«

»

يونيو 01 2011

تايلند : نودلز الفول السوداني بالسمسم .. Spicy Peanut Noodles with Sesame

هلا والله …

 

هذا الموضوع تابع لفعالية حول العالم في ٣٠ يوم.

 

 

إذا تكلمنا عن الأكل الآسيوي أول شي يخطر على بال الناس هو الأكل الصيني و بعده يمكن الياباني. كثير ناس يتجاهلون مطابخ آسيويه ثانيه بنفس شهرة الأكل الصيني و الياباني إلا إنها للأسف ما أنتشرت بشكل كبير عندنا ، أهم هذي المطابخ برأيي هو المطبخ التايلندي، فيه غيره طبعا المطبخ الأندونيسي و الكوري و الماليزي و السنغافوري و حتى الفيتنامي بس المطبخ التايلندي بالذات متطور بشكل رهيب و أنصحكم تتعرفون عليه أكثر و أكثر. المطبخ التايلندي خليط غريب، هو مطبخ هادي في نكهاته زي الياباني بس أقوى شوي، هو مطبخ يميل للحرارة و إستخدام البهارات و النكهات المعقدة زي المطبخ الهندي و في نفس الوقت في الأكل دايما فيه خليط من كذا طعم وقوام زي المطبخ الصيني. الأكل التايلندي يعتمد على مبدأ التوازن بين الأطعام الخمسة ( حلو ، حامض ، مر ، مالح ، وحسب كلامهم حار بس الحراره موب طعم زي ما يقولون ) غالبا الأكلات التايلنديه تتوازن فيها هذي المكونات فما تكون لا حلوه أو حامضه أو مالحه أكثر من اللازم.

 

اليوم عندنا طبق بيعجب كثيرين إن شاء الله ، هو طبق نودلز جدا سهل وجدا مرن في التقديم وطبعا جدا جدا لذيذ وبيعطيكم فكرة حلوه عن الأكل و النكهات التايلنديه. المكونات اللي مطلوبه هنا يفضل تدورونها ، هي اللي في النهاية تعطي الأكل الطعم حقه و النكهة المميزة. النودلز الآسيويه تختلف تماما عن النودلز الإيطاليه أو الباستا، طريقة الصنع و نوعية النشويات المستخدمه تختلف بشكل كبير عكس الإيطاليه اللي تقريبا كلها نفس الوصفة بس بأشكال مختلفه. كل نوع نودلز لها طعم وقوام وحتى طريقة طبخ مختلفه عن الثانيه وعشان كذا ياليت تمشون على نفس النوع اللي حطيت.

 

النودلز هذي الحلو فيها إنها تنوكل دافيه وكل ما قعدت أكثر كل ما تحسن طعمها، تقدرون تسوونها قبل بيوم لو تبون وتحفظونها في الثلاجه وتخلونها توصل حرارة الغرفة قبل تاكلونها.

 

 

المقادير :

 

 

ملعقة كبيره زيت ( يفضل زيت فول سوداني )

ملعقتين كبار زنجبيل مقطع صغار

فصين ثوم مقطعة صغار

٢ ملعقة كبيره زيت سمسم

٢ ملعقة كبيرة بينت بتر ( ناعمة )

ملعقة ونص كبيره صويا صوص خفيف

ملعقة كبيرة خل صيني أسود ( أو صوص وستشير )

ملعقتين كبار سكر بني أو لو عندكم سكر نخيل palm sugar

ملعقة كبيره زيت حار chili oil

ملعقتين صغار صوص سمك fish sauce

ربع كيلو نودلز بيض صينية نحيفة egg noodles

٦ حبات بصل أخضر مقطعه على زاويه

١/٢ كوب فول سوداني محمص ومقطع كبار

سمسم محمص للزينه

ملعقتين كبار ريحان تايلندي

ملعقتين كبار نعناع

 

 

* البينت بتر موب بس للفطور ، لها إستخدامات كثير في الأطباق المالحة خصوصا في الأكل الشرق آسيوي .

 

* الصويا اللي تجي ثقيلة وحلوه هذي صوص صويا أندونيسي يسمونه كيكاب مانيس. الصويا اللي أقصده في الموضوع هو الصويا الصينية أو اليابانيه اللي تجي خفيفه زي كثافة المويه تقريبا وسوداء ومالحة شوي بدون أي طعم حلاوه أو غيره.

 

* الخل الأسود هو خل معتق مصنوع من خل رز في حال ما لقيتوه أستخدموا صوص وستشير صوص ( أعتقد متوفر في كل مكان ). في حال ما لقيتوا وستشير أستخدموا خل “شيري” وفي أسوأ الحالات أستخدموا صوص بلسمك.

 

* الزيت الحار اللي أقصد يجي زيت لونه أحمر مطعم بفلفل أكيد موجود في البقالات الأندونيسيه. إذا مافيه فيه شي ينباع بعد في البقالات الأندونيسيه إسمه سامبال أوليك (موجود أكيد) sambal oelek يجي فلفل حار مطحون مع زيت ، خذوا من الزيت اللي معه وهو نفس الشي.

 

* صوص السمك صوص تايلندي أصلي موجود في كل أكلاتهم تقريبا ، في الأكل التايلندي يستخدمون صوص السمك زي الملح. وشو صوص السمك ؟ صوص السمك ماراح أكذب عليكم هو بالضبط زي إسمه صوص سمك، هو عبارة عن مجموعة أسماك مجففة ومطحونه مع بهارات و مواد ثانيه كثير. طعمه بعد ماراح أكذب عليكم ، طعمه يجي مالح وبطعم سمك قوي ! وريحته بعد ماراح أكذب عليكم ريحة سمك ! هل يبان في الطعم النهائي ؟ أبدا وكأنه موب موجود ، كل اللي يعطي الصوص هذا هو ملوحة وطعم عميق مافيه شي ثاني بيعطي نفس الطعم حقه.

 

* نودلز البيض تلاقون مكتوب عليها egg noodles بالإنجليزي. تقدرون تستخدمون إندومي لو تبون ( بدون الزيت و الخرابيط اللي معه ) و تقدرون بعد تستخدمون باستا إيطاليه بشكل شعر الملائكة angel hair  أو إسبجيتي لو تبون بس بشرط يكونون طازجين ! يعني ما تكون باستا مجففه !.


* الريحان التيالندي طعمه مختلف عن الريحان الإيطالي اللي ورقة عريض، في حال ما لقيتوا ريحان تايلندي لا تستخدمون ريحان إيطالي ! زيدوا نعناع وخلاص.

 

 

الطريقة :

 

 

نسخن الزيت في مقلة صغيرة على حرارة وسط وبعد ما يحتر نحط الزنجبيل و الثوم ونطبخهم دقيقه وحده بس بعدين نشيل الخليط ونحطه في صحن خلط كبير. نضيف على صحن الخلط زيت السمسم ، البينت بتر ، الصويا ، الخل أو الوستشير ، السكر البني ، الزيت الحار وصوص السمك ونخلطهم مع بعض زين إلين يعطوننا صوص ثقيل شوي.

 

نطبخ النودلز زي ما هو مكتوب على العلبة إلين ما تصير ألدنتي (شوفوا موضوع الباستا إذا ما تعرفون وش معنى ألدنتي). بعد ما تستوي النودلز نطلعها من المويه ونصفيها وعلطول نغسلها بمويه بارده عشان نوقف عملية الطبخ بعدين نحطها عالصوص اللي سوينا ونقلبها معه زين. نضيف البصل الأخضر ونقلبه مع النودلز بعدين نخليها تشرب الصوص ساعة عالأقل على حرارة الغرفة مع التقليب من وقت لوقت. نضيف الفول السوداني و السمسم و النعناع و الريحان ونقلبه معهم بعدين نذوق النودلز ونعدل الطعم حسب الرغبة.

 

نودلز الفول السوداني

peanut noodles

نودلز تايلنديه

thai peanut noodles

نودلز تايلنديه

Follow TopChefCooks on Twitter

عن الكاتب

Top Chef

7 comments

3 pings

Skip to comment form

  1. البتول

    ماشاء الله تعجبني دائماً دقتك في الشرح واهتمامك بالتفاصيل
    إذا ممكن أبي أعرف طريقة الشوربة التايلندية اللي تكون حلوه ومعها
    أناناس وروبيان وشي مثل التين إذا تعرف شيء عنها ياليت تنزل عنها :)

    1. Top Chef

      حياك ….

      أناناس ما أعرف الصراحة … متأكده موب التوم يم العاديه ؟

  2. ابرار

    شي جميل ولذيذ ودي اجربها لكن المقادير صعبه مؤ متواجده بأي بيت
    الله يعطيك العافيه

  3. غير معروف

    اول مره تكون مرن في المقادير
    يا ليت تتبع المرونه هذي دايم

    ما لقيت في الصوره النهائيه اثر للبصل الاخضر ؟
    وبعدين ليه السمسم اسود ههه لايكون محروق ؟

    1. Top Chef

      مرن ؟ دايما مرن في المقادير بشرط إنها ما تكون شي أساسي في الوصفة ..

      البصل موجود ، يمكن في الصحن الكبير حق الخلط نزل تحت ولا تلاقينه داخل النودلز بس هي معها بصل هذا المهم ماعليك من الصور.

      السمسم هذا سمسم أسود . فيه كذا نوع من السمسم غير الأبيض

  4. غير معروف

    تسلم الايادي يارب اعشق الاكل التايلندي واوافقك تماما انه مطبخ مظلوم مع انه في قمة الروعة

  5. غير معروف

    يعطيك العافيه ‏..

  1. ختام فعالية حول العالم في ٣٠ يوم …. » Top Chef Blog .. مدونة توب شيف

    […] تايلند : نودلز الفول السوداني بالسمسم […]

  2. ختام فعالية حول العالم في ٣٠ يوم …. « مدونة توب شيف … Top Chef

    […] تايلند : نودلز الفول السوداني بالسمسم […]

  3. أندونيسيا : ناسي جورين .. Nasi Goreng « مدونة توب شيف … Top Chef

    […] فاصوليا طازجة ( هذا موسمها ) ومطعمها بشوي صوص سمك (شوفوا موضوع تايلند إذا ما تعرفون وشو صوص السمك) و آخر شي مقدمها مع بيضه […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: