«

»

مارس 01 2011

الباستا الطازجة .. Fresh Pasta

هلا والله …


تكلمت قبل فترة عن أساسيات طبخ الباستا وعن الفروقات و الأنواع و المكونات في هذا الموضوع . بعدها تكلمت عن الباستا الناشفة وخصائصها وطبخها و إختيارها في هذا الموضوع. يفضل تكونون قارين هذي المواضيع قبل تبدون هنا.


باستا طازه ؟ وش السبب اللي يخلي الواحد يتعب نفسه ويسوي باستا طازه في البيت مع العلم إن السوبرماركت مليان باستا ؟ السبب هو إن الباستا الطازه و الناشفه نوعين مختلفات تماما عن بعض. أسهلكم تعتبرونهم طبقين مختلفات لأن فرق الطعم موب بسيط بينهم. الباستا الطازه لينه وما تكون ألدنتي أبدا زي الباستا الناشفه. غير كذا الباستا الطازه بتشرب الصوص اللي ينحط معها. الباستا الطازه فيها ميزة ثانيه بعد إنها ممكن تتطعم أو تنحشي أو حتى تتسوى بأي سماكه ممكنه بسهولة شديدة.

 


طبخ الباستا الطازجة


طبخ الباستا الطازه ما يختلف كثير عن طبخ الباستا الناشفة العاديه.


نفس الشروط حقت الباستا الناشفة بدون زيت ، قدر كبير  ونستخدم مويه مملحة و نظيفة كثيره. الفرق إننا هنا ما نخلي الباستا على أقوى غليه يكفي نحط المويه على غليه خفيفه عشان لا تتقطع علينا أو تنفك الحشوة لو كانت الباستا محشية.
متى تستوي الباستا الطازه ؟ الباستا الطازه أبدا ما تتقدم وهي ألدنتي !! .. لازم تكون مستويه ولينه . أهم شي ما تطبخونها أكثر من اللازم كونها بتشرب المويه وتصير لينه أكثر من اللازم. نختبر الباستا نفس ما سوينا في الباستا العاديه نذوق حبه ونشوف كيف صارت. في حالات ماراح نحتاج نسلق الباستا في مويه أبدا كونها تكون مطبوخه في صوص كثير زي الكانيلوني مثلا .


الباستا الطازجة تستوي أسرع بكثير من الناشفه كونها مصنوعه من طحين أبيض موب من سميد . فمثلا إذا كانت الباستا الناشفه تاخذ حوالي ٩ – ١٣ دقيقه بتلاقون إن الطازه مدة طبخها ما تتعدى ٣ دقايق في الغالب .


عمل الباستا في البيت


عمل الباستا في البيت يمكن تحسون إنه موضوع صعب وإنه موضوع كبير وياخذ وقت بس هو موضوع تافه و ما ياخذ وقت أو جهد كبير،  الحلو فيه إن المكينة تسوي كل الشغل. اللي يخاف من العجاين لا يخاف هنا، العجينة مهيب من النوع اللي يلصق في كل شي هي أقرب ما تكون زي عجينة صلصال من كونها عجينة خبز.


عجينة الباستا مصنوعه من طحين أبيض متعدد الإستخدامات وبيض. أي شي ثاني هو إضافه. بعض الإيطاليين يستخدمون طحين خاص للباستا مكتوب عليه 00 أو دبل زيرو. هذا طحين قمح عادي بس مطحون أنعم. هو راح يعطي باستا ألين شوي بس موب ضروري أبدا هنا، طحين أبيض متعدد الإستخدامات راح يأدي الغرض وزيادة. البيض راح يعطي الباستا قوة (من البروتين اللي فيه) وبعد ليونة (من الدهن اللي في الصفار) وطبعا لون وطعم. عمل باستا طازه بدون بيض مستحيل !! لا تخافون من الريحة أو غيره لأن مافيه ريحة ! الإضافات ممكن تكون زيت زيتون ( عشان يعطيها ليونه أكثر وطعم)، ملح ، نكهات إضافيه مثل الطماط مثلا أو السبانخ أو حتى حبر الحبار.


فيه أكثر من طريقة عشان نسوي عجينة الباستا. الطريقة الأولى وهي التقليدية، اللي هي إننا نحط الطحين على طاولة المطبخ ونسوي حفرة في النص ونحط البيض و الإضافات فيها. نبدأ نخلط البيض بشوكة ونسند الطحين بيدنا وندخل من الطحين كل شوي إلين تتكون لنا كوره بعدين نبدأ نعجن بيدنا وندخل من الطحين أكثر و أكثر إلين توصل العجينة للقوام المطلوب. هذي الطريقة ممتازة وخصوصا إذا كنا بنسوي كمية كبيره. مشكلة هذي الطريقة هي إنها موب نظيفة زي باقي الطرق وراح توصخ المطبخ بالطحين شوي. هذي الطريقة بتعطي باستا شوي رطبة وراح تحتاج إننا نرشها رش خفيف بطحين و إحنا نفردها و نعجنها.


الطريقة الثانية هي إننا نستخدم العجانة مثل الكينوود و الكيتشن إيد. الطريقة جيده إذا كنتوا بتسوون كمية كبيره.


الطريقة الثالثة هي الطريقة المفضلة بالنسبة لي وهي إننا نستخدم جهاز تحضير الطعام أو خلاط المولينكس. هذي الطريقة جدا مريحة وسهل نصلح أي خطأ يصير لنا. مشكلتها إن حجم الخلاط هو المحدد هنا لو كنا بنسوي كمية كبيره بتكون صعبة شوي بخلاط صغير.


المكونات :


كوب طحين

بيضتين

رشة ملح

ربع ملعقة صغيرة زيت زيتون

* الكمية تسوي باستا تكفي شخصين تقريبا. إذا تبون تزودون ضاعفوا الكمية بنفس النسب.

* هذي الكمية مجرد خط عام تمشون عليه راح نسوي كل شي بالنظر وبتشوفون بعد شوي مستحيل أحد يغلط.


الطريقة :


نحط الطحين و الملح و الزيت في الخلاط المولينكس و نخلطهم ثواني بس.


نخلط البيض في صحن ثاني إلين يصير متجانس. هنا المرحلة اللي نحط النكهات و الإضافات لو نبي ( راح أتكلم عنها تحت بالتفصيل ).


الحين نشغل الخلاط ونبدأ نصب البيض شوي شوي. نصب نص البيض تقريبا. عند هذي المرحلة شكل الخليط بيكون زي البارمزان المبشور.


fresh pasta


الحين نبدأ نصب البيض شوي شوي إلين ما يصير شكل الخليط زي الكسكسي أو كتل كبيره شوي زي كذا :


fresh pasta


إذا وصلنا هذي المرحلة خلاص العجينة جاهزة وما تحتاج أي بيض زيادة موب شرط نستخدم كل البيض اللي خلطنا !. لو زودنا بيض بنلاقي العجينة تجمعت على بعض وصارت كورة بس بنلاقي العجينة رطبة وراح تتعبنا في الفرد كونها بتصير مطاطة أكثر من الازم. لو حصل وزودتوا بيض ووصلتوا مرحلة الكوره سهل، خذوا الكوره وقطعوها قطع كبار بيدكم و رجعوها للخلاط بعدين حطوا عليها ملعقة صغيرة طحين و أخلطوا إلين ترجع لمرحلة الكسكسي بعدين كملوا عادي.


الحين ناخذ العجينة ( اللي بتكون كتل ) ونحطها على طاولة المطبخ ونبدأ نعجنها ونجمعها على بعض إلين تكونلنا كورة ما تلصق. نعجن العجينة تقريبا ٥ دقايق (ما نحتاج طحين هنا) . العجينة هذي قاسية مقارنة بعجاين الخبز و البيتزا وغيرها فلو لقيتوها قاسية شوي لا تستغربون عادي. نغلف العجينة في نايلون ونحطها على طاولة المطبخ ترتاح من نص ساعة إلى ساعة.


باستا طازة


فترة الراحة ضرورية هنا. الهدف منها إنها تخلي الطحين يتشرب المويه اللي في العجينة وهذا ياخذ وقت. غير كذا هي راح تريح الجلوتن ( اللي هو البروتين المسؤول عن قوام الخبز ) وتخليه سهل في الفرد.


fresh pasta


فرد الباستا :


بعد ما ترتاح العجينة لازم نعجنها بعدين نفردها وبعدين نشكلها أو نحشيها حسب ما نبغى.


عشان نفرد الباستا راح نحتاج مكينة فرد حقت الباستا. تقدرون تسوونها بدون مكينة بإستخدام الفرادة حقت العجينة العادية بس نصيحة من عندي لا تسوونها كذا، الفرد للسمك المطلوب شبه مستحيل، صعب جدا نوصل للنحف اللي نقدر نوصله في مكينة الباستا هذا واحد. الشي الثاني هو إنها عملية شوي متعبة عكس المكينة اللي تسهل علينا كل الشغل.


المكاين تجي إما يدوية أو كهربائية. المكاين في الغالب تتثبت بأطراف الطاولة ولها قرص إختيار السماكة. سواء كانت المكينة يدوية أو كهربائية كل الإثنين بيعطون نفس النتيجة. المكينة اللي أنا أستخدم هي إضافة على العجانة وجدا مريحة برأيي. الحلو فيها إنها ماتحتاج تثبيت في الأطراف غير كذا كهربائية بدون ما تحتاج مكينة خاصة بس فيها وبعد فيها ميزة إنها تسمحلي أستخدم يديني الإثنين.


fresh pasta

 

نجي للفرد … نقسم العجينة أول شي عشان يسهل علينا فردها وما تصير طويلة أكثر من اللازم. عالكمية اللي حاط (لشخصين) أقسموها نصين وخذوا نص وغطوا النص الثاني زين عشان ما ينشف. ناخذ العجينة ونضغطها شوي بيدنا عشان يصير سهل تدخل في المكينة.


نحط المكينة على أعرض شي (ونشغلها لو كانت كهربائية أو نحرك العروة لو كانت يدوية) بعدين نبدأ نحط العجينة في الفتحة وناخذها من الطرف الثاني. لا تشدون العجينة وهي تطلع من الجهاز. لو لقيتوا إن العجينة شوي تلصق رشوها بشوي طحين .
الحين خذو العجينة و أطووها بالنص زي الظرف ودخلوها في الجهاز مره ثانيه على نفس العرض، أعرض شي.. هذي العملية تشبه عمليه العجن في العجاين العاديه وهي اللي تعطي العجينة قوتها وقدرتها إنها تنفرد وتصير نحيفه . لو لقيتو إن العجينة صارت عريضه أكثر من اللازم يمديكم تطوونها بالعرض بدال الطول عشان تصلحون العرض . عيدوا هذي العملية على أعرض شي إلين تسمعون صوت فرقعه قويه تقريبا بتحتاجون تعيدونها ٣ – ٦ مرات بالكثير .


fresh pasta

عجن الباستا

 

الحين نغير العرض حق المكينة للعرض اللي بعده ونفردها مره وحده على هذا العرض بس وهذي المره خلاص ! بدون ما نطويها . الحين خلصنا عجن وصار هدفنا هو فرد العجينة بس . نبدأ نفرد العجينة على كل عرض مره وحده إلين نوصل للدرجة اللي نبغاها. لو لقينا العجينة صارت طويلة مرة وصعب نتحكم فيها قصوها و أعجنوا كل جزأ لحاله. السمك المطلوب شي راجعلكم وراجع للصوص اللي بتقدمونة معها.


نقطع ونشكل العجينة هذي بالشكل اللي نبغى بعدين نرجع نعيد نفس العملية من جديد مع باقي العجينة إلين تخلص كلها . الباستا الحين ممكن تقعد على حرارة الغرفه ساعة ساعتين وهي مغطيه بنايلون أو منشفة قبل طبخها أكثر من كذا ممكن تنشف . لو تبون تحفظونها لوقت أطول مالكم إلا الفريزر .


بس هذي عجينة الباستا جدا سهلة ومقاديرها متوفرة وسهلة …


نعيد من جديد …

نخلط المواد في الخلاط إلين نوصل مرحلة البارمزان .. نزيد بيض إلين نوصل مرحلة الكسكسي .. نوقف خلط ونعجن ٥ دقايق … نريح العجينة نص ساعة عالأقل .. نعجنها على أعرض شي إلين نسمع صوت فرقعه .. آخر شي نفردها للسمك اللي نبغى ونشكلها أو نحشيها حسب ما نبغى .. وبس …


تفيير النكهة و اللون :


وحدة من ميزات الباستا الطازة هو إمكانية تغيير نكهتها ولونها بسهولة شديدة عشان تمشي مع الصوص اللي بتقدمونه معه.


* تغيير جزأ من الطحين بنوع طحين ثاني راح يعطي باستا بطعم مختلف تماما. أنواع الطحين اللي ممكن تستخدم كثيرة هنا : الطحين الأسمر ( البر أو النخالة ) ، طحين المكسرات بأنواعها ( لوز ، فستق ، بندق ، جوز ،،،إلخ ) ، طحين الحنطة السوداء buckwheat ، طحين الدخن ، طحين الشعير ، طحين البقوليات حتى مثل الحمص ممكن يستخدم ، وحتى السميد الناعم بعد..


* الخضار الورقية راح تعطي لون ونكهة خفيفة للباستا . سبانخ ، جرجير ، بقدونس ، ريحان ( تخيلوا مثلا سباقيتي مطعمه بريحان مع صوص طماط D-: ) .. إلخ .. أي خضار ورقية ممكن تستخدم هنا. أستخدموا تقريبا ثلث كوب لكل كوب طحين أو حسب الرغبة.


عشان نستخدم الورقيات : نشيل أي جذور أو سيقان قاسية كونها ممكن تخرم الباستا بعدين ،  نسلقها في مويه مملحة تقريبا ٣٠ ثانية بعدين نحطها علطول في حمام ثلج عشان نوقف الطبخ ونثبت اللون. ننشف الخضار زيييين ونعصرها بيدنا ونطلع أكبر كمية مويه منها بعدين نفرمها بسكين شوي ونضيفها عالبيض و إحنا نضيفة للباستا وبس.


* هذي موب بس الطرق الوحيدة إننا نعدل النكهة و اللون. ممن إضافة أكثر من شي على خليط البيض عشان نعطي الباستا طعم خاص. حبر الحبار مثلا ممكن يستخدم عشان يعطي باستا سوداء بنكهة بحرية خفيفة. معجون الطماط ممكن يستخدم عشان يعطي باستا حمراء بنكهة طماط. أي عصير بعد ما ينطبخ شوي ممكن يستخدم بعد ، عصير الجزر المطبوخ إلين يثقل مثلا أو عصير البنجر أو أي عصير ثاني مثل عصير الفلفل الأحمر ممكن يستخدم  .  الزعفران ينخلط مع شوي مويه إلين يقلب لون المويه وبعدين تنحط على البيض .. خيارات تغيير النكهة هنا ما تخلص.


* إستخدام صفار بيض بس في الباستا راح يعطي باستا دسمة أكثر و طرية أكثر و لونها أصفر فاقع. أستخدموا صفارين بيض بدال كل بيضه كاملة.


تشكيل الباستا وحشوها


بعد ما سوينا العجينة وفردناها الحين لازم نقطعها أو نحشيها. تقطيع الباستا ممكن يكون بشكل يدوي بسكين أو بإستخدام القطاعة اللي تجي مع المكينة حقت الفرد وتجي بأشكال كثير زي السباجيتي أو اللينجويني أو الفيتوشيني. لو بتستخدمون القطاعة سهل كأنكم تفردون الباستا دخلوها من الفتحة وشغلوا المكينة وبتطلع مقطعة من الطرف الثاني.


هذي بعض الأشكال حقت الباستا اللي تتسوى باليد مع العلم إن فيه غيرها كثير.


* اللزانيا :


اللي بيذوق لازانيا مصنوعة بباستا طازة أتحداكم إذا رجع للباستا الناشفة. الفرق في الطعم ما ينوصف ! مافيه أي ماركة في السوق تقدر تسوي باستا بنفس النحف زي اللي تسوون في البيت.


اللزانيا ما تحتاج أي تشكيل بس نفرد الباستا على أنحف شي وخلاص. نفردها بعدين نحطها عالجنب شوي تنشف يمكن ١٠ دقايق بعدين نقطعها بسكين مربعات بعرض يدك.


lasagne


lasagna

 

لاحظوا كيف نحيفة !! ..


* البابرديللي Pappardelle :


من أحلى الباستات و ألذها برأيي .. هذي الباستا من مقاطعة إيميليا رومانا في إيطاليا اللي يجي منها أكلات كثير مثل البولونيز صوص مثلا أو اللزانيا البولونيزيه أو أغلب صوصات اللحم تجي من هذي المنطقه وعشان كذا هذي الباستا تمشي مع هذي الأشياء بشكل جدا حلو . الباستا هذي شكلها شرايط عريضه وعشان كذا هي تستحمل إنها تنحط مع صوصات قويه مثل البولونيزي مثلا مع العلم إنها ماتزال لينة . طريقتها جدا سهلة :


نقطع شرايح الباستا حسب طول الباستا اللي نبغى. بعدين ناخذ القطع ونحطها قدامنا بالطول ونرش عليها شوي طحين. بعدين نلفها زي الإسطوانة ونقطعها بعرض الإبهام تقريبا بس بدون ما نضغط بقوة بالسكين عشان ما نلصقها في بعض.


fresh pappardelle

باببارديللي

 

 

نفك الباستا عن بعض ونرش عليها شوي طحين ونخليها عالجنب بعد ما نغطيها بمنشفة أو نايلون إلين يجي وقت الطبخ.



* الكانيلوني Cannelloni :


الكانيلوني باستا إسطوانية محشية. هي تقريبا لازانيا بس ملفوفة بدال ما تكون طبقات. أحيانا يسموون الكانيلوني مانيكوتتي manicotti بس فيه فرق كبييير بينهم وهو إن المانيكوتي مصنوعة من كريب موب من باستا.


عشان نسوي الكانيلوني ناخذ شرايح الباستا ونحطها قدامنا بالعرض (يعني عكس ما سوينا في البابرديللي) . بعدين نقص الباستا بحيث إننا إذا لفيناها ما تتقاطع كثير. آخر شي نحط الحشوة في قمع بدون أي راس ونصب الحشوة على طولها. نلف الباستا بعدين نقطعها أسطوانات بعرض الكف تقريبا.


canneloni

canneloni

 

 

بعد ما نسويها ممكن نخليها في صحن فرن بحيث ندخلها متى ما جهزت أو حتى نفرزها. فيه ناس يسلقون الكانيلوني يعني الباستا لحالها قبل الحشي بس شخصيا أشوف إنه موب ضروري ، الباستا راح تنطبخ في الصوص وكونه ما فيه جنبها باستا ثانيه ما نخاف إنها تلصق زي في اللزانيا مثلا .


* التورتيليني و التورتيلوني Torellini and Tortelloni :


زي ما شرحت في موضوع المقدمة حق الباستا الفرق بينهم هو الحجم بس التورتيليني أصغر من التورتيلوني.


أول شي ناخذ شرايح الباستا اللي سوينا بعدين نقطعها مربعات.


ناخذ مربع باستا وندهن طرفين منه بشوي مويه . بعدين نحط الحشوة في النص ونحط شوي بس ! .


tortellini

 

الحين نقفل الباستا زي المثلث بعد ما ندهن نص بشوي مويه عشان تلصق. نطلع الهواء قدرالإمكان بعدين نلصقها شوي بإننا نضغط الأطراف على بعض.


tortellini

 

الحين عشان نكمل الشكل نسحب الزاويتين حقت المثلث لبعض ونلصقهم بشوي مويه . وبس هذي التورتيلوني .


تورتيليني

* الرافيولي Ravioli :


يمكن أشهر شكل باستا محشية.  ممكن تتسوى بأحجام كبيره أو صغيرة وممكن تكون مربعة أو دائرية.


أسهل طريقة لعملها هي إننا نقطع الباستا مربعات زي ما سوينا في التورتيليني بعدين نحط الحشوة وندهن جهة بمويه ونلصق الوجهين على بعض بعد ما نطلع الهواء. ممكن بعد نقطع الباستا دوائر بقطاعة بعدين نسوي نفس الشي. أو يمديكم تسوونها أسرع و بكميات أكبر بإنكم تاخذون ورقة باستا كاملة وتوزعون الحشوة فيها بعدين تدهنون الوجه الأول وتحطون ورقة باستا ثانية فوقها وتقطعونها. هذي الطريقة ممتازة إذا بتسوون كميات كبيره صغيرة.


* أجنولوتتي Agnolotti :


باستا على شكل نص قمر.


ناخذ شرايح الباستا ونقطع منها دوائر بقطاعة أو اللي ما عندة قطاعة يستخدم علبة تونة أو جبن مفرغة من الطرفين.نحط الحشوة تقريبا في النص وندهن واحد من الأنصاص بشوي مويه.


agnolotti

 

نقفل عليها من الجهة الثانية زين وبس ..


agnolotti

حفظ الباستا


الباستا الطازجة النية ممكن تنحفظ في الثلاجه من يوم إلى يومين تقريبا أكثر من كذا لازم في الفريزر. في الفريزر راح تعيش تقريبا ٣ شهور. عشان نحفظها في الثلاجه نرش شوي طحين عليها ونحطها في صحن ونغطي الصحن بنايلون بعدين نحطه في الثلاجه. إذا جينا نطبخها ما يحتاج نخليها ترجع لحرارة الغرفة نطبخها علطول من الثلاجة.


في حال حبينا نفرز الباستا لازم نضمن إنها ما تلصق كلها في بعض وتصير كتلة ثلج وحدة كبيره بعدين. عشان كذا نفرز الباستا بإننا نحطها في صينية فرن وبعد ما تجمد نحطها في كيس وبكذا نضمن إنها ما تلصق في بعض.


الباستا الطوال زي السباجيتي و البارباديلي وغيرها يفضل تنرش بشوي طحين بعدين تتشكل على شكل أعشاش بعدين تنحط في صينية وتتفرز.


freezing pasta

 

 

إذا جينا نطبخ الباستا من الفريزر ما يحتاج نخليها تذوب نطبخها من الفريزر علطول.

الباستا المطبوخة ممكن تنحفظ في الثلاجه إلى يومين تقريبا. أهم شي نحطها في علبة تتقفل بإحكام ونسخنها مرة وحده بس.


عن الكاتب

Top Chef

24 comments

29 pings

Skip to comment form

  1. غير معروف

    ياشيخ تسلم يدك ,
    احس انك فعلا شغوف بالطبخ ياليت في زيك كثير
    ع الاقل لما تأكل الاكله تكون واثق انها بأفضل طريقه ممكن وتناسب ناس كثير

    عموما انا نفسي انك تنزل طريقة اللزانيا والاسباغتي
    هههههههههههههه بنقلب ايطالين بعدها ~
    معليش ادري الموضوع شوي متعب بالنسبه لك
    بس انا نفسي اسويها بطريقه صحيحه
    ولما اشوف مقاطع اجنبيه ما افهمها تماما يعني .
    ويعطيك العافيه مقدما ~

    1. Top Chef

      الله يسلمك ….

      ممممم شكلك ما قرأتي باقي المواضيع ؟ شوفي الكم موضوع اللي قبل هذا و اللي بعده فيه كذا كذا وصفة تغطي الباستا بأنواعها تقريبا.

  2. limo0o0nah

    أفضل موقع طبخ عربي بصراحه

    1. Top Chef

      شاكرلك من ذوقك أختي …

  3. عبير

    ماشاءالله شيء جميل جدا اذكر شفت الكوكيز اللي عملته نزلته وحدة بمنتدى وكان شكله مغري جدا وناوية اسويه ان شاءالله والبارح كنت ابحث عن الباستا الطازجة وطلعت لي المدونة بصراحة شيء رائع ولمساتك انيقة ومبين نفسك بالطبخ حلو جدا.

    عندي سؤال ناوية اسوي التورتيليني بس ماادري اللحمة مطبوخة ولا لا؟

    وبالتوفيق يارب

    1. Top Chef

      مشكورة أخت عبير هذا من ذوقك.

      التورتيليني محشية كبدة دجاج موب لحم والكبدة مطبوخة طبعا.

  4. Bushra

    مرحباً ، شيف ..
    أنا حابه اسوي الباستا بحشوة القرع
    عندي قرع باقي بعد ما سويت التشيز كيك ..
    وش ممكن اضيف عليه واحشي فيه الباستا
    اذا عندك طريقه شيف .. !

    ما شاء الله الموضوع واضح زي الشمس
    الله يجزاك الف خير و يوفقك يارب ..

    1. Top Chef

      هلا والله …

      فيه موضوع عن حشوه القرع للباستات.

  5. nehad

    هل يمكن تفريز الرافيولي

    1. Top Chef

      أختي كل كل شي موجود في الموضوع كل إسئلتك كانت مجاوب عليها في المواضيع اللي كتبت.

  6. nehad

    موضوع رائع بس لسه بسال برده عن الباستا بدون بيض

    ولي سؤال ما افضل عجانه لان راسي خربت من البحث

    انا حاليا في السعوديه

    انا مش عايزه السعر يزيد عن الف ريال
    ارجو الافاده

    1. Top Chef

      الباستا اللي بدون بيض تكون مصنوعه من سميد وهذي تحتاج مكاين خاصه للإستخراج و العجن. أقري كل مواضيع الباستا وبتفهمين وش أقصد. بس ليش تتعبين نفسك وتسوين باستا سميد في البيت ؟ الطعم ما يفرق مهما سمعتي من ناس أعرفي إن الطعم ما يفرق أبدا أبدا عن الباستا الجاهزه. إذا بتتعبين نفسك وتسوين باستا في البيت سويها بطريقة الطوي يعني باستا بيض وطحين عاديه.

  7. 2011

    واااااااااااو

  8. AB

    ابداااااااااااااااااااااااااااااااااااااااااااع

  9. sos

    شكرآ يَ غآليه مآقصرتي
    الله يحرمَ آيديك من النننآر (F) ..

    1. Top Chef

      آآمين يارب بس تراني ولد

  10. نانو سيتا

    السلام ورحمة الله وبركاته شيف .

    ممكن اعرف ايش الحشوه اللي استخدمتها بحشوة الكانيلوني ؟

    وكيف العجينه تستوي بعد الحشوه معليش ما فهمت عليك زين يعني بعد الحشوه راخ نطبخ الكانيلوني بصوص كثير بقدر عادي ولا نرصه ببايركس ونرش عليه الصوص وينطبخ بالفرن ؟

    1. Top Chef

      الكانيلوني أحشيها ، لفيها ، حطيها بصينية ، حطي الصوص عليها بعدين دخليها الفرن بس ….

  11. slama

    سلام عليكم
    انا اكثر من مره أجرب اطبخ الباستا في البيت “fresh pasta ” وبصراحه شفلها ممتع وراح اجرب اليوم طريقتك وان شاء الله راح تطلع النتايج حلوة اكيد !
    بس ياريت لو تكتب طريقة سلق المكرونة الطازة انا اعرف انها ما تأخذ أكثر من دقيقة وانها لمن تطلع “تطفو” تكون جاهزة بس احيانا لأ ؟ ايش اسوي
    راح اترك سؤال في الASK ME
    وشكرا عن جد للمدونة الرائعة

    1. Top Chef

      وعليكم السلام و الرحمة …

      فيه فقرة كاملة في الموضوع عن طبخ الباستا ؟

  12. نانو سيتا

    السلام عليكم أخوي

    سبحان الله بعد بحث طويل توصلت لنفس النيجه للباستا الطازجه والذ مليون مره من الجاهزه عن جد يستهل التعب عملت رافيولي محشي بالفطر والروبيان وكان طعمه على شهاده اللي ذاقوه لذيذ مع اني ما عمري بحياتي اذوقه .. فحبيت اتاكد من الطعم رحت لمطعم ايطالي وطلبت حسيت نفس اللي سويته بس اللي ذاقوه قالوا اللي سويتيه اطعم بكثير الحمد لله اني عرفت طريق الطازج .
    وان شاء الله راح اوريك مصوره المقطع بالفيديو وان شاء الله ابغاك تشوفي لي ان كان هناك اغلاط .

    1. Top Chef

      وعليكم السلام و الرحمة …

      ألذ أو لأ تعتمد على الطبق اللي بتسوينه .. زي ماقلت هي غير أكثر من كونها ألذ أو أحسن .. بس صح عليك الرافيلولي حقت السوبرماركت من جد أستغفر الله ..

  13. شغف

    ماشاء الله لا إله إلا الله
    موسوعة إيطالية

    “باستا طازه ؟ وش السبب اللي يخلي الواحد يتعب نفسه ويسوي باستا طازه في البيت مع العلم إن السوبرماركت مليان باستا ؟ السبب هو إن الباستا الطازه…………….الخ ”

    ^^
    حسيت هالكلام موجه لي :$

    إن شاء الله برجع للطريقه وادقق فياه دام النيه لازلت موجوده

    قريباً بإذن الله الباستا الطازه بمطبخنا .

    تسلم ماقصرت

    1. Top Chef

      هههههههههه لا والله موب لك لحالك فيه كثييييييييييييير يقولون نففففس الكلام مع العلم إني أشرح و أعيد ليش وليش بس أرجع و ألاقي نففففففس السؤال دايما …

      ننتظر تطبيقاتك ..

  1. البيض .. معلومات تهمك شرح بالصور

    […] قوام ناعم ونكهة ولون لأشياء زي الإسكريم أو لعجاين زي عجاين الباستا ، البيض ممكن بعد يستخدم كمادة مستحلبة ويعطينا آلاف […]

  2. صوص الروزيه ( كريمة الطماطم ) .. Rosée Sauce » Top Chef Blog .. مدونة توب شيف

    […] حشوة البطاطس .. Potato Filling » Top Chef Blog .. مدونة توب شيف على الباستا الطازجة .. Fresh Pasta […]

  3. حشوة البطاطس .. Potato Filling » Top Chef Blog .. مدونة توب شيف

    […] راجوو الغنم .. Lamb Ragù » Top Chef Blog .. مدونة توب شيف على الباستا الطازجة .. Fresh Pasta […]

  4. راجوو الغنم .. Lamb Ragù » Top Chef Blog .. مدونة توب شيف

    […] بارباديللي زي ما شرحت في موضوع الباستا هنا بعدين نطبخها زي ما شرحت في الموضوع […]

  5. صوصات الكريمة .. Cream Sauces » Top Chef Blog .. مدونة توب شيف

    […] الباستا زي ما شرحت في المواضيع هنا […]

  6. راجوو البولونيزي .. Ragù alla Bolognese » Top Chef Blog .. مدونة توب شيف

    […] .. Ricotta and Spinach Filling » Top Chef Blog .. مدونة توب شيف على الباستا الطازجة .. Fresh Pastaحشوة القرع الأمريكي .. Butternut Squash Filling » Top Chef Blog .. مدونة […]

  7. حشوة الريكوتا و السبانخ .. Ricotta and Spinach Filling » Top Chef Blog .. مدونة توب شيف

    […] .. Butternut Squash Filling » Top Chef Blog .. مدونة توب شيف على الباستا الطازجة .. Fresh Pastaصوصات الكريمة .. Cream Sauces » Top Chef Blog .. مدونة توب شيف على […]

  8. حشوة القرع الأمريكي .. Butternut Squash Filling » Top Chef Blog .. مدونة توب شيف

    […] شي نسوي عجينة باستا زي ما شرحت في الموضوع هنا . نسوي رافيولو بإننا نقطع دوائر كبيره من شرايح الباستا […]

  9. صوص البوتتانيسكا .. Puttanesca Sauce » Top Chef Blog .. مدونة توب شيف

    […]   أحدث التعليقاتالباستا الطازجة .. Fresh Pasta » Top Chef Blog .. مدونة توب شيف على مقدمة عن طبخ الباستا ..An Introduction to Pasta Cookingجراتان […]

  10. البيض .. Eggs » Top Chef Blog .. مدونة توب شيف

    […] .. Spaghetti alla Carbonara » Top Chef Blog .. مدونة توب شيف على الباستا الطازجة .. Fresh Pastaراجوو الغنم .. Lamb Ragù » Top Chef Blog .. مدونة توب شيف على […]

  11. سباجيتتي كاربونارا .. Spaghetti alla Carbonara » Top Chef Blog .. مدونة توب شيف

    […] دوكسل الفطر ) .. Mushroom Duxelle » Top Chef Blog .. مدونة توب شيف على الباستا الطازجة .. Fresh Pastaسباجيتي آليو ، أوليو إي بيبيرتشينو ( صوص الزيت و الثوم و […]

  12. حشوة الفطر ( دوكسل الفطر ) .. Mushroom Duxelle » Top Chef Blog .. مدونة توب شيف

    […] ) .. Spaghetti Aglio , Olio e Peperoncino » Top Chef Blog .. مدونة توب شيف على الباستا الطازجة .. Fresh Pastaسباجيتتي كاربونارا .. Spaghetti alla Carbonara » Top Chef Blog .. مدونة […]

  13. سباجيتي آليو ، أوليو إي بيبيرتشينو ( صوص الزيت و الثوم و الفلفل ) .. Spaghetti Aglio , Olio e Peperoncino » Top Chef Blog .. مدونة توب شيف

    […] ونطبخ الباستا. هنا طريقة طبخ الباستا الناشفة ، وهنا الطازة […]

  14. سباجيتتي كاربونارا .. Spaghetti alla Carbonara « مدونة توب شيف … Top Chef

    […] قرآة الوصفة ياليت تقرون مواضيع الباستا هنا وهنا و هنا وموضوع البيض […]

  15. البيض .. Eggs « مدونة توب شيف … Top Chef

    […] قوام ناعم ونكهة ولون لأشياء زي الإسكريم أو لعجاين زي عجاين الباستا ، البيض ممكن بعد يستخدم كمادة مستحلبة ويعطينا آلاف […]

  16. غير معروف

    […] […]

  17. راجوو البولونيزي .. Ragù alla Bolognese « مدونة توب شيف … Top Chef

    […] أو شي زي الريجاتوني أو حتى البيني أو حتى تستخدمونه حشوة للباستات الطازه . طبعا تقدرون تسوون فيه ألذ لزانيا وتقدرون تستخدمونه […]

  18. حشوة الريكوتا و السبانخ .. Ricotta and Spinach Filling « مدونة توب شيف … Top Chef

    […] نسوي عجينة الباستا بكوب طحين زي ما شرحت في موضوع الباستا الطازة هنا. […]

  19. راجوو الغنم .. Lamb Ragù « مدونة توب شيف … Top Chef

    […] بارباديللي زي ما شرحت في موضوع الباستا هنا بعدين نطبخها زي ما شرحت في الموضوع […]

  20. راجوو الأرنب .. Rabbit Ragù « مدونة توب شيف … Top Chef

    […] بارباديللي زي ما شرحت في موضوع الباستا هنا . بعدين نسلقها زي ما شرحت في الموضوع […]

  21. حشوة الفطر ( دوكسل الفطر ) .. Mushroom Duxelle « مدونة توب شيف … Top Chef

    […] عجينة باستا على شكل لازانيا زي ما شرحت في موضوع الباستا الطازه بعدين نقطعها مربعات حسب حجم الرافيولي اللي نبي. الحين […]

  22. حشوة كبدة الدجاج .. Chicken Liver Filling « مدونة توب شيف … Top Chef

    […] المصنوعه بحنطة سوداء buckwheat . تلاقون الطريقة في موضوع الباستا الطازه […]

  23. حشوة البنجر و الريكوتا .. Beet Root and Ricotta Filling « مدونة توب شيف … Top Chef

    […] عجينة الباستا زي ما شرحت في موضوع الباستا هنا وهنا […]

  24. حشوة البطاطس .. Potato Filling « مدونة توب شيف … Top Chef

    […] الكم موضوع الجاي راح أتكلم عن حشوات ممكن تستخدم للباستات الطازجة، كثير من هذي الحشوات ممكن تستخدم كحشوات لأكلات ثانيه […]

  25. صوصات الكريمة .. Cream Sauces « مدونة توب شيف … Top Chef

    […] الباستا زي ما شرحت في المواضيع هنا […]

  26. سباجيتي آليو ، أوليو إي بيبيرتشينو ( صوص الزيت و الثوم و الفلفل ) .. Spaghetti Aglio , Olio e Peperoncino « مدونة توب شيف … Top Chef

    […] ونطبخ الباستا. هنا طريقة طبخ الباستا الناشفة ، وهنا الطازة […]

  27. صوص البوتتانيسكا .. Puttanesca Sauce « مدونة توب شيف … Top Chef

    […] الباستا زي ماشرحت في مواضيع الباستا (هنا و هنا)  بعدين نضيفها للصوص ونقلبها معه مع شوي بارمزان […]

  28. صوص الأرابياتتا .. Arrabiata Sauce « مدونة توب شيف … Top Chef

    […] الباستا زي ما شرحت في مواضيع الباستا (هنا و هنا)  […]

  29. صوص الروزيه ( كريمة الطماطم ) .. Rosée Sauce « مدونة توب شيف … Top Chef

    […] المكرونة زي ماشرحت في مواضيع الباستا ( هنا و هنا ) […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: