صوص الأرابياتتا .. Arrabiata Sauce

هلا والله …

الأرابياتتا تفرع ثاني مشهور من صوص الطماط الأساسي. موجود هنا .

الأرابياتتا ترجمتها تقريبا صلصة الشيطان أو الصلصة المعصبة ههه. هذا الصوص أرتبط عند الناس بالباستا مع العلم إنه صوص عام لكل شي جربوه مع البيض ، السمك ، الأكل البحري  ، الدجاج ، البقر ، الغنم ، العجل ، الخضار مثل الباذنجان و الكوسا وغيرها ،  أو حتى صوص بيتزا. الصوص عبارة عن صوص طماط أساسي بس حار وفيه ثوم أكثر.

الطريقة :

نسخن شوي زيت زيتون بعدين نحط شوي فلفل أحمر مجروش حسب الرغبة و ثوم ( بعد حسب الرغبة ) ، نطبخ الثوم شوي بعدين نزيد عليها من صوص الطماط الأساسي حسب الرغبة و نطبخها شوي ..

أمثلة :

بينني أرابياتتا Penne Arrabiata :

نص كيلو مكرونة بيني ، طازه أو ناشفة. أو أي شكل ثاني يمشي.
٤ أكواب صوص طماط أساسي

فصين ثوم مقطعه صغار

ملعقتين صغار فلفل أحمر مجروش

زيت زيتون

جبن بارمزان ( يفضل بارميجانو ريجانو ) أو رومانو

بقدونس مفروم أو ريحان طازج حسب الرغبة

نطبخ الباستا زي ما شرحت في مواضيع الباستا (هنا و هنا)  .

و الباستا تطبخ نسوي الصوص بإننا نسخن الزيت بعدين نحط الثوم و الفلفل الحار ونطبخهم شوي إلين تطلع ريحة الثوم بعدين نحط صوص الطماط ونطبخة معهم . آخر شي نصفي الباستا ونضيفها عالصوص ونزيد بارمزان أو رومانو و بقدونس أو ريحان مع رشة زيت زيتون ..

هاش الشمر و الدجاج مع صوص الأرابياتتا .. Fennel and Chicken Hash with Arrabiata Sauce :

الهاش أسهل شي في العالم و الحلو فيه إنه ماله وصفه حطوا فيه أي شي باقي في الثلاجة. غالبا بتلاقون معه بطاطس وبصل و الباقي أي شي تحبون و أي بهارات أو صوصات تحبون بعد. كان عندي يوم سويته باقي من دجاج محمر في الثلاجة وشمر شوي ويخرب وحطيتهم مع بعض في هاش ثاني يوم.

اللي يسأل وش الهاش ؟ الهاش في الأساس خليط بطاطس وبصل وكورند بيف (لحم مخلل) وبهارات مشوحين على صاج مع بعض. موب شرط الكورند بيف بس هو أشهر هاش تقريبا. ينوكل عالفطور في الغالب ويقدم مع بيض مقلي أو مسلوق بس شخصيا أحبه عشاء سريع أو غداء.

راس شمرمقطع شرايح نحيفة

حبتين بطاطس كبار مقشرة أو لأ حسب الرغبة ، مقطعة مكعبات.

بصله مقطعه شرايح

فص ثوم مقطع شرايح نحيفة

زيت زيتون

ملح و فلفل و بابريكا (يفضل مدخنة لو عندكم بعد)

لحم حسب الرغبة .. أي لحم باقي حطوه .. أو حتى لو ماتبون ما يحتاج ..

زعتر بري في حال التوفر

صوص أرابياتتا

هذا الشمر للي ما يعرفه… خضار رهيبة و إستخداماتها كثير في الأكل الإيطالي.. هذا النبات فيه شي غريب وهو إنه خضار ، عشبه ، و بعد بهار ! .. القلب (اللي في الصورة ) يعتبر نوع خضار ، اللي زي الشعر طالع هذا عشبه زيه زي الزعتر و الريحان و البقدونس.. و البذور و حبوب اللقاح حقته تعتبر بهارات .

نشيل الراس حقه أول بعدين نقطعه زي ما نقطع البصل عادي ..

نسخن شوي زيت زيتون في مقله كبيرة أو صاج ( أنا أستخدم مقلة حديد زهري )  على حرارة وسط وبعد ما تحتر نحط البطاطس و الشمر و البصل ونطبخهم مع التحريك من وقت لوقت إلين تستوي البطاطس وتكون قشرة ويلين الشمر مره تقريبا ٢٠ – ٢٥ دقيقة .

بعد ما يصير زي كذا نبدأ نفعصه ونضغطه بملعقة الطبخ . بعدين نحط ملح وفلفل وبابريكا حسب الرغبة ونحط الثوم و اللحم المستخدم ونطبخهم مع بعض شوي.

آخر شي نذوق ونعدل الطعم بعدين نحط الأعشاب لو بنحط وبس ..

بس هذي الهاش .. أهم شي أهم شي لا تدققون كثير في الهاش .. الهاش موب أكله لها مقادير وكذا ، المقادير حاطها تسهيل بس أهم شي الطريقة .. نحمر البطاطس مع البص بعدين نحط عليها أي شي نبي بس هذا المهم في الهاش الباقي كله زيادة ..

لينقويني مع فواكه البحر .. ٬Linguine ai Frutti di Mare :

اللي بنسويه هنا إننا بنطبخ الأكل البحري في صوص الأرابياتا بعدين نحط عليه الباستا .. الباستا موب ضروريه هنا لو تبون قدموا نفس الصوص مع خبز أو أي نشا ثاني.. الأكل البحري المستخدم ممكن يكون أي شي أهم شي أهم شي يكون من نوعية ممتازة .. في حال ماكان فيه أكل بحري طازج زي الناس أشتروا مجمد عادي .. مجمد مايعني أقل أو أسوأ .. أنا بستخدم هنا : حبار (كلماري) calamari or squid ، ربيان shrimp ، سكالوب (نوع من القشريات) scallops ، محار clams ومسل mussels بعد نوع من أنواع القشريات. لو ماتوفرت بعض هذي الخيارات موب مشكلة سووها بنوع أو نوعيين بس عادي ..

نقطة خاصة بالكلام clams و المسل mussles .. هذي الإثنين لازم لازم تكون حية إذا شريتوها ! تأكدوا إنها حية و إنها مقفلة زين . لو كانت ميتة ممكن تسبب تسمم علطول. إذا لقيتوا أي حبة شوي مفتوحة أضربوها شوي وشوفوا تقفل أو لأ إذا قفلت يعني حية لو ماقفلت يعني ميته !. القشر حقهم مفروض ما يكون فيه أي كسور.

نص كوب مويه

ملعقة صغيرة خل عنب أبيض

١٢ حبة كلام clams

تقريبا ٣٠٠ جرام باستا ( أنا أستخدمت طازه هنا )

كوب صوص طماط أساسي

فصين ثوم

ملعقتين صغار فلفل مجروش

١٢ مسل mussles

٨ حبات ربيان منظفة ومقشرة

٥ حبات سكالو scallops مقطع أنصاص

تقريبا ١٥٠ جرام كلماري مقطع حلقات

بقدونس وبارمزان للزينة

………………………………….

أول شي ننظف المسل و الكلام بإننا ننقعهم في مويه بارده تقريبا نص ساعة .بتشرب المويه النظيفة وتطلع التراب لو كان فيها كذا .بعدين نطلع الكلام خلاص جاهز كذا. المسل يحتاج إننا نشيل “الشنب” حقه. بعض الحبات بنلاقي زي الخيط طالع من الجنب نسحبه بيدنا إلين ننتفة بعدين يكون جاهز للطبخ.

نسخن شوي زيت زيتون في قدر عريض وعميق بعد ما يسخن نحط الثوم و الفلفل المجروش ونطبخه ثواني. بعدين نحط الكلام clams مع المويه و الخل ونرفع الحرارة لوسط ونغطي القدر زين . نطبخ الكلام إلين يبدأ يفتح تقريبا ٣ دقايق . نفك الغطا ونكمل طبخ زود دقيقة .

الحين نحط صوص الطماط مع رشة ملح وفلفل بعدين باقي المكونات البحرية . ونقلبهم في الصوص شوي ونطبخهم إلين يفتح المسل و الكلام زين بعدين نقدمه . في حال لقينا بعض حبات المسل أو الكلام ما فتحت نرميها لا نحاول نفتحها كونها كانت ميته من الأساس . في حال ما أستخدمنا مسل أو كلام نطبخه إلين ما يقلب الربيان برتقالي وبس ! . نرش زيت زيتون وبقدونس وبارمزان بعدين نضيف الباستا اللي نكون سالقينها و الصوص ينطبخ .