«

»

أبريل 22 2012

سباجيتتي كاربونارا .. Spaghetti alla Carbonara

هلا والله ….

.

قبل قرآة الوصفة ياليت تقرون مواضيع الباستا هنا وهنا و هنا وموضوع البيض هنا.

.

صوص الكاربونارا للباستا من ألذ و أشهر الصوصات التقليدية للباستا. معنى الإسم هو باستا بطريقة زوجة عمال مناجم الفحم واللي يعتقد إنها أكلة كانت تسويها زوجات عمال المناجم لأزواجهم إذا رجعوا من عملهم.

.

في الأصل الصوص مصنوع من نوع من منتجات لحوم الخنزير المملحة إسمه خوانتشالي Guanciale(الخوانتشالي عبارة عن لحم راس خنزير مملح cured ومبهر ومحفوظ). الخوانتشالي ينطبخ إلين ينزل كل الشحم اللي فيه بعدين يتسوى الصوص من الشحم و اللحم حقه مع بارمزان وبيض. الصوص يتسوى بنفس الطريقة بس بإستخدام أنواع لحوم مملحة ثانية زي البيكون و البانتشيتا pancetta. في حالتنا إحنا المنتج الوحيد المتوفر اللي نقدر نشتغل عليه هو بيكون البقر وبيعطي نتيجة رائعة. إذا توفر عندكم (أو كان عندكم الوقت تسوونهم في البيت) أنواع بيكون أو بانتشيتا ثانية زي البط أو الغنم ممكن تستخدمونهم بنفس الطريقة بالضبط.

.

كثير ناس ما يعرفون وشو البيكون بالضبط. البيكون في الأصل طريقة من طرق حفظ اللحوم ، هو لحم له قبة شحم (راجعوا موضوع مقدمة عن اللحوم إذا ما تعرفون وشي قبة الشحم) هذا اللحم ياخذونه ويرشون عليه ملح وبهارات ويتركونه فترة طويلة إلين الملح يسحب المويه الزايدة ويدخل البهارات داخل اللحم. بعد كذا يدخنون اللحم وهذا يخلي اللحم يعيش وقت طويل ويعطيه طعم رهيب. البيكون شي جدا جدا لذيذ، هو شي يقرمش ، مالح ، مبهر وفيه نكهة دخان رهيبة زي نكهة الشوي تقريبا ، مستحيل ما يعجب أحد. عكس نظريات كثيرة أسمعها البيكون مافيه مصارين ولا فيه أي خرابيط ثانية هو لحم بقر عادي !

.

كثير ناس يستخدمون أشياء زي بيكون الديك الرومي أو الدجاج وهذي موب بيكون أبدا !!  أول شي أبيكم تفكرون فيه هو كيف قدروا ياخذون شريحة طويلة زي كذا من صدر دجاج صغير ؟ الطريقة هي إنهم يستخدمون لحم دجاج مفروم ناعم (من الفخذ غالبا) بعدين يلصقون اللحم مع بعض بصمغ لحم وبعدين يملحونه ويدخنونه عادي. طبعا الدجاج و الديك الرومي مافيهم قبة شحم فيضطرون يحطون بدائل شحم (كاربوهيدرات ومثبتات) عشان تعطي قرمشة البيكون نفسها. عن نفسي أكره الأكل الملعوب فيه زي كذا ، ما أعتقد إن أحد في حاجة إنه ياكل شي زي كذا فيه ملايين الأشياء الثانية اللي نقدر ناكلها ! اللي ما يصدق كلامي ياخذ علبة بيكون بقر جنب علبة بيكون دجاج ويقرأ المكونات.

.

الوصفة هذي مثال على كيف البيض ممكن يستخدم في تطبيقات ما نتخيلها. البيض هنا مع شحم البيكون و البارمزان يستخدم كصوص للباستا. توقيت وطريقة إضافة البيض عالوصفة مهمة هنا فياليت تمشون عاللي كاتب بالضبط. البياض بينضاف قبل الصفار كونه يحتاج طبخ أكثر ، الصفار هنا بيكون شبه ني وسايل تقريبا ، بس مطبوخ بشكل خفيف بحرارة الباستا(أمشي على قواعد سلامة وإختيار البيض اللي كتبت في الموضوع حق البيض هنا)  . هل نقدر نسوي الباستا بدون البيض أو بدون البيكون أو نزيد عليها شي ثاني ؟ أكيد نقدر بس ماراح تكون كاربونارا !!

.

المقادير :

.

٥ شرايح بيكون مقطعة شرايح بعرض الإبهام تقريبا

فص ثوم مقطع شرايح نحيفة

٢٢٠ جرام سباجيتي

نص كوب جبن بارميجانو ريجانو  Parmigiano Reggiano مبشور ناعم

فلفل أسود

بيضتين مفصولة

شوي بقدونس مفروم

ملعقة كبيرة زيت زيتون

.

* ممكن تبدلون أي شكل ثاني مناسب بدال السباجيتي. شوفوا موضوع الباستا هنا لو ما تعرفون كيف تختارون الشكل المناسب مع كل صوص.

.

* ممكن تستخدمون باستا طازة هنا ، إذا تبون تعرفون كيف تسوون الباستا شوفوا الموضوع هنا.

.

* جبن البارمزان ينصنع في كذا مكان بس موب أي نوع يقدر يكتب إنه بارميجانو ريجانو. البارميجانو ريجانو هي أفضل أنواع البارمزان و اللي تجي من مدينة بارما في إيطاليا في مصانع خاصة معتمدة. ممكن تستخدمون أي جبن قاسي ثاني بدال البارمزان. تقدرون تستخدمون بارمزان عادي أو جبن رومانو أو جرانو بادانو بس مافيه شي بيعطي طعم زي البارميجانو ريجانو الأصلية، الفرق جدا كبير. البارميجانو ريجانو متوفرة في السعودية دايما أشتريها من الدانوب ومتأكد أي سوبرماركت يجيب أشياء مستوردة بيبيعها.

.

بارميجانو ريجانو.

الطريقة :

.

لاردون بيكون

.

نبدأ أول شي بإننا نحط البيكون في مقلة باردة بعدين نحطها على حرارة وسط ونخلي الشحم ينزل منه و البيكون يطبخ فيه إلين يقلب البيكون لون بني غامق. نطفي النار ونحط الثوم ونقلبه في الدهن شوي.

.

frying bacon.

نسلق الباستا إلين ما تصير ألدينتي زي ما شرحت بالضبط في مواضيع الباستا. نشيل تقريبا ربع كوب من موية سلق الباستا على جنب بعدين نصفي الباستا.

.

نرجع المقلة اللي فيها البيكون عالنار بعدين نحط الباستا و ملعقتين تقريبا من موية السلق ونقلب الباستا في دهن البيكون زين. نخلي الباستا تطبخ في الزيت دقيقة تقريبا ونزيد من موية السلق لو لقينا القدر ناشف مره.

.

نطفي النار ونشيل القدر من النار بعدين نحط ٣/٤ البارمزان و الفلفل الأسود و بياض البيض ونحركهم مع الباستا زين إلين تتغطى الباستا بطبقة خفيفة من الصوص. نحط البقدونس و زيت الزيتون ونحركهم مع الباستا بعدين نقسم الباستا على صحنين.

.

نسوي زي العش فوق ونحط صفار البيض شوي شوي على كل صحن بعدين نزينها بزيادة بارمزان وناكلها علطول.

.

وقت الأكل أكسروا الصفار و أخلطوه مع الباستا زين بعدين كلوها. تقدرون تحطون الصفار مع زيت الزيتون و البقدونس لو ما تبونه باين كذا بس أحسه أحلى بهذي الطريقة.

.

spaghetti alla carbonara

.

سباجيتي أللا كاربونارا

.

Follow TopChefCooks on Twitter

عن الكاتب

Top Chef

35 comments

Skip to comment form

  1. Samar

    وين احصل البيكون عجزت احصله بالرياض الله يعطيك العافيه قلي وين اللقاه من زمان ادوره

  2. Zoz

    جربت الوصفة على شرايح بيف عادية وقليتها في قليل زيت ( ماحصلت بيكون )

  3. iNouf

    هل ممكن نستعمل بييف جيركي بدل البيكون؟
    لان البيكون له فترة مختفي من الرياض.

    1. Top Chef

      الجيركي غير تماما هو لحم مجفف وعكس البيكون هو مافيه دهن أبببد.

      ممكن يستخدم بس ماراح يعطي كاربونارا ممتازه زي البيكون.

  4. Salma

    هههههههه
    شي عجيب اللي يقول : البيكون لحم خنزير وعععععع
    ههههههههه راق لي ردك وضححكت بقوه >> بلا تخلف زايد / ههههههه ماتنلام طالع من قلب
    هههههه هالاشكال من البشر تفقع المراره ردودهم يسوون انفسهم فاهمين كل شي ما شالله
    بالتوفيق خالد والله يصبرك ويثبتك. استمررر،،،،

    1. Top Chef

      هههههه لا لو إني ما تكلمت عن البيكون في الموضوع معليش بس كاتب قدام عينها وشو البيكون وكيف يسوونه وتجي تتفلسف … ما شفتي شي …

  5. غير معروف

    الف شكر شيف .. خطوات واضحة جداً الصفار حطيته ع المقلاة او نيء .. لانه بالصورة طالع متماسك شوي ؟؟
    ** تقريبا سعر البيكون + الريجانو

    1. Top Chef

      صفار خلطته مع الباستا وهي حاره والثاني حطيته ني فوق الباستا كل واحد يخلطه بنفسه.

      السعر والله ناسي الصراحة.

  6. محمد

    طبخناها قبل أمس , ياكانت لذيذة بشكل !
    روعة و آخر روعة ! انتا شيف تووووب 😉

    1. Top Chef

      بالعافية ….

  7. محمد

    اخيرا لقيت الريجيانو و في دانوب التحلية , فصفصت تلاجتهم فصفصة !
    ححاول اطبخها لهم في ايام العيد – أول مرة أطبخ – والله يستر D:
    مشكور ياشيفنا , لنا موعد :)

    1. Top Chef

      بالتوفيق … ريلااااااكس الموضوع ما يستاهل أي خوف صدقني …

  8. محمد

    ههههههه حلو , بكرة بروح اشوف محل ريحان , آخر محاولة D:
    لقيت وصفة على يوتيوب هنا http://www.youtube.com/watch?v=9c00Emu5a84 بس بدون كريمة ؟ اشرايك ؟
    ثانيا لو مالقيت الريجيانو , هل ممكن استبدلها ب بارميزان فورماجيو ؟
    الف شكر :)

    1. Top Chef

      عمر الكريمة ماكانت موجودة في الكاربونارا الصدقيه !!!! بعض المطاعم تحطها بس خطأ.

      الحين أنزل وصفة تروح تسأل رأيي بوصفة ثانيه ؟ هههههه لو كانت أفضل ليش أنزل هذي ؟

      قلتلك أول لو مالقيت البارميجانو ريجانو أستخدم بارمزان عادي !!!

  9. محمد

    قصدك نفس اللحم مو نفس الشيف ؟
    اما عن الجبنة , انا رحت دانوب التحلية و دانوب الصيرفي ودانوب الاربعين ومالقيتها :(

    1. Top Chef

      هههه نفس اللحم ….

      أمس شاريها من دانوب التحلية وكل ٣ أيام تقريبا أشوفها في دانوب الخالدية لا يهمك شكل اللي عندي دور بالإسم في الثلاجه موب عند القسم اللي يبيع بالكيلو وتلاقيها. لو تبي مكان ثاني يبيها وهذا مضمون إنه عنده ، رح محل إسمه ريحان في مطعم إل فيلاجيو اللي جنب تشيليز في الحمراء. عندهم تحت محل يبيع أشياء إيطاليه ودايما عندهم جبن بارمزان + كذا شي ثاني رهيب في المحل هناك.

  10. محمد

    هلا ياشيف , رحت دورت على البيكون اقرب شي لقيته كان اسمه breakfast beef
    شكله زي كدا https://godshalls.com/store/Retail-Products/Godshalls-Beef-Bacon-Sliced-12-oz-O4I_111.aspx
    هل يكون مناسب ؟ و كمان الجبنة رحت 3 فروع للدانوب مالقيتها , ممكن تدينا بدايل ؟
    شكرا مقدما :)

    1. Top Chef

      هو نفس الشيف …

      الجبنة موجودة في الدانوب ماقد دخلت فرع دانوب ما لقيتها ولو إختلف الشكل بتلاقيها بنفس الإسم .. عموما لو مالقيت أستخدم بارمزان عادي بس دور زيادة …

  11. غير معروف

    ولو إني ع الصامت لكني من المتابعين الدائمين لمدونتك ..
    يعطيك العافية ..
    واللي يخليني أكل صفحاتك قبل ما أكل وصفاتك كمية المعلومات الجديدة
    والمفيدة اللي فيها ، واللي المفروض كل وحدة منا تتطلع عليها بتركيز
    عشان نعرف ايش ناكل أولا ونستمتع بأكلنا ثانيا ..
    ألف شكر يا شيف ..

  12. غير معروف

    ماشاء الله علييك أنت إنسان مبببدع

  13. lolo

    بصراحة مدونتك شي جميل ^_^
    وما طحت عليها الا وقت الاختبارات

    هذي انشاءالله اول وصفة بجربها

  14. الله يرحمنيه

    ثانكس ع الوصف الجمييييبل. الحين البيكون هذا هو نفسه اللحم المقدد ولا؟؟

    جد معلومات حلوو ولو الواحد ما ياكل هالسوالف نفسي بس الثقافة شي جمييييل ^^

    1. Top Chef

      حسب ما نشوف في الأفلام إيه هو نفسه بس منيب متأكد

  15. فيصل

    ثآنكسسس

    http://www.shrhh.com/vb/

  16. taimaa

    يعطيك العافية شيف خالد ,,
    بس أتمنيت تحط لنا المغلف تبع البيكون البقري مثل ماسويت مع البارميزان ..
    ممكن أعرف في أي قسم ألاقي البيكون ؟ وهل في في ملاحظات لازم احطها في أعتباري لما أجي أختاره ؟
    معليه اتحملني أول تجرب ليا في تجربة البيكون ومررره متحمسه اجربه :)

    1. Top Chef

      ليش تضيقينها وهي واسعة فيه كذا نوع لو أحطلك نوع بتروحين تدورين نفففس النوع حتى لو فيه غيره بنفس الجودة أو أحسن.

      البيكون تلاقينه في الثلاجات مع اللحوم المجمدة وكذا. أهم شي تحطينه في بالك إنه يكون نص لحم ونص شحم ، بعض الأنواع تجي مليانه شحم بطبقة لحم صغيرة وبعضها مليانه لحم بطبقة شحم صغيرة.

  17. غير معروف

    فين القى بيكون البقر في مكة او جده؟ عندك فكره؟

    1. Top Chef

      أغلب السوبرماركتات

  18. غير معروف

    بايكون يعني لحم خنزييييييييييييير
    وععععععععععععع

    1. Top Chef

      بدون تخلف زايد ، البيكون طريقة في معالجة أو حفظ اللحم وياليت تقرين الكلام اللي فوق قبل تكتب كومينتات. وتراها نعمة ياليت تكرمينها شوي.

  19. غير معروف

    يعطيك العافية
    لسا الأسبوع الي فات كنت ادور في المدونة على طريقتها

    1. Top Chef

      الله يعافيك …

      ههههه جت على حظك

  20. Top Chef

    شي عجيب .. لي تجربه ان شالله

    اشكرك على هالوصفه

    1. Top Chef

      بالعافية مقدما

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: