«

»

نوفمبر 25 2011

بان بردو (فرينش تواست) .. French Toast

هلا والله …

 

الفرينش توست French Toast أو البان بردو Pain Perdu أو الإيجي بريد Eggy Bread واحد من أشهر أطباق الفطور حولين العالم ، ما فيه مطعم فطور أو بوفيه فطور في أي مكان ما يبيع فرينش توست. أي واحد بيدور فرينش توست في فرنسا أو أغلب دول أوروبا ( ماعدا بريطانيا )غالبا ماراح يلاقيه بهذا الإسم وبيلاقيه بإسمه الأصلي اللي هو بان بردو Pain Perdu واللي تعني الخبز المنسي أو المفقود. الفرينش توست عباره عن شرايح خبز بايت مغمسة في خليط كسترد وبعدين مطبوخه على مقله أو صاج ، ممكن تكون حلوه أو مالحة وممكن تتقدم مع ألاف ألاف الإضافات و الصوصات فوقها. الفرينش توست ( زي بودنج الخبز ) يعتقد غالبا إنه إختراع فرنسي وكان طريقة لإستخدام الخبز البايت وعمل شي مفيد منه.

 

مع العلم إن الفرينش توست أكله منتشرة بشكل كبير إلا إنه للأسف صعب نلاقي فرينش توست زي الناس في أغلب الأماكن. الفرينش توست المثالي برأيي يكون سميك (بحيث إن الإضافات ما تطغى على طعم الفرينش توست نفسه)، شارب كمية كافيه من الكسترد ، متحمر من برا ،عليه طبقة مقرمشة خفيفه بدون ما يكون محروق ويكون مستوي من داخل ما يكون سايل أو رطب و بدون طبعا ما يكون ناشف أو قاسي من داخل. أي شي غير كذا راجعلكم، كمية الإضافات اللي ممكن تنحط عليه جدا كبيره ومحدودة بخيالكم بس.

 

المقادير :

 

خبز يكون مقطع شرايح سمكها على الأقل ١ إنش ومبيتة طول الليل.

نص كوب حليب

نص كوب كريمة (قشطة خفق)

ملعقتين كبار عسل مسخن في الميكروييف ٢٠ ثانيه ( إختياري )

رشة ملح

٣ بيضات

زبدة

 

* الخبز أهم شي في الفرينش توست. أي نوع خبز ممكن يستخدم بشرط يكون سميك وحقيقي. يعني الخبز العربي مثلا ما ينفع عشانه نحيف وخبز التوست الجاهز ما ينفع لأنه مليان إضافات تمنعه ينشف زي الخبز العادي. غير كذا أي خبز ممكن يستخدم سواء كان أبيض ، أسمر ، سادة ، مع إضافات أو بدون ، دسم وثقيل زي البريوش أو خفيف زي الخبز الفرنسي كلها تنفع. مع هذا أحسن أنواع خبز للفرينش توست هي الأنواع اللي معها بيض زي البريوش مثلا كون البيض يخليها تنشف stale أسرع من اللي بدون بيض غير إن نكهتها أفضل، أهم شي لا تستخدمون التوست العادي !!! . بعض أنواع الخبز لها قشر جدا ثقيل و أحيانا بعد الطبخ القشر يصير كأنه قطعه جلد فتقدرون تشيلون القشر عن الخبز لو تبون.

 

* الشي الثاني الضروري هو إن الخبز يكون بايت وناشف قدر الإمكان. نقطع الخبز شرايح سميكة وبعدين نتركه برا الثلاجة طول الليل بدون ما نغطيه عشان يبات وينشف بشكل أفضل. العملية اللي تخلي الخبز – و المعجنات بشكل عام – ينشف ويبات موب عملية تبخر مويه عادية. اللي يصير هو إعادة ترتيب لجزئيات النشا دخل الخبز Starch Retrogradation وهذي العملية تغير كل شي وتغير كيف الخبز يشرب المويه. لهذا السبب ما نقدر نسرع عملية تجفيف وبيات الخبز في الفرن ونطلع بنفس النتيجة. الفرن بينشف الخبز ويبخر المويه منه ، بس الفرن ما راح يغير تركيب النشا في الخبز زي ما الزمن يسوي. الخبز البايت يشرب كمية كسترد كبيره بدون ما يتقطع ويعطينا بعد الطبخ قوام قوي بس في نفس الوقت كريمي وبدون ما يكون مهري ومقطع زي الخبز الجديد.

 

* العسل البارد صعب ينخلط مع السوائل وعشان كذا طلبت نسخن العسل في الميكروييف فترة بسيطة بس عشان يكون أسهل ينخلط مع الكسترد. تقدرون تسوون نفس الشي على النار ، سخنوا العسل إلين يصير قوامه خفيف وسهل الخلط.

 

* العسل هنا للتحلية و النكهة بس هو إختياري تقدرون تتركونه لو بتسوون فرينش توست مالح أو تقدرون تبدلونه بسكر أبيض أو بني أو حتى شراب ميبل maple syrup. لو تبون تقدرون تضيفون أي نكهة تحبونها على الكسترد زي فانيلا ( أعواد أو سايلة أو بودرة ) أو نكهة لوز أو برتقال أو بهارات زي القرفه أو أي شي ثاني.

 

الطريقة :

 

نخلط الكريمة و الحليب و البيض والملح و العسل في صحن خلط إلين يصير متجانس ونغطيه ونحطه في الثلاجه لثاني يوم. هذا الخليط كسترد و الكسترد يتحسن مع الوقت وعشان كذا نتركه في الثلاجه يتعتق. الخليط ممكن يقعد في الثلاجه إلى يومين بدون أي مشاكل. في حال كنا مستعجلين نقدر نسوي الخليط قبل الطبخ علطول بس ماراح يكون نفس الشي.

 

وقت الطبخ نشغل الفرن على ٣٧٥.

 

الحين نصب الكسترد في صحن مسطح وبعدين نغمس الخبز البايت في الكسترد ٣٠ ثانيه تقريبا لكل وجه. نشيل الكسترد ونحطه على شبك تبريد دقيقتين تقريبا عشان يتشرب الكسترد.

 

فرينش توست

 

نسخن مقله تيفال على حرارة وسط مع شوي زبده بعد ما تذوب الزبده وتبدأ تطلع رغوة نحط الفرينش توست ونطبخه إلين يتحمر الوجه الأول بس ، بعد ما يتحمر الوجه الأول نقلبه ونحمر الوجه الثاني. الحين نشيل الفرينش توست ونحطه على شبك الفرن مباشره ونخليه يكمل طبخ داخل الفرن ٥ دقايق زيادة. كثير وصفات تطلب طبخ الفرينش توست على المقله بس وهذا شوي صعب وغالبا يا نطلع بفرينش توست وجهة محروق أو ما أستوى تماما من داخل.

 

french toast

أمثلة لوصفات فرينش توست

ANY CHARACTER HERE

خيارات الإضافات اللي على الفرينش توست جدا كبيره زي ما ذكرت قبل.  تقدرون تاكلونه لحاله أو تقدرون تضيفون عليه أشياء زي سكر بودره ، مربى ، عسل ، شيره ميبل maple syrup ، فواكه ، فواكه مطبوخة أو مكرملة ، بيكون ، بيض ، مرتديلا و بسطرمة وأي لحوم مملحة ثانيه ، كريمة مخفوقه ، إسكريم أو سوربيه ، صوص كاراميل ، نوتيلا ، مكسرات ، أجبان … إلخ إلخ إلخ

ANY CHARACTER HERE

الإضافات هذي مجرد أمثلة لإضافات جربتها و حبيتها بس أنصحكم تجربونها ولو مره.

ANY CHARACTER HERE

* فرينش توست بالنوتيلا و الموز : الموز و النوتيلا رهيبين مع بعض ومستحيل ما يعجبون أحد. أهم شي تستخدمون موز مستوي ومنقط.

ANY CHARACTER HERE

* فرينش توست الفواكه : مافيه أبسط من كذا ، فواكه مشكله فوق الفرينش توست مع شوي شيره ميبل أو سكر مطحون.

ANY CHARACTER HERE

* فرينش توست التفاح و التشدر مع الميبل الحار : التشيدر و التفاح و الميبل رهيبين مع بعض. اللي نسويه هنا هو إننا نجيب تفاح ونقطعه شرايح جدا جدا نحيفه ونرصه فوق الفرينش توست وبعدين نرش شوي جبن تشدر على التفاح. قبل التقديم بلحظات نسخن شوي ميبل سيرب maple syrup إلين تبدأ تغلي بقوه وبعدين نصبها على التشدر وهي حاره، الميبل الحار بيذوب التشدر ويطبخ التفاح شوي ويعطي طعم رهيب غير إنه حلو في التقديم عند الناس. نفس الحركة ممكن تستخدم بالكمثرى وبأنواع جبن ثانيه زي الكومتي Comte و الجرويير Gruyere.

ANY CHARACTER HERE

فرينش توست

فرينش توست

pain perdu

ميبل حار مع تفاح وتشدر

warm maple and cheddar

* ساندوتش الفرينش توست بالبينت بتر و الموز : ناخذ قطعتين خبز هنا وندهن بينهم بينت بتر و نرص فوقها قطع موز مستوي مره وبعدها نكمل عادي كأننا نسوي أي فرينش توست ، نغطسة في الكسترد وبعدها نطبخة وبعدها عالفرن إلين يستوي. في هذي الوصفه أحب أستخدم خبز جوز إذا توفر.

ANY CHARACTER HERE


french toast sandwhich

ساندوتش الفرينش توست

peanut butter french toast sandwhich

Follow TopChefCooks on Twitter

عن الكاتب

Top Chef

45 comments

3 pings

Skip to comment form

  1. Ray

    شكرا على الأشياء الجيدة

  2. فاطمة

    يعطيك العافية … أصبحت مرجعي في عالم الطبخ .أنا أحب أسوي الحاجة على إصولها في الأول بعدين أغير حسب ذوقي

    1. Top Chef

      وبالضبط هذا الصح اعرفي الاصل بعدين سويه على راحتك

      1. فاطمة

        حاولت أسوي البراونيز كذا مرة وما ضبط , وجربت طريقتك وضبطت معاي من أول مرة . طلع روووووووعة أحلى من حق المطاعم والكوفي الي عندنا في السعودية

        1. Top Chef

          بالعافية على قلبك ….

  3. ريما

    وهل يمكن اعطائي طريقة الطحينيه

    1. Top Chef

      الطحينيه قصدك الحلاوه الطحينيه ؟ ما أعرفلها طريقة الصراحة ، اللي أعرفه إن يبيلها شوي طبخ سكر وكذا يعني فيها شوي تعقيد.

  4. ريما

    هل يمكن اعطئي طريقة مقبلات فرنسيه

    1. Top Chef

      خبز فرنسي وزبدة ….

      حددي بالضبط … أنتي قاعدة تتكلمين عن عالم كبير موب طبق أو إثثنين …

  5. غير معروف

    ليش ماتكتب وصفات خبز نان – شباتي -باراتا ؟؟ ..

    1. Top Chef

      لو دورتي بتلاقين النان بالصور …

  6. smh2

    ممكن اعرف وين تعلمت الطبخ؟؟

    1. Top Chef

      هنا كل شي :
      http://topchefcooks.com/about-me/

  7. غير معروف

    من فين

  8. qbo0ola

    عجبتني طريقتك جدا … ماعليك امر شيف تحط لي اسم افضل ماركة قشطة خفق ؟؟؟ويعطيك الف عافيه

    1. Top Chef

      اي شي موب موب نباتي ولا طويل الاجل

  9. غير معروف

    من فين اجيب زي هذا الخبز في جدة ؟

    1. Top Chef

      اي مخبر اوروبي زي الفرن او بول او حتى في السوبرماركتات زي الدانوب وغيرها

  10. غير معروف

    اعجبني كتابتك لإدق التفاصيل وايضاح التركيب الكيميائي للمواد مثل النشا اللي بالخبز :)
    هذا يدعو مجال لأبتكار بالطبخ وفهم ماذا نصنع..

    اللي اريده طريقة منزلية لخبز البريوش او أي خبز فرنسي يصلح للفرنش توست إن كان ممكن ..وشكرا .

    1. Top Chef

      طريقة البريوش موجودة في صفحة الوصفات بس بشكل عام الخبز و المعجنات موضوعها طويل ولا أبغى أدخل فيها بالتفاصيل الحين الصراحة.

  11. fofo-tvxq 4ever♥ (@Falcon_jap)

    آممممممم شكلها مرررة لذيذ
    من زماان كنت ادور عنها بسس ماكنت اذكر اسسمها
    .. سسؤآل بسيط
    يصصلح تحط بدل الخبز كيك ؟؟
    وتسلم يديآتكك

    1. Top Chef

      يصلح أكيد بس يفضل كيك قديم ويكون كيك ثقيل يعني شي زي باوند كيك يستحمل الحركه.

  12. غير معروف

    مشكوووور والله يعطيك العافيه

    gooood thenksss

  13. نهاد

    المدونه حقيقي تحفه
    ومعلومات مفيده اوي
    مشكووووووووووووووووور

  14. bshaier

    ماشاء الله كل مواضيعك روعة وتفتح النفس وجالسة احفظ المواضيع بملفات وورد للرجوع اليها
    يعطيك العافية اخوي والله يجازيك خير الجزاء

  15. غير معروف

    روعه روعه جربتها بخبز انا سويته صحيح فرق بالطعم عن توست السوبرماركت وكنت دايم استغرب منك اذا قلت خبز حقيقي واقول في نفسي وش قصة الخبز الحقيقي وبعد ما خبزت التوست في البيت اكتشفت السر تسلم اخوي عموما عندي سؤال برى الموضوع بس مادري وين احطه واعتذر عن جهلي ابغى طريقه ل بلح الشام تخليه مقرمش من برى كل الوصفات اللي جربتها يطلع معاي ذايب واذا حطيته فالشيرة يتفلطح و تروح النفخه مدري وش السبب

    1. Top Chef

      بلح الشام عباره عن عجينة شو مقليه بس مافيها سر ولا شي. أهم شي تقلينها صح وتقلينها وقت كافي بحيث تستوي من داخل وتتبخر المويه الزايدة اللي فيها كونها هي اللي تخليها تصير لينه. الأسئلة اللي مالها علاقه بالموضوع حق التعليق ياليت تحطينه في صفحة الآسك مي عشان يشوفها أقبر عدد من الناس.

  16. الاوتار

    مشكور اخوي على الوصفة هذاني شريت خبز فرنسي وقريب اسويه ان شاء الله اذا ظبته ابجرب المره الجاية اخلط مع الكاسترد عصير برتقال الله يعين اهلي

    1. Top Chef

      إذا تبي نكهة برتقال في الخليط حط قشر برتقال دايما ، طبعا بدون الجزأ الأبيض المرق اللي لاصق عليه. العصير مافيه نكهة قويه وبتضطر تحط كمية كبيره عشان يبان طعمه وهذا بيخرب النسب حقت الكسترد. دايما خذها قاعده في كل الحمضيات ، إذا تبي النكهة تاخذ القشر و إذا تبي الحموضه و المويه تاخذ العصير.

  17. نور

    شيف عجييييبه عجييييبه سويتها اليوم حق اهلي ينو عليها
    و قدمتها مع جناش سايل
    بس المشكله انه كميه الجناش كانت وااايد شسوي بالباقي ؟
    اقدر احفظه بالفريزر ؟
    و يعطيك العافيه

    1. Top Chef

      بالعافية على قلبك.

      الجاناش شوفي موضوع الجاناش

  18. غير معروف

    مشكور شيف على الوصفة ..
    جربتها بخبز تركي (يشبه الفرنسي) وكانت لذيذه بجد
    جربت مقترحاتك التفاح بالتشيدر والبينت بتر بالموز والسكر
    كلها كانت لذيذة
    إن شاء الله بجرب موالح فيها
    إذا ممكن سؤال عن الكاسترد : كم يوم ممكن يبقى في الثلاجة قبل لايخرب؟

    يعطيك العافية

    1. Top Chef

      بالعافية على قلبك ..

      الكسترد كتبت كم يعيش في الثلاجه في الموضوع.

  19. غير معروف

    ممكن اعمل الفرينش توست ببريوش معمل في المنزل ؟؟؟ (البريوش معمول في قالب التوست الكبير وجاي شكله مثل التوست )
    لاني احسه مليان زبده فهل راح يعطينا نتيجه كويسه ؟؟

    1. Top Chef

      أكيد تقدرين ونص بعد بالعكس بيكون رهيب هنا وطريقة حلوه تستخدمينه بعد ما يقدم. أي أي أي أي خبز ينفع بشرط يتحقق فيه الشروط اللي حطيت. خبز البيت ما يعتبر أقل من الخبز اللي برا بأي شكل من الأشكال طبعا لو أتسوى صح.

      1. غير معروف

        كويس … يعطيك العافيه ..
        اللى خلاني اسالك اللى اعرفه انوا ي اي نوع خبز يمشي طري طازج قديم عادي … مره اشتريت خبز فرنسي اللى يجي قاسي مره لاني سمعت ان فيه زيه بس طري .. المهم انى لماسويته صار جدا سي زي ماقلت طلعت الاطراف كانها بلاستيك !!!

        1. Top Chef

          يوم أقول خبز قاسي أقصد إنه بايت وناشف ما كنت أقصد قوام الخبز وهو جديد، حتى ألين خبز بينشف ويقسى بعد فترة وهذا اللي نبيه، الخبز الجديد يسوي فرينش توست سيء. اللي يخلي الأطراف قاسيه هو القشر حق الخبز شيليه قبل الطبخ وخلاص.

  20. غير معروف

    حلوة طريقتك لكن دايم افضله مالح . خصوصا مع كوب حليب

    1. Top Chef

      الطريقة تمشي مالح أو حلو

  21. ظل الشفق

    الفطور عندي شيء مقدس!!
    الله يخليك كثر دائما من وجبات الفطور
    وهذا الفطور مسويته يعني مسويته وإنشاء الله انزل صورته هنا- إنشاء الله على الاسبوع الجاي عشان الدوامات ^^”
    توصيفك دقيق وواضح ..شكرا جدا على كل شيء

  22. الخُزامى

    يعطيك العافيه ,,

    شرح وافي جدًا ,,ياليت تعطينا أمثله عللى وصفات مالحه ..

    :

    1. Top Chef

      الأمثلة كثييييييرة والله بس ماعندي صور، إذا صورت أي شي بضيفه بعدين إن شاء الله.

  23. غير معروف

    ماشاء الله تبارك الله
    اول مرة اعرف انو بعد ماينطبخ في المقلاة ينحط في الفرن
    لاتستغرب ترى مافي احد يعطي معلومات مع الوصفة
    هذة المدونة كنز
    الله يعطيك العافية 

    1. Top Chef

      لا لا موب ضروري هي طريقة أفضل بس

  24. noor

    وااااااااااااااااااو ماشاء الله فعلا رائع
    شرح مفصل جدا لذيد ومتقن الله يعطيك العافية
    وجزاك الله كل خير

  1. مارون جلاسيه .. Marron glacé | المطبخ الجزائري العربي - tabakh l Cuisine Algérienne

    […] أو عسل للحلويات ، صبوها على البانكيك أو الوافل أو الفرينش توست ، سووا فيها سوربيه أو حتى أستخدموها كتغير عن الشيره […]

  2. مارون جلاسيه .. Marron glacé » Top Chef Blog .. مدونة توب شيف

    […] « بان بردو (فرينش تواست) .. French Toast […]

  3. مارون جلاسيه .. Marron glacé « مدونة توب شيف … Top Chef

    […] أو عسل للحلويات ، صبوها على البانكيك أو الوافل أو الفرينش توست ، سووا فيها سوربيه أو حتى أستخدموها كتغير عن الشيره […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: