هلا والله …
هذا الموضوع تابع لفعالية حول العالم في ٣٠ يوم.
المطبخ الآيرلندي جدا بسيط و شعبي و يعتمد بشكل أساسي على المكونات الموجودة في نفس المنطقة مثل البطاطس و الكرنب و الحبوب و الغنم ومنتجات الخنزير بشكل أساسي. هو جدا قريب من المطبخ الإنجليزي ونقدر نقول إنه فرع من فروعه ويختلف عنه في المكونات لا أكثر.
الأكلة اليوم جدا سهلة وسبب إختياري الأساسي لها هو البازلاء الصراحة كونه هذا موسمها وهو الوقت اللي تكون فيه بأحلى طعم. البازلاء و الغنم رهيبين مع بعض و النعناع مع الغنم يعتبر نكهة كلاسيكية ودايما رهيبة. الصوص اللي بسويه جدا سهل هو بازلاء مطحونه لا أكثر ، جربوه مع البيض المقلي و البيكون لو تحبون رهيب.
المقادير :
للصوص :
تقريبا نص كيلو بازلاء طازة جديدة أو مجمدة.
١/٣ كوب نعناع
٣ ملاعق كبيرة زبدة
٣ ملاعق كبيرة كريمة أو حسب الرغبة
لريش الغنم :
١/٤ كوب نعناع مفروم
زيت زيتون
ملعقتين كبار خل بلسمك
٤ فصوص ثوم مفرومة
ملعقتين صغار كمون
ملعقة صغيرة كزبرة
ملعقة صغيرة فلفل حار مطحون
ملح وفلفل أسود
٨ ريش غنم
* كثير ناس يغلطون في البازلاء ويحفظونها وقت طويل مع العلم إنها جدا حساسة للحفظ. البازلاء حدها ٤ أيام في الثلاجه من يوم تنقطع من الشجر. أول ما تنقطع من الشجر السكر اللي فيها يبدأ يتحول نشا ويصير طعمها أقل حلاوه وقوامها نشوي زي البطاطس تقريبا. حوالي ٤٠٪ من السكر يتحول نشا من أول يوم بعد القطف بس ! عشان كذا مهم جدا تكون طازة مره إذا كنتوا بتستخدمونها طازة. إذا ماعندكم طازة أستخدموا مجمدة، البازلاء المجمدة غالبا تكون بازلاء طازة وحلوه ومجمدة في نفس اليوم وفي عز موسم البازلاء. البازلاء المجمدة ممتازة للأكل كونها ما تخسر طعمها ولا حلاوتها زي الطازة إذا قدمت ولا حتى فوائدها الغذائة ( آخر همي بس قلت معلومة يمكن تفيد أحد ). البازلاء المعلبة خيار سيء هنا ( أو في أي أكلة ) ، التعليب ما يمشي مع البازلاء زين وراح يعطي بازلاء لينة أكثر من اللازم وبطعم معدني خفيف.
* اللحم أنا مستخدم ريش بس أستخدموا أوصال عادية لو تبون بنفس التتبيلة أي لحم غنم يمشي بشكل حلو مع الصوص.
الطريقة :
للصوص :
نسلق البازلاء و النعناع في مويه مغليه ومملحة إلين تستوي وتصير لينه تقريبا ٤ دقايق.
نصفي البازلاء و النعناع ونحفظ موية السلق بعدين نفرمهم بالخلاط مع الزبدة و الكريمة و رشة ملح وفلفل ونزيد من موية السلق إلين توصل القوام اللي نبي. نغطي الصوص بنايلون ونخليه عالجنب إلين نسوي اللحم.
للريش :
نخلط الزيت مع الخل و النعناع و الكزبرة و الكمون و الفلفل الحار و الثوم في صحن ونقلب الريش فيهم. نغطي الريش ونخليها تتبل على حرارة الغرفة ساعة عالأقل أو في الثلاجة لو وقت أطول.
نطلع الريش من التتبيلة وننشفها بمناديل رول بعدين نرش ملح وفلفل أسود عالوجهين.
نسخن مقلة ستانلس أو حديد زهري على حرارة أعلى من وسط بشوي وبعد ما تحتر نحط شوي زيت وبعدين نحط الريش. نطبخ الريش إلين يتحمر الوجه الأول بعدين نقلبها ونطبخ الوجه الثاني إلين يتحمر تقريبا ٤ دقايق بالكثير. هذا بيعطينا ريش ميديم medium يعني ماتزال حمراء داخل زي ما أنا أحبها و أعتقد الغنم أكثر من كذا يصير ناشف وقاسي بس كل واحد وذوقه.
نشيل الريش من الحرارة ونخليها عالجنب دقيتقين ترتاح عشان ترجع المويه تتوزع في اللحم ويرتاح العضل ويجينا رطب ولين. نقدم الريش مع صوص البازلاء وبطاطس أو كسكسي أو رز أو أي نشا ثاني تحبون عالجنب.
8 comments
2 pings
Skip to comment form ↓
غير معروف
19 مايو, 2011 الساعة 11:32 م (UTC 3) Link to this comment
مرحبا …
لو سمحت البلسميك شكله ثقيل او كثيف هنا ” هذا انت مسوية صوص -طبخته مثل مرة قلت لي عليها او عادي من العلبة على طول”
ورقة النعناع شكلها غريبة شوي او من التصوير؟؟
Top Chef
20 مايو, 2011 الساعة 12:27 ص (UTC 3) Link to this comment
لا البلسمك صوص زي اللي سويته للتشيز كيك أول .. هو موب مطلوب أبدا هو شكل أكثر من كونه صوص
ورقة النعناع مافيها شي ورقة نعناع عادية هههه بس يمكن عشانها من طرف الغصن اللي فوق وجايه كذا .
غير معروف
19 مايو, 2011 الساعة 8:55 م (UTC 3) Link to this comment
مبدع ماشا الله عليك
غير معروف
19 مايو, 2011 الساعة 12:56 م (UTC 3) Link to this comment
يسلمو يدك شيف
والله يديك العافيه يارررب
um nwaf
19 مايو, 2011 الساعة 5:46 ص (UTC 3) Link to this comment
حلوه البساطة..
يمكن هذا الشىء الوحيد اللي حتجرأ واسويه ميديم
يعطيك العافية
غير معروف
19 مايو, 2011 الساعة 3:57 ص (UTC 3) Link to this comment
شييييييييييي صراحة
حلو منك صوص البازلاء حبيته لاني من الناس الي تحب البازلاء واقدرها
عندي سؤال على الماشي هالحين الريش اشتريها والعظم فيه شوي زوايد او لحم واشوف الريش الي معك
مافيها انت وشلون تنظفه او ترتبه
يسلمو ياعسل ماقصرت وصحة وعافية على قلبك
Top Chef
19 مايو, 2011 الساعة 9:08 ص (UTC 3) Link to this comment
أها .. سؤال حلو وحلو بعد إنك لاحظتي لأني للحين مستغرب محد سألني عن الهدف من تنظيف الريش ؟
الريش أنا أشتريها كاملة و أنظفها في البيت سهل مره. الريش تجيك عظم ومشبوك فيه قطعة لحم في الأخير (اللي في الصورة) هذي يسمونها العين. بعدين يجي فوق العين طبقة جلد قاسي من النوع اللي ما يذوب مع الطبخ وبعدين طبقة لحم خفيفة وبعدين شحمة .. في التنظيف إحنا نشيل الشحم و نشيل الجلد و اللحم الصغير ونطلع الريش زي كذا … تقدرين تسوين العملية في كل ضلع لحاله بس صعبة شوي وتاخذ وقت بس لو شريتي الضلع كله ونظفتيه مره وحده يكون سهل . شوفي الفيديو أسهل :
غير معروف
19 مايو, 2011 الساعة 11:15 ص (UTC 3) Link to this comment
اذا تبي الصدق من المرة الماضية يوم اشوف ريشك وريشي وانا اقول وشلون سواها خصوصا ان المحلات تبيع الريش مقصصة خالصة لكن بدون تنظيف .وحاولت انظفها لكن تعبت منها ماسكة وبقوة ما قدرت ارتبها
عموما الفيديو عجزت مافتح معي لو تحط رابط يمكن اريح لك
ختام فعالية حول العالم في ٣٠ يوم …. » Top Chef Blog .. مدونة توب شيف
27 ديسمبر, 2012 الساعة 5:13 ص (UTC 3) Link to this comment
[…] آيرلندا : ريش الغنم بالنعناع مع صوص البازلاء […]
ختام فعالية حول العالم في ٣٠ يوم …. « مدونة توب شيف … Top Chef
5 يوليو, 2011 الساعة 9:26 م (UTC 3) Link to this comment
[…] آيرلندا : ريش الغنم بالنعناع مع صوص البازلاء […]