سباجيتي آليو ، أوليو إي بيبيرتشينو ( صوص الزيت و الثوم و الفلفل ) .. Spaghetti Aglio , Olio e Peperoncino

هلا والله ..

اليوم مافيه كلام كثير ، وصفة جدا بسيطة وسهلة و ما تحتاج حتى روحة سوبرماركت لأن غالبا المكونات في كل بيت دايما. هذي الباستا تعكس كل شي يمثلة الطبخ الإيطالي ، بساطة ، مكونات ممتازة ومطبوخة بطريقة صح بس.

الباستا هذي جدا مشهورة في كل مناطق إيطاليا وهي وحدة من الوصفات الشعبية تقريبا اللي مافيه بيت ما يسويها. الصوص طعمه زيت زيتون مع ثوم وفيه لذعة خفيفه من الفلفل ، الزيت لازم يكون زيت زيتون و من أحسن نوع و الثوم لازم يكون مطبوخ صح بحيث ما يكون مر.

المقادير :

فصين ثوم مقطعة شرايح نحيفة أنحف شي نقدر نقطعه. لا تستخدمون ثوم مهروس هنا !

١/٢ ملعقة صغيرة فلفل أحمر مجروش

نص كوب زيت زيتون من أحسن أحسن نوعية موجودة

٢٠٠ جرام باستا … سباجيتي هي أكثر شي متوفر بس لو لقيتوا باستا الآنجل هير angel hair بتكون رهيبة هنا

بارمزان ويفضل بارميجانو ريجانو

ملح وفلفل

بقدونس أو ريحان للتزيين

الطريقة :

في مقلة واسعة ، نحط نص الزيت مع الثوم و الفلفل المجروش ورشة ملح ونخليها بدون ما نشغل النار عشان يتطعم الزيت بالثوم عبال ما موية الباستا تغلي.

الحين نغلي المويه حقت الباستا ونطبخ الباستا. هنا طريقة طبخ الباستا الناشفة ، وهنا الطازة .

و الباستا قاعدة تطبخ نبدأ نسوي الصوص ، نشغل النار على حرارة وسط ونطبخ الثوم إلين تطلع ريحته شوي تقريبا نص دقيقة بس، لا نخليه يقلب بني أبد ! بعدين نطفي النار .

إذا قربت الباستا من مرحلة الألدنتي ناخذ نص كوب من موية السلق حقت الباستا بعدين نصفي الباستا . نحط الباستا عالصوص ونحط نص كوب موية السلق + باقي الزيت و الأعشاب + رشة ملح بعدين نشغل النار ونطبخ الباستا إلين تصير ألدنتي. نذوق الملوحة حقت الباستا ونعدلها لو أحتاجت . آخر شي نرش بارمزان ونقلبه مع الباستا ونقدمها …