صوص الروزيه ( كريمة الطماطم ) .. Rosée Sauce

هلا والله …

 

هذا الصوص واحد من تفرعات صوص الطماط الأساسي هنا .

 

صوص الروزيه أو الصوص الوردي (أو البمبي زي ماناس يسمونه D; ) واحد من ألذ و أسهل تفرعات صوص الطماط الأساسي. هو صوص عام موب بس للباستا زي ما يعتقد كثيرين. جربوه عالسمك أو الدجاج أو الأكل البحري زي الربيان و غيره.

 

نفس هذا الصوص لو عدلنا عليه شوي بإننا نضيف عليه دجاج تكا ونسويه ببهارات هنديه بنطلع بأكله هندية جدا مشهورة اللي هي البتر تشكن !

 

 

المقادير و الطريقة :

 

مافيه مقادير بالضبط … نسخن شوي من صوص الطماط الأساسي ونخليه على غلية خفيفه بعدين نحط عليه قشطة خفق إلين يوصل للطعم اللي نبي. آخر شي نعدل الملح و الفلفل بس ..

 

 

 

أمثلة للإستخدامات :

 

بيني بصوص الروزيه .. Penne Rosée :


تقريبا نص كيلو مكرونه بيني أو أي شكل ثاني سواء طازه أو ناشفة.

تقريبا ٣ أكواب من صوص الطماط الأساسي

نص كوب قشطة خفق أو حسب الرغبة

جبن بارمزان ( يفضل من نوعية بارميجانو ريجانو )

بقدونس أو ريحان للتزيين

 

نسلق المكرونة زي ماشرحت في مواضيع الباستا ( هنا و هنا ) .

 

نسخن صوص الطماط وبعد ما يبدأ يغلي نحط عليه الكريمة ونذوق الملح و الفلفل ..

 

نصفي الباستا ونحطها عالصوص بعدين نرش شوي بارمزان وبقدونس أو ريحان ونقدمها مع إضافة بارمزان عالوجه.

 

PENNE rosée

 

بيني روزيهPENNE ROSE

 

بيني روزيه

 

 

سوبلي ( كرات ريزوتو محشية موزاريلا ومقلية ) مع صوص الروزيه ..  Suppli with rosée sauce :

 

مثال ثاني بس عشان أبين إنه موب بس مع الباستا ..

 

suppli with rose

سوبلي مع الروزيه

 

 

هذي مجرد أمثله بس لإستخدامات الصوص. الصوص جدا مرن ويمشي مع أشياء كثير .. أبدعوا أنتم عاد في الأشياء اللي تقدمونه معه.

 


11 comments

Skip to comment form

    • Anonymous on 21 December, 2012 at 7:50 pm
    • Reply

    السلام عليكم
    الله يعطيك العافيه اخوي
    ممكن تعطينا طريقة كرات الريزوتو

    1. وعليكم السلام و الرحمة …

      تحتاجين ريزوتو أول … الصراحة صعب شرح طريقة الريزوتو بسرعه هنا هو راح يكون له موضوع متكامل بإذن الله

    • آلاء on 5 February, 2012 at 2:09 pm
    • Reply

    اتفق معك في الأمر الأول واختلف معك في ثاني أمر في حالات كثيرة نحتاج الصوص الزايد يعني في أنواع باستا بطبيعتها ما تحتفظ با لصوص مو لخطأ في قوامه بقدر ما أن شكلها كذا لذلك نحتاج الصوص الزايد وخطأ يكون في أسفل الصحن نازل فنسكبه فوق.

    1. هلا والله …

      مع إحترامي لك بس هذي فكرة خطأ. إذا الصوص كان ثقيل أو فيه قطع ويحتاج إنه يتعلق على الباستا بقوه نستخدم شكل باستا فيه تضاريس كثيره زي البيني مثلا أو الباستا الحلزونيه أو أي شي ثاني موب ناعم مانستخدم شكل ناعم ومافيه أماكن يتعلق فيها الصوص زي السباجيتي مثلا ونغرقه بالصوص سواء فوق الباستا أو تحته هذا يخليه صعب في الأكل ، تذكري إننا ناكل الباستا موب الصوص في النهايه الصوص مفروض ما يقعد في الصحن.موب أي شكل يمشي مع أي صوص زي ما يعتقد ناس كثيرين لازم تشوفين وش الصوص اللي عندك وكيف يمشي مع الشكل اللي تستخدمين.

      شي ثاني لازم تركزين عليه هو جودة الباستا المستخدمه وكيفية سلق الباستا. لو سلقتي الباستا بمويه مع زيت هذا ممكن يخلي الصوص ما يلصق فيها ولو أستخدمتي باستا من نوعية سيئة هذا بعد ممكن يخلي الصوص ما يلصق عليها.

      القاعدة اللي مافيها نقاش هو إن الصوص لازم يتعلق عالباستا ما يكون مغرق فيها.

      أقري المواضيع الثانيه حقت الباستا كتبت ليش كل شي بالتفصيل.

    • آلاء on 5 February, 2012 at 1:44 pm
    • Reply

    بالنسبة لمسألة صلصة الباستا نحاول نستخدم مويه السلق لأنه فيها نشا مفيد لقوام الصوص ولابد نقلب الصوص مع الباستا شوي على النار وبعدها لما نسكب الباستا بالصحن يبقى أحياناً صوص نسكبه “فوق” الباستا بحيث ماينزل للصحن ويتجمع تحت الباستا.

    مدونتك مفيدة لأبعد حد .
    شكراً لك .

    1. هلا والله …

      نستخدم مويه الباستا إذا أحتاج الصوص غالبا يكون في الصوصات السريعه موب في صوص زي هنا. لو تخلطين مويه نشا مع صوص زي هذا بتخففينه وتضعفين نكهته. الصوص مفروض يتعلق على الباستا ما يكون مغرق فيها ، أي صوص زايد خليه في القدر لا تصبينه فوق الباستا.

    • شقآوة فضل on 12 May, 2011 at 7:53 pm
    • Reply

    حبيت الصوص كتير خصوصا إنو سهل ويتآكل مع أيي شي
    الله يديك العافيه يارب 🙂

    • ظل الشفق on 17 March, 2011 at 8:00 am
    • Reply

    سويتهاااااااااااااااااااااا T_Tمن جد لساتني سويتها…. وطلعت حلوة@_@ أحسن من حقت المطاعم!!!!!طبعا مو بحذافيرها بس حاولت وضبطت معي من أول مرة!!!!!!!!!!!!!كل شيء فيها موزون طعم الملح والجبن وحتى المكرونة …
    ماحطيت بقدونس ولا ريحان..قلت المرة الجاية بالحذافير إنشاءالله…دايما اذوقها حقت المطاعم وأحاول اسويها بس هالمرة ضبطت معي …بيجيك أجر كل إلي كلوها ^^
    الله يجزاك ألف خير..من قلب صادق…الله يجزاك الف خير ويوفقك في الدنيا والآخرة…وأخيرا ضبطتها!!^_^

    1. هلا والله ..

      بالعافيه على قلبك … لا تدققين إنك تسوين الوصفه بحذافيرها مدام طلعت لذيذه معك هذا أهم شي ..

    • Anonymous on 4 March, 2011 at 4:30 pm
    • Reply

    الباستا شكلها لذيذ بس الاحظ انه مابه صوص يعني هل تشرته الباستا والا هو اصلا قليل يادوب
    يغطي الباستا ؟؟؟

    1. أكبر خطأ في الباستا إنها تكون مغرقة بالصوص … إذا خلصتي الصحن مفروض ما يبقى أي صوص فيه . الصوص يكون متعلق في الباستا وهذا ما يصير إلا إذا طبختيها صح ، و أخترتي شكل صح ونوعية ممتازة… أقري المقدمة حقت طبخ الباستا شرحت كل شي فيها.

Leave a Reply

Your email address will not be published.

%d bloggers like this: