المرانج السويسري .. Swiss Meringue

هلا والله ….

اللي ما قرأ الموضوع الأول حق المرانج مهم يقراه قبل يقرأ هذا .

لا تخلون الإسم يخوفكم . المرانج السويسري تقريبا زي المرانج الفرنسي الفرق إننا نخفقة هنا فوق حمام مائي و نستخدم سكر أكثر بس .

المرانج السويسري يتميز بإنه مرانج مطبوخ و كثيف . كونه مطبوخ هذا يخليه ثابت أكثر وبعد يموت البكتيريا اللي فيه وعشان كذا هو ممكن ينوكل ني سواء لحاله أو بإننا نسوي منه مثلا تغطية كيك ( البتر كريم السويسري ) . غير كذا هو كثيف يعني شرط كمية السكر اللي فيه كبيره وعشان كذا بتلاحظون إن فقاعاته أضيق من الفرنسي . السكر هنا يحمي البيض من إنه يتكتل علينا في الحمام المائى وعشان كذا مستحيل يتسوى هذا المرانج بدون سكر أو بسكر قليل .



الإستخدامات

 


المرانج هذا له تطبيقات كثير وكلها تستفيد من خواصه اللي ذكرت فوق . أول فائدة هو إنه ممكن ينصنع منه بتر كريم أو كريمة زبدة سويسرية . هذي الحشوة أو التغطيه جدا عملية ولذيذة ( برأيي ألذ تغطية كيك ) وممكن تتطعم بأي نكهة ( راح أنزلها بموضوع مفصل ) . المرانج بعد ممكن ينخلط مع حشوات ثانيه أو أساسات ثانيه عشان يخففها شوي أو ينفشها مثل السوفليه أو الموس .ممكن ينطبخ في حليب أو مويه مغليه خفيف ونقدمه مع كسترد هذا يسمونه floating islands أو الجزر الطافيه .

 

المرانج هذا لو تجفف في الفرن يصير شي زي البسكوت يقرمش وطعمه تقريبا زي المارشمالو . ممكن هذا المرانج يتجفف شوي ونصنع منه كوكيز مرانج أو ممكن يتشكل وينحشي زي البافلوفا مثلا . ممكن بعد ينصب في صينية باي أو تارت ويتسوى منه قشرة للباي أو التارت اللي يسمونها إنجل باي angel pie . ممكن بعد يتشكل بأشكال حلوه ( فطر مثلا ) ويتجفف وينصنع منه زينات للكيك . مثلا فيه كيكه معروفه اللي هي” بوش دي نويل ” bouche de noel  اللي هي تقريبا سويسرول على شكل جذع شجرة يقدمونه في الكرسمس وهذي مزينة بفطر مصنوع من مرانج . المرانج السويسري كونه كثيف وضيقه فقاعاته أكثر من الفرنسي و الإيطالي هو المرانج المستخدم في الغالب عشان يغلفون إسكريم مثلا زي في ال baked alaska .إستخدامات المرانج هذا كثيره وهذي مجرد أمثله لا أكثر .

 

 

فطر مرانج

لاحظوا الفطر هنا هذا مصنوع من مرانج

 

 

 

 

الطريقة

 


للمرانج السويسري كمية السكر هنا تكون ٤ ملاعق كبيرة لكل بيضة . يعني كل ٤ بيضات نستخدم كوب سكر . تقليل السكر موب خيار هنا ! السكر مكون أساسي لهذا المرانج بدونه بتسوون شكشوكة موب مرانج .

 

كل الأشياء اللي تنطبق على المرانج الفرنسي تنطبق هنا . يعني البياض لازم يكون نظيف وخالي من أي دهن أو نقط صفار و الصحن معدن إلخ …. اللي ما قرأ موضوع المرانج الفرنسي يقراه هنا .

 

 

الطريقة :

 

١ ـ نحط البيض مع السكر في صحن معدني .

 

٢ـ نسخن قدر صغير فيه شوي مويه ( حوالي ١ سم بس ) إلين تبدأ المويه تغلي على غلية جدا خفيفه . المويه مفروض ما تلمس قاع الصحن المعدني .

 

٣ ـ نحط الصحن اللي فيه البيض فوق البخار ونبدأ نخفق سواء بيدنا بخفاقة يدوية أو بخلاط يدوي كهربائي . السكر راح يذوب في هذي المرحلة و الخليط راح يتحول للون أبيض زي المارشمالو الذايب تقريبا .

 

٤ ـ نختبر الخليط بإننا نلمس المرانج ، المفروض ما يكون فيه أي أثر للسكر يعني إذا فركنا الخليط بين أصابعنا ما نحس بالسكر و حرارة الخليط مفروض تكون شوي دافيه . للي عندهم ميزان حرارة مفروض يكون تقريبا ١٣٠ فهرنهايت .

 

swiss meringue

 

٥ـ الحين هنا نبدأ الخفق . نشيل الصحن المعدني من الحمام المائي و نبدأ نخفق بسرعة عالية زي ما سوينا في المرانج الفرنسي العادي إلين يوصل الخليط للمرحلة اللي نبيها ويبرد شوي ( شوفوا موضوع المرانج الفرنسي عشان تعرفون وش المقصود بمراحل المرانج ) .

 

 

swiss meringue

 

وبس هذا تقريبا كل شي تحتاجونه للمرانج السويسري …

 

64 comments

7 pings

Skip to comment form

    • salma on 26 September, 2014 at 10:30 pm
    • Reply

    عفوا هل عندك صفحة على الفيس بوك؟

    • salma on 26 September, 2014 at 10:18 pm
    • Reply

    السلام عليكم
    شكرا لك اول مرة اجد مثل هذا الجهد العملاق وهذه الامانة
    حابة اسالك سويس ميرنغ بتركريم جهزتها بطريقة من الفيس بوك طلعت جميلة بس عاطيين الحرارة اللازمة للبياض مع السكر 160 فهرنهايت وطبقت الوصفة نجحت
    ولكن لما خزنتها في الثلاجة وطلعتها ثاني يوم كانت شيء اخر مش عارفة ايش مثل الزبدة بس قوامها اثقل …. ياريت تفيدني هل درجة 160 فهرنهايت صحيحة؟ وكيف نخزنها في البراد او الثلاجة !؟ هل تخرب اذا خزنا الكريمة في الثلاجة! ؟ ويمكن اخزنها خارج الثلاجة؟
    شكرا لك

    • Anonymous on 2 June, 2014 at 1:08 pm
    • Reply

    مرحبا شيف معلوماتك رائعة وشرحك وافي
    رجاء حار بدي منك رد على سؤالي لأنه صرلي زمان وانا عم ابحث عن تغطية مناسبة للكيكات بالقوام وبالطعم ولقيت انسب شي المرانج السويسري بس للأسف صرت مجربته كتير وماعم يظبط مشكلتي انه بعد ماشيله من عن النار عم اخفق كتير بس ماعم يجمد ابدا وعم يضل متل اللبن او الزبادي ومتأكدة انه مافي قطع صفار ومستخدمة وعاء ستانلس ياريت اعرف شو الحل رجاااااءا

    1. تأكدي من حجم البيض. أوزني الصفار ، كل صفار مفروض يكون تقريبا ٣٠ جرام لو أقل معناها البيض صغير وبيكون السكر جدا كثير كذا.

      بعد ما تشيلينه من الحراره المرانج يحتاج وقت طويل نسبيا عشان يوصل منقار الطير … كلمة كثير ما توصف كم دقيقة تقريبا.

    • Rania on 30 April, 2014 at 8:14 pm
    • Reply

    مادري شفيه مانزل الكومنت كامل المهم كنت كاتبه انو ماصار واقف زي المرانق حقك صاير ذايب كانه ماكرون تعرف السبب؟ وطول وهو يخلط عيا يوصل للقوام المطلوب الي هو منقار العصفور اعتقد اسمه كذا

    1. ممم ، من يوم يصير شي غلط الأفضل تحلين المشكلة في وقتها. كان المفروض توقفين خلط وتعيدين المرانج ببيض وسكر جديد. الدقة مطلوبه دااااايما.

    • Rania on 30 April, 2014 at 8:10 pm
    • Reply

    سويت حمام مائي وانطبخ البيض شوي للاسف

    • Alaa on 25 December, 2013 at 10:07 am
    • Reply

    أخي كيف يتم صنع الأشكاال مثل الفطر والورد من السويس ميرانغ

    1. يشكلونها بقمع حق حلويات عادي ؟

        • Alaa on 28 December, 2013 at 7:56 pm
        • Reply

        طيب أخي وإن أكثرت أسئلة …. هو نفس هاذ الميرانغ نقدر نشكل فيه والا في أي إضافة ؟؟؟ وهل يمسك بدرجات حرارة العالية نسبياً
        ومشكور سلفاً^^

          • Top Chef on 30 December, 2013 at 5:03 am
            Author

          التشكيل هنا شوي صعب لأنه يتلصق بشكل كبير زي المارشمالو السايل تقريبا فصعب تطلعين بأشكال منتظمه.

          هذا ما يذوب أو يخرب مع الحرارة بس أرجع وأقول تخيلي الطعم كيف بيكون في الفم هو يتلصق بقوه.

    • Anonymous on 24 October, 2013 at 5:32 pm
    • Reply

    طيب شيف السكر نحطه بعد ما يصير الرغوة وعلى دفعات زي ما قلت في الميرانغ الفرنسي؟

    1. ما يفرق. الهدف من التسخين هو تذويب السكر بشكل أساسي وطبعا تثبيت وطبخ بروتين البيض عكس الفرنسي اللي لازم نكون حذرين أكثر.

    • Anonymous on 22 October, 2013 at 2:58 pm
    • Reply

    يالحبيب المرانق زهقني ما هو براضي يثقل
    الحمام المائي بعد الغلية اخليه عالنار ولا اشيله؟

    1. تخفق البيض والحماما عالنار طبعا إلين يوصل الحراره المناسبه بعدين تشيل الصحن اللي فيه البيض وتكمل خفق .

    • حسام on 30 September, 2013 at 3:26 pm
    • Reply

    هلا شيف، من زمان ادور ع شخص بنفس دقتك وامانتك في الوصف، مو مثل اغلب “الشيفز” العرب اللي عنا، يا قلبي لا تحزن بس
    يعطيك الف الف عافية على كل شي، عندي هنا سؤال عن الوصفة
    هل ممكن المرانج السويسري ينحفظ؟ طبعاً مفروغ من هالقصة بالنسبة للفرنسي ماينحفظ بس السويسري مطبوخ + فقاعاته كثيرة وضيقة،، هل هذا يسمحلنا نحفظه بالثلاجة؟
    البيكد الاسكا من الذ الوصفات بالنسبة لي، بسوي مرانج مطعم بقشور برتقال والحشوة ايسكريم دارك تشوكلت وتحت طبقة كيكة فانيلا،
    فسؤالي، لانه مشوار بالنسبة لي اعمل كل شي قبل وقت التقديم، ولاني بسوي الحلا لعزومة، هل ممكن اجهز الحلا قبل بيوم، مع المراج طبعا واحفظه بالفريزر ووقت التقديم احطه بالفرن يتحمر؟
    او كيف بيكون بالضبط؟
    وسؤال “غبي” شوي، هل فيه طريقة اشعل فيها البيكد الاسكا غير الفودكا؟ شي متوفر بالسعودية لاني اعرف انه مع الحرق كل الخمور تتبخر بس بالحالتين مافيه خمور هنا،

    1. المرانج السويسري و الإيطالي ثابتين أكثر من الفرنسي وعشان كذا ممكن ينحفظون بس حط في بالك إنهم ماراح يعيشون وقت طويل وبعد حط في بالك إن العمل فيهم وهم باردين جدا جدا صعب كأنك تحاول تشكل مارشمالو. بس ليش تعقدها على نفسك ؟ سويي أي نوع مرانج مطلوب للوصفة اللي راح تسوي ، سويي البيكد آلاسكا وحطها في الفريزر ودخلها الفرن من الفريزر قبل التقديم وبس ؟ ليش تسوي مرانج قبل بيوم وتخليه في الثلاجه وتتعب نفسك ثاني يوم وتغطي الكيك بالمرانج وقت الزحمة ؟

      مممم ما أعرف الصراحة ، ما أظن فيه شي يولع زي الكحول ممكن يستخدم في الأكل.

        • حسام on 2 October, 2013 at 1:51 am
        • Reply

        يب هذا كان قصدي، مو انه اسوي المرانج قبل يوم، كنت اقصد هل ينفع الحلا كله يتسوى قبل بيوم
        طيب شيء ثاني، عندك اقتراحات لنكهات بخصوص البيكد الاسكا؟ نكهات بنطلع رهيبة برايك، اعرف انه مسالة ذوق لكن بالحلا بالذات اغلب وصفاتك واختياراتك تعجبني، فمجرد فضول
        ويعطيك العافية، ماتوقعت ترد بهالسرعة

          • Top Chef on 2 October, 2013 at 1:06 pm
            Author

          الخيارات كثييير في النكهات. شف تركيبات نكهة حولينك تحبها وحولها لبيكد آلاسكا.

          كمثال عندننا تارت معروف اللي هو تارت الليمون بالمرانج. إحنا عندنا مرانج هنا وش اللي يمنع إنك تسوي إسكريم أو سوربيه ليمون وممكن بدال الكيك تحط قاعدة تارت أو حتى كيك عادي وتسوي بيكد آلاسكا ليمون بالمرانج. النكهتين تمشي مع بعض في التارت غالبا بتمشي في كل شي.

          خذ نكهات كلاسيكيه ومستحيل تغلط.

          منجا مع باشن فروت
          منجا مع فلفل حار
          منجا مع جوز هند

          شكولاته ونعناع
          شكولاته وبرتقال
          شكولاته وكرز
          شكولاته وتوت
          شكولاته وبندق

          شاي أخضر وشمام

          كرز أو خوخ أو مشمش ولوز

          قرفة وتفاح

          بهارات مع قرع

          ليمون مع نعناع

          كثييييير النكهات بتتعب وأنت تحاول تذكرها. تذكر إن في الطبخ إذا لقيت شي يمشي مع شي هو غالبا بيمشي معه في أي تطبيق ثاني فخذ أفكار من حلويات ثانيه أو حتى من كوكتيلات تعجبك أو من موالح ، النكهات نكهات ما تفرق وين أو كيف تطبقها.

    • لولو on 21 August, 2013 at 6:15 am
    • Reply

    قصدي بينفع وضع فانيلا مع المرنج في حالة خبزه في الفرن (المرانج يتجفف شوي ونصنع منه كوكيز مرانج )؟

    اي نوع مارنج بينفع يتجفف ونصنع منة كويكز مرنج ؟ الفرنسي ولا السويسري ولا الايطالي

    1. أكيد ممكن … ويمديك تحطين أي بهارات أو أعشاب أو مكسرات بعد ….

      كل الأنواع ممكن تتجفف في الفرن. كل واحد بيعطي قوام شوي مختلف عن الثاني.

    • لولو on 20 August, 2013 at 3:09 am
    • Reply

    جزاك الله خير
    يمن وضع فانيلا مع اخر رشة سكر وقت الضرب علشان بدي اعمل المارنج كويكز

    اي نوع مارنج بينفع ينعمل كويكز الفرنسي ولا الايطالي ولا السويسري ؟ ومين افضل واحد ؟

    1. الصراحة مافهمت المكتوب …. يمن قصدك فيها يمكن ؟ مرانج كويكز ؟ هذا إيش ؟ مافهمت هل تبين تغطية لكوكيز أو شي ثاني.

      مافيه أفضل مرانج كل واحد له إستخدامات وصعوبه

    • Anonymous on 22 April, 2013 at 11:22 pm
    • Reply

    لو سمحت شيف اقدر احط سكر بني بدال الابيض ؟

    1. أكيد ممكن …

    • ام رفيف on 16 November, 2012 at 5:44 pm
    • Reply

    السلام عليكم
    انا شفت نفس طريقتك بس حطو بعد ما برد بياض البيض زبدة مقطعة قطع صغيرةلامهو مخلوط ولا بسكر بدرجة حرارة الغرفه ايش اسمو
    وهل يكون جامد و ينفع للحشو لاني اخذ وقت في تزين الكيك بالفاوندون واخاف الحشوة تسيح

    احس مشكله الشعب السعودي ومنهم انا طبعا
    هيا الكريمه تسيح ماتسيح جامدة تتحمل تجلس برة التلاجة زي كيكات الزوجات نجلس بالساعات ولا كإنو شي ايش يناسب الكب كيك وايش مايناسبو يبغالنا موضوع خاص لهذ الشي

    واسفه اذا اتكرر سؤالي ما الحق اقري المواضيع بسبب تعليق النت

    1. وعليكم السلام و الرحمة ….

      هذا مرانج سويسري … هذا موب بتركريم !!! اللي تقصدين بتر كريم … فيه وصفة ثانيه موجوده في المدونة إسمها بتركريم المرانج السويسري وفيها نضيف الزبدة زي اللي شفتي ، هذي شي وذيك شي.

  1. اوكي واذا حطيته بالفرن شلون اعرف انه استوا وخلص؟

    1. بسكوت المرانج موضوعه ثاني. شوفي البافلوفا في المدونة

    • رائد on 16 July, 2012 at 12:33 am
    • Reply

    يعطيكك العافيه شيف
    بسئلك هنا المكونات 4 بيض كاملين
    او 4 بياض بيض

    1. بياض طبعا

  2. عفوا ازعجتك بالنسبة للتغليف

    بس انا جربته امس وطلع معي نفس الصورة لكن ماقدرت اغلف فيه الكيكه لانه فيه نوع من اللزوجه ؟.
    هل من الممكن اغلف فيه الكيكة وادخلها للفرن تجمد او … ان شاء الله وصلت الفكرة
    لان عندي تحدي اسوي تورتة نجاح وابي اسوي شيء جديد عن القاناش وكريمة الزبدة ..

    جزيتم خيرا

    1. فيه فكرة لازم تفهمينها في الحلويات. كللللل الحلويات اللي تشوفين في العالم هي كلها عبارة عن كم مكون أساسي مخلوطين ومركبين على بعض بطرق مختلفه. الإبداع يكون بكيف تخلطينهم. إذا تبين تسوين شي جديد تقدرين تسوين شي جديد بكريمة زبدة أو بجاناش ، كأبسط مثال جربي تنكهين كريمة الزبدة بنكهة جديدة عليك وعلى اللي بيذوقونها وحطيها فوق كيكة بنكهة بعد مميزه. كمثال عندك كيكة الموز بفروستنج البينت بتر شي رهيب وغريب مع العلم إنه ما زال كيك عادي وفوقه بتر كريم.

      الفروستنج هذا صعب شوي في الدهن وهو غالبا ينحط كصمغ عالكيك عشان ينحط فوقه شي ثاني مثل إنك ترشين مكسرات أو جوز هند مثلا سواء على جوانب الكيك بس أو تغطين الكيكة فيها أو تقدرين تقدمينها زي ما هي أو تحرقين الفروستنج شوي بدافور.

      الفرن ما بيخلي الفروستنج يجمد إلا إذا بتحطينه وقت طويييل مره بالساعات بس هذا فيه خطر عالكيك ينشف عمرك لا تسوين هذا الشي. تقدرين تحطينها في فرن حار دقايق عشان بس تحرقين الأطراف ويعطيها طعم زي المارشمالو المحروق وشكل حلو بعد بس موب شي ضروري.

      1. طيب تنفع الشعله في هذي الحالة

        قصدك الفروستنج كريمة الزبدة والا غيرهـ

        بالنسبة للكيكه فيه غير نكهة الموز تناسب البنت بتر لو سويت كيكه بنكهة الفانيللا مع الكريمة بالبنت بتر

        وشكرا

        1. هذي نموذج من كيكة سبق سويته

          http://vb.albashiri.net/showthread.php?t=191623

          وهذي كيكة الايس كريم بعد سويته

          http://vb.albashiri.net/showthread.php?t=194707

          • Top Chef on 20 May, 2012 at 1:09 pm
            Author

          اكيد ينفع اصلا افضل للتحكم بس موب كل الناس عندها عشان كذا اقترحت الفرن.

          فانيلا ، شكولاته ، عسل او ميبل سيرب ، جوز ، بيكان كلها انواع كيك تضبط هنا

  3. السلام عليكم

    اخي طبقت هذي الوصفة بس طلعت له ريحه زي البيض المسلوق …. كذا صح والا فيه خطأ في طريقة التحضير ؟

    وممكن نسويها كتغليفة للكيكة ؟

    وشكراً

    1. وعليكم السلام و الرحمة …

      طبعا فيه خطأ … أقري موضوع البيض عشان تعرفين .. أشتري بيض أحسن وجديد ولا تحطينه عالحمام المائي أطول من اللازم.

      أرجع و أقول أقري موضع البيض عشان تعرفين أهمية الشي هذا …

      1. بالنسبة للبيض توه جديد بس يمكن غلطتي انه طول على الحمام المائي

        لان السكر ماستعملته بودرة

        سؤالي الاخر هل ينفع تغليفة للكيك ؟

          • Top Chef on 18 May, 2012 at 11:35 pm
            Author

          اكيد هو اصلا وشو ؟ كاتبها في الموضوع انه تغطية وحشوة كيك

  4. ٥ـ الحين هنا نبدأ الخفق . نشيل الصحن المعدني من الحمام المائي و نبدأ نخفق بسرعة عالية زي ما سوينا في المرانج الفرنسي العادي إلين يوصل الخليط للمرحلة اللي نبيها ويبرد شوي ( شوفوا موضوع المرانج الفرنسي عشان تعرفون وش المقصود بمراحل المرانج ) .

    لو انا راح اعمله ميرانغ مجفف (زي البسكويت)
    راح تكون اي مرحلة..(وهو ساخن)

    1. رؤوس صلبه

    • سويسرولة on 23 May, 2011 at 5:51 pm
    • Reply

    الصورة الاخيرة فيها زبدة و لا لأ
    و لا بس بياض بيض وسكر
    سويتها نفس طريقتك و خلطها بالخلاط العادي ابو سكينتين طلعت زي اللبن مو زي ماقي الصورة
    مشكوووووووووور

    • me on 4 May, 2011 at 10:50 pm
    • Reply

    راح اسويه ثانيه
    و اقولك بس فيه ملاحظه المارينج طلع يلمع مرره كن مكبوب عليه كلين “”اللماع”

    1. طبيعي يطلع كذا هذا من السكر

    • Me on 4 May, 2011 at 7:36 pm
    • Reply

    لا والله مو حار يمكن كان على ٧٠ مئوي حت كمان كنت رافع الصينية للدور الثاني من فوق

    بس فيه شي سويته ما ادري هل هو اللي خربه

    تعرف يجي مع الفرن صينية كبيرة سودا هذي مسحتها وحطوا عليها ورق الزبدة و كذا سيدة حطيت المارينج يعني ما حطيته في صينية خارجية

    تعتقد هذا السبب

    1. لا الصينية مالها علاقة .. هذي صينية عادية ترى تنفع لكل شي …

      والله الصراحة غريبة ؟ يمكن فرنك يكون حار أكثر من اللازم بس حتى لو كذا ماراح ينحرق بهذي السرعة ؟ السكر متأكده من كميته ؟ لو كثرتي سكر بيتحمر أسرع يمكن هذا السبب .. غير كذا ما أشوف وش المشكلة الصراحة.

    • me on 4 May, 2011 at 4:49 pm
    • Reply

    سويته و استخدمت فيه سكر الحلويات والمارينج طلع ممتاز
    بس لما حطيته في الفرن ما طول ساعه او ساعه و نص تقريبا بعدين صار بني و مو مره
    يمديك تاكله

    يعني كل البافولوفا لونها بني اتمني توصلك المعلومه

    1. الفرن حار بس …

    • me on 1 May, 2011 at 3:53 pm
    • Reply

    عندي سؤال شيفنا

    السكر اللي استخدمه
    سكر خشن ولا سكر ناعم

    واذا ما عليك امر اكتب موضوع عن انواع السكر واستخدماتها هي اكثر شي يحوسني في الحلويات

    1. سكر عادي لو كان سكر مطحون أو ناعم بقولك لا تخافين

    • عفاف on 10 February, 2011 at 3:25 pm
    • Reply

    اهليين اخوي
    مبدع كعادتك
    انا سبق سويت الميرانغ وحطيته في صينية تيفال في الفرن على نار هاديه لمدة ساعه تقريبا
    بس المشكله
    انه احمر قليل من تحت وعطى طعم حرق خفيف
    وش تتوقع السبب

    1. السبب في الغالب إن الفرن حار أو إنك حطيتي الصينيه في الرف اللي تحت و كانت الصينيه نحيفه . الحراره حطيها على أقل شي فرنك يوصله .

  5. مرحبا توب شيف
    هل كثرة الخفق لها دخل بعدم تكون منقار الطير .؟ او قلته ؟ يعني اذا زاد هل يخرب او في احتمال لفشل الطريقة ؟
    السؤال الثاني اذا كان ساخن هل يكون شكل المنقار ولا لازم يبرد ؟

    1. هلا والله …

      كثرة الخفق واحد من أكبر الأخطاء في المرانج . كثير ناس تشك هل خلص ولا لأ فيروحون عشان يتأكدون يخلونه يخفق وقت أطول وهذا خطأ طبعا. لو المرانج وصل المرحله اللي تبين خلاص وقفي لا تخفقين أكثر من كذا . لو خلطتي أكثر من اللازم بيطيع عليك .

      المرانج السويسري راح يبدأ يجمد وهو يبرد وهو حار صعب شوي .

      1. الف شكر .. الله يوفقك يارب

    • ام اقوبي on 28 January, 2011 at 3:55 pm
    • Reply

    تسلك ادينك ياشيف

    1. الله يسلمك مشكوره على مرورك .

    • الخُزامى on 28 January, 2011 at 7:18 am
    • Reply

    رائع كالعادة ,,,

    طيب لو حبيت استخدمه كتغطية لكب كيك جزر ,,, ابغى انكهه بالقرفة كيف؟

    مستعجلة ابغى اعمله هالاسبوع …

    شكرااا

    1. تنكيه المرانج تلاقينه في موضوع المرانج الفرنسي تكلمت عنه بالتفصيل … بس بتسويين تغطيه بالمرانج لحاله كذا ؟ أصبري إلين أنزل طريقة البتر كريم .

    • Anonymous on 27 January, 2011 at 10:39 pm
    • Reply

    منور مثل عادتك

    بس لو انك مكمل جميلك وحاط معه البتر كريم السويسري مو كان احسن ^_^

    1. هلا والله …

      راح أنزله قريب إن شاء الله لا تخافين … بس ودي كل موضوع يكون مفصل عن الثاني عشان يكون أسهل في البحث بعدين .

    • Anonymous on 27 January, 2011 at 9:04 pm
    • Reply

    رووووعه جرته اكثر من مره 100% ممتاز في كريمه الزبده السويسريه …. وخلاص اعتمدها في التزين سواء كب كيك او تورته خفيفه وطعمه لابعد حد ….
    بس ياترى في فرق في الطعم عن اللى تتسوى بالشيره ولا نفس المواصفات … علشان ماعندي ميزان فماقد جربتها ….

    1. كل شي بوقته … فيه فرق بس في الأغلب في القوام بس .. موب أحسن أو أسوأ بس هذا غير وهذاك غير …

  1. […] عن مرانج سويسري ( شوفوا هنا إذا ما تعرفون وشو المرانج السويسري ) مخلوط معه زبده […]

  2. […] ـ أول شي نسوي مرانج سويسري بالبيض و السكر ونخليه يوصل مرحلة منقار الطير . نخلط نشا […]

  3. […] قبل قراءة الموضوع تكونون فاهمين موضوع المرانج السويسري و البتركريم […]

  4. […] […]

  5. […] قبل قراءة الموضوع تكونون فاهمين موضوع المرانج السويسري و البتركريم […]

  6. […] عن مرانج سويسري ( شوفوا هنا إذا ما تعرفون وشو المرانج السويسري ) مخلوط معه زبده […]

  7. […] ـ أول شي نسوي مرانج سويسري بالبيض و السكر ونخليه يوصل مرحلة منقار الطير . نخلط نشا […]

Leave a Reply

Your email address will not be published.

%d bloggers like this: