المقبلات و الأطباق الرئيسية .. Mains and Entrees

شوربة التوم يم .. Tom Yum Soup

الكافر لايم نوع من أنواع الحمضيات . ثمر هذا الشجر مر ومافيه عصير كثير وما يستخدم في الغالب في الطبخ اللي يستخدم هو الورق و بشر الثمر بس . هذي الشوربة يميزها التوازن بين الحار و الحامض عشان كذا هو مكون مهم هنا .. عموما لو ما لقيتيه مررررررره مشي حالك بعصير اللايم العادي . بس حاولي تدورينه بيكون غير ترى .

٤ أكواب مويه
كوب ربيان مقشر ومنزوع العرق اللي في الظهر
نص علبة فطر طازج ويفضل لو كان فطر شيتاكي مقطعة أنصاص
حبتين لايم ( ليمون أخضر )
عود ليمون جراس
٣ أوراق كافر لايم
تقريبا ملعقتين كبار صوص السمك fish sauce
١/٢ كوب كزبرة مفرومه شوي
٣ حبات فلفل حار يفضل يكون من النوع التايلندي الأحمر النحيف

قطعي الليمون جراس ٤ قطع تقريبا . بعدين أضربي كل جزأ بظهر السكين في أماكن متفرقه عشان تطلعين نكهته .

أغلي المويه . بعدين حطي الليمون جراس ، الفطر ، الفلفل التايلندي ، ورق الكافر لايم و أطبخيهم شوي بس . حطي الربيان وأول ما يقلب برتقالي قفلي النار عشان ما يصير ناشف .

حطي من صوص السمك إلين تصير مالحة حسب ذوقك ( في الأكل التايلندي صوص السمك بديل للملح تقريبا ) .

أعصري اللايم بعد حسب ذوقك . بعدين حطي الكزبرة وشيلي الكافر لايم و الليمون جراس كونها ما تنوكل . وقدميها . الشوربة ماتاخذ دقايق في التجهيز .

————————————————————————————————————————————————————————–

البروكلي بالفرن .. Roasted Broccoli

طريقتي المفضله في البروكلي وخصوصا إذا كنت بسويه بدون صوص أو أي شي …
طبعا نفس الطريقة تنفع مع الزهرة أو الهليون ( أسباراجس).
سخني الفرن ل ٤٢٥
بعدين قطعي البروكلي ورشيها بزيت زيتون + ملح وفلفل أسود + فص ثوم تقريبا لكل راس بروكلي.
ودخليها الفرن و أقلبيها بعد نص الوقت تقريبا … بعدين رجعيها الفرن ..
بعد ما تستوي طلعيها ورشي عليها بارمزان مبشور وهي حاره شوي بس … وذوقي أحلى طبق جانبي …

————————————————————————————————————————————————————————–

البطاطس المشوية (الكاملة) .. Roasted Potatoes

سخني الفرن على ٣٧٥ بعدين أخرمي البطاطس بشوكه في مناطق متفرقة عشان ما تنفجر.
بعدين أدهنيها بزيت وملح بس !! حطيها بلفرن على الشبك بدون صينية
وخليها تطبخ إلين تلاقين إنها صارت لو دخلتي سكينة صغيره تطلع بسهولة و أستوت من جوا .
أفتحيها من فوق وحطي ساور كريم + زبده + كراث + جبن أي أي أي شي تحبين تقدرين تحطينه معها … نفس الطريقة ممكن تستخدم مع البطاطس الحلوه

————————————————————————————————————————————————————————–

البيف ستروجونوف .. Beef Stroganof

كيلو لحم بقر فيليه مينيوون مقطع صغار
٣ ملاعق زبده
٣/٤كوب بصل مقطع
نص كيلو فطر طازج
٢ وربع ملعقة طحين
١/٣كوب مرق لحم
١/٣كوب قشطة خفق
١/٢كوب ساور كريم
ملعقتين خردل يفضل خردل ديجون
ملعقتين شبت وملعقتين بقدونس مفروم
ملح وفلفل خشن

أول شي سخني مقلة على حرارة عاليه يفضل تكون ستانلس ستيل . بعدين و المقلة تسخن نشفي اللحم زييييييييييين عشان يتحمر صح . الحين تبلي اللحم بملح وفلفل بعدين حطي شوي زيت ( موب زيت زيتون ) في المقلة و أطبخي اللحم ولاتحركينه كثير عشان يتلون صح . أطبخيه إلين بس يتلون ٣-٤ دقايق بعدين شيلي اللحم على صحن. الحين شيلي الدهن الزايد اللي في المقلة بعدين حطي الزبده وعلى حرارة وسط أطبخي البصل و حاولي تمسحين قاع القدر عشان يلين القطع البنية اللي فيها الطعم . الحين أرفعي الحرارة شوي وحطي الفطر ورشة ملح وفلفل و أطبخي الفطر إلين يتلون ١٠- ١٥ دقيقة تقريبا. الحين رشي الطحين فوق الفطر و حركي ونزلي الحرارة إلى أقل من وسط وحركيها حوالي دقيقة .الحين أضيفي المرق، القشطة ، الساور كريم ، الخردل ، و المويه اللي نزلت من اللحم . وخليها تطبخ على غلية جدا جدا خفيفة إلين تثقل .لا تخلينها تغلي !!! أنتبهي .الحين رجعي اللحم للقدر مع الصوص وبعدين أضيفي الأعشاب ذوقي الصوص و اللحم وشوفي إذاتحتاج ملح أو فلفل بعدين قدمي.

————————————————————————————————————————————————————————–

طماطم مجففه .. Oven dried tomatoes

أول شي تسوينه إنك تشرين كمية طماط من نوعية جيدة كمية كبيرة عشان تسوين كمية كبيرة، حاولي تختارين طماط مستوي وطعمه جيد. بعدين تقطعين الطمام أنصاص بالطول و ترصينهم في صينية وتخلين الوجه المقطوع فوق . بعدين تقطعين ثوم وتخلطينه مع زيت زيتون وملح وفلفل .  طبعا هذي الأساسية بس أبدعي هنا حطي اللي تبين . وبعدين تدهنين وجه الطماط بهذا الزيت.
شغلي الفرن على ٢٠٠ فهرنهايت وحطي الطماط فيها ..
راح تاخذ حوالي ٨ ساعات عشان تنشف نسبيا .

لو تبينها شوي رطبة عشان تاكلينها خليها وقت أقل .

المسألة في النهاية على راحتك أحيانا أخليها ساعتين و آكلها كطبق جانبي و أحياناأخليها ٤ أو ٥ساعات .
بس إذا تبينها قريبة من الطماط المجفف خليها وقت أطول.بعد ماتخلطين خليها تبرد
و أحفظيها في علبة تتقفل حوالي أسبوع ،

أو لو سويتي كمية وتبين تحفظينها لوقت طويل

يمديك تحطينها في علبة أو مرطبان و تغطينها بزيت زيتون

طبعا تأكدي إن الزيت يغطيها

كونه هو اللي بيحفظها .

بعدين غطي العلبة وحطيها في الثلاجة، تقعد كذا الظاهر سنة ما عندك مشكلة.

————————————————————————————————————————————————————————–

تتبيلة رجل الخروف .. Roast leg of lamb

خردل ديجون + ثوم + روزماري + ملح خشن مطحون ( يعني موب ساسا ) وفلفل بعد خشن مطحون + زيت .
أخلطيهم مع بعض وسوي فيها زي المعجون بعدين
أدهني الرجل فيها،خليها تتبل في الثلاجة طول الليل . بعدين ثاني يوم طلعيها من الثلاجة قبل بساعتين وخليها برا الثلاجة إلين توصل لحرارة الغرفه . بعدين شغلي الفرن على حرارة عاليه عشان تحمرين اللحم أول شي ، يعني ٤٢٥ تقريبا .
حطي اللحم في الفرن في الرف الأوسط وخليه إلين يتحمر شوي تقريبا ربع إلى نص ساعة بعدين نزلي الحرارة إلى ٣٥٠ وخليه يكمل طبخ إلين يستوي .

————————————————————————————————————————————————————————–

حلقات البصل .. Onion Rings

الطريقة سهل ، تنقعينها في لبن !!! موب حليب ! لبن ساعه أو أقل . بعدين تغمسينها في طحين مع النكهات اللي تحبين
بعدين في اللبن بعدين في الطحين مره ثانيه
بعدين تقلينها في زيت حار ٣٧٥ تقريبا لو عندك ميزان حرارة .

————————————————————————————————————————————————————————–

شاورما الدجاج .. Chicken Shawarma

تبلي صدور الدجاج قبلها بيوم ، بس خليها صدور كامله لا تقطعينها .
كوب زبادي
ملعقتين كبار عصير ليمون
٤فصوص ثوم مهروسة
١/٢ملعقة صغيرة شطة
ملعقة كبيرة خل
ملعقة كبيرة بصل مفروم
ملح وفلفل
زيت زيتون
جوزة طيب
هذي تتبيلة أساسية بس لو تبين عدلي عليها على كيفك

وترى الكميات بس خطوط عامة يعني غيريها بعد على كيفك.
بعد يوم طلعي الصدور من التتبيلة . أنا أشويها في الفرن ،الفرن فيه شواية من فوق شغليها وخليها تسخن زين بعدين أرفعي صينية الفرن على الرف العلوي .شيلي شوي من التتبيلة حقت الدجاج يعني لا تخلين الدجاج مغطى بالتتبيلة عشان ما تنحرق بالفرن ، حطي الصدور في الصينية وعلى الشواية أطبخيها إلين تستوي و أقلبيها مرة هذي الطريقة تعطي نفس تأثير الشاورما العادية بفرق بسيط هو إن الدجاج ما يجي ناشف زي الشورما العادي يجيك رطب . الشورما لو لاحظتي دجاج مشوي لا أكثر ترى . بعد ما يستوي الدجاج قطعية صغار وخلصنا !! لو تبين بعد يمديك تسوين معاها الخبز العربي.

————————————————————————————————————————————————————————–
شوربة الطماطم الإيطالية .. Italian cream of tomato soup

شوربة الطماط الإيطالية سهلة وهذي الطريقة أنا متأكد إنها راح تعجبك
بس أرجع و أقول دايما جودة الأشياء هي اللي بتعطي الشوربة طعمها .

كيلو ونص طماط مشكل ( كل ما شكلتي أطعم حطي طماط صغار وكبار ولو عندك الطماط اللي يجي بالعرق حقه حطيه) .
٨فصوص ثوم
بصلتين كبار مقطعة أجنحة
١/٢كوب زيت زيتون
لتر تقريبا مرق دجاج
ورقتين غار
4 ملاعق كبيرة زبدة .
١/٢كوب ريحان مقطع
٣/٤كوب قشطة خفق

أول شي سخني الفرن على ٤٥٠

قطعي الطماط أنصاص
بعدين حطي الطماط و البصل و الثوم في صينية فرن كبييييييييرة

تأكدي إنها تكون مفرقة في الصينية موب كل شي فوق بعض .
بعدين رشي عليها ملح وفلفل و زيت زيتونحطيها في الفرن حوالي نص ساعة
أو إلين يبدأ يتكرمل شوي.بعدين في قدر كبير حطي الطماط المحمصة و المرق وورق الغار
و أطبيخها تقريبا 20 دقيقة .بعدين شيلي ورق الغار و حطي الريحان وبعدين أطحنيها .

رجعيها على النار بعدين عدلي كثافة وملوحة الشوربة على كيفك .
آخر شي حطي القشطة و الزبدة وحركي إلين تنخلط زين…زينيها بزيادة ريحان. .
————————————————————————————————————————————————————————–

شوربة العدس .. Lentil Soup

بصلة كبيرة مقطعة
٤فصوص ثم مقطعة شرايح
ملعقة صغيرة كمون
ورقة غار
كوب عدس أحمر مغسول و تأكدي مافيه حصى
5أكواب مرق دجاج ( يفضل الله يرضى عليك بعدي عن الماجي)
كوب مويه
بقدونس و ليمون للتزيين

أطبخي البصل في زيت على حرارة هادية إلين يقلب شفاف .

أضيفي الثوم و الكمون و الغار و أطبخيه دقيقة زيادة بعدين حطي المرق و العدس و الملح و الفلفل
أطبخيها 30 – 45 دقيقة .
الحين لو تحبين أطحنيها أو أطحني نصها وخلي نصها و عدلي الملح و الفلفل و كثافة الشوربة على كيفك .
بعدين زينيها بالبقدونس .

————————————————————————————————————————————————————————–
شوربة الفطر بالشعير .. Mushroom Barley Soup

٢كوب شعير حب
كوب ونص مرق دجاج للشعير + ٤ أكواب مرق دجاج للشوربة .طبعا مرق دجاج يعني مرق دجاج موب ماجي !
بصلتين كبار مقطعة
فصين ثوم مقطعة شرايح
عودين كرفس مقطعة صغار
حوالي ٧٠٠ – ١٠٠٠ جرام فطر طاااااازج !!! ما ينفع أبدا أبدا أبدا هنا المعلب .. مقطع شرايح
٣ملاعق زبدة
ملعقة زيت زيتون
ملعقتين كبار طحين
ملعقة كبيرة خل بلسمك أو شيري
١/٢كوب ساور كريم
١/٢كوب قشطة خفق

أول شي نطبخ الشعير في قدر صغير مع المرق حقه مع ربع ملعقة ملح على غلية خفيفة
حوالي نص ساعة أو إلين يلين.بعدين ذوبي الزبدة و الزيت في قدر وعلى حرارة وسط
أطبخي البصل و الكرفس إلين يذبل بعدين حطي الفطر و الملح والفلفل وعلي الحرارة
إلين أعلى شي عشان تلونين الفطر مع التحريك المستمر راح تاخذ شوي وقت العملية هذي
بعدين نزلي الحرارة مرة ثانيه للوسط وحطي الثوم و أطبخيه شوي بس،
بعدين حطي الخل + كوب مويه وحركي زيييييين مع مسح قاع القدر
عشان تذوبين كل القطع البنية اللي بتعطي الشوربة نكهتها .بعد ما يختفي السائل
رشي الطحين عليها وحركي زين حوالي دقيقة هذا اللي راح يثقل الشوربة .
الحين أضيفي المرق وخليها تغلي على غلية جدا خفيفة حوالي ربع ساعة.
الحين أضيفي الشعير المطبوخ و حركيه شوي و بعدين أضيفي الساور كريم و القشطة
وخليها تطبخ بس لا تخلينها تغلي أبدا !!! أو فيه إحتمال تفصل القشطة يعني أنتبهي .
آخر شي ذوقي الشوربة و تأكدي من الملح والفلفل. لو تبين أطعم بعد حطي فطر مجفف
لو لقيتيه راح يعطي نكهة فطر قوية.

————————————————————————————————————————————————————————–

شوربة الشمر والجزر .. Carrot and fennel soup

جدا سهلة ومن أطعم الشوربات اللي ذقتها ، لا تنسين طعم الشوربة يتحسن
كل ما كان المرق أطعم وكل ما كانت المكونات طازه
حبتين شمر القلب بس ، مقطعة شرايح ١/٤ إنش تقريبا .
نص كيلو جزر مقطع حلقات نفس الحجم
بصله كبيرة مقطعة أجنحة بعد نفس الحجم
٣فصوص ثوم
تقريبا ٥ ملاعق زيت زيتون
١/٢ملعقة سكر
٤أكواب مرق دجاج
ملعقة صغيرة من بذور الشمر
سخني الفرن على ٤٥٠ . بعدين حطي الخضار ورشيها بشوي زيت زيتون وملح وفلفل و سكر في صينية فرن كبيرة،وحطيها في رف الفرن الأسفل وخليها تتحمر إلين تبدأ تلون شوي حوالي ٢٥ – ٣٠ دقيقة وطبعا حركيها بعد نص الوقت عشان تستوي من تحت بعدين حطي الخضار المحمرة في قدر كبير مع المرق وخليها تطبخ حوالي ٢٥ دقيقة بعدين أطحني الشوربة . رجعيها على النار و عدلي الطعم لو تبين بالملح و الفلفل أو لو تبين زيدي مرق عشان تخففينها أو خليها شوي تطبخ عشان تثقلينها .

————————————————————————————————————————————————————————–

كيش الفطر و السبانخ .. Spinach and Mushroom Quich
أول شي تسوين العجينة :

كوب ونص طحين
ملعقة صغيرة ملح
ملعقة صغيرة سكر
أصبع زبدة مقطع مكعبات حجمها حوالي ١ سم
بيضة
ملعقة صغيرة مويه باردة
بياض بيضة
حطي الطحين و الملح و السكر في خلاط مولينكس ، بعدين حطي الزبدة الباردة و أخلطي شوي إلين يسويلك تكتلات .
بعدين حطي البيضة و المويه بعد ماتخلطينهم مع بعض .
الحين أبدي أعجني العجينة شوي بس !!!! يعني ٤ مرات لاأكثر بس عشان تخلطينها
موب عجن عجن زي الخبز . غلفيها بنايلون ورجعيها الثلاجة ساعةعلى الأقل .
الحين أفردي العجينة ورصيها في صينية التارت ( تكفي العجينة هذي تارت حجمها ١٢ إنش )
بعدين رجعيها الثلاجة ساعة ثانية .
الحين سخني الفرن على ٤٠٠ بعدين سووي زي ما سويت في موضوع التارت
حطي قصدير أو ورق زبدة و أملي العجينة بوزن مثل رز أو حبوب أو أي شي ثاني .
بعدين أطبخيها في الفرن ٢٠ دقيقة . بعدين شيلي الوزن و القصدير و خرميها بشوكة
و كملي طبخ تقريبا ١٠ دقايق أو إلين تبدأ تسير بنية.
الحين أدهني التارت ببياض البيض طبقة جدا خفيفة ، هذي عشان تمنع الرطوبة تتسرب للعجينة.

الحين الحشوة :

ملعقة كبيرة ونص زبدة .
١/٣كوب بصل ذاك الفرنسي مدري لو تعرفينه يجي صغير و أحمر ، مقطع بس لو ما عندك ينفع بصل عادي .
١/٤كيلو فطر طازج لو سمحتي مقطع شرايح نحيفة
زعتر بري
٣/٤كوب قشطة خفق
بيضتين
رشة ملح
رشة فلفل
بصلتين خضر مقطعة صغار
نص كوب سبانخ .
ملعقتين جبنة جريير .. Gruyere

الحين ذوبي الزبدة بعدين أطبخي البصل إلين يذبل بعدين حطي الفطر و الملح و الفلفل
وأرفعي الحرارة على أعلى شي ،أطبخي الفطر إلين يبدأ يلون وينطبخ حوالي ٨ دقايق
بعدين نزلي الحرارة و حطي السبانخ وقلبيها . بعدين شيلي الخليط من المقلة على صحن إلين يبرد.
الحين سخني الفرن على ٣٥٠ بعدين حطي الزعتر البري في قاعدة التارت
وبعدين الفطر و السبانخ،بعدين أخلطي القشطة مع البيض وملح وفلفل وصبيها على التارت
بعدين رشي فوقها الجبن والبصل الأخضر.
حطيها في الفرن إلين ما يجمد الكسترد حوالي ٢٥ دقيقة ، بعدين خليها ترتاح ربع ساعة قبل تاكلينها

————————————————————————————————————————————————————————–

سلطه خضار مشويه مع صوص زيتون .. Grilled Vegetable Salad

أول شي الصوص :

فصين ثوم
ملعقة كبيره كابر
كوب زيتون بدون نوى
١/٢ ملعقة صغيره سكر
١/٢ ملعقة صغيره فلفل حار مجروش
ملعقتين كبار خل عنب أحمر
١/٢ كوب زيت زيتون

حطي المكونات كلها في خلاط مولينكس وأخلطيهم إلين يتقطعون شوي بس يكونون لسا خشنين تقريبا .

هذا الصوص موب بس لهذي السلطه هذا يسمونه أوليفادا صوص يوناني مشهور قدميه مع أشياء كثير ينفع .

للسلطة :

راس بروكلي مقطع على شكل زهرات
راس زهره ( أو راسين بروكلي لو تبين ) مقطع على شكل زهرات
حبه بصل أحمر مقطعه أجنحه عريضه
حبتين فلفل مشكل أحمر ، أصف، أخضر .. اللي تبين
ملح وفلفل وزيت زيتون

رشي الخضار بشوي زيت زيتون وبعدين شوي بس ملح وفلفل .

شغلي شوايه الفرن من فوق على أحر شي وحطي الخضار في صينيه فرن ودخليها الفرن إلين تبدأ تنشوي من الأطراف بس . بعدين طلعيها وأخلطيها مع الصوص

————————————————————————————————————————————————————————–

جوانح الدجاج الحاره .. Chicken wings

هذي الحاره :
تفضلي :

تاخذين أول شي أجنحة دجاج وتشيلين الطرف الأخير . بعدين تقسمين الجناح نصين . الحين حطي جيبي كوب طحين وحطي معهم ملعقة صغيرة بابريكا ، ملعقة صغيره بوردة ثوم ، ملعقة صغيره فلفل حار ، ملعقة صغيره فلفل أسود ، ونص ملعقة صغيره ملح وحركي البهارات مع الطحين . رشي الطحين على الأجنحة وغطيها فيه بعدين حطيهم في الثلاجه على الأقل ساعتين عشان تتبل وعشان تلصق التغطيه فيه .

الحين أقلي أجنحة الدجاج في زيت حار إلين تستوي من الداخل . بعدين سويي التغطيه اللي هي عباره عن ١/٤ أصبع زبده مع ١/٢ كوب شطة من نوعية frank’s أو لو مرررررره مالقيتيها أستخدمي شطة كرستال عادية مع شوي تباسكو ، ذوبي الزبده وحطي الشطة بعدين أول ما ينخلطون صبيهم على الأجنحة قبل التقديم وقدميها مع صوص الرانش. .

————————————————————————————————————————————————————————–

منتو ربيان .. Shrimp dumplings

بالنسبة للعجينة للأسف طلع ضروري نشا القمح ( غير نشا الذرة ) .. مدري إذا تقدرين تلاقينه أو لأ ؟ بس هو اللي يخليه شفاف زي ما شفتي ..

جربي تسوينها ب wonton wrappers أعتقد شفتها في السوبرماركت مره ، قريبه منها .

الحشوة :

بياض بيضه
ملعقة كبيره صويا خفيفة
ملعقة صغيرة سكر
ملعقة صغيرة نشا
١/٢ ملعقة صغيرة زيت سمسم
ملعقة صغيرة ملح
١/٢ ملعقة صغيرة فلفل أبيض
٢٢٥ جرام ربيان منظف ومقشر
ملعقة كبيره زيت
١/٤ كوب بامبو شووت bamboo shoot تلاقينه معلب في السوبرماركت

أخلطي المكونات مع بعض وخليها في الثلاجه ساعتين بعدين لفيها في الورق حق اللف و أطبخيها بالبخار زي المنتو إلين تقلب الحشوة برتقالية .

————————————————————————————————————————————————————————–

سلطة بطاطس مع الأعشاب .. Potato and herb salad

كيلو ونص بطاطس حمراء ( لو ماعندك أستخدمي بطاطس عاديه بس الحمراء حلوه كونها تحافظ على شكلها ما تنهرس مع الطبخ )

٣ ملاعق كبيره خل رز .. متوفر في السوبرماركت .. لو ماعندك أستخدمي ملعقتين خل تفاح

٣/٤ كوب مايونيز

٣ بصلات خضراء مقطعه صغار

عود كرفس مقطع شرايح نحيفة

١/٤ كوب بقدونس مفروم

١/٤ كوب ريحان أو نعناع مفروم

ملعقتين كبار شبت مفروم

ملعقة صغيره بشر ليمون

ملح وفلفل

حطي البطاطس في مويه بارده وخليها تغلي بعدين نزلي الحراره إلين تصير على غليه جدا خفيفه . خليها تطبخ إلين تصير لينه إذا دخلتي سكين تدخل بسهوله للأخير . طلعيها من المويه وصفيها وخليها تبرد إلين تصير سهل تمسكينها بس لا تخلينها تبرد تماما !!

قشريها لو تبين . وبعدين قطعيها مكعبات . أخلطي المكونات كلها وذوقي وأنتي تحطين الملح و افلفل . السلطه هذي ممكن تتسوى اليوم اللي قبله وتنحط في الثلاجه

————————————————————————————————————————————————————————–

هذي طريقة فوندوتا إيطاليه غير شوي عن الفوندو بس هي أسهل و أصعب تفصل زي الفوندو العادي .. Italian fondotta

٤٠٠ جرام جبن مقطع مكعبات
كوب حليب كامل الدسم
٣ صفارات بيض
فص ثوم
ملح
لو عندك زيت فقع بيكون رهيب هنا

أنقعي الجبن في الحليب ساعتين عالأقل إلين يصير لين مره . صفي الحليب من الجبن .

الحين في حمام مائي كأنك تذوبين شكولاته ، حطي الحليب و البيض مع التحريك بإستمرار تقريبا ٣ – ٤ دقايق إلين يثقل شوي . بعد ما يثل حطي الجبن على دفعات شوي شوي إلين يذوب بنعومه . أطبخي الخليب زود ٥ دقايق تقريبا بعدين ذوقيه وعدلي الملح . لا تخلين الخليط يغلي !! أنتبهي من هذي النقطة عشان ما يتكتل وعشان ما يفصل عليك .

وهو يذوب جهزي صحن الفوندو بإنك تدهنينه بصل الثوم عشان تعطيمه طعم ثوم خفيف مره بعدين صبي الجبن في الصحن حق الفوندو وقدميه مع أي شي تحبين .. قطع خبز فرنسي مثلا ، أي خضار زي البروكلي أو الجزر أو الزهرة ، بطاطس محمرة في الفرن أو حتى مسلوقه ، فطر سوتيه أو محمر في الفرن ، دجاج ، لحم … الخيارات أحس كثيره …

————————————————————————————————————————————————————————–

ديب سبانخ للشيبس مثلا .. Spinach dip

١١٠ جرام تقريبا جبن فيلادلفيا على حرارة الغرفة
علبة خرشوف معلب مقطعه صغاااار
فص ثوم مفروم
١/٢ كوب بارمزان
ربع كوب سبانخ مقطع
١/٢ كوب ساور كريم
١/٢ كوب مايونيز

سخني الفرن على ٣٥٠ ..

أخلطي كل المواد مع بعض وحطيها في صحن يدخل فرن وحطيه في الفرن تقريبا نص ساعة أو إلين الطبقة اللي فوق تبدأ تتحمر.

————————————————————————————————————————————————————————–

وصفة دجاج مشوح مع بهارات كيجون .. Cajun chicken

سويي التتبيلة الجافة أول :
٣ملاعق كبيره فلفل حار مطحون ، ملعقتين كبار سكر بني ، ملعقتين كبار بابريكا ( يفضل مدخنة لو عندك ) ، ملعقة كبيره كمون مطحون ، ملعقة صغيرة بودرة ثوم ، ملعقة صغيرة أوريجانو .. أخلطيهم مع بعض بصحن ..

الحين جيبي صدور دجاج ونشفيها زييييين بعدين رشي على الوجهين ملح وفلفل أسود وبعدين حطي عليها خلطة البهارات و أضغطي عليها شوي بيدك عشان تلصق ..

سخني مقلة ( يفضل ستانلس ) على حراره أعلى من وسط بشوي و حطي شوي زيت و بعدين شوحي الدجاج إلين يتحمر الوجه الأول . نزلي الحراره بحيث البهارات ما تنحرق بعدين أطبخي الوجه الثاني . بعد ما يستوي الدجاج من داخل ( يروح اللون الوردي ) شيلي الدجاج من النار علطول وخليه يرتاح دقيقتين قبل تاكلينه .

الدجاج رهيب لأكثر من شي موب بس لحاله تقدرين تسوينه برجر دجاج رهيب أو حتى تقطعينه ساندوتشات .

————————————————————————————————————————————————————————–

الرز البخاري ..

السر فيه في الجزر و الدهن دايما يكون دهنه أكثر من الرز العادي . الزيت ينفع كدهن بس دايما حطي دهن من تحمير الدجاج أو اللحم مثلا مع الرز هذا راح يسوي كل الفرق .

عموما هو السر في المكونات و الطريقة أكثر من إنه في البهارات زي ماناس كثير يسوون ….

قطعي بصلة و فص ثوم و أبشري حبة جزر كبيرة .

أطبخي البصل في زيت نباتي إلين يبدأ يتلون من الأطراف شوي بعدين حطي الثوم و الجزر و البهارات ( شوي قرنفل ، زنجبيل ، قرفة ، هيل ، فلفل حار ، حبوب كمون ) أطبخيهم بعد ما تقصرين الحرارة إلين يذبل الجزر . الحين حطي معجون طماط ( حوالي ملعقة كبيرة ) بعدين حركيه معهم شوي . الحين حطي الرز ( الوصفة هذي لكوب رز بس ) و أطبخيه شوي إلين يبدأ يتقمر شوي بعدين حطي المرق ( نوعية المرق هي كل شي هنا أستخدمي مرق لذيذ وطعمه قوي ) و الملح ( ملعقة صغيرة ) و حطي معهم لو تبين شوي من دهن الدجاج أو اللحم اللي يتحمر . أول ما يبدأ يغلي نزلي الحرارة على أقلللل شي وغطي القدر زيييييييييين وخليه يطبخ إلين يستوي الرز . بعد ما يتسوي خلي القدر مغطي وخليه يرتاح بدون نار ٥ دقايق – نص ساعة على الأقل وبعدين قدميه مع الكشنة عالوجه .

لو تلاحظين ما قلت لك حطي لحم أو دجاج لأني شخصيا أسوي الدجاج أو اللحم في الفرن و أستخدم مرق أنا أكون مسويه من أول … بس لو تبين أستخدمي مويه عاديه و أستخدمي دجاج أو لحم عادي زي باقي الوصفات بعدين كبي الرز آخر شي بعد ما تشيلين الدجاج أو اللحم .

————————————————————————————————————————————————————————–

الباييا .. Paella

السيفوود ..

دجاجة مقطعه ١٢ قطعه .. يعني تقطعينها رجل ، الفخذ تقسمينه ، الصدر تقسمينه بالنص ، و جناح .
ملح وفلفل
ملعقة صغيرة أوريجانو مجفف
زيت زيتون
فصين ثوم
١/٢ بصله كبيره مقطعه صغار
حبتين طماط معلب منزوعة البذور و مقطعه
ملعقة صغيرة بابريكا حلوه أو مدخنة أو في أسوأ الحالات حاره
كوبين رز بدون غسل !
ملعقتين صغار خيوط زعفران
٦ أكواب مرق دجاج
ذيلين لوبستر مقسومة بالنص
نص كيلو كلماري مقطع حلقات
نص كيلو ربيان كبار منظف
١٢ حبة مسل mussels
١/٢ كوب بازلاء مجمده مذوبه
ليمون

الحين الباييا الناجحة لازم يكون عليها طبقة رز تقرمش من تحت (حكاكة) عشان كذا أستخدمي أعرض أعرض قدر عندك و أعلى أعرض عين غاز بعد .

نشفي الدجاج زين بمنديل رول . بعدين رشي عليه ملح وفلفل و أوريجانو . سخني المقلة على حرارة وسط وبعد ما تحتر حطي زيت زيتون و أطبخي الدجاج إلين تحمرين الوجه الأول بعدين أقلبيه وحمري الوجه الثاني ، نزلي الحرارة وكملي طبخ إلين تقريبا يستوي الدجاج من داخل . الحين شيلي الدجاج عالجنب وكبي الزيت بس لا تنظفين المقله !

رجعي المقلة على حرارة وسط وحطي شوي زيت زيتون مع البصل ورشة ملح و أطبخيه إلين يذبل بعدين حطي الثوم و الطماط و أطبخيه إلين يبدأ البصل شوي يتكرمل بعدين حطي البابريكا وكملي طبخ.

حطي الرز عالخليط وقلبيه مع الدهن و أطبخيه شوي عشان تحمصينه شوي .حطي الزعفران في ربع كوب مويه حاره وخليه ٥ دقايق بعدين كبيه عالرز مع المرق . خلي المرق يطبخ على غليه جدددددددددا خفيفه بدون ما تغطين القدر أو تحركين الرز حوالي ١٠ دقايق.الحين حطي السيفود مع الدجاج اللي طبخنا وخليه يطبخ مع الرز على غليه جدا خفيفه إلين يصير الرز ألدنتي و يفتح المسل. الحين حطي البازلاء وخليها تطبخ إلين يتشرب الرز كل المويه . طفي النار وخليها ترتاح ٥ دقايق قبل تاكلينها .

 

————————————————————————————————————————————————————————–

كول سلو .. col slow

١/٢ راس ملفوف أخضر مقطع شرايح نحييييييفه
١/٢ راس ملفوف أحمر مقطع بعد شرايح نحيفة
جزرة مقطعه بعد شرايح نحيفه
١/٢ كوب لبن مراعي أو غيره
٤ ملاعق كبيره زبادي
٤ ملاعق كبيره مايونيز
ملعقة كبيره من المويه حقت المخلل
ملعقة صغيره خردل بودره
ملعقة كبيره كراث مقطع
ملح وفلفل أسود
ولو تبين بعد زيدي عليهم بودرة كرفس

أخلطيهم مع بعض وخلاص …. لو تبين يمديك تبشرين الخضار هنا أو حتى لو تبينها أنعم وأنعم بعد أفرميها بالخلاط المولينكس فيه ناس يحبونها كذا بس لاتخلينها تصير سايل يعني بس قطع صغيره هذا بيخليها زي حقت كنتاكي لو تحبينها .

————————————————————————————————————————————————————————–

بارميجانا الباذنجان .. Eggplant Parmigana
أول شي تسوينه هو إنك تقطعين الباذنجان بالطول بحيث يكون عندك شرايح عريضة شوي تقريبا زي الستيك. الحين رشي عليها ملح وفلفل بعدين غطسيها في طحين بعدين بيض بعدين بقسماط مخلوط معه جبن بارمزان .

سخني شوي زيت زيتون و أقلبي الباذنجان إلين يتحمر الوجهين بعدين حطيه على ورق نشاف ..

الحين سويي صوص الطماط الأساسي ( إذا ما عندك الطريقة بنزلها قريب إن شاء الله أو دوريها في موضوع الباستا) بعدين حطي شوي صوص على صينية بعدين الباذنجان بعدين شوي صوص فوق الباذنجان بعدين موزاريلا و شوي بارمزان ودخليها فرن ٣٧٥ إلين تذوب الجبنة وتبدأ تتحمر .

————————————————————————————————————————————————————————–

باذنجان مخلل .. Pickled Eggplant
قطعي الباذنجان عيدان زي البطاطس تقريبا بعدين رشي عليها ملح وقلبيها فيه وحطيها في صفاية بلاستك. خليه نص ساعة عشان الملح يشرب الرطوبة الزايدة و المراره من الباذنجان ( لو كان الباذنجان اللي عندك صغير ما يحتاج ) .

الحين أشطفي الباذنجان بالمويه عشان تشيلين الملح الزايد بعدين حطيه بين منديلين رول وخليه يجف زيييين. الحين سويي سائل التخليل بإنك تخلطين جزأ خل مع جزئين موية يعني لو أستخدمتي كوب خل حطي كوبين مويه. نوعية الخل راجعتلك بس يفضل تستخدمين خل عنب أو تفاح وبعدي عن الخل الأبيض ماله طعم. أغلي سائل التخليل مع ورق غار وشوي فلفل أسود كامل و شوي كزبرة وكمون كاملة بعدين حطي الباذنجان و أطبخيه ٣ دقايق تقريبا. حطي فصوص ثوم في مرطبان نظيف بعدين حطي عليها شوي زيت زيتون بعدين حطي الباذنجان فوقها وبعدين سائل التخليل إلين يوصل لأعلى شي. قفلي المرطبان وخليه على حرارة الغرفة إلين يبرد بعدين حطيه في الثلاجه عالأقل أسبوع يتخلل. كليه في خلال ٣ أسابيع تقريبا .

————————————————————————————————————————————————————————–

ربيان أو دجاج أو لحم بالكاجو .. Chicken Cashew

الصوص :

1/2 كوب مرق دجاج
ملعقتين صغار نشا
1/4 كوب صوص هويسان
ملعقتين كبار صويا
ملعقة صغيرة زيت سمسم .

أخلطي المقادير مع بعض وخليها عالجنب .

للطبخة :

كوب كاجو غير مملح
ملعقتين كبار زنجبيل مفروم
فصين ثوم مقطعه
3 أكواب خضار مشكلة حسب الرغبة
تقريبا 350 جرام ربيان مقشر ومنظف

سخني مقلة كبيره على حرارة عاليه ، حطي شوي زيت و أقلي الكاجو مع الثوم و الزنجبيل إلين تطلع ريحتهم تقريبا 30 ثانية . حطي الخضار و أقلبيهم شوي بعدين حطي شوي مويه وغطي القدر . خليه يطبخ إلين الخضار تصير مستويه بس لسا تقرمش شوي تقريبا 3 دقاق . حطي الربيان و الصوص وخليهم يطبخون إلين يقلب الربيان برتقالي ويثقل الصوص شوي . بس …

————————————————————————————————————————————————————————–

شوربة الذرة الصينية .. Corn Soup
٣ أكواب مرق دجاج
علبة ذرة حجمها ٢٥٠ جم اللي يكون مكتوب عليها كريمد creamed corn تلاقينها في السوبرماركت.
علبة ذرة كاملة
كوب دجاج مطبوخ ومقطع
ملعقة كبيره نشا
ملعقتين كبار مويه
بياض بيضتين
بصل أخضر

حطي المرق و الذرة المطحونه و الذرة الكاملة و الدجاج في قدر و خليهم يطبخون على غلية خفيفه . أخلطي النشا و المويه مع بعض بعدين صبيهم على الشوربة و خليهم يطبخون إلين تثقل ويروح طعم النشا . ذوقي الشوربة وعدلي الملح و الفلفل (فلفل أبيض) و السكر لو أحتاجت. أخفقي بياض البيض شوي بعدين حطيه عالشوربة و أطبخيها إلين تبدأ تطلع زي الرغوة عالشوربة .. وبس

————————————————————————————————————————————————————————–

جينيرال تسو  .. General tso chicken (Kendo chicken)

الصوص :

ملعقة صغيرة زيت سمسم
٤ ملاعق صغيرة نشا
٤ ملاعق صغيرة سكر
٥ ملاعق صغيرة خل رز
٦ ملاعق كبار صويا خفيفه
١/٢ كوب مويه

للدجاج :

نص كيلو صدور دجاج
بيضه
ملعقة كبيره نشا

باقي الأغراض

فلفل حار أحمر حسب الرغبة
ملعقة كبيره زنجبيل
٣ فصوص ثوم مقطعه صغار
٤ حبات بصل أخضر
سمسم

————

أخلطي مقادير الصوص وحطيها على جنب …

الحين أخلطي النشا مع البيضه و قلبي الدجاج فيهم .

سخني الزيت و أقلي الدجاج إلين يصير يقرمش من برا ..

طلعي الدجاج وحطيه على ورق عشان يشرب الدهن … وكبي أغلب الزيت وبقي بس شوي عشان نطبخ الفلفل و الزنجبيل و الثوم ..

الحين أطبخي الزنجبيل و الثوم و الفلل إلين تطلع ريحتهم شوي بعدين شيليهم لو ما تبين طعمها قوي …

رجعي الدجاج و صبي الصوص عليه و أطبخيه معه شوي بعدين طفي النار و رشي حلقات البصل الأخضر و السمسم .

————————————————————————————————————————————————————————–

شوربة ربيان أو الأستكوزا ( بيسك ) .. Shrimp or Lobster Bisque
هذي جدا لذييييييييذة وهي تمشي بأي نوع قشريات ربيان ، كراب ، ستاكوزا أو حتى خليط منهم .

هذي طريقة بسك ربيان .

٣/٤ كيلو ربيان غير مطبوخ ومقشر .. طبعا القشر ماترمينه !! خليه راح نسوي منه مرق ربيان هنا .
أصبع زبده
زيت زيتون
حبتين كراث هندي .. يختلف عن الكراث العادي كثيييير عموما تلاقينه في كل سوبرماركت يجي طويل وعريييييض . نستخدم الجزأ الأبيض منه بس . نقطع الجزأ الآخضر ونرميه . بعدين الجزأ الأبيض نقطعه بالطول ونغسله زييييين بعدين نقطعه شرايح .
٣ حبات كرفس مقطعه حلقات
٢ حبة جزر مقطعه نفس الكرفس
ورقة غار
قشر نص برتقاله .. القشر نبيه قطعه كبيره لا يكون مفروم ناعم مره
ملعقتين كبار معجون طماط
ملعقة كبيره خل عنب + ١/٤ كوب مويه
٣ ملعقت كبيره طحين
٤ أكواب قشطة خفق
ملح وفلفل
كراث عادي للزينة مع عصير ليمون

نسخن ٣ ملعقت زيت زيتون بعدين نذوب الزبده معها على حرارة وسط .. نحط عليهم قشر الربيان بس القشر !! و الكراث و الكرفس و الجزر ومعجون الطماط وورق الغار و قشر البرتقال ونطبخهم إلين تلين الخضار شوي حوالي ١٠ دقايق . الحين نصب عليهم الخل مع المويه ونحرك زييييييين إلين يتبخر كل المويه . الحين نحط الطحين ونحركه حوالي دقيقتين. الحين نحط المويه ونخليها تطبخ على غليه خفيفه حوالي ٢٠ دقيقه .. نحط القشطة ونتأكد إن الحرارة ما تزيد عن غلية جددددا خفيفه ونخلي الشوربة تطبخ زياده ٢٠ دقيقه . نصفي الشوربة في قدر ثاني ونذوق الملح و الفلفل . الحين نرجع الشوربه لغليه خفيفه بعين نحط الربيان بعد ما نقطعه قطع كبيره لو كان كبير مره نخليه يطبخ حوالي دقيقتين أو إلين ما يقلب لونه برتقالي .. ( لا تخلين الربيان يطبخ أكثر من كذا عشان ما يصير قاسي ) .. قدمي الشوربه مع الليمون و الكراث عالوجه .
أوكي الشوربة وعرفتها هذي إسمها بيسك .. هي نوع من الشوربات البحرية الثقيلة بس بعد اللذييييييييييييييذه … الشوربه الثانيه ماعرفتها والله .. و الربيان بعد ماعرفته لا هو و لا الصوص .. هذي طريقة بيسك ربيان رهييييييييييييييييبة وإنشاء الله أحسن من حقت المطعم بعد لأني ذقت كثير في مطاعم بس هذي كانت شوي غير … ٣/٤ كيلو ربيان غير مطبوخ ومقشر .. طبعا القشر ماترمينه !! خليه راح نسوي منه مرق ربيان هنا . أصبع زبده زيت زيتون حبتين كراث هندي .. يختلف عن الكراث العادي كثيييير عموما تلاقينه في كل سوبرماركت يجي طويل وعريييييض . نستخدم الجزأ الأبيض منه بس . نقطع الجزأ الآخضر ونرميه . بعدين الجزأ الأبيض نقطعه بالطول ونغسله زييييين بعدين نقطعه شرايح . ٣ حبات كرفس مقطعه حلقات ٢ حبة جزر مقطعه نفس الكرفس ورقة غار قشر نص برتقاله .. القشر نبيه قطعه كبيره لا يكون مفروم ناعم مره ملعقتين كبار معجون طماط ملعقة كبيره خل عنب + ١/٤ كوب مويه ٣ ملعقت كبيره طحين ٤ أكواب قشطة خفق ملح وفلفل كراث عادي للزينة مع عصير ليمون نسخن ٣ ملعقت زيت زيتون بعدين نذوب الزبده معها على حرارة وسط .. نحط عليهم قشر الربيان بس القشر !! و الكراث و الكرفس و الجزر ومعجون الطماط وورق الغار و قشر البرتقال ونطبخهم إلين تلين الخضار شوي حوالي ١٠ دقايق . الحين نصب عليهم الخل مع المويه ونحرك زييييييين إلين يتبخر كل المويه . الحين نحط الطحين ونحركه حوالي دقيقتين. الحين نحط المويه ونخليها تطبخ على غليه خفيفه حوالي ٢٠ دقيقه .. نحط القشطة ونتأكد إن الحرارة ما تزيد عن غلية جددددا خفيفه ونخلي الشوربة تطبخ زياده ٢٠ دقيقه . نصفي الشوربة في قدر ثاني ونذوق الملح و الفلفل . الحين نرجع الشوربه لغليه خفيفه بعين نحط الربيان بعد ما نقطعه قطع كبيره لو كان كبير مره نخليه يطبخ حوالي دقيقتين أو إلين ما يقلب لونه برتقالي .. ( لا تخلين الربيان يطبخ أكثر من كذا عشان ما يصير قاسي ) .. قدمي الشوربه مع الليمون و الكراث عالوجه

————————————————————————————————————————————————————————–

شوربة الكرنب و البيكون .. Bacon and Cabbage Soup

حطي ١٠٠ جرام بيكون تقريبا في قدر وغطيه بمويه بارده و أسلقيه يمكن ٥ دقايق . راح يطلع زي الرغوه شيليها كل شوي . بعد ٥ دقايق طفي النار وصفيه. بعدين خليه يبرد وقطعيه مكعبات صغيره .

الحين ذوبي شوي زبده بعدين أطبخي فيها حبة بصل مقطعه صغار إلين تذبل. بعدين حطي عليهم حبتين بطاطس مقطعه مكعبات صغيره و أطبخيها شوي في الزبده . الحين حطي ٥ أكواب مرق دجاج ، موب ماجي ، مرق دجاج مع ورقة غار وشوي ملح وفلفل . أطبخيهم إلين يستوي البطاطس بعدين هدي النار شوي وحطي نص راس كرنب مقطع شرايح و أطبخيه ٥ دقايق تقريبا . آخر شي شيلي ورقة الغار و أطحي الشوربة بخلاط بعدين رجعيها للقدر وعدلي الثقل و الملح و الفلفل .. تعدلين الثفل بإنك تزيدين مرق لو أحتاجت أو تخلينها تطبخ شوي لو كانت خفيفه أكثر من اللازم .. آخر شي تضيفين البيكون وبس .

————————————————————————————————————————————————————————–

سلطة يونانية .. Greek Salad

قطعي مجموعه فلافل ( أحمر ، أصفر ، أخضر ) .. مع خيار و بصل أحمر وشوي ورق نعناع وزيتون يوناني يفضل كلمتا .. آخر شي قطعي عليهم جبنه فيتا .. ولازم فيتا بدونها ماصارت سلطة يونانيه ..

الخلطة سويها بإنك تخلطين جزأ خل عنب مع 3 أجزاء زيت زيتون وشوي أوريجانو ورشه ملح وفلفل .. أخلطيهم مع بعض زيين بعدين رشيها شوي شوي عالسلطة .

————————————————————————————————————————————————————————–

سلطة الطماط و الأفوكادو .. Avocado and tomato salad
قطعي الأفوكادو شرايح نحيفه .. وقطعي طماط شرايح نحيفه بنفس السمك تقريبا .. رصيهم ورى بعض بعدين أعصري عليهم ليمون وزيت زيتون وشوي أوريجانو ..

————————————————————————————————————————————————————————–
كوكتيل الربيان … shrimp coctail

أسلقي الربيان في مويه مملحه على غليه خفييييفه إلين يقلب برتقالي بس ! لا تخلينه أكثر من كذا عشان ما يصير ناشف . وبس قدميه في كاس كوكتيل مع صوص ثاوزند آيلند أو صوص روسي .
http://topchefcooks.com/thousand-island-dressing/

السلطة قدمي نفس الصوص اللي فوق مع الربيان و أفوكادو و منقا أو بابايا لو تحبين و بصل أحمر .. هذي سلطة رهييييبه .

————————————————————————————————————————————————————————–

الارز المكسيكي .. Mexican rice

أطبخي بصله مع شوي كمون حب ، فلفل أسود ، وكزبرة في شوي زيت إلين تقلب شوي ذهبي بعدين نزلي الحراره وحطي ٤ فصوص ثوم مقطعه شرايح و حبه فلفل حار مقطعه شرايح أطبخيهم شوي بس بعدين حطي ملعقة كبيره صلصة . الحين حطي عليهم كوبين رز بسمتي مغسول و أطبخيه شوي في الزيت يمكن دقيقه تقريبا . الحين حطي مرق دجاج تقريبا ٣ أكواب ونص + ملعقة صغيرة ملح وغطي القدر زيييييين بمنشفه رطبه بعدين الغطاء حق القدر ونزلي الحراره على أقل شي. أطبخيه حسب الرز اللي عندك بياخد من ١٥ – ٢٠ دقيقه بعدين طفي النار وخليه يرتاح نص ساعة قبل تاكلينه .

————————————————————————————————————————————————————————–

زهره محمرة بالفرن .. Oven roasted cauliflower

أخلطي فص ثوم مع نص عصير ليمونه و بشر نص ليمونه وملح وفلفل وزيت زيتون . صبي الخليط على الزهرة بعدين أفردي الزهرة في صينية بحيث تكون مفرقه عن بعض يعني لا تصير الصينية صغيرة .

الحين شغلي الفرن على ٤٥٠ ( من تحت طبعا ) وبعد ما يحتر حطي الزهرة و خليها إلين تبدأ الأطراف تقلب ذهبي . طلعيها من الفرن ورشي عليها جبن بارمزان لو تبين وبس …

————————————————————————————————————————————————————————–

الفول العادي

فول عادي .. أنا أحسبك تبين طبق غير ….

الفول سهل .. الفول عبارة عن فول مطبوخ مع بصل وثوم وبهارات بعدين مطحون بس …. لو تبينه يصير شوي أحمر حطي صلصة و عدس .. لو تبين بعد يمديك تسوينه حب يعني بدون طحن وبعد بيكون رهيب ..

كل علبتين حطيلها تقريبا بصله كبيره .. أطبخي البصل على حراره هاديه في شوي زيت إلين تصير شفافه وتبدأ تصير صفراء بعدين حطي الثوم و أطبخيه شوي بس . الحين حطي صلصة طماط تقريبا ربع علبة لكل علبة فول و قلبيهم مع بعض . الحين حطي الفول و البهارات اللي تبين بالمويه حقته و أطبخيه شوي . البهارات تكون على كيفك طبعا بس فلفل حار ، فلفل أسود ، ملح طبعا ، كمون ، كزبرة يمكن هذي الأساس وزيدي أو نقصي على كيفك .. ذوقي الفول إذا لقيتي إنه وصل للطعم اللي تبين طفي النار و أطحينه بخلاط بعدين قطعي عليه كزبرة و بقدونس وبس هذا الفول …

————————————————————————————————————————————————————————–
يخنه سبانخ مع طماطم مجفف .. Spinach and sundried tomato stew

أطبخي بصلة كبيره مقطعه صغار مع حبة بيكون بعد مقطع صغار في زيت زيتون على حرارة وسط . وهي تطبخ قطعي نص كوب طماط مجفف محفوظ بزيت ( ينباع في السوبرماركت ) وحطيه على البصل . أطبخيهم إلين يذبل البصل بعدين ضيفي عليهم ٤ فصوص ثوم مقطعة شرايح و أطبخيها دقيقه تقريبا .. الحين حطي عليهم ملعقة صغيرة بابريكا حلوة + شوي ملح وفلفل + كوب مويه + علبتين فاصوليا بيضاء خليهم إلين يبدأون يغلون بعدين أضيفي عليهم حوالي ٣٠٠ جم( تقريبا ٨ أكواب ) سبانخ مغسول و منظف ومشيول العرق حقه وغطي القدر . أطبخيهم ٥ دقايق مع التحريك كل شوي إلين يذبل السبانخ. آخر شي ذوقي الملح و الفلفل و البابريكا وشوفي إذا تحتاج زيادة .

————————————————————————————————————————————————————————–

حشوة سبانخ للمعجنات

أسلقي السبانخ في مويه مغليه مع شوي ملح حوالي ٣٠ ثانيه . بعدين شيليها من المويه و أرميها في حمام ثلجي . الحين شيليها من الحمام الثلجي و أعصريها زيييييين. قطعيها بالسكين بعدين أضيفي عليها الإضافات اللي تحبين .

تقدرين مثلا تسوين شي زي إنك تضيفين عليها جبن مثل الريكوتا أو أي جبن ثاني يعجبك وتسوين حشوة حلوة …

أو تقدرين تضيفين عليها شوي بصل وثوم و سماق وليمون وتسوين الحشوة العادية حقت السبانخ …

————————————————————————————————————————————————————————–

دجاج مع خردل ديجون .. Chicken with dijon mustard

أبسط شي .. غسلي الدجاجه بعدين نشفيها زيييييييييييييين بمناديل رول .. نشفيها زين زين بعد .. لو ما نشفتيها ماراح تتحمر صح ولا راح تعطيك جلد يقرمش بعدين .أدهني الدجاجه بخردل ديجون . بعدين رشي ملح وفلفل عليها من كل مكان ومن داخل البطن بعد . الحين رشي أي بهارات ثانيه عالدجاج مع العلم إنها ما تحتاج ! يعني مافيه شي خطأ بخردل وملح وفلفل . بس تقدرين مثلا تخلطين معها روزماري ( يمشي بشكل رهيب مع الخردل ) ، ثوم ، و طبعا طرخون .. خلي الدجاجه على حرارة الغرفة ساعة تقريبا عشان تتبل وعشان توصل حرارة الغرفة وتنطبخ أسرع .. الحين جيبي صينية فرن ورصي بصل تحتها أو أي خضار ثانيه تبين مثل بطاطس أو غيره . بعدين حطي الدجاج فوقه ( الهدف هنا الدجاج يكون فوق المويه اللي بتنزل منه وبكذا يتحمر صح ) .. الحين أدهني الدجاج بزبدة أو زيت بعدين حطي الدجاج في فرن ٤٠٠ إلين يبدأ يتلون حوالي ٢٠ دقيقه . الحين نزلي الحراره ل ٣٥٠ وخلي الدجاج إلين يستوي . تعرفين إن الدجاج أستوى بإنك تقطعين بين الفخذ و الجسم وتشوفين إذا فيه دم ولا لأ .. بياخذ يمكن ٢٠ دقيقه زياده . بعد ما تطلعين الدجاج خليه يرتاح ربع ساعة قبل تاكلينه .

————————————————————————————————————————————————————————–

الحمص

حطي الحمص في الخلاط مع شوي ثوم ( تقريبا فص فصين يكفي ) + عصير ليمون + طحينه + ملح وفلفل أبيض + كمون + شوي من مويه الحمص اللي في العلبه . شغلي الخلاط إلين يصير ناعم شوي بعدين زيدي زيت زيتون و الخلاط شغال .

هذي مكونات أي حمص في العالم … الإضافات عاد إختياريه .. ذوقي الحمص كل شوي وشوفي وش يحتاج . لو لقيتيه ثقيل زيدي شوي مويه ، لو لقيتيه خفيف زيدي حب حمص . بس …

————————————————————————————————————————————————————————–

ساندوتش دجاج .. Chicken Sandwich

جففي الدجاج بمنديل ثقيل زيييين . بعدين رشي عليه ملح وفلفل أسود . الحين سخني مقله على حراره عاليه وبعد ما تحتر حطي شوي زيت ( موب زيت زيتون ) و حطي الدجاج بس بدون ما تحركينه كثير إلين يتلون الدجاج زين . شيلي الدجاج على جنب إلين يبرد .

الحين أخلطي مايونيز + بصل أحمر مقطع صغاااااار مره + شوي ليمون وخردل . جيبي خبز ساندوتش يكون ليييين مره و حطي داخل كل حبه قطعه خس هذي الحركه مهمه عشان المويه اللي تنزل من الدجاج ما تخرب الخبز . حطي الحشوه فوق الخس بعدين حطي مخلل حلو relish مقطع صغار فوق الخلطه وبس ..

طبعا هذي وحده من مليون طريقة تقدرين تسوين فيها ساندوتش دجاج … يعني لا تلتزمين فيها بالضبط .

————————————————————————————————————————————————————————–

شوربة دجاج .. Chicken Soup

أول شي تاخذين صدرين دجاج وتقطعينهم مكعبات صغار .

بعدين مقادير الشوربة .

عودين كرفس مقطعه صغار
حبة جزر مقطعه صغار
حبتين بصل مقطعه صغار
فص ثوم مقطع صغار
زبدة تقريبا ٣ ملاعق كبار
ملح وفلفل
٥ أكواب مرق دجاج ممتاز !! تذكري هذي شوربة دجاج بدون مرق دجاج صارت مويه مغليه … جوده المرق هي الل يتحدد جوده الشوربه .
ملعقتين كبار طحين
كوب كريمة
ملح وفلفل
شوي بقدونس أو كراث للزينه

أول شي تسوينه هو إنك تذوبين الزبده على حراره وسط بعدين تطبخين الجزر و البصل و الكرفس مع رشة ملح وعلى حراره هاديه لا تزودين النار ! ولا تخلينها تتلون . خليهم يطبخون إلين يذبلون تماما بعدين حطي الثوم و أطبخيه شوي إلين تطلع ريحته يمكن دقيقه بس حطي الطحين وحركي زييين بعدين خليها تطبخ دقيقه تقريبا . الحين صبي ٤ أكواب من المرق ومع التحريك خليها توصل لغليه بعدين نزلي الحراره بحيث تكون على غليه جدا هاديه . خلي الشوربه تطبخ حوالي ربع ساعة عشان يروح طعم النشا .

الحين أطحني الشوربه في خلاط بعدين رجعيها للقدر مره ثانيه . شوفي قوام الشوربه كيف إذا خفيف خليها تطبخ على نار هاديه إلين تثقل إذا ثقيل زيدي مرق إلين توصل للقوام اللي يعجبك . آخر شي ذوقي الملح و الفلفل في الشوربه وعدليهم حسب الرغبة الحين حطي صدور الدجاج و أطبخيها إلين تستوي بعدين حطي الكريمه و أخلطيها شوي بعدين طفي النار وكليها بعد ما ترشين بقدونس أو كراث عالوجه

————————————————————————————————————————————————————————–

الربيان المقلي  .. Fried shrimp

 … خذي الربيان وقشريه . بعدين غطيه بشوي طحين مع النكهات اللي تبغين ( بودرة ثوم و ملح وفلفل كافيه ) . هزي الربيان بحيث يطيح الطحين الزايد بعدين غمسيه ببيض بعدين بقسماط أو أي تغطيه ثانيه تحبين .

للقلي السر هو دايما في القلي هو التحكم في الحراره بس … أستخدمي زيت حار و أقلي الربيان أقل من دقيقتين ! راح ينشف إذا أكثر من كذا . قدميه علطول وراح يكون يقرمش ولذيذ .

صوص يناسبة تلاقين عاليسار في الموقع فيه شي مكتوب ( صوصات ) بتلاقين هناك صوص الألف جزيرة و الصوص الروسي هذي كلها ممتازة مع الربيان .

————————————————————————————————————————————————————————–
شوربة البروكلي بالكريمة  .. Broccoli Soup

راسين بروكلي
بصله صغيره
شوي زبده
تقريبا ٤ أكواب مرق دجاج
كوب قشطة خفق
ملح وفلفل وليمون
جبن تشيدر معتق بتلاقين مكتوب عليه mature .

قطعي البروكلي أول شي إلى زهرات . و بعدين خذي الساق وقشريه وقطعيه مكعبات صغيره .

الحين أطبخي البصل في شوي زبده ورشة ملح على نار هاديه إلين يذبل البصل بس بعدين حطي جذر البروكلي و أطبخيه معهم شوي بس . حطي ٣ أكواب من المرق وخليه يوصل غليه خفيفه بعدين خليه يغلي إلين يصير البروكلي لين مره . الحين أطحني الشوربه بالخلاط ورجعيها للقدر . إذا كانت الشوربه ثقيله زيدي مرق ولو كانت خفيفه خليها تطبخ شوي إلين تثقل . الحين حطي وردات البروكلي و أطبخيها إلين تصير شوي لينه بس ما تبينها تصير لينه أكثر من اللازم . الحين ذوقي الشوربة وزيدي ملح وفلفل أسود و ليمون إلين توصل للطعم اللي تبين بعدين حطي الجبن حسب الرغبه ( تذكري الجبن مالح ! ) . آخر شي حطي الكريمة وخليها توصل غليه بس بعدين طفي النار وقدميها .

————————————————————————————————————————————————————————–

أضلاع بقر قصيرة .. Beef short ribs

ريش بقر

بس ترى هذي موب ريش بقر بالمعنى العادي … الريش العاديه ما تنفع هنا ! النتيجة راح تكون شي ما ينوكل . الريش اللي تبين هذي يسمونها الأضلاع القصيره short ribs . اللحوم عموما تنقسم نوعين فيه أنواع تنطبخ بسرعه وعلى حرارات عاليه اللي هي كل القطع المناسبه للستيك مثل الريش العاديه و الفيليه وغيرها … وفيه القطع الثانيه اللي تحتاج وقت طبخ طويييييل وعلى حراره جدا هاديه عشان يلين . الأضلاع القصيره من النوع الثاني .

الأضلاع القصيره وحده من ألذ القطع في البقر . ببساطه شديده إذا تبين شي زي حق تشيليز وغيره هذي سهله …

رشي الأضلاع بملح وفلفل على الوجهين .

بعدين شغلي الفرن على ٢٢٠ فهرنهايت .

وحطي الأضلاع فوق صينية فرن ودخليها الفرن إلين تصير لييييييييييينه وتذوب في الفم . راح تاخذ وقت !! راح تاخذ وقت طويل بعد قد قعدت معي قطعه صدر بقر ١١ ساعة في الفرن !!! آخر شي تدهنينيها بصوص باربيكيو وتخلينها تكلم طبخ إلين تصير ليييييييينة مره …

هذي وحده من طرق الطبخ العامه موب بس خاصه لهذي الأكله راح أتكلم عنها بالتفصيل إن شاء الله …

إذا تبين طريقة ثانيه يمديك ..

رشي عليها ملح وفلفل زي أول ..

بعدين شوحي الضلوع زييييييين على كل الأوجه في قدر ثقيل .

حطي بيره ساده + صوص باربيكيو إلين غطي الضلوع بمقدار ٣/٤ بس ! يعني جزأ منها بيكون طالع .

الحين خليها تغلي بعدين نزلي الحراره على أقل شي بحيث تكون على غليه جددددددددا خفيفه إلين تستوي وتصير ليييينه وتطيح من العظم .

————————————————————————————————————————————————————————–

دجاج مشوي بالبهارات  .. Spice rubbed grilled chicken

جيبي ملعقة صغيرة بذور كمون مع ملعقة صغيرة بذور شمر ونص ملعقة صغيرة كزبرة . حطيهم في مقلى على حراره وسط إلين تبدين تشمين ريحة البهارات . الحين حطي البهارات في طاحونه بهارات أو هاوند لو تبين و أطحنيها بس خليها خشنه !!! لا تخلينها تصير بودره .

الحين جيبي صدور الدجاج ورش عليها ملح وفلفل أسود و فلفل أحمر حار أو بابريكا لو تبين عالوجهين . بعدين رشي عليها خلطة البهارات هذي . خليها على حرارة الغرفه نص ساعة تقريبا بعدين أدهنيها بزيت و أشويها .

هذي دجاج بنكهة عربيه على هنديه يمشي مع رز أبيض عادي بالزعفران بشكل حلو .

 

————————————————————————————————————————————————————————–

سمك مشوي بالفرن .. Broiled Fish
نظفي السمك وبعدين نشفيه بمنديل ثقيل من داخل ومن برا . بعدين سويي ٣ قطعات بالسكين في كل جهة من جسم السمك . هذي بتخلي التتبيلة تدخل للحم وبتخلي اللسك يستوي أسرع .

الحين أفتحي بطن السمك ورشي فيها شوي ملح وفلفل . بعدين أحشيها بالفلافل الملونة + ليمون مقطع حلقات + أي شي ثاني لو تبين مثل شبت أو بقدونس …

الحين رشي وجهين السمك بملح وفلفل وبعدين بقدونس وشوي ثوم + البهارات لو بغيتي ( ولو إني أشوف إنه مايحتاج ) .

الحين أدهني زيت زيتون أو زبده ( أو خليط من الإثنين ) على وجهين السمك وبعدين حطيها في صينية فرن وعلى حرارة ٤٠٠ أطبخي السمك إلين يستوي .

هنا الخطوة المهمة .. متى يستوي ؟ أسوأ شي سمك مطبوخ أكثر من اللازم . كون السمك مافيه دهن طبخه أكثر من اللازم بيخليه ينشف أسرع من باقي اللحوم . السمك ينطبخ أسرع من الدجاج لا تخلينه وقت طويل في الفرن .

تعرفين إن السمك أستوى بإنك ترفعين جسم السمك بشوكه أو ملعقة . إذا لقيتي إن اللحم بدأ يتفتت عن بعض إذا رفعتيه بالملعقة علطول شيليه . أختبريه كل شوي ولا تخلينه يطبخ أكثر من اللازم . آخر شي أعصري ليمونه وخلاص .

————————————————————————————————————————————————————————–

سلطة المنجا و الأفوكادو .. Avocado and Mango Salad

ولو تبين بعد أحلي يمديك تقدمينها في قشر الأفوكادو كسلطة صغيرة عالجنب . أو يمديك تقطعين نفس السلطة أصغر وتخلينها صلصة وتقدمينها فوق الأسماك المشوية مثلا أو الربيان أو غيره .

حبتين منقا مقطعه مكعبات صغيرة
حبتين أفوكادو مقطعة مكعبات صغيرة
نص بصلة حمراء مقطعة شرايح نحيفة
ملح وفلفل
٨ ملاعق تقريبا زيت زيتون
ملعقة كبيرة ليمون أخضر
ملعقة كبيره بلسمك

سويي التتبيلة بإنك تخلطين الملح و الفلفل و الليمون و البلسمك و الزيت إلين ينخلطون زيييين .

قطعي السلطة و صبي التتبيلة عليها على طول وقدميها .

لو بتخلينها صلصة قطعيها أصغر و أضيفي فلفل حار

————————————————————————————————————————————————————————–

كلوب ساندوتش  .. club sandwich

سويي ساندوتش توست بالمرتديلا . حطي طبقة مايونيز بعدين جبنة بعدين المرتديلا بعدين طبقة خفيفة مايونيز بعدين توست ثاني . لو تبغين تقدرين تحطين طبقة مايونيز على الخبزة الثانيه بعدين تحطين جبنة بعدين خبزة ثانيه وكذا ….

بعدين أخفقي شوي بيض و غطي السانوتش فيه وبعدين أقليه بشوي زبدة ..

هذا السانوتش يسمونه مونتي كرستو ورهييييييييييييييييييب بس لازم يتقدم حار ….

سانوتشات الجبن سهل التغيير و التجديد فيها أهم شي تطلعين من الأشياء اللي أنتي معتادة عليها كل مره هنا المشكله الأساسية … يعني جربي نوع خبز غير كل مره وراح يعطي ساندوتش جديد ، جربي نوع جبن غير وبعد راح يعطي سانوتش جديد .. لا تقولين مافيه أنواع جبن .. كل سوبرماركت علي الأقل عنده ١٠ أنواع جبن …

جربي مثلا سويي ساندوتش خبز فرنس ( أو صامولي ) ، بعدين جبنة إسمها بري brie بعدين جيبي شكولاته قوالب ههه وحطيها على الجبنة بعدين حمصيهم مع بعض وشوفي ….

————————————————————————————————————————————————————————–

ربيان مشوي .. Grilled Shrimp

بأسهل الطرق .. حطي الربيان في أسياخ ، رشيه بملح وفلفل و وشوي زبده ( عشان يطلع بني غامق ) أو زيت إذا اللون ما يفرق عندك . أشويه على نار عاليه إلين يقلب الوجه الأول برتقالي بعدين أقلبيه إلين الوجه الثاني يقلب بعد برتقالي بس … أهم شي أشتري ربيان طازج ومن نوعية جيده ، و أشويه بسرعه هذا السر . كثير ناس يحسبون الربيان عشان شكله غريب يحتاج إنه ينطبخ وقت طويل و النتيجة ربيان كأنه مطاط .

هذي الطريقة بإختصار .. بس فيه مجال للتحسين بعد .. أي بهارات أو أعشاب ممكن تستخدم عشان تنرش على الربيان قبل الطبخ . أهم شي لا تحطين كثير بحيث تغطين وتضيعين طعم الربيان نفسه .

لو تبين تتبلين الربيان بتتبيله بعد ممكن أهم شي هنا إنك تنتبهين إنك ما تتبلين الربيان أكثر من اللازم كون الحموضه تطبخ الربيان يعني نص ساعة بالكثير . إذا تبين تتبيله بعد أي تتبيله للدجاج أو اللحم تنفع وحتى خلطات السلطه العاديه بعد . التتبيله ببساطه شديدة هي محلول حمضي مع دهن بس …

بقشر ولا بدون قشر ؟ هذي مسألة أذواق … القشر راح يحفظ الرطوبه في الربيان ، غير إنه بيعطي نكهة ربيان حلوه له .. بس بعد القشر صعب في التقشير شوي لو كنتي تبين تقدمينه بطريقة نظيفة . أنتي حسب رغبتك تبين قشره أو لا تقشرينه شي راجعلك مافيه شروط

————————————————————————————————————————————————————————–

لحم بصلصة المحار .. Beef with oyster sauce
بصلصة المحار :

نص كيلو لحم ستيك . سيرلوين أو فيليه يفضل
ملعقة كبيره ونص صويا صوص
ملعقة صغيره خل
ملعقتين صغار نشا
ملعقتين كبار مويه
ملعقة كبيرة زيت

شوي زنجبيل وثوم
حبة جزر مقطعه شرايح
ملعقين ونص كبار صلصة محار
نص ملعقة كبيره سكر بني
١/٤ كوب مويه
زيت وملح وفلفل

قطعي اللحم عكس إتجاه النسيح حقه ( شوفي الفهيتا ) . بعدين تبلي اللحم بالصويا و اللخل و النشا و المويه و الزيت . خليه حوالي ربع ساعة يتتبل .

أخلطي باقي المويه و السكر و صلصة المحار في صحن ثاني وخليهم عالجنب .

سخني مقلة على أحر أحر أحر شي تقدرين عليه . بعدين حطي شوي زيت ( حوالي ملعقتين ) بعدين حطي الزنجبيل و الثوم إلين ما تشمين ريحتهم بس بعدين حطي اللحم بعد ما تصفينه من التتبيلة ( لاترمين التتبيلة ) . أطبخي اللحم إلين يستوي وشوي يتلون ممكن تحتاجين تسوين هذي العملية على دفعتين ، بعد ما يستوي اللحم شيليه .

الحين سخني شوي زيت وأطبخي الجزر ( ممكن معه أي خضار ثانيه مثل البروكلي مثلا ) . بعد ما يستوي حطي التتبيله و حطي المويه و صوص المحار اللي خلطناهم عالجنب . أطبخي الخليط هذا إلين يثقل بعدين رجعي اللحم وذوقي الملح و الفلفل وقدميه بس .

————————————————————————————————————————————————————————–

دجاج بالكاجو .. chicken cashew

دجاج بالكاجو ..

نص كيلو صدور دجاج مقطع صغار
التتبيلة :
نص ملعقة صغيرة ملح
ملعقة صغيرة خل
ملعقة كبيره نشا
شوي زنجبيل

الصوص :

ملعقتين كبار صلصة هويسان hoisin
ملعقتين كبار صوص صويا
ملعقيت كبار مويه
ملعقة صغيره سكر

أشياء ثانيه :

فص ثوم
شوي بصل أخضر
ربع كوب كاجو محمص
أي خضار تحبين معها
زيت

تبلي الدجاج بالتتبيلة حوالي ٢٠ دقيقة .

أخلطي مكونات الصوص مع بعض في صحن .

الحين سخني المقلة على حرارة عاليه بعدين حطي شوي زيت و الثوم إلين يطلع ريحته .

حطي الدجاج مع التتبيله وأطبخيه إلين يستوي تقريبا . بعدين شيليه من المقله .

سخني زياده زيت و أطبخي الخضار اللي تحبين بعدين رجعي الدجاج و الصوص للمقله و أطبخيهم إلين يستوي الدجاج و يثقل الصوص . حطي الكاجو و البصل الأخضر وقدميه .

————————————————————————————————————————————————————————–

كرات الربيان المقلية .. Shrimp Balls

هذي جدددددا سهلة … وتغير حلو عن الربيان المقلي العادي . بالنسبة للصوص اللي معها كل مطعم والله يقدم صوص غير ؟ اللي أعرفه بالعاده يتقدم معها صوص السويت آند ساور العادي ؟ اللي لونه برتقالي غامق ؟ ما أدري إذا هذا اللي تقصدين ؟

تحتاجين تقريبا لكل ٣٠٠ جرام ربيان ( ما أدري كم الكمية بالحبة كون الحجم بيختلف من حبة لحبة ؟ ) .

٣٠٠ جم ربيان من أي حجم مقشر .
ملعقة صغيره ملح
نص ملعقة صغيره فلفل أبيض
ملعقتين كبار نشا ذرة
خبز توست قديم
بيض

حطي الربيان مع الملح و الفلفل الأبيض و النشا في خلاط مولينكس و أفرميه إلين يكونلك معجون . شكلي المعجون على شكل كرات حسب الحجم المطلوب وحطيه في الثلاجه نص ساعة إلين تجمد .
الحين غطي الكرات هذي بطحين بعدين بيض وبعدين التوست بعد ما تقطعينه مكعبات .
أقلبي الكرات في زيت حار إلين تصير من برا تقرمش .

السر في إنها ما تشرب الدهن هو إنك تسخنين الزيت للحراره الصح .. حرارة الزيت هي اللي راح تمنع الأكل يشرب الدهن . أفضل حل تستخدمين ميزان حرارة زيت ..

 

————————————————————————————————————————————————————————–

سيشوان بيف .. Szechuan chicken

نص كيلو لحم بقر سيرلوين مقطعه شرايح نحيفه تقريبا نص سانتي .
٢ جزر مقشر ومقطع شرايح نفس حجم الستيك
ملعقة كبيره زنجبيل مفروم
٢ بصل أخضر مقطعه عالجنب
ملعقة كبيره صوص الفاصوليا السيشاونيه been paste
٣ ملعق كبيره فلفل سيراتشا seratcha أو صلصة إندو فود
زيت
ملح وفلفل
ملعقة صغيرة سكر
ملعقة كبيره مويه
١/٢ ملعقة صغيره فلفل سشوان ( مهم عشان الطعم يصير بيف سيشوان )
نشا ذرة

أخلطي كمية نشا مع اللحم كافيه إنها تغطيها .. بعدين شيلي النشا الزايد .

الحين أخلطي الشطة مع صوص الفاصوليا في صحن صغير ..

سخني كمية زيت كافيه إنها تغطي المقله بحوالي ٢ سم وعلى حرارة عاليه حطي اللحم و أطبخيه إلين ما يبدأ يصير يقرمش . نزلي الحراره وشيلي اللحم على الجنب . الحين شيلي الزيت بس بقي منه حوالي ملعقتين كبار وحطي الجزر و الزنجبيل و أطبخيه إلين ينطبخ ويصير لين بس لا تخلينه يتلون أبدا ! حوالي دقيقه إلى دقيقتين . رجعي اللحم وحطي المويه و خلطة الشطة و الفاصوليا و أطبخيه إلين يثقل الصوص شوي ويصير يغطي اللحم . حطي الملح حسب الرغبه وحطي البصل الأخضر آخر شي مع فلفل السشوان و السكر . ذوقي وعدلي الطعم حسب ذوقك …

————————————————————————————————————————————————————————–

شوربة القرع .. Pumpkin soup
/٢ كوب قشطة خفق
أصبع زبده
٦ أكواب بصل مقطع مكعبات
تقريبا ٥ أكواب من خليط القرع
ورقة غار
رشة قرنفل
ملعقة صغيره جوزة طيب
ملعقة صغيره قرفه
ملعقة صغيره كزبره مطحونه
ملعقة صغيره ميراميه طازه أو ناشفه
ملعقة صغيره فلفل حار
نص ملعقة صغيره زنجبيل
١٠ أكواب مرق دجاج
بذور القرع لو تبين للتزيين وتعطي طعم حلو بعد .

ذوبي الزبده بعدين أطبخي البصل فيها مع رشة ملح على حرارة هاديه إلين يذبل البصل حوالي ١٠ دقايق .

بعدين حطي القرع ، و البهارات وورق الغار ومرق الدجاج و أطخيهم على غليه خفيفه حوالي ٢٠ دقيقه .

بعد ٢٠ دقيقه أطحني الخليط ورجعيه للقدر مره ثانيه . شوفي كيف قوام الشوربه هل تبينه أخف زيدي مرق ، تبينه أثقل خليه يطبخ شوي إلين يثقل … قبل ما تخلصين ذوقي الملح و الفلفل وعدلي الطعم حق الشوربه . آخر شي حطي القشطة حقت الخفق وحركيها مع الشوربه وخليها ترجع تغلي غليه خفيفه بعدين طفي النار وقدميها …

يمديك تسوين الشوربه قبلها بيوم أو يومين .. بس لا تحطين القشطة إلا بعد ما تسخنينها ثاني يوم .

————————————————————————————————————————————————————————–

باستا الأجبان الأربعة .. Pasta quatro fromage ( four cheese pasta )
مكرونة الأجبان الأربعة سهلة مرررررره . خلطة الأجبان الكلاسيكيه هي الفونتينا ، الجورجونزولا ، البارمزان و الرومانو … هذي الأجبان مختلفه تماما عن بعض .. عندك الفونتينا جبنة ذوبان شبه صلبه مع نكهة حلوه قريبه من الموزاريلا تقريبا في القوام بس الموزاريلا مالها أي نكهة وعشان كذا أبعدي عنها هنا …. الجورجونزولا جبنة زرقاء لها أكيد طعم قوي خاص .. البارمزان و الرومانو أجبان صلبة وكل واحد بنكهته الخاصه … هذي الأجبان كلها إيطاليه بس ما يمنع لو تستخدمين أجبان فرنسيه مثل الروكفور الزرقاء و الجوريير مثلا …

أهم شي أهم شي أهم شي الله يخليك ويرضى عليك حاولي ما تتركين هذي الأنواع وتستخدمين تشدر ، موزاريلا ، وجبن سايل زي ما كثير ناس يسوون … حاولي تستخدمين قدر الإمكان : جبن بارمزان ( ضروري ) ، جبن رومانو أو رومي ، فونتينا ( أعتقد صعب تلاقينه في السعوديه عشان كذا أستخدمي جرويير بداله ) .. وجربيها ولو مره وحده مع جبن أزرق أي نوع بس صدقيني الطعم غير ترى بدونها .

تذوبين ملعقين زبده مع ملعقتين كبار قشطة خفق … بعدين تنزلين الحرارة على أقلللل شي وتحطين الأجبان ..

1/4 كوب جورجونزولا ، روكفور ، ستيلتون ، أو أي جبن أزرق ثاني
1/4 كوب جبن فونتينا أو أسياجو ، أو أسوأ الحالات جرويير
1/4 كوب بارمزان
1/4 كوب رومانو أو جبنة رومي عاديه

حركيهم إلين شوي يذوبون بس لا تكثرين ولا ترفعين الحرارة عشان ما يفصل الجبن عليك أول ما يذوب الجبن طفي النار وذوقي الخليط وحطي ملح وفلفل .. آخر شي حطي الباستا وزودي من موية الباستا لو أحتجبتي تخلينها أخف .

————————————————————————————————————————————————————————–

الشنتزل .. schnitzel
تجيبين شرايح عجل ولازم عجل هنا ! . تحطين الشرايح بين طبقتين نايلون وتضربينها ضرب خفيف بالفرادة حقت العجين شوي شوي بس . هذي الخطوة تلين اللحم شوي وتخليه كله نفس الإرتفاع .

الحين تجيبين طحين ، بيض ، وبقسماط بعد ما تخلطين معه شوي أعشاب مثل الأوريجانو مثلا . ترشين شرايح العجل بملح وفلفل عالوجهين بعدين تغطسينها بالطحين وتهزينها عشان تشيلين الزايد بعدين تغطسينها بالبيض وبعدين بالبقسماط وتحطينها عالجنب .

الحين تسخنين مقله على حرارة أعلى من وسط بشوي . خليها تسخن يمكن دقيقه بعدين حطي شوي زبده وزيت وخليهم إلين تذوب الزبده . كمية الدهن هنا مفروض تكون كافيه إنها تغطي المقله وشوي زياده . حطي اللحم و أطبخيه إلين يقلب أول وجه شوي ذهبي بعدين أقلبيه عالوجه الثاني وكملي طبخ . الشنتزل ماراح ياخذ ثواني في الطبخ ترى ! ٤ دقايق يمكن بالكثييييييير . أول ما يتلون الوجه شيليه وخليه يرتاح دقيقه بعدين كليه مع عصرة ليمون .

————————————————————————————————————————————————————————–

مخلل خيار .. cucmber pickle

نص بصله مقطعه أجنحه
خيار مقطع حسب الطريقه اللي تبين
كوب مويه
كوب خل تفاح
١/٢ كوب خل عنب ويفضل لو كان خل عنب أبيض
1/2 كوب سكر
ملعقتين ونص صغار ملح
ملعقة صغيره بذور خردل
1/4 ملعقة صغيره كركم
ملعقة صغيره بذور كرفس ( لو عندك طبعا لا تدققين كثير )
شوي قرفه مكسره
ورقه غار
ملعقة صغيره كمون كامل يعني موب مطحون
كم حبه قرنفل
4 فصوص ثوم
ملعقة صغيره فلفل أسود

حطي الخيار مع البصل في العلبه اللي بتحطين فيها المخلل وتأكدي إنها نظيفه زين .

حطي باقي المواد كلها ماعدا الثوم في قدر ستانلس !!! مهم جدا يكون ستانلس أبعدي عن الألمنيوم مررررره !! أنتبهي من هذي النوعيه من القدور :

http://www.mekshat.com/pix/upload04/images190/mk3105_naser%20%284%29.jpg

طبعا موب شرط نفس اللون بس شفتي كيف الماده هذي .. هذي أبعدي عنها هنا وأفضل لو ما تقربينها أصلا في الطبخ .. الألمنيوم يتفاعل مع أي شي حامض زي الخل هنا أو مثلا طماط أو غيره ويعطيك طعم صدى قوييييييييي مره .

خلي الخليط يغلي على غليه خفيفه يمكن ٥ دقايق . الحين حطي الثوم وبعدين صبيه على المرطبانات حقت التخليل إلين يغطي الخيار و البصل يشوي . خليه يبرد على حراره الغرفه بعدين زيديه من سائل التخليل لو أحتاج وقفلي المرطبان وحطيه في الثلاجه .

————————————————————————————————————————————————————————–

مخلل الفجل .. Radish Pickles

فص ثوم كذا تضربينه بظهر السكين عشان تطلعين طعمه بس بدون ما تقطعينه
درزنين فجل تقريبا
كوب سكر
كوب خل تفاح
ملعقتين صغار ملح
ملعقة كبيره بذور خردل
١/٢ ملعقة صغيره بذور كرفس
ملعقة كبيره شبت مقطع

أغسلي الفجل وشيلي الأطراف … قطعيه لو تبين وردات أو حلقات .. أو حتى خليه كامل ما يفرق .

حطي كل المكونات ما عدا الفجل في قدر وخليها تطبخ إلين يذوب السكر بس ويصير خليط صافي . صبي عليها الفجل وطفي النار . عبيه في علب حقت مخلل وحطيه في الثلاجه يوم عالأقل إلين يتخلل بعدين كليه .. كذا راح يقعد معك تقريبا شهر في الثلاجه كون هذا مخلل سريع موب مخلل أصلي .

————————————————————————————————————————————————————————–
ساندوتش تونه  ..Tuna sandwich

حطي تونه مع مايونيز وليمون وملح وفلفل وشوي كراث أو بصل أخضر مقطع صغار . بعدين أدهنيه على خبز توست أو غيره وحطي عليه جبنه إسمها جودا … مهم نوعيه الجبن هذي !!! ومهم الجبن هنا ! حمصي الساندوتش شوي بس شوي إلين تتحمر شوي من برا وتذوب الجبنه وذوقي ….

————————————————————————————————————————————————————————–

سلطة تونه  .. Tuna salad

حوالي ٢٠٠ جرام تونه ؟ أعتقد العلبه الوحده ٢٠٠ جرام .. دايما في التونه لو لقيتي التونه اللي تجي محفوظه في أكياس مسحوبة الهواء موب المعلبه تراها أحسن بكثييييييييييييير كثير كثير بعد .

أوراق خس زبده .. لاتخافين من الإسم هو هذاك الخس اللي يجي ليييييين مره مو خس أمريكي ولا عربي .. يجي شكله زي كذا :
http://image.shutterstock.com/display_pic_with_logo/1141/1141,1165646947,1/stock-photo-butter-lettuce-isolated-on-white-2299661.jpg

لو مالقيتيه حطي رجله خيار بديل حلو …

ملعقتين كبار بصل أبيض مقطع صغااااااااار

ملعقتين كبار فلفل بارد أحمر أو برتقالي مقطعه صغاااااار .. بعد هنا لاتبدلين بالأخضر ! الطعم مختلف تماما .. أنا أبغى شي حلو هنا الأخضر مافيه أي حلاوه .

ملعقة كبيره كابر

ملعقتين كبار بيض مسلوق مقطع

ليمون وملح وفلفل ..

طلعي التونه من العلبه أو الكيس شوي شوي لا تكسرينها حاولي تخلينها تحافظ على شكلها . شيلي الزيت حق التونه في صحن ثاني لاترمينه ! .

رصي الخس أو ورق الرجله بدون ما تقطعينه أو شي ! وحطي التونه قطع كبار فوقه . بعدين رشي البيض و البصل و الكابر و الفلفل البارد .. آخر شي رشي الزيت حق التونه وعصير الليمون وملح وفلفل ..

————————————————————————————————————————————————————————–

المحمرة

أول شي تسوينه هو إنك تشوين ٣ حبات فلفل رومي أحمر( + كمية فلفل أحمر حار لو تبين )، أسهل طريقة لهذا الشي هو إنك تقطعينهم بالنص وتشيلين القلب بعدين تحطينهم في صينية فرن ويكون الجلد على فوق وترشين عليهم ملح وفلفل وزيت زيتون. شغلي شواية الفرن يعني من فوق على أعلى شي وحطيهم في الرف العلوي بحيث يكونون قريبين من الشوايه مره. خليهم يطبخون إلين يتفحم الجلد تماما بعدين طلعيهم من الفرن وحطيهم في صحن وغطيه بنايلون ١٠ دقايق تقريبا. بعد ما تغطينه بالنايلون أبدي قشري الجلد المحروق من الفلفل وبتلاقينه يطلع معك بسهولة.

الحين في خلاط مولينكس حطي الفلفل + كوب جوز محمص + نص فص ثوم + ١/٣ كوب بقسماط جديد + ملعقتين صغار دبس رمان + ملعقة صغيرة كمون + ١/٤ ملعقة صغيرة فلفل حار مطحون . أخلطيهم وضيفي زيت زيتون من فوق حسب الرغبة. حاولي تفرمينهم بس لاتخلينهم ناعمين مره تبين كل شي يكون خشن.

————————————————————————————————————————————————————————–

البرياني

نص كوب زبادي

فصين ثوم مفرومه

شوي زنجبيل مفروم

بهارات برياني .. اللي هي قرفة ، هيل حب ، فلفل أسود حب ، كزبره ناشفه حب ، كمون حب وبعد زعفران و قرنفل

ملعقة صغيره وثلاث أرباع ملح

نص كيلو رجل غنم مقطعه مربعات

٣ ملاعق سمنه

بصله كبيره مقطعه أجنحه

كوب ونص رز بسمتي

كوبين وثلاث أرباع مويه

١/٣ كوب زبيب

١/٣ كوب كاجو أو لوز

أقلي البصل في السمن مع البهارات … بعدين حطي اللحم ونص الملح وأطبخيه شوي … الحين حطي الرز وخليه يطبخ شوي في السمن حوالي دقيقه بعدين حطي الزبادي مع الثوم وحطي المويه و الزبيب ووخليها تغلي مع باقي الملح نزلي الحراره لأقل أقل شي بعدين غطي القدر زييييييييين … وخليها تطبخ حوالي ٢٠ دقيقه .. آخر شي طفي النار وخلي الرز يرتاح ٥ دقايق … بعدين حطي الكاجو وحركي بس هذا البرياني

————————————————————————————————————————————————————————–

كاري الربيان التايلندي مع جوز الهند .. Thai srhump coconut curry

في شوي زيت ( يفضل زيت فول سوداني ) أطبخي بصلة مقطعه صغار مع فصين ثوم مقطعه شرايح وعودين ليمون جراس مقطعه صغار و ٣ ملاعق كبيره زنجبيل أو جالنجال مفروم مع حبتين فلفل تايلندي اللي يجي قصير ونحيف وحاااار. أطبخيهم إلين يذبل البصل و الثوم بعدين حطي عليهم ملعقة كبيره سكر بني أو لو عندك سكر نخيل وبعدين ملعقة كبيرة معجون طماط. أطبخيهم شوي بعدين حطي عليهم كوبين حليب جوز هند وورقتين كافر لايم لو عندك ( مقطعة شرايح نحيفة ) . خليها تغلي على غلية جدا جدا خفيفه حوالي ٢٠ دقيقه أو إلين تثقل شوي وتتركز النكهة للدرجة اللي تعجبك، ذوقي الكاري وعدلي الملوحة و الطعم حسب الرغبة بعدين حطي ٧٥٠ جرام ربيان مقشر ومنظف + نص كوب بامبو شووت مقطع ( تلاقينه في علب ) و أطبخيهم إلين يقلب الربيان برتقالي بس. طفي النار وذوقي الصوص و الربيان وعدلي الملوحة و الحموضه من جديد بعدين آخر شي قطعي عليه ريحان تايلندي .

————————————————————————————————————————————————————————–

مخلل الباميا .. Pickled Okra

البامية المخللة رهيبة ، هي مالها القوام المخاطي اللي نعرفه في الباميه وعشان كذا كثير من الناس بيحبونها مخلله حتى لو ماكانوا ياكلونها بالعادة

نص كيلو باميا لينه يعني لا تصير مخشبة
١/٢ ملعقة صغيرة فلفل أحمر مجروش
ملعقة كبيرة بذور خردل
ملعقة كبيرة ونص بذور شبت أو اللي يسمونها عين جرادة
٦ فصوص ثوم كاملة
ملعقة صغيرة فلفل أسود كامل
نص ملعقة كبيرة ملح
ملعقة كبيرة سكر
٣ أكواب خل تفاح
كوب مويه

أغسلي البامية بعدين حطي فص ثوم داخل كل مرطبان تخليل (يعني تحتاجين ٦ ). الحين رصي البامية في المرطبانات.

في قدر صغير حطي باقي المقادير كلها وخليها تطبخ إلين توصل غليه ويذوب الملح و السكر بعدين صبي السائل على البامية اللي في المرطبانات بالتساوي. خليها شوي إلين يطلع البخار الحار بعدين قفلي المرطبانات وخليها على حرارة الغرفة إلين تبرد شوي بعدين دخليها الثلاجة. خليها في الثلاجة يوم على الأقل عشان يمديها تتخلل. هذي المربى موب معقمة ولا راح تعيش وقت طويل زي المربى حقت السوبرماركت فعشان كذا دايما أحفظيها في الثلاجة ولا تخلينها أكثر من ٣ أسابيع إلى شهر

————————————————————————————————————————————————————————–

تيكساس فرايز .. Texas Fries

التيكساس فرايز تسوين بطاطس مقلي عادي .. صراحة صعب في البيت أسهل شي أشتري من الأكياس الجاهزة و أقليها عادي .

بعدين … الطبقة اللي فوق حمري لحم مفروم في مقله إلين يتلون شوي بعدين حطي عليه شوي مويه + خلطة بهارات التاكو ( تنباع في السوبرماركت في ظروف جاهزة ) . خليها تطبخ إلين تختفي المويه تقريبا بعدين حطيها فوق البطاطس مع جبن تشدر و هلبينو وحطيها في الفرن شوي بس ..

————————————————————————————————————————————————————————–

سلطة لسان العصفور (سلطة باستا) .. Orzo Salad

كوب لسان العصفورorzo pasta
١/٣ كوب صنوبر
فص ثوم مقطع صغار
١/٢ كوب بقدونس مقطع صغار
تقريبا نص علبة طماط صغار مقطع أرباع
تقريبا ١٠٠ جرام جبن فيتا أو حسب الرغبة
ملعقة كبيرة ونص خل عنب
ملعقتين كبار زيت زيتون بكر

في مقله صغيرة أقلي الصنوبر في شوي زيت زيتون مع رشة ملح ( أنتبهي لا ينحرق بسررررعه ينحرق ترى ) بعدين حطيه عالجنب.

في مرطبان أخلطي الثوم مع الخل و الزيت و رشة ملح وفلفل أسود وقفليه بعدين رجيه إلين يتحول لخلطة متماسكة مع بعض.

أسلقي لسان العصفور في مويه مغليه مملحة إلين يصير ألدنتي ( شوفي موضوع الباستا إذا ما تعرفين كيف تطبخين باستا ) بعد ما تستوي صفي الباستا و أغسليها بمويه بارده.

أخلطي لسان العصفور مع الطماط و البقدونس و الصنوبر بعدين فتتي عليهم جبن الفيتا حسب الرغبة و آخر شي الخلطة بعد حسب الرغبة.

—————————————————————————————————————————————–

الفلافل (الطعمية) .. Flafel

كوب حمص ناشف
١/٢ بصله كبيره مقطعه صغار
٣ملاعق كبار بقدونس مفروم
٣ملاعق كبار كزبرة مفرومة
ملعقة صغيرة ملح
ملعقة صغيرة فلفل أحمر حار
٤ فصوص ثوم
ملعقة صغيرة كمون
ملعقة صغيرة بيكنج باودر
٤ – ٦ ملاعق كبيرة طحين

أغسلي الحمص زين بعدين حطيه في صحن وغطيه بمويه بارده وخليه طول الليل يشرب المويه.

ثاني يوم صفي الحمص وحطيه في خلاط مولينكس مع البصل و الكزبرة و البقدونس و الملح و الفلفل و الثوم و الكمون و أفرميهم إلين ينفرمون شوي.

حطي البيكنج باودر مع ٤ ملاعق طحين و أطحنيهم إلين يكونلك عجينة ما تلصق وزيدي طحين حسب الحاجة .

حطي الخليط في صحن ودخليه الثلاجه كم ساعة إلين يبرد شوي. بعدين شكليه و أقليه في زيت حار ( ٣٧٥ ) ، حراره الزيت مهمة عشان ماتشرب زيت. لو لقيتي إن الفلافل تتفكك في الزيت زيدي ملعقة طحين وكملي

————————————————————————————————————————————————————————–

مقلقل الغنم

المقلقل عبارة عن يخنه لا أكثر. تجيبين لحم قاسي مقطع مكعبات ( شوفي موضوع مقدمة عن طبخ اللحوم إذا ما تعرفين وش الفرق بين اللحم القاسي و اللين ). بعدين تحمرين وتشوحين اللحم في زيت على حراره عاليه. بعد ما يتحمر تشيلين اللحم من القدر وتنزلين الحراره وتطبخين البصل و الثوم و بعدين تزيدين الطماط و باقي الأشياء اللي تبين زي الفلفل الحار أو البهارات وغيرها. الحين ترجعين اللحم للقدر وتزيدين شوي مرق دجاج أو غنم وتطبخينه على غليه جدا جدا جدا هاديه إلين يصير اللحم لين مره ويتقطع بالملعقة بسهولة.

————————————————————————————————————————————————————————–

المييت لووف .. Meat Loaf

المييت لوف (رغيف اللحم) أكلة عائلية جدا مشهورة. أقرب شي لها هو الميت بولز أو كرات اللحم ونقدر نعتبرها رغيف من كرات اللحم مغطى بصوص.

هذي الطريقة رهيبة وسهلة بس ركزي ركزي على إختيار أحسن نوع لحم ممكن هو اللي يسوي كل الفرق.

المقادير بالجرام لأن جدا صعب بالحجم ما أدري كم بالضبط كون الأحجام تختلف .

٢٠٠ جرام شابورة

١/٢ ملعقة صغيرة فلفل أسود

١ ملعقة صغيرة فلفل حار مطحون

١/٢ ملعقة صغيرة بابريكا

ملعقة صغيرة زعتر بري thyme موب oregano

١/٢ بصلة صغيرة مقطعه

جزره مقشرة ومقطعه

٤ فصوص ثوم

١/٢ فلفل رومي أحمر !! وما ينفع أبدا أخضر هنا ترى

٥٠٠ جرام سيرلوين sirloin بقري مفروم

٥٠٠ جرام لحم بقري مفروم

ملعقة ونص صغيرة ملح

بيضه

بعدين التغطيه :

١/٢ كوب كتشب

ملعقة صغيرة كمون

رشة من صلصة وستشير صوص

رشة تباسكو أو أي شطه

ملعقة كبيرة عسل

الطريقة :

سخني الفرن على ٣٢٥

الحين في خلاط مولينكس أخلطي الشابوره + الفلفل الحار و الأسود و الباريكا و الزعت و أخلطي إلين تتفتت الشابوره .

شيلي الخليط وحطيه في صحن . بعدين حطي الجزر و الثوم و البصل و الفلفل الرومي و أخلطيهم في الخلاط بس شوي إلين يتقطع ما تبين تعصرينهم.

اليحن أخلطي اللحم + الخضار + الشابوره المفرومه في صحن بأطراف أصابعك بس !! يعني أبدا لا تضغطينها بيدك عشان ما تنشف . بعدين حطي البيضه و الملح و كملي خلط .

أضغطي الخليط في صينية حقت الميت لوف عشان تشكلينها . بعدين أقلبي الخليط على صينية فرن مغطيه بورق فرن فكي اللحم منه شوي شوي إلين يطلع كله بعدين حطيه في الفرن ١٠ دقايق . بعد ١٠ دقايق أخلطي التغطيه حقته و أدهني الميتلوف بفرشه ورجعيه الفرن إلين يستوي كامل . لو عندك ميزان حرارة أطبخي الميت لوف إلين يوصل ١٥٥ فهرنهايت لا أكثر !! ولا أقل …

————————————————————————————————————————————————————————–

إيدام خضار

الخضار اللي بستخدم هي كوسا ، زهره ، جزر ، بصل ، فطر ، فاصوليا و بازلاء و بخلط معاهم فاصوليا بيضاء وممكن تبدلينه بحمص لو تبين.

الكوسا و الزهره و البصل و الجزر و الفطر بحمرهم في الفرن و الفاصوليا و البازلاء بسلقهم قبل.

نبدأ أول شي بإننا نشغل الفرن على ٤٥٠ بعدين نبدأ نحمر الخضار في صياني متفرقه بالدور. نحط الخضار اللي نبي في صينية فرن ونرش عليها شوي فلفل أسود وملح وزيت زيتون . نحمر الكوسا و الزهره و الجزر بحيث يكونون لسا نيين بس متحمرين شوي من بره. البصل و الفطر نحمرهم إلين يتحمرون زيين ويتكرملون بشكل حلو من بره.

الحين نسلق الفاصوليا في مويه مغليه مع رشه ملح لمدة دقيقه تقريبا إلين تلين شوي بعدين نشيلها ونحطها في حمام ثلجي علطول عشان نوقف الطبخ. نعيد نفس العمليه بالبازلاء (أستخدمي بازلاء مجمده أحسن) يعني نطبخها إلين تصير شوي لينه بس لسا نيه من داخل.

الحين نبدأ نسوي المرق. نبدأ أول شي بحبه بصل مقطعه صغار نطبخها بشوي زيت زيتون إلين يذبل البصل بعدين نحط عليها ٤ فصوص ثوم مقطعه شرايح ونطبخهم إلين تطلع ريحتهم ثواني بس بعدين نضيف عليهم ملعقة كبيره معجون طماط ونطبخه معهم شوي. الحين نحط علبه طماط معلب (شوفي موضوع صوص الطماط الأساسي عشان تعرفين كيف تختارين أحسن نوع) وكوب مرق دجاج بعدين نضيف عليهم البصل و الفطر المحمر و الجزر ونخلي المرق يطبخ إلين ينقص شوي وتتركز النكهة تقريبا ٢٠ دقيقه. الحين نحط الزهره و نص كوب (أو حسب الرغبه) فاصوليا بيضاء معلبه (أو مطبوخه في البيت) ونطبخهم مع بعض إلين تستوي الزهره تقريبا. الحين نحط باقي الخضار (البازلاء و الفاصوليا و الكوسا) ونكمل طبخ إلين يستوون. نعدل كثافه المرق بإننا نزيد مرق دجاج أو نخليه يطبخ أطول شوي بعدين نعدل الملح و الفلفل آخر شي. آخر خطوه نطفي النار ونحط على المرق شوي نعناع وبقدونس مفرومين.

—————————————————————————————————————————————–

ستيك الدجاج بالبلسمك .. Balsamic Marinated Chicken

ستيك الدجاج بالبلسمك سهل كل اللي بنسويه هو إننا نتبله بتتبيله بلسمك بعدين نشوحه.

ناخذ صدور الدجاج وننقعها في خليط مكون من جزأ خل بلسمك و ٣ أجزاء زيت زيتون وشوي ثوم مهروس وملح وفلفل و أوريجانو. ننقع الدجاج نص ساعة عالأقل إلى ساعتين أكثر من كذا ماراح يأثر. بعد ما ننقعه نطلع الدجاج وننشفه زييين على ورق نشاف أو مناديل رول ، مهم إن الدجاج يكون ناشف من برا عشان يتشوح معانا بعدين. نرش ملح وفلفل على وجهين الدجاج وبعدين نسخن مقله على حراره أعلى من وسط بشوي وبعد ما تحتر نحط شوي زيت (موب زيت زيتون) ونشوح الدجاج على الوجه الأول إلين يتحمر بعدين نقلبه ونشوح الوجه الثاني وننزل الحراره شوي عشان يكمل الدجاج إستواء ، إذا قرب الدجاج يستوي نحط في المقله ملعقتين كبار زبده ونطبخ الدجاج إلين يختفي اللون الوردي من داخل بس ولا دقيقه أكثر من كذا.

————————————————————————————————————————————————————————–

كبدة مشوحة .. Seared Liver

آبدي بمقله جدا حاره وحطي فيها شوي زيت نباتي (موب زيت زيتون) بعدين حطي فيها الكبدة اللي تبين مقطعه شرايح (يفضل كبدة الدجاج أو العجل هم أفضل شي ) ورشة ملح وفلفل وكمون وخليها بدون تحريك كم ثانيه إلين ما تتلون ، بعد كذا قلبيها شوي وخلي الوجه الثاني يتلون. الحين حطي البصل مقطع أجنحة و الثوم و أي شي ثاني تحبين بعدين حطي عليهم شوي ملعقة أو ملعقتين كبار زبده و أطبخي كل شي مع بعض كم دقيقه إلين ينطبخ البصل شوي و تصير الكبده مستويه بس شويييي ورديه من داخل (عمرك ما تطبخين الكبده إلين تصير سوداء من جوا). آخر شي حطي ملعقتين كبار خل بلسمك وملعقة كبيره دبس رمان و قطعي عليهم شوي بقدونس.

—————————————————————————————————————————————–

شوربة الزهرة بالزعفران .. Cauliflower and Saffron Soup

حبة بصل متوسطة مقطعه صغار
فصين ثوم
٤ أكواب زهرات زهرة (تقريبا راس ونص)
٤ ملاعق كبيره زبده
ملعقتين كبار زيت زيتون
٤ ملاعق كبيره طحين
كوبين حليب كامل الدسم
١/٨ ملعقة صغيره زعفران
كوبين مرق دجاج
ملح وفلفل أبيض
نص كوب كريمة

نخلط نص الزعفران مع زيت الزيتون في صحن صغير

نذوب الزبدة على حرارة هادية بعدين نطبخ البصل والثوم مع رشة ملح إلين يذبلون ، بعد كذا نحط الزهره وزيت الزيتون اللي مع الزعفران ونرفع الحراره شوي ونطبخهم كلهم إلين تتلون الزهرة شوي.

الحين نحط الطحين ونحركه مع الخليط شوي بعد كذا نحط الحليب و المرق و الزعفران ورشة ملح وفلفل أبيض ونخلي الخليط يوصل لغليه جدا هادية. نخلي الخليط يطبخ إلين تصير الزهرة جدا لينه وبعد كذا نطحنها بخلاط. نصفي الخليط بصفايه ونرجعه للقدر إلين يوصل لغليه بعدين نحط الكريمة. آخر شي نذوق ونعدل الملح و الفلفل وقوام الشوربه بإننا نضيف مرق أو حليب زيادة حسب الرغبه.

نزين الشوربة بكراث مقطع صغاااار أو بصل مقلي أو قطع خبز.

—————————————————————————————————————————————–

طاجن الدجاج بالزيتون .. Chicken and Olive tagine

ملعقة صغيره كمون مطحون
١/٢ ملعقة صغيره بابريكا
١/٤ ملعقة صغيره فلفل حار
١/٢ ملعقة صغيره شمر مطحون
٢ ملعقة صغيرة كزبرة مطحونه
بصلة مقطعه أجنحة
فصين ثوم مقطعة شرايح
٦ أفخاذ دجاج منزوعة العظم ومقطعه ٣ قطع
كوبين مرق دجاج
ملعقتين كبار عصير ليمون
١/٢ كوب زيتون أخضر مقطع أرباع
كوب كزبره

نقلب الفخوذ في الكون و الكزبرة و الشمر و البابريكا و الفلفل الحار وشوي ملح وفلفل ونخليه يتتبل تقريبا نص ساعة.

نسخن شوي زيت في مقله على حرارة أعلى من وسط بشوي بعدين نحط قطع الدجاج ونحمرها على كل الأطراف بعدين نشيل الدجاج في صحن.

نكب الزيت اللي في المقله بعدين نطبخ البصل و الثوم على حراره متوسطة بزيت زيتون في نفس المقله وبعد ما يذبل نرجع الدجاج للقدر. نضيف عصير الليمون و المرق ونمسح قاع القدر بالملعقة عشان نذوب كل القطع البنية.

نغطي القدر وننزل الحراره لأقل شي ممكن ونخلي الدجاج يطبخ إلين يستوي تماما ويصير لين ويتقطع بدون جهد تقريبا ربع ساعة. نشيل الغطا ونحط الزيتون ونخلي الطاجن يطبخ إلين يثقل المرق شوي تقريبا ٥ دقايق. آخر شي نطفي النار ونحط الكزبره.

—————————————————————————————————————————————–

سوفليه الجبن .. Cheese Souffle

للصحون :

٣٠ جرام طحين
٣٠ جرام بقسماط
زبة دافيه

————————–

لصوص المورناي :

٤٥ جرام زبده
٤٥ جرام طحين
٣٧٥ جرام حليب كامل الدسم
ربع بصله
ورقة غار
جوزة طيب
فلفل أبيض وملح
زعتر طازج thyme
١٢٠ جرام جبن جروير gruyere
رشة فلفل أحمر حار

لليازون :
٥ صفارات بيض

—————————

للمرانج :

٥ بياضات بيض
جبن جروير

—————————————–

نشغل الفرن على ٤٠٠.

ندهن ٦ صحون سوفليه بشوي زبده دافيه بعدين نخلط الطحين و البقسماط مع بعض ونغطي أطراف الصحون بهذا الخليط (زي ما سوينا بالسكر في السوفليه الحلو)

نسوي صوص مورنيه بالمكونات اللي كاتب (شوفي موضوع الصوص الأبيض و الرو في المدونة إذا ما تعرفين كيف) بعدين ندسمه بالليازون بإستخدام صفار البيض. نخلي الأساس عالجنب إلين نسوي المرانج.

نسوي المرانج ببياض البيض ونخليه يوصل مرحلة الرؤس الصلبه مع الإنتباه إننا ما نخفقه أكثر من اللازم !!

نخلط المرانج على الأساس شوي شوي بعدين نوزع الخليط على صحون السوفليه ونحط شوي جبن مبشور عالوجه وبعدين نمسحة زي ما سوينا في السوفليه الحلو بالضبط.

ندخله الفرن دقيقتين تقريبا بعدين ننزل الحراره ل ٣٥٠ ونخليه يكمل طبخ إلين يتضاعف حجمه ويستوي من داخل ويتحمر الجبن من فوق تقريبا تقريبا ١٠-١٥ دقيقه (خلي عينك عليه).

—————————————————————————————————————————————–

سلطة السالمون بالشمر .. Fennel and Salmon Salad

١/٤ كوب سكر
١/٤ كوب خل رز
حبتين يانسون (اللي شكله زي النجمه)
٤ أكواب مويه
فيليه سالمون نص كيلو تقريبا مع الجلد
حبتين برتقال
٤ أكواب شمر fennel مقطع أجنحة نحيييييفة
كوب ورق نعناع
ملعقتين كبار زيت زيتون

أخلطي السكر مع الخل و المويه و اليانسون مع ملح وفلفل في قدر وخليه يوصل غليه بعدين حطي فيليه السالمون وخلي الجلد على فوق ، غطي القدر وطفي النار وخلي السالمون يقعد في القدر ١٠ دقايق (مع إن النار طافيه إلا إن حراره الخليط بتطبخ السالمون). أقلبي السالمون بعدين غطي القدر من جديد وخليه يكمل طبخ إلين ينطبخ من برا بس يكون شفاف من النص تقريبا ٦-٧ دقايق.

شيلي الفيليه من الصوص وخليه يبرد شوي بعدين شيلي الجلد وفتتي اللحم لقطع كبيره بإستخدام شوكه. لا تفتتين اللحم مره نبيه قطع كبيره.

قشري البرتقال من القشر ومن الجزأ الأبيض بإستخدام سكين حاد بعدين قطعي البرتقال لأجنحة supremes.

أخلطي الشمر و النعناع في صحن بعدين رصيهم في صحون وحطي فوقهم شوي برتقال وكم قطعه سالمون وآخر شي شوي زيت زيتون وملح وفلفل.

————————————————————————————————————————————————————————–

سمك بصوص المونييه .. Fish with Meuniere Sauce

السمك المستخدم غالبا للمونييه هو سمك موسى أو سمك السول. يمديك تستخدمين نفس الطريقة مع أي سمك أبيض بس الصوص يمشي أحسن مع الأسماك المسطحة.

رشي الفيليه عالوجهين بشوي ملح وفلفل أبيض بعدين سخني مقله تيفال على حرارة وسط و أطبخي السمك في شوي زبدة. حطي الفيليه وخليه يطبخ إلين يبدأ لونه يتغير ويبدأ الوجه اللي تحت يتلون شوي بعدين أقلبيه و كملي طبخ إلين يستوي السمك. يستوي السمك إذا حاولتي تشيلينه ولقيتيه بدأ يتفتت معك بعد ما يوصل هذي المرحلة لاتخلينه ولا دقيقه يطبخ زيادة عشان ما ينشف. الحين شيلي السمك على صحن عالجنب عشان تسوين الصوص.

للصوص حطي شوي زبده في نفس المقله وخليها تطبخ إلين تبدأ تقلب بنيه وتبدأ تطلع ريحتها (لا تخلينها تنحرق أنتبهي) بعد ما تقلب بنيه طفي النار وأعصري عليها شوي ليمون ورشه بقدونس وذوقي الصوص وعدلي الحموضه و الملح و الفلفل وقدمي الصوص فوق السمك.

—————————————————————————————————————————————–

كرات اللحم السويدية .. Swedish Meat Balls

كرات اللحم السويدية هي كرات لحم عادية منكهة بنكهات سويدية بس.

شوفي موضوع كرات اللحم في المدونة وسوي نفس الشي بس بدال ما تنكهينها بأعشاب زي ما سوينا هناك نكهيها بشوي جوز طيب و زنجبيل و كاراويه و بهار حلو وشبت.

الصوص تسوينه بعد ما تطبخين الميت بوولز شيليهم في صحن عالجنب ونزلي الحراره بعدين حطي ربع كوب طحين على الزيت اللي باقي و حركيه معهم إلين يتشقر شوي (يعني نسوي رو بس بالدهن اللي نزل بدال زبدة) بعدين ضيفي على الرو ٣ أكواب مرق بقر غامق (تلاقين موضوع المرق في المدونة) و أطبخيها معها شوي إلين يختفي طعم الطحين بعدين ضيفي عليها شوي قشطة خفق عشان تدسمينها زياده وآخر شي قطعي على الصوص شوي شبت وبس

————————————————————————————————————————————————————————–

سلطة نوودلز الكوسا .. Zucchini Noodle Salad

الكوسا من أكثر الخضروات اللي صعب تتورطين فيها أحس، إستخداماتها ما تخلص.

في أي خضار تتورطين فيها أسهل شي تسوينه (وغالبا يطلع رهيب) إنك تحمرينه في الفرن. شغلي الفرن على ٤٠٠ ، رشي الكوسا بملح وفلفل وزيت زيتون وشوي ثوم وبعدين دخليه الفرن إلين يتحمر ويستوي من داخل. آخر شي طلعيه ورشي عليه نعناع مقطع ورشة ليمون. لو الكوسا صغاااار حلو تخلينها كاملة غير كذا قطعيها على زاوية قطعتين أو ثلاثة وقدميها كطبق جانبي مع سمك أو خضار أو دجاج أو لحم أو أي شي.

تقدرين تسوين في الكوسا كذا شي من شوربه ، سلطة ، ساندوتش (بعد ما تشوينه وتقدمينه ممكن مع شي زي صوص روميسكو) ، تقدرين حتى تسوينه تيمبورا (الطريقة في الموقع).

سلطة نوودلز الكوسا :

هنا نستخدم الكوسا زي النوودلز وبنطبخها بالملح بس (شوفي موضوع طرق الطبخ الأساسية إذا تبين تفهمين كيف هذا يصير).

تقريبا كيلو كوسا
جبن بارمزان
صنوبر محمص
ملح وفلفل أسود
بصل أحمر مقطع أجنحة نحيييييفة
نعناع مقطع كبار

الدريسنج :
ملعقة كبيرة خل عنب أو خل تفاح لو ماعندك
ملعقة كبيرة عصير ليمون
٦ ملاعق كبيرة زيت زيتون
ملعقة صغيرة عسل
ملح وفلفل
ملعقة صغيرة خردل (يفضل خردل ديجون)

أول شي نبشر الكوسا بمبشرة بحيث نسوي شرايح طويلة زي الفيتوشيني. نبشر الكوسا إلين نوصل للبذور بعدين نوقف ونبشر الجهة الثانيه لا تبشرين البذور !! ما نبيها هنا ولا راح نستخدم القلب بس نبي الأطراف.

الحين نحط النوودلز في صفايه ونرش عليها شوييي ملح تقريبا ربع ملعقة صغيرة ونقلبها مع الملح شوي. نخلي النوودلز نص ساعة وبعد نص ساعة نشيلها من الصفاية وبنلاحظ النوودلز صارت لينه مرة.

الحين نسويي الدريسنج بإننا نخلط مقاديره كلها في برطمان صغير إلين تتداخل مع بعض وتصير خليط متجانس.

نحط النوودلز و النعناع و الصنوبر و البصل في صحن خلط ونبدأ نحط الدريسنج عليها شوي شوي (لاتحطين أكثر من اللازم الدريسنج لازم يغطي الخضار بس موب أكثر من كذا).

—————————————————————————————————————————————–

طاجن الخضار .. Vegetable Tagine

الطاجن فيه ألف طريقة تسوين طاجن خضار نوعية الخضروات المستخدمة ما تخلص هذا طاجن جدا لذيذ كطبق جانبي مع كسكسي أو شي زي كذا.

ملعقتين صغار كمون مطحون
ملعقتين صغار كزبرة مطحونة
ملعقة صغيرة شمر مطحون
بصلتين مقطعة أجنحة نحيفة
فصين ثوم مقطعة شرايح نحيفة
٣ ملاعق كبيرة هريسة (معجون فلفل حار موجود في كل مكان)
حبة قرع أمريكي مقطعة كبار
٤ جزرات مقشرة ومقطعه رونديل كبار
كوبين مرق دجاج
٧٥ جرام مشمش مجفف مقطع بالنص
علبة حمص معلب مصفية (أو حمص منقوع طول الليل وبعدين مطبوخ في مويه)
نعناع
بقدونس
كزبرة

** البهارات يفضل تحمصينها شوي في مقله بعدين تطحنينها راح تسوي فرق كبييييير عن إنك تستخدمين بهارات مطحونه جاهزة.

سخني الفرن على ٤٥٠ .

حطي الجزر و القرع في صينية فرن بعدين رشي عليهم شوي ملح وفلفل وزيت زيتون ودخليهم الفرن إلين يتحمرون شوي بس يكونون لسا شوي قاسين من داخل.

والخضار في الفرن سخني شوي زيت زيتون على حرارة وسط بعدين أطبخي البصل إلين يذبل بعدين حطي الثوم و الهريسة و البهارات و أطبخيهم شوي مع بعض. الحين حطي المرق و المشمشم المجفف وخليهم يطبخون على غليه خفيفة.

بعد ما تخلص الخضار حطيها عالمرق مع الحمص وخليهم يطبخون إلين تستوي الخضار. ذوقي وعدلي الملوحة بعدين طفي النار وحطي النعناع و البقدونس و الكزبرة المقطعين.

—————————————————————————————————————————————–

شوربة دجاج تايلندية .. Thai Chicken Soup

عودين ليمون جراس lemon gras اللي هو عشبة الليمون مقطعة صغار (شوفي موضوع مكعبات الليمون إذا ما تعرفين وشلون تقطعينه).
حبتين شالوت shallot مقطعة مكعبات صغيرة (ينفع بصل بص بيفرق كثييييير)
فصين ثوم مقطعة شرايح نحيفة
زيت
٦ أكواب مرق دجاج أبيض (الطريقة في المدونة)
علبة طماط معلب مصفيه من العصير (صفي العلبه في صفايه ، خلي العصير عالجنب وبعدين قطعي الطماط قطع كبيرة)
تقريبا ٦٠ جرام معجون تمر هندي مقطع
تقريبا ٣ ملاعق كبيرة صوص سمك fish sauce (أو حسب الحاجة)
حبتين فلفل تايلندي (الأحمر الصغيييييير) مقطعة صغار
ورقتين كافر لايم مجمدة أو طازه (لو ماعندك حطي بشر لايم بس موب طالع نفس الشي)
٢ إنش تقريبا زنجبيل مقشر ، مقطع صغار
نص كيلو صدور دجاج
تقريبا ١٠٠ جرام بازلاء ثلجية أو snow peas مقطعه أرباع
١/٣ كوب ريحان تايلندي (ريحان عادي لو ماعندي)

أطبخي الشالوت مع الثوم و الليمون جراس في شوي زيت على حرارة وسط إلين يذبلون تماما ويبدون يتلونون مع الأطراف.

حطي المرق + عصير الطماط + التمر الهندي + الزنجبيل + صوص السمك + ورق الكافر لايم + الفلفل الحار وخليهم يطبخون على غليه خفيفه نص ساعة تقريبا بدون تغطية القدر !

والشوربة تطبخ حطي صدور الدجاج في الفريزر ٢٠ دقيقة تقريبا. بعد ما تجمد شوي قطعي الصدور شرايح نحيفة مره وخليها عالجنب.

صفي الشوربة في قدر ثاني وأرمي اللي في الصفايه بعدين رجعي المرق لغليه. الحين حطي صدور الدجاج مع الطماط المقطع و الريحان و ال snow peas وخليهم يطبخون على غليه جدا خفيفه إلين يستوي الدجاج لا أكثر تقريبا دقيقتين. بعد كذا ذوقي الشوربة وعدلي الملح بإنك تزيدين صوص سمك (في تايلند محد يستخدم ملح تقريبا) و عدلي الحموضة بإنك تزيدين خل قصب سكر أو عصير لايم.

—————————————————————————————————————————————–

السوككا .. Socca

هذي وصفتين رهيبة وغير مألوفة لكثير ناس بس أضمنلك من يوم تجربينها بتدمنينهم الإثنين. الوصفة الأولى لشي إسمه سوككا ، هي أكلة شوارع من جنوب فرنسا تقريبا تشبه البانكيك أو الخبز بس مره رهيبة. الوصفة الثانية هي للحمص المقلي ، شي تقريبا زي البطاطس المقلي بس أسهل بكثير ودايما يضبط عكس البطاطس.

السوككا Socca :

كوب ونص مويه
كوب طحين حمص
ملعقة صغيرة ملح
فلفل أسود
٤ ملاعق كبار زيت زيتون
نص بصلة مقطعة أجنحة نحييييفة
ملعقة كبيرة روزماري مقطع صغار

حطي المويه في صحن بعدين أنخلي عليها طحين الحمص. أخلطي معهم الملح و الفلفل و ملعقتين من زيت الزيتون وأخلطي الخليط إلين يعطيك خليط متجانس. خلي الخليط يرتاح على حرارة الغرفة كم دقيقة (يقعد كذا إلى ١٢ ساعة بدون مشاكل).

شغلي الفرن على ٤٥٠ و أدهني صينية بيتزا بباقي الزيت.

الحين أخلطي البصل و الروزماري مع الخليط وصبي الخليط في صينية البيتزا المدهونة ودخليها الفرن. خلي البانكيك في الفرن ربع ساعة تقريبا أو إلين يجمد الخليط.

طلعي السوكا من الفرن وشغلي الفرن على الشوايه (يعني الحرارة من فوق على أحر شي) وحطي شبك الفرن قريب من الشواية بعدين أدهني السوكا بشوي زيت زيتون ودخليها الفرن قريب من الشواية عشان تتحمر من فوق في مناطق (تقريبا دقيقة إلى دقيقتين موب أكثر).

طلعيها من الصينية وقطعيها وكليها لحالها أو قدميها مع سلطة أو شي زي تابيناد أو صوص روميسكو أو حتى صوص طماط عادي. بس هناك يالكونها لحالها في الشارع ملفوفة بورق.

—————————————————————————————————————————————–

فرايز الحمص .. Chickpea fries

كوب طحين حمص منخول
ملح وفلفل
ملعقتين كبار زيت زيتون + زيادة للدهن
كوبين مويه
بارمزان مبشور
زيت للقلي

أدهني صينية بيتزا بزيت زيتون (أو لو عندك أفضل صينية مربعة المهم إن خليط الحمص إذا صبيناه يكون إرتفاعه تقريبا ١سم عالأقل في الصينية اللي نحط).

أغلي المويه وبعد ما تغلي حطي عليها طحين الحمص شوي شوي مع التحريك بإستمرار وإحنا نضيف الطحين عشان ما يتكتل. بعد كذا نضيف رشة ملح وفلفل أسود و زيت الزيتون وننزل الحرارة لغلية خفيفة. نخلي الخليط يطبخ على غليه جدا خفيفة دقيقة وحدة بس بعدين نطفي النار ونصب الخليط ونواسيه في الصينية اللي جهزنا.

نخلي الخليط يبرد شوي بعدين نغطيه وندخليه الثلاجة نص ساعة عالأقل أو إلين يجمد تماما. بعد ما يجمد نطلعه من الصينية ونقطعه بالشكل اللي نبي نقدر نقطعه مكعبات أو دوائر أو حتى عيدان زي البطاطس العادي.

الحين نسخن زيت في مقلة بحيث يوصل نص إرتفاع الحمص اللي سوينا بعدين نقليه في الزيت إلين يتحمر من جهة ونقلبه ونحمر الوجه الثاني.

—————————————————————————————————————————————–

سلطة المنجا أو البابايا الخضراء مع الربيان .. Green Mango or Papaya Shrimp Salad :

حبة باباي خضراء مقطعة جوليان (شوفي موضوع التقطيع إذا ما تعرفين كيف)
فص ثوم
نص حبة شالوت shallot أو ربع بصلة حمراء صغيرة
حبة فلفل أحمر حار يفضل فلفل تايلندي
ملعقتين كبار صوص سمك fish sauce
٣ ملاعق كبيرة عصير لايم
ملعقتين صغار سكر
حبة طماط مقطعة ٨ قطع
ملعقتين كبار فول سوداني محمص ومقطع كبار
١/٢ كوب كزبرة مفرومة
ربيان مسلوق أو مشوي حسب الرغبة (إختياري بس رهيب)
……

* الربيان أطبخيه بإنك تحطينه في مويه مملحة على غلية جدا خفيفة إلين يقلب لونه برتقالي بعدين شيليه وحطيه في حمام ثلج عشان توقفين الطبخ.

في هاوند حطي البصل و الثوم و الفلفل الحار و أهرسيهم زين بعدين حطي عليهم عصير اللايم و صوص السمك و السكر. ذوقي وعدلي حسب الرغبة ، لو أحتاجت ملح زيدي صوص سمك.

أخلطي الصوص مع باقي المقادير إلا الربيان بعدين حطي الربيان آخر شي

—————————————————————————————————————————————–

توفو بالملح والفلفل salt and pepper tofu :

١/٢ كوب بصل مقطع مكعبات صغيرة
حبة فلفل أحمر بارد مقطعة مكعبات صغيرة
ملعقة كبيرة ثوم مقطع صغار
ملعقة كبيرة زنجبيل مقطع صغار
ملعقة كبيرة صويا صوص
ملعقة صغيرة سكر بني

التوفو :

مكعب توفو مقطع لمكعبات حجمها ١ إنش تقريبا
نشا ذرة
ملح وفلفل أسود مطحون خشن
زيت للقلي

————————————————————

سخني شوي زيت وبعد ما يحتر حطي البصل و الفلفل الأحمر و أطبخيهم بسرعة إلين يذبلون. بعد ما يذبلون حطي الثوم و الزنجبيل و أطبخيهم دقيقه بس إلين تطلع ريحتهم شوي بعدين حطي الصويا و السكر البني وطفي النار بعدين حطي الخضار في صحن.

الحين حطي التوفو في صحن ورشي عليها نشا ذرة وملح وفلفل أسود وقلبيهم مع بعض بحيث التوفو يكون مغطى بالنشا زين.

الحين أقلي مكعبات التوفو في زيت حار إلين تصير تقرمش من برا وتاخذ لون ذهبي خفيف. طلعيها من الزيت وحطيها على مناديل عشان تشيلين الزيت الزايد. قدمي التوفو وفوقها الخضار اللي سوينا في الخطوه الأولي.

————————————————————————————————————————————————————————–

البوليابيس .. Bouillabaisse :

قبل كل شي لازم تعرفين أشياء عن البوليا بيس.

البوليابيس يخنة سمك من جنوب فرنسا. نوعية السمك المستخدم هي أهم شي وكل شي في البوليابيس والفرنسيين المهتميين بأصالة المطبخ الفرنسي يصرون على إستخدام أنواع أسماك معينه تتواجد هناك لأنها هي اللي تعطي نكهة البوليابيس الأصلية بس طبعا هذا شي مستحيل هنا. تقدرين تسوين بوليابيس رهيبة بدون الفلسفة الزايدة هذي أهم شي يتوفر كم نوع سمك وكم نوع قشريات عندك ولو ما توفر أي شي من الأنواع هذي لا تحطينه ماراح تنقص من الوصفة كثير. أنا حاولت أبسط الوصفة بأبسط شي أقدر عليه بدون ما أخرب في الطعم أي تغير أو تبديل ثاني بتسوينه سويه بس على مسؤوليتك الصراحة.

البوليابيس :

لمرق السمك :

تقريبا نص كيلو عظم وروس سمك بدون الأمعاء وبدون الخياشيم لو كانت موجوده.
ربع كيلو قشر ربيان أو لوبستر
ورقتين غار
كم حبة فلفل أسود حب
لتر ونص مويه
رشة ملح

البوليابيس :

١/٢ كوب زيت زيتون بكر
حبة بصل كبيرة مقطعه كبار
حبة شمر fennel صغيرة مقطعه كبار (الشمر هنا الثمرة نفسها موب البذور)
١/٢ كوب واين أبيض منزوع الكحول white wine متوفر في السوبرماركتات بإسم فينولا
علبة طماط مقشر مقطع الطماط حقها كبار
١/٤ كوب بقدونس مفروم
قشر ربع برتقاله تقريبا ( تاخذين برتقاله وتاخذين شريط من القشر بإستخدام قشارة خضار عادية بعدين تشيلين الجزأ الأبيض لو كان لاصق فيها)
رشة صغيرة زعفران (ضروري هنا للطعم !)
٢٠٠ جرام فيليه سمك ماسك شوي. في جده دوري شي زي الحريد أو النجار أو الشعور. مقطع مكعبات كبيره قد لقمه تقريبا.
٢٠٠ جرام سمك لين. في جده تقدرين تستخدمين ناجل أو هامور. مقطع زي اللي فوق.
٢٠٠ جرام لحم ربيان مقطع زي اللي فوق
فصين ثوم
رشة فلفل حار

الروي :

حبة فلفل أحمر بارد
٣ فصوص ثوم
حبة فلفل أحمر حار منزوع البذور
عصرة ليمون
ملح
١/٢ كوب زيت زيتون
خبز فرنسي مقطع حلقات

………………………………………

للمرق :

نغسل عظم السمك و الربيان بعدين نحطهم في قدر مع الفلفل الأسود و الملح و المويه وورق الغار ونشغل النار عليهم.

نخلي المرق يطبخ على غليه جدا خفيفه نص ساعة تقريبا بعدين نصفيها في قدر ثاني.

للبوليابيس :

نحط ربع كوب زيت زيتون في قدر على حراره وسط وبعد ما يحتر نطبخ فيه الشمر و البصل مع رشة ملح إلين يذبلون شوي (لا تخلينهم يتلونون). بعد ما يذبلون نحط الواين ونطبخه إلين يتبخر تقريبا بعدين نحط المرق اللي سوينا في الخطوة الأولى و الطماط و الزعفران و قشر البرتقال و البقدونس. نخليهم يطبخون على غليه جدا خفيفه ربع ساعة تقريبا.

الحين نحط الربع كوب الباقيه من الزيت و السمك كله ورشة ملح و الفلفل الحار و الثوم ونرفع الحراره لأعلى شي ونخليهم يغلون على غلية قويه ٥ دقايق تقريبا. نطفي النار ونحط الربيان ونغطي القدر ونخليه إلين يستوي السمك و الربيان (بدون حراره هو بيستوي من الحراره الباقيه في القدر).

نذوق ونعدل الملح حسب الذوق.

الروي :

نشوي الفلفل البارد على الغاز مباشره إلين يصير القشر كله أسود مره. نحطه في صحن ونغطي الصحن بنايلون ونتركه ١٠ دقايق. بعد العشر دقايق نقشر الفلفل وبنلاقي القشر طلع بسهولة.

الحين ناخذ الفلفل المشوي مع الثوم و الفلفل الحار و الليمون ونخلطهم مع بعض في خلاط مولينكس وبعدين نصب عليهم زيت الزيتون شوي شوي من فوق. نذوق ونعدل الملح حسب الرغبة..

للتقديم :

ناخذ شرايح الخبز الفرنسي وندهنها زيت زيتون بعدين نحطها في فرن ٥٠٠ إلين يتحمر الخبز شوي. نطلع الخبز الحار وندهنه بالروي بعدين نحط في كل صحن حبه من هذا الخبز المدهون ونصب فوقه اليخنه.

—————————————————————————————————————————————–

 

كروكيت البطاطس .. Potato Croquettes :

نص كيلو بطاطس (تقريبا حبتين وسط) مقشره ومقطعه قطع كبيرة.
٣ بيضات
ملعقة كبيرة بقدونس مفروم
ملعقة كبيرة كراث مفروم
ملعقة كبيره نعناع مفروم
ملعقتين كبار زبدة دافيه
١/٢ ملعقة صغيره ملح
رشة فلفل أسود
٣/٤ كوب طحين
٣/٤ كوب بقسماط أو بقسماط ياباني لو عندك ( لو بتستخدمين بقسماط عادي سويه في البيت ) ، تقدرين تستخدمين بعد كراكرز مطحونه لو تبين تغيير أو حتى كنافه.

غطي البطاطس بمويه بارده مع ملح وخليها توصل غليه خفيفه و أطبخيها إلين يستوي البطاطس يعني يدخل فيه سكين بسهوله.

صفي البطاطس وهو حار بعدين علطول أهرسيه وهو حار لازم !!

خلي البطاطس تبرد شوي بعدين حطي عليها البيضه و الملح و الفلفل و الأعشاب و الزبدة وأخلطيها معهم زييين.

شكلي البطاطس بالشكل اللي تبين سواء كرات صغيره أو أسطوانات ، أو أقراص أي شكل تبينه وحطيهم على صحن أو صينيه.

الحين أخفقي البيضتين الثانيات شوي في صحن وحطي الطحين و البقسماط في صحون منفصله.

خذي الكبة وغطيها بالطحين بعدين هزيها عشان تشيلين الطحين الزايد بعدين غطيها في البيض وبعدين في البقسماط ووزعيها على صحون ودخليها الثلاجه نص ساعة عشان تتماسك.

في مقله سخني زيت يكفي إنه يغطي نص الكبه إلين يصير حار (٣٦٠ فهرنهايت لو عندك ميزان حراره) بعدين حطي الكبه وبعد ما يتحمر الوجه الأول أقلبيها وأطبخي الوجه الثاني. قدميها مع صوص روميسكو (موجود في صفحة الوصفات) أو مايونيز مع أي نكهة تحبين.

—————————————————————————————————————————————–

المسقعة .. Moussaka

أيواااا … هذي الأكلة أقدرها بشكل ما تتصورينه .. جربي هذي و أضمنلك شي رهيييييييب … الطريقة اللي بحط تستخدم باشاميل في الأخير لو ما تحبين الباشاميل معها أتركيه بكل بساطة وسويها بدونه. أنا ما أحب البطاطس مع المسقعه الصراحة بس إذا تحبين طبعا حطي …

المسقعة :

لحشوة اللحم :

٤٠٠ جرام لحم غنم مفروم (تقدرين تستخدمين بقر أو عجل لو تبين بس الغنم غييييير هنا)
بصله وسط مقطعه صغار
٣ فصوص ثوم مقطعه شرايح نحيفة
عودين دوش أو زعتر بري (أو ملعقة صغيره زعتر بري مجفف thyme)
ملعقة صغيره أوريجانو
رشة جوزة طيب
ربع ملعقة صغيره بهار حلوallspice
نص ملعقة صغيره فلفل حار مطحون
نص ملعقة صغيره قرفة
ملعقة كبيره صلصة طماط
نص كوب مرق دجاج أو لحم
ملعقة صغيره خل عنب أو تفاح
علبتين طماط معلب مهروسه ومنزوعة البذور (شوفي موضوع صوص الطماط الأساسي سويي زي ما سوينا بالطماط هناك بالضبط)
ملح وفلفل أسود

للباذنجان :

حبة باذنجان كبيره أو حبتين صغيره مقشرة و مقطعه حلقات سمكها ١ سم (أو حسب ما يكفي الصحن عندك).
شوي طحين
زيت للقلي

للباشاميل :
أصبع زبدة
٧ ملاعق طحين
٣ أكواب ونص حليب كامل الدسم
ربع كوب جبن قشقوان
ربع كوب جبن بارمزان

للحم :

أبدي أول شي بإنك تسخنين قدر عريض على حراره وسط ، بعد ما يحتر حطي شوي زيت زيتون بعدين اللحم وخليه يطبخ مع التحريك من وقت لوقت إلين يتلون ويتحمر. في البدايه بيتغير لونه لرصاصي وبتطلع منه مويه وبعدين بتتبخر المويه وبيبدأ اللحم يتحمر ويتحول للون ذهبي هذا اللي نبيه ! ما نبي لحم لونه رصاصي بس.

بعد ما يتحمر اللحم نزلي الحراره وحطي البصل والثوم و الأعشاب و البهارات ورشة ملح وفلفل وحركيهم مع بعض وخليهم يطبخون إلين يذبل البصل شوي.

الحين حطي معجون الطماط و أطبخيه مع الخليط شوي تقريبا دقيقه بعدين حطي الخل و أطبخيه إلين يتبخر وبعدين حطي المرق و الطماط وخليهم يطبخون على حراره هاااديه إلين يثقل الخليط تماما ويصير مره ثقيل تقريبا ساعة أو أكثر. ذوقي الخليط وعدلي الملح الحين (أنتبهي لا تحطين ملح كافي و الخليط مليان مويه !! الملح ما يتبخر ولو حطيتي الملح تماما وخليتيه يطبخ ساعه بتطلعين بشي طعمه بحر)

وصوص اللحم يطبخ جهزي الخطوات الثانيه . تقدرين تسوين صوص اللحم قبلها ب ٥ أيام وتحفظينه في الثلاجه أو تفرزينه ٣ شهور تقريبا.

للباذنجان :

لو الباذنجان كبير مره يفضل تملحينه عشان تشيلين المراره بس هي خطوة موب ضروريه. لو تبين تملحينه حطي الشرايح حقت الباذنجان في صفايه ورشيها بكمية ملح كبيره وخليها تقريبا ساعة. بعد ساعة أغسلي الشرايح وجففيها بمناديل رول. أو أستخدمي باذنجان صغير وخلاص نادرا ما يكون مر.

جيبي مقله وحطي فيها تقريبا نص سانتي زيت وخليه يحتر إلين يصير حار مره للقلي. غطي الباذنجان بشوي طحين و أقلي الشرايح إلين تتحمر من برا بعدين أنقليها على شبك تبريد أو ورق قلي لو تبين. رشي شوي ملح عليها لو ماكنتي ملحتي الباذنجان

الباشاميل :

سويي صوص مورنيه (صوص جبن) تلاقين الطريقة في موضوع الصوص الأبيض

الحين جيبي صحن و أدهنيه زيت بعدين حطي طبقة لحم بعدين طبقة باذنجان وكذا إلين آخر الصحن. حطي طبقة باشاميل آخر شي فوق ودخلي الصينية الفرن على حراره ٣٧٥ إلين يتحمر الجبن وكل شي يصير حار.

—————————————————————————————————————————————–

رز الصيادية :

عندي ووحدة من أطعم أطباق الرز اللي أحب بعد. عن نفسي فكرة السمك المسلوق مع رز موب شي مشجع الصراحة لأن عمر السمك ما يجي مطبوخ صح كذا دايما يكون مستوي أكثر من اللازم وعشان كذا عمري ما أطبخ السمك مع الرز في الصيادية بس أسوي السمك عالجنب لو أبي. عشان طعم السمك اللي مطلوب طبعا في الصيادية أستخدم مرق سمك.

حبتين بصل مقطعه أجنحة
فص ثوم مقطع شرايح نحيفة
حبة فلفل أخضر حار كامل
ملعقتين كبار تمر هندي
٤ حبات هيل ، ٣ حبات قرنفل ، عود قرفة ، حبة ليمون مجفف أسود ، ملعقة صغيرة كزبرة حب ، نص ملعقة صغيرة كمون حب ، نص ملعقة صغيرة فلفل أسود حب
ملعقة كبيرة معجون طماط
كوبين رز بسمتي (أو زودي أو نقصي حسب الرغبة طبعا)
٣ أكواب ونص مرق سمك (تلاقين الطريقة في صفحة الوصفات في وصفة البوليابيس ولو ما تبين حطي مويه أو مرق دجاج بس الطعم موب طالع نفس الشي أبدا)

……………………………………………………….

أول شي نسويه هو إننا نسخن شوي من مرق السمك ونحط فيه التمر الهندي ونخيه ينقع فيه إلين يصير المعجون جدا لين. نصفي الخليط ونخليه عالجنب.

نغسل الرز في عدة غسلات من المويه إلين تصير موية الغسل صافية بعدين نحطه في صفاية عشان تنزل المويه الزايدة.

في قدر نسخن شوي زيت ونحط البصل مع رشة ملح ونطبخ البصل على غلية جدا جدا هادية مع التحريك من وقت لوقت إلين يتكرمل البصل ويصير لونه بني جدا غامق (تقريبا نص ساعة أو أكثر !!)

الحين نحط الثوم و الفلفل و البهارات الكاملة ونحركهم مع بعض بعدين نحط الرز ونقلبه في الدهن تقريبا دقيقتين.

الحين نحط معجون الطماط ونحركه معهم شوي بعدين نحط المرق اللي ذوبنا فيه التمر الهندي و باقي المرق وتقريبا ملعقتين صغار ملح. نخلي المويه إلين توصل غليه بعدين ننزل الحرارة لأقل أقل شي ونغطي القدر زيييين. نطبخ الرز ١٨ دقيقة تقريبا أو حسب الرز حقك كم ياخذ وقت طبخ بعدين نطفي النار ونخلي الرز يرتاح ١٠ دقايق قبل الأكل ….

 

—————————————————————————————————————————————–

الزهرة المقلية .. Fried Cauliflower

جيبي الزهرة وقطعيها وردات بعدين أسلقيهم في مويه مملحة إلين تصير لينه بس موب مهرية (يدخل فيها سكين بسهولة بس موب للدرجة اللي تكون مثل الزبدة) بعدين طلعيها من المويه وحطيها في حمام ثلجي عشان نوقف الطبخ وما تصير مهرية بعدين. خليها تبرد شوي قبل تكملين.

وقت القلي خذي الوردات ونشفيهم زييييين بمناديل أو خرقة مطبخ بعدين غطيهم في طحين مخلوط معه ملح وفلفل (وأي أعشاب أو بهارات لو تحبين. الكاري بالذات لذيذ مع الزهرة) بعدين هزيهم عشان تشيلين الطحين الزايد وبعدين غطيهم في بيض وبعد البيض غطيهم في بقسماط وأقليهم في زيت حار.

—————————————————————————————————————————————–
صينية الزهرة (جراتين الزهرة Cauliflower gratin)

هذي الأكلة إدماااااااان بكل ما تعنيه الكلمة من معنى. واحد من ألذ ألذ الأطباق الجانبية عندي وكثييييير ما كانوا ياكلون زهرة حبوها منها. أحب أسويها في صحون صغيرة وأعطي كل واحد صحنة بس يمديك تسوينها في صحن كبير لو تبين وتقدمينها كصينية هي رهيبة بكل الأحوال. الشي الثاني الرهيب فيها إنك تقدرين تجهزين كل شي وتدخلينها الفرن بس في آخر دقايق يعني ممكن تتجهز قبل بوقت (إلى يومين) لعزيمة أو كذا.

كيلو ونص زهرة (أو حتى بروكلي) مقطعة وردات. تقريبا راسين كبار أو بالأدق ٨ أكواب من الوردات.
٦ ملاعق كبيرة زبدة
٤ ملاقع كبيرة طحين
كوبين حليب كامل الدسم
رشة جوزة طيب
كوب جبن جودا gouda (أو ممكن تستخدمين تشيدر أو جرويير أو فونتينا أو خليط منهم)
ربع كوب تقريبا جبن بارمزان
تقريبا كوب بقسماط منزلي ! (خبز بايت مطحون في خلاط)

أسلقي الزهرة وبرديها في حمام ثلجي (زي ما شرحت للوصفة السابقة)

الحين سويي صوص مورنيه (صوص باشاميل مع جبن شوفي موضوع الصوص الأبيض لو تبين شرح أفضل). ذوبي ٤ ملاعق زبدة على حراره وسط وبعد ما تذوب حطي عليها الطحين وحركيه معها وأطبخيه شوي إلين يصير شوي أشقر بعدين أبدي صبي عليه الحليب شوي شوي مع التحريك. لاتصبين دفعة الحليب الثانية إلين يوصل الحليب لغلية. بعد ما تصبين كل الحليب حطي رشة ملح وفلفل أبيض وجوزة طيب وخلي الصوص يطبخ شوي عشان يروح طعم النشا. طفي النار وحطي جبن الجودا على دفعات مع التحريك من وقت لوقت إلين يذوب تماما. خلي الصوص عالجنب.

الحين جيبي صينية وأدهنيها بزبدة بعدين رصي الزهرة عليها.

غطي الزهرة بالمورنيه بعدين رشي وجهها بالبارمزان المبشور.

الحين الصينية ممكن تقعد في الثلاجة إلى يومين.

إذا جيتي تطبخينها ، شغلي الفرن على ٣٧٥.

ذوبي باقي الزبدة وبعد ما تذوب حطي عليها البقسماط وقلبيه معهم بعدين وزعي البقسماط فوق الزهرة.

دخلي الصنيية الفرن وخليها في الفرن إلين تتحمر من فوق ويبدأ الصوص يغلي وتصير الزهرة جدا جدا لينية وكريمية ..

—————————————————————————————————————————————–

السمبوسة الهندية .. Indian Samosa

كل تجاربي السابقة في السمبوسة الهندية كانت عادية إلين رمضان اللي راح وصلت للعجينة المثالية برأيي ، لينه وتتفتت في الفم رهيبة ما ينشبع منها. طريقة عمل العجينة شوي غريبة هي أقرب مالها عجينة الباي تقريبا وهذا سرها …

عجينة السمبوسة الهندية :

كوبين طحين
نص أصبع زبدة جدا جدا جدا بارد مقطع مكعبات صغيرة
ملعقتين كبار زبادي
ملعقة كبيره مويه بااااااااردة
١/٢ ملعقة صغيرة ملح
ربع ملعقة صغيرة كركم (إختيري بس للون)

الطريقة :

أخلطي الطحين مع الملح و الكركم. حطي عليهم الزبدة الباردة و أبدي أفركي الزبدة بالطحين بأطراف أصابعك إلين يتحول الطحين لشي يشبه الرمل الرطب تقريبا (شوفي موضوع كوبلر الخوخ لو تبين صوره تقريبية). لا تخلين الزبدة تذوب جدا مهم ! لو لقيتي الزبدة بدت تذوب حطي العجينة في الثلاجه نص ساعة وكملي.

الحين أخلطي الزبادي عالعجينة وحركيه معهم بعدين أبدي حطي المويه البارده ملعقة صغيره كل مره إلين تتجمع العجينة على شكل كوره (يمكن ما تحتاجين كل المويه ويمكن تحتاجين شوي زيادة عن اللي كاتب). أعجني العجينة باليد دقيقة تقريبا بعدين غلفيها بنايلون وخليها ترتاح ربع ساعة تقريبا.

قسمي العجينة ل ٢٠ أو ٣٠ قطعه وأفرديها مع شوي طحين، حطي الحشوة وقفليها بعد ما ترطبين الأطراف بشوي مويه. غطي السمبوسة الجاهزة بفوطة رطبة شوي إلين وقت القلي و أقليها في زيت حار إلين تصير ذهبية.

————————————————————

الحشوات كثيره والله والخياارت بعد كثيره أي حشوة يمديك تستخدمين هنا. هذي حشوة الخضار أعتقد أكثر شي مستخدم.

حشوة الخضار الهندية :

حبة بطاطس كبيره مقشرة ومقطعه مكعبات متوسطة
ربع كوب سمن أو نص أصبع زبدة
كوب بصل مقطع مكعبات صغيرة
حبة فلفل أخضر حار مقطع صغار
فصين ثوم مقطعه صغار
ملعقتين صغار زنجبيل مقطع صغار
تقريبا ملعقة كبيره كاري (يمديك تستخدمين كاري مدراس اللي في المدونة أفضل من اللي تشرين جاهز)
١/٢ كوب بازلاء مجمده مغسوله إلين تذوب ومصفيه من المويه الزايدة
ملح وفلفل وعصير ليمون

……………………………………………..

حطي البطاطس في قدر وغطيها بمويه وشوي ملح بعدين خلي المويه توصل غليه جدا جدا هاديه. أطبخي البطاطس إلين تصير لينه بس ماسكة شكلها وشوي يبيلها زيادة طبخ (لا تخلينها تنهري بتخرب كل الطعم). صفي البطاطس من المويه وخليها عالجنب.

سخني السمن في قدر ثاني على حراره وسط وبعد ما يحتر حطي البصل مع رشة ملح إلين يذبل البصل بس بعدين حطي الثوم و الزنجبيل و الفلفل الحار و الكاري و أطبخيهم إلين تطلع ريحتهم بس ،تقريبا دقيقة. حطي البطاطس و أرفعي الحراره إلين تبدأ البطاطس تتحمر شوي في الزوايا بعدين حطي البازلاء وأطبخيهم إلين تستوي البازلاء. ذوقي وعدلي الملح و الفلفل و الكاري و الليمون حسب الرغبة. خليها تبرد و أحشي العجينة فيها.

—————————————————————————————————————————————–

دجاج كييف .. Chicken Kiev

أصبع زبدة دافي ولين (موب ذايب)
فص ثوم مفروم ناعم
ملح وفلفل أسود
بشر نص ليمونه
ملعقتين كبار أعشاب مشكلة طازجة حسب التوفر (بقدونس ، كراث ، نعناع ، طرخون ، شبت ، دوش ، ريحان )
صدرين دجاج
بيضه
شوي طحين
بقسماط أو بانكو أو أي شي ثاني تحبين تغطينه فيه

خذي صدور الدجاج وحطيها بين طبقتين نايلون وبعدين أضربيها بشكل خفيف بمقله ثقيلة إلين تصير مسطحة. تقريبا سمكها ٣-٤ ملليمتر.

في صحن ثاني أخلطي الزبدة اللينه مع الثوم و الملح و الفلفل و بشر الليمون و الأعشاب و أخلطيهم مع بعض زين إلين يتجانسون.

حطي في وسط كل صدر دجاج ملعقة كبيره أو إثنين من خليط الزبدة و الأعشاب بعدين لفيها على شكل روول كأنك تلفين سبرينج روول تقريبا. تأكدي إن الزبدة مغلفه من جميع المناطق !

غلفي كل رول بنايلون وخليه جدا ضيق وبعدين دخليه الثلاجه ساعة تقريبا عشان يجمد ويمسك شكله.

الحين طلعي الرولات من الثلاجه وشيلي النايلون بعدين رشيها بملح وفلفل. سويي اللي يسمونه حمام إنجليزي يعني تغطية قلي عادية : صحن فيه طحين وصحن فيه بيض وصحن فيه التغطيه الأخيره اللي هي بقسماط أو ما يقابله. غطسي الرولات في الطحين وشيلي الزايد بعدين في البيض وبعدين في البقسماط وحطيهم عالجنب. أفضل لو عندك وقت تجهزين الرولات لهذي النقطة وتخلينها في الثلاجه نص ساعة عالأقل عشان تلصق التغطية عليه بشكل جيد.

الحين في مقلة نبي نقلي الدجاج قلي ضحل Shallow frying. سخني كمية زيت كافيه إنها توصل لنص إرتفاع الدجاج تقريبا. بعد ما يحتر الزيت حطي الرولات وخليها تطبخ (عدلي الحراره بحيث ما تحترق من تحت !) بعد ما يتحمر الوجه الأول أقلبي الوجه الثاني وخليها إلين يتحمر الوجه الثاني بعدين قدميها وهي حاره.

—————————————————————————————————————————————–

نوودلز مقلية .. Fried Noodles

النوودلز الصينية عالم من الطبخ هي موب أكله وحده. نوعية النوودلز نفسها مثل هل هي نوودلز طحين ولا بيض ولا رز ولا نشا ثاني زي الفاصوليا أو غيرهم وشكل النوودلز وهل هي مقليه أو لأ وهل هي جافه أو طازه وطبعا هذا غير الصوصات اللي ما تخلص .. كل منطقة في شرق آسيا لهم صوصاتهم وإضافاتهم وعشان كذا كلمة نوودلز صينية ماتعني شي ! هي ممكن تكون ملايين الأشياء. هذي طريقة سهلة لنوودلز ستر فرايد بنكهة صينية وتقدرين تعدلين عليها حسب الموجود عندك وحسب ذوقك عشان تمشي مع أي شي تطبخينه.

نوودلز مقليه … Fried noodles

ملعقتين زيت
شوي ربيان أو دجاج أو لحم أو حتى حبار أو سمك أو فطر أي بروتين ينفع هنا
كوب ملفوف مقطع شرايح كبيره شوي
١/٢ كوب بصل مقطع أجنحه
١/٤ كوب جزر مقطع صغار
تقريبا ٣٠٠ جرام نوودلز بيض نحيفه مطبوخه
بصلتين خضر مقطع على زاويه
فص ثوم
٣ ملاعق كبيره صوص وستشير
ملعقة كبيره صلصة إندوفوود
فلفل أبيض وصوص صويا

النوودلز أستخدمي هنا نوودلز بيض egg noodles من النوع النحيف يعني اللي يجي تقريبا زي الإسباجيتي في الشكل و السماكه. أطبخي النوودلز زي ما هو مكتوب عالعبه بعضهم تحتاج بس نقع في مويه حاره وبعضها بيحتاج سلق خفيف أهم شي لاتطبخينها أكثر من اللازم.

الحين بعد ما تطبخين النوودلز تبدين بإنك ترشين اللحم اللي بتستخدمين بشوي ملح وفلفل أبيض بعدين تسخنين ملعقة زيت وتطبخينه فيه نص طبخه تقريبا بعد كذا شيلي اللحم المستخدم عالجنب.

الحين أطبخي الملفوف و البصل و الجزر في شوي زيت إلين يصيرون شوي لينين بعدين حطي عليهم النوودلز و البصل الأخضر و الثوم وملعقة الزيت الثانيه و أطبخيهم مع بعض شوي. الحين حطي صوص الوستشير و الإندوفوود و اللحم اللي طبخنا في الخطوه الأولى و أطبخيهم مع بعض شوي إلين تتغطى النوودلز بالصوص . ذوقي النوودلز وزيدي صوص صويا وفلفل أبيض حسب الرغبه.

—————————————————————————————————————————————–

فيلي تشيز ستيك ساندوتش .. Philly cheese steak sandwich

أكييييد ممكن وهي جدا جدا سهلة بس الناس صعبوها للأسف … أهم شي في الساندوتش هو المكونات الصح وطريقة الطبخ اللي بقول ….

فيلي تشيز ستيك ساندوتش … Philly Cheese Steak Sandwich

هذي الأكلة أكلة شوارع. هي تتسوى على صاج بالأصل وتستخدم بقايا فيلية البقر أو الفيليه منيون اللي تكون مقطعه صغار ومخلوطة مع فلفل بارد وفطر وبصل وطبعا أهم شي جبن البروفولون provolone cheese. الخبز هنا يكون خبز لين زي الصامولي ما يحتاج أبدا لا خبز فرنسي ولا كروسان ولا كل هذا التعقيد زي ما يسوي ناس كثير… الغريب في هذا الساندوتش كل ما حاول الواحد يصلح فيه يخربه …..

حبة بصل مقطع أجنحة جدا جدا نحيفة
حبة فلفل أخضر أو أحمر أو خليط منهم بعد مقطع شرايح جدا جدا نحيفة
تقريبا كوب فطر مقطع شرايح نحيفة
كم شريحة جبن بروفولوني provolone (أشوفة أساسي بس لو مررررره ما لقيتيه حطي موزاريلا مقطع شرايح نحيفة موب مبشور)
تقريبا ١٥٠ جرام ستيك فيليه fillet لا تمشين عالشكل ! الفيليه إسم لقطعه محدده قولي للجزار أبي فيليه وهو بيعرف وش تقصدين. الستيك نبيه هنا ستيك كامل ما نبيه مقطع …
ملح وفلفل
خبزتين صامولي أو أي خبز يشبهه بس يكون لين ما نبي خبز له قشر سميك زي الباجيت مثلا…

سخني مقله أو صاج على حراره عالية. رشي الستيك بملح وفلفل أسود خشن من الجهتين. بعد ما تحتر المقله أو الصاج بشكل جيد حطي شوي زيت بعدين حطي الستيك وأطبخيه إلين يتحمر الوجه الأول بعدين أقلبيه وحمري الوجه الثاني (مهم جدا لون التحمير يكون غامق هنا) . الحين شيلي الستيك من النار وخليه عالجنب يرتاح شوي. حطي الفطر وأطبخيه مع رشة ملح وفلفل إلين يتشوح، شيلي الفطر في صحن وبعدين طفي النار. قطعي الستيك شرايح نحيفة بعدين قطعي الشرايح شرايح أنحف و أنحف و أنحف إلين تقريبا تفرمين اللحم يعني يصير قطع صغيييره (اللحم بيكون دم من داخل بس عادي بينطبخ زيادة في الخطوة اللي بعدها). الحين أرجعي شغلي النار وبعد ما تحتر المقله حطي البصل و الفلفل مع رشة ملح وفلفل وقلبيهم إلين يذبلون ويصيرون شوي لينين. الحين حطي الستيك المقطع و الفطر وقلبي كل شي مع بعض وأطبخيهم رلين يوصل الستيك لدرجة الإستواء اللي تعجبك (أنصحك خليه ميديم رير). ذوقي الخليط وتأكدي من الملح ولفلفل.

الحين رصي كذا شريحة جبن في كل ساندوتش (حطي كثير موب طبقة وحده بس) وبعدين حطي الحشوة الحاره فوقها بحيث تذوب الجبن شوي وبس هذا الفيلي تشيز ستيك ….

—————————————————————————————————————————————–

الدال .. Daal

فيه ملايين الطرق لطبخ العدس … إن شاء الله إذا وصلت لموضوع البقوليات بأعطي أمثلة أوضح و أكثر …

هذي طريقة الدال الهندي أو بعد مره ثانيه هي وحده من طرق الدال الهندي :

بانتشماييل دال (معناها دال ال ٥ أنواع لأن في الأصل يستخدم ٥ أنواع عدس بس أستخدمي أي تشكيلة متوفرة)

نص كوب + ملعقتين كبار عدس مشكل (أحمر ، أصفر ، أخضر أو أي أي تشكيله موجوده ، لو تبين سويه بنوع واحد أو نوعين بعد ما يفرق القوام ماراح يكون مختلف بس زي إذا كان أكثر من نوع).

١/٢ ملعقة صغيرة كركم

سمن أو زيت

بصلة مقطعه صغار

حبة فلفل أحمر مجفف

١/٢ ملعقة صغيرة كمون حب

حبتين قرنفل

فصين ثوم مقطعه صغار

١/٢ ملعقة صغيرة بودرة فلفل حار

ملعقة صغيرة جارام ماسالا (شوفي الطريقة في المدونة ، لا تستخدمين اللي مطحون جاهز)

حبة طماط مقطعه

تقريبا ملعقة كبيره كزبرة مفرومة

ملح وفلفل وليمون حسب الرغبة

……………………………………………..

أفردي العدس في صحن وتأكدي إن مافيه أي حصى أو أغصان شجر بعدين حطيه في صفايه وأغسليه زين.

حطي العدس في صحن وغطيه بمويه بارده وخليه ينقع فيها ٢٠ دقيقة تقريبا …

صفي العدس من موية النقع بعدين حطيه في قدر مع كوبين ونص تقريبا مويه ونص كمية الكركم. شغلي النار عليه وخليه يطبخ على غليه جدا خفيفه إلين تقريبا يستوي بعدين حطي عليه تقريبا ملعقة صغيرة ملح وخليه يكمل طبخ إلين يصير العدس جدا جدا لين تقريبا ٢٠ – ٢٥ دقيقة. متى ما لقيتي المويه حقت السلق قلت كثير زيدي المويه شوي.

والعدس يطبخ أطبخي باقي الأشياء. في قدر صغير سخني السمن وبعد ما يحتر أطبخي البصل فيه مع رشة ملح إلين يذبل ويبدأ يقلب ذهبي ، حطي الثوم و الفلفل المجفف و الكمون و القرنفل و الفلفل المطحون و الجارام ماسالا وباقي الكركم وقلبيهم إلين تطلع ريحتهم لا أكثر. الحين حطي الطماط وأطبخيه إلين تصير لينه.

حطي خليط الطماط على العدس بعد ما يستوي وخليهم يوصلون غليه ، عدلي القوام بإنك تزيدين مويه حسب الرغبة. الحين ذوقي الدال وعدلي الملح و الفلفل و الليمون و البهارات حسب الرغبة بعدين حطي الكزبرة …

—————————————————————————————————————————————–

سويت آند ساور تشيكن .. Sweet and sour chicken

راح أكون صريح معك وأتمنى ما تفهميني غلط بس الوصفة موب كل شي !! تطبيق الوصفة أحيانا هو السر وهو الفرق بين طبق وطبق. رشة ملح أو سكر أو حامض ممكن تغير طبق بشكل جدا كبير ، إهتمامك للتفاصيل زي قلي الدجاج ووقت طبخ الصوص وطبخ كل شي على حرارة عالية بحيث تعطينها الشي اللي يسمونها ووكيه اللي هو لمسة الووك أو النار وغيرها كثير بيسوي كل الفرق أحيانا …

هذي هي الوصفة اللي دايما أستخدم وشخصيا تعجبني جربي وشوفي :

سويت آند ساور تشيكن .. Sweet and Sour chicken

الدجاج :
صدرين دجاج مقطعه مكعبات (أو لو تبين أطعم بعد أستخدمي لحم فخذ دجاج)
فصين ثوم مقطعه صغااار
ملعقتين صغار صويا صوص (الصينية الخفيفه)
ملعقتين صغار نشا ذرة
ملعقة صغيره سكر
رشة ملح
رشة فلفل أبيض

صوص السويت آند ساور :
نص كوب مرق دجاج (أو مويه)
ملعقة كبيره صلصلة محار (أو صويا غامقة)
ملعقة كبيره زيت سمسم
ملعقتين كبار خل
٣ ملاعق كبيرة كتشب
ملعقة كبيره ونص سكر
ملعقة كبيره صويا صوص
ملعقتين ونص صغار نشا ذرة
رشة ملح

للخضروات :
نص بصله مقطعه مكعبات كبيره
نص حبة فلفل رومي أخضر مقطعه نفس حجم البصل
نص حبة فلفل رومي أحمر مقطعه نفس حجم البصل
كوب أناناس مقطعه نفس البصل
ملعقتين كبار زنجبيل مقطع صغار
ملعقتين كبار ثوم مقطع صغار
حبتين بصل أخضر مقطعه على زاوية

الطريقة :

للدجاج :
أخلطي كل مقادير التتبيلة مع بعض وأخلطي الدجاج عليهم وخليه عالجنب.

لصوص السويت آند ساور :
أخلطي كل المقادير إلين تتجانس وخليها عالجنب …

للستر فري :

مهم جدددا كل شي يكون مقطع جاهز قبل تبدين .. كل شي بيتم هنا في أقل من كم دقيقه فخلي كل شي جاهز وكل شي جنبك وأنتي تشتغلين. أستخدمي المقلة الصينية wok على حرارة جدا عالية وأكبر عين غاز عندك …

سخني المقليه على حرارة جدا جدا عالية. بعد ما تحتر حطي فيها شوي زيت وبعدين حطي الدجاج فيها وأطبخيه إلين ينطبخ تقريبا. شيلي الدجاج على صحن. الحين زيدي زيت لو لقيتي المقله ناشفه بعدين حطي البصل و الفلافل الملونه و الأناناس و أطبخيهم إلين يلينون شوي . الحين حطي الزنجبيل و الثوم وأطبخيهم إلين تطلع ريحتهم لا أكثر. رجعي الدجاج للمقلة وقلبيه مع الخليط بعدين صبي عليه صوص السويت آند ساور وخليه يطبخ إلين يثقل الصوص ويغطي كل شي. ذوقي الصوص وعدلي الملح والفلفل ويمكن السكر لو أحتاج بعدين طفي النار وحطي البصل الأخضر .

 

—————————————————————————————————————————————–

 

مخلل الزنجبيل الياباني .. Pickled Ginger (Gari)

خذي كيلو زنجبيل وقشريه بعدين قطعيه شرايح نحيييييييفه مره حطيهم في صحن ورشي عليهم ملعقتين كبار ملح وقلبيه معهم . غطي الصحن وخليه ساعة تقريبا يتملح بعدين جففي الزنجبيل بمنديل ثقيل وحطيهم في برطمان نظيف .
أغلي ٣ أكواب خل رز ( لازم خل رز ) مع كوبين سكر بعديم أول ما يغلي صبيه عالزنجبيل اللي في المرطبان. خليه يبرد بعدين غطي المرطبان وحطيه في الثلاجه بيعيش يمكن شهر أو أكثر …

 

—————————————————————————————————————————————–

مخلل الهالابينو .. Pickled Jalapeno

ممكن تسوينه زي المخلل حق الخيار ليش لأ. هذي الطريقة أفضلها ، هي طريقة مكسيكية أصليه موب زي أي شي تشترينه من علبه !!

مخلل الهالابينو .. Pickled Jalapeno

٣ ملاعق كبيره زيت
٥ فصوص ثوم كامله (مقشرة طبعا)
حبه جزر مقشره
تقريبا ١٢ حبة فلفل هالابينو
نص بصله مقطعه أجنحة جدا نحيفة
١/٢ كوب خل تفاح
ورقتين غار
ملعقة صغيرة أعشاب مجففه مشكله (زعتر thyme , دوش ، أوريجانو)
٤ حبات فلفل أسود مكسره كبار
تقريبا نص ملعقة صغيرة ملح

……………………………………………….

سخني الزيت على حراره وسط … بعد ما يحتر الزيت حطي فصوص الثوم الكامله وأطبخيها إلين تبدأ تقلب ذهبيه في مناطق بعدين شيليها في صحن. حطي الجزرة و الفلافل و البصل وأطبخيهم إلين البصل يصير شفاف.

حطي نص كوب مويه تقريبا وحطي الخل وورق الغار و الأعشاب المجففه و الفلفل و الملح . خلي الخليط يغلي على غليه جددددا خفيفه إلين يصير الجزر شوي لين و يقلب الهالابينو أخضر فاتح (تقريبا زي لون الزيتون الأخضر) بياخذ ٨-١٠ دقايق تقريبا. وزعي الخليط على مرطبان ، خليه يبرد شوي بعدين غطيه وحطيه في الثلاجه إلين ثاني يوم عالأقل قبل الأكل. ممكن تحفظين المخلل هذا تقريبا ٣ أسابيع في الثلاجه بدون مشاكل.

—————————————————————————————————————————————–

سلطة البازلاء مع الفجل و الفيتا .. Peas and Radish Salad

مكون جدا مظلوم برأيي ، جربي هذي السلطة بتحبب أي واحد بالفجل …. التتبيلة هنا لحالها رهيبة مع أي سلطة ثانية ….

سلطة البازلاء والفجل وجبن الفيتا :

للدريسنج :

ملعقتين صغار كمون حب
ملعقتين كبار عصير لايم
ملعقتين صغار عسل (أو سكر لو ماعندك)
٥ ملاعق كبيرة زيت زيتون ممتاز !!
٣ ملاعق كبيره شبت مفروم

للسلطة :

٤ أكواب بازلاء مجمدة (طبعا لو كنا في الربيع أستخدمي بازلاء طازه بس هذا الوقت من السنة مستحيل تلاقين بازلاء زي الناس و المفرزه طعمها أفضل بكثير من الطازه في هذي الحالة. لا تستخدمين معلبه !!!)
ربطة فجل مقطعه شرايح نحيييييييفة
كوب جبن فيتا
تقريبا كوبين رجله (لو عندك موب ضرورية هنا)

الطريقة :

للدريسنج :

حطي الكمون في مقله صغيره وحمصيه على حراره وسط إلين تطلع ريحته شوي (تقريبا دقيقة إلى دقيقتين). طفي النار وخليه يبرد بعدين أطحنيه في طاحونه بهارات أو هاوند.

حطي الليمون و العسل و الكمون و الزيت والشبت ورشة ملح وفلفل في مرطبان وقفليه زين بعدين رجيه إلين تلاقين الخليط صار متجانس وثقيل شوي (يعني الزيت بيدخل في اللليمون ماراح يكون مفصول) ذوقي الخليط وعدلي الملح والفلفل حسب الرغبة.

للسلطة :

أسلقي البازلاء في مويه مغليه مملحة إلين تصير لينه (بس موب مهرية ، بتاخذ تقريبا ٢-٥ دقايق). طلعيها علطول من المويه وحطيها في حمام ثلجي (مويه + ثلج). بتلاحظين البازلاء صار لونها أخضر فاقع علطول. هذي الخطوة مهمة عشان اللون وعشان توقف الطبخ وما تصير البازلاء مهرية وبنية في السلطة.

صفي البازلاء من المويه زين بعدين حطيها في صحن خلط مع الفجل و الرجلة، كسري جبن الفيتا عليهم بعدين صبي الدريسنج عليهم وقلبيهم مع بعض. ذوقي وعدلي كمية الدريسنج والملح حسب الرغبة.

—————————————————————————————————————————————–

خبز الثوم .. Garlic Bread

خبز الثوم سهل ، تاخذين أصبع زبده دافي وتخلطين عليه ٣ فصوص ثوم مهروسه و شوي بقدونس أو ريحان أو أي أعشاب ثانيه أو خلطه أعشاب تحبين وبعدين تخلطينهم مع الزبده زين إلين يتداخلون معها. الحين تجيبين قطع خبز حقيقي موب توست يعني خبز فرنسي أو رغيف إيطالي أو أي شي زي كذا وبعدين تدهنين الخبز من جهة بهذي الزبده. شغلي الفرن على حراره ٤٢٥ وحطي الخبز في الفرن إلين يتحمر.

طبعا فيه طرق ثانيه كثير تسوين خبز فيه نكهة ثوم بس هذي اللي أغلب المطاعم يسوون وعشان كذا هي اللي عطيتك بس تقدرين تسوينه بطرق ثانيه زي إنك تقمرين الخبز أول في شوايه أو شوايه فرن وبعدين تدهنين فص ثوم ني عليه وهو حار وترشينه بشوي زيت زيتون و بقدونس.

————————————————————————————————————————————————————————–

السبرينج روولز .. Spring Rolls

الحشوة جدا سهلة ، هي خضار ستر فراي بس .. يمديك تسوين أي حشوة للسبرينج رولز مافيه شي أساسي .

سخني شوي زيت علي حرارة أعلى من وسط بشوي بعدين أطبخي فيها شوي ثوم وزنجبيل بعد ما تطلع ريحتهم حطي عليهم بصل أخضر مقطع شرايح وفطر ( يفضل فطر شيتاكي ) و أطبخيهم شوي بعدين حطي عليهم جزر مقطع شرايح نحييييفه و أطبخيه ثواني وبعدين حطي كرنب مقطع شرايح و أطبخيه معهم إلين يذبل شوي بس يكون لسا محافظ على قرمشته. الحين حطي شوي صويا و شوي صوص سمك و عصره لايم و شوي سكر و أطبخيهم إلين يشربون الصوص بعدين ذوقي وزيدي صويا وصوص سمك إلين توصلين للطعم اللي يعجبك. طفي النار وحطي شوي كزبره مفرومه و سمسم محمص و خليه يبرد بعدين أستخدميه كحشوة للسبرينج روول أو أي شي ثاني. كثير مطاعم يحطون براعم فاصوليا ، ذيك اللي تجي تقرمش لك الخيار هنا تقدرين تحطينها أو لأ.

—————————————————————————————————————————————–

ربيان بصوص الكريمة .. Shrimp with Cream Sauce

في مقلة كبيره و على حرارة وسط تذوبين ٤ ملاعق كبيره زبده بعدين تحطين عليها نص بصلة صغيره مقطعه صغار وفصين ثوم مقطعه شرايح و تطبخينهم شوي شوي إلين يقلب البصل شفاف. بعد كذا ترفعين الحراره شوي و تحطين عليهم الربيان المقشر ورشه ملح وفلفل وشوي ورق زعتر أخضر thme لو عندك وشوي فلفل أحمر مجروش وتخلينه إلين يقلب الوجه برتقالي بعدين تقلبينه وتطبخين الوجه الثاني. الحين لو عندك حطي شوي واين أبيض تقربيا ربع كوب بس (موجود في الدانوب إسمه فينولا) وحركي المقله زييين و أمسحي القطع البنية اللي في قاع القدر بعد ما يتبخر الواين حطي شوي كريمة حسب الرغبه وأطبخي إلين توصل غليه بس بعدين ذوقي الصوص وعدلي الملح والفلفل ، آخر شي طفي النار ورشي شوي بقدونس عالوجه.

تقدرين تقدمينه مع ماشد بوتيتو أو حتى يمديك تخلطين معه باستا لو تبين أو ممكن خضار بالبخار أو سلطة عالجنب كلهم ينفعون معه.

————————————————————————————————————————————————————————–

فاهيتا الربيان بالأفوكادو .. Shrimp and Avocado Fajita

الأفوكادو سويي جواكمولي (تلاقين الطريقة في موضوع الفهيتا)

الربيان رشيه بملح وفلفل أحمر وبابريكا وأوريجانو وشوي كمون بعدين سخني مقله كبيره على حراره أعلى من وسط بشوي وبعد ما تحتر حطي شوي زيت وشوحي الربيان إلين يقلب برتقالي ويستوي من داخل يعني إلين يروح اللون الشفاف من النص. بعد كذا أعصري عليه ليمونه خضراء ورشي عليه شوي كزبره وشيليه في صحن عالجنب. الحين في نفس المقله أطبخي شوي بصل وفلفل ملون لو تحبين إلين يذبل شوي ويتكرمل عالأطراف.

الصلصة تشوين ٣ حبات طماط وقرنين فلفل أخضر في الفرن على أحر حراره إلين ينحرق قشر الفلفل و الطماط بعدين تحطينهم في خلاط مع فص ثوم وشوي خل تفاح وشوي كزبره وتخلطينهم بس شوي (نبي الصلصة ثقيله ما نبيها سايله).

الحين سخني خبز تورتيا شوي بعدين أدهنيه بالجواكمولي بعدين الربيان بعدين الصلصه بعدين البصل و الفلفل لو كنتي مستخدمه و آخر شي شوي ساور كريم.

————————————————————————————————————————————————————————–

رز الزعفران .. Saffron Rice

الرز عموما جدا سهل تسوينه زي ما تسوين أي طبق رز ثاني بطريقة البيلاف زي الكبسة أو غيره.

رز الزعفران … Saffron rice

حبة بصل مقطعه صغار
شوي زيت
شوي كزبرة حب ، ورقة غار ، رشة بسيييطة زعفران
كوبين رز بسمتي مغسول بعدين منقوع نص ساعة تقريبا وبعدين مصفى تماما من المويه الزايده
ملعقتين صغار ملح
٣ أكواب وشوي مرق دجاج (حسب عمر الرز ونوعيته وغيره)

…………………………

أطبخي البصل في الزيت إلين يذبل ، حطي البهارات ماعدا الزعفران وقلبيه معهم شوي بعدين حطي الزعفران والرز. قلبي الرز في الدهن زيين بعدين حطي عليه المرق والملح وخليه يوصل غليه. بعد ما يوصل غليه نزلي الحراره لأقل شي وغطي القدر زيييييين. خلي الرز يطبخ تقريبا ١٧ دقيقة (أو حسب نوعية الرز اللي عندك بس معي ١٧ دقيقه ممتاز) بعدين طفي النار ولا تفتحين القدر !! خلي القدر يرتاح زيادة عشر دقايق قبل تفتحين القدر وتاكلينه.

الزينة اللي فوق : أقلي شوي مكسرات ، أقلي شوي بصل مقطع شرايح جدا نحيفة ، أقلي شوي زبيب أو زركش وأخلطيهم مع بعض وبعدين حطيهم فوق الرز.

—————————————————————————————————————————————–

شوربة الجازباتشو الباردة .. Cold Gazpacho

كيلو وربع طماط طازج ومستوي تماما ومن أحسن أحسن أحسن نوعية (هو كل شي هنا). الطماط مشيول الجذر حقه ومقطع أرباع.
فصين ثوم
خيارتين مقطعه كبار
تقريبا ٣ ملاعق كبيره بصل
ملعقة صغيرة سكر
رشة تاباسكو
تقريبا ٣ ملاعق كبيرة خل شيري (يفضل وبشدددددددده خل شيري بس لو مافيه حطي نص بلسمك ونص خل عنب أحمر)
١/٢ كوب زيت زيتون
قطعة خبز فرنسي (تقريبا طولها ٢ إنش) بدون القشرة اللي عليها (شيليها بسكين)
١/٢ ملعقة صغيرة كمون

للزينة :
فلفل أحمر و أخضر و أصفر مقطع برونواز (شوفي موضوع مهارات التقطيع الأساسية)

أخلطي مقادير الجازباتشو كلها ماعدا الكمون في صحن وغطيه وخليه في الثلاجه طول الليل (خطوة إختيارية بس تعطي نتيجة أحسن)
في خلاط أخلطي مقادير الجازباتشو ثاني يوم (ماعدا الكمون) بعدين صفيها في صحن ثاني. خلي الجازباتشو تبرد في الثلاجه إلين تصير جدا جدا جدا باردة. ذوقي الجازباتشو وعدلي الملح و الخل وحطي كمون حسب الرغبة … قدميها في صحون مبردة وحطي في كل صحن شوي من برونواز الفلفل …

————————————————————————————————————————————————————————–

ساندوتش الربيان بطريقة نيو إنجلاند (شريمب روولز) .. New England Shrimp Rolls

ساندوتش جدا جدا سهل ، هو بالأصل يستخدم فيه اللوبستر بس ممكن يتسوى بأي نوع أكل بحري ثاني. الساندوتش جدا جدا سهل أخلطي أي أكل بحري مع مايونيز + أي شي ثاني تحبين في خبز لين وبس … بس طبعا ساندوتش عن ساندوتش يفرق وهنا يجي دور التفاصيل اللي بتسوي كل كل الفرق.

للأسف ماعندي مقادير ثابته هنا أعتمد عالذوق والتعديل وأنتي سويي نفس الشي حسب ذوقك.

نبدأ أول شي بطبخ الربيان : أنا أحب أطبخ الربيان كامل بقشره وراسه بالبخار هذا ما يضيع أي نكهة في المويه زي السلق وطبعا الطبخ بالقشر دايما يعطي نتيجة ألذ. حطي شوي مويه في قدر وخليها تغلي بعدين حطي فوقها شبك أو صفاية حتى وبعدين حطي الربيان وغطي القدر ، خلي الربيان يطبخ إلين يقلب الوجه الأول برتقالي بعدين أقلبيه وخليه يكمل طبخ إلين يستوي من داخل (خذي أكبر حبه ، أقطعي الربيان وشوفي اللون من داخل المفروض يختفي اللون الشفاف ويصير الربيان أبيض جامد من داخل) طبخ الربيان ماراح ياخذ أكثر من ٣-٤ دقايق حتى بالربيان الكبير ! …

لو ما تبين تطبخين الربيان بالبخار يمديك تسلقينه بكل سهولة ، جيبي مويه مملحه وخليها توصل غليه جدا هاديه بعدين حطي الربيان وخليه يطبخ إلين يستوي .

شيلي الربيان بعد الطبخ وحطيه في حمام ثلجي (مويه مع ثلج) وخليه إلين يبرد شوي. قشري الربيان بعدين قطعيه قطع صغيره.

الحين خذي لحم الربيان في صحن خلط وزيدي عليه رشة ملح وفلفل أبيض وكرفس مقطع صغار وأي أعشاب تحبين (أنا أحب هنا الكراث والبقدونس كافيه) بعدين حطي مايونيز بالكمية اللي تعجبك. زيدي عصير ليمون حسب الرغبة بعدين ذوقي وعدلي الطعم حسب ذوقك. حطي الخليط في الثلاجه.

الحين للخبز يمديك تستخدمين أي خبز طبعا بس المتعارف عليه في هذا الساندوتش هو إننا نستخدم خبز هوت دوج وهذا اللي أستخدمت في الصوره.

خذي خبز الهوت دوج وبسكين حاد أقطعي شوي من الجهة اليمين و اليسار من الخبز (بحيث نخلي الخبز شوي مربع). بهذي الطريقة يصير عندنا وجهين ناعمين يتقمرون مع زبدة بشكل حلو عكس لو كان الخبز أسطواني.

الحين في مقلة صغيرة على حرارة هاديه ذوبي شوي زبدة وبعدين حطي الخبز عالوجه الأول وخليه يطبخ في الزبدة إلين يتحمر الوجه الأول شوي بعدين أقلبيه وحمري الوجه الثاني في الزبدة.

شيلي الخبز من النار وسويي قطع في السكن من فوق بطول الخبز (بحيث نحشي الخبز من فوق زي ما سويت في الصوره). حطي ورقة خس صغيره داخل كل خبزه وبعدين حطي الحشوة حقت الربيان ويمديك تزينينها بشوي كراث مقطع.

 

————————————————————————————————————————————————————————–

الكيسو فونديدو Queso fundido

من أسهل أسهل الأكلات وألذها. الكيسو فونديدو أكله تقليديه من شمال المكسيك تنوكل في الغالب كتاكو مع خبز تورتيا طحين وطبعا يمديك تقدمينها كطبق مقبلات …

ملعقتين كبار زيت
نص بصلة صغيرة مقطعة أجنحة نحيفة
حبة فلفل أحمر حار من النوع الكبير موب النحيف الحار مره
تقريبا ١٢٠ جرام سجق أو مقانق (تلاقينها في أي ملحمة وأي سوبرماركت عند اللحام).
تقريبا ٢٢٠ جرام جبن مقطع مكعبات حجمها ١ سم تقريبا (موزاريلا ، تشيدر mild ، لايسستر أو مونتري جاك. أنا أحب أستخدم ربع موزاريلا و الباقي تشيدر أو مونتري جاك أو لايسستر)

سخني الفرن على ٣٧٥ وحطي الصحن اللي بتقدمين الطبق فيه في الرف السفلي من الفرن عشان يحتر مع الفرن . أي صحن يستحمل حرارة ممكن يستخدم هنا.

أشوي الفلفل الأحمر بعدين قشريه وبعدين شيلي البذور اللي داخل وقطعية شرايح نحيفة (شوفي موضوع التشيلي ريينوس في المدونة شرحت موضوع شوي الفلفل وتقشيرة)

طلعي اللحم حق السجق من الغلاف حقه. بسكين صغير شقي الغلاف وطلعي اللحم منه.

الحين في مقله صغيره سخني نص الزيت وبعد ما يحتر شوي أطبخي البصل إلين يذبل ويبدأ يتلون من الأطراف ، حطي شرايح الفلفل المشوي ورشة ملح وخليهم يطبخون شوي بعدين شيلي الخليط على صحن.

سخني باقي الزيت على حرارة وسط وأطبخي اللحم حق السجق إلين يتلون تماما ويبدأ يتحمر بعدين حطي عليه خليط الفلفل و البصل اللي سوينا أول وحركيه معهم. ذوقي الخليط وعدلي الملح والفلفل حسب الرغبة. خلي الخليط عالجنب.

الحين طلعي الصحن حق التقديم من الفرن وحطي الجبن فيه ويفضل يكون الجبن مرصوص في طبقة وحده. رجعي الطبق للفرن إلين تقريبا يذوب الجبن تماما بعدين حطي الحشوة فوق الجبن ورجعيه الفرن إلين يكمل الجبن ذوبان …

بس هذا الكيسو فوندودو …..

————————————————————————————————————————————————————————–

كاري الميلاجو (كاري الفلفل الأسود من جنوب الهند) … Milagu Chicken curry

لمعجون الكاري :

ملعقة كبيره زيت
١٠٠ جرام لحم جوز هند طازج مبشور (أو نارجيل عادي)
عودين قرنفل
حبتين هيل
٣ حبات فلفل أسود
قطعة قرفة طولها ١ سم
١/٢ ملعقة صغيره بودرة فلفل حار
١/٢ ملعقة صغيرة كركم
ملعقة صغيرة كزبرة مفرومة

لكاري الميلاجو :

٣ ملاعق كبيره زيت
نص ملعقة صغيرة بذور خردل أسود
١٠ ورقات كاري (شوفي موضوع كاري مدراس إذا ما تعرفين وشي)
قطعة زنجبيل طولها تقريبا ١ إنش مقشرة ومقطعه صغار
٣ فصوص ثوم مقطعه صغار
٣ قرون فلفل أخضر مقطعه صغار
بصلتين مقطعه صغار
طماطتين مقطعه صغار
٥٠٠ جرام صدور دجاج (أو خليط صدور وفخوذ أطعم بعد) مقطعه مكعبات صغيره (قد اللقمة)
ملح وفلفل أسود مطحون خشن

للمعجون :

سخني الزيت في مقله صغيره على حراره وسط بعدين حطي جوز الهند مع البهارات العدلة وحمصيه مع التحريك المستمر إلين يقلب تقريبا بني. حطي البهارات المطحونه وقلبيها معه دقيقه بعدين طفي النار وخلي الخليط يبرد شوي بعدين أنقليه لخلاط ، زيدي عليه تقريبا ٣/٤ كوب مويه وأخلطيه إلين يعطيك معجون ثقيل.

للكاري :

سخني الزيت في قدر على حرارة وسط وحطي بذور الخردل. بعد فترة بتبدأ البذور تتفجر (بذور الخردل ما تطلع نكهتها إلا بالحرارة للمعلومية)، أول ما تنفجر البذور حطي ورق الكاري و الزنجبيل و الثوم و الفلفل الأخضر وأطبخيهم تقريبا دقيقتين بعدين حطي البصل وخليه يطبخ مع التحريك إلين يبدأ يقلب ذهبي من الأطراف.

حطي الطماط وأطبخيه دقيقه بعدين حطي معجون الكاري اللي سوينا في الخطوة الأولى مع رشة ملح. حطي الدجاج عالقدر مع كوب مويه وقلبي كل شي مع بعض. غطي القدر ونزلي الحرارة لأقل شي وأطبخي الكاري إلين يستوي الدجاج بس أنتبهي تطبخينه أكثر من اللازم (بس إلين يختفي اللون الوردي من داخل أكبر قطعة دجاج).

ذوقي الكاري وعدلي الملح والفلفل وبعدين حطي رشة فلفل أسود كبيرة في الأخير.

————————————————————————————————————————————————————————–

البولينتا جدا سهلة هي تنطبخ تقريبا زي أي نوع من أنواع الحبوب زي الرز أو غيره الشي الوحيد اللي بيختلف هو إنها ممكن تكون كتل لو ما أنضافت للسائل بالطريقة الصح. فيه آلاف إذا ماكان ملايين الخيارات بالنسبة للنكهة من تغيير السائل اللي تنطبخ فيه (حليب ، مويه ، مرق ، صوص أو خليط من هذول) لإضافة منكهات من بهارات أو أعشاب أو أجبان أو زيوت أو غيرها. الخيارات ما تخلص والنيه إن شاء الله موجوده إني أغطي طبخ البولينتا بشكل أوضح وأفضل من هنا.

البولينتا نوع من النشويات زيه زي الرز أو الخبز أو الباستا قدميه مع أيييي طبق فيه صوص زي اليخنات أو الراجو زي الأوسو بوكو مثلا أو الطواجن أو غيرها. يمديك حتى تسوين البولينتا بسائل أقل بحيث إذا جمدت تجمد تماما ويمديك بعدين تقلينها زي البطاطس مثلا … عشان كذا الخيارات جدا كثيرة …

هذي طريقة بولينتا أساسية تقدرين تعدلين عليها بسهولة ولو إنها ما تحتاج أي تعديل خصوصا لو بتستخدمينها كطبق جانبي مع شي بطعم قوي.

البولينتا .. Polenta :

كوب ذرة مطحونة corn meal أو بولينتا polenta أو جريتس grits (الثلاثة هم نفس الشي تقريبا ، الإيطاليين يسمونها بولينتا ، الأمريكان يسمون الذرة البيضاء جريتس و أي ذرة مطحونه يسمونها كورن ميل بس الثلاثة بالضبط بالضبط نفس الشي في الطبخ).
٦ أكواب مرق دجاج (أو أي سائل ثاني مثل أي مرق ثاني أو حليب أو مويه أو حتى خليط من اللي ذكرت)
ملح وفلفل
جبن بارمزان وزيت زيتون

في قدر سخني المرق إلين يوصل غليه خفيفه وبعدين وأنتي تحركين المرق بملعقة خشبيه أبدي ضيفي البولينتا شوي شوي مع التحريك طول الوقت (لو تجمع على بعض ممكن يتكتل وعشان كذا مهم التحريك هنا). خلي البولينتا يطبخ على غلية خفيفة من ٢٥-٤٠ دقيقة تقريبا أو إلين تقريبا يستوي مع التحريك أغلب الوقت. الفترة اللي بيحتاج بتعتمد على حجم الطحن كل ما كبر كل ما أخذ وقت أطول في الطبخ ذوقيه وبتعرفين.

الحين حطي الملح (لو حطيتيه في البداية بيأخر إمتصاص الذرة للمويه ويطول الطبخ) وخليه يكمل طبخ . عدلي القوام حسب الرغبة، لو تبينه سايل أكثر زيدي سائل ولو تبينه أثقل شوي خليه يطبخ زود إلين يوصل للقوام اللي تبين (طبعا حطي في بالك إنه بيثقل شوي وهو يبرد). الحين حطي رشة فلفل أسود وشوي بارمزان ورشة زيت زيتون وقلبيه معهم وبس هذا البولينتا ….

————————————————————————————————————————————————————————–

الفيش أند تشيبس جدا سهل بس الصدق قلي البطاطس بعد موب شي سهل لأنه يحتاج قليتين على حرارتين مختلفه عشان يطلع مضبوط. إذا تبين تشيبس مع السمك هنا تقدرين تقلين من البطاطس المفرز الجاهز.

جربي هذي الوصفة :

فيش آند تشيبس .. Fish and Chips

سمك فيليه للقلي …
شوي طحين
ملح وفلفل أسود

للتغطية :
كوب طحين
كوب بيره (بدون نكهة)
١/٤ ملعقة صغيرة ملح
بياض بيضتين

* أستخدمي سمك فيليه طازج ومن أحسن نوعية تقدرين. مافيه شي يحسن سمك سيء.

* سمك الفيليه لازم ما يتعدى ١ سم ، أكثر من كذا بيخلي القلي جدا صعب.

سخني الزيت على حرارة أعلى من وسط بشوي (لو عندك ميزان حرارة سخني الزيت إلين يصير ٣٥٠ تقريبا)

والزيت يحتر أبدي جهزي التغطية. أخلطي الطحين مع الملح و البيره وحركيهم مع بعض شوي شوي إلين ينخلطون بس لاتخلطين أكثر من اللازم.

في صحن ستانلس أخفقي بياض البيض كأنك تسوين مرانج (فيه موضوع طويل عريض في المدونة عن المرانج) إلين يوصل مرحلة الرؤوس المتوسطة. الحين حطي المرانج على التغطية وقلبيها معهم شوي شوي.

جففي السمك بمنديل بعدين أخلطي الطحين مع شوي ملح وفلفل. غطسي السمك بالطحين وشيلي الطحين الزايد بعدين غطسي السمك في التغطية اللي سوينا قبل شوي وبعدين عالزيت. أقلي السمك إلين تصير التغطية ذهبية ومقرمشة.

طلعي السمك من الزيت وجففيه بمنديل بعدين حطيه في فرن مسخن قبل على ٣٠٠ تقريبا إلين تخلصين قلي باقي السمك (عشان ما يقعد مقرمش).

وبس هذا الفيش آند تشيبس …

 

————————————————————————————————————————————————————————–

الإسم صحيح (هي تنطق دافنوا إذا كان هذا اللي تقصدين). دافنوا البطاطس غير جراتان البطاطس اللي كثير ناس يعرفون فما أدري إذا هذا اللي تقصدين أو لأ. دافنوا البطاطس الحقيقية مافيها أي جبن بس مع هذا وجهها محمر ولها قشرة مقرمشة بسيطة وفيها نكهة جبن (أي واحد ما يعرف إن معها جبن بيتوقع معها جبن). هذي نسخة رهييييبة من دافنوا البطاطس ويعجبني فيها القشرة اللي تتكون تحت وفوق عالبطاطس رهيبة.

دافنوا البطاطس .. Pomme Dauphinpos

نص أصبع زبدة دافي
كوب حليب
فص ثوم مقشر ومضروب بس موب مقطع
فلفل أسود
٣/٤ ملعقة صغيرة ملح
رشة جوزة طيب (مبشورة جديد موب مبشورة جاهزة)
تقريبا ٧٠٠ جرام بطاطس مقشرة
كوب ونص كريمة

سخني الفرن على ٤٢٥

أستخدمي هنا صحن بايركس كبير (حجمه ٩ في ١٣ انش او ١٠ في ١٢ انش) أو أكبر وأعرض صحن بايركس أو خزف عندك (بعدي عن المعدن).

أدهني الصينية بشكل جيد بنص الزبدة تقريبا.

قطعي البطاطس لشرايح سمكها تقريبا ٣ مللي .. يفضل تستخدمين ماندولين هنا كونها أسهل وأدق كثيييير من السكين لمثل هذي الوظائف. لاتستخدمين الشرايح الصغيرة أو اللي سمكها موب متساوي كونها راح تستوي بوقت غير ويا بتنحرق لو كانت أنحف من اللازم أو تقعد كقطع قاسيه لو كانت أسمك من اللازم حاولي تستخدمين الشرايح المتناسقة بس. بعد التقطيع لاتغسلين البطاطس لأن النشا اللي عليها مهم لعملية الطبخ هنا.

أبدي رصي البطاطس في الصينية بطبقة وحده بس ! . رصي البطاطس وخليها تتقاطع عند ثلث كل حبة تقريبا بس لاتسوين دور ثاني لو بقى عندك بطاطس ! البطاطس تكون طبقة وحده بس.

حطي الحليب مع الملح و الفلفل و الثوم و جوزة الطيب في قدر صغير وخليهم يوصلون غليه بعدين طفي النار عليهم. شيلي الثوم وصبي الحليب الحار عالبطاطس.

غطي الصينية بقصدير ودخليها الفرن ربع ساعة تقريبا أو إلين ما البطاطس يمتص أغلب الحليب.

الحين سخني الكريمة إلين تبدأ تغلي بعدين صبيها فوق البطاطس ووزعي باقي الزبدة فوقها في أماكن متفرقة.

رجعي الصينية للفرن بس هذي المرة بدون القصدير وخليها تطبخ تقريبا ١٥-٢٠ دقيقة أو إلين تبدأ تتحمر وتكون قشرة عالوجه.

طلعيها من الفرن وخليها تبرد ١٠ دقايق تقريبا قبل تاكلينها (جدا مهم عشان البطاطس تجمد شوي وتشرب أي كريمة باقيه)

————————————————————————————————————————————————————————–

دجاج جلفريزي (هو طبق باكستاني موب هندي للمعلومية) .. Chicken Jalfrezi

١/٤ كوب زيت
حبتين بصل كبار مقطعين شرايح نحيفة
٢ ملعقة صغيرة ثوم مبشور
٢ ملعقة صغيرة زنجبيل مبشور
٤ حبات طماط مقطعه صغار (يفضل مقشرات لو تبين أحسن)
ربع كوب زبادي كاملة الدسم
١ ونص ملعقة صغيره فلفل حار مطحون
ملعقة صغيرة كركم
ملعقة صغيرة كمون كامل
٢ ملعقة صغيره كزبرة مطحونة
٣ حبات هيل أسود (موب أخضر)
٦ حبات قرنفل
حبة ورق غار
ملح
دجاجة مقطعة ٨ قطع (فخذين ، ساقين و الصدر مقطع ٤ مقطع) يمديك تستخدمين دجاج بدون عظم لو تبين بس لو بتستخدمين صدور بس نقصي وقت الطبخ وقللي المويه.
ورق كزبرة

سخني الزيت على حرارة وسط وحطي البصل مع رشة ملح وأطبخيه إلين يتكرمل تماما (لاتخلينه ينحرق بس يتكرمل على حرارة هادية) بياخذ وقت يمكن ٢٠-٣٠ دقيقة عالأقل. شيلي البصل من المقله وأفرميه في خلاط مولينكس بعدين خليه عالجنب.

الحين حطي الثوم و الزنجبيل في نفس القدر اللي طبخنا البصل فيه وأطبخيهم شوي بعدين حطي الطماط و الزبادي وأطبخي كل شي إلين يذبل الطماط شوي. حطي عليهم خليط البصل اللي سوينا بعدين كل البهارات وأطبخيهم مع التحريك من وقت لوقت إلين يفصل الزيت عن الخليط يعني تلاقين طبقة زيت طلعت في الوجه.

الحين حطي سيقان وفخوذ الدجاج وتقريبا كوب مويه وشوي ملح وغطي الدجاج بالصوص. غطي القدر ونزلي الحرارة لأقل شي وأطبخي الدجاج إلين يصير لييييين وتقريبا ينفصخ من العظم بملعقة تقريبا ٣٠-٤٠ دقيقة. لو لقيتي القدر نشف زيدي شوي مويه حسب الحاجه. الحين حطي الصدور حقت الدجاج وأطبخيها إلين تستوي من داخل ويروح اللون الوردي بس ! لاتطبخينها أكثر من اللازم عشان لا تنشف، تقريبا ٨-١٢ دقيقة حسب حجم الدجاج.

ذوقي الدجاج والصوص وعدلي الملوحة حسب الرغبة بعدين حطي الكزبرة.

قدميها مع برياني أو رز أبيض أو حتى خبز زي النان …

————————————————————————————————————————————————————————–

دجاج كراهي .. Chicken karahi

كراهي يعني صاج وهذا الدجاج بالعادة كذا ينطبخ على صاج مع تشكيلة أنواع فلفل.

ملعقة كبيرة سمن (أو زيت بس السمن أطعم واجد هنا)
١/٢ ملعقة صغيرة فلفل أحمر مجروش
حبتين فلفل رومي بارد مقطعة شرايح (أحمر أو أصفر بعدي عن الأخضر هنا)
حبة بصل أحمر مقطعة شرايح عريضة شوي (تقريبا ١ سم)
نص كيلو دجاج (صدور أو فخوذ) مقطعة مكعبات
ملعقتين كبار كزبرة مفرومة
١/٢ ملعقة صغيرة كاسوري ميتي kasouri meti (ورق حلبة مجفف شوفي صورته في موضوع البتر تشيكن)
عصير ليمونه
تقريبا ٥ سم زنجبيل مقشر ومقطع عيدان نحيييييييييفة قدر الإمكان

صوص الكراهي :

١/٣ كوب سمن
٣ فصوص ثوم مقطعة صغار
ملعقة كبيرة حبوب كزبرة مطحونه خشن
٨ حبات فلفل أحمر حار طازج موب مجفف ، مطحونه في هاوند
بصلتين مقطعات صغار
٥ سم زنجبيل ، مقشر ومفروم
٣ حبات فلفل أخضر حار مقطعه صغار
٧٥٠ جرام طماط مقطعه صغار
ملعقتين صغار ملح
ملعقة صغيرة جارام ماسالا (الطريقة في المدونة)
ملعقة صغيرة ونص ورق كزبرة ناشف (كاسوري ميتي ، شوفي موضوع البتر تشيكن)
ملعقة صغيرة سكر

للصوص :

سخني السمن في قدر بعدين حطي الثوم وأطبخيه إلين تطلع ريحته بعدين حطي الكزبرة و الفلفل الأحمر وخليهم يطبخون إلين تطلع ريحتهم بعدين حطي البصل وحركي كل شي مع بعض ، أطبخي البصل إلين تبدأ أطرافه تقلب ذهبي بعدين حطي الزنجبيل و الطماط و الفلفل الأخضر ونزلي الحرارة وأطبخيهم إلين يثقل الخليط ويبدأ الزيت يفصل منه. حطي الملح و الجارام ماسالا و الكاسوري ميتي وذوقي وعدلي الملح و السكر حسب الرغبة.

للكراهي :

سخني صاج أو ووك wok (المقله الصينية) على أعلى حرارة ممكنه وبعد ما تحتر حطي السمن و الفلفل المجروش و البصل و الفلفل الرومي وأطبخيهم مع التحريك المستمر تقريبا دقيقة، حطي الدجاج وأقليه دقيقة معهم تقريبا بعدين حطي صوص الكراهي وأطبخي كل شي إلين يستوي الدجاج ويروح اللون الوردي من داخل.ذوقي وعدلي الملح بعدين طفي النار وحطي عصير الليمون و الكاسوري ميتي و الكزبرة وزيني كل شي بالزنجبيل.

————————————————————————————————————————————————————————–

الجوب تشاي .. jopchae

الجوب تشاي نوودلز كوريه جدددا مشهورة وغالبا تلاقينها في أي مطعم كوري تدخلينه. اللحم ممكن يتبدل بدجاج أو ربيان أو حتى توفو أو يمديك تزيدين الفطر وتقدمينها بدون لحم.

ملعقتين كبار زيت سمسم محمص toasted sesame oil
تقريبا ١٢٠ جرام ستيك بقري مقطع شرايح بالطول ( ribeye , sirloin, striploin ) كلها تنفع
بودرة فلفل حار
حبتين جزر مقطعه أعواد نحيفة
بصلة كبيره مقطعه أجنحة
٩ حبات بصل أخضر مقطع الجزأ الأخضر لأجزاء طولها تقريبا ١ إنش و الجزأ الأبيض مقطع بالطول (يعني نحاف) لقطع طولها ١ إنش
٥ ربطات سبانخ مغسولة بشكل جيد ومشيول جذرها
كوب فطر يفضل خليط من عدة أنواع لو توفر مقطعة لقطع كبيره متساويه الحجم تقريبا
ملعقة كبيره ثوم مفروم
٢٢٠ جرام نوودلز سولافان أو نوودلز زجاجية أو نوودلز الفول الأخضر. بتلاقين مكتوب عالعلبة يا cellophane noodles يا glass noodles يا bean thread noodles
ملعقتين كبار صويا صوص (خفيفة موب حقت الأندونوسيين الثقيلة)
ملح وفلفل أسود
١/٤ كوب صنوبر محمص
١/٤ كوب سمسم محمص

—————————————————————————

أسلقي السبانخ في مويه مغليه مملحة لمدة ٢٠ ثانيه تقريبا بعدين شيليها من المويه بصفاية وحطيها في حمام ثلجي أو أغسليها بمويه بارده عشان توقفين الطبخ. أعصري السبانخ بشكل جيد من المويه بعدين قطعي كتلة السبانخ لكم قطعة كبيره.

جيبي قدر كبير فيه مويه مغليه وملحيه وخليه عالجبن (لطبخ النوودلز بعدين).

جيبي مقلة الصينيين اللي يسمونها ووك wok أو أي مقله ثانيه كبيره لو ماعندك وحطيها على أكبر عين غاز عندك وسخنيها شوي. بعد ما تحتر أرفعي النار على أعلى شي وحطي ملعقة من زيت السمسم وبعدين اللحم ورشة ملح وفلفل حار وقلبيهم مع بعض شوي. خلي اللحم إلين يتحمر من جهات بعدين شيليه عالجنب في صحن كبير(لاتطبخينه أكثر من اللازم عشان ما ينشف العملية ماراح تاخذ دقيقة). حطي الجزر مع رشة ملح في نفس المقله وأطبخيه إلين يلين شوي لا أكثر بعدين شيليه عالجبن مع اللحم. حطي باقي الزيت والبصل مع رشة ملح في المقله وأطبخيهم مع بعض مع التحريك من وقت لوقت إلين يبدأ البصل يتلون من الجوانب بعدين شيليه عالجنب مع اللحم و الجزر. حطي البصل الأخضر مع رشة ملح وأطبخيه إلين يذبل تقريبا دقيقتين وبعدين شيليه عالجنب مع خليط اللحم. حطي الفطر وأطبخيه إلين يبدأ يتحمر بعدين رشي عليه رشة ملح وشيليه مع خليط اللحم. حطي السبانخ وأطبخيه ثواني بس بعدين حطي الثوم وقلبيه معه وبعدين شيليهم الإثنين عالجنب مع خليط اللحم. طفي النار.

حطي النوودلز في المويه المغليه وطفي النار وخليها تقعد في المويه إلين تلين تقريبا ٣-٥ دقايق (ذوقيها). بعد ما تستوي صفيها وحطيها في المقله على حراره وسط مع الصويا وقلبيها معها إلين تتشربها. أنقلي النوودلز للصحن اللي فيه اللحم و الخضار وقلبي كل شي مع بعض. ذوقي النوودلز وعدلي الملح والفلف وزيت السمسمس لو تبين زيادة وبعدين حطي الصنوبر و السمسم وكليها دافيه أو حتى بارده.

————————————————————————————————————————————————————————–

الدجاج الفيتنام المكرمل .. Vietnamese Caramelized chicken

٣/٤ كوب سكر بني غامق
٣ أكواب مويه
١/٢ كوب صوص سمك fish sauce
١/٣ كوب خل رز (أو ملعقة كبيره ونص خل أبيض)
ملعقة صغيرة صويا صوص
ملعقة كبيره زنجبيل مفروم
٤ فصوص ثوم مفرومه
رشة زيت سمسم محمص
زيت
حوالي ٧٠٠ جرام أفخاذ دجاج منزوعة العظم و الجلد ومقطعه قطع كبر اللقمة. الصدر بينشف مع الطبخ ، الفخذ لأ !
٤ حبات بصل أخضر مقطعه صغار
حبتين فلفل أخضر حار مقطعه حلقات
كوب فول سوداني محمص
١/٢ كوب براعم فاصوليا (يسمونها عندنا براعم حلبه مع العلم إن مالها أي علاقة) bean sprouts
١/٣ كوب ورق كزبرة
١/٣ كوب ورق نعناع
١/٣ كوب ورق ريحان يفضل ريحان تايلندي
نوولز رز أو سولوفان أو حتى نوودلز صينية بالبيض عاديه.

في صحن أخلطي المويه و السكر و الصويا و صوص السمك و زيت السمسم و الثوم و الزنجبيل و الخل إلين يذوب كل شي وخليه عالجنب.

في مقله كبيره مسخنه على حراره أعلى من وسط بشوي حطي شوي زيت بعدين حمري الدجاج بشكل جيد من جميع الجهات. حطي ثلث الخليط اللي فوق وخليه يطبخ مع الدجاج إلين ينقص ويصير زي الشيره الثقيله ويتكرمل الدجاج بشكل جيد.

حطي باقي خليط السكر و الصويا وخلي الدجاج يطبخ على غليه جدا هاديه إلين ينقص الخليط تماما ويصير زي الشيره والدجاج يصير جددددا لين ومغطى بالشيره. أنتبهي لا تخلينه ينقص أكثر من اللازم عشان لايصير مالج أكثر من الازم.

حطي البصل الأخضر و الفلف الحار وخليهم يطبخون شوي.

طفي النار وحطي الفول السوداني و الأعشاب آخر شي حسب الرغبة وقدميها مع نوودلز أو حتى رز.

————————————————————————————————————————————————————————–

الفيش كيك جدا سهلة. أي نوع سمك مطبوخ بايت ينفع وحتى يمديك تسوينها بكراب أو ربيان أو أي سيفوود بعد.

الفكرة ببساطة إنك تخلطين السمك اللي تستخدمين مع نكهات وأشياء تمسكه بعدين تقلينه قلي ضحل في شوي زيت. ممكن في الفرن بس ما أنصح الصراحة. النكهات اللي ممكن تحطينها راجعه لك ، ممكن تنكهينها بأي أي أي شي يخطر على بالك من كاري إلى فلفل أو أي خليط أعشاب أو بهارات تحبين.

كفتة سمك .. Fish cake

تقريبا ٤٠٠ جرام سمك مطبوخ ومبرد (أو نص كيلو فيليه سمك بدون جلد أطبخيه في شوي زيت إلين يستوي بس لا تطبخينه أكثر من اللازم !!! بعدين خليه يبرد)
كوب بصل أخضر مقطع صغااار
٣ ملاعق كبيره بقدونس مفروم
ملعقتين كبار طحين
فصين ثوم مقطعه صغار
١ ١/٢ ملعقة صغيره بشر ليمون
٢ ونص كوب بقسماط طازج (خبز قديم بدون قشر مطحون في الخلاط بدون تحميص أو تجفيف !)
بيضه

فتتي السمك في صحن خلط ، أضيفي عليه البصل الأخضر و البقدونس و الثوم و الليمون و الطحين و كوب من البقسماط، ذوقي وعدلي الملح و الفلفل. أضيفي البيضه وحركيها مع الخليط.

شكلي الخليط على شكل أقراص. حطي باقي البقسماط في صحن ورصي الكيك على البقسماط عشان يمسك فيه.

سخني كمية زيت في مقله كافيه إنها تغطي الكيكات لنص الإرتفاع تقريبا (تقريبا ٥ ملاعق كذا). حطي الكيكات وأقليهم إلين يتحمر الوجه الأول بعدين أقلبيهم شوي شوي إلين يتحمر الوجه الثاني.

قدميها مع ليمون وصوص تارتار لو تبين.

————————————————————————————————————————————————————————–

كاري السمك المشوي التايلندي .. Thai grilled fish curry

للكاري الأحمر :

٦-١٠ حبات فلفل أحمر مجفف منقوع في مويه إلين يصير لين وبعدين مقطع.
كم حبة فلفل حار تايلندي طازج (حسب الرغبة، الأكل التايلندي جدا حار بالعادة)
١/٤ كوب ثوم مقطع
رشة ملح
٥ ملاعق كبيره شالوت shallots أو بصل لو مافيه بس يفضل شالوت يفرق كثيير في الطعم
١/٤ كوب عشبة ليمون مقطعه ( الجزأ المتين بس بعد ما تشيلين الأوراق الخارجية القاسية)
ملعقة كبيره جالنجال galengal (يشبه الزنجبيل، يمديك تبدلين زنجبيل لو ماعندك بس كل مابدلتي كل ما تغير الطعم)
ملعقة صغيره بشر كافر لايم
ملعقة صغيرة جذر كزبرة
ملعقة صغيره معجون ربيان shrimp paste . يسمونه عندنا تراسي
رشة فلفل أبيض مطحون
رشة جوزه طيب

للسمك :

ورقتين موز
نص كوب زيت جوز هند (ضروووري زيت جوز هند أصلا المفروض كريمة جوز هند مفصولة بس صعب شرح عملها هنا)
تقريبا ٧٠ جرام ورق ريحان تايلندي (أو عادي لو مافي)
٦-١٠ ورقات كافر لايم مقطعه شرايح نحييييييفة
كوب كريمة جوز هند coconut cream (موب حليب !)
٤ حبات فيليه سمك بدون جلد وزن كل وحده تقريبا ١٨٠ جرام. أستخدمي سمك قوي شوي ما يتفتت مع الطبخ زي الهامور

لخليط جوز الهند :

١/٤ كوب زيت جوز هند
ملعقتين كبار ونص سكر نخيل palm sugar أو سكر بني لو ماعندك
١/٤ كوب صوص سمك fish sauce
١٠٠ جرام لحم جوز هند طازج مبشور (أو أستخدمي نارجيل لو ماتبين)
١/٢ كوب كريمة جوز هند coconut cream (موب حليب !)

الطريقة :

لعمل معجون الكاري :

ممكن عمله بهاوند كبير أو بخلاط. الهاوند أفضل بس الإثنين ينفعون.

لعمله في الهاوند أبدي بإنك تضربين الفلفل المجفف المنقوع إلين ينهرس تماما بعدين حطي المكونات اللي بعده واحد واحد ولا تضيفين اللي بعده إلين ينهرس اللي قبله تماما.

لعمله في الخلاط حطي كل المكوانات وأخلطي وزيدي مويه لو أحتاج عشان يمشي الخليط في الخلاط بس حاولي تحطين أقل قدر ممكن.

لعمل خليط جوز الهند :

سخني زيت جوز الهند على حراره وسط وبعد ما يحتر حطي عليه ٥ ملاعق كبيره من معجون الكاري وأقلي المعجون إلين تتغير ريحته تقريبا دقيقه أو إثنين. نزلي الحراره وذوقي الخليط وعدلي الطعم بصوص السمك و سكر النخيل حسب الرغبه (ذوقي وعدلي).

حطي جوز الهند أو النارجيل عالخليط وأطبخيه شوي بعدين حطي كريمة جوز الهند وأطبخي الخليط إلين تتبخر المويه من كريمة جوز الهند وتحسينه صار دهني وفيه طبقه زيت فوق الخليط ، طفي النار.

للسمك :

أقطعي العرق السميك اللي في وسط ورق الموز وأرميه.

أقطعي ورق الموز ٨ قطع. ٤ منهم عرضها ٦ إنش تقريبا و ال ٤ الثانيات عرضها ٨ إنش تقريبا.

أمسحي ورق الموز عشان تنظفينه بعدين حطي ورقة صغيره فوق وحده كبيره وخلي الجهة اللي تلمع على فوق.

أدهني الورقة الصغيره بشوي زيت جوز هند بعدين كم ورقة ريحان وبعدين شوي من خليط جوز الهند بعدين زيادة ريحان بعدين ورق كافر لايم وآخر شي كريمة جوز هند. حطي فيليه سمك بعدين أرجعي رصي الأشياء اللي تحت بترتيب عكسي.

لفي نص ورقة الموز الصغيره على الحشوه وبعدين لفي الورقة الكبيره عليهم كلهم وقفلي الظرف ب أعواد شوي أو أعواد أسنان في عدة أماكن. عيدي نفس العملية لل ٣ حبات الباقيه.

الحين أشوي الظروف إما عالفحم وهو المفضل أو في شواية الفرن لمدة ٢٥-٣٠ دقيقة. الورق الخارجي راح ينحرق تماما بس الداخلي بيكون محافظ على شكله وقدميه فيه.

————————————————————————————————————————————————————————–

بوت ستيكرز (المنتو المشوي) .. Pot stickers

في اليابان يسمونها جيوزا gyoza وفيه نسخ كوريه لهذا الطبق.

الفكرة سهلة ، دمبلنج ، نحمرها كأننا نقليها بعدين نطبخها بالبخار. في خطوة القلي هي راح تلصق في القدر (من هنا الإسم) لا تخافون كملوا في الوصفة وراح تفك لحالها. الحشوة اللي مستخدم هنا ربيان بس ممكن تتبدل بدجاج أو فطر أو خضار لو تبين..

ربع كيلو ربيان مفروم في الخلاط (لاتخلطينه أكثر من اللازم)
١/٤ كوب بصل أخضر مفروم
كوب كرنب مفروم
ملعقة صغيره زنجبيل مفروم
ملعقة صغيره خل رز ( أو نص ملعقة خل ونص ملعقة مويه)
ملعقة صغيره سكر
ملعقة كبيرة صويا صوص
ملعقة كبيرة زيت سمسم محمص
بيضه
فلفل أسود وملح

٢٤ ورقة وون تون won ton wrapper دائرية أو مربعة (الدائرية بتعطيك دمبلنج على شكل نص قمر و المربعة مثلثات حسب اللي تبين)
١/٣ كوب مرق ربيان (أو دجاج لو بتستخدمين حشوة دجاج)

أخلطي أول ١١ مكون شوي شوي.

حطي شوي من الحشوه في وسط كل ورقة ون توون ، رطبي الحواف بشوي مويه بعدين قفليها على شكل نص دائرة لو أستخدمتي الدائرية أو مثلث لو مستخدمه المربعة. حطي الحبات الجاهزة في صينية مرشوشة بشوي طحين عالجنب وغطيها بفوطة رطبة.

للطبخ ، سخني مقله على حراره وسط وأدهني شوييي زيت عليها إلين تحتر. حطي الدمبلنج عالزيت وبعديهم شوي عن بعض (لاتحشرينهم جنب بعض يمكن تضطرين تسوينهم على دفعات لو ماعندك مقله كبيره).

خلي الدمبلنج تطبخ دقيقتين تقريبا بعدين صبي المرق شوي شوي وغطي القدر ونزلي الحراره لأقل شي.

خليها تطبخ دقيقتين تقريبا بعدين قدميها.

————————————————————————————————————————————————————————–

Follow TopChefCooks on Twitter

6 comments

Skip to comment form

  1. هدى

    جزاك الله خيرا
    الله يوفقك ويرضى عليك

  2. غير معروف

    ما شاء اللة معلومات مفيدة وقيمة جدااا

  3. غير معروف

    الله يوفقك ويعطيك العافية ويجزاك خير على هالعطاء والفائده الي بتقدمها لنا ..

    1. Top Chef

      العفو وحياك

  4. Haifa

    ماشاء الله عليك مبدع جداً الله يوفقك ويجزاك خير علي ما تقدمه من علم نافع وأسلوب جداً محترف وواضح وسهل

    1. Top Chef

      من ذوقك وحياك الله دايم

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: