الكريمة المخفوقة … Whipped cream

السلام عليكم …

.

الكريمة المخفوقه كثير مننا شافها في أماكن كثير بس ما يدري إنها موجوده . مثلا اللي قد أكل موس شكولاته غالبا كان مخفف بكريمة مخفوقة ، بعض أنواع الكيك يكون مزين أو حتى محشي بكريمه مخفوقه ، اللي قد شرب مشروب بارد أو حار في كافيه ولقى شي زي الرغوه عالمشروب حقه هذا بعد كريمة مخفوقه. الكريمة المخفوقة مكون أساسي مستخدم بكثرة في الطبخ وإستخداماته ما تخلص ممكن يستخدم كحشوه لكيك أو سويس رول ، ممكن يستخدم كتغطية لكيك أو تشيز كيك، ممكن يستخدم عشان يعطي خفه للأكل زي في مثال الموس اللي شرحنا وممكن يستخدم للديكور ونسوي منه أشكال حلوه زي وردات أو حدود للكيكات وغير هذي الإستخدامات كثير . هذي كلها إستخدامات حلوة بس بعد ممكن تستخدم في إستخدامات مالحه بعد مثل إننا نسويها مع ساور كريم مثلا  بعدين تتقدم مع بطاطس في الفرن أو حتى مع خبز أو كراكرز أو شابوره . إستخداماتها كثيره . هي وحده من الأشياء السهله اللي الواحد لازم يعرف كيف يسويها كونه بيحتاج المهاره هذي كثير . اللي قد سمع عن شي يسمونه كريم شانتيه هذا بالضبط نفس الشي مجرد إسم مختلف لا أكثر.

.

كثير ناس ما يحبون كريمة الخفق لسبب واحد بس ! هو إن أغلب الناس ما ذاقوا كريمه خفق صحيحه . أغلب الناس فكرتهم عن الكريمه المخفوقه هي علبه تنباع في السوبرماركت تنضغط من جهة وتطلع من الجهة الثانيه رغوه ثقيله هذي هي الكريمة اللي في أغلب القهاوي و المطاعم للأسف . هذي الكريمه ولو إن الناس يعتبرونها كريمة خفق إلا إن تركيبها بعيييييد تماما عن كريمة الخفق الأصليه هذي عباره عن دهن مهدرج مع مثبتات كثييييره ومواد حافظه بعيده كل البعد عن كريمة الخفق الصحيحه .

.

التركيب و المكونات

.

الكريمة المخفوقه عبارة عن رغوه. الرغوه عباره عن فقاعات هواء محاطه بجدران نحيفه كل ماكانت الجدران هذي متينه وقويه أكثر كل ماكانت الرغوه هذي ثابته أكثر يعني الهواء اللي في الفقاعات ما يطير في الجو بسرعه كونه ممسوك بجدران قويه . الرغوه هنا في حالتنا جدرانها مويه بس المويه لحالها ما تكون رغوه صح ؟ قد حاولتوا تخفقون مويه ولقيتوا رغوه ؟ مستحيل ؟ عشان كذا نحتاج شي يمسك أو يثبت المويه اللي هي جدران الفقاعات حقت الهواء . السكر ، البروتين حق الحليب ، و الدهن هم اللي بيثبتون المويه في مكانها وخصوصا الدهن كونه أهم شي في حالتنا . الدهن في الكريمه يكون على شكل نقط صغيييييره موزعه في الكريمه . مع الخفق تتكون الفقاعات ويكون الدهن موزع حولين هذي الفقاعات صح ، الدهن مع الخفق يبدأ يلصق في بعض وبكذا يثبت هذي الفقاعات في مكانها .

.

طيب في حالتين مهمات هنا وش اللي بيصير لو الدهن حق الحليب هذا ذاب ؟ اللي بيصير واضح الدهن بيذوب و الفقاعات بتنهد وبتنهد أو تطيح الكريمه المخفوقه علينا هذا واحد .. الحالة الثانيه ,وش اللي بيصير لو تحمسنا في الخفق زياده وزياده وزياده عن اللزوم؟ اللي بيصير هنا هو إن الدهن حق الحليب اللي نقط صغيره زي ما شرحت، بيقرب من بعض أكثر و أكثر و أكثر ويبدأ يلصق في بعض أكثر و أكثر و أكثر ويكون نقط أكبر و أكبر و أكبر .. إليييين يكون نقط كبيره مره واضحه للعين, هنا الدهن خلاص تقريبا فصل من الخليط وصار الشي اللي نسميه الزبده (هذي هي الطريقة الصناعية في عمل الزبدة إنهم يخفقون كريمة وقت طويل إلين تكون زبدة).

.

نوعية القشطة المستخدمه هنا جدا مهمه . قشطة الخفق العاديه هي أفضل شي لعمل الكريمة المخفوقة ومن هنا أصلا جت التسميه ” قشطة خفق !؟ ”  . قشطة الخفق العاديه فيها من ٣٥-٣٨ % نسبة دهن وهي النسبه المناسبه لهذي الحالة . الحليب كامل الدسم فيه ٣٪ دسم بس ! ، الحليب قليل الدسم فيه ٢٪ وعشان كذا مستحيل يعطوننا كريمة خفق . كريمة الخفق قليلة الدسم أو اللي يسمونها سنجل كريم single cream يكون فيها في الغالب ١٥٪ دسم وراح تعطي كريمة مخفوقه بس كون الدسم جدا قليل فيها ماراح تعطي كميه هواء كثير يعني ماراح تنفش زي العاديه ولا راح تثبت بعد زي العاديه عشان كذا تحتاج مثبتات من برا غير الدهن الموجود فيها . لو الدسم كان أعلى من ٣٨٪ موب شرط أحسن ! كون الدهن أكثر معناه إنه راح يتجمع مع بعض أسرع ويعطيك زبده قبل حتى لا يوصل لمرحلة الكريمه المخفوقة .عشان كذا أفضل شي للكريمة المخفوقة هو كريمة الخفق العادية whipping cream.

.

كريمة الخفق النباتيه (غالبا ينكتب عليها non dairy ) بعدوا عنها هنا قدر الإمكان ، هذي كريمة صناعيه ! مصنوعه من زيوت مهدرجة مالها أي أي ميزه على الكريمه الأصليه غير إن طعمها أستغفر الله . شي ثاني ، الكريمة اللي تجيك طويلة الأجل (بتلاقون عليها كلمة long life أو UHT وتعني ultra high treated يعني مبسترة على حرارات عالية) ولو إنكتب عليها كريمة خفق أو قشطة خفق راح تعطي نتائج جدا سيئة مقارنة مع الكريمه قصيرة الأجل لا من ناحية ثبات الكريمة أو حتى نفشتها أو حتى الطعم. فيه أنواع تنباع في السوق تلاقون عليها علم فرنسا وغيره وعليها صوره كريمة مخفوقه وكل هذا الكلام .. كونها من فرنسا موب شرط إنها أحسن هذي كريمة خفق طويلة الأجل بس مستورده وسعرها أغلى من المحلية . خلاصة الكلام .. أستخدموا كريمة خفق غير نباتية ، كاملة الدسم يعني نسبة دسم (٣٥-٣٨٪) ، قصيرة الأجل .. هذي راح تعطي أفضل نتيجة بالنسبه للماركات ما أعتقد يفرق كثير بس جربوا وشوفي وش اللي يعجبكم .

.

المكون الثاني هنا هو السكر ، السكر مكون إختياري بس هو يساعد على تثبيت الكريمة فترة أطول . أي نوع سكر ممكن يستخدم السكر الأبيض العادي ينفع بس السكر المطحون يفضل كونه أسهل يذوب . السكر البني ، العسل ، أو حتى شراب الذرة أو أي نوع سكر ممكن يستخدم هنا عشان يعطي نكهة ثانية للكريمه لو نبي . كمية السكر المستخدمه تقريبا من ملعقتين كبار إلى ٦ ملاعق كبيره لكل كوب قشطة خفق.

.

خيارات النكهة

.

خيارات النكهات ما تنتهي للكريمة . يمديكم تسوون الكريمة بأي نكهة تعجبكم عشان تمشي مع الأكل اللي أنتم تسوونه . الخلاصات السايله أو الجامده مثل الفانيلا ، الموز ، البرتقال وغيرها خيار جيد، نقط بسيطة تكفي. الشكولاته (سواء بودرة ومخلوطة في البداية أو مذوبه ومبرده شوي ومخلوطة آخر شي) و القهوه البودره (نسكافيه) بعد تنفع . قشور الحمضيات بعد ممكن تستخدم عشان تعطي نكهة للكريمة . البهارات بعد ممكن تستخدم مثل القرفه أو القرنفل أو الفلفل الأسود أو غيره .

.

تغير النكهة ممكن يصير بعد بإنكم تخلطون شي ثاني مع الكريمة آخر شي . مثلا نقدر نخلط جبن ماسكاربوني ونسوي كريمة مخفوقه بنكهة ماسكاربوني .. أو أي جبن كريمي ثاني مثل الفيلادلفيا أو الساور كريم أو غيرهم.

.

تغير نوعية السكر زي ما ذكرت فوق خيار ثاني لتعديل النكهة. إستخدام ميبل سيرب أو عسل أو دبس أو حتى سكر بني بيعطي طعم حلو للكريمة.

..

الطريقة

.

فيه طريقتين بشرحها للكريمه .

.

الطريقة الأولى ( الغير مثبتة ) :

.

كوب قشطة باااااااااااااااااااااارد .. لا تتهاونون أبدا بهذي النقطة !

رشة ملح

أي سكر أو نكهة لو تبون طبعا زي ما شرحت فوق

.

نبدأ أول شي بإننا نحط الصحن حق الخلط و المضرب حق الخلط بعد في الفريزر حوالي نص ساعة . الصحن يفضل يكون معدن بس القزاز بعد بينفع . البلاستك خيار جدا سيء هنا .

.

قشطة خفق

.

بعدين نحط الكريمه و رشة الملح و نبدأ نخلط على سرعه هاديه في البدايه إلين ما يبدأ الخليط يصير شوي رغوه بعدين نزيد السرعه على أعلى شي. نسوي كذا عشان ماتنرش كل الكريمة في وجهنا لو بدأنا بأسرع شي من البداية .

.

نبدأ الحين نخلط معه السكر (لو كنت بحط  معه سكر) و النكهات بأنواعها إلا الأنواع اللي تنحط آخر شي مثل الساور كريم مثلا .بعدين نخليه ينخلط إلين الدرجة المطلوبه .

.

نوقف خلط كل شوي ونرفع الخلاط ونشوف كيف شكل الخليط . إذا نبي كريمة مخفوقة نرفع الخلاط و المفروض يكون ماسك زي كذا :

.

كريمة خفق

.

لاحظوا إنه محافظ على شكله ، أبيض ناصع وإذا رفعنا المضرب حق الخلاط كيف الرؤوس حقته واقفه ما تستسلم للجاذبيه هذي اللي يسمونها مرحله الرؤوس الصلبة أو ال stiff peaks أو منقار الطير . أول ما نوصل هذي المرحله نوقف علطول ! أكثر من كذا وبيبدأ شوي شوي يقلب الخليط أصفر بعدين بتلاقون زبده ومويه زبده تحت .

.

أما إذا نبي كريم شانتيه نحلي الكريمه حقتنا و نسويها بفانيلا و نخفقها لدرجة أقل من منقار الطير يعني مفروض تصير إذا رفعتوا الخلاط فيه رؤوس واضحه بس تستسلم للجاذبيه عكس هنا . بس هذا الفرق الوحيد بينهم .

.

لاحظتوا كيف المسألة مافيها أي شي يخوف أبدا .. أنا أستخدمت هنا خلاط كبير أو عجانه .. بس اللي ما عنده أبدا موب ضروري يمديكم توصلون نفس النتيجة بالضبط بخلاط كهربائي يدوي أو حتى بخفاقة بيض عاديه ! .

.

هذا الخليط كونه موب مثبت يفضل يتقدم بسرعه كونه يطيح بسرعة .

.

الطريقة الثانية ( مثبتة ) :

.

هنا راح نثبت الخليط بشوي جيلاتين الجيلاتين يعطي قوة للكريمة ويعطينا قدرة نحفظها وقت أطول غير إنها كذا راح تصير ثقيلة أكثر في حال حبينا نزين كيكه مثلا فيها .

.

لكل كوب قشطة خفق نحتاج نص ملعقة صغيره جيلاتين + ملعقة كبيره مويه باردة .

.

ننقع الجيلاتين في المويه البارده ٥ دقايق تقريبا بعدين نحط المويه على حراره هاديه إلين يذوب الجيلاتين تماما . الحين نخلي خليط الجيلاتين كم دقيقه على حراره الغرفه إلين يبرد شوي (عشان لا نحط شي حار في كريمة وتخرب علينا الكريمة المخفوقة. تذكروا ! لازم تكون بااااردة) بعدين نخلطه مع الكريمة في نفس المرحلة اللي نخلط فيها السكر.

.

إنقاذ كريمة مخفوقة فاصلة

.

إذا لقينا إن الكريمة المخفوقة بدت تطيح علينا وتهبط :

.

ندخلها الثلاجه حوالي ساعة إلى ساعة ونص (بإفتراض إنها كانت شوي دافيه ) . ونرجع نخفقها شوي إلين ترجع زي ماكانت . أنتبهوا هنا كونها بترجع بسرعة دايما أستخدموا خفاقة يدويه لا تستخدمون خلاط أو عجانة أبدا عشان لا تخلطون أكثر من اللازم.

.

إذا غلطنا وزودنا خلط وبدأ الخليط يقلب أصفر :

.
الحل هنا هو إننا نزيد شوي قشطة خفق ونخفق بعد بخفاقة يدويه إلين يرجع زي ماكان . هذا الحل ممكن ينفع وممكن لأ حسب المرحلة اللي وصلنا لها في الخفق يمكن يكون فات الأوان خلاص وما ترجع زي ماكانت وفي هذي الحاله كملي خفق مرة ثانيه إلين تحولين الكريمة زبده و أستخدميها الجزأ الجامد من الخليط كزبده عادية و أرمي السايل .

.

الحفظ و الإستخدام

.

الكريمة المخفوقة تكون في أفضل حالاتها أول ما تنخفق بعدين تبدأ تطيح شوي شوي. بعد الخفق إما إنها تستخدم في وقتها ، أو ممكن تنحفظ حوالي يوم في الثلاجه بعد ما نغطي الصحن بنايلون . إذا جيتوا تستخدمونها أخفقوها بخفاقه يدويه شوي عشان ترجع لنفس الكثافة حقتها في اليوم اللي قبل. الكريمة المثبته (اللي حطينا عليها جيلاتين) ممكن تنحفظ إلى ٣  أيام بشكل جيد في الثلاجه (طبعا مغطية بنايلون) . في حال كانت الكريمة راح تستخدم لتزيين كيكة مثلا أو حشوه لشي لازم الشي هذا يتبرد بعد كون  الكريمه في الأساس حليب و الحليب يخرب ويحمض على حرارة الغرفه . الكريمة المثبته هي اللي في الغالب تستخدم لتزيين الكيكات و في الحشوات كونها تعيش وقت أطول .

 .

زي ما قلت في أول الموضوع الكريمة هذي إستخداماتها كثير . هذي بعض الأفكار البسيطة لها مع أشياء ممكن تتقدم معها :

.

* قرفة مع سكر بني … وقدموها مع باي مثلا تفاح أو غيره

* عسل مع زنجبيل . بعد ممكن مع التارتات الحاره أو الباي

* شيرة بانكيك ( أصليه ) مع قرفه أو جوزة طيب وقدموها مع البانكيك

* سكر بني ، ملح ، وتتقدم مع الإسكريم أو تشيز كيك قرع مثلا

* فانيلا مع كيكة برتقال مثلا ..

* شكولاته بيضاء مع تشيز كيك شاهي أخضر مثلا .. أو مع كيكة شكولاته مثلا .

* ملح وفلفل أبيض وشوي ساور كريم آخر شي وتتقدم مع خبز توه طالع من الفرن .

.

بودنج الكاراميل مع الكريمة المخفوقة

كاراميل بودينج مع كريم شانتيه

.

هنا قدمت البودنج هذا مثلا مع كريم شانتيه منكة بشكولاته بيضاء . نذوب شوي شكولاته بيضاء ونخليها تبرد بعدين نحطها مع الكريمة في آخر مراحل الخلط بس .

.

مولتن كيك مع ويب كريم وتوت

مولتن كيك مع ويب كريم

.

هنا سوينا مولتن كيك وقدمناها مع ويب كريم سادة مع شوي توت أحمر . الشكولاته في هذا الحلى قوية وطعمها باين ونحتاج شي يكسر هذي الحده وهذي القوة عشان كذا نحط شي خفيف ( الكريمة ) وش حامض وفي نفس الوقت تمشي نكهته مع الشكولاته اللي هو التوت الأحمر ومع شوي نعناع اللي بعد يمشي مع الشكولاته .. كذا وصلنا لتوازن حلو في الطعم و النكهة وما يصير الحلى ممل زي لو قدمناه لحالة .

.
Follow TopChefCooks on Twitter

94 comments

14 pings

Skip to comment form

    • ام عبدلله on 13 October, 2012 at 9:50 pm
    • Reply

    يعطيك ية اخوي على موضوع وشرحك الجميل
    لكن عندب سؤال محيرني ومختلفين عليه انا وزوجي وكنت ادور على اجابة لما وصلت هني
    سؤالي:نقدر نستعمل الوبينغ كريم للاكلات والشوربات مثل شورية كريم المشروم وغيرها من الاكلات اللي تنحط فيها كريم
    لاني اذكر كنت اسوي هالوصفات بكريم نوع ثاني مادري شنو اسمه
    بس زوجي مصر يبي يستعمل الوبينغ كريم .واللي جابه جاهز موجود بعلبة بلاستيك ومغطى بالالمنيوم مثل الروب يعني ومكتوب وبينغ كريم

    افدني الله يرضى عليك

    ام عبدالله

    1. إيه أكيد تقدرين … هي تنحط في الأخير عالشوربات وغيرها زي ما تفضلتي عشان تعطيها طعم كريمي ناعم ….

      الويبنج كريم يكون غالبا سايل وما يكون في علب زي الزبادي … طبعا هذا حسب علمي مدري الصراحة إذا فيه شي زي كذا بس أنتي متأكده مكتوب عليها ويبنج كريم بس !!

    • Anonymous on 2 October, 2012 at 1:53 pm
    • Reply

    بخصوص الكريمه افدتينا كثيرا افادك الله اسمحي لي بطلب ياشيف تنزلي لي طرقة ومقادير بسكويت الويفرالبتشكل بورقة كرتون فديو واكون شاكر

    1. هلا والله ….

      أنا منيب بنت ….

      ما أعرف اللي تقصدين الصراحة وما أنزل وصفات فيديو شوفي يوتيوب

    • حنان on 23 September, 2012 at 3:41 pm
    • Reply

    أشكرك من كل قلبي .. فيه اشياء اساسيه نغلط فيها واحنا مو عارفين السبب .. مدونتك هذي رائعه عمل متقن ماشاءالله.,
    حاولت ابحث قبل أسألك عن التشيز فروستنق.. اللي نستخدم فيها زبده وسكر وجبنة فيلاديلفيا ومالقيت لها وصفه هنا, انا احب اسويها مع كيكة الرد فيلفت ولكن قوامها غير متماسك وتذوب بسرعه.. هل ممكن اضيف لها جيلاتين ؟ واذا نعم انا استخدم 200 جرام جبنه كم يناسبها جيلاتين وشكرا لك

    • Anonymous on 22 September, 2012 at 3:05 am
    • Reply

    طيب لو سمحت الجيلاتين متى يضاف, بعد ما تنتفش وتوصل مرحلة منقار الطير ولا قبل؟ وهل اذا حطيت الجيلاتين اضربها بالخلاط ولا اخلطه بطريقة اللف؟ ياليتك تسوي لنا الطريقه فديو, لأني سويت قشطة الخلفق هذي كثيييييييير وما تضبط :”””””” خاصه اني افضل طعمها على باقي الطرق اللي كلها زبده وسكر, اعتبر طعمها الألذ

    1. هلا والله …

      دايما الجواب موجود في الموضوع :
      “بعدين نخلطه مع الكريمة في نفس المرحلة اللي نخلط فيها السكر.”

      الجيلاتين لتثبيت الخليط بس عشان يعيش وقت أطول هو ماله علاقة بنجاح أو فشل الكريمة المخفوقه. أقري الموضوع زيييييين وطبقيه بحذافيره وأضمنلك إن شاء الله يضبط معك.

    • رغدة on 9 September, 2012 at 3:07 am
    • Reply

    السلام عليكم .. يعطيك العافية شيف ..
    هل في فرق بين الويبيج كريم والدبل كريم في الحلويات .. يعني إذا وصفة طلبو heavy or double cream
    هل اقدر استخدم الويبينج كريم بدالهم ؟
    شكراً جزيلاً ..

    1. وعليكم السلام و الرحمة …

      حسب الوصفة. فيه فرق كبير بنسبة الدهن (٣٦ في الويبنج و حوالي ٤٥ أو أكثر حتى في الدبل) والدهن شي كبير في الحلويات فحسب هو ليش وكيف مستخدم مافيه جواب واحد مضمون الصراحة.

    • cup cake on 8 September, 2012 at 10:51 am
    • Reply

    ما شاء الله الشرح واضح و مفيد جدا
    و لو بدي احط لون عادي نفس الطريقة اعمل و اخر شي اضيف اللون ؟؟
    بحثت عن طريقة كرات الترافل و ما لقيتها يا ريت تكتب لي الطريقة
    و يعطيك الف عافية على المجهود الرائع

    1. اللون تحطينه آخر شي بالضبط ….

      ما نزلت طريقة ترفل للآن ولا راح أنزلها إلين أكمل مواضيع الشكولاته إن شاء الله

    • الاوتار on 6 August, 2012 at 6:43 pm
    • Reply

    مشكور على المعلومات المهمه انا احبها مع الكوروسون اي نوع ويكفي كريمة الخفق فخراً انها توضع فوق الاسبرسو

    • Anonymous on 21 June, 2012 at 2:00 pm
    • Reply

    مرحبا.
    شف مشكوره جهودك
    أنا عندي طلب وبحثت علية حتى دخت وماكنت ألاقية بالتفصيل أو بنجاح
    وهو راس العبد
    إلي تجي طبقة بسكوت بالأسفل فوقها كريما كثيفه ولزجه ومطاطية قليلا
    وفوقها طبقة شوكولا.
    يا ريت ياريت الله يدخلك الجنة نفسي أعملها بالبيت

    1. كريمة راس العبد هذي تسوينها بإنك تسوين كريمة مخفوقة مطعمة بأي نكهة تحبين زي ما شرحت في الموضوع بعدين تثبتينها بجيلاتين بعد زي ما شرحت في الموضوع. بعدين تشكلين الكريمة فوق قطع بسكوت أو كوكيز بإستخدام كيس حلويات أو ملعقة وتدخلينها الثلاجه عشان تجمد وتمسك شكلها.

      آخر شي تذوبين شكولاته وتحطين البسكوت وفوقه الكريمة على شبك تبريد بعدين تصبين الشكولاته فوقهم وهي راح تجمد.

    • امونه on 19 June, 2012 at 5:57 pm
    • Reply

    عندي سؤال بخصوص كريمه الخفق انا استخدم هذي النوعيه

    http://nsa08.casimages.com/img/2009/06/21/090621025507771456.jpg

    اخلطها بعدين اضيف معها سكر مطحون وتضبط لكن لما اجي اشكلها واني اشكله تمام شوي تذوب معي الباقي اللي بالكيس ليش ماا ادري ياليت نصيحتك اخوي

    وعندي سؤال اخر ابي اسوي قاناش واغلفه يتحمل حراره برى شوي مثل هالشكل عذرا لصاحبه الصوره

    http://a3.sphotos.ak.fbcdn.net/hphotos-ak-ash4/251695_235340119814306_7848021_n.jpg

    1. نوعية ممتازة ، نفس اللي أستخدم هنا …

      سويها بالضبط زي ما سويت …

      إذا كنتي تطولين و أنتي تشكلين وتخلينها وقت طويل برا أكيد بتطيح حاولي تبردينها إذا ما كنتي تستخدمينها وثبتيها بجيلاتين زي ما شرحت لو تبين تخلينها تستحمل أكثر بعد .

  1. جربت أعمل الكريمة
    وعملت كل شئ مثل ماقلت >> ماعدا اني نسيت احط الملح
    وجلست ساعه اخفقها بس مو جايه تضبط : (

    وجربت اعمل المولتن كيك
    طلع لذيييذ بشكل ماتوقعت كيذاا !!

    http://img04.arabsh.com/uploads/image/2012/02/28/0a3f424366fa.png

    ويعطيييك العافيه شيف 🙂

    1. جدا حلوة الصورة …

      الكريمة المخفوقة بتنخفق معك صدقيني جربي تسوين كل شي بالضبط زي ماقلت كل شي لازم يكون بااااارد هذا أهم شي.

  2. جربت أعمل الكريمة
    وعملت كل شئ مثل ماقلت <> فشت شوي لأني مو بسرعه صورتها

    يعطيييك العافيه شيف 🙂

    • Bushra on 4 January, 2012 at 7:02 am
    • Reply

    السلام عليكم
    اخوي طيب عادي لو استخدمت طويل الأجل ؟
    وهل اقدر استخدم الفانيليا الأعواد للنكهه .. ولا السايلة افضل ؟
    وشكرا

    1. وعليكم السلام …

      قلت راح يعطيكم أفضل نتيجة بس ماذكرت إن فيه مشكله لو أستخدمتوها.

      الفانيلا الأعواد دايما تعطي طعم أقوى و أحسن السبب اللي الناس ما يستخدمونها في كل شي هو التكلفه غالبا.

  3. الف شكر على اجابتك وصراحة احلا شي الكريمة الطازجة وراح اسوي بنصائحك وانتبه لكمية السكر

    وماتعرف قد ايش انا مدمنة عليها حتى بالكوفي احب ازينها بالكريمة

    وياليت دايم تتحفنا بوصفاتك وتسوي لنا كيكة اسفنجية المزينة بالكريمة والفواكة (التورتة)>> من احب الحلويات عندي

    ولاتقطع عنا بوصفاتك ونصايحك

    ربي يوفقك

  4. هلا شيف انا متابعتك من زمان واستفدت منك كثير فشكرا لك مقدما

    بس ابي افهم شي تقول ان السكر يثبت الكريمة

    انا استخدمت كريمة الخفق الطازجة من المراعي جدا لذيذة وطلعت مره متماسكة

    بس جيت احليها بسكر بعد الخفق هبطت وتحولت لشبه سائل

    سؤالي هل التوقيت مهم في وضع السكر

    ولو زودنا السكر اكثر من المقدار المطلوب يؤثر على الكريمة والا لا؟؟؟

    وسؤالي الثاني ايش تقصد بالكريمة النباتيه:

    فيه كريمات سائلة نباتيه هي الي تقصدها ؟؟؟؟ وايش رايك بكريمة لكتوفيل؟؟

    1. أكيد التوقيت جدا مهم ما ينفع تحلينها بعد ما تسوين الكريمة.

      كمية السكر محددها في الموضوع وحاط حد أعلى لها ولا كان قلت سكر وبس

      كريمة نباتيه يعني كريمة صناعيه عباره عن دهون صناعيه مع مويه وبروتين حليب ومثبتات ثانيه.

      لاكتوفيل مثال على الكريمات النباتيه كونها كريمة بدون منتجات ألبان ؟؟؟؟ مع إحترامي بس شي مقرف. أي أكل ماله أساس طبيعي برأيي شي مقرف خصوصا الأشياء الصناعيه بزياده زي الدهون الصناعيه هذي ترى بلاستك إلا شوي !! كيف ناكل شي زي كذا ؟

    • هيثم on 30 October, 2011 at 9:01 pm
    • Reply

    الله ينفعك وينفع بيك ويكتبلك جزيل الاجر

    • احلام on 16 October, 2011 at 7:30 am
    • Reply

    ممكن طريقه التراميسو الاصلي

    1. تلاقينها في صفحة الوصفات

    • ورد on 28 September, 2011 at 3:00 pm
    • Reply

    اهاااااااا هاذي الي عذبتني بس فكرة الجيلاتين ما جربتها والخلاط الي عندي بلاستكياترى غيرة هوياترى السبب؟

    1. سويه زي ماقلت بالضبط و إن شاء الله يضبط

    • bashar on 10 September, 2011 at 8:06 am
    • Reply

    تحية وبعد,,,

    ممكن حدا يساعدنا ويحكينا طريقة وكميات تحضير كريمة رأس العبد او دحبور

    1. كريمة راس العبد هذي تسوينها بإنك تسوين كريمة مخفوقة مطعمة بأي نكهة تحبين زي ما شرحت في الموضوع بعدين تثبتينها بجيلاتين بعد زي ما شرحت في الموضوع. بعدين تشكلين الكريمة فوق قطع بسكوت أو كوكيز بإستخدام كيس حلويات أو ملعقة وتدخلينها الثلاجه عشان تجمد وتمسك شكلها.

      آخر شي تذوبين شكولاته وتحطين البسكوت وفوقه الكريمة على شبك تبريد بعدين تصبين الشكولاته فوقهم وهي راح تجمد.

    • CREATIVE on 17 August, 2011 at 2:12 pm
    • Reply

    يعطيك العافيه يا شيف
    اذا ممكن طريقتك في المولتن كيك

    1. http://www.shamoa.com/vb/showthread.php?t=19571

    • lala on 26 July, 2011 at 7:48 pm
    • Reply

    الكريمة المخفوقة ..ومعمولة صـــح..!

    لها نكهة غير..غير

    بس عندي سؤال..

    الكريمة السايلة …يعني بعد فتح العلبة

    كم يوم تكون صالحة للأستخدام..؟!!؟؟

    1. كل شركه تبستر حليبها بشكل مختلف وبعد العلبه اللي تنحفظ فيها تسوي فرق ، دايما في مثل هذي الأشياء أمشي عاللي مكتوب عالعلبه.

    • koko on 11 June, 2011 at 11:15 am
    • Reply

    مشكوووووووووووووووووووور ابسويه واعلمك كيف طلع وانتقادات الاهل
    مشكور الله يعطيك العافيه

    • koko on 11 June, 2011 at 10:52 am
    • Reply

    مشكووووووووووررر من جد الله يعطيك العافيه
    يعني ما ستخدم قلليل الدسم
    معليش انا متحمسه وابي اسويها وتضبط
    بليزززز تحملني
    و ما فهمت “مو طويل الاجل”
    هذي وين القيه وش اس المنتج الي مو طويل الاجل
    انا قصدي اذا شريت قليل الدسم يخف دسامته/:
    انا من جد اسفه ابي اسووووووووووووويه

    1. سويه زي ما كتبت في الوصفه اللي عطيتك وبتطلعين بشي رهيب لا تخافين …

      تقدرين تسوينها بقليل الدسم بس الفرق في الطعم و القوام كبير غير إن الفرق في نسبه الدسم و السعرات موب ذاك الكبير فعشان كذا هو واحد من الحلويات الدسمه لو تبين تخففين أو كذا كلي كميه آصغر أو سويي حلى ثاني.

      الكريمة أو قشطة الخفق زي الحليب يجي منها طويل آجل ومنها قصير آجل بس ؟ مقدر أوضح آكثر من كذا ؟ طويلة الآجل بتلاقين مكتوب عليه طويله آجل بس.

      تلاقينه في كل مكان عادي جنب الحليب وكذا.

    • koko on 11 June, 2011 at 10:17 am
    • Reply

    طيب لو استعملت قليل الدسم بيزبط
    وحد تقول عنده الطريقه والمقادير
    4 بياض بيض
    700ملي فرش كريم
    250 حليب سايل
    200 سكر
    الطريقه
    يضرب البيض حتى ينفش ثم تحط السوائل من دون طبخ
    وبعد يدخل الفرن 9 دقايق بس ويطلع من الفرن
    هذي صح ولا غلط

    1. هذا مررررره خفيف بدون صفار بيض وبكريمه قليله الدسم ومخففه بعد بحليب ، هذا شكله حق رجيم ؟.. هو صح بيعطيك شي يشبه الكريم بروليه ، بيعطيك كسترد وصح محروق من فوق بس في الطعم ماراح يكون نفس الشي أبدا.

      يضبط ولا لأ هذي موضوع ثاني .. هو يضبط من ناحيه إنه بيعطيك كسترد ومحروق من فوق . بس السؤال هو هل هو كريم بروليه ولا لأ ؟ لأ طبعا لأن الكريم بروليه معروف إنه دسم شوي ، أدسم من باقي أنواع الكسترد زي الكريم كاراميل مثلا. قلة الدسم تآثيرها كبيرعلى الكسترد . أولا كونه مامعها صفار بيض الطعم بيكون آخف بكثير وبتلاقين لونه أبيض لماع بدال ما يكون أصفر زي ما الكريم بروليه مفروض يكون. ثانيا كون الدسم آقل بتلاقين القوام بعد غريب شوي ، بتلاقينه يتفتت تقريبا أكثر من كونه ناعم وحريري زي ما الكريم بروليه مفروض يكون.

      بكون صريح معك وهو رأيي الشخصي فقط وكل واحد وذوقه .. بس أحس الوصفه هذي طعمها سواليييييف. يمكن لأني حساس من ناحيه الكريم بروليه شوي و أشوفه شي يستسهلونه الناس ولو إنه موب شي كل واحد يضبطه بس أنتي وذوقك.

      بالنسبة لوقت الطبخ ، بعد أسمحيلي أقولك بس اللي كاتب الوصفه ماعنده سالفه من هذي الناحيه .. جربي الوصفه هذي بإنك تحطينها بصحن واحد كبير وجربي تحطينها بصحون صغيره مره وجربي تسوينها بعد بصحون وسط وحطيها زي ما قال في الوقت وشوفي كل واحد كيف يعطيك نتيجة غير وهذا بس بمجرد تغير شكل أو حجم الصحن.

      بتلاقي قوام وطعم كل واحد طلع مختلف .. هذا لأن الكسترد ما ينفع تقيسين بالوقت مهما كنتي فنانه في الطبخ ودقيقه لازم تعرفين تشوفين وتحكمين بالنظر.

    • koko on 11 June, 2011 at 7:17 am
    • Reply

    مشكووور طيب كم نست الدسم بناعك
    واكون شاكره لك تعونك معي

    1. نسبة الدسم ٣٥٪

    • koko on 11 June, 2011 at 6:43 am
    • Reply

    طيب بليزززززز
    انا ذقته وكان مرررر خفيف حتى سكرررررره خفيع معليش طيب تحط صوره للقشطه الخفق الخفيفه بلللللللللليز
    والله يعطيك العافيه
    من جد خاطري اسويه

    1. والله ما أعرف الصراحة أنا أعرف أسويه بالطريقة الصح وهي اللي كتبتلك أي شي غير كذا ماجربت الصراحة.

      القشطة الخفيفه مافهمت وش قصدك ؟ عموما أنا منيب في السعوديه ما تفرق لو صورت اللي عندي .

    • koko on 11 June, 2011 at 4:30 am
    • Reply

    مرحبا انا من الرياض
    فيه فرق بين قشة الخفق و الفرش كريم
    كم من مره حاولت اسوي “كريم بروليه”ب قشطة الخفق بس من جد تطلع مرررررره ثقيله
    ومعليش تعطيني طريقه مظبوطه
    بلللللللللللللللللليز

    1. غالبا هم نفس الشي . أقول غالبا لأن التسميات و التصنيفات تختلف من دوله لدوله . في فرنسا لو قلتي فريش كريم بيعطيك شي يشبه الساور كريم.

      http://msa6el.mbc.net/vb/tt68278.html

      الموضوع قديم بس الوصفه جدا ممتازه و الكريم بروله أصلا مفروض يكون ثقيل ودسم ..

    • الأمـل on 15 May, 2011 at 6:33 pm
    • Reply

    الله يسعدك ماقصرت شكرا لكل معلومه هنا *

    • ام البدر on 2 April, 2011 at 6:04 pm
    • Reply

    شكرًا على ألطريقه يعطيك العافيه ممكن أعرف نوع القشطه اللي استخدمتها

    1. هلا والله …

      أنا منيب في السعوديه والله .. الأنواع اللي عندي موب شرط تلاقينها عندك .. بس حطيت كل معلومه تحتاجين عشان تختارين نوع القشطة إن شاء الله تنفعك

  5. مشكورة على الوصفة

    1. حياك .. بس هذي موب وصفه .

    • عفاف on 11 February, 2011 at 8:07 am
    • Reply

    الله يسعدك وين ما كنت
    الا وش رايك بالكريمه النباتيه
    الصراحه مريحه ونتيجتها طيبه

    1. هلا والله ..

      كريمة نباتيه ؟؟؟ من الإسم تحسين فيه شي خطأ ؟؟؟؟؟ صراحة أستغفر الله من جد طعمها مقرف وبعد مليانه دهون مهدرجة يعني مافيه أي سبب مقنع ليش أستخدمها ؟

    • totah :) on 20 January, 2011 at 7:52 am
    • Reply

    يعطيك ألف عافيه شيف مشكور على الطريقه

    اجل احسن اني اخلط الكريمه بمعدن وادخله قبل نص ساعه بالفريزر

    دايم انا اخلط بوعاء بلاستك اجل ابدا اسوي طريقتك

    يعطيك الف عافيه الصراحه المفروظ تسويلك كتاب على هالطبخات كل وحده ازين من الثانيه

    1. الله يعافيك …

      أهم شي يكون شي بارد ..

    • SARA on 12 December, 2010 at 11:39 pm
    • Reply

    مشكور ماقصرت..
    هل الكريمه المثبته مهب حاليه ولهب دسمه ولا تذوب مع حرارة الجو خاصه للي بياخذها معه لاستراحه لأن هذي مشاكل الكريمه اللي دايم اعاني منها 🙁

    1. هلا والله …

      حاليه أنتي تتحكمين في هذا الشي لاحظي إني ماحطيت السكر لازم ! هو إختياري حسب إستخدامك للشي اللي معه .

      دسمه إلا هي دسمه بس أخف من كريمة الزبده مثلا أو البتر كريم .. راح تذوب مع الحرارة في النهايه . التثبيت مقصود فيه إنه يخليها تعيش في الثلاجه 3 أيام أو أكثر بدال ما تنهد عليك زي لو ما ثبتيها .

    • Anonymous on 12 December, 2010 at 2:37 pm
    • Reply

    الله يعطيك العافيه
    انا من الناس اللي مااحب كريمه الخفق ؟
    يمكن عشان الا سباب اللي ذكرتها
    حسبي الله على هالكافيهات ياانهم يلعبون علينا ….

    1. الله يعافيك ..

      الموضوع موب عن كريمة الخفق بس كشي عالجنب في أكله ! .. هذا ما يهمني كثير ترى .. اللي يهمني إن فيه وصفات كثييييير تحتاج إنك تخفقين كريمه وبدال ما أكتب المووضع مليون مره في كل موضوع حطيت كل أساسيات خفق الكريمه . خلاصة الكلام لو تحبين الموس تراها نفس الشي حقت الكافيهات هذي أستغفر الله ..

    • وفاء on 12 December, 2010 at 11:49 am
    • Reply

    السلام عليكم

    ماشاء الله عليك ,,, ليش ماتنزلك كتاب

    شيف ممكن نعرف ايش افضل كريمه موجوده بالسوق

    1. وعليكم السلام ….

      كتاب ما أْعتقد والله .. لأن ترى أغلب اللي أجيبه معروف أصلا ماطلعت بشي جديد من الأساس ؟

      أفضل كريمة والله ما أعرف مدري أصلا وش اللي متوفر .. الوحيده اللي أشوفها قصيرة أجل هي المراعي ؟ بس يمكن فيه أنواع ثانيه ما شفتها .عموما نوعية الكريمة هذي آآآآآخر شي واحد ممكن يلاحظه في أي حلى . لا تركزين كثير فيها .. فيه فرق بين طويل أجل وقصير أجل كبير صح .. بس بين كريمتين طازه ما يفرق كثير .

    • ام اقوبي on 12 December, 2010 at 8:33 am
    • Reply

    يعطيك العافيه

    1. الله يعافيك …

  6. تسلم يدينك . اقتراحات النكهه رائعه . جذبني تشيز كيك الشاي الاخضر ياريت الطريقه 🙂 لاهنت

    1. تشيز كيك الشاهي الأخضر سهل هو زي أي تشيز كيك عادي …
      سوي نفس وصفة تشيز كيك القرع بالنسبه للخطوات طبعا المكونات هنا :
      القاعده ممكن تتسوى ببسكوت عادي أو ديجستف … نفس كمية تشيز كيك القرع حوالي ٢٢٠ جرام بسكوت مع نص أصبع زبده
      ٩٠٠ جرام جبن فيلادلفيا
      كوب سكر
      ٤ بيضات
      ٥٠٠ جرام شكولاته بيضاء من أففففففضل نوعية في السوق . الشكولاته البيضاء اللي نوعيتها سيئة راح تجمد عليك هنا وتخرب كل شغلك عشان كذا أشتري أفضل أنواع .. لو لقيتي لندت السويسريه هذي ماعليها كلام . ذوبيها شوي شوي في حمام مائي بعدين خليها تدفى على حراراة الغرفه شوي .
      ٦ ملاعقة صغيره بوردة شاهي أخضر .. اللي هي الشاهي الأخضر العادي بس جيبي نوع يكون بودره موب خشن .

      سويي نففففس الخطوات .. سويي القاعده . حطيها في الفرن . حطيها في الثلاجه تبرد ..

      بعدين الحشوه نففففس الشي .. الجبن مع السكر وخليهم ينخلطون شوي بعدين حطي الشاهي و الشكولاته البيضاء وحركيهم شوي بعدين البيض بيضه بيضه وبس …. الباقي كملي زي التشيز كيك عادي … حمام مائي على نفس الحرارة لنفس درجة الإستواء ونفس وقت التبريد .

    • Anonymous on 12 December, 2010 at 2:38 am
    • Reply

    والله موضوع راااااااائع ماتتخيل وشلون العالم حايسين بهالكريمه عن جد والله لوتمر المنتديات ماتلقى الا البنات وش اسوي بالكريمه ماعت جمدت داخت عيت مدري وشو خخخخ حاله معها
    الله يوفقك مواضيعك بالصميم

    1. هلا والله …

      عادي تصير مع الكل .. هي أشياء بسيطة الواحد يتعلمها وخلاص …. حياك ومشكوره على مرورك ..

    • Anonymous on 11 December, 2010 at 11:19 pm
    • Reply

    يسلمو حبيب قلبي ماقصرت يعطيك الف الف عافية على مجهوداتك

    والله يوفقك في اختباراتك وينولك مرادك يا رب

    1. الله يسلمك …

      آآآمين يارب الله يسمع منك …

    • Anonymous on 11 December, 2010 at 3:27 pm
    • Reply

    شيف مشكور الجيلاتين اذا خلطته مع الماء اخليه عالنار ثواني والا اكثر؟

    1. الجيلاتين لازم أول شي يشرب المويه قبل لا يذوب فيها . حطيه في المويه ٥ دقايق كذا بعدين حطيه عالنار على حرارة خفيفه . موب مهم يغلي أو كذا بالعكس أصلا ما نبيه يغلي أبد . حطيه إلين يذوب بس راح ياخذ ثواني بس عشان يذوب كونها كلها ملعقة كبيره مويه

  7. أكيد … الدريم ويب من قال إنه كريمة خفق أصلا ؟ هذا شي وهذاك شي !! الدريم ويب خطوتين ويصير بلاستك ترى هههههه من جد والله .

    حياك ومشكوره على مرورك .

  8. أحبها مع الفاربتشينو

    واقتراح القرفه والسكر البني موفق جداً جداً

    أهم شي لحد يقولي دريم ويب ترا الطعم فرررررررق

    تسلم ولا هنت ، شغل جبااار كالعادة

  1. […] … Mixed Fruit Pavlova » Top Chef Blog .. مدونة توب شيف على الكريمة المخفوقة … Whipped creamمولتن كيك .. Molten Chocolate Cake » Top Chef Blog .. مدونة توب شيف على […]

  2. […] نقطع الفواكه إذا كانت تحتاج تقطيع. بعدين نسوي كريمة مخفوقه بالفانيلا بس بدون سكر. اللي ما يعرف كيف يسوي كريمة مخفوقه يشوف الموضوع هنا. […]

  3. […] هنا عدد من التغطيات و الحشوات المشهوره و المهمة مثل الكريمة المخفوقة و الجاناش و تكلمت عن البتركريم بشكل عام وعطيت مثال له […]

  4. […] أو تتقدم مع إسكريم ، سوربيه ، فروزن يوجرت أو حتى كريمة مخفوقة […]

  5. […] هو رغوه ، وزي ما شرحت في موضوع الكريمة المخفوقة الرغوه هي فقاعات هواء مغلفه بسائل ومثبتة بشي . في […]

  6. […] ممكن زنجبيل ملبس أو ممكن مثلا قرع ملبس بيطلع حلو بعد . الويب كريم بأنواعه بعد بيطلع حلو .. الكراميل أو صوص الكراميل بعد […]

  7. […] أو نقدمها مع إسكريم أو صوص فواكه أو فواكه كاملة أو كريمة مخفوقة (زي ما سويت بس مع شوي سكر عشان تكسر […]

  8. […] نقطع الفواكه إذا كانت تحتاج تقطيع. بعدين نسوي كريمة مخفوقه بالفانيلا بس بدون سكر. اللي ما يعرف كيف يسوي كريمة مخفوقه يشوف الموضوع هنا. […]

  9. […] هنا !! . اللي يبي يعرف أكثر عن الأنواع حقت الكريمة يقرأ هنا .  الدهن اللي في الكريمة يعطي الجاناش نعومة إضافيه […]

Leave a Reply

Your email address will not be published.

%d bloggers like this: