ساندوتش البيبروني و البيض و الجرجير .. Egg , Pepproni and Arugla Sandwich

هلا والله …

.

هذي وصفة واحد من ألذ الساندوتشات عندي. الوصفة جدا سهلة وجدا جدا لذيذة ، بيبروني مقرمش مع طماط وجرجير وبيض مسلوق في ساندوتش كروسان ما أظن فيه أبسط وأفضل من كذا. المقادير اللي تحت لساندوتش واحد بحبة كروسان كبيرة بس ممكن تضاعفون المقادير حسب الحاجة.

.

المقادير :

.

تقريبا ١٠ شرايح بيبرويني جدا نحيفة

طماط مقطع شرايح نحيفة

بيضة مسلوقة كاملة مقطعة شرايح نحيفة

 شوي ورق جرجير (أو خس)

مايونيز (يفضل مايونيز بيتي لو تعرفون تسوون)

حبة كروسان من نوعية ممتازة

.

* البيبروني للي ما يعرفة هو نوع من أنواع السجق أو النقانق. هو بإختصار عبارة عن لحم وشحم مفرومين (موب كبدة وجلد ومصارين زي ما يقول ناس كثير) ، مملحة ، مبهرة ،  مدخنة ومعتقة أو مجففة. البيبروني لحم مطبوخ وممكن ينوكل  علطول ما يحتاج أي طبخ زيادة بس الطبخ يغير فيه شوي ويخليه يقرمش وهذا سبب حب أغلب الناس له. البيبروني منتشر وموجود في أي أي سوبرماركت في السعودية في نفس القسم اللي يبيعون المرتديلا و السلامي وهذي الأشياء.

.

* فكرة ناس كثير عن الكروسان مغلوطة ! الكروسان موب فطاير على شكل هلال ! الكروسان عجينة معقدة مصنوعة من طبقات من الزبدة و العجين تقريبا أقرب مالها البف بيستري وليس عجينة العشر دقايق وغيرها من الخرابيط ! أشتروا كروسان جيد لهذي الوصفة ، كروسان يكون بالزبدة موب بالمارجرين أو بدائل الزبدة زي كثير من الأنواع الأرخص. تلاقون كروسان جيد في أي مخبز ممتاز زي محلات بول Paul وغيرها. إذا ما توفر تقدرون تسوون الساندوتش بأي خبز ثاني تحبونه بس الكروسان يعطيه شي زيادة.

.

الطريقة :

.
نشغل الفرن على ٤٠٠

.

نرص البيبروني في صينية فرن بعدين نرشه بشوي زيت زيتون وندخله الفرن. نخلي البيبروني في الفرن إلين يتحمر ويبدأ يصير يقرمش (بيصير يقرمش أكثر إذا برد) من ١٠-١٥ دقيقة تقريبا.

.

Pepproni in Oven.

نشيل البيبروني من الصينية وننزل حرارة الفرن ل ٣٥٠.

.

نقسم الكروسان بالنص بشكل أفقي ونحطه في نفس الصينية اللي حمرنا فيها البيبروني (الوجه المقطوع على تحت). نمسح الزيت الباقي في الصينية في الكروسان.

.

ندخل الصينية بالكروسان عليها للفرن ونخليه إلين يتحمر من تحت شوي.

.

Toasting Croissant.

كروسان محمص.

الحين نبدأ نركب الساندوتش : ندهن الكروسان عالوجهين بالمايونيز بعدين نحط البيبروني وبعدين البيض وبعدين شرايح الطماط وآخر شي الجرجير ، نقفل الكروسان وبعدين نثبته( لو حبيتوا) بعود أسنان.

.

Croissant Sandwich.

Croissant sandwich.

ساندوتش البيبروني و البيض.

Follow TopChefCooks on Twitter

39 comments

1 ping

Skip to comment form

  1. خساره توقعت ألاقب في المدونه وصفات سادوشز اكثر
    ياليت تحط وصفات زياده

    1. أحط وصفات منوعة غالبا لشرح تكنيك طبخ أكثر من وصفة لمجرد وصفة.

    • ام ريم on 31 مايو, 2014 at 12:14 ص
    • رد

    يعطيك العافية جربت الساندويتش و كان جداً لذيذ
    مشكور

    1. عليك بالعافية ….

    • Raja on 14 يناير, 2014 at 8:27 ص
    • رد

    ممكن اعرف احسن نوع ببروني ابي نوع يكون لذيذ مثل حق دومينوز

    1. أشتري كم نوع وذوقي وأختاري اللي يعجبك أكثر.

    • nano.M on 28 أغسطس, 2013 at 10:26 م
    • رد

    راح انتظر مواضيعك عن الكروسون ..
    وابد ماهي بمشكله راح اتعلم معاك وباذن الله اضبطه واكون تلميذه جيده ..

    • Rami on 26 أغسطس, 2013 at 10:50 م
    • رد

    يعطيك العافية شيف
    بيصير بدل الفرن استخدم الجرل يعني اقدر احمص الخبز على الجرل وكمان اقدر اطبخ البيبروني على الجرل كمان على ما اضن ولا انت شو رأيك؟

    1. الله يعافيك.

      الخبز ممكن بس طبخ البيبروني شوي صعب بسبب الحرارة العالية ونحف القطع فصعب تتعامل معها هنا. ممكن تحط مقله فوق الجريل وتخلي الجريل مصدر حرارة زي الغاز وكذا تحل المشكلة.

    • nano.M on 25 أغسطس, 2013 at 11:36 م
    • رد

    يم يمي ..كل وصفاتك ماشاء الله ..
    عندي طلب صغنون بس متعب , ياليت لو سمحت تحط طريقة الكروسان ربي يبارك لك بوقتك.. مره اكلته بفندق بتركيا ويااااااالله ,
    ومن يومها وانا اجرب واشتري ومالقيت زيه ,
    ولازلت اذا تذكرته يوجعني فكي ويسيل لعابي من لذاذته..

    1. عليك بالعافية.

      الكروسان واحد من أصعب أصعب العجاين اللي الواحد يسويها ، ميب سهلة أبدا ، قبل ما تسوينها لازم تفهمين الخبز وخطوات عمله قبل تبدين بالكروسان. بإذن الله بيكون له مواضيع هنا في المدونة بس موب في الوقت القريب الصراحة.

    • اروى on 24 أبريل, 2013 at 1:01 ص
    • رد

    اشكرك شيف .. هذي من أروع الساندويتشات اللي ذقتها بحياتي ..
    سويتها بكرواسون ومرة بساندويتش بعد ماقسمته وحمرته .. ومرة بخبز صاج منزلي .. كل مرة اتلذذ وانا اكله ..
    جزاك الله خير ..

    1. بالعافية على قلبك …

    • ابرار on 9 نوفمبر, 2012 at 12:46 ص
    • رد

    طيب لو كان بيض مقلي ينفع؟

    1. طعم مختلف بس ينفع أكيد ليش لأ …

    • غير معروف on 29 أكتوبر, 2012 at 4:53 ص
    • رد

    وين ألاقي الكروسان الجيد في جده اشكرك على طبخاتك

    1. paul

    • غير معروف on 25 سبتمبر, 2012 at 12:26 ص
    • رد

    رائع اهنيك

    • غير معروف on 22 سبتمبر, 2012 at 7:02 ص
    • رد

    الله يديم النعمه بس انا مااحبك ..

    1. ههههه والله شكلك صدق صدق تكرهيني أنا أعرف اللي يكره أحد عالنت يقفل الصفحة بس إنك تقرين الموضوع بعدين تردين وتكتبين كذا ياساتر وش مسويلك هههههه

    • bent el deera on 8 سبتمبر, 2012 at 12:22 م
    • رد

    تسلم الايادي
    صراحه ساندويش فاخر … باذن واحد احد بطبقه اليوم ولا بكره
    اعترف لك اني ما احب البيض وما اكله الا مضطره بس لمن شفت الشكل النهائي ما قاومت

    1. الله يسلمك …

      البيض لذيذ الناس مدري ليش يبعدون عنه ؟ بالعافية مقدما …

      1. الله يعافيك ويكافيك من كل شر .. امس تشجعت و سويتها على العشا والحمدالله تبارك الله خلصت ونمسحت حتى فتافيت الكرواسون من الصحون
        مشكور جدا
        بالنسبه للبيض _ ويمكن تضحك علي _ ما افضله عشان قوامه لاهو يابس ولا لين

          • Top Chef on 13 سبتمبر, 2012 at 2:00 م
            Author

          بالعافية …

          هذا قوام البيض الطبيعي كذا ؟ اذا ما تحبين البيض هذا موضوع ثاني

    • غير معروف on 6 سبتمبر, 2012 at 6:04 م
    • رد

    يمي يمي ..
    شكلها لذيذه تسلم يداك يارب .

    • غير معروف on 3 سبتمبر, 2012 at 12:45 م
    • رد

    سويته ع الفطور اليوم طلع لذييذ:)
    بس البيبروني الي عندي ماكان نحيف مرة وبعد ماسويته طلع يشد شويا مو مقرمش ممكن بسبب سماكته؟

    1. لو كان سميك مررره صعب شوي يقرمش بس فرق سماكه بسيط ماراح يسوي هذي المشكلة الظاهر كان يحتاج وقت أطول شوي في الفرن…. أنسي الوقت وأطبخيه عالشكل و الطعم إلين يصير زي ماقلت شوي يقرمش بعدين طلعية. دايما ذوقي أكلك في كل المراحل عشان تعرفين وين أنتي بالضبط …

    • غير معروف on 3 سبتمبر, 2012 at 8:49 ص
    • رد

    روعه من جد الكروسان جدا لذيذ لمن ذقته برا هش ومقرمش وفيه طعم زبده ومع المربى يييمييي بس لمن دورته هنا ييكون مزيت بزياده او بعجينة فطاير وشفت طريقة عمله في النت جدا متعبه

    1. عشان كذا طلبت بالتحديد كروسان جيد.

    • غير معروف on 3 سبتمبر, 2012 at 2:55 ص
    • رد

    الله يسلموا ياشيف وياريت تكثر من وصفات الساندويتشات

    1. هههه والله كل واحد يقول ياليت تكثر من وصفات شي غير …. عموما ما أحب أركز على شي أحب التنويع في كل الوصفات الهدف من الوصفة هذي هي تطبيق على سلق البيض لا أكثر …

    • الاوتار on 3 سبتمبر, 2012 at 2:10 ص
    • رد

    مشكور على الوصفة الرائعة

    • لمياء on 3 سبتمبر, 2012 at 1:25 ص
    • رد

    يمييييي شكله شهي والاروع مشبع وغني ينفع حق زنقات الاكل اللي ماتدري وش تطبخ فيها.

    • أسماء on 2 سبتمبر, 2012 at 11:57 م
    • رد

    رائع .. لكن هل شرائح اللحم المقدد المقلية (البيكون) تنفع بدل البيبروني.

    1. اكيد بس شوي غير

  2. آلله ششششكلها يجنن ,, كل المكونات المحببة لي فيها
    انشالله راح اجربها

    • NeeMo on 2 سبتمبر, 2012 at 9:31 م
    • رد

    I want some );

    • غير معروف on 2 سبتمبر, 2012 at 9:20 م
    • رد

    يممممي..شكلها لذيذ يعطبك العافيه

  1. […] الوصفه الاصليه بهاللينك […]

اترك تعليقاً

لن ينشر بريدك الإلكتروني.

%d مدونون معجبون بهذه: