«

»

مارس 23 2011

حشوة القرع الأمريكي .. Butternut Squash Filling

هلا والله ..

 

القرع أشوف إنه واحد من ألذ الخضروات اللي الناس ظالمينها دايما. أغلب الناس ما جرب القرع إلا مطبوخ بطريقة وحده بس اللي هي السلق وغالبا يجي لين أو بالأصح منهري تماما وحلو أكثر من اللازم هذا غير إنه دايما دايما يكون شي في الخلفية بس. بس القرع موب كذا أبدا ، هو مكون جدا لذيذ و مرن جدا في الإستخدام وممكن ينطبخ بكل طرق الطبخ المعروفه (قلي ، شوي ، سلق ، بالبخار ، بالزيت ، بالفرن ) وممكن ندخله على أكلات كثير ومتنوعة سواء كانت مالحة أو حلوة.

 

حشوة القرع في الباستا هي يمكن ألذ حشوة باستا طازه بالنسبة لي و أنصحكم تجربونها ولو مرة وحده بس. القرع هنا بنشويه في الفرن إلين يتركز طعم القرع ويتكرمل جزأ من السكر اللي فيه بعدين بنسوي فيه حشوة وبنحشي باستا فيه . الباستا بعدين تتقدم مع صوص زبده وهذا اللي يسوي كل الفرق، خليط القرع الحلو مكسور بالدسم في الزبده يعطي طعم رهيب.

 

المكونات :

 

حبة قرع أمريكي مقسومة بالنص بالطول. أو تقدرون تستخدمون قرع عادي أو حتى بطاطس حلوه.

زيت زيتون

ملح وفلفل

جوزة طيب

رشة قرفة

رشة يانسون

رشة فلفل حار

 

 

الطريقة :

 

نسخن الفرن على ٤٢٥ وندهن صينية فرن بشوي زيت زيتون.

 

نرش شوي ملح وفلفل أسود وفلفل حار و يانسون و قرفة و جوزة طيب على القرع بعدين نحطه على صينية الفرن ونخلي الوجه المقطول تحت. ندخله الفرن إلين يصير القرع لين مره تقريبا نص ساعة إلى ساعة إلا ربع. بعد ما يستوي نشيله من الفرن ونخليه يبرد.

 

تشيز كيك

 

الحين نشيل القرع بملعقة ( بيطلع بسهولة ) ونحطه في خلاط مولينكس ونخلط إلين يصير خليط ناعم . نذوق الخليط ونعدل الطعم حسب الرغبة .

 

تشيز كيك قرع

 

بس هذي الحشوة .

 

 

رافيولو مع بيضه في الداخل مع صوص زبدة الميرامية .. Uova de Raviolo with Sage Butter Sauce :

 

 

هنا بسوي رافيولو اللي هي عبارة عن رافيولي بس كبيره وبحشيها حشوة القرع و صفار بيضه وبقدمها مع صوص زبدة الميرامية . البيضه بتنطبخ شوي في السلق بس بتكون سايلة و إذا قطعنا الرافيولي بتسيح في الصحن. حبة وحدة تكفي لكل شخص هنا لأن هذا الطبق جدا دسم بس لذيذ لذيذ بشكل محد يتصوره.

 

في حال فكرة البيضه ما أعجبتكم هي خطوة إضافيه بس أبدا موب لازم تحطونها و شكل الباستا بعد أي شكل ممكن يستخدم موب شرط أبدا رافيولي .

 

 

أول شي نسوي عجينة باستا زي ما شرحت في الموضوع هنا . نسوي رافيولو بإننا نقطع دوائر كبيره من شرايح الباستا ، الحين نحط شوي من حشوة القرع ونسوي زي الحفره في داخل الحشوة ، ناخذ صفار بيضه صغير (بيضة سمان لو أمكن) ونحطه في الحفرة هذي بعدين نقفل الرافيولو بدائرة باستا ثانيه ، أهم شي هنا إنكم تنتبهون إنكم ما تكسرون الصفار و أنتم تقفلون الباستا.

 

الحين نطبخ الباستا زي ما شرحت في الموضوع هنا . و إحنا نطبخ الباستا نسوي الصوص بإننا نذوب زبدة مع شوي أوراق ميرامية لو عندكم . نشيل الباستا من المويه ونحطها في الصوص ونرش بارمزان عالوجه ونقدمها ..

 

صوص زبدة

 

pasta eggs

 

باستا بيض


 


 


 


عن الكاتب

Top Chef

3 comments

  1. Bushra

    شكراً شيف ،
    يعطيك الف عافيه على الوصفة
    الله يجزاك خير

  2. غير معروف

    يسلمووووووووو

    الله يعطيك العافية ويبارك بعمرك وعلمك ويردك سالم وغانم لاهلك ويقرعين والديك بشوفتك يا رب

    1. Top Chef

      الله يسلمك …

      آآمين يارب الله يسمع منك . ومشكوره على مرورك دايما

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: