تشيز كيك القرع بالبهارات … Spiced pumpkin cheesecake

السلام عليكم جميعا …

.

الوصفه هذي سألتني عليها وحده في الآسك من فتره و كتبتها هناك و بعد ما كتبت الوصفه قلت خل أصورها أفضل كونها من جد تستاهل خصوصا لهذا الوقت من السنة اللي تنعدم فيه تقريبا الفواكه . مره وحده راح أشرح شوي عن التشيز كيك واحد من ألذ الحلويات بالنسبه لي عشان كذا كثير من المباديء اللي هنا طبقوها على أي تشيز كيك إن شاء الله وبتطلعون دايما بتشيز كيك رهيب .

.

القرع واحد من الخضار اللي  مظلومه كثير كونه يمشي مع أشياء كثير سواء كانت حلويات أو موالح . وحده من النكهات اللي دايما تلاقونها موجوده مع بعض هي القرع مع البهارات كونها تطلع وتبين نكهة القرع الحقيقيه. كثير مننا تعود إنه يكره القرع و السبب أشوف إنه يرجع لإستخدامنا الخاطيء له في الوصفات الشعبيه اللي غالبا ما تستخدم القرع مسلوق ويكون مكانه كأنه غلط في الطبخه وهذا خلا ناس كثير يكرهون القرع بدون ما يعطونه فرصه.

.

التشيز كيك وحده من أكثر الحلويات المنتشره ولكن للأسف نادرا ما نذوق تشيز كيك مضبوط . من زمان كنت أشوف إن المحل الوحيد اللي ممكن آكل عنده تشيز كيك كان تشيز كيك فاكتوري وكان هدفي وحلم حياتي إني أسوي تشيز كيك زي حقهم . بس بعد ما بديت أسوي تشيز كيك في البيت ورجعت ذقت حقهم عرفت إن حقهم ما يسوى ريال وأي شخص يقدر يسوي ألذ منه بمليون مره . صراحة فقدت الأمل أصلا إني أذوق تشيز كيك زي الناس في محل أو في قهوه كلهم نفس الشي يايكون رغوه وأقرب للموس من التشيز كيك ، أو يجيك ناشف أو يجيك محبب . التشيز كيك المفروض يكون ناااااعم ناعم ناعم وكريمي ولين. و القشره المفروض ماتكون حجر ما تنكسر بالشوكه ولا تكون لينه لدرجة إنكم ما تحسون فيها في الفم وتلغي الهدف من وجودها من الأساس ، هي مفروض تقرمش على خفيف بحيث إنها تبان كشي يقرمش ضد الحشوه الكريمية . التغطيه (إن وجدت) أو النكهة حقت التشيز كيك في مثل حالتنا مفروض تكون واضحه وباينه وطعمها ممتاز .

.
الطريقة اللي راح أستخدمها هنا راح أستخدم حمام مائي . اللي يقول إنه ما يفرق يكون غلطان . البيض هو اللي بيثقل التشيز كيك و البيض حساس جددددا للحراره كونه مليان بروتين و البروتين حساس للحراره . لو الحراره زادت عن حدها اللي بيصير هو إن البروتين بيضغط على بعض بقوه ويقرب من بعض ويتشابك ويكون لنا حبوب كبيره اللي تكون السبب في التشيز كيك اللي محبب أو موب ناعم . غير كذا كون البروتين يضغط على بعض هذا يدفع المويه برا التشيز كيك وهذا يعني تشيز كيك ناشف أكثر .شي ثاني البروتين مع الحراره يتصلب هذا بالضبط اللي يحول البيضه السايله إلى بيضه جامده من يوم تلمس الحراه. كون البروتين حق البيض في التشيز كيك بعد ممكن يتصلب أكثر من اللازم هذا بعد بيخلي التشيز كيك ناشف وقاسي . عشان كذا مهم جدا إن الحراره تكون منظمه وإننا ما نطبخ هذا البروتين أكثر من اللازم عشان ما نطلع بتشيز كيك ناشف وقاسي.

.

الحمام المائي يرتب وينظم دخول الحراره للأكل اللي محطوط فيه بحيث يوفر حراره متساويه من كل النواحي وبنفس الوقت حراره هاديه. كون الحراره هاديه وكونها تجي من كل مكان هذا يمنع التشققات اللي تشوفونها على وجه كثير من التشيز كيكات. إذا الحمام المائي يخلي التشيز كيك رطب ، لين ، ناعم ، وبعد يمنعه يتشقق .. فيه سبب مقنع أكثر من كذا ؟

.

المشكله في التشيز كيك و الحمام المائي هو إن الصينيه حقت التشيز كيك تهرب مويه كيف نحطها في الحمام المائي بدون ما نحولها لشوربه تشيز كيك ؟ أفضل حل لقيته هو إستخدام صينيه كيك عميقه بنفس القطر حق صينيه التشيز كيك . الحل هذا بنزله إن شاء الله بعدين في وصفه ثانية للتشيز كيك بس حاليا خلونا في الصينية العاديه كونها هي أكثر شي منتشر في البيوت .

.

خطوات نجاح أي تشيز كيك :

.

هذي الخطوات مهمة في أي تشيز كيك فرن (يعني أساسه كسترد يعني فيه بيض). سووها مع أي تشيز كيك من هذي النوعية وبتطلعون دايما بشي رهيب.

.

١ـ أستخدموا مكونات على حرارة الغرفة.

٢ـ أخلطوا التشيز كيك على أقل سرعه وإلين تنخلط المقادير بس ولا دقيقه أكثر عشان ما ندخل هواء كثير في الخليط.

٣ـ أطبخوا التشيز كيك في حمام مائي.

٤ـ لا تطبخون التشيز كيك أطول من اللازم !!

٥ـ بردوا التشيز كيك وقت كافي قبل التقطيع و الأكل.

.

أول شي بنسوي خلطة القرع (بيورييه القرع)

.

المقادير :

.

حبة قرع ويفضل لو كان قرع أمريكي .

.

الطريقة :

.

نسخن الفرن على ٤٢٥ ، بعدين نقطع القرع بالنص بالطول ونشيل البذور و الألياف اللي داخل ونحط القرع على صينيه فرن بس نخلي الجهة اللي قطعناها تحت . ندخل القرع الفرن حوالي نص ساعة إلى ساعة إلا ربع أو إلين ما تدخل سكين للقرع وتطلع بسهووووله يصير القرع لييييين مره .

.

نطلع القرع ونخليه يبرد إلين يصير سهل علينا نشيله. بعدين نشيل اللحم منه بملعقة ونحطها في خلاط مولينكس ونطحنها زيييين إلين تصير خليط ناعم .

.

تشيز كيك

/

كذا بيصير شكلها بعد ما تطلع من الفرن .

/

تشيز كيك قرع


.

خلطه القرع هذي تستخدم في أشياء كثير مثل حشوات رافيولي أو إضافه لريزوتو أو حتى شوربة قرع عشان كذا أحفظوا الزايد في الفريزر بيعيش شهور.

.

التشيز كيك :

.

المقادير :

.

حوالي ٢٢٠ جرام بسكوت . أنا أستخدمت هنا للتغير جنجر سنابس ginger snaps (الطريقة موجودة في صفحة الوصفات) هو نوع من أنواع البسكوت بطعم الزنجبيل وكان رهيييب هنا . الوزن هنا للتقدير بس قدروا الكميه من الوزن المكتوب عالعلبه .

نص أصبع زبده مذوبه

٩٠٠ جرام جبن فيلادلفيا كامل الدسم على حرارة الغرفه . أي جبن كريمي ثاني ينفع مثل الكيري بس أنصح بالفيلادلفيا راح تعطي أفضل طعم هنا . وشلون تعرفون ٩٠٠ جرام ؟ الوزن مكتوب عالعلبه قدروا الكميه .مهم جدددا هنا إن الجبن يكون كامل الدسم . دسم أكثر يعني نعومه أكثر وحبوب أقل .

كوب وثلث سكر أبيض

عود فانيلا .. أو ملعقة كبيره فانيلا سايله أو ملعقة صغيره تقريبا فانيلا بودره

ملعقة صغيره زنجبيل مطحون

١/٨ ملعقة صغيره قرنفل مطحون

ملعقتين صغار قرفه

١/٤ ملعقة صغيره جوزه طيب

رشه ملح

حوالي ٤٠٠ جرام من خليط القرع اللي فوق . ٤٠٠ جرام تجي تقريبا كوب + ثلاث أرباع كوب .

٤ بيضات كامله + صفار بيضه  كلهم على حراره الغرفه .

.

* في حال حبيتوا تسوون تشيز كيك سادة يعني بالفراولة أو غيره سووا هذي التبديلات على نفس الطريقة بالضبط. أستخدموا بسكوت دايجستف بدال الجنجر سنابس. أتركوا الزنجبيل و القرفة وجوزة الطيب و القرنفل و خليط القرع. زيدوا ٤٠٠ ملل (تقريبا علبه) ساور كريم عالخليط أخلطوها مع الجبن.

.

الطريقة :

.

أول شي نسخن الفرن على 350 فهرنهايت .

.

نحط البسكوت في كيس ونكسره بيدنا أو بالفراده حقت العجين لو نبي . اللي يبي يحطه في الخلاط يحطه عادي بس أنا أحب يكون فيه قطع بسكوت كبيره داخل التشيز كيك . بعد ما نكسره نصب عليه الزبدة الذايبة ونخلطه معهم زين.

.

تشيز كيك

.

الحين نرش الصينية حقت التشيز كيك ببخاخ زيت في كل النواحي ، أو لو ماعندك أدهنوا الصينية بزبده عادي . بعدين نغطي القاعده بطبقه من ورق الزبده أو اللي يسمونه parchment paper اللي يجي لونه أبيض .

.

الحين نرص القاعده بطبقه البسكوت ولو تبون رصوا الجوانب بعد بس أشوفها غير ضرورية.

.

لاحظوا كيف فيه قطع كبيره . هذي بتصير قطع تقرمش بعدين في التشيز كيك

.

ندخل القاعده الفرن إلين تبدأ تتحمر شوي يمكن ٥ – ٧ دقايق . الهدف هنا هو إننا نخلي القشره تنطبخ وتصير مقرمشه معنا . لو ما سوينا كذا إحتمال تشرب من الرطوبه حقت الحشوه بعدين وتصير لينه . نفس الحركه سويناها لو تذكرون في التارت .

.

الحين نجي للتأمين . كيف نخلي صينية التشيز كيك ما يدخلها مويه ؟ الحل هو إننا نغطي الأطراف بقصدير .

.

/

نجيب قصدير من أقوى نوع أو اللي مكتوب عليه heavy duty مهم جدا إنه يكون قوي كون القصدير النحيف بيتقطع بسهوله . مويه في التشيز كيك بتخرب كل شغلك عالفاضي عشان كذا تأكدوا إنكم تستخدمون أحسن قصدير . نحط الصينيه وسط القصدير زي الصوره بعدين نغلف الأطراف عليها بس شوي شوي عشان لا يتقطع علينا . نعيد نفس الحركه أكثر من مره يمكن ٣ مرات تكفي يعني ٣ طبقات قصدير .

.

الحين نجيب مطاط من نوعيه قويه (خطوة إختيارية) . ونربطه على التشيز كيك عشان يمسك أطراف القصدير . كون المطاط بيمسك الأطراف هذا بيمنع أو عالأقل يقلل التكثف اللي يتكون أحيانا داخل القصدير .

.

.

المطاط ماراح يتعرض لحرارة عاليه مره كونه بيكون أصلا مغطى بمويه من الحمام المائي .

.

الحين نجي للحشوة :

.

أهم شي هنا إننا نخلط المكونات أقل قدر من الإمكان . السبب هو إننا ما نبغى ندخل فيه هوا كثير . الهوا في التشيز كيك يخليه خفيف مره زي الموس بس موب هذا اللي أنا أدور عليه أنا أبغى شي ناعم موب خفيف . السبب الثاني هو إن الهوا ينفش في الفرن وينفش معه التشيز كيك . التشيز كيك ما يتحمل لو نفش مصيره يطيح ويتشقق . عشان كذا مهم إن الخلط يكون أقل شي نقدر عليه . عشان نقدر نخلط كذا لازم كل المكونات تكون على حرارة الغرفه . طلعوا الأغراض من الثلاجه قبلها ب ٣ ، ٤ أو ٥ ساعات بعد أهم شي هذي الخطوه لا تستهينون فيها أبدا .

.

نبدأ أول شي في خلاط يدوي أو خلاط كبير كلهم ينفعون عادي . نحط الجبن ونخلطه على أقل سرعه شوي بس إلين يلين شوي بعدين نحط السكر و الفانيلا و الملح ونخلط شوي بس بعدين نحط البهارات و خليط القرع . نخلط المقادير إلين تبدأ تكون خليط متجانس شوي الحين نبدأ نحط البيض بيضه بيضه إلين يدخل كله وأفضل لو نمسح جوانب الخلاط وقاعه كل شوي عشان نتأكد إن كل شي مخلوط . أول ما نلاقي إن كل شي أنخلط نوقف مايحتاج نخلط أكثر من اللازم تذكروا .

.

نصب الخليط في القشره حقت التشيز كيك بعد ما تكون بردت .

.

.

الحين نجهز الحمام المائى . نجيب صينيه كبيره مره، كافيه إنها تكفي صينية التشيز كيك حقتنا . بعدين نحط منشفه تحت ونحط فوقها التشيز كيك . المنشفه بتمنع التشيز كيك يتحرك في الصينيه غير إنها بتعطي عزل إضافي . نحط الصينيه و المنشفه وفوقها التشيز كيك في الفرن بعدين نبدأ نصب مويه مغليه أو مره حاره شوي شوي على المنشفه ونتأكد إنها ما تصب في التشيز كيك . نزيد مويه إلين يوصل إرتفاع المويه نص إلى ٣/٤ الإتفاع حق التشيز كيك .

.


.

الحين نجي للسؤال الكبير . كم نخليه في الفرن ؟ هذا واحد من أكثر الأشياء اللي بتأثر في التشيز كيك كونه هو اللي بيحكم التشيز كيك مطبوخ أكثر من اللازم أو لأ . اللي قد سوا كريم بروليه أو كريم كاراميل يعرف إننا لازم نطلع الكسترد وهو شوي لين في الفرن . يعني إذا هزيناه يهتز وسط الكسترد بس بس الأطراف تكون شوي جامده .

.
عشان كذا أفضل حل هو إننا نهز التشيز كيك هنا ونراقب كيف يتحرك . المفروض الدائره اللي من حوالي ٣ إنش من الوسط تهز هزه خفيفه و الأطراف مفروض تكون شبه جامده . غير كذا نلمس الوسط حق التشيز كيك بيدنا ونشوف كيف ملمسه هل هو مره لين ولا شوي بس ؟ المفروض ما يكون لين مره ويتلصق يكون شوي جامد بس وما يلصق عاليد. عموما هو راح ياخذ يمكن من ٥٠ دقيقه إلى ساعة وربع .

.

نطلع التشيز كيك من الفرن ونحطه على شبك تبريد لو كان عندكم . نخليه يمكن ٥ دقايق كذا يبرد بعدين نشيل المطاط و القصدير . لو لقيتوا شوي رطوبه هنا موب مشكله عادي التشيز كيك بيكون ممتاز إن شاء الله لا تخافون هذي غالبا موي تكثفت داخل القصدير. الحين بسكين صغير نفك الأطراف حقت التشيز كيك من القالب عشان ما تتقطع علينا وهي تبرد . كوننا طبخنا التشيز كيك في حمام مائي ما يحتاج نبردها شوي شوي زي ما نسوي لو ما طبخناه في حمام مائي. نخليه يبرد برا الثلاجه يمكن نص ساعة كذا بعدين ندخلها الفرن عشان تبرد، ٤ ساعات هو يمكن أقل وقت تبريد بس أفضل بكثييييير لو تخلونها تبرد لثاني يوم . التشيز كيك بيعيش بدون ما يتغير طعمه يومين أو ثلاثه في الثلاجه.

.

نطلع التشيز كيك من الثلاجه ونشيل الجوانب حقته :

.

تشيز كيك بالقرع

تشيز كيك قرع

.

الحين عشان التقطيع :

.

إذا تبون تقطعون التشيز كيك وتطلعون بقطع نظيفه مره أفضل حل تستخدمون سكين حاد ونحيف وطويل . تنقعون السكين في مويه حاره ثواني بعدين تمسحونها بمنديل بعدين تقطعون . بعدين تعيدون العمليه كل مره قبل لمس الكيكه . يعني تنقعونها ثواني ، تمسحون السكين ، بعدين تقطعون هذا بيطلع قطع جدا نظيفه لو يهمكم الشكل طبعا .

.

تشيز كيك قرع

لاحظوا كيف أماكن القطع نظيييييييفه .

.

خيارات التقديم و التزيين كثيره لهذا التشيز كيك .. صوص شكولاته مثلا ، مكسرات محمصه أو حتى مسويه ملبس حلوه بتطلع ، أي فواكه لها علاقه بالحلى هذا بعد حلوه مثلا ممكن زنجبيل ملبس أو ممكن مثلا قرع ملبس بيطلع حلو بعد . الويب كريم بأنواعه بعد بيطلع حلو .. الكراميل أو صوص الكراميل بعد حلو(في صفحة الوصفات) .. أنا عشان التغيير قدمتها مع صوص بلسمك والنتيجة رهيييييييييييييبه . قدمت معها بعد ويب كريم و برالاين باللوز ، كان ودي لو إني ما رميت البذور حقت القرع كان أحلى بكثيييير لو كنت حمصتها بعدين سويتها في البرالاين بدال اللوز .

.

تشيز كيك قرع ، ويب كريب

pumpkin cheesecake

 

قرع تشيز كيك مع بهارات

.



Follow TopChefCooks on Twitter

178 comments

2 pings

Skip to comment form

    • شروق on 13 July, 2012 at 12:38 am
    • Reply

    رائع جدا، التشيز كيك ما ينفع الا بالبيض؟ يعني مانقدر نسويه بالجيلاتين الساده؟ اذا كنا مستعجلين مثلا ومانبي نحطه بالفرن.. ثانكيو

    1. ينفع بس موب في قاموسي الصراحة. ماخلصت الحلويات موب شرط تشيز كيك اذا مستعجله

    • fno on 11 July, 2012 at 8:02 am
    • Reply

    ألذ تشيز كيك ذقته بحياتي باليابان وكان بالمشمش
    وطعمه جداً مختلف عن التشيز كيك المعتاد الي بالبلو بيري والفراوله قبل كنت احسب ان التشيز كيك ما يمشي الا مع هالنكهتين
    وكانوا مسوينه زي طريقة الكيكة الرخاميه ومخلين بعض المشمش قطع ما انطحن وكان يذوب بالفم من لذاذته
    مع اني ذايقته قبل سنه الا ان طعمه للحين بفمي
    ينفع اسوي نفس وصفتك بس بالمشمش
    يعطيك العافيه

    1. التشيز كيك ماله علاقه هو بالمشمش أو غيره ، نجاح التشيز كيك هو في طريقة الطبخ هذا أهم شي ، لاتطبخنيه أكثر من اللازم و لاتدخلين هواء زايد فيه ، أطبخيه بحمام مائي وبرديه بشكل كامل و أضمنلك أي نكهة بتطلع حلوة. للأسف مع العلم إن الموضوع سهل ما أتذكر في حياتي ذقت تشيز كيك زي الناس برا البيت إلا في محل واحد بس !!! وجربت كثيييييير !! بس محل واحد بس هو اللي سوا شي زي اللي في البيت.

      يمديك أكيد ، شيلي القرع و البهارات وحطي بداله شوي مشمشم مطحون وغطي التشيز كيك بكوليه مشمشم أو مربى مشمش.

  1. مشاء اللة عليك من جد مبددددع
    اني جربت طريقتين من عندك وكانوا وااااو وعجبوا الكل
    بس هنا حبيت اسأل البسكوت خلطت معة زبده او لا لان كأني لاحظت انة بدون
    واذا بدون كيف كانت النتيجة هل هو متماسك او يتفتت بسرعة

    1. وش تشوفين في الوصفة ؟ إذا فيه زبدة يعني معها زبدة ما أحط شي غير اللي أسوي

    • Anonymous on 19 April, 2012 at 10:05 pm
    • Reply

    ابغي اعرف ضروري الان بسويه

    1. بالنظر احسبي في هذا الموضوع ما تحتاجين قياسات دقيقة المهم تكون طبقة بسكوت نحيفة

    • Anonymous on 19 April, 2012 at 10:03 pm
    • Reply

    شكله يحمس الواحد انو يجرب بس ابعرف كم كمية البسكوت لازم تكون والزبدة علي صينية قطرها 22 سم

    • Anonymous on 22 February, 2012 at 5:34 am
    • Reply

    وش ممكن احط فوق التشيز كيك ؟؟ تشيري او بلو بيري ؟؟ ممكن احط المكونات نفسها بس بدون النكهات الزنجبيل و القرنفل ؟ لان ماحبها ,,, عرفت قصدي ؟؟ عشان لو بحط فوقها بلو بيري او تشيري يطلع الطعم متناسق ,,,

    1. مين قال التشيز كيك لازم فوقه شي ؟ إذا بتسوين تشيز كيك قرع أنصحك تجربين هذي زي ماقلت بالضبط قبل تسوين أي تغير. البهارات مع القرع تسوي فرق كبيييييير صدقيني جربيها كذا قبل تسوين أي تغير.

    • ابتهال on 16 February, 2012 at 9:40 am
    • Reply

    تسلم يديك، ومشكوره على دقه الوصف . لقد ساعدني ذلك في معرفه اسباب تشقق الشيك كيك

    • Sea Wave on 21 December, 2011 at 3:39 pm
    • Reply

    ما شاء الله
    الوصفة و طريقة الشرح
    و الصورة راااائعة

    تسلم ايديك
    من يومين بس ذقته من يد واحدة امريكية
    و دورت عليها بالمواقع الاجنبية
    و كلهم يستخدمون قرع معلب
    انا عارفة ان القرع له فايدة ككبيرة
    عشان كذا كنت ابغى وصفة فيها قرع فريش
    والحمدلله لقيتها هنا

    بالنسبة لتقطيع التشيز كيك
    استخدمي خيط الاسنان النحيف جداا تطلع لك القطع مرة مرتبه
    جربي و ما حتندمي

    1. هلا والله …

      قبل كل شي أنا ولد منيب بنت ….

      أنتي تشوفين القطع موب مرتبه هنا ؟ إذا كذا أجل ليش أستخدم شي ماله إلا إستخدام واحد في المطبخ ؟ مدام النتيجة وحده وعندي سكين خلاص أحس ؟

        • Sea Wave on 23 December, 2011 at 6:43 pm
        • Reply

        تسلم ايدك يا توب شيف
        صح كلامك اذا عندك سكين حاد
        بس كنت بطرح المعلومة للكل عشان يستفيد
        وشكرا

    • الاوتار on 16 December, 2011 at 3:38 pm
    • Reply

    مشكور على الوصفة الرائعة
    تصدق افضل التشيز كيك الي تسوية اختي على الي برا ومو غريبة تشيز كيك قرع لان القرع فيه حلاوة واتوقع الجزر ينفع
    وبسألك عن الي بالصورة البرالين هو نفسه الي يسمى قرص العسل

    1. تقريبا هو نفسه الفرق إن قرص العسل منفوش ومليان فراغات عكس هذا.

  2. روعة تسلم اناملك بجد

    • فوز on 26 July, 2011 at 7:30 am
    • Reply

    السلام عليكم ورحمة الله و بركاته

    إن شاء الله ناويه اجربها بس أقدر استغني عن ورق الزبده ولا لا ؟!
    يعطيك العافيه

    1. ورق الزبده عشان يسهل عليك تشيلينها من القالب بعدين، تقدرين ما تحطينه وتقدمينها في نفس القالب أو تستخدمين قصدير قوي.

    • الخُزامى on 9 July, 2011 at 2:48 am
    • Reply

    باين لذيذ ,,,

    راح اطبقه بحول الله ولكن راح استغني عن القرنفل وجوز الطيب !

    حابه احاكي طريقتك في التقديم … بحثنت عن طريقتك في برالاين اللوز ماحصلتها ..

    ياليت تساعدني فيها …

    بالنسب لصوص البلسمك يصلح مع اي بلسمك

    شاكره لك …

    1. عالأقل أول مره جربيه زي ماقلت بعدين شوفي إذا بتغيرين ولا لأ.

      دوري تحت في الردود سألتني وحده عن البرالاين وحطيتلها الرابط حق الموضوع.

      أي بلسمك يصلح

        • الخُزامى on 11 July, 2011 at 4:06 am
        • Reply

        اعتذر بحثت عن كلمه برالاين مو مكسرات !

        سويتها وللاسف تقطعت علي القشره !

        ودي اغطيها عشان الشكل !

        ايش التغطيه المناسبه

        شاكره لك ..

          • Top Chef on 11 July, 2011 at 1:12 pm
            Author

          ويب كريم أو كريمة مخفوقه أحسن شي هنا بتغطي الشكل . أو يمديك تقطعين الكيكة وبكذا ما يبان الخراب.

    • ام فهد on 19 June, 2011 at 7:53 pm
    • Reply

    يعني تتوقع ان الزنجبيل الطازج هو اللي اثر بالطعم؟؟؟
    خلاص انشالله مرة ثايه راح اسويها بالبودرة وابلغك بالنتيجه.
    لاني ثلجت باقي القرع للمرة الثانيه
    🙂
    زين شيف شفت صورة التطبيييق؟

    • ام فهد on 19 June, 2011 at 6:46 pm
    • Reply

    شيف عندي ملاحظه:
    مع اني انا اللي خلطت المقادير بس لما ذقتها بعد ماخلص احس نكهتا غريبه
    بس حلوه… يمكن طعم النجبيل مأثر فيها لاني حطيت زنجبيل طازج وما كان عندي جوزة الطيب .
    وسؤال : الحين اقدر اثلج هالتشيز كيك بعلب
    عشان متى مابغيت طلعت منه شوي؟؟؟

    1. المقادير اللي حاط بإستخدام زنجبيل بودره ، الزنجبيل الطازج ما يعتبر بديل له و هو ما يعتبر بديل للطازج كل واحد له طعم مختلف وقوه غير.

      تقدرين تفرزين التشيز كيك بعد ما تلفينه بنايلون زيييين وتخلين يذوب طول الليل في الثلاجه لا تحطينه في الفرن أو المايكروييف ما ينفع. الطعم راح يختلف طبعا عنه وهو توه طازج.

    • ام فهد on 15 June, 2011 at 5:13 am
    • Reply

    السلام
    شيف انا كنت ابي اسويها الحين بس توقفت عند نقطه
    اذا بقسم المقدار للنص يعني 450 جم جبن فيلادلفيا شلون على البيض احط بيضتين ونص صفار بيضه؟؟
    ودوت حاولت احصل جوزة الطيب مالقيت … اقدر استغنى عنها والا لازم احط لها شي بديل؟
    وترني سوري ماعرفت نوعية القوالب اللى وصفتها لي:)

    1. إقسمي البيض ليش لأ .. أو تقدرين تحطين بيضتين وصفار .

      جوزة الطيب مجرد بهار إذا ما عندك لا تحطينه

      القوالب مدري كيف أوصفها تجي زي حقت المفن بس الأكواب اللي داخلها تطلع لحالها ؟

    • ام فهد on 14 June, 2011 at 3:41 pm
    • Reply

    يعني تتوقع الجزريحتاج اشويه نفس القرع والا احطه على طول بالمكينه اللي تفرم الطعام؟
    تصدق شيف انا جبتلي شيف مطاعم معروف يدربني على الميني تشيز كيك بالبيت لاني احب اسويه واوديه للناس اذا بقهويهم 🙂
    نفس الطريقه اللي وصفتها لك ميني بس للاسف حرام عليه فلوسه كل سلبيات التشيز كيك اللي انت ذكرتها كانت موجوده عندي : ناشف ومتشقق وماعجبني
    بس بظل احاول بالميني وانا اقول يمكن الشي الوحيد اللي ناقص عندي الحمام المائي.

    1. الجزر يحتاج شوي أو طبخ بالبخار أهم شي لازم ينطبخ عشان ينهرس بسهولة.

      ما تحتاجين شيف ولا شي كل المعلومات اللي تبين موجوده في الموضوع. تقدرين تسوين الميني بصحون سوفليه وتحطينها بحماما مائي أو تقدرين تسوينها بصحون المفن اللي تجي مفرقه عن بعض مدري إذا عرفتيها ؟

    • ام فهد on 14 June, 2011 at 3:19 pm
    • Reply

    السلام سيف
    اذا بغيت اسوي التشيز كيك القرع بس داخل قولب الكب كيك بحجم ميني داخل الوراق حقت الكب كيك
    ابيها تكون اسهل للتقديم في العزايم…اوكيه؟
    اشلون احطها في حمام مائي وكم تقريبا اخليها بافرن؟
    هل اقدر استبدل القرع بالجز؟؟
    يعني نكهه جديده؟؟؟
    شرايك؟

    1. وعليكم السلام ..

      ما أعرف الصراحة .. ماقد سويتها إلا في قوالب كبيره زي كذا و أقطعها.

      تقدرين تستخدمين جزر بس بعد ما تطحنينيه صفيه لأن الجزر يكون فيه ليف أحيانا .. و جربيها قبل بالقرع قبل تسوين أي تبديل.

    • lolo on 29 May, 2011 at 11:21 am
    • Reply

    السلام عليكم
    ممكن توصف الطعم بكل طبخه تطبخها..
    يعني زي تشيز كيك القرع بالبهاراااات مو قادره اتخيل الطعم هل هو مالح او حالي ؟
    ولو بتحط عليه تغطيه رايك ايش اللي ينفع؟

    1. طعمها تشيز كيك بس بنكهة قرع وبهارات خفيفه .. جربيها مافيه أي شخص في العالم يقدر يذوق من الكلام ..

      ليش تغطيه ؟ الناس يحطون تغطيه عالأكل عشان تحسن الطعم أو تبينه أو تعطي شكل أو طعم جديد ، ما أعتقد فيه هدف نحط تغطيه هنا ؟ التشيز كيك طعمه قوي وواضح ومعقد و شكله حلو و حالي بشكل كافي مانبيه أحلى من كذا

    • مها on 22 May, 2011 at 1:12 am
    • Reply

    كيف اعرف افضل نوعيه بلسميك
    او وين القاه بجدة

    1. البلسمك الأصلي غالي .. ومحد حاطه على سلطة في الغالب !! … البلسمك عشان يصير بلسمك لازم يتعتق في صناديق خشب ١٠ سنوات عالأقل وتوصل ١٠٠ سنة تعتيق أحيانا.. هذا يكون سعره تقريبا ٨٠ ريال وفوق .. لقيته أتذكر في محل إسمه ريحان جنب تشيليز تابع لمطعم الفيلاجيو بس مدري إذا لسا عندهم ولا لأ .

      إذا تقصدين حق السوبرماركت هذا موب بلسمك بلسمك هذا خل عنب عادي مثقل شوي ومضاف عليه قشر عنب ومواد ثانية تعطية طعم قريب من الأصلي. فيه أنواع تجي في النص يعني رخيصة شوي وفي نفس الوقت ميب بلسمك بلسمك وهذي هي أفضل شي للإستخدام اليومي .. هذي الأنواع تعرفينها بإنه يكون مكتوب عليها إنها معتقة غالبا يعني بتلاقين مكتوب مثلا معتق ٥ سنوات أو كذا …

    • تيماء on 17 May, 2011 at 6:26 am
    • Reply

    يسلموووو شيف …
    سؤال … دحين اللي تحت التشيز كيك هوه خل البلسميك ولا النقاط اللي جنبه؟؟

    وسؤال برا الموضوع
    كل انواع خل البلسميك آمنه؟ يعني اي نوع اشتريه اكون مطمنه انو مافيه واين او شئ محرم؟

    1. الإثنين كلهم نفس الصوص ..

      كل أنواع البلسمك آمنة هو خل ؟ وش بيحطون معه ؟

    • ABEER on 10 April, 2011 at 3:01 pm
    • Reply

    انا ما اثق لا بالفرن ولا بالصينيه صراحه ههههه

    فا ايش رايك اجيب صينيه دائريه واحط جواها قصدير كذا اضمن لي

    لاحظ استخدمنا ٩٠٠ جرام جبنه حرام اخسرهم خخخخخ ،

    بعدين اذا دخلت التشيز كيك الفرن بيكون اساسا حار بعد تحمير البسكت، عادي؟

    1. اللي أسويه حطيته في الموضوع بالصور .. صراحة مدري وش أقولك ؟ بس كل اللي عندي قلته في الموضوع منيب قاعد أشرح ليش كل شي سويته من جديد . سويي اللي ترتاحين له .

    • ABEER on 10 April, 2011 at 11:39 am
    • Reply

    هذا الكلام مافهمته

    {أفضل حل لقيته هو إستخدام صينيه كيك عميقه بنفس القطر حق صينيه التشيز كيك . الحل هذا بنزله إن شاء الله بعدين في وصفه ثانيه للتشيز كيك بس حاليا خلونا في الصينية العاديه كونها هي أكثر شي منتشر في البيوت }
    مع اني ملاحظه انك مستخدم صينية تشيز كيك

    وكمتن هنا مافهمت
    { ونحط القرع على صينيه فرن بس نخلي الجهة اللي قطعناها تحت }
    هل اشغل الفرن من تحت ؟؟ وهل اشغل المروحه شوي بعدين اطفيها بحيث توزع الحراره؟

    انا متاكده ان طعمه بيعجبني كثير لان المكونات هذي احبها مع بعض 🙂

    1. ههههه أصبري للموضوع الثاني حق التشيز كيك وبتفهمينه وبالصور إن شاء الله بعد . حاليا سويي زي ماسويت هنا .

      ياحبك للفرن من فوق هههه .. أعطيك إياها قاعده طول ما أنتي في هذي المدونه ! كلمة فرن يعني من تحت بس !!! إلا إذا قلت شغلي الفرن من فوق و إلا الحين ما كتبت ولا شي يتطلب تشغيل الفرن من فوق .

      القرع أقطعيه نصين بالطول وحطيه عالصينيه بس خلي الجزأ المقطوع مواجه للصينية يعني على تحت و الجزأ اللي لسا فيه الجلد على فوق .. لا تشغلين ولا تطفين ولا شي سويه زي ماقلت بالضبط ..

    • ABEER on 10 April, 2011 at 10:53 am
    • Reply

    ماشا الله بيرفكت
    يعطيك العافيه

    • عفاف on 12 February, 2011 at 4:29 am
    • Reply

    ما شاء الله
    شغل مضبوط
    بس لو حبيت اسلق القرع بدال ما اشويه يصلح؟
    وبعدين ما تحس ان الجبن كثييير 900 جم؟

    1. سلق القرع يضيع كثير من الطعم في المويه وبعد بيخلي القرع يشرب كثير مويه وهذا يمكن يأثر في التشيز كيك .

      الفرن بالعكس ، بيبخر مويه وهذا بيركز طعم القرع أكثر و أكثر غير إنه في الفرن يصير فيه تحمير وبيتغير طعم القرع لطعم ثاني.

      ٩٠٠ جم موب كثير أبدا … إلا إذا تبين التشيز كيك يصير نحيف مره ..

    • *سفونه الليمونه* on 22 January, 2011 at 3:54 pm
    • Reply

    شكل رهيب تبارك الله
    بس الطعم الله اعلم>>>>من الجماعه الظالمه :/
    على اني ماكرهه مثل ايام الطفوله تطورت بعد ماكبرت وحتى مره سويتها شربه وكان معاها اضافة زبادي …كان الطعم لابأس بالنسبه لي وزوجي اعجبته مره.. بس اتوقع لو حاطه كريمة خفق افضل وانت شرايك؟

    1. شكلك تقصدين القرع في الكلام ؟

      فعلا ظالمه القرع مره …. ما يحتاج لا كريمة ولا زبادي ؟ موب هذي هي اللي تسوي الشوربة .. الكريمة في الشوربات تستخدم عشان تعطي دسم أعلى وتخلي الشوربة أنعم بس .. الزبادي يستخدم للطعم بس . طعم الزبادي مع القرع في الشوربه ما أشوف له لزمه .

    • سلوى on 1 January, 2011 at 4:01 pm
    • Reply

    السلام عليكم
    وصفتك كتير حلوه وان شاء الله جاري التطبيق
    بس عندي سؤال البسكوت دائما يجي عندي لين ورطب مايقرمش وكمان بعض الاحيان طعمه مويه
    مع اني اتاكد انو مادخل مويه في الصينيه ولافتها بالقصدير مزبوط
    وشكرا لك

    1. وعليكم السلام …

      أنا وقفت أستخدم الصينية هذي عموما بس كونها متوفره عند الجميع نزلت الطريقة فيها وراح أنزل وصفه ثانيه بس بصينية ثانيه ماتدخل أي نقطه مويه .

      هو المشكله في الحمام المائي إن المويه راح تتكثف داخل القصدير مهما سويتي . لو البسكوت كان رطب أكثر من اللازم في الغالب السبب موب شرط الحمام المائي . ممكن تكون الحشوه رطبه أكثر من اللازم . أو البسكوت المستخدم من النوع اللي يشرب الرطوبه من الأشياء اللي حولينه . عشان كذا نخبز البسكوت لحاله في الفرن قبل نصب الحشوه .

    • زي السكر on 1 January, 2011 at 12:01 am
    • Reply

    روعه ماشاااااااااء الله تسلم الايادي

    1. الله يسلمك … حياك

    • Anonymous on 13 December, 2010 at 10:55 am
    • Reply

    ماشاء الله تبارك الله عليك
    …. ابداع مابعده إبداع … وألفففف شُكر على ” الصور “…..<< تختصر الكثير من الشرح … مع انك تبارك الرحمن ماتقصّر بالشرح .

    1. هلا والله …

      حياك وش دعوه ما سوينا شي …

    • Anonymous on 10 December, 2010 at 11:10 pm
    • Reply

    بالله وشلون سويت حركة السكر والمكسرات ابي بالضبط الله يخليك ووشلون قصيتها متساويه بدون ماتتكسر ولك جزيل الشكر

    1. هلا والله …

      السكر هذا أسهل شي بالدنيا ترى …

      تلاقين الطريقة في موضوعي حق الإسكريم .

      عشان تسوين الشكل كذا أول ما تصبين السكر في الصينيه بيكون شوي لين علطول تكونين مجهزة سكين صغيره أو أفضل بعد قطاعة بيتزا مدهونه زيت . قصيها والسكر حار وبتلاقينها تمشي معك وتنقص بسهوووووله .. بعدين خليها إلين تبرد تماما وبتلاقين إن الشكل اللي سويتيه طلع من القالب بالشكل اللي تبين . يمديك لو تبين ولو إني ما أنصح صراحة كونها خطوة شوي معقده بس يمديك تسوين أشكال ثلاثية أبعاد يعني تلفين ورق الزبده مثلا بحيث يطلعلك قوس أو كذا .

    • Anonymous on 10 December, 2010 at 4:16 am
    • Reply

    اسمح لي اقولك انك مجنووووووووووووون ووصفاتك اجرااااااااااااااااااام
    قسما تسطلت عند الصور
    مااقول غير الله يحفظك وياقاك
    انت وبدون مباااالغه مبدددع ماشاء الله
    وجاري التطبيق بأذن الله

    1. هلا والله …

      مشكوره على كلامك ومرورك .. حياك .. وقوليلنا عالنتيجه كيف تطلع بعدين .

    • Anonymous on 9 December, 2010 at 6:21 am
    • Reply

    كم يوم ممكن يقعد التشيز بالثلاجة بدون مايتغير طعمه؟

    1. يومين تقريبا .. أكثر من كذا يبدأ ينشف .. بس موب معناها نرميه … أنا في الغالب أجمد الزايد و أسوي إسكريم بعدين أكسر قطع التشيز كيك فيه مع شوي إضافات …

    • miss.alo2h on 9 December, 2010 at 3:40 am
    • Reply

    الله يسلم هالأيدين
    دائما شغلك مميز ورائع نفس طريقتي بالتشيز بس أنا أضع القرع مع البهارات على النار أحسها تطلع نكهة البهار واضحة وبعدين أكمل متل طريقتك
    وبالفعل تشيز كيك القرع كتير طيب واجمالا كل التشيز كيك لذيذ

    1. هلا والله …

      ما يحتاج تحطينها عالنار … لا تنسين إن التشيز كيك يدخل فرن أصلا .. غير كذا لو حبيتي تحطين البهارات وتخلينها تسخن تقدرين ترشينها على القرع وهو يتحمر بدال ما توسخين قدر زياده عالفاضي …

  3. مرحبا اخوي
    عندي سؤال بخصوص اكواب السيلكون هل تنفع اسوي فيها التشيز ، ولو سويت فيها هل فترة الطهي تختلف ؟

    طريقتك رهيبه وافكارك اجمل ..
    واصل بالتوفيق

    1. هلا والله …

      هي تنفع بس أفضل لو تبعد عنها … التشيز كيك حساس للحركه كوننا نطلعه قبل يستوي ١٠٠٪ و السيليكون شوي لين وسهل يتحرك ويخرب التشيز كيك علينا وإحنا نطلعه من الفرن أو كذا . غير كذا كل الناس اللي سووها يشتكون من إنه جددددا صعب تطلعها من القالب عشان كذا أفضل .

      1. كل الشكر لك .. هل بعد مايبرد يعطي نفس الانطباع يعني يصعب تطلعه ؟

          • Top Chef on 9 December, 2010 at 8:29 am
            Author

          هو كلامي كان عن بعد ما يبرد .. لأن التشيز كيك عموما وأغلب الكيكات ما تطلع من القوالب إلا بعد ما يجمد هيكلها شوي بحيث يتحمل الحركه وكذا . بس في مثل هذي الحاله صعب جدا … لو تبي جرب بس صراحة لو علي منيب مغامر .

  4. عارف شي !

    قبل كانت تحوم كبدي من حلى بالقرع واستغرب من الأجانب !!

    مع اني ماعندي مشكله أكله مع المطازيز :$

    بس حمستني خصوصا ان سكرها بيتكرمل

    يبيلها تجربه ان شاء الله 😉

    1. القرع حلو ليش ما ينفع حلى ؟ هو واحد من الأشياء اللي تمشي في أشياء كثير ممكن سلطه ، حلى ، شوربه ، أو حتى لحالها .

      جربيها على ضمانتي منتب نادمه … وإن شاء الله نغير فكرتك عن القرع في الحلويات بعد D:

    • Anonymous on 8 December, 2010 at 9:27 am
    • Reply

    يا مجنووووووووووووووووون>>ترا هذا مدح هع هع
    ابدااااااع بالوصفة والتزيين والتصوير
    ماشاء الله لاقوة الا بالله
    الله لايضرك ويحفظك ويفتح لك ابواب الخير

    1. ههههه … مشكوره على مرورك حياك ..

    • Anonymous on 8 December, 2010 at 8:08 am
    • Reply

    يعطيك العافية..

    مرة سويت كريم كراميل بالفرن صار فيه مسامات.. وش السبب؟
    اخاف التشيز يصير مثله ويخرب علي..
    –ممكن رابط التشيز العادي؟
    –بعض الوصفات يحطون عسل او سكر مع البسكوت وش فاايدته؟

    1. هلا والله ..

      الكريم كاراميل صار فيه كذا كونه طبخ أكثر من اللازم .. يا إنك ما أستخدمتي حمام مائي ، يا إنك حطيتي الفرن أعلى من اللازم أو فرنك كان أعلى من اللازم (الأفران أبدا موب دقيقه ترى) ، أو وهو الغالب إنك مشيتي على وقت الوصفه بدون ما تستخدمين إختبار الكسترد والنتيجه إنك طبختيه أكثر من اللازم .

      التشيز كيك بيصير فيه نففففس الشي إذا تجاهلتي هذي الأشياء .

      التشيز كيك العادي بنزله بعدين في موضوع إن شاء الله …

      الوصفات اللي تستخدم سكر في الغالب يكون للتحليه الزايده وعشان يخلي البسكوت يلصق فيه بعض أكثر ويصير يقرمش أكثر . العسل تقريبا مافيه هذي الخاصيه بس هو له طعم خاص يمكن هذا سبب إستخدام العسل .

    • Anonymous on 8 December, 2010 at 7:37 am
    • Reply

    مرحبا شيف

    والله شكله يشهي .. بس زي ما قلت انو القرع مظلوم انا ما اكله

    بنتظار انواع تانية .. ويمكن مرة أجرب هذا النوع

    مشكور يا شيف

    1. ههههه بالضبط القرع مظلوم موب لأنك ما تاكلينه .. القرع مظلوم لأنك ما عطيتيه فرصه بس … جربيه ،،، كلنا أكلناه وإحنا صغار وكان عباره عن قطع قرع حلوه مره مسلوقه ومهريه داخل مرق أو كذا هذا السبب أغلبنا ما يحب القرع لأن أولى تجاربنا معه ماكانت جيده بس .. القرع له نكهة خاصه حلوه مره وتصير أحلى بعد إذا تحمر القرع وبدأ السكر اللي فيه يقلب كاراميل .

    • شوكولانا on 8 December, 2010 at 7:14 am
    • Reply

    تسلم ايدك .. شي خيال
    شفت لك قبل كذا تشيز بالفراولة وكان طيب مثل هذا ونكهه ثانيه

    الف شكر ولي تجربه ان شالله

    1. هلا والله ..

      حياك وأنتظر تطبيقك ..

    • Anonymous on 8 December, 2010 at 1:56 am
    • Reply

    مساك ورد وجوري . اخبارك مع البرااااااااااااااااااااد ولو اني اشك الي عندكم يسمى براد خخخخخخ

    ولو ما عليك امر بغيت طريقة صوص البلسمك ومشكور مقدما على كل الي تقدمه لنا

    1. هلا والله …. مساء الخير …

      صوص البلسمك هذا سهل مره وإستخدامه موب بس للحلويات ترى .. حطي قاروره بلسمك في قدر وخليها تطبخ على نار هاديه إلين تثقل وتصير زي الشيره . بعدين أنقليها لعلبه وخليها تبرد .. هي راح تثقل أكثر وهي تبرد عشان كذا تأكدي إنها تصير أخف شوي من اللي أنتي تبين .

    • Amola on 8 December, 2010 at 12:52 am
    • Reply

    حلوو دام انوو ينفع ..يعني تقريبآآ احط الباكيت كله او بس أكتفي بكم ملعقه من الجيلي 🙁

    1. مهم جدا تكون الكميه زي ماهو مكتوب في الوصفه … يعني لو مكتوب ملعقه كبيره حطي ملعقة وربع من الجيلي العادي .. بالظرف والله ما أعرف كم ؟ كوني ما أعرف كم وزن هذا وكم وزن هذاك .. المهم هو إنك تبدلينه بنفس الشي وزياده شوي .

    • Amola on 8 December, 2010 at 12:26 am
    • Reply

    ماشاااءلله تباررك الله أتعب وأقول مبدع..أطلق م شغل المحلاات
    نفسي مرا أجررب اسوي تشيز كيك بالفررن.. بس أخاف م يضبط 🙁
    عندي إستفسار بسيط..الحين لو بسوي تشيزكيك وم عندي جيلاتين الشفاف ممكن أستبدله بجيلي بالفواكه مثلآ أناناس أو ليمون أو م ينفع……………..!!!

    1. هلا والله …. ليش تحطين شي في خاطرك جربي وش خسرانه ؟ أنا أول مره في حياتي أسويه تراني كنت موب بس ميييييح ما أعرف أي أي أي شي في المطبخ كانت يمكن ثاني أكله أو ثالث أكله أسويها وطلعت النتيجة رهيبه …

      ينفع تشيز كيك بالجيلاتين المنكه بس أعرفي إن الطعم و اللون راح يختلف كثيييييييير .. غير إن طعمه بيكون كذا صناعي مدري كيف

    • Anonymous on 7 December, 2010 at 6:20 pm
    • Reply

    القرع يوم شويته في الفرن ذكرني طعمه بالجزر اليماني او البطاطا الحلوة يعني لذيذه

    بس فعلا مدري ليش الناس تكرهة مع انه مفيد جدا ولذيذ قدمته بدون ما اقول مكوناته الكل تقبله لكن بس قلت قرع

    العيون طلعت والكل قال يععععععععععععععع ؟؟؟؟طيب في الاول قلتوا لذيذ وشلون طلع يعع مدري

    المسالة طالع عمرك نفسيا لا اكثر ولا اقل ولا ؟؟؟

    1. صح صح … إذا أنشوى يصير زي البطاطس الحلوه تقريبا .. بس يعني شوي غير .. أصلا مين قال ما نقدر نسوي تشيز كيك ببطاطس حلوه ؟ يمديك لو تبين .

      بالضضضبط زي ماقلتي المسألة نفسيه لا أكثر . خصوصا ترى مع الأطفال يستحيل التفاهم مالك إلا تخدعينهم هههههه … الكبار مشكله مالهم حل سويي أكلك وأمرك لله D:

        • Anonymous on 7 December, 2010 at 7:17 pm
        • Reply

        يا طويل العمر اختك في الله تقص على الكبار قبل الصغار وش حيثهم

        اصلا الكبار يغريهم الشكل والطعم بس اهم شي لاتقول وش هذا وماعليك

        طيب في شوربة القرع مثلا ؟؟؟

        مافي احد تقبله .انا بس اقول انه قرع ولا احد يقرب منه تقل سعلو يخافون ياكلهم لكن اقدمه بشكل مغري وبعدين اسال وشلون الطعم

        اتحدى احد يقول شين الكل قال طعم قلت اجل تراه قرع ههههههههههههههه

        والمثل يقول “العين تأكل قبل الفم احياناً” صح ولا لا

        جربها وحطها هنا وانا راح اعطيك اعلى تصويت لها

          • Top Chef on 7 December, 2010 at 7:23 pm
            Author

          ههههههههههههههه .

          صح المثل العين تاكل قبل الفم هذي ميه في الميه صح … وصح الشكل له دور كبير لو كان حلو الناس بياكلون أي شي

    • Anonymous on 7 December, 2010 at 5:34 pm
    • Reply

    لذيذ فعلا لكن مافهمت ليش الفوطة خليتها تفصل بين الصينيتين هنا؟؟؟

    على فكرة مدري جربت تحط القصدير من داخل الصينية او لا؟؟؟

    1. هلا والله ..

      ليش أحط قصدير داخل الصينيه ؟ البارتشمنت ما يلصق ولا يتقطع ليش أحط قصدير ؟

      الفوطه تنحط عشان أسباب كثير بس هي موب ضروريه .. أول شي لو قد سويتي تشيز كيك في صينيه موب مساويه بتفهمين إن التشيز كيك لو طبخ وهو مايل في لافرن موب شي زين .

      ثاني شي الفوطه تثبت الصينيه الثانيه فوقها أحيانا المويه تخليه شوي يطفوا ويبدأ يتحرك . هذا الشي خصوصا في لو كنتي مسخدمه صحون صغيره .

      ثالث شي الفوطه بتوفر حمايه للتشيز كيك من إنه ينحرق من تحت كونه أحيانا القاعده تكون لاصقه بالقاعده حقت الصينية الكبيره يعني التشيز كيك من تحت ما يلمس الحمام المائى . يعني هي توفر عزل أفضل

    • Anonymous on 7 December, 2010 at 5:19 pm
    • Reply

    ماشاء الله شي يجنن يذكرني شكله بحق سعد الدين هههه
    طيب علمني وين المشكله فيه :
    مره سويت تشيز كيك بالمنجا بس ماتماسك هو بالاساس بالثلاجه يعني مادخل الفرن
    تتوقع ليه ؟

    1. هلا ..

      فيه أكثر من سبب .. يا إنه ما برد زين ، يا إن الجيلاتين خرب بإنك سلقتيه ، يا إنك حطيتي شي يخرب الجيلاتين مع الكيك ، أو يمكن كمية الجيلاتين للسائل موب متساويه

    • lolitta on 7 December, 2010 at 2:24 pm
    • Reply

    ما شآء الله شكل التشيز كيك يشههههههي
    عوآفي شيف

    1. الله يعافيك ومشكوره على مرورك

    • ام اقوبي on 7 December, 2010 at 11:58 am
    • Reply

    ماشاء الله الوصف دقيييييق جدا

    بالتوفيق … ونحن بانتظار المزيد 🙂

    1. حياك ومشكوره على مرورك

    • Anonymous on 7 December, 2010 at 11:58 am
    • Reply

    تجنن … ماشاء الله …. بس عندي سؤال واحد …اللحين التشيز كيك المفروض انه يجي كذا ناعم مو ناشف (مدري اشلون اشرح بس يجي كانه جبن لما تقطعه يعني لماتشوف القطعه كان يكون مفتت اشوي بس ناعمه لماتحطه في الفم ) ولا لزم يطلع كريمي كذا ماتحس ان البيض كانه ماستوى تمام …

    1. هلا والله …

      ياذا البيض هههههه وش قصدك ما أستوى صح ؟ لا تخافين مستوي ماراح يجيبلك أي مرض هههه ولا فيه ريحه ولا زفره ولا غيره .

      كون التشيز كيك رطب هذا شي تدورينه موب العكس .

    • Anonymous on 7 December, 2010 at 11:33 am
    • Reply

    أحب النكهات المتضادة ..
    وفكرة بسكويت الزنجبيل بطللللللللة .

    فنان وبتضل فنان ..

    1. ياهلا والله ….

      واحد من الأشياء اللي لازم الواحد يفكر فيها وهو يطبخ هو النكهات المتضاده و القوامات بعد . شوفي مثلا شي زي شوربه ليش يحطون عليها مثلا شابوره ؟ أو سلطه مثلا ليش شابوره ؟ لازم دايما شي يعطي تبيان . أنا معك في هذي ميه في الميه .

    • Anonymous on 7 December, 2010 at 11:24 am
    • Reply

    خطيييييييييييير ماشاءالله
    حاجة تاخذ العقل والتصوير توب ياتوب
    بس مااتوقع اني اسويها لان انا اصلا مااحب القرع خير شر 🙁
    بس اهم شي اخذت الافكار الثانيه لو بعمل اي نكهه ثانيه

    يعطيك العافيه على هالابداع

    1. هلا والله …
      ما شفتيني أقول القرع مظلوم .. أغلب الناس كره القرع من تجارب الطفوله ههههه يعني يجيك قرع مسلوق وحلو وفيه زي الليف أكيد بتكرهينه . عطي القرع فرصه ههه صدقيني رهيب .

      عموما الناس أذواق … بالعافيه مقدا اللي بتسوينه

  1. […] إما عشان يعطينا كسترد سايل أو كرد أو كسترد جامد زي التشيز كيك أو الكريم بروليه أو غيرهم كثير، نخفق بياض البيض مع شوي […]

Leave a Reply to Top Chef Cancel reply

Your email address will not be published.

%d bloggers like this: