عن المدون و المدونة

بسم الله الرحمن الرحيم

.

اسمي خالد ، سعودي من مواليد جده عام ١٩٨٨ . مجال دراستي الأساسي هو في هندسة البرمجيات في جامعة كونكورديا في مونتريال في كندا. مثل كثير من الناس أنا أحب الأكل الجيد و أستمتع فيه وهذا اللي خلاني أحب الطبخ في البداية. يوم بدأت أتعلم أكثر و أكثر عن الطبخ شدتني الحرفية العالية و الإهتمام بأدق التفاصيل اللي شفت طباخين كثير يعطونه لأكلهم. من يوم كنت صغير ماكنت بعيد عن المطبخ ، ماكنت أخلي أحد يسويلي فطوري يوم الخميس و الجمعة كنت دايما أسويه بنفسي بس كان أشياء بسيطة زي ساندوتش أو إندومي أو بيض مع شاهي يعني أشياء جدا بسيطة ما تعتبر طبخ من الأساس. بعد ما كبرت شوي تقريبا في المتوسط صرت أطبخ أشياء أصعب شوي من وقت لوقت ومن باب المتعة لا أكثر، أتذكر كنت آخذ صدور دجاج و أتبلها من راسي و أشويها على الشواية الكهربائية وهذا يمكن أول طبق أتذكر كنت أسويه ممكن يعتبر طبخه حقيقية. مع هذا كان الطبخ مجرد شي أسويه للمتعة من وقت لوقت ومن باب كسر الروتين لا أكثر.

.

التحول الكبير لي كان يوم رحت لكندا وعشت لحالي. في البداية كان كل أكلي تقريبا من مطاعم، مدينة جديدة غنية بثقافة أكل وشباب كلنا نحب المطاعم فأكيد ماكنا نوفر فرصة إننا نذوق أي مطعم نلاقيه. كثير من المكونات و المطابخ ما تعرفت عليها إلا هناك. ماكنت أعرف طعم الخبز كيف مفروض يكون وطعم الكروسان كيف مفروض يكون وطعم البف بيستري كيف مفروض يكون إلين جربتهم من مخبز فرنسي هناك ، ماكنت أعرف طعم التشيز كيك كيف مفروض يكون إلين ذقت واحد هناك وما أعتقد كان فيه أمل أذوق أكل تايلندي وياباني وصيني وفيتنامي وجامايكي وبرازيلي ويوناني ويهودي وحتى أكل فرنسي على أصوله لو مارحت هناك. كنت أطبخ مع الشباب من وقت لوقت ومن باب كسر الروتين لا أكثر، أكلنا كان جيد بس ماكان شي الواحد ممكن يختار إنه ياكله الصراحة. مع هذا كنا نشتاق للأكل اللي حبيناه في السعودية و اللي تعودنا عليه. كانت أكثر أكله أحبها في ذاك الوقت هي الفيتوشيني ألفريدو وكل ما كنت أذوقها في مطعم هناك كانت مخيبة للآمال إلين جاء اليوم اللي فكرت أسويها في البيت. بدأت بالمواقع الأجنبيه ولقيت ملايين الوصفات. رحت بعدها للمواقع العربيه ولقيت بعد ملايين الوصفات. مع كثرة الوصفات إلا إنها كانت مختلفة بشكل جدا كبير وكنت محتار أي وحدة أطبق. بدأت أقرأ في الوصفات الأجنبيه ، قرأت يمكن ٢٠ أو ٣٠ وصفة أحاول أدور وش المشترك بينها إلين لقيت إن غالبية الوصفات فيها أشياء مشتركة. هي كلها تستخدم كريمة ما تستخدم صوص باشاميل ولقيت بعد إنها تختلف في النكهات المستخدمه بس كلها تستخدم جبن بارمزان عكس كثير من الوصفات العربيه اللي تستخدم أجبان ثانيه. بدأت أطبق بإني جربت وصفه لقيت إنها تستوفي كل الصفات اللي موجوده في غالبية الوصفات وفي نفس الوقت مافيها أشياء غريبه يعني قريبة من اللي كنت آكل في السعودية. طبقت الوصفة ومن يومها تغيرت نظرتي للطبخ ! الفيتوشيني اللي سويت كانت أفضل حتى من اللي كنت آكل في السعودية وبعد ما جربوها الشباب كان لهم نفس الرأي. أعجبتني هذي الطريقة في الطبخ بإني أقرأ كذا رأي وكذا طريقة وأختار اللي أشوف إنه الأصح، اللي لقيته بعدين إن كثير من الوصفات بنلاقي فيها خطوط أساسيه تشترك فيها. أستمريت على طريقتي هذي في البحث و الطبخ وسويت كثير من الأكلات اللي ماكنت يوم من الأيام أحلم إني أسويها في البيت وكلها كانت تطلع بجودة أكثر من ممتازه وبسعر رخيص وماكانت تاخذ وقت ! أتذكر في أول ترم لي هناك كنت أعرف أسوي مولتن كيك و صدور دجاج بصوص كريمة الفطر و أجنحة دجاج تنافس أي مطعم وحتى تشيز كيك بجودة خل نقول متوسطة على مقاييسي اليوم.

.

بعد ما تعلمت كثير من الأكلات السهلة و اللي أحبها بدأت أدور شي أكثر. صرت أدور على أكلات أشوف إني أقدر أسويها في كل مكان ، في النت ، في التلفزيون وحتى في المطاعم اللي أروح بإني أجرب أشياء وأدور طرقها وأسويها. في البداية كنت أدور أشياء أرتاح معها وبمجرد ما أقرأ شي أحس إنه صعب أتركه و أدور شي ثاني. من يوم أقرأ في وصفة مكون غريب أتركها ومن يوم أقرأ في وصفه إني أحتاج أقطع دجاجه كاملة مثلا أو أطبخ سمكة كاملة أترك الموضوع علطول ، فكرة عمل باستا في البيت كانت شي من المستحيلات ، فكرة عمل مرق في البيت من عظم كانت نكتة بالنسبة لي وتجربتي الأولى في عمل عجينة بيتزا خلتني أبعد عن أي شي ممكن يقرب حتى من فكرة عجينة.

.

في هذيك الفترة كنت أبحث عن وصفات طول وقت فراغي بمعنى طول وقت فراغي. إذا كنت أذاكر كنت أفتح فوود نيتورك food network بدون صوت على أمل أشوف طبخة جديدة تشدني. إذا كنت عاللابتوب دايما ما تكون فيه صفحة ما تنقفل فيها وصفات أقرأ فيها وعلى هذي الحالة. مع الوقت تبدأ تخلص الوصفات ونبدأ نشوفها تتشابه ونبدأ ندور شي جديد ، شي غير ، شي يعطينا الشعور الرهيب اللي يجينا إذا ذقنا نكهة جديدة علينا ما قد تخيلناها حتى مجرد تخيل. مع الوقت لقيت إن فيه أشياء كثير الناس يعطونها إهتمام خاص وأنا مقدر أجربها بسبب شروطي الغبية في تصفية الوصفات. أتذكر شفت إسكريم بارمزان وفوقه فراولة وصوص بلسمك وقلت الله يكرم النعمة إسكريم سلطة ! بس بعد فترة زاد الفضول اللي فيني إني أعرف طعم هذي الأشياء و إني أجرب طرق الطبخ الغريبة هذي ، صرت أفكر طيب كل الناس يمدحون هذا الشي هل معقول إنهم كلهم غلطانين أو ما يعرفون يذوقون ؟ هل معقول إن ذوقي غير عن كل الناس هذي ؟ بعدها بديت أدخل مناطق مظلمة و أجرب أشياء ما يكون عندي حتى فكرة ولو بسيطة كيف مفروض يكون طعمها ومع العلم إنه موب دايما يطلع الشي فعلا يستاهل التجربة إلا إنه ماقد طلعت من تجربة إلا وأنا كاسب شي جديد هذا غير كمية الأطباق و المكونات الكبيرة اللي عرفت طعمها.

.

إلى هذي المرحلة كنت مازلت أعتمد على الوصفات في كل شي. كنت مازلت أعتمد على نفس طريقتي القديمة بإني أشوف كذا وصفة و أقارن بينهم وأشوف وش الأشياء المشتركة وكيف يفرقون عن بعض و إذا أحتاج آخذ الأشياء اللي حبيت من الوصفات كلها و أجمعهم مع بعض. بس مع هذا كان دايما عندي رغبة إني أعرف ليش كل خطوة في كل وصفة تتم بالطريقة هذي ؟ على قد ما قرأت طرق للستيك كلها تتشابه بس إذا كان كذا ليش فيه مطاعم تسوي ستيك ممتاز و مطاعم أقل و أنا في بيتي أسوي بلاستك ؟ مشكلتي ببساطة كانت في فهم الوصفات. ليش نقطع الأكل كذا ؟ طيب إذا كانت هذي الوصفه تقول نقطع الثوم مثلا شرايح نحيفة بس هذي الوصفة تقول ثوم مقطع صغار وش الفرق ؟ ليش وصفة التشيز كيك هذي تقول ٥ بيضات بس هذي ١٠ صفارات بيض ؟ كيف بيفرقون ؟ ليش هذي الوصفه تقولنا نطبخ التشيز كيك في حمام مائي وهذي لأ ؟ طيب هذي معها طحين وهذيك لأ وش فايدة الطحين ؟ طيب ليش الستيك يطلع عندي ناشف مع العلم إني مشيت عالوصفة ؟ ليش الستيك يوم يستوي في دقيقتين على كل وجه ويوم دقيقتين تخليه محروق ؟ ليش البيتزا عندي تلصق أو ليش ما تنفرد زي ما شفت في الصور ؟ أو ليش الخبز هذا بحليب وهذا بدون ؟ أسئلة كثيرة كانت تطلعلي زي ماتطلع في راس كثير ناس. كثير من الأحيان هذي الأشياء اللي نجهلها تكون سبب خراب أكلة أو بأقل تقدير سبب خيبة الأمل من تجربتها وحلي كان زي غالبية الناس هو إني أتهم الوصفة إن فيها مشكلة و أروح للي بعدها.

.

مع الوقت زاد الفضول عندي إني أعرف ليش كل شي يصير. كنت أقرأ عن مواضيع طبخ كثير في النت بس المواضيع اللي كانت تشدني أكثر شي هي اللي تتعمق وتفسر ليش كل شي يصير. مافيه أي تفاصيل كنت أحس إنها زايدة عن المطلوب ، عمري ماقرأت موضوع وقلت هذا كلام ما يهني كواحد يطبخ بالبيت. لو واحد كان يشرحلي كيف أطبخ بيضة ودخل في كيف البروتين يتغير مع الحرارة ويسويلنا شبكة تعيق حركة المويه وهذا اللي يخلي البيضه تجمد وتتحول لشي زي الجيل هذي معلومة يمكن ما تساعدني بشكل مباشر أعرف كيف أطبخ بيضه بس هي معلومة جدا ممتعة بالنسبة لي وتخليني أعرف ليش كل شي يصير. للأسف مواقع الإنترنت ما تدخل كثير في هذي التفاصيل نادرا ما نلاقي مواقع تشرح هذي المواضيع بشكل كان يشفي فضولي وإهتمامي فيها وعشان كذا صرت أدور مصادر ثانية. بالصدفة طحت على كتاب رائع إسمه On food and Cooking الكتاب كبير بس غير كل كتب الطبخ اللي كنت أعرفها ذاك الوقت هذا الكتاب ماكان فيه صور ولا كان فيه وصفات أصلا. الكتاب كان يشرح المكونات وطرق الطبخ بطريقة علمية بحتة ، بدأت أدور على مثل هذي الكتب وعلى كتب ثانية تقدر تخليني أستفيد من هذي المعلومات بشكل عملي أكبر.

.

اللي أنا ما كنت أعرفه ذاك الوقت هو إن الطريقة اللي أنا كنت أتعلم فيها هي الطريقة اللي يدرسونها الطباخين في معاهد الطبخ. معاهد الطبخ ما تعلم الناس مجموعة من الوصفات وتعطيهم شهادات. معاهد الطبخ تعلم الناس أساسيات الطبخ وتدربهم عليها. أساسيات الطبخ هي العمود الفقري للوصفات كل وصفة في العالم هي إما حالة مستقلة على تطبيق لأحد هذي الطرق أو مجموعة من التطبيقات لكذا طريقة طبخ مجموعة بطريقة معينة. خل ناخذ طبق سعودي تقليدي اللي هو الكبسة ونشوف كيف إن خطواته هي مجموعة من التطبيقات على كذا طريقة طبخ أساسية. كل وصفة كبسة فيها كذا خطوة : أول شي نختار اللحم ونقطعه إذا ماكان مقطع ، بعد كذا نسوي مرق (بالأصح هو سليق لحم موب مرق) من هذا اللحم ونطبخه مع بهارات إلين ينطبخ اللحم تماما ويصير لين ، آخر شي نحط على هذا المرق رز ونطبخ الرز وهذي الكبسة. إختيار اللحم ومعرفة الجودة وكيف كل منطقة من كل حيوان يكون طعمها هذا موضوع أساسي في الطبخ. تقطيع اللحم بطريقة صحيحة بحيث يستوي في نفس الوقت ويكون سهل للأكل هو بعد من طرق الطبخ اللي تدخل في فن الجزارة butchery ، عمل المرق و الأشياء اللي تفرق فيه وكيف نطعمه وكل هذي المواضيع موضوع أساسي في الطبخ ، إستخدام البهارات و الملح و إختيارها موضوع أساسي في الطبخ ، طبخ اللحم في مرق موضوع أساسي في الطبخ (طريقة اليخنة) و أخيرا طبخ الرز موضوع أساسي بعد في الطبخ. هذي أكلة سعودية وزي ما شفنا مهارات الطبخ اللي يتعلمونها في أي معهد طبخ ممكن تتطبق معها ولو تعلمنا كل وحدة من هذي الأساسيات بنعرف كيف نخلي كل خطوة تعطينا أفضل نكهة وكيف نتغلب على أي مشكلة تجينا في أي خطوة. تعلم طرق الطبخ بيخليكم تفهمون أي وصفة تقرونها وتعرفون ليش كل شي فيها يصير ولو فيها خطأ بتعرفون وين الخطأ. تعلم طرق الطبخ هو الطريقة الصحيحة في تعلم الطبخ وفهمه بشكل جيد.

.

بدأت أكتب في النت في منتدى عالم حواء. بالصدفة طحت على موضوع هناك كان وصفة تشيز كيك ويوم بدأت أقرأها لقيت فيها ألف مشكلة ومشكلة هذا خلاني أسوي بحث عن كلمة تشيز كيك بالعربي وشفت كذا موضوع وكان أغلبها يعاني من نفس المشاكل. كثير من الوصفات كانت ناقصه ، كثير منها كان يحط مكونات بدون أي سبب (بيكربونات أو بيكنج باودر في تشيز كيك مثلا ؟) ، كثير منها ماكان حتى تشيز كيك كان مافيه أي جبن !! كان بس ظرف كريمة مع ظرف دريم ويب مع سكر وأشياء ثانية وحتى المواضيع اللي كانت تحط مقادير جيده كانت تهمل الأشياء اللي فعلا تسوي كل الفرق في التشيز كيك مثل كيف نعرف إنها أستوت ! نزلت موضوع عن التشيز كيك في عالم حواء وبعده نزلت أكثر من موضوع عن الفهيتا وعن تارت الجاناش وبعدها بكم يوم أنطردت من المنتدى لمخالفتي لشروطهم اللي صراحة ماقد قرأتها. تركت الكتابة في النت فترة بعدين رجعت لمنتديات المساطيل ومن بعدها لمنتدى شامواه و مقهى العيال و جسد الثقافة. بعد سنة تقريبا من الكتابة في المنتديات وبعد مشورة عدد من الزوار جزاهم الله خير قررت أترك المنتديات وما أرجع أنزل مواضيع هناك بسبب شروطهم اللي ما تخدم أحد إلا ملاكها. هذا القرار كان من أفضل القرارت اللي سويتها في حياتي ومن هنا أنولدت هذي المدونة.

.

من يوم فتحت المدونة كنت حاط هدف واحد ناوي إني أمشي عليه في هذي المدونة. أي واحد قرأ الكلمة اللي مكتوبة بالخط الصغير تحت البنر الرئيسي حق المدونة و اللي مكتوب فيه Cooking Techniques Explained ومعناها طرق الطبخ مشروحة هذي تمثل هدفي لهذي المدونة إن شاء الله. هذي المدونة راح يكون هدفها شرح طرق الطبخ الأساسية واللي كان لها الفضل الأكبر في إني أتعلم كل شي تعلمته. راح يكون فيه وصفات أكيد بس الهدف الأساسي من هذي الوصفات هو إنها تكون تطبيقات أو أمثلة على طرق الطبخ اللي شرحت أو اللي راح أشرحها بشكل مفصل أكبر في المستقبل إن شاء الله. إرضاء الناس غاية لا تدرك أنا عارف إن موب كل الناس يهمهم تعلم طرق الطبخ الأساسية وأنا عارف إن كثير من الناس ما يحب يعرف ليش كل شي يصير أو ماعنده وقت يقرأ كل الكلام الطويل اللي أكتب بس أنا أستهدف بكل صراحة الناس اللي يفكرون زيي وراح أشرح زي ما أحب إن أحد يشرحلي.

.

.

شكر خاص للأخت نورة على مساعدتي في إعداد هذي الصفحة.

.

Follow TopChefCooks on Twitter

326 comments

Skip to comment form

  1. السلام عليكم ..

    أنا وحده مليت من وصفات النت و المنتديات العشوائيه أحب أخذ الوصفات من متخخصين في الطبخ عشان تضبط الوصفه

    عمل رائع

    • Ghadeeroze on 10 February, 2014 at 10:39 am
    • Reply

    الله يعطيك الف عافيه ، بصراحه اليوم الفجر اكتشفت هال مدونه وماني قادرة أسكرها، هي تجوع وتحمس للطبخ من قلب هههههه،
    أنا صار لي أسبوع بس أخذت دورة تزيين الكيك وكنت ابحث عن كريمة الزبدة خصوصاً ان مؤ أعجبني طعم سمن مازولا وهو البحث الا وصلني لهامدونه
    تسلم اناملك وذوقك

    1. الله يسلمك وحياك الله دايم

    • huda on 26 January, 2014 at 4:39 pm
    • Reply

    ما شاء الله والله انبهرت من مد،نتك شي ، وحبيت اكثر التفاصيل و المعلومات اللي ماكنت ابدد اعرفها
    شي جميل مرا ، افضل مدونه بالنسبه لي لانها ثريه وغنيه بالمعلومات المفيده لنجاح الطبخ

    شكرا من كل قلبي على جهودك وربي يوفقك يارب وين ماكنت …

    =)

    1. العفو وحياك الله في أي وقت ومشكوره على كلامك

    • Emtithal on 15 January, 2014 at 12:37 pm
    • Reply

    انا من متابيعك على mbc ماشاء الله دائما وصفاتك شهية ولذيذة
    سمعت اليوم منك عندك حساب انستقرام باسم خالد_عارف لكن ماعرفت اوصل اليه
    ياريت تكتبه من جديد مع شكري الجزيل

    1. ههههه لا أختي شكلك ملخبطة. أنا مالي أي علاقة بخالد عارف أو إم بي سي.

  2. أجمل شيء في الدنيا أن تختار طريقك بنفسك وأن تتميز عن الاخرين ، وهذا ما أشعر به بين ثنايا كتاباتك ،،
    بالتوفيق ومن تقدم إلى تقدم بإذن الله

    1. مشكوره على كلامك …

    • انت مبدع on 8 January, 2014 at 8:49 pm
    • Reply

    أتعب .. أتعب .. أتعب و أنا أقول مبدع
    ضروري .. ضروري .. ضروري .. تسوي لك
    برنامج على التلفزيون.. و مقاطع اليوتوب بتكون
    فكرة لطيفة .. و واثقة إنك بإذن الله بيكون
    لك شأن كبيييير في هالمجال
    و أي إنسان يقرا لك راح يحترمك و يقدرك
    و يتمنى لك من كل قلبه التوفيق و النجاح

    1. الله يخليك ، هذا من ذوقك …

    • Noura on 23 December, 2013 at 7:18 am
    • Reply

    ما شاء الله عليك ؛ الله يوفقك يا رب ويكتب لك الخير ؛ وعجبني انك مكلف على نفسك ومدونة وشرح للعالم بدون مقابل ؛ الله يجعله في موازين أعمالك يا رب ❤️

    1. آمين يارب ومشكوره على كلامك

    • samiah on 22 December, 2013 at 1:29 am
    • Reply

    ما شاء الله مدونه رائعه اعجبتني طريقة شرحك بالتفصيل ان شاء الله راح اطبق اشياء كثير تعلمتها منك
    شكرا ع المجهود اللي تقدمه

    1. حياك الله دايم وفي أي وقت.

    • Nora on 17 November, 2013 at 10:13 pm
    • Reply

    ماشاء الله تبارك الرحمممن ،
    الله يوفقك ويهنيك ياارب T.T ، كلما دخلت مدونتك ما أمل منها أبدا
    أنا من عشاق الطبخ والأكل 😀 , وعلمتني كثييير الله يسعدك
    تعجبني طريقة شرحك الدقيقة ، إذا سويت شيء من مدونتك أكون مطمئنة خخخ

    ،،،
    شسمه قريت موضوعك عن الخبز ✨❤️❤️
    وجربت خبز النخالة بدون الاضافات وكان لذييذ ، بس فيه مشكلة
    الخبز قاسي شوي ، ما أدري ليش ، هل المشكلة من الدقيق أو إني ماتركتها تتخمر أكثر ؟
    معليشش ع السؤال الشطحة بس ف بالي اسألك ()
    ،،،

    شكرًا ع المدونة الرائعة .. دعواتي لك ^^

    1. الله يخليك وهذا من ذوقك أختي …..

      بخصوص الخبز الصراحة ممكن يكون كذا كذا شي. أفضل أترك مشاكل وحلول الخبز لموضوع الخبز إن شاء الله راح أتوسع فيه بشكل أفضل من ذاك الموضوع.

        • Nora on 18 November, 2013 at 5:11 am
        • Reply

        إن شاء الله ، ننتظره بفارغ الصبر ^^

    • nusa on 11 November, 2013 at 4:36 pm
    • Reply

    الله يجزاك الجنه على كل اللي تقدمه … انت مدرسه
    كثير فرحني كلامك وتجربتك بالطبخ ألهمتني ….

    بالنسبه للحلويات احتاج اقرا فيها واتعملها اكثر لو ممكن تعطيني اسماء كتب حلويات تفيدني (يعني كتب شرح مثل ما تفضلت مو كتب وصفات)
    وهل فيه كتب مترجمه !
    وبالتوفيق اخوي 🙂

    1. الله يخليك هذا من ذوقك …..

      كتب حلويات جدا جدا كثيره. دوري على الكتب حقت معاهد الطبخ اللي يدرسونها للطلاب هذي فيها كل التكنيك وبعد ما تفهمين الأساسيات أقري وتوسعي فيها بقراءة كتب وصفات أو كتب طباخين أو مطاعم مشهوره وأهم شي جررررربي وأطبخي أكثر وأكثر وبعد ذوقي من محلات ومن مطاعم أكثر وأكثر.

      يمكن أفضل مثال عاللي أتكلم هو كتاب professional baking اللي يدرسونه في le cordoun blue واحد من أشهر معاهد الطبخ في العالم.

      كتب مترجمه ما أعرف الصراحة …..

        • nusa on 12 November, 2013 at 7:46 pm
        • Reply

        جزاك الله خير , شكرا جزيلا

    • ريم on 17 October, 2013 at 5:41 am
    • Reply

    او ام جي يا رجل!! O_O
    يو ار ان لوف ويذ كوكينق!! يو ار ان لوف!!
    شي يخوف!
    حبك للطبخ يخوف! …
    ترا قلت ماشاء الله p:

    بالله بس باعرف كيف ترتب وقتك في انك تقرأ عن الطبخ وتتطبق الوصفات وفنفس الوقت تدرس؟
    لأن انا دايما عندي مشكلة في الوقت! انا اموت في الطبخ بس مشكلتي احب اشياء كثير .. احب اقرأ واحب الرياضة وفنفس الوقت اشتغل فأحوووس
    عشان كذا يادوب اطبخ كل يوم وفين وفين أقرأ عن فن الطبخ .. يادوب اقرآ وصفات بس ما ألقى وقت اتعلم اساسيات الطبخ

    والله يوفقك :”)

    1. ههههههههه

      دايم فيه وقت. كل يوم تاكلين ٣ مرات ، لو كل وجبه سويتي شي غير هذي كم وصفة في الأسبوع ؟

      الله يعينك ، تنظيم الوقت فعلا مشكله للي عنده كذا شي ، مالك حل إلا الله يعينك هههه

    • بدريه on 12 October, 2013 at 11:19 pm
    • Reply

    ماشاء الله لاقوة الا بالله ربي يحفظك طموح وحققت شي من رغبة وقليل اللي زيك يعلم
    من جد اتمنى لك من قلبي انك تتوفق

    1. هذا من زوقك وشاكرلك مرورك أختي.

    • Anonymous on 9 October, 2013 at 12:15 am
    • Reply

    ماشاءالله عليك فعلا مبدع ونتشرف ولنا الفخر في شاب زيك وربي يسعدك ويحقق كل امنياتك وممكن طريقه تارت الجاناش ومشكور وربي يحفظك

    1. الله يخليك من ذوقك.

      تفضلي هنا كل شي وزيادة …

      http://www.shamoa.com/vb/showthread.php?t=19308

    • Anonymous on 24 September, 2013 at 4:16 am
    • Reply

    انت شى استثنائى فى الموهبه والشرح …بالنسبه لى وصفاتك امان وثقه ..بارك الله فيك ولك

    1. جزاك الله خير وهذا من ذوقك.

  3. اخيرا اخيرا اخيرا
    انت راااائع و تشاركني افكاري
    برامج الطبخ الاجنبه هي الافضل عندي و التكنيك مهم
    اما الوصفات في المنتديات العربيه مع الاسف تهتم بالشكل
    و الالوان بغض نظر عن الطعم و المكونات

    يعني ممكن يحطون كذا نوع كريمه و قشطه و جبن كريمي
    و دريم ويب و علشان يتماسك يضيفون جيلي او كريمه

    شكرا لك من الاعماااق

    1. الله يخليك من ذوقك.

      حتى البرامج الأجنبيه فيها وفيها. ومواقعهم بعد فيها وفيها. حتى وصفاتهم تلاقين وصفات تعتمد على علب ومقادير جاهزه وغيرها بس لأنها جدا كثيره ولأن كثير ناس محترفين يكتبون ويسوون برامج عندهم تلاقين كثير جيد.

    • cute-girl on 17 September, 2013 at 9:38 pm
    • Reply

    ياخي مايجوز كذا ، ليش ماينشرون مدونتك لو بالجرايد لو ان شالله في التلفزيون ، انت انسان موهوب مرره ماشاللله من بعدك عرفت كل اساسيات الطبخ ، مدري ليش مجتمعنا لين الحين وهم يستحقرون موهبه و فن الطبخ مع التفنن فيه ممتع ، متابعتك بقوه استمر ❤ !!

    1. الله يخليك من ذوقك. اللي مهتم بشي بكتبه بيطيح عالمدونة هههههه مايحتاج …

      الصدق إني أسمع عن اللي يستحقرون الطبخ بس ما شفت إلا وحده هنا في المدونة بس ههههه الله يذكرها بالخير. طبعا أبدا موب شي يهمني وأقول هذا صادق وسواء رفضوا أو أستنكروا هذا شي أحبه وبسويه بس الصدق ماقد قابلت أحد وقلتله شغلتي إلا لقيت منه إعجاب وحماس إنه يعرف طبيعة عملي أكثر. فكرة المجتمع الرافض المنغلق أحس كبرناها حبتين.

    • tony on 12 September, 2013 at 3:40 am
    • Reply

    مدونة رائعة وفيها كل مفيد
    نورالعالم

    • غزل on 30 August, 2013 at 7:59 pm
    • Reply

    السيد الراقي الشيف خالد الله يعطيك العافيه ويسلم لنا اناملك الذهبيه
    حقيقي مدونه رائعه جدا شدتني وصفاتك الرائعه وانا من عشاق المطبخ وخصوصا صنع الحلويات بانواعها دلتني على مدونتك ابنة اختي وكنت مستمره في البحث عن طريقة صنع الماكرون عشقي الابدي
    تسلم يا شيف وانا من اليوم حكون من متابعينك ات شالله
    تحياتي يا مبدع

    1. حياك الله في أي وقت أنتي وبنت أختك …..

    • دياب الدالي on 20 August, 2013 at 9:34 pm
    • Reply

    مشكور جداً شيف خالد على جهودك وطيبة نفسك في إفادة الآخرين
    أنا فعلاً كنت أتساءل وأستغرب وجود هذا الكم الهائل والمتجدد من الوصفات في العالم ومن ابتكرها وكيف عملها بتلك الطريقة والمقادير بالتحديد؟
    وكنت أرى الإلمام بكل الوصفات أمر صعب جداً .. فكنت أتمنى أن أهتدي إلى قواعد معينة أستطيع من خلالها أن أبتكر وصفات وخلطات من نفسي
    دون الرجوع إلى مراجع ..
    وكنت أستغرب كيف أن أكل المطاعم أشهى من أكل البيت وكيف بعض البيوت عندهم أكل راقي وممتاز والبعض الآخر مشي حالك بالرغم من تشابه
    المكونات وماهي الأسرار السرية في ذالك ؟ هل هي في إستخدام مواد وبهار معينة ؟ هل هي كثرة أم قلة البهار والمكونات ؟ هل هي في قوة ومقدار
    النار ؟ هل هي في تناسب المكونات مع بعضها ؟ هل هي في الطريقة ؟ أرجو أن تجيبني عن هذه الأسئلة .
    وبإذن الله أستفيد من مدونتك الأكثر من رائعة
    ويعطيك العافيه .

    1. بالنسبة للوصفات وكيف بدأت هي ما تبدأ بشخص في الغالب (ولو إنها أحيانا ممكن) هي غالبا تبدأ بسنوات وسنوات من التطور، أجيال وأجيال يكونون أحيانا ورا قصة تطور طبق والأمثلة جدا كثيرة. لو ألقيت نظرة على فعالية حول العالم في ٣٠ يوم نزلت ٣٠ وصفة من ٣٠ دولة مختلفة وقبل كل وحده كنت أشرح كيف جت الوصفة وكيف تطورت وأكل أهل المنطقة هذي. راح توضحلك الصورة بشكل أكبر بكثير كذا.

      بالنسبة لأسئلتك كأنك قاعد تسأل وش السر اللي يخلي أكلي لذيذ ؟ وكأنك قاعد تبحث عن سبب واحد أو سر وحيد يخلي الأكل لذيذ وهذا طبعا غير موجود. مافيه مكون واحد يخلي كل شي لذيذ ، مافيه حركة وحده تخلي كل أكل ألذ هي مجموعة من كل الأشياء اللي ذكرت وهي راح تختلف بعد من أكلة لأكلة. خذ الملح كمثال ، أقل و يكون الأكل ماله طعم ، مهما كانت الأكلة لذيييييذة ومضبوطة بدون كمية الملح المطلوبة لساننا ما يقدر يستشعر لذة هذي الأكلة بالعربي كأن كل شغلك عالفاضي ، بزيادة ولو كمية بسيطة عن المطلوب وبعد تصير الأكلة ما تحتمل. هذا مثال واحد بسيط لكيف شي سخيف زي الملح يسوي الفرق بين أكلة ممتازة وأكل لأ.

  4. لم اتعرف على المدونة الا قبل يومين تقريبا وحفظت الصفحة للعودة لها .

    رااااائع كنت ابحث منذ زمن عن هذه التفصيلات المفيده ، وطالما تساءلت لماذا تختلف الطبخات او ما يسمى ( النٓفٓس) برغم ان ان المقادير واحده
    وطريقة الطبخ واحده .

    لي عودة بعد انتهاء الشهر الفضيل للفوائد هنا

    شكرا

    1. الله يخليك من ذوقك مشكورة.

      بالنسبة للنفس هو شي ما أؤمن فيه الصراحة بالطريقة اللي الناس يحطونه إنه شي ينولد مع الواحد. أنا مؤمن إن فيه تكنيك وفيه فكر وراء الطبخ بمجرد ما الواحد يتعلمه أكله بيتحسن. الشغف أو حب الطبخ ممكن ياخذك أبعد بس هو موب الشي اللي بيخلي واحد يطبخ أو ما يعرف يطبخ !! أي أحد يقدر يتعلم.

      الدليل موجود ، كل سنه آلاف من الناس يدخلون معاهد الطبخ وهم يعرفون صفر أو أقل من صفر ويطلعون ويشتغلون في مطاعم كبيره. مو بالضروره يتعدى كونه شيف بسيط ومو بالضروره يحب الشي اللي يسويه (كثير من باب الحاجة) بس الفكرة إنه يقدر يسوي أكل مقبول حسب مقاييس مطاعم كبيره بمجرد إنه تعلم اللي يجهل.

    • nawal on 1 July, 2013 at 10:08 am
    • Reply

    شكرا” استاذ خالد على المدونه متابعه مواضيعك القيمه من ايام المنتديات

    • nawal on 1 July, 2013 at 10:06 am
    • Reply

    شكرا” استاذ خالد على المدونه هذا ماكنت ابحث عنه من معلومات متابعه بقوه للمدونه ولمواضيعك ف القيمه في المنتديات.

    1. حياك الله ومشكوره على كلامك ….

    • Crazy on 24 April, 2013 at 12:54 am
    • Reply

    هلا فيك توب شيف وينك مَ‘ـَُِنٍّ زمان
    اكره الكيري والنستله ھَھٍھَھٍھَھَھٍھَھٍھَھَھَھٍھَھٍھَھٍ
    انا كنت متابعتك مَ‘ـَُِنٍّ ايام المنتديات وجربت لك وصفات
    كثيره بِــ̯͡سّ اليوم بالصدفه طلعت براسي
    اسوي بيتزا وكنت ابغاها غير الدارج مَ‘ـَُِنٍّ خزعبلات
    كنت ابغى اخبز وذكرت موضوعك بشمواة
    وكنت اذكر انه شامل والحمدلله طبقت التكنيك
    واخيراً قهرت العجينه لانو دايم تقهرني وماتضبط ابد
    كانت رائعه جدا ماشاء الله
    فحبيت انو اشكرك فبحثت عن عنوان لك او انستغرام
    فطحت على هالمدونه وبصراحه احسن قرار انك تكون لك مدونة
    لانو بتفيد الكثير مَ‘ـَُِنٍّ ‏​ٱلليـے يتمنون يتعلمون
    الى الامام ياشيف وجد انت توب شيف الله يوفقك ❤

    1. الله يخليك ويحييك .. بالعافية ان شاء الله على قلبك …

    • أمل on 29 March, 2013 at 7:12 pm
    • Reply

    أخوي خالد رائع ماشاء الله مايحتاج أمدحك .

    بس عندي سؤال ليش ماتحاول تظهر نفسك باسمك الكامل و تؤلف كتب أو حتى تسوي فيدوهات !

    فيه ناس على الساحة أحس ماعندهم إبداع فقط تكرار للطرق بتغييرات جدا بسيطة ! والطرق زي ماوضحت ملعوب علينا فيها ! ومع ذلك يظهروا أنفسهم !

    و أخيرا لا أعلم ما علاقة الحاسوبيين بحب الطبخ ! << مبرمجة ^_^

    وفقك الله .

    1. الله يخلييك من ذوقك ….

      ماعندي إعتراض على الموضوع بس ما أشوف الهدف. المهم اللي بقوله يوصل .. طبعا الفيديو أنا ضده من الأساس وأشوف إنه موب بديل عن الكلام المكتوب أبدا ! فيه حالات الفيديو يكون مفيد إلا ضروري بعد مثل في وصف الحركة زي كيف أشرحلك مثلا كيف تحركين يدك وأنتي تعجنين أو كذا بس في الوصفات أو مواضيع الطبخ هو عائق أكبر من إنه مفيد.

    • Anonymous on 18 March, 2013 at 3:15 am
    • Reply

    بالصدفه وانا ادور على وصفه البافلوفا تعرفت على هالمدونه ، اذهلني كم المعلومات المهمه والمفيده الي فيها يعطيك العافيه شيف على هالمجهود الرائع ، بالتاكيد رح تكون مدونتك مرجع لي دائما ، اتمنى منك اذا كان عندك وقت تزور صفحتي بالانستغرام وتقيم طبخاتي فيها ورح اكون شاكره اذا ابديت ملاحظاتك واعطيتني من نصائحك ، صفحتي بالانستغرام هي bnbooona@

    1. من ذوقك وحياك الله في اي وقت ومشكوره على كلامك الحلو

    • Mori on 2 February, 2013 at 12:34 am
    • Reply

    Top cheef

    مسسسسسستحيل :'(
    صارلي سنين وأنا أدور عليك واسأل عنك أداره شمواه
    ماحد أعطاني خبر عنك

    لقيت مدونتك صدفه وأنا ابحث بقوقل عن المارنج باودر وش يكون

    ربي يسعدك ويسعدك ويسسسسعدك ويحقق لك الي تتمناه
    فعلا انت شيء نادر وذوق رفيع صراحه ، رغم صغر سنك

    موفق يارب دايمن وابدن

    <_<

    1. هلا والله …..

      الله يهديهم .. عارفين هم عن المدونة بس مدري …..

      الله يخليك وحياك الله دايما …

    • هيفاء on 31 January, 2013 at 7:54 am
    • Reply

    رائـــــــــــــــــــــــع جدا
    الله ينولك مرادك في الدراين
    متابعاك بقــوه وبكل شغف أنتظر جديدك
    وقسم بالله إنك وسام للسعوديه وللشرق بكبـــره
    كلامك جدا أثر فيني قي ( فيلم ملهم )
    موفق يارب 🙂

    1. الله يخليك من ذوقك ….

  5. مشاء الله جهد جبار احترمك وبشده

  6. مشاء الل مميز انا بس قرأت المقدمه وتأثرت وصفحة البهارات ابداع الله يوفقك انا من اشد المعجبين بك استمر يامبدع احنا نتابعك بشغف

    1. مشكوره ومن ذوقك وحياك الله دايما …

    • Anonymous on 21 January, 2013 at 1:57 am
    • Reply

    مشكور جداً علي الدعم يلي قدمته لي صراحة أنا أكثر من متفاجئة معقولة فئة شباب سعودي محب لفن الطبخ بهذا الشك أتمنى لك الاستمرار

    1. شاكرلك كلامك وتشجيعك ومشكوره على مرورك …

    • أم أحمد on 9 January, 2013 at 1:12 am
    • Reply

    السلام عليكم

    صارلي أسبوعين من عرفت مدونتك وأنا يوميا أدخل عشان أقرى المعلومات الأكثر من رائعه

    بصراحة شرحك أكثر من رائع وبالتفصيل الممتع

    وأول مرة أشوف أحد يشرح طرق الطبخ الصحيحه وكيف الأشياء تتماشى وتتجانس مع بعض

    دائما كنت أفكر ليش نستخدم بياض بيض بدل البيضه كامله او ايش الفرق بين البيكنج باودر والصودا

    الله يجزاك خير ويوفقك وييسر أمرك ويسعدك في الداريين ويحقق لك كل ما تتمنى

    المدونه أكثر من رائعه وواضح انك تعبان عليها مع انك منت مستفيد ماديا،،،

    ما أقدر أقول الا شكرا

    1. وعليكم السلام و الرحمة ….

      الله يخلييك ويجبر بخاطرك … مشكوره ما قصرتي وحياك الله دايما …

    • ^^ on 7 January, 2013 at 10:17 am
    • Reply

    انا شكلي حاقدم المآستر على مونتريال ><

    منها ادرس ومنها اخذ عندك كورسات , انا أحب الطبخ واحب المطبخ بس احيان اذا قرأت الدقة ماشاء اللهـ في طبخك اتعب نفسيا واقول محا اقدر اسويها =(

    1. ههههه تشرفينا والله …. للأسف منيب هناك لي سنه هنا …. الله يردني لها قولي آمين بس هههه

    • ياسمينة on 26 December, 2012 at 12:34 pm
    • Reply

    في عالم حواء كان اسمك حزن ؟

    1. لا كان توب شيف

  7. السلام عليكم
    اهنيك ياشيف على تطويرك لموهبتك و وصولك لهاذي المرحله مشالله تبارك الله
    ذكرتني بنفسي بصراحه انا جدا اعشق الطبخ اا كنت زعلانه اقوم ادخل المطبخ لوحدي اطلع الي في نفسي بالطبخ فعلا عالم غير متعه حقيقيه
    اتمنى ادخل معهد طبخ بس للاسف هنا عندنا بالسعوديه على حد علمي مافي
    قناه فوود نتورك انا ٢٤ ساعه عليها احب اتعلم تكنيكس جديده احب استعمل مكونات جديده و غريبه
    فعلا استمتعت بمدونتك و يارب اقدر اوصل زي ماوصلت مشا الله
    و شكرا

    1. وعليكم السلام و الرحمة ……

      الله يوفقك في مشوارك … التلفزيون أكتشفت إنه موب مكان جيد لتعلم الطبخ الصراحة…. إذا تبين المعلومات دوري في الكتب ، الكتب فيها التفاصيل بعيد عن الأسلوب و الكاريزما اللي التلفزيون يتطلبها. وحده زي ريتشيل راي مثلا هذي حرام أحد ياخذ منها شي هههههه

    • Fatimah on 17 December, 2012 at 12:40 am
    • Reply

    تسلم ياشيف وانا ما اتعلمت الا منك ومن هذي المدونه الي اعتبرها المرجع الاول لعالم الطبخ في العالم العربي …كفايه رحابة صدرك على اسئلتنا وما قصرت على تجاوبك معنا …جد جد افدتني والحين اذا احد سألني عن الطبخ على طول اعطيهم رابط المدونه واقول تعلمو اساسيات الطبخ 🙂

    1. الله يخليك من ذوقك والله ……

    • jasim on 13 December, 2012 at 1:45 am
    • Reply

    يعطيك الف عافية على هذا المجهود !!!!!
    والله افدتني بأشياء كثيرة من زمان كنت ابغى اعرف عنها و انت كل يوم تحمسني اكثر و اكثر للطبخ !!!
    انا كبداية كنت بس ابغى أخبز احب اسوي كيك و الأشياء هذي بس بعد شفت مدونتك تحمست أكثر اني اطبخ و أتعلم كل شي يتعلق بالطبخ !
    لا تحرمنا من مواضيعك الجميلة <3

    1. الله يعافيك ….

      هذا والله شي يفرحني إني قدرت أحببك أكثر في الطبخ .. إن شاء الله الجاي أكثر

    • نوره on 9 December, 2012 at 5:20 pm
    • Reply

    انا جدا فخوره بعملك
    ماشاءالله عليك دايما كنت موجود للرد عن اي استفسار او طريقه و اعتقد هالموقع بيسهل علي كثير و بيفكك شوي :p
    اتمنالك التوفيق

    1. للجميع إن شاء الله وهذا من ذوقك أختي …..

    • أم كنان on 5 December, 2012 at 12:13 am
    • Reply

    رائع اخي ، تابعتك في كتير منتديات لحد ماوصلت لمدونتك بتمنالك التوفيق وتستمر الله يحفظك يارب .

    1. الله يخليك مشكوره على كلامك وحياك الله دايما …

  8. السلام عليكم ورحمة الله وبركاته فخور جدا فيك الله يسعدك ويفتح عليك الجميل أننا نشترك في هدف واحد انا درست في مونتريال طبخ ودرست في فاتكوفر كما كنت اتمنى التقي فيك سعدت جدا بطرحك الرائع بالفعل هذا ماينقصنا الجميل انه كلنا كنا ندور الفريدوا فتتوشيني وتشيز كيك عاد لازم تذوقني هيا يوم الله يفتح عليك يارب كل التوفيق اخوي

    1. وعليكم السلام و الرحمة ….

      الفخر لي ومشكور على مرورك أخوي …. نورت الموقع …

    • GeGe on 3 December, 2012 at 9:34 am
    • Reply

    الله يعطيك العافيه يا رب ويقويك انا تعبت مره عشان اعرف عنك اكثر واكثر واوصل لهالمدونه الرائعه كنت ابحث عن موضوع ف النت ولقيت لك الموضوع وانبسطت مره مره ، يعني عجبني اول شي انك مسهل الوصفه للي يبغا يسويها فكنت تشجع ع عملها لسهولتها وعجبني بساطة الاسلوب والشرح واهتمامك بالتفاصيل هذا غير صور العمل الي كانت تدل ع ان وراها شيف مش اي شيف ما شاء الله عليك صراحه الي خلاني اسجل ف المنتدى عشان اقدر احصل ع مواضيعك كلها وبعدها الحمدلله تعرفت ع مدونتك وهذا اعتبره كنز ، اسعدتني هالمدونه جدا جدا لان هذا الي نبغاه صراحه ما يكفينا وصفات وبس نبغا احاديث طويله لا تمل عن التفاصيل ، جزاك الله خير ووفقك الله واحسنت بارك الله فيك واكثر من امثالك حقيقه نحتاج مثلك كثير في هذا المجال واعجبتني فكرتك في عمل المدونه حينما نعمل الشئ الذي نحبه ويهمنا ، نفعله كما نريد لايماننا بان هناك من يشاركنا نفس الشعور والاهتمام دون ان يعيقك التفكير في غالبية رأي الناس من حيث اهتمامهم بالوصفات وحسب وبان الكثير لن يعجبه طرحك للاسهاب ف التفاصيل ، فشكرا على هذا الدرس

    1. مشكوره على كلامك وتشجيعك وحياك الله دايما وفي أي وقت …

    • Afaf abduljalil on 28 November, 2012 at 2:35 am
    • Reply

    شكرا لك اخي الكريم على هذه المدونه المميزه ..
    شروحات وافيه .. تسلسل جميل .. و صور اقل مايقال عنها انها متكامله و رائعه..
    تابعتك على منتديات شمواه .. و بحثت عن جديدك في السيد قوقل .. الى ان وجدتك هنا ..
    جربت طريقة صوص الطماطم الاساسي مع الباستا .. وكانت لذيذه لدرجة كبيييره .. و سأجرب باقي الوصفات بإذن الله ..
    شكرا لك ليتها تكفي ..

    1. مشكوره على كلامك وحياك الله دايما وفي أي وقت …

    • Anonymous on 23 November, 2012 at 1:55 pm
    • Reply

    السلام عليكم.. هل هذا هو شكل المدونة النهائي؟ أرجو وضع منيو وتقسيم للوصفات .. يعني الحلى له قسم والستيكات لها قسم وكذا يعني عشان ما نضيع :” وشكرا الله يجزاك خير ويوفقك دنيا وآخره

    1. وعليكم السلام و الرحمة ….

      لا والله للأسف للحين في تحديثات وتعديلات …

    • Rana Aziz on 20 November, 2012 at 2:29 pm
    • Reply

    I’m in LOOOOOVE with your blog!!
    من زمان وانا ابغى اتعلم اساسيات الطبخ ودي اتعلم كيف اسوي وصفات من عندي من دون ما ادور وصفات بالنت خصوصا بعد ما جربت اسوي ماكرونز ولا ضبطت معي وحاولت وعدتها 8 مرات!! ولا ضبطت معي وهذا خلاني اتحمس اني اتعلم اساسيات الطبخ ويوم قريت كلامك حمسني زيادة لان من ججد كانك تقول اللي بنفسي! كل الاسئلة اللي قلتها لنفسك كنت اسأل انا نفس الاسئلة ذي .. ان شاء الله استفيد من مدونك وان شاء الله اقدر اشتري الكتاب اللي تتكلم عنه *.*

    1. حياك وإن شاء الله تلاقين اللي تبين ….

    • Anonymous on 18 November, 2012 at 6:02 pm
    • Reply

    مساء الخير كيف الحال انا متعودة يوميا ادخل مدونتك لانها مرجعي اللي اثق فيه واليوم يوم دخلت وما لقيت المواضيع اللي مسويها ضاق صدري تكفى رجعلنامواضيعك المميزه باسرع وقت

    1. قاعد أنقل المدونة لسيرفر جديد كله بيضبط إن شاء الله بعد كم يوم.

    • Anonymous on 13 November, 2012 at 7:28 pm
    • Reply

    السلام عليكم شيف ..
    حابه استفسر عن الفرن الكهربائي بالنسبه لخبز المعجنات ..

    هل فعلا هناك فرق بين البوتغاز والفرن الكهربائي بالنسبه لتوزيع الحراره البوتغاز توزيعه يفرق عن الكهرباء اقصد لما احط صينة لبابا روتي خبزتها اول مره بالبوتغاز ما ذابت التغطيه على الخبزه .. ولما عملتها مره ثانيه بالكهربائي طلعت الخبزه هشه وذاب التغطيه وعطتني نفس الخبزه إللي تنباع بمحلاتهم .. رجعت عملتها مره ثالثه بالبوتغاز ما ضبطت مثل المره الاولى . زبدة الكلام ودي اشتري لي فرن كهربائي بس ودي لو عندك فكره عن موصفات فرن كهربائي موصفاتها كويسه وبسعر معقول .
    وأشكرك على كل ما تقدمه بالمدونة الله يجعله بموازيين حسناتك .

    1. وعليكم السلام و الرحمة ….

      فيه فروقات بس موب في التوزيع أبدا .. توزيع الحرارة و الدقة تعتمد على جودة الفرن بغض النظر عن هو غاز أو كهرب.

      ماعندي الصراحة خلفية كبيره عن الأنواع المتوفرة .

    • ll@live.com on 13 November, 2012 at 4:26 pm
    • Reply

    انت حجازي ياشيف ؟

    1. نجدي من سكان الحجاز

    • nadra on 9 November, 2012 at 7:56 pm
    • Reply

    المدونه ممتازه واتمني لك التوفيق

    1. شكرا جزيلا وحياك الله دايما

    • زائرة on 8 November, 2012 at 3:53 pm
    • Reply

    مذهل!
    هل تكفي” شكراً” لمكافأة الوقت و الجهد و الرغبة النبيلة؟
    لا أعلم، ف” شكراً” عن ” شكراً” تختلف.
    لكن أفضل ما أستطيع تذكيرك به الآن هو ” أن تستصحب النية الطيبة وإرادة نفع الناس” فهذا النوع من النية الصادقة أنقذ رجلا من النار في جذع شجرة!
    دمت مباركا!

    1. شاكرلك أختي وهذا والله هدفي هنا لا أكثر …

    • asayel on 30 October, 2012 at 11:05 am
    • Reply

    يالسعادة 🙂
    ما أقدر أوصف سعادتي يا خالد بمدونتك الجميلة هذي .
    أنا أحب التفصيل وليش وكيف ومتى وكل هذا فالطبخ أحبه .
    أحب أعرف الفرق بين الوصفات وأدور كذا وصفة لمن ألاقي الي تعجبني ..
    حاليًا قاعدة أبحث فالكيك وأبغى أعرف الفروقات بينهم ياليت كمان
    لو تسوي موضوع زي كذا في مدونتك الأكثر من رائعــة.
    شُكرًا على المدونة الجميلة والله يسعدك ويعطيك العافية يا رب.
    مُتابعة لك ؛

    1. هلا والله ….

      مشكوره وحياك الله دايما …..

      ما كتبت إلا للي زيي وزيك يحبون التفصيل.

      بإذن الله راح يكون فيه مواضيع عن الكيك وكذا على طول الطريق بس هذي مواضيع الصراحة جدا بعيد عشان نوصلها. إن شاء الله ما أطول فيها.

    • bella tahani.. on 27 October, 2012 at 2:21 am
    • Reply

    يسعدليّ مساك او صباحك ,

    بالنسبه لي! احب المختصر و زبدة الحكي .

    على اني حطيتلك حكي زمان لكن مانسيتك..
    الحين عندنا اجازه حجّ واحنا مانحتفل بالعيد و الملل ليّ معاه حكايه فـ قررت اني اطبخ اشياء اكثر من ستيكات و المكرونات والرز لكن اتكاسل ! .. بس تذكرتك انت و كيف حبك للطبخ وانك تتلذذ وانتا توصف حتى
    فـ احسك الهمتني ,
    افكر اسوي من عندك تشيز كيك و وعدت صديقتي اجيها ومعايا التشيز كيك..
    ان شاء الله رح اصورو واسير اوريك اياه مع اني ماعرف كيف احط الصور بالرد

    + حكييّ كثير عارفه بس نوع من الفضفضه هههههه , اعذرني .
    يعطيك الهنّاء ياخالد

    1. هلا والله …

      حياك الله في اي وقت …

      الصور ارفعيها على اي موقع رفع صور وحطي الروابط هنا عادي

Leave a Reply

Your email address will not be published.

%d bloggers like this: