«

»

نوفمبر 29 2010

بوت دي كريم الشكولاته بالبهارات .. Spiced Chocolate Pot de Creme

هلا والله ….

.

“pot de creme” ترجمتها قدر الكسترد أو قدر الكريمة . الكسترد كلمة تعني أي خليط من بيض و منتجات ألبان و البوت دي كريم نوع من أنواع الكسترد ويمكن أدسمها و أثقلها بعد . كمية الدسم العاليه فيه هي اللي تعطيه الطعم الغني المميز و النعوووومه المعروفة في البوت دي كريم . كونه ثقيل كمية بسيطة منه تكفي وعشان كذا دايما ما يتقدم بكميات جدا بسيطة. غير كذا البوت دي كريم بعد إسم لشكل من أشكال الصحون اللي يتقدم هذا الحلى فيها ! . يعني هي إسم لحلى فرنسي مشهور وبعد إسم لصحن مصمم إنه يشيل نفس الحلى.

.

بدال ما أسوي الحلى بنكهة شوي تقليديه وطفشنا منها كثير اللي هي شكولاته ساده .. قررت أضيف شوي لمسة على هذا الحلى بإني أستخدم شوي فلفل حار وقرفة  كونه يمشي مع الشكولاته بشكل جدا ممتاز . لو ما حبيتوا الطعم أو الفكره منه يمديكم تضيفون النكهة اللي تعجبكم عالشكولاته مثل اللوز مثلا أو النعناع أو البرتقال أو حتى الزنجبيل أو البندق أي نكهة ممكن تدخل في هذا الحلى مع الشكولاته .

.

الشي الثاني الحلو فيه هو إن الحلى جدا سهل وما ياخذ وقت طويل في التجهيز و التحضير وبعد يعيش وقت في الثلاجه حوالي يومين .

.

المقادير :

.

كوبين قشطة خفق قصيرة الأجل

١١٣ جرام شكولاته غامقة من أفضل نوعية تلاقونها مقطعة.

٦ صفارات بيض

٦ ملعق كبيره سكر

رشه ملح

رشة فلفل حار مدخن أو عادي

رشة فانيلا

رشة قرفة

.

* أنا أحب الشكولاته ال ٦٤٪ بس هي مسألة أذواق ! مهم جدا إن نوعية الشكولاته تكون ممتازه كون طعمها بيكون واضح هنا . ما تحتاجون ميزان عشان الشكولاته الوزن مكتوب على العلبه . إذا تبون تعرفون كيف تختارون شكولاته وكيف تفرقون بين أنواع الشكولاته شوفوا موضوع الشكولاته هنا.

.

الطريقة :

.

نسخن الفرن على  ٣٢٥

.

نخفق البيض مع السكر و الملح إلين ينخلط زين ويصير شوي فاتح

.

بعدين نسخن الكريمه في قدر صغير إلين يبدأ بس يغلي أول ما تبدأ تطلع أول علامات الغليان نطفي النار ونحط الشكولاته كلها مره وحده ونحرك إلين تذوب .

.

الحين نبدأ نصب من خليط الشكولاته على البيض شوي شوي لو صبيتوه مره وحده ممكن يتكتل البيض عشان كذا لازم نرفع حرارة البيض شوي شوي .. نصب من الخليط ملعقة ملعقة في البدايه إلين نحس إن خليط البيض صار شوي دافي بعدين نصب الخليط كله مره وحده ونحرك .. الحين نصب الكسترد إما في قوالب صغيره حقت البوت دي كريم لو عندنا شكلها يجي زي كذا .

.

.

أو ممكن نستخدم أي صحن صغير مثل صحون السوفليه مثلا أو حتى فناجيل القهوه العربيه تنفع هنا .

.

الحين نرص الصحون في صينية فرن ونصب مويه مغليه بحيث توصل المويه المغليه تقريبا ل ٣/٤ إرتفاع الكوب . ندخلها الفرن  . نخليها في الفرن إلين تستوي إذا سوينا عليها إختبار الكسترد اللي هو إننا نهز الصحن و نشوف كيف يتحرك أو يهز . المفروض إن الأطراف حقت أي كسترد تكون شوي جامده بس الوسط يهز شوي بس . في حالتي هنا راح تاخذ يمكن ١٥ دقيقه بس تأكدوا قبلها بوقت أفضل . مافيه شي أسوأ من كسترد مطبوخ أكثر من اللازم بيكون ناشف ويمكن محبب بعد .

.

طلعوه من الحمام المائي وخلوه يبرد في الثلاجة عالأقل ساعتين و الأفضل طول الليل .

.

هنا أنا أستخدمت قشر البيض كطبق للتقديم كونه الحجم المثالي لهذا الحلى . أخذ معي في هذي الحالة أقل من ١٠ دقايق . إذا حبيتوا تستخدمون قشر البيض للتقديم زي ما أنا مسوي هنا ، أقسموا الطرف العلوي من البيضه شوي شوي بسكين مسننة جدا جدا حادة . طلعوا البيض منها و أستخدموه في الكسترد. أغسلوا قشر البيض في مويه عشان تشيلون أي أثر للبيض داخل القشر. الحين عشان تدخلون القشر الفرن نستخدم أطباق البيض (الكرتوب موب البلاستنك هنا !!) . نحط القشر في الأطباق حقت البيض ونحط الكرتوب بالقشر في صينية فرن بعدين نملأ القشر بالكسترد بعدين نحط المويه المغليه عالصينية زي ما سوينا بالطريقة العاديه وندخل الصينية بكرتون البيض للفرن (لاتخافون ما ينحرق كونه مشبع بالمويه حرارة الكرتون مستحيل تتعدى ١٠٠ درجة مئوية وهي أقل من درجة إحتراق أي شي). نكمل الحلى عادي. إذا جيتوا ترصون الحلى في صحن أستخدموا ملح خشن وثبتوا قشر البيض عليه (زي ما سويت في الصورة).

.

بوت دي كريم كسترد

بوت دي كريم شكولاته
.

Follow TopChefCooks on Twitter

عن الكاتب

Top Chef

29 comments

3 pings

Skip to comment form

  1. غير معروف

    الحين قشطة الخفق نفس كريمة الخفق ولا غير؟

    1. Top Chef

      نففففسها هذا بالعربي وهذا انجليزي بس

  2. غير معروف

    يمشي لو أستخدم شكولا تشيلي وأشيل الفلفل ؟

    1. Top Chef

      يمشي أكيد …

  3. rori

    merciiiiiiiiiiiiiiiiiiiii

  4. r

    مرسي جداااااااااااااااااااااااااااااااااااااااااااااا

  5. lama

    مرحبا شيف .. الله يعطيك العافيه على هالفكره .. مرررره اعجبتني فكره البيض ,, ما شاء الله مبدع في الطبخ لا اله الا الله و مبدع في التزيين الله لا يضرك …
    بس حبيت اعرف ,, شلون تدخل الطبق حق البيض داخل حمام مائي ما راح يتفتفت الطبق لانه اذا ماني غلطانه ورق …
    و مره ثانيه اشكرك على جمال الاكل و التزييين

    1. Top Chef

      مشكوره هذا من ذوقك…

      بالنسبه للصحن لا تخافين هذي الحركه يستخدمونها كل المطاعم بدون مشاكل.

  6. Miss law

    الله يعطيك العافيه شي حلو

    1. Top Chef

      الله يعافيك .. ومشكوره على مرورك ..

  7. عفاف

    اهليين اخوي
    ياليت تعلمنا طريقة الكاسترد اللي يحطونه جوا الدونات المدوره
    صراحه عجيب سائل استغرب كيف يحشونه وهو ساءل

    1. Top Chef

      تفضلي :

      طبعا هم يخففونه بعد ما يخلصون بكريمه مفوقه في الغالب وعشان كذا تحسينه سايل .

      هذي وحده من الكسترد الأساسيه … إسم الكتسرد هذا كريم باتسييه وإستخداماته ما تنتهي ..

      ٦ صفارات بيض
      ٣/٤ كوب سكر
      ٦ ملعق كبيره نشا
      رشه ملح
      ٣ أكواب حليب كامل الدسم
      عود فانيلا أو ملعقة كبيره فانيلا سايله . طبعا أي نكهة تنفع محد قال إنه بس فانيلا .

      أبدي أول شي بإنك تسخنين الحليب مع عود الفانيلا لو بتستخدمينه . لو منتب مستخدمه عود لا تحطين الفانيلا الحين . سخني الحليب إلين يبدأ يغلي بس يعني تبدأ تطلع بلالين عالجنب .

      الحين والحليب يغلي أخفقي صفار البيض مع السكر والملح بقووووه إلين يصير فاتح . بعدين حطي النشا وأخلطيه معهم شوي .

      بعدين أبدي صبي الحليب بالتدريج .. أول شي طبعا تصبين ملعقة كبيره وتخلطينها زين .. بعدين ملعقة ثانيه وتخليطينها زين .. وكذا …. بعد ما تبدين تحسين إن خليط البيض صار شوي دافي حطي كل الحليب مره وحده و أخلطيه زييييين .

      الحين رجعي الخليط لقدر نظيف وأطبخيه على حرارة هاااااااديه وطول الوقت تقريبا حركيه بالخفاقه حقت البيض لاتوقفين فترات طويله ولا راح يتكتل عليك وتكرهين نفسك . أول ما يبدأ يغلي خليه حوالي دقيقتين عشان تشيلين طعم النشا منه . بعدين علطول أنقلي الخليط لصفايه وصفيه زين كونه يمكن يكون فيه كتل .

      الحين عشان خطر تسمم .. حطي الصحن اللي فيه الكسترد الحار في حمام ثلجي وحركيه من فترة لفترة . مهم جدا إنك تبردين الكسترد بسرعه عشان كذا نستخدم حمام ثلجي . بردي الكسترد بعدين أنقليه للثلاجه وغطيه بنايلون بس يكون على وجه الكسترد موب عالصحن بس عشان ما يطلعلك قشره بعدين . خليه يبرد زييييين قبل تستخدمينه

  8. غير معروف

    حسيت انك مافهمت علي عشان كذا كان باقي لي شوي واصيح خخخخخخخ

    طيب الصواني العادية بعد ممتازة جربتها في تشيز كيك القرع طيب تقطعه وهو في الصينية ولا تقلبه بالكامل ؟؟

    اما القصدير ما اقصد انه ما يلزق عليه شي يعني ابدا ابدا

    جرب تغطي صينية باشميل او بيتزا راح تلاقي الجبنة كلها راحت عليك او جرب تغطي صينية دجاج في الفرن راح تلاقي الجلد لزق على القصدير .في حلى اصلحه يلف بالقصدير لكن مستحيل تقدر تفكة ويصير قالب الا اذا صار جامد صح ولا راح يلزق عليك .العبرة فيه ما يمسك في الاشياء الباردة غالبا!!!!اتوقع طبعا

    اما من ناحية انه في تكسيرات ابد ما هي ملحوظه لان القصدير يطاوعك عكس الورق خليته مع الجوانب مرتب وبما انه فيه انواع اختار النوع القوي انت قلتها عشان يكون اضمن مايكون في تسريب

    في الاخير اختلاف الرأي لا يفسد للود قضية .وحلو نتعلم جرب طريقتي واجرب طريقتك وين المشكلة

    1. Top Chef

      الصياني العاديه أقلبها زي ما شرحت .. عموما بنزل بعدين طريقة بالتفصيل عشان تشوفين أوضح .. لأن شكل الصينيه بعد مهم . الحلو فيها هو إنها تعطي تشيز كيك أطرافه واقفه عكس الصياني حقت التشيز كيك .. لو نزلت الصور بعدين تشوفين وش أقصد .

      حتى النوع القوي يسرب .. ترى والله قد صارتلي كثير أغلف تشيز كيك من برا بستين ورقه وألاقي إنه تقطع مع الحركه وكذا … المشكله إنه قهر لأمك ما تكتشفين هذا الشي إلا إذا طلعتي التشيز كيك ..

      القصدير بيلصق في الأشياء البارده لو جربتي تسوين مثلا مارشمالو بتفهمين زيييييين وش أقصد .. المسأله موب مسأله بارد وحار هي حسب الشي اللي تسوينه .. هو ما يلصق في التشيز كيك كونه فيها دهن عالي مره .. هذا هو السبب مالها علاقه ببارد أو حار أبدا .. لو لصق في جلد دجاج ماراح يفك لو بردت الصينيه .

  9. غير معروف

    مساك الله بالخير شيف

    اليوم سويت الحلى بس والله يا ان قص البيض حكاية

    عموما جربته بالنوعين من الشوكولاته البني وحطيت معه نكهة القهوة وكراميل القهوة

    الابيض حطيت معه بشر برتقال مع صوص كراميل وهذه صورهم

    [url=http://www.rofof.com][img]http://sub3.rofof.com/img4/012onzbi9.jpg[/img][/url]

    وهذه الاواني الي قدمتها فيها تقريبا اكبر بشي بسيط من حجم البيضة

    [url=http://www.rofof.com][img]http://sub3.rofof.com/img4/012niyvr9.jpg[/img][/url]

    وهذا تشيز كيك الشاهي الاخضر ومثل ماقلت لك قبل لفيت الصينية من داخل بالكامل حتى الارتفاع بالقصدير

    بعد مابردت تمام وقت التقديم كان بامكاني احرك التشيز كيك على كيفي ونقلته الي صحن التقديم بدون مايصير له شي والبسكويت كان جااااااااااااااااااااااااااف جدا مافيه نقطة ماء او حتى اثر رطوبة

    [url=http://www.rofof.com][img]http://sub3.rofof.com/img4/012niyvr9.jpg[/img][/url]

    وهنا بعد التزيين ولو انه بسيط لكن يعطي منظر على الاقل

    [url=http://www.rofof.com][img]http://sub3.rofof.com/img4/012niyvr9.jpg[/img][/url]

    وهذا تارت الليمون

    [url=http://www.rofof.com][img]http://sub3.rofof.com/img4/012niyvr9.jpg[/img][/url]

    واخيرا البيتزا طبعا ماعندي حجر على الاقل حاولت اكون قريبة منه

    [url=http://www.rofof.com][img]http://sub3.rofof.com/img4/012niyvr9.jpg[/img][/url]

    وبس هذه تطبيقاتي لهذا الاسبوع ^_^

    1. Top Chef

      مساء النور و السرور …

      ماشاء الله عليك الله لا يضرك .. سويتي هذا في أسبوع واحد ! ماشاء الله …

      قص البيضه موب شرط ترى هي بس للزينه لا أكثر . عموما هو شي تتحسنين فيه إذا تدربتي عليه . غير إنه حلى من بيض حلى يتقدم في بيض بس … لو ماعندك وقت أو بتسوين كميه كبيره سويه بالأكواب في الحالتين نفس الطعم .

      الكسترد مدري بس موب كأنه شوي رطب ؟ مدري من الصوره ما أقدر أحكم بس كأنه شوي سايل ؟؟ يمكن غلطان ترى ؟

      التشيز كيك و البيتزا و التارت ترى ماطلعت الصور ؟ كلها تجيني صور الكسترد …

      بالنسبه للقصدير أنتي شكلك مافهمتيني … أنا ماقلت ما ينفع .. تدرين أصلا شي ثاني يمديك تسوينها وسويتها كثير بعد بدون ما أحط حتى لا قصدير ولا ورق زبده يعني البسكوت لصقته عالصينيه علطول وضبط بدون أي مشاكل . بس الفكره هو أنتي تقولين قصدير وقصدير وش الفرق اللي بيسويه القصدير عن ورق الزبده ؟ هل بيعطي نتيجة أحسن ؟ لو عندي الإثنين أستخدم قصدير ولا ورق زبده ؟ هذا السؤآل اللي أنا أقوله …
      أنتي تقولين قصدير زين ودايما يضبط أنا أقولك إنه قد صارت ولصق بسكوت على قصدير كونه ماقد لصق معك موب معناه إنه مستحيل يلصق صح ولا لأ ؟ دوري في النت وبتلاقين ناس صارت معهم . الفكره ومافيها بالنسبه لي لو فيه إحتمال ولو بسيط إن شغلي يخرب لمجرد إني بدال ما أحط ورق زبده حطيت قصدير أعتقد بنقهر صح !! .. ليش أعرض نفسي لمشكله ممكن تصير إذا يمديني أتفاداها من الأساس .. بس هذي نقطتي .. عموما سويي اللي يريحك الطعم في الحالتين واحد هذا المهم …

      1. غير معروف

        ايه عادي ليش لا قلتلك من الاول المطبخ تسليتي واستمتع فيه جدا

        هذه الصور حملتها ثاني
        http://m002.maktoob.com/alfrasha/ups/u_new/000/02/29/86/33772/508173.jpeg

        http://m002.maktoob.com/alfrasha/ups/u_new/000/02/29/86/33772/508174.jpeg

        http://m002.maktoob.com/alfrasha/ups/u_new/000/02/29/86/33772/508175.jpeg

        http://m002.maktoob.com/alfrasha/ups/u_new/000/02/29/86/33772/508176.jpeg

        الله يسلم عمرك انت مافهمت ليش مصرة على القصدير هالحين انت حطيت الورق في لاقاعده بس صح ؟؟

        طيب ولفيت القدصير من برى ومطاط وقصة طويله عريضة المطلوب منها منع الرطوبة والماء الوصول الى القشرة صح؟؟

        طيب انا جبتها من الاخير .سبب ثاني اقدر احط الحلى بدون القاعده حقته كذا اريح لي وانا اقطعه او حتى اخذه معي لاي احد ما اجلس اطر القاعده منهم ولا اني اضيعها واضطر كل يوم والثاني اشتري جديده

        بعدين لاني جربت قبل اني احط القصدير ولا صار له شي خصوصا لو الحلى بارد صح ومتماسك زين ما ارح ابتلش بالعكس القصدير ممتاز ما يلزق في ايي شي انت ليش خايف منه

        عموما انت لك افكارك وانا لي افكاري والحلو في المدونة تبادل الافكار صح؟؟

        اماالبيض هو حكاية لاكثر من سبب اولا الكمية كانت كبيرة شوي لكن ما كانت صعبه ابد .الثاني كان عندي ولد بثر يتصيد القشرة عشان يكسرها ههههههههه.الاخير البيض حجمة شوي صغير

        1. Top Chef

          أهااااااااااااااااا … أنتي تلفين القصدير داااااااااااخل … حلوه الفكره والله .. مره حلوه وصح أريح بكثير من اللف من برا . بس أحس القصدير مهما كان مافيه أمان ممكن يتقطع أحس لو غلفتيه بطريقتك من داخل وبعد من برا عشان إحتياط بس بيكون أحسن . بعدين أحط دائره ورق زبده داخل القصدير بتكون حلوه .. مشكوره والله فكره مرررررررره رهيبه وآسف لو كنت ما فهمتك أول .. المشكله الوحيده هنا هو إن الأطراف بيكون عليها شكل من القصدير كون القصدير موب ناعم مره بس أحسن من مويه تدخل للصحن . عموما زي ماقلت أنا مريح راسي وأستخدم صياني كيك عريضه بس الفكره ممتازه للي بيسويها بصياني التشيز كيك العاديه .

          بالنسبه لفكرة التقطيع .. أنا أستخدم ورق زبده كوني ما أقطع أصلا على القاعده !؟ ورق الزبده مريح في إنك تشيلين التشيز كيك من القاعده . و القاعده زي ماقلتي لو وديتيها بيت أحد موب راجعه وعشان نفس السبب أنا أنقل التشيز كيك بعد ما يبرد بالورق اللي عليه لصحن عادي أو صحون الكيك اللي تنرمي. أنا أشيل التشيز كيك بالورق من القاعده على لوح تقطيع وأقطع هناك .

          القصدير موب مصمم إنه يكون شي مايلصق أبد ! أقري العلبه وشوفي هم نفسهم يقولون هذا الكلام … أرجع وأعيد جربي تسوين شي زي ماكرون مثلا على قصدير وشوفي … كون الشي مالصق معك لايعني إن القصدير ماده ضد اللصق أصلا .

          بالنسبه للبيض … الحجم أشوفه مناسب خصوصا لهذا النوع من الحلويات الثقيله شوي .. بس أنتي واللي تشوفينه ..

  10. كوكو

    اشكرك بصراحه على الكاسترد سويت وصفتك العاديه كاااانت روعه والله مع انها متعبه
    بس فتاكه
    يعطيك العافيه يارب

    1. Top Chef

      بالعافيه على قلوبكم …..

  11. غير معروف

    مرحبا شيف

    طيب ممكن استخدم شوكولاته بيضاء او لا؟؟؟

    1. Top Chef

      طبعا ممكن … مين قال أصلا لازم شكولاته ؟ … يمديك بشوي تغيرات تخلينه كريم بروليه وتحرقينه من فوق بعد لو تبين .. يمديك تسوينه بأي نكهة في راسك زيه زي الإسكريم . الشكولاته البيضاء لذيذه بس لحالها ما تكون ذاك الشي هو بينفع أكيد بس موب صاير شي رهيييييب مره إذا ماحطيتي شي مع الشكولاته البيضاء .

  12. بائعة الورد .

    روووعة ,,, وخصوصااا فكرة قشر البيض ..

    ممكن تشرح طريقتك في تنظيف القشر ؟

    وسؤال ..ثاني

    ادخل كرتون البيض في الفرن ؟

    1. Top Chef

      هلا والله …

      تنظيف القشر ؟ عادي بسكين حااااااااااااااااااد تحددين دائره فوق في البيضه . هذي الدائره بتكون أضعف من باقي القشرة . بعدين تبدين تكسرين شوي شوي وبعدين تشيلين هذي الدائرة وبتلاقين القبة طلعت معك .

      تطلعين البيض اللي داخل . بعدين تغسلين الداخل بمويه وتطلعين لو كان باقي من الماده اللي تحت القشر تفركينها وتطلع بأصابعك عادي . رصي القشور في كرتون بيض بعدين صبي الخليط في القشر وبعدين حطي الكرتون بالبيض اللي فيه في حمام مائي . كرتون البيض ماعليه خوف كونه في حمام مائي حرارة المويه لاتنسين إنها مستحيل تتعدى ١٠٠ صح ولا لأ ! هذا أقل بكثيييييير من درجة إحتراق الورق .

  13. شوكولانا

    تسلم يدينك توب شيف
    سويت الحلو هذا مره بصراحه القليل منه يكفي يعني فكرة البيضه للكميه رائعه
    كل الشكر للمجهود ..
    وافكارك حلوه :)

    1. Top Chef

      بالضضضضضبط نفس فكرتي بالضبط .. هذا الهدف من البيضه أعتقد إنها الحجم المناسب لهذا النوع من الحلويات غير طبعا إن شكلها حلو .

      حياك ومشكوره على مرورك

  14. mona_daloo3ah

    حلوة مرة الفكرة الله يعطيك العافيه

    فعلا الشوكولاته الساخنة مع الفلفل والقرفة شي خيال اخذت فكرتها من فيلم شوكولاته

    استمر وانا من متابعينك وانتظر جديدك دائما

    1. Top Chef

      الله يعافيك …

  15. غير معروف

    عساك ع القوة..

    حلوة حركة البيضة.. شلون سويتها؟

    موفق يارب,,

  1. البيض .. Eggs | Guiddz

    […] كمية سائل كبيرة إما عشان يعطينا كسترد سايل أو كرد أو كسترد جامد زي التشيز كيك أو الكريم بروليه أو غيرهم كثير، نخفق […]

  2. البيض .. Eggs » Top Chef Blog .. مدونة توب شيف

    […] كمية سائل كبيرة إما عشان يعطينا كسترد سايل أو كرد أو كسترد جامد زي التشيز كيك أو الكريم بروليه أو غيرهم كثير، نخفق […]

  3. البيض .. Eggs « مدونة توب شيف … Top Chef

    […] كمية سائل كبيرة إما عشان يعطينا كسترد سايل أو كرد أو كسترد جامد زي التشيز كيك أو الكريم بروليه أو غيرهم كثير، نخفق […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: