كرات اللحم الإيطالية .. Italian Meatballs

هلا والله …

هذي الطريقة لكرات اللحم هي أفضل طريقة جربتها لها إلى الآن ، الكرات بهذي الطريقة تجي لينه ورطبة وفيها نكهة رهيبة من الإضافات اللي محطوطة عليها.

المقادير :

بصلة كبيرة مقطعه صغار

٥ فصوص ثوم مقطعة صغار

٥ ملاعق كبيرة أعشاب طازجة مقطعه صغار.

١/٣ كوب جبن بارمزان أو رومانو (يفضل بارميجانو ريجانو)

كوبين خبز أبيض مقطع مكعبات. أي خبز ينفع خبز فرنسي ، إيطالي ، أو حتى توست أهم شي نشيل الحواف حقت الخبز.

كوب حليب

٧٠٠ جرام لحم بقر مفروم

٣٥٠ جرام لحم غنم مفروم

٣٥٠ جرام لحم عجل مفروم

بيضه

ملعقتين صغار فلفل أحمر مجروش

ملح وفلفل أسود

* الأعشاب ممكن تكون أي أعشاب أو خلطة أعشاب ، ريحان ، بقدونس ، ميرامية ، زعتر ، أوريجانو … إلخ .. أنا أحب أستخدم ريحان و زعتر و بقدونس .. في حال ماتوفر طازج أستخدموا أعشاب مجففه بس ثلث الكمية يعني كل ملعقة كبيره أعشاب طازجة حطوا بدالها ملعقة صغيرة مجففة.

* اللحم تقدرون تستخدمون نوع واحد بس أو نوعين و بالكميات اللي تحبون بس نصيحة جربوها ولو مره وحده كذا وبتعرفون ليش حطيت ٣ أنواع . كل نوع لحم له صفات غير الثاني وكل واحد بيعطي شي لكرات اللحم غير الثاني. تقدرون بعد تسوونها بالديك الرومي أو الدجاج لو حابين.

الطريقة :

في مقله صغيره نطبخ البصل مع رشة ملح في شوي زيت زيتون على حرارة هادية إلين يذبل. بعد ما يذبل نحط الثوم و الأعشاب ونطبخهم دقيقه بس إلين تطلع ريحتهم. نطفي النار ونخلي الخليط يبرد شوي.

الحين نحط الخبز في صحن ونصب عليه الحليب ونخليه يتشربه تقريبا ١٠ دقايق.

في صحن كبير ثاني نحط أنواع اللحم كلها ونقلبهم مع بعض شوي شوي.

الحين نصفي الخبز من الحليب ونعصر الخبز بيدنا عشان نطلع الحليب الزايد.

الحين نضيف باقي المقادير عاللحم .. نحط الخبز و خليط البصل و الثوم اللي سويناه أول شي و البيضه و البارمزان و الفلفل المجروش و الملح و الفلفل .

الحين أهم خطوة وهي خلط المقادير مع بعض .. لازم نخلط المواد شوي شوي بأطراف أصابعنا ، أكثر شي يخلي كرات اللحم ناشفة هي إن الناس يعصرونها بيدهم ويضغطونها بقوة. نخلط شوي شوي إلين تنخلط كل المقادير مع بعض.

الحين نسخن مقله صغيره فيها شوي زيت ونطبخ قطعه صغيرة من خليط اللحم عشان نعرف إذا كان فيها ملح يكفي أو لأ.

نشكل اللحم على شكل كور. تقدرون تستخدمون كور إسكريم لو حابين أو ميزان أهم شي خلوها كلها نفس الحجم عشان تستوي بنفس السرعة بعدين. حجم الكور راجع لكم تقدرون تخلونها صغار مره أو كبار مره شي راجعلكم .

الحين الكرات جاهزة نقدر نطبخها علطول أو نخليها في الثلاجه كم يوم أو حتى نفرزها لو نبي بتعيش تقريبا ٣ شهور في الفريزر. لو حبينا نفرزها نحطها في صينية زي ماسويت فوق بحيث تكون الحبات بعيدة عن بعض شوي بعدين نحط الصينية في الفريزر إلين تجمد الكور، بعد ما تجمد نشيلها من الصينية ونحطهم في كيس ونطلع أكبر كمية هواء منه ونقفل الكيس زين بعدين نخليها في الفريزر. إذا جينا نطبخها بعدين نخليها تذوب في الثلاجه طول الليل بعدين نطبخها عادي.

الطبخ :

نسخن الفرن ل ٣٧٥ .

الحين نسخن مقله (يفضل ستانلس) على حرارة أعلى من الوسط بشوي ونخليها تسخن شوي بعدين نحط شوي زيت (موب زيت زيتون) ونحط الكور ونطبخها إلين تتحمر كل الأوجه .. بعد ما نحمرها نحط المقله كلها في الفرن عشان تكمل طبخ إلين تستوي من داخل .

بعد ما تستوي نطلعها من الفرن ونحط صوص الطماط الأساسي ونطبخه معها شوي بعدين نحط الباستا وزيادة بارمزان و بقدونس .

هذي الطريقة موب الطريقة الوحيدة لكرات اللحم ، فيه آلاف الطرق و الإستخدامات لها.