كرات اللحم الإيطالية .. Italian Meatballs

هلا والله …


هذي الطريقة لكرات اللحم هي أفضل طريقة جربتها لها إلى الآن ، الكرات بهذي الطريقة تجي لينه ورطبة وفيها نكهة رهيبة من الإضافات اللي محطوطة عليها.


المقادير :


بصلة كبيرة مقطعه صغار

٥ فصوص ثوم مقطعة صغار

٥ ملاعق كبيرة أعشاب طازجة مقطعه صغار.

١/٣ كوب جبن بارمزان أو رومانو (يفضل بارميجانو ريجانو)

كوبين خبز أبيض مقطع مكعبات. أي خبز ينفع خبز فرنسي ، إيطالي ، أو حتى توست أهم شي نشيل الحواف حقت الخبز.

كوب حليب

٧٠٠ جرام لحم بقر مفروم

٣٥٠ جرام لحم غنم مفروم

٣٥٠ جرام لحم عجل مفروم

بيضه

ملعقتين صغار فلفل أحمر مجروش

ملح وفلفل أسود


* الأعشاب ممكن تكون أي أعشاب أو خلطة أعشاب ، ريحان ، بقدونس ، ميرامية ، زعتر ، أوريجانو … إلخ .. أنا أحب أستخدم ريحان و زعتر و بقدونس .. في حال ماتوفر طازج أستخدموا أعشاب مجففه بس ثلث الكمية يعني كل ملعقة كبيره أعشاب طازجة حطوا بدالها ملعقة صغيرة مجففة.


* اللحم تقدرون تستخدمون نوع واحد بس أو نوعين و بالكميات اللي تحبون بس نصيحة جربوها ولو مره وحده كذا وبتعرفون ليش حطيت ٣ أنواع . كل نوع لحم له صفات غير الثاني وكل واحد بيعطي شي لكرات اللحم غير الثاني. تقدرون بعد تسوونها بالديك الرومي أو الدجاج لو حابين.

 


الطريقة :


في مقله صغيره نطبخ البصل مع رشة ملح في شوي زيت زيتون على حرارة هادية إلين يذبل. بعد ما يذبل نحط الثوم و الأعشاب ونطبخهم دقيقه بس إلين تطلع ريحتهم. نطفي النار ونخلي الخليط يبرد شوي.

الحين نحط الخبز في صحن ونصب عليه الحليب ونخليه يتشربه تقريبا ١٠ دقايق.


meatballs

كرات لحم

 

في صحن كبير ثاني نحط أنواع اللحم كلها ونقلبهم مع بعض شوي شوي.


كرات لحم

 

الحين نصفي الخبز من الحليب ونعصر الخبز بيدنا عشان نطلع الحليب الزايد.


الحين نضيف باقي المقادير عاللحم .. نحط الخبز و خليط البصل و الثوم اللي سويناه أول شي و البيضه و البارمزان و الفلفل المجروش و الملح و الفلفل .


meatballs

 

الحين أهم خطوة وهي خلط المقادير مع بعض .. لازم نخلط المواد شوي شوي بأطراف أصابعنا ، أكثر شي يخلي كرات اللحم ناشفة هي إن الناس يعصرونها بيدهم ويضغطونها بقوة. نخلط شوي شوي إلين تنخلط كل المقادير مع بعض.


الحين نسخن مقله صغيره فيها شوي زيت ونطبخ قطعه صغيرة من خليط اللحم عشان نعرف إذا كان فيها ملح يكفي أو لأ.


نشكل اللحم على شكل كور. تقدرون تستخدمون كور إسكريم لو حابين أو ميزان أهم شي خلوها كلها نفس الحجم عشان تستوي بنفس السرعة بعدين. حجم الكور راجع لكم تقدرون تخلونها صغار مره أو كبار مره شي راجعلكم .


meatballs

 

 

الحين الكرات جاهزة نقدر نطبخها علطول أو نخليها في الثلاجه كم يوم أو حتى نفرزها لو نبي بتعيش تقريبا ٣ شهور في الفريزر. لو حبينا نفرزها نحطها في صينية زي ماسويت فوق بحيث تكون الحبات بعيدة عن بعض شوي بعدين نحط الصينية في الفريزر إلين تجمد الكور، بعد ما تجمد نشيلها من الصينية ونحطهم في كيس ونطلع أكبر كمية هواء منه ونقفل الكيس زين بعدين نخليها في الفريزر. إذا جينا نطبخها بعدين نخليها تذوب في الثلاجه طول الليل بعدين نطبخها عادي.

 


الطبخ :

 

نسخن الفرن ل ٣٧٥ .

الحين نسخن مقله (يفضل ستانلس) على حرارة أعلى من الوسط بشوي ونخليها تسخن شوي بعدين نحط شوي زيت (موب زيت زيتون) ونحط الكور ونطبخها إلين تتحمر كل الأوجه .. بعد ما نحمرها نحط المقله كلها في الفرن عشان تكمل طبخ إلين تستوي من داخل .

 


meatballs

 

بعد ما تستوي نطلعها من الفرن ونحط صوص الطماط الأساسي ونطبخه معها شوي بعدين نحط الباستا وزيادة بارمزان و بقدونس .

 

meatballs



هذي الطريقة موب الطريقة الوحيدة لكرات اللحم ، فيه آلاف الطرق و الإستخدامات لها.

 

meatballs

 

كرات لحم

 

meatballs

22 comments

Skip to comment form

    • Anonymous on 17 September, 2014 at 12:37 am
    • Reply

    تسلم يدك ويبارك بعمرك، سويت الطبق طلع لذييييذ جدا وعجب الكل ولله الحمد سويته بنوع واحد من اللحم المفروم وان شاء الله ناويه اسويه بالثلاث انواع ان شاء الله وسويت كذا طبق كلها تمام حلوه ولذيذه جزاك الله كل خير
    ومن اللي استفدته من المدونه الطبخ على نار هاديه قبل كنت احط النار على اعلى شي صحيح ينضج الاكل لكنه مو مثل الطعم اللي على نار هاديه خاصة البيض

    • الاوتار on 16 December, 2011 at 5:15 am
    • Reply

    مشكور على الوصفه بالنسبة للحم المفروم اي جزء ينفع

    1. أي جزأ ينفع بس لو تبي جرب بأجزاء معينه أو خلطات من أجزاء بس كون اللحم مخلوط مع نكهات كثير قويه صعب يبان الفرق.

    • Ovan on 9 August, 2011 at 3:43 pm
    • Reply

    المكرونة الموجودة عندي .. اسباكيتيني ..
    تنفع والا لازم اسباكيتي ؟؟

    1. شوفي موضوع مقدمه عن الباستا شرحت الأشكال وكيف تختارين شكل مع الصوص اللي تسوين .

    • Ovan on 9 August, 2011 at 3:18 pm
    • Reply

    امم شيف والله اسفه D:

    لكن تكفي هذي الطريقة ل 10 أشخاص تقريبا ؟؟

    والريحان موجود بالحديقة .. لكن اللي نستخدمو الورق صح ؟؟ مو الزهر P:

    1. لاحظي إني ماحطيت كميات .. لو تبين سوي ل ١٠٠ شخص أنا عطيتك طريقه وبس …

      الريحان الورق هو المستخدم دايما

    • Ovan on 9 August, 2011 at 3:04 pm
    • Reply

    طيب ما فيه وقت تقريبي للاستواء لان صعبه اقطع كل شوي وحدة :/

    شي ثاني الفرن اشغله من تحت بس صح ؟؟

    اخر شي ان شاا الله .. امم المكرونه اخر شي اذا حطيتها على الصوص تكون هي والكرات بقدر واحد ؟؟

    بهذلتك ادري والله

    الله لا يحرمك الاجر والخير 🙂

    1. صعب أعطيك وقت مالك إلا كذا .

      الفرن دايما من تحت إلا إذا أحد قالك غير كذا …

      المكرونه زي ما شرحت قبل وزي ما تشوفين من الصور ، حطيها على الصوص مع الكرات مع كل شي و قلبيه .

    • Ovan on 9 August, 2011 at 2:48 pm
    • Reply

    بعد ما نحمرها نحط المقله كلها في الفرن عشان تكمل طبخ إلين تستوي من داخل .

    شيف 🙂
    كيف أعرف انها إستوت خلاص ؟؟
    بعدين أنا عندي فرن صغير وأعلى حرارة فيه 250 🙁

    وعندي فرن ثاني لكن غاز

    ما العمل :@

    1. أقطعي أكبر حبه بالنص وشوفي إذا مستويه ولا لأ هذي أسهل طريقه ..

      الفرن حقك بالمئوي عشان كذا أعلى حراره ٢٥٠ . ٣٧٥ فهرنهايت = ١٩٠ مئوي يعني حطي الفرن حقك على ١٩٠ سواء كان غاز أو كهرب صغير أو كبير …

    • Ovan on 9 August, 2011 at 3:29 am
    • Reply

    بعد ما تستوي نطلعها من الفرن ونحط صوص الطماط الأساسي ونطبخه معها شوي بعدين نحط الباستا وزيادة بارمزان و بقدونس .

    عفوا شيف وين نحط الباستا ؟؟ بنفس المقلاة ؟؟؟ ووالا كيف ؟؟
    وبرضو البارمزان والبقدونس وين نحطها

    ودزاك الله خير الجزاء

    1. تقدرين تحطين الباستا على الصوص أو الصوص على الباستا مايفرق ؟ يعني صفي المكرونه بعدين حطيها في المقله نفسها اللي فيها الصوص أو حطي المكرونه بعد ماتصفينها في قدر وصبي الصوص عليها … إن شاء الله تكون وصلت الفكره…. البارمزان و البقدونس مع الصوص عادي ..

    • meme on 8 March, 2011 at 2:39 pm
    • Reply

    ماشاء الله روعه ان شاء الله اسويها بااقرب وقت

    • huda on 8 March, 2011 at 6:16 am
    • Reply

    الصراحة طبخ حلوو وطريقة التقديم احلى

    تسلم يدك

    1. الله يسلمك .. حياك الله في أي وقت

    • Anonymous on 7 March, 2011 at 8:07 pm
    • Reply

    اشهد لك وبصدق هذه الذ كرات لحم ذقتها بحياتي ولو اني كنت اطبقها بنوع واحد وبهارات فقط لكن يوم جربت طريقتك صار الطعم غيررررررررررررررررررررررررر

    هذا احد اسباب ادماني للمدونة المقادير مضبوطة والنكهات والطرق جديدة واكيد التصوير وطريقة التقديم خرافية

    جربت مرة وقدمتها ك طبق رئيسي مع رز بالشعيرية ومرة ثانية بالكريمة وجبنة المويريلا والبارميزان وكانت ولا الحلى

    طبعا انا من اكبر المعجبات والمنتظمات على المدونة الله يعطيك الصحة والعافية ويردك لاهلك سالم يار ب

    1. هلا والله …

      مشكوره على كلامك وعلى مرورك و حياك الله دايما ..

  1. أممممم أحسها لذيذة مرة

    تسلم لا هنت

    1. الله يسلمك .. مشكورة على مرورك ..

    • Anonymous on 7 March, 2011 at 2:34 am
    • Reply

    اهلين شيف
    اتمنى اتمنى انك لما تعلمنا اي طبخه تعلمنا معها طريقة التقديم
    يعني الطبق اللي فوق هذا ممكن تقدمه لاحد ضيوفك (اقصد الكميه)
    يعني دائما اطباقك اللي تعرضها ما تشبع طفل
    ولو قلت زيدي الكميه بيخرب الشكل
    فيا ليت ما تغفل النقطه هذي
    والله يوفقك ويرجعك سالم

    1. هلا والله …

      والله مدري وش أقولك الصراحة … بس موضوع التزيين موضوع كبير مره وكيف بتزينين شي أو تقدمينه يعتمد على أكثر من شي .. مثلا هذي الأكله لو بقدمها في عزيمة كبيرة هل معقول بعطي كل واحد صحن مزين ؟ أكيد بحط كل شي في صحن وكل واحد يحط وبزين الصحن الكبير بطريقة غير .. غير كذا حتى لو بزيين الصحن زي ماسويت فيه أكثر من طريقة إني أزينة .. يعني أنتي تقولين الكمية قليلة بإفتراض إنه طبق رئيسي صح .. بس مين قالك إن مافيه شي قبله أو بعده ؟ ومين قال إنه هو الطبق الرئيسي ؟

      الشي الثاني أنتي قلتي نقطة حلوه .. لو زدنا الكمية بيخرب الشكل .. بس السؤال هو هل برأيك فيه طريقة تملين الصحن ويطلع حلو ؟ الجواب لأ !! كثير ناس بيحط بقدونس وليمونه مقطعه على شكل فراشة و جزر وخرابيط ثانيه مالها أي علاقة بالصحن علي أساس إنها زينه مع العلم إنها ما تحلي شي .. هذي من أساسات التزيين .. الفراغات في الصحن حلوه !! ..

Leave a Reply

Your email address will not be published.

%d bloggers like this: