الصوصات .. Sauces

التابيناد .. Tapenade

كوب زيتون نيسواز بدون بذر
كوب زيتون أخضر ويفضل لو كان من نوع Picholine الفرنسي
١/٤كوب طماطم مجففة
ملعقة كبيرة كابر
فص ثوم
فيلية أنشوجة
١/٢ملعقة ريحان مفروم
١/٢ملعقة أوريجانو مفروم
ملعقة كبيرة بقدونس مفروم
١/٤كوب زيت زيتون

أخلطي كل شي بالخلاط المولينكس إلا الزيت .. شوي شوي إلين ينفرم بعدين أضيفي الزيت وكملي خلط شوي شوي هذي أحسن تابيناد ذقتها في حياتي …
بس طبعا إذا شي ما عندك شيليه و إذا شي تبين تحطينه زيديه ..
إذا شي تحبينه حطي أكثر و إذا شي تكرهينه حطي أقل ..التابيناد شي شخصي زي البيستو موب قرآن منزل …

————————————————————————————————————————————————————————–

الصلصة الفرنسية .. French Dressing

1/3 كوب خل عنب أبيض
١/٣كوب سكر
١/٢كوب كتشب
١/٢كوب زيت زيتون
ملعقة كبيرة خردل يفضل لو خردل ديجون
ملعقة صغيرة بودرة ثوم
ملعتقين صلصة ويستشير صوص
١/٤كوب بصل مقطع صغاااااار أو مبشور لو تبين
ملح وفلفل
حطي المقادير كلها في خلاط و أخلطي

————————————————————————————————————————————————————————–

الكاتشب .. Ketchup

علبة كبيرة ( كبيرة موب وسط ولا صغيرة ) طماط كامل
بصلة مقطعة
4فصوص ثوم مقطعة
ملعقتين كبار زيت نباتي
ملعقة صغيرة فلفل حار بودرة
نص ملعقة صغيرة بابريكا
ربع ملعقة صغيرة قرفة
ربع ملعقة صغيرة all spice مدري وش إسمه بالعربي والله
ملح وفلفل
ملعقة كبيرة معجون طماطم
١/٢كوب سكر بني فاتح
١/٢كوب خل تفاح

أول شي أخلطي الطماط في خلاط , بعدين أطبخي البصل مع رشة ملح في الزيت
إلين يقلب ذهبي شوي بعدين حطي الثوم و أطبخيه شوي زود. حطي البهارات وأطبخيها يمكن دقيقة
بعدين حطي الطماط و معجون الطماط وباقي الأشياء وخليها تطبخ على غلية خفيفة يمكن ٤٠ – ٤٥ دقيقة مع التحريك المستمر
.بعدين أخلطيها بالخلاط إلين تصير ناعمة .. بس !!!

————————————————————————————————————————————————————————–

صوص البتر سكوتش .. Butterscotch Sauce

150 جم زبده يعني أصبع ونص
250 جم سكر بني غامق
300 مل قشطة خفق

ذوبي الزبده و السكر مع بعض على حراره وسط إلين يبدأ السكر يذوب . شيلي الخليط من الحراره وحطي الكريمه و رجعيها عالنار إلين تبدأ تغلي . صفي الخليط و أحفظيها في الثلاجه

————————————————————————————————————————————————————————–

صوص البلسمك .. Balsamic reduction

إطبخي كوبين من البلسمك على نار وسط إلين ما يثقل ويسير زي الدبس وإستخدميه فوق الدجاج ، الستيك أو حتى مع الحلويات فوق الفراولة مثلا أو التين .
جربيه حتى كصوص فوق الإسكريم ، صدقيني منتب مصدقة كيف طعمه بيسير حلو وموب حامض أبدا .
إطبخي فيليه سمك مع شوي زبدة في مقلة بعدين شيلي السمك و إطبخي شوي زبدة إلين تقلب بنيه ، بنية بس موب سودا
وبعدين إخلطي معاها شوي بلسمك و قدميها مع السمك.
صوص ثاني أسهل من الأول و بعد شي رهييييييييييييييييب . بعد ما تشيلين الدجاج أطبخي شوي بصل أو ثوم أو الإثنين لو تبين بعد شوي بس
بعدين صبي حوالي كوب خل بلسمك وخليه يثقل شوي …. مافيه أسهل من كذا.

————————————————————————————————————————————————————————–

صوص التارتار .. Tartar sauce

تخلطني مايونيز + ليمون + كابر + ثوم + فيليه أنشوجه لو تبين .

بس هذا الترتار صوص ..

————————————————————————————————————————————————————————–

صوص الدونات ( السكر ) .. Liquid fondant

١/٤كوب حليب سخنيه في قدر إلين ما يسخن شوي
بعدين حطي عليه كوبين سكر مطحون و أخلطي
غطسي الدونات في الخلطة وهي حارة وحطيها على شبك عشان تبرد .
لاحظي إن الخلطة هذي راح تجمد بسرعة لو بردت
فأفضل شي تشيلينها من النار وتحطينها في صحن فوق حمام مائي.

————————————————————————————————————————————————————————–

صوص الفول السوداني (البني ) الساتي .. Saty Sauce

١/٢ كوب فول سوداني محمص
١/٤ ملعقة صغيرة كمون حب
١/٢ ملعقة صغيرة كزبرة حب
١/٢ ملعقة صغيرة فلفل أحمر مجروش
١/٢ بصله مقطعه صغار
فص ثوم مقطع صغار
ملعقة صغيرة زيت
٢ ملعقة كبيره سكر بني
١/٣ كوب حليب جوز هند
ملعقة كبيره صويا صينيه kecap manis
١/٣ ملعقة صغيرة ملح وفلفل

حمصي الكزبره و الكمون في مقله إلين تطلع ريحتها . بعدين أطحنيها هي و الفلفل الحار إلين تعطيك بودرة

أطبخي البصل و الثوم في الزيت على حراره هاديه إلين تطلع ريحتها بعدين حطي البهارات اللي طحنا و حليب جوز الهند و السكر البني و الصويا و الملح و الفلفل حسب الرغبة . أطبخيهم شوي بعدين خليهم يبردون .

في خلاط مولينكس أفرمي الفول السوداني شوي بعدين صبي عليه الخليط اللي فوق وكملي خلط .

————————————————————————————————————————————————————————–

هوني مسترد .. Honey Mustard

حطي تقريبا ٦ ملاعق كبيرة خردل ديجون + ملعقتين كبار عسل وعدلي حسب الرغبة كل واحد يحب الصوص غير فشوفي أنتي إذا تحبينه حالي زيدي عسل وكذا ..

————————————————————————————————————————————————————————–

البلسمك فينيجريت .. Balsamic Vinegratte

سهل جدا زي أي فينيجريت .. تحطين جزأ خل بلسمك + ٣ أجزاء زيت زيتون + ملعقة صغيرة خردل ديجون أو خردل عادي ( إختيارية بس عشان تمسك الخليط مع بعض ) + رشة ملح وفلفل + شوي عسل أو سكر أو أي شي حالي عشان يوازن الحموضه . أخلطيهم مع بعض وبس .. هذي النسبة تمشي لكل أنواع الفيناجريت .

————————————————————————————————————————————————————————–

صوص الترياكي .. Teriyaki Sauce

التيرياكي الأصلي غالبا معه شي إسمه ميرين اللي هو خمر رز حلو و بعد ساكي اللي هو خمر رز.. تقدرين تشيلين هذي المكونين بس بحاول أقرب النتيجة قدر الإمكان …

ملعقتين كبار صويا خفيفه
ملعقة كبيرة زيت
ملعقة صغيرة زيت سمسم
ملعقة كبيره عسل
ملعقة كبيره خل رز .. حاولي حاولي ما تبدلين بداله شي
١/٢ ملعقة صغيرة زنجبيل مفروم
ملعقتين صغار صويا ثقيل

————————————————————————————————————————————————————————–

صوص الرانش .. ranch dressing

تفضلي هذا الرانش :

كوب وثلاث أرباع لبن .. لبن لبن عادي مراعي صافي اللي هو
نص كوب مايونيز
ملعقتين كبار كراث مقطع أو بصل أخضر
ملعقتين كبار بقدونس
ملعقة كبيره خل تفاح
فص ثوم مفروم
١/٢ ملعقة صغيرة بشر ليمون
ملح وفلفل وشوي بودرة بصل

أخلطي المواد مع بعض إلين تتجانس .. بس

————————————————————————————————————————————————————————–

طريقة عمل النوتيلا .. Nutella

سخني الفرن على ٣٥٠ بعدين حطي كوبين بندق مع القشر في صينية فرن وحمصيه إلين يبدأ الجلد يقلب ذهبي تقريبا ربع ساعة . بعد ما يتحمص البندق طلعيه من الفرن و حطيه على فوطة مطبخ ، حطي فوطة ثانيه فوقه و أفركيه زين عشان تطلعين القشر .

حطي البندق في خلاط مولينكس و أخلطيه زين إلين ينطحن زين ويسويلك زبدة بندق ( زي البينت بتر بس بالبندق ) . حطي عليه ربع كوب كاكاو بودرة وكوب سكر مطحون و أخلطيهم بالخلاط زين بعدين أبدي صبي ( و الخلاط شغال ) زيت شوي شوي إلين يصير سايل و أخف من النوتيلا بشوي ( بيثقل إذا برد ) بس .. أحفظيه في الثلاجه شهرين تقريبا .

————————————————————————————————————————————————————————–

ديب سبانخ للشيبس مثلا .. Spinach dip

١١٠ جرام تقريبا جبن فيلادلفيا على حرارة الغرفة
علبة خرشوف معلب مقطعه صغاااار
فص ثوم مفروم
١/٢ كوب بارمزان
ربع كوب سبانخ مقطع
١/٢ كوب ساور كريم
١/٢ كوب مايونيز

سخني الفرن على ٣٥٠ ..

أخلطي كل المواد مع بعض وحطيها في صحن يدخل فرن وحطيه في الفرن تقريبا نص ساعة أو إلين الطبقة اللي فوق تبدأ تتحمر.

————————————————————————————————————————————————————————–

مربى القرع .. Pumpkin jam

قشري القرع بعدين قطعي القرع صغار تقريبا بحجم القروش . خذي ٨ أكواب قرع وحطيها في كوب مع ٦ أكواب سكر و عصير وقشر ٦ برتقالات و حبتين ليمون . حطيهم في قدر طول الليل في مكان بارد نسبيا أو الثلاجه لو ماكان عندك. ثاني يوم شغلي النار عليها وخليها تغلي على غليه جدا خفيفه مع التحريك من وقت لوقت إلين تلاقين القرع قلب شفاف تقريبا ٤٥ دقيقه . آخر شي حطي بهارات لو تحبين كونها حلوه مع القرع .. رشة زنجبيل ورشة قرفة ورشة خفيفه قرنفل . حطي القرع في مرطبانات نظيفة وأحفظيها في الثلاجه تقريبا بتعيش كذا شهر أو لو مستعدة يمديك تعلبينها وبتعيش أكثر من سنة .

————————————————————————————————————————————————————————–

صلصة الثوم  .. Garlic sauce

٤ فصوص ثوم . تطحنينهم زييييين إلين تصير ناعمه مره مع ١/٤ ملعقة صغيرة ملح . حطي عليها عصير ليمونه و ١/٤ كوب زيت

في الخلاط حطي ٤ فصوص ثوم مع ١/٤ ملعقة صغيرة ملح و أخلطي إلين يصير معجون ناعم بعدين زيدي عليهم عصير ليمونه وربع كوب زيت نباتي شوي شوي إلين يكونلك معجون أبيض .

————————————————————————————————————————————————————————–

الحمص

حطي الحمص في الخلاط مع شوي ثوم ( تقريبا فص فصين يكفي ) + عصير ليمون + طحينه + ملح وفلفل أبيض + كمون + شوي من مويه الحمص اللي في العلبه . شغلي الخلاط إلين يصير ناعم شوي بعدين زيدي زيت زيتون و الخلاط شغال .

هذي مكونات أي حمص في العالم … الإضافات عاد إختياريه .. ذوقي الحمص كل شوي وشوفي وش يحتاج . لو لقيتيه ثقيل زيدي شوي مويه ، لو لقيتيه خفيف زيدي حب حمص . بس …

————————————————————————————————————————————————————————–

زبدة تفاح .. apple butter
ال apple butter مربى تفاح ثقيل . إستخداماتها بعد موب بعيدة عن المربى سواء تدهنين توست فيها أو مثلا في كيك . ممكن طبعا تستخدمينها في الحلويات أو الموالح بس مالها إستخدام واحد محدد .

طريقتها سهلة بس تاخذ وقت صراحة .

كيلو تفاح أحمر مقشر ومقطع أرباع بعدين تشيلين البذور
كيلو وربع تفاح أخضر مقشر ومقطع أرباع وبعدين تشيلين البذور .
٤ أكواب سكر
ملعقة كبيره خل تفاح
٣ ملاعق كبار مويه
١/٢ ملعقة صغيرة قرفة
١/٢ ملعقة صغيرة جوزة طيب ( إختياري )

حطي التفاح مع السكر في قدر و أطبخيهم على حرارة أقل من وسط بشوي إلين يذوب السكر تقريبا . بعدين حطي الخل و المويه . غطي الخليط وخليه يطبخ على هذي الحرارة 3 ساعات تقريبا مع التحريك من فترة لفترة . بعد 3 ساعات نزلي الحرارة أقل وخليه يطبخ إلين تلاقين إن التفاح صار ذااااايب مره يمكن 5 – 9 ساعات . بعد ما يذوب التفاح حطيه في خلاط و أطحنيه بعدين رجعيه للقدر و أطبخيه على غليه جدددددا خفيفه مع البهارات إلين يثقل ويقلب صوص تفاح من ساعة إلى ٤ ساعات تقريبا .

————————————————————————————————————————————————————————–

الشطة

كوب فلفل أحمر حار ! طازج
ملعقة صغيره ملح
١/٢ بصله
عصير نص ليمونه
٣ فصوص ثوم
كوب خل مطبوخ إلين يوصل قريب للغليان بس لا تخلينه يغلي
فلفل أسود

حطي كل المكونات في خلاط و أخلطيهم وأنتبهي لوجهك وعيونك وأنتي تفتحين الخلاط كون البخار حق الخل مع الفلفل مشكله إذا لمس العين .

حطيه في مرطبان مقفل وخليه في الثلاجه عشان يتعتق حوالي يون عالأقل ويبدأ طعم الفلفل يخف شوي وتبدأ النكهات تتمازج …

————————————————————————————————————————————————————————–

صوص الكراميل (التوفي) .. Caramel Sauce
كوبين سكر

كوب مويه

كوب ونص قشطة خفق

نص أصبع زبدة

ملعقة كبيرة عسل( إختياري بس إجراء إحتياطي )

نكهات لو تبين : جربي معاها قشر برتقال ، فانيلا ، ملح أو الثلاثة مع بعض.
حطي السكر و المويه في قدر ثقيل على حرارة وسط إلى عالية
إذا بدت تغلي غطي القدر عشان الموية اللي تتكثف على الغطاء تمسحلك جوانب القدر وما يتسكر عليك.
بعد دقيقتين شيلي الغطاء وخليها تغلي لا تحركينها أبببببدا إلين ما يبدأ يتحول لونها ذهبي . الحين هزي القدر شوي شوي عشان اللون يتوزع صح إلين ما يوصل لدرجة الكراميل اللي تبينه .
كل ما طبختيه كل ما قلت الحلاوه بس زاد طعم الكراميل وكل ما طبختيه أقل كل ماكان حلو وأفتح وله أقل نكهة كراميل هي شي راجعلك أهم شي لاتحرقونه.
طفي النار وصبي القشطة و الزبدة مع التحريك. طبعا إنتبهي لاتحرقين يدك تراه حااااااااااااااااااااااار وتراه بيغلي بقوة .
الحين خليه يبرد وبتلاقينه بدا يثقل زود.

————————————————————————————————————————————————————————–

الساور كريم (كريم فريش) .. Sour Cream (Creme Fresh)

الكريم فريش منتج ألبان مخمر زي اللبن و الزبادي و الساور كريم. يمكن أقرب شي له هو الساور كريم وغالبا يستخدمون بدال بعض بس هم غير. تقدرين تشترينه بس ماأعتقد متوفر عندنا في السوبرماركتات حقتنا ويمديك تسوينه بسهولة بعد. تخلطين كوبين قشطة خفق قصيرة الأجل مع ربع كوب لبن وتحطينهم في علبة قزاز أو معدن على حرارة الغرفة وتغطينه بنايلون. بعد ٨ – ٤٨ ساعة بيكون ثقل ، كل ما تخمر أكثر كل ما حمض وثقل أكثر بس هو راجعلك كم تبينه يتخمر. بعد ما يوصل للطعم اللي يعجبك حطيه في علبه تتقفل بإحكام في الثلاجه يعيش إلى أسبوعين أو أكثر وهذي طريقة ممتازه بعد لإستخدام الكريمة الزايدة عشان ما تخرب

 

————————————————————————————————————————————————————————–

ديب البصل المكرمل .. Caramelized onion dip

ديب البصل المكرمل رهيب كديب أو كصوص مع الأكل أو الساندوتشات أو غيرها.

تاخذين كوب ونص بصل مقطع أجنحة وتطبخينه في شوي زيت وزبده على نار هاديه مع التحريك من وقت لوقت إلين يقلب البصل بني غامق مره ويذبل تقريبا ٢٠-٣٠ دقيقه لا تستعجلين عليه مافيه طريقة أسرع للبصل المكرمل. بعد كذا تاخذين البصل بعد ما يبرد وتخلطين عليه كوب ونص ساور كريم مع ٣/٤ كوب مايونيز مع شوي ملح وفلفل حسب الرغبه وبس هذا الصوص.

————————————————————————————————————————————————————————–

الخردل المنزلي .. Home Made Mustard

عمل الخردل في البيت جدا جدا جدا سهل ويمديك تتحكمين في الحراره و القوام و اللون بعد بالضبط زي حق السوبرماركت. بتكلم عن الأنواع والإختلافات بينهم وطرق العمل المختلفه غير بس هذي طريقة جدا سهلة ولذييييذة للمسترد العادي.

١/٤ كوب خردل مطحون
ملعقتين صغار سكر بني فاتح
١/٣ ملعقة صغيره ملح
١/٢ ملعقة صغيره كركم
١/٤ ملعقة صغيره بابريكا
١/٤ ملعقة صغيره بودرة ثوم
١/٢ كوب مويه مخلل من نوعيه ممتازه
١/٤ كوب مويه
١/٢ كوب خل تفاح
١/٤ كوب بذور خردل كامله.

* بذور الخردل تجي ٤ أنواع أساسيه : خردل أبيض ، خردل أصفر ، خردل بني ، خردل أسود وفي الحده أقلهم الأبيض و الأصفر وبعدين البني و الأسود فإذا كنتي تبين شي حاد مره أستخدمي بذور سوداء أو بنيه غير كذا أستخدمي بذور صفراء أو بيضاء. تقدرين بعد تخلطين كم نوع عشان تطلعين بطعم ولون وقوام غير.

في صحن بلاستك أو سيراميك ( ما يكون معدني لأننا بندخله المايكروييف ) أخلطي الخردل المطحون و بودره الثوم و السكر و الملح و البابريكا و الكركم. في صحن ثاني أخلطي مويه المخلل مع المويه وخل التفاح. أطحني بذور الخردل في طاحونه بهارات تقريبا دقيقه بعدين حطيه مع باقي البهارات. الحين أخلطي السوائل على البهارات وحركيها زين بعدين دخلي الصحن المايكروييف لمده دقيقه بعدين أطحني الخليط في خلاط إلين يصير على النعومه اللي تبين ، تقدرين تخلينه شوي خشن أو تخلينه ناعم مره زي حق السوبرماركت. بعد ما يبرد غطيه وأحفظيه إلي شهر في الثلاجه.

—————————————————————————————————————————————–

الصلصة المكسيكية .. Mexican Salsa

ولو إن فيه مليون وحده بعطيك وحده سهله. تجيبين عودين فلفل أخضر حار (أو حسب الرغبه) مع فص ثوم و ٥ حبات طماط وتدخلينهم فرن حار (٤٥٠ تقريبا) إلين ما ينشوي وجه الطماط و الفلفل يصير شبه محروق بعدين تحطين كل شي في هاوند وتدقينهم إلين يوصلون للكثافه اللي تبين آخر شي تعدلين الملوحه و الحموضه حسب الرغبه وتقدرين تضيفين كزبره للخليط لو تبين.

الصلصات في المكسيك عالم ثاني زي إذا قالك كاري في الهند كل مدينه بتلاقين لها صلصه خاصه فيها بمكوناتها وأنواع فلفلها الخاصه وعشان كذا فيه آلاف الطرق و التفرعات لها.

————————————————————————————————————————————————————————–

صوص الروميسكو.. Romesco Sauce

الروميسكو من ألذ ألذ الصوصات عندي خصوصا مع الأسماك ، بتلاقين آلاف إذا ماكان ملايين النسخ من هذا الصوص فلا تخلين الوصفه هذي تربطك عدلي عليها زي ما تبين بعد ما تذوقينها أول مره وتعرفين كيف مفروض الروميسكو يكون. يمديك تستخدمينها مع اللحوم أو الأسماك أو الخضروات أو حتى تستخدمينها كديب أو دهان مع ساندوتشات وكذا.

النسخة هذي شوي تحتاج مكونات زيادة وخطوات أكثر بس طعمها يستاهل ونص.

حبة طماط كبيره ومستويه تماما
حبة فلفل مجفف
١/٣ كوب زيت زيتون ممتاز
ملعقتين كبار بندق محمص بعدين مقشر (شوفي موضوع تقشير المكسرات في المدونة إذا ما تعرفين تقشرينه)
ملعقتين كبار لوز مقشر (موب محمص)
شريحة خبز سمكها ١ سم تقريبا من خبز ريفي إيطالي أو شريحتين من خبز باجيت فرنسي (لا تستخدمين توست أو صامولي !!) مقطعه مكعبات
فصين ثوم
١/٨ ملعقة صغيره فلفل أحمر مجروش
تقريبا ربع كوب فلفل رومي أحمر مشوي ومقطع
ملعقة كبيره خل عنب أحمر
ملح وفلفل

* الفلفل الأحمر المشوي هو يمكن أهم مكون هنا ، أشوي الفلفل الأحمر وقشريه زي ما شرحت في موضوع التشيلي ريينوس بعدين قطعيه وخذي منه ربع كوب تقريبا.

سخني الفرن ل ٤٠٠ بعدين غطي صينية فرن بقصدير ، حمري الطماطه في الفرن نص ساعة تقريبا أو إلين يبدأ القشر يتفحم. قشريها من القشر بعدين قطعيها صغار وحطيها في خلاط مولينكس.

وأنتي تحمرين الطماطه سوي باقي الشغل. أقطعي الفلفل الأحمر المجفف وشيلي البذور اللي داخل بعدين قطعيه لقطع كبيره نسبيا. سخني الزيت في مقله كبيره إلين يحتر بعدين حطي الفلفل المجفف و أطبخيه إلين يبدأ لونه يتغير وتطلع ريحته بعدين شيليه لصحن الخلاط. الحين حطي اللوز و البندق و الثوم و الخبز و الفلفل المجروش عالزيت و أطبخيهم إلين يتحمص الخبز شوي ويبدأ الثوم ينطبخ بعدين شيليهم مع الزيت وحطيهم في صحن الخلاط. حطي الفلفل الأحمر المشوي في الخلاط مع الخل والملح والفلفل و أخلطيهم مع بعض إلين يعطي خليط زي المعجون تقريبا، عدلي قوام الصوص بإنك تضيفين مويه حسب الرغبه بعدين ذوقي الصوص وعدلي الحموضه و الملوحة.

—————————————————————————————————————————————–

مربى البصل .. Onion Marmalade

١/٤ كوب زيت زيتون
٦ أكواب بصل أحمر مقطع أجنحة نحيفة
١/٢ ملعقة صغيرة فلفل أحمر مجروش
كوب سكر بني غامق
٣/٤ كوب خل تفاح
ملعقتين كبار خل بلسمك
١/٤ كوب مويه
١ ونص ملعقة كبيرة زنجبيل مبشور
١/٢ كوب زبيب

سخني الزيت على حرارة وسط في قدر بعدين حطي البصل و الفلفل وحركيهم شوي عشان يتغطون بالزيت بعدين غطي القدر و أطبخي الخليط ربع ساعة تقريبا. الحين حطي السكر البني و خل التفاح و البلسمك و المويه و الزنجبيل و أطبخي الخليط على غليه خفيفة بدون ما تغطين القدر إلين يصير البصل جدا لين ويثقل الخليط تقريبا ٢٠ دقيقة. الحين حطي الزبيب و أطبخيه زيادة تقريبا ٢٠ دقيقة ثانية إلين يصير الخليط جدا ثقيل وأسود. عدلي الملح و الفلفل بعدين خليه يبرد تماما قبل تحفظينه في الثلاجة

————————————————————————————————————————————————————————–

 

Follow TopChefCooks on Twitter

1 comment

  1. غير معروف

    يعطيكك الف ﻋﺂﻓﻴﻬﻪ ..

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: