هلا والله ….
اليوم مافيه فلسفة زايده ههه .. وصفه سهلة وسريعة وماتاخذ دقايق في التجهيز و الأحلى من هذا كله إن مقاديرها بعد متوفرة في كل بيت في الغالب .
كرات الثلج إسم لحلى مصنوع من جوز الهند . أنا أقدر جوز الهند وله عندي معزة خاصه عشان كذا هذا واحد من ألذ الحلويات بالنسبه لي وأسهلها بعد . الحلى عبارة عن كوكيز جوز هند يكون رطب وطرييي ويذوب في الفم ومحشي شكولاته غامقة ولوز . تركيب هذا الحلى مشابه بشكل كبيييير لحلى ثاني اللي هو الماكروون الأمريكي ( غير الماكرون الفرنسي ) راح أنزل كل الثلاثة إن شاء الله .. الحلى عبارة عن خليط جوز هند ممسوك ببياض بيض ومحشي هنا شكولاته ولوز . ممكن ينحشي طبعا بأشياء ثانيه ( ممكن كاراميل ، لوز بس ، زبده لوز أو أي زبده مكسرات ، برالاين ، زبيب ، مارزبان .. إلخ الخيارات كثيره … ) وممكن تنحط نكهات ثانيه مع الخليط إذا حابين . غير كذا الشكل الكروي أبدا موب أساسي هنا .
المقادير :
٣ أكواب جوز هند ( نارجيل ) أو حوالي ٢٠٠ جرام للي يمشي بالوزن .
٢/٣ كوب سكر أبيض
رشة ملح
بياض بيضتين
ملعقتين صغار مويه
حوالي ١٠٠ جرام شكولاته غامقة ( ٥٤٪ – ٧٢٪ نسبة كاكاو ) من أفضل نوعية تلاقونها .. أبعدوا عن جلكسي و أبعدوا عن الشكولاته “الخام !!” أشتروا أحسن شكولاته موجوده كونه مهم هنا .. مقطعه مكعبات نص صانتي في نص صانتي تقريبا بعد كله تقريبا لا تهمكم التفاصيل هذي الحلى سهل .
لوز محمص ومقشر مقطع شرايح نحيفه ( إختياري ) .
سكر بوردة .
الطريقة :
نسخن الفرن على ٣٥٠
في جهاز تحضير طعام ( خلاط مولينكس ) نخلط النارجيل مع السكر و الملح إلين ينطحن شوي ويصير أنعم من شكله الحالي . بعدين نضيف بياض البيض و المويه ونخلطه شوي إلين يكون خليط يمسك شكله لو ضغطناه بيدنا .
كذا راح يكون شكل الخليط لاحظوا مفتت بس إذا ضغطتوا عليه بينعجن .
الحين نبدأ نشكل الخليط على شكل كور راح نحتاج تقريبا ملعقة كبيره من الخليط لكل كوره بس طبعا هي تعتمد على حجم الكور المطلوب . ويمكن نحتاج نبلل يدنا لو كانت تلصق . نشكل الكور بعدين نضغط بأصبعنا ونسوي مكان للحشوة ونحط الشكولاته و شوي لوز محمص لو نبغى بعدين نقفل عليها ونرجع نكورها . نرصها على سيلبات أو ورق بارتمشن ( اللي الناس يسمونه ورق زبده بس ورق الزبده شي مختلف ) .
ندخلها الفرن إلين تبدأ تقلب شوي ذهبيه من تحت بس .. بس نبغاها بيضاء يعني حاولوا ما تخلونها أكثر من اللازم . راح تاخذ حوالي ١٣-١٥ دقيقه في الفرن بس يمكن أقل ويمكن أكثر إعتمادا على فرنك . نطلعها من الفرن ونخليها تبرد تماما . نرشها بسكر مطحون لو نبغى ونقدمها .
75 comments
Skip to comment form ↓
احمد توفيق
7 مايو, 2014 الساعة 12:06 ص (UTC 3) Link to this comment
مرحبا
انا جوز الهند اللي عندي صار ناشف كانه سميد
ينفع استخدمه ؟ واذا ماينفع لهذي الوصفة هل ينفع لوصفات ثانية او انه خلاص جف
وهل اقدر اسوي جوز هند بالبيت ؟ من ثمرة جوز الهند اللي قشرتها بنيه ؟
وانا حصلت في التميمي كيس جوز هند لونه ازرق وهو رطب
مكتوب عليه ( جوز الهند المحلاة قطع صغيرة 396g )
انا قريت الردود بس ماعرفت كم الكمية احط منه لنفس الوصفة
معليش ازعجتك تحملني بس مره حاب اسويها وتضبط من اول مرة
Top Chef
24 يوليو, 2014 الساعة 6:19 م (UTC 3) Link to this comment
ممممم إذا جاف مررره زي ماتقول ما أفضل الصراحة أستخدمه.
طول ما إن طعمه ما تغير يمديك تستخدمه أكيد حرام ترميه. يمديك أبسطها تحمصه وتستخدمه كزينه.
تقدر أكيد تسوي جوز الهند في البيت بس عملية شوي متعبة ولو إنها تعطي ألذ نتيجة.
خذ حبة جوز هند. جرب تخرم العيون حقتها (بتلاقي ٣ عيون) ، في عين وحده لينه وبتنخرم و الباقين غالبا لأ. أخرم جوز الهند وبعدين طلع المويه منها في كوب (أشرب المويه أو أستخدمه في أي شي لاتترميه)
الحين حط جوزة الهند في فرن ٣٧٥ لمدة ١٠ دقايق تقريبا أو إلين تلاقي جدران جوزة الهند بدت تطلع عليها شطوب. خذ حبة جوز الهند ، غلفها بفوطة مطبخ وأضربها بنشابه حقت عجينة وبتنكسر معك بسهولة. الحين أبدا أفصل اللحم عن القشر الشر المتين اللي زي الخشب (بتلاقي شوي قشر لاصق في اللحم لا تشيل هم).
الحين خذ قشارة خضروات وقشر الجلد اللي لاصق عاللحم وبتطلع بلحم جوز هند صافي. الحين أبشر هذا اللحم بمبشره عاديه وهذا جوز هند طبيعي.
جوز الهند المحلا موضوع ثاني موب بديل هنا بس إذا تبي لحم جوز هند طبيعي وبسرعه رح عن لولو هايبر ماركت وفي قسم الخضار بتلاقي واحد وظيفته يبشر جوز هند طازج لك.
جوجو
24 ديسمبر, 2013 الساعة 9:32 م (UTC 3) Link to this comment
الله يسعدك ف الدنيا والاخره ياخي انت كنز والله
الله يحفظك لعين ترجيك
بس حنا متابعينك ومحبينك مالنا خاطر عندتس يوم انا نطلبك تغير صورتك والله انها مقززه ماهي ب على ابداعك والله حرام
حبيت الوصفه مرررره لاننا نعشق بعض مكونات الطعام وودنا نجمهم مع بعض بس ما عندنا وصفه
وانت ما تقصر دوم تجمع لنا المكونات الي نحبها ف وصفه
الله يسعدك ياشيخ
Top Chef
27 ديسمبر, 2013 الساعة 4:56 ص (UTC 3) Link to this comment
ويسعدك بعد.
لو يوم من الأيام أحد قاللي هذي الوصفة ما أعجبتني وأشوفها مقززه أو موب قد إبداعك (زي ما صار معي صدق يوم نزلت صورة أخطبوط !!) هل المفروض إني أشيلها ؟ حقك علي إني أساعدك وأحاول أخدمك باللي أقدر عليه بس إختياري للأشياء اللي أحط في مدونتي راجع لي مع كامل إحترامي ….
sarah
6 أكتوبر, 2013 الساعة 6:42 ص (UTC 3) Link to this comment
ممكن طريقة التبوله
Top Chef
6 أكتوبر, 2013 الساعة 7:49 م (UTC 3) Link to this comment
من عيوني بس ياليت تنقلين سؤالك لصفحة الآسك عشان الكل يقدر يلاقيه بسهولة.
Jojy
21 سبتمبر, 2012 الساعة 11:41 ص (UTC 3) Link to this comment
يم يم يسلمو مرره لذيذ تن شااء الله بسويه لامي وابوي جايين من السفر
أدعوهم. الله يوصلهم بالسلامه
Top Chef
21 سبتمبر, 2012 الساعة 2:28 م (UTC 3) Link to this comment
الله يوصلهم بالسلامه إن شاء الله
fofo lovely,, (@Falcon_jap)
22 يوليو, 2012 الساعة 5:54 ص (UTC 3) Link to this comment
طيب شيف ينفع لو اطحن كل شي لحاله بعدين اخلطهم بالملعقة ؟؟
والجوز الهند اخليه ناعم ششبه بودرة ؟؟
الجوهره
29 يناير, 2012 الساعة 3:30 ص (UTC 3) Link to this comment
مرحباااا شيف خالد ..
ان شاء الله تكون بأفضل حاااال ..
ابشرك سويت كرات الثلج بس بقوالب السيليكون وطلع شكلها حلوو ,,
بس ما طلعت مثل حقتك رطبه طلعت مره ناااشفه ,,
وما كانت تمسك معي عشان كذا اضطريت استخدم القوالب واستعملت العنف مع جوز الهند عشان يضبط في القوالب
مع العلم اني زدتها بياض بيضه ومويه عشان تمسك واقدر اكورها بس ما مسكت معي
تتوقع لو اخلي جوز الهند كاسين يضبط معي ؟!..
واشكرك من اعماق قلبي على وصفاتك الجميله ..
Top Chef
29 يناير, 2012 الساعة 3:41 ص (UTC 3) Link to this comment
والله ما أعرف الصراحة ؟ هي مفروض تمسك بالكميات اللي حاط بس لو ما مسكت زيدي مويه وبيض زي ما سويتي إلين تمسك معك. ليش طلعت ناشفه بعد ما أعرف بس يمكنها ماكانت رطبه من الأساس يعني إذا كنتي واجهتي مشكله في التشكيل إنها ناشفه فأكيد راح تنشف أكثر في الفرن موب العكس ؟
غير معروف
30 ديسمبر, 2011 الساعة 2:17 م (UTC 3) Link to this comment
I used an ice cream scope instead of rolling the as a ball , and they turned to be snow igloo not snow balls LOL
so thanx for this lovely recipe
الاوتار
6 ديسمبر, 2011 الساعة 4:15 م (UTC 3) Link to this comment
مشكور اخوي على الوصفة ابسألك سؤال بس لاتظحك لو استخدمت ايس كريم غطيتة بهذي الخلطة ينفع
Top Chef
6 ديسمبر, 2011 الساعة 5:18 م (UTC 3) Link to this comment
قصدك نحط في الوسط إسكريم بدال شكولاته ؟ هو ممكن فيه أكله زي كذا يسمونها بيكد آلاسكا baked alaska بس تكون مغطيه بمرانج والمرانج عازل وعشان كذا تنفع بس في الحالة هنا للأسف لأ بيذوب الإسكريم وهو في الفرن.
sousou
31 أكتوبر, 2011 الساعة 11:06 م (UTC 3) Link to this comment
ميرسي كثييييير ع الوصفة شكلها كثييير حلوة ..
راح أجربها بكرة إن شآء الله هي و الماكرون الفرنسي ..
الله يعطيك العافية ..
خوله
6 يوليو, 2011 الساعة 11:34 ص (UTC 3) Link to this comment
تم التطبيق
جداً لذيذ وسهل .. وفخم بعد ،
يعطيك العافيه : )
غير معروف
18 يونيو, 2011 الساعة 10:35 ص (UTC 3) Link to this comment
السلام عليكم
حبيت اقولك ان الجوز الهند اللي عندي جدا ناعم (برايك ما استعمل الخلاط؟ اخلطه بالملعقه زييييين وخلاص؟ واذا جيت اخلطه بالبيض استعمل خلاط الكاس
وايش قصدك بسكر ابيض ؟ < متعقده من سالفة السكر
هل هو بودره او ناعم او ناعم مرره او عادي اللي هو خشن؟
Top Chef
18 يونيو, 2011 الساعة 10:45 ص (UTC 3) Link to this comment
وعليكم السلام ..
إذا كان ناعم ماراح ينعم أكثر سويه زي ماقلت أضمن. بالنسبة للسكر ، سكر أبيض عادي لو بني كان قلت بني ولو مطحون كان قلت مطحون.
غير معروف
18 يونيو, 2011 الساعة 11:01 ص (UTC 3) Link to this comment
بس انا استعمل خلاط الكاس ويمكن ينعمه زياده
خلاط تحضير الطعام ما عندي
عندي الخلاط هذا لو تعرفه مادري ينفع معه او لا
http://www.moulinex.com/Products/Hand-Blenders/turbomix.aspx
واعذرني لو عقدت الموضوع
Top Chef
18 يونيو, 2011 الساعة 11:07 ص (UTC 3) Link to this comment
أعتقد عادي مايضره ..
بشرى ..
29 مايو, 2011 الساعة 12:34 ص (UTC 3) Link to this comment
ما شاء الله ,
بس سؤالي , احطها بالفرن بنفس درجه ارتفاع الكيك ؟ ولا انزل الصينيه ؟
Top Chef
29 مايو, 2011 الساعة 12:42 ص (UTC 3) Link to this comment
أي وصفة ما يقولك وين تحطين الصينية حطيها في النص دايما
الأمـل
16 مايو, 2011 الساعة 4:52 م (UTC 3) Link to this comment
السلام عليكم
اليوم صلحته وطلع شي مجنوووووووووون روعه انأكل كله
الله يسلم ايدينك ويجزاك عنا خير مشكوووووووووووووور
صورته وكنت بارفعه بس مارضى يحمله المهم انه طلع شي *)
ابتسام
8 مارس, 2011 الساعة 10:52 م (UTC 3) Link to this comment
السلام عليكم
كيف حالك شيف
جربتها بس للاسف ماضبطت معي مدري وش المشكله بالضبط
مع اني مستخدمه نفس ماقلت والاكواب المعياريه بعد
بس ما عجنت معي ابدا
طلعت جوز هند بس مرطّب شوي
ابدا ماتنعجن , ورحت زودت بياض بيضه ثالث ورابع وخامس قلت لعل وعسى
بس مافي أمل ابدا
بالاخير صارت تتجمع بيدي بس لما اجي اكورها تتفتت
عاد اخر شي سويتها بالملعقه وصرت اضغط عليها ودخلت كم حبه للفرن بس طلعت ناشفه مره
ومن امسكها تتفتت
بس طعمها لذيذ
ياترا وش المشكله ؟
ودي اجربها مره ثانيه بس اخاف اطلع بنفس النتيجه
Top Chef
9 مارس, 2011 الساعة 5:58 ص (UTC 3) Link to this comment
هلا والله …
هي مفروض تكون تلصق في بعض بس ماراح تكون زي العجينة ! حتى لو أضطريتي تزودين سائل ماراح يكون ٥ أو ٦ أضعاف !! هذا اللي خلاها ناشفة بياض البيض .. بياض البيض يجفف أي شي ينحط معه هو هنا فايدته زي الصمغ بس .
جربي سويها مرة ثانيه .. هذي المرة لا تزيدين بياض أبد .. خذي كورة من الخليط و أضغطيها بقوة بعدين كوريها .. و إذا طلعتيها من الفرن خليها تبرد شوي لأن أكيد أول ما تطلع بتكون هشة مره خليها شوي وهي بتجمد أكثر .
ابتسام
11 مارس, 2011 الساعة 9:50 م (UTC 3) Link to this comment
ايه جربتها مره ثانيه ونفس النتيجه
حسافه ماضبطت
اضغط ما اضغط كنه جوز هند صافي ولا كني حطيت معه شي
ولما طلعتها من الفرن خليتها ولما رجعت لقيتها متيبسه لو ألمسمها بس تتفتت
متحمسه لها كثير
Top Chef
11 مارس, 2011 الساعة 11:58 م (UTC 3) Link to this comment
والله مدري الصراحة مشكلتك غريبة .. طيب طحنتي جوز الهند بالخلاط قبل ؟
ابتسام
14 مارس, 2011 الساعة 10:22 ص (UTC 3) Link to this comment
أول مره لا ماطحنته وقلت يمكن هنا المشكله
المره الثانيه طحنته ونفس الوضع
Top Chef
14 مارس, 2011 الساعة 1:06 م (UTC 3) Link to this comment
ههههه والله مدري الصراحة ؟
غير معروف
30 ديسمبر, 2010 الساعة 4:29 م (UTC 3) Link to this comment
افكر اسويه ..
؟
وودي احشيه بكاسترد بس ما احس ينفع ..
قاعده افكر شلون ينحشي بكاسترد لو ابي ب ماعرفت
لأن لو انتظرته يستوي مابيكون مفرغ من داخل
وماينفع احشيه قبل واكوره لأنه شبه سائل وبيحوسني
تتوقع في طريفه احشيه بكاسترد
Top Chef
30 ديسمبر, 2010 الساعة 8:50 م (UTC 3) Link to this comment
حسب الكسترد .. بس تقدرين تبردين الكسترد أو تثلجينه بعد وتحشينه وهو يذوب في الفرن .
غير معروف
26 ديسمبر, 2010 الساعة 6:50 م (UTC 3) Link to this comment
مرحبا شيف
مدري ليش مصعين الموضوع الاخوات اسه لمن هذا الحلى في حياتي ماشفت اسئلة كثيرة واستفسارات
اجل لو هو حاط لكم موضوع الاستا او موضوع البيتزا وش صار هههههههههههههههههههههههههه
شوف تطبيقي ^_^ يسلمو خيو لا تبطي علينا بالجديد
http://m002.maktoob.com/alfrasha/ups/u_new/000/02/29/86/38341/510764.jpeg
http://m002.maktoob.com/alfrasha/ups/u_new/000/02/29/86/38341/510762.jpeg
Top Chef
26 ديسمبر, 2010 الساعة 8:12 م (UTC 3) Link to this comment
هلا والله …
طبيعي حتى أبسط الأشياء أحيانا يكون فيها لخبطة … تصير لكل واحد …
بالعافيه عليكم وتطبيكم طالع ماشاء الله رهيب ..
غير معروف
26 ديسمبر, 2010 الساعة 5:42 م (UTC 3) Link to this comment
شيف سويتها بس ماش …….
طلعت حلوه شكلا ونوعا ما تتفتت بس مو مسكره مره يعني مو حاليه ولا عرفت احط فيها شوكولاته من داخل
يمكن عشان اصلا مفتته واحس ان كميه جوز الهند كثيره تتوقع لو اني حطيت كوبين ينفع ؟
طيب وش هي نوع اكوابك وملاعقك يمكن تكون كبرها غير ؟؟
Top Chef
26 ديسمبر, 2010 الساعة 8:09 م (UTC 3) Link to this comment
هلا والله …
زودي السكر المره الجايه .. عموما السكر مسأله شخصيه .. فيه ناس بيقولون حاليه بزياده ؟ و العكس ؟ أنا عطيتك أنا وش أحب …
الشكولاته سهل تحطينها ؟ تسوين حفرة وتحطين الشكولاته بس ؟ زي الكبه تقريبا ؟
إذا كان متفتت مره أجل هذي مشكله عندك شيكي عالقياسات يمكن البيض حقك صغير أو المويه ماحطيتي بشكل كافي أو جوز الهند حطيتي أكثر من اللازم . هي مفروض تنعجن تصير زي العجينة إذا ضغطتيها بيدك .
الكوب دايما أقصد فيها كوب معياري ٢٥٠ مل مايفرق من بيت لبيت ؟
غير معروف
26 ديسمبر, 2010 الساعة 10:57 ص (UTC 3) Link to this comment
توب انا من عشااااااااااااااااااااااااااااق جوز الهند ..
بس سؤال الحين استخدم جوز الهند العادي اللي نشتريه من السوبرماركت
والا المحلى لان المحلى ماهو عندي ولا الاقيه الي هو طازه صح ؟؟
كمان الخلاط المولينكس قصدك الكاس والا الثاني اللي يطحن كل شي ويعجن ؟؟
ادري سؤال ذكي بس الله يعينك ..
لان ودي اليوم اسويه بحول الله
Top Chef
26 ديسمبر, 2010 الساعة 1:50 م (UTC 3) Link to this comment
جوز الهند المحلى يفرق عن العادي بإن معه سكر بودره بس …
أستخدمي جوز الهند حق السوبرماركت العادي …
خلاط المولينكس أقصد ذاك اللي يجي بالعرض اللي يسمونه جهاز تحضير طعام ..
soso
25 ديسمبر, 2010 الساعة 7:37 م (UTC 3) Link to this comment
يعطيك العافية
سؤالي : ( بعدين نضيف بياض البيض و المويه ونخلطه شوي إلين يكون خليط يمسك شكله لو ضغطناه بيدنا )
هل بياض البيض مخفوق ؟؟
وهل التحريك يكون بالخلاط؟؟ او المضرب ؟؟ ولا بالملعقة …. واذا كان بالملعقة هل تفرق لو كانت خشب او معدن ؟؟
وهل ممكن استخدم شوكولا هرشي اللي على شكل دمعه وتكون داخلها مكسرات (بندق)
Top Chef
25 ديسمبر, 2010 الساعة 7:48 م (UTC 3) Link to this comment
نخلط قصدي بالخلاط المولينكس .. بس لو تبين بالملعقة بعد ينفع هو البيض هنا بس فايدته يمسك الخليط في بعض زي الصمغ .
شكولاتة هرشي تنفع .. عموما أي شكولاته تنفع .. بس أنا دااااايما أتكلم من ناحية أفضل طعم … هل هيرشي راح تعطيك أفضل طعم ؟ ما أعتقد .
Top Chef
22 ديسمبر, 2010 الساعة 2:31 م (UTC 3) Link to this comment
أهاااااا …
هنا المشكلة … بالنسبة للخلط بدون الخلاط ما أعتقد هذي المشكلة . الخلاط صح بيخلطها أحسن بس موب معقول يكون سبب .
هي ماكان المفروض تنشف في يدك من الأساس ؟ مدري ليش صار معك كذا ؟
الفرن بعد مفروض ما تتحمر كثير هذا يمكن يكون سبب …
الشي الأخير هو الثلاجه .. الحلى هذا ما يحتاج ينحط في ثلاجه أبببببدا .. الثلاجه هي يمكن أكثر شي خربها .. كان عالأقل حطيتيها بالميكروييف أو ما طلعتيها من الثلاجه . الثلاجه زي ماقلتي بتخلي الشكولاته تجمد وتخليها تنشف .
Ovan
21 ديسمبر, 2010 الساعة 9:27 م (UTC 3) Link to this comment
:'( :'(
سويت هالحلا شيف ووو طلع قاسي شوي واكثرهم قالوا نحس يبغاله تحسينات .. يعني تزيدين شي او ما ادري وش قصدهم ..
طلع طعمه شبيه للباونتي الى حد ما
التشوكليت اللي استخدمتها معه Lindt – swiss classic, dark
غير معروف
22 ديسمبر, 2010 الساعة 12:02 ص (UTC 3) Link to this comment
وانا كمان جربته …. وطلع نفس نتيجتك …. ماااادري يمكن انا تعودت على جوز الهند بالنستله واكوره واغمسه في شوكلت وبدون فرن …. وطعمها يطلع روعه كانه باونتي بس بالطريقه هذى حسيت انه اشوي ناشف ويحتاج شي يخليه اطرى من جوى واطعم ….
Top Chef
22 ديسمبر, 2010 الساعة 3:25 ص (UTC 3) Link to this comment
والله غريبه ؟؟ أنا ماقد طلع معي ناشف ؟ بالعكس رهيب ورطب ويذوب في الفم ؟
يبغاله تحسينات زي إيش ؟ أنا أشوف إنه كذا تمام بس زي ماقلت المجال واسع للتحسين و التعديل …
الشكولاته هذي نفس اللي أستخدم ..
يمكنك حطيته في الفرن أكثر من اللازم ؟؟ لأن دايما أسويه ولا قد صار إنه وصل مرحلة أقول عنه ناشف ؟
جوز الهند اللي بالنستلة ذقته .. صراحة ما أعجبني لأن طعم جوز الهند فيه ضعيف شوي .. وطعم النستلة مخليه حااااالي بزياده ..
Ovan
22 ديسمبر, 2010 الساعة 5:25 ص (UTC 3) Link to this comment
شف خلني أقولك طريقته اللي سويتها باختصار
طحنت الاشياء الناشفه بالخلاط بعدين خلطتها مع بياض البيض والمويه مو بالخلاط .. حركتها بملعقه وبيدي
بعدين بديت أكور يوم وصلت لاخر المقدار تقريبا بديت أحس ان الكور اللي سويتها بالاول بدت تيبس ما ادري هل هو عشاني مخليتها مكشوفه او لا . او هي ما يبست بس انا اتوهم
المهم وصفيتها كلها بصنيه بايركس ودخلتها الفرن الصغير .. وطلعتها بس كانت من تحت غامقه اكثر من صورتك شوي
أول ما طلعتها من الفرن كانت لينه اكثر من بعدين .. بعد 10 دقايق تقريبا رشيت عليها سكر مطحون ودخلتها الثلاجه مغلفه بنايلون مخرق << يوم رشيت عليها السكر حسيتها بدت تمتص السكر يعني يصير لونه مو أبيض مثل اذا حطيت السكر على دونات ساخنه
يوم طلعتها وعقب كانت يابسه شوي طبقتها الخارجيه .. ايه والشوكلاته اللي داخلها صارت يابسه كأني بس مكسرتها وحاشيتها .. يعني تعيق سلاسة الأكل
وبس :*)
Amola
21 ديسمبر, 2010 الساعة 7:54 م (UTC 3) Link to this comment
شوف انت حطيت لوحده م البنات رابط موضوعك ف شامواه الحين لما اضغط عليه تروح صفحتك وتطلع بدالهاا شامواه
اقصد خلي اي رابط تحطه ف المدونه ينفتح ف صفحه لحالها مو نفس صفحتك الأأساسيه
الله يخليك قول فهتم
<< زيرو ف الشرح خخخخ
Top Chef
21 ديسمبر, 2010 الساعة 8:04 م (UTC 3) Link to this comment
أهاااااااا …
طيب لا تضغطين عليه أضغطي ضغطه يمين بعدين أختاري إنه يفتح في صفحة ثانيه .. لو كنت حاط الرابط في موضوع أقدر أختار إنه يفتح في صفحة ثانيه بس إذا حطيته في رد شوي صعبة لازم أسوي حركة بال html وكذا ..
Amola
21 ديسمبر, 2010 الساعة 6:16 ص (UTC 3) Link to this comment
بــاك …
انا احتفظ بجوز الهند ف الفريزر صح او غلط..!!
بعدين عندي اقتراح ي ليت لما تحط لينك ينفتح بصفحه لحاله مو نفس صفحة المدونه حقتك فهمت…
Top Chef
21 ديسمبر, 2010 الساعة 11:56 ص (UTC 3) Link to this comment
هلا …
صحيح … جوز الهند لو بتحفظينه فترات طويله لازم ثلاجه أو فريزر في علبه تتقفل زييييين ..
مافهمت وش قصدك باللنك في صفحة ثانيه ؟ مدري إذا شي في موضوع ثاني ؟ بس أنا ماحطيت أي لنك هنا ؟
غير معروف
20 ديسمبر, 2010 الساعة 5:24 م (UTC 3) Link to this comment
ادري غثيتك بس
والله مافهمت وشلون استخدم نص الكميه بالنسبه لجوز الهند الرطب المحلى
Top Chef
20 ديسمبر, 2010 الساعة 6:00 م (UTC 3) Link to this comment
يعني الوصفه هنا طالب أنا ٣ أكواب نارجيل صح .. أستخدمي كوبين ونص محلى وكوبين ونص ساده .
Ovan
20 ديسمبر, 2010 الساعة 3:11 م (UTC 3) Link to this comment
يميييي
شكلها ألييييم أنا كل ما شفت وصفه اقول ان شا الله بسويها لاهلي واتخيل شكلي وانا اسويها << حالتي صعبه ..
بس الدراسه ضغغغط حارمتني << تتعذر لروحها
المهم .. شيف
وش قصدك بأفضل نوعية شوكلاته ؟ يعني اكيد مو قصدك اروح السوبر ماركت واذوق الشوكلاتات اللي عندهم بعدين اعرف الاحسن .. لا يعني اذا عادي تقولنا اي نوع انت استخدمت
شكرا مقدما :*)
Top Chef
20 ديسمبر, 2010 الساعة 5:53 م (UTC 3) Link to this comment
إنك تروحين السوبرماركت وتجربين ليش لأ ؟ … بس أعرفي وش الماركات اللي تجربين بالأول وبعدين أختاري اللي تشوفين إنها ألذ وحده بالنسبه لك …
شوفي هنا شارح كيف الفرق بين الشكولاتات
http://www.shamoa.com/vb/showthread.php?t=19308
بائعة الورد .
20 ديسمبر, 2010 الساعة 2:18 م (UTC 3) Link to this comment
يالله … عاد أنا من عشاق جوز الهند ..
ربي يجزيك خير …
Top Chef
20 ديسمبر, 2010 الساعة 2:44 م (UTC 3) Link to this comment
أجل بالعافيه عليك .. بتعجبك ..
غير معروف
20 ديسمبر, 2010 الساعة 10:55 ص (UTC 3) Link to this comment
ان شاء الله بيعيشوا ايديك
جاري التطبيق
Top Chef
20 ديسمبر, 2010 الساعة 2:40 م (UTC 3) Link to this comment
حياك ..
غير معروف
20 ديسمبر, 2010 الساعة 10:38 ص (UTC 3) Link to this comment
ودي اصيح لين اشبع لاشفت وصفاتك
اقول جوز الهند المحلى الرطب ومبشور كبير يصلح بهالوصفه عندي وبلشانه به
وجوز الهند السابق الذكر وشلون احفظه عشان لايجف
Top Chef
20 ديسمبر, 2010 الساعة 2:39 م (UTC 3) Link to this comment
جوز الهند المحلى ينفع طبعا هنا .. أستخدمي بس نص الكمية موب أكثر من كذا ..
جوز الهند ينحفظ عادي في علبه تتقفل ولا راح ينشف .
Amola
20 ديسمبر, 2010 الساعة 4:19 ص (UTC 3) Link to this comment
امممممممم
انا بدل م ارش عليها سكرر …اغمسهاا بشوكليت خاام وجالكسي وتطللللللللع اليمه
كأنها باونتي ع رفايللو والذ كمان
تسسسسسسلم دياااااتك خيووو
Top Chef
20 ديسمبر, 2010 الساعة 4:58 ص (UTC 3) Link to this comment
بس ماراح تصير كرات ثلج وقتها ههههه أنتي تقصدين شكلك شي ثاني هذاك الماكروون .. راح أنزل الطريقة قريب هذاك صح ممكن يتغطى بشكولاته أو غيره …
بس نقطة أخيره .. الجلكسي و الشكولاته الخام أستغفر الله …. أستخدمي شكولاته أحسن وبتشوفين فرق كبييييييييييييييير .
الله يسلمك ومشكوره على مرورك …
غير معروف
20 ديسمبر, 2010 الساعة 1:52 ص (UTC 3) Link to this comment
وانا بعد اموت في جوز الهند وحلوياته مدري اذا تعرف حلاوة لدو مشهورة جدا في الغربية لذيذه جدا
مشكور ماقصرت والله يبارك فيك والله لايحرمنا منك ولا من وصفاتك
Top Chef
20 ديسمبر, 2010 الساعة 4:55 ص (UTC 3) Link to this comment
هلا والله …
والله الصراحة ماقد سمعت عنها ؟ كيف شكلها ؟ يمكن قد ذقتها ؟
غير معروف
26 ديسمبر, 2010 الساعة 7:28 م (UTC 3) Link to this comment
عند محلات الشيحة الي يبيع المشبك والمنفوش الكبيرات حلويات هندية على ما اعتقد عرفته ؟؟ يبيع كور جوز هند لونها ابيض او برتقالي لذيذه بس حلاها زايد شوي وصفتك حلاها معقول
Top Chef
26 ديسمبر, 2010 الساعة 8:15 م (UTC 3) Link to this comment
إييييييييه عرفتها …. أحيانا يخلطون معها فستق على ما أعتقد .. صح شوي حلوه أكثر من اللازم .. بس غير كذا كون جوز الهند ما يدخل الفرن ما يبان طعمه قوي مره زي ما أنا أحبه ..
غير معروف
19 ديسمبر, 2010 الساعة 11:09 م (UTC 3) Link to this comment
رووووووووووووعه تسلم يدينك
Top Chef
20 ديسمبر, 2010 الساعة 4:49 ص (UTC 3) Link to this comment
الله يسلمك .. مشكوره
Top Chef
19 ديسمبر, 2010 الساعة 10:10 م (UTC 3) Link to this comment
لا لا لا شي عجيب انا اموت بهذا الشيء
بس انتظر الماكرون الامريكي لاني من زمان ابحث عنه ومالقيت اللي يشفي غليلي من الطرق
اذوقه بس من برى لكن ابي اسويه
اسال يقولوا سهل مايبي له بياض بيض وجوز هند وسكر
ومالقيت اللي يعطيني وجه بالتفاصيل
انتظرك ومشكور على الطرح الرائع هذا
Top Chef
20 ديسمبر, 2010 الساعة 4:48 ص (UTC 3) Link to this comment
الماكرون الأمريكي جددددا سهل .. عموما أنظري الطريقة ماراح أطول إن شاء الله …
Top Chef
23 ديسمبر, 2010 الساعة 10:37 م (UTC 3) Link to this comment
اليوم سويت طريقتك بكور الثلج
ياسلام عليك الكل يمدح يقولوا هذي من ابداعك قلت لالا هذي من توب شيف اتوقع
تسلم يدينك وان شالله اجرب الماكرون الامريكي
بس احتاج اشتري جوز خلص اللي عندي
مع التحيه ..
Top Chef
23 ديسمبر, 2010 الساعة 10:38 م (UTC 3) Link to this comment
ليش ماطلع ردي كامل
كنت اقول اتوقع صرت مشهور بالعائله من كثر تجاربي لاطباقك
Top Chef
24 ديسمبر, 2010 الساعة 3:11 ص (UTC 3) Link to this comment
لا أبدا هذي من إبداعك أنتي موب أنا ؟ أنتي سويتي كل شي أنا وش سويت ؟
غير معروف
19 ديسمبر, 2010 الساعة 8:53 م (UTC 3) Link to this comment
واااااااو
تجنن تجنن تجنن ….
يعطيك الف عافيه …. انا من عشااااق جوز الهند …
Top Chef
20 ديسمبر, 2010 الساعة 4:25 ص (UTC 3) Link to this comment
بالعافيه مقدما …
الله يعافيك ومشكوره على مرورك …
شغف
19 ديسمبر, 2010 الساعة 8:45 م (UTC 3) Link to this comment
على أني موب من عشاق الجوز هند
الا ان شكلها مغري
بالعافيه عليك ، لاهنت
Top Chef
20 ديسمبر, 2010 الساعة 4:25 ص (UTC 3) Link to this comment
مشكورة .. والله يعافيك ومشكوره على مرورك ..