«

»

مايو 31 2011

الهند : صاج بانيير .. Saag Paneer

هلا والله ..

 

هذا الموضوع تابع لفعالية حول العالم في ٣٠ يوم. هذي ثاني وصفة هنديه في المدونة نزلت قبلها وصفة لكاري مدراس هنا.

 

الصاج بانيير وحده من أشهر الأكلات الهنديه حولين العالم ، الأكله جدا مشهورة لدرجة إنها تنباع مجمده عندنا في السوبرماركت كخيار للنباتيين ( هداهم الله ). الصاج بانيير أكله من شمال الهند و أكل شمال الهند يختلف عن الجنوب في كونه أهدأ شوي في إستخدام البهارات القويه أو الحاره واللي بيذوق الأكله هذي علطول بيعرف وش أقصد. صاج بالهندي يعني سبانخ و البانيير زي ما شرحت قبل هو نوع جبن هندي. الأكله هذي هي عبارة عن كاري ( الطبق موب البهار و لا الورق !) مكون من سبانخ مفروم مع قطع بانيير بدال اللحم أو الدجاج ومقدمة مع خبز نان أو رز أبيض عادي. الأكله جدا لذيذه وجدا سهلة وهي طعم هندي متأكد بيكون جديد على ناس كثير.

 

المقادير :

 

 

وصفة من البانيير أو قطعة جاهزة وزنها تقريبا ربع كيل. مقطعة مكعبات كبيره.

سمن أو زيت نباتي

نص كيلو سبانخ مغسول

ملعقة صغيرة بذور كمون

بصلة مقطعه صغار

٣ فصوص ثوم مقطعه صغار

زنجبيل مقطع صغار مره بنفس كمية الثوم ( تقريبا ملعقتين كبار )

حبتين فلفل أخضر حار مقطع صغار ( أو حسب الرغبة )

نص ملعقة صغيرة كركم

نص ملعقة صغيرة كزبرة مفرومة

رشة قرفة مطحونه

رشة فلفل أحمر مطحون

ربع كوب كزبرة مفرومه

جارام ماسالا ( خلطة بهارات هنديه تنباع جاهزة )

ربع كوب زبادي كامل الدسم

ربع كوب كريمة

 

 

* تقدرون تستخدمون جبنة كوتاج أو حلوم أو حتى توفو بدال البانيير.

 

* تقدرون تستخدمون أو تخلطون أنواع ورقيات ثانيه مع السبانخ. هذي أكله ثانيه يسمونها بالاك بانيير palak paneer وهي بالضبط نفس الشي بس بإستخدام ورقيات ثانيه غير أو مع السبانخ.

 

* كمية الفلفل اللي حاط جدا بسيطة ومالها أي حراره قويه في الطبق إذا تحبون الأكل حار زيدوا الكمية و إذا تبون أقل أو بدون بعد ينفع.

 

 

الطريقة :

 

أول شي نسويه نغسل السبانخ. بعد ما نغسلها نسخن قدر عريض على حرارة أعلى من وسط بشوي بعدين نحط السبانخ مع رشة ملح بدون زيت أو أي شي ثاني ونغطي القدر ونطبخها إلين تذبل تقريبا ٥ دقايق. السبانخ هنا راح تنطبخ بالبخار اللي بيطلع من المويه اللي عالقة فيها وقت الغسيل. بعد ما تذبل نشيلها من القدر ونحطها في حمام ثلجي عشان نوقف عمليه الطبخ ونثبت اللون. الحين نفرم السبانخ بسكين ونحطها عالجنب. فيه ناس يحبون يفرمون السبانخ ويخلونها ناعمه مره وفيه ناس يستخدمون الخلاط لهذي العمليه ، المسألة راجعتلكم وكيف تبون قوام الكاري في الأخير.

 

spinach

سبانخ

 

 

الحين نسخن القدر من جديد على حرارة وسط ونخليه يسخن شوي بعدين نحط شوي زيت و بعدين البانيير مع رشة ملح وفلفل ونخليه يتحمر مع التحريك من وقت لوقت إلين يكونلنا لون ذهبي حلو على كل الجهات ( أنتبهوا لا تخلونه ينحرق ). بعد ما يتحمر نشيله ونحطه عالجنب إلين نسوي الكاري. تحمير البانيير خطوة إضافيه بس راح تعطي الكاري و البانيير طعم رهيب.

 

saag paneer

 

الحين نرجع القدر عالنار على حرارة هاديه ونحط السمن مع حبوب الكمون و البصل ورشة ملح ونطبخ البصل إلين يذبل. بعد ما يذبل البصل نحط الثوم و الزنجبيل و الفلفل الأخضر و نطبخهم إلين تطلع ريحتهم بعدين نحط الكزبرة و الكركم و القرفة و الفلفل الحار و شوي جارام ماسالا . الحين نرجع السبانخ و البانيير للقدر ونحط الكزبرة ونطبخهم شوي مع بعض بعدين نحط الكريمة و الزبادي ونطبخهم بدون ما نخلي الخليط يغلي ( عشان لا تتكتل الزبادي ) إلين يتمازجون مع بعض. نذوق الكاري ونوزن الطعم بإننا نزيد ملح وفلفل و ليمون و جارام ماسالا حسب الرغبة.

 

saaj paneer curry

 

صاج بانيير

 

saaj paneer

 

صاج بانيير كاري

 

saaj paneer

 

صاج بانيير

Follow TopChefCooks on Twitter

عن الكاتب

Top Chef

17 comments

2 pings

Skip to comment form

  1. nana

    سبانخ وجبن يميييي

    مشكور على الوصفة

  2. نهى

    السلام عليكم
    ابغ اعرف مقادير الباجوري هاي اكلة هندية يعملوها باللبن ابغ مقاديرها لو تكرمت ياشيف

    1. Top Chef

      ما اعرفها للأسف

  3. ام زياد

    يعطيك الف عافيه شيف
    بس هل اقدر اسويها واستعملها كحشوه للساندوتشات ولا السمبوسه
    احسها تصير اطيب من اكلها مع الرز
    لو نحط الرز بدون دجاج ولا لحم من المصايب عندنا

    1. Top Chef

      وش المانع ؟ حطيها مع اللي تبين لو إسكريم .

      أطيب ولا لأ هذا موضوع ثاني ، لو كان فيه طريقة نعرف بدون نذوق كان محد جرب.

  4. ام فهد

    السلام عليكم
    شيف شكرا على توضيح سبب عدم ظهور رسالتي مع كتابتها اكثر من مرة الظاهر اني ازعجتك :)
    بس للحينك ماجاوبت على سؤالي لوسمحت:
    هل بامكاني ان استخدم سبانخ مثلجه بدل الطازجه في حال عدم توافرها؟
    هل يؤثر على النكهه؟
    وبانتظار اجابتك حتى يتم التطبيق :)

    1. Top Chef

      هههه جاوبتك والله بس شكلي محيت الردود المكرره ومحيت ردي معها …

      عموما تقدرين تستخدمين سبانخ مجمده عادي .. أسلقيها بعدين حطيها في مويه مجمده وكملي الوصفة عادي . أي وصفة تطلب سبانخ مفرومه تقدرين تبدلينها بمجمده دايما

  5. غير معروف

    صباح الخير

    اخيراً لقيت وصفة للجبن الي بحلت فيه “مسوية جبن من لبن ماعز ولا احد بغاه ومتحفة عليه ارمية ”

    طيب بغيت اسألك حطيت لبن وكريمة بس اشوف كأنه ناشف ولا !!!

    بخصوص الجراماسالا مو كأنها ناقصها حلبة وورق كاري ولا انا غلطانة!!

    وصرحة بقول شي جربت اسويها في البيت وشريت من السوبرماركت لكن كلهم مايجون ولا حتى بالمقارنه مع الي اجيبها من الهند لها طعم ونكهة غيييييير تماماً

    الله يجزاك ووالديك الجنة يا رب

    1. Top Chef

      موب ناشف بس هو ما يجيك في مرق أو إيدام زي الكاري العادي . لو تبين زيدي قشطة أو حتى مويه عشان تخلينه سايل أكثر

      الجارام ماسالا لها مليون ألف طريقة كل منطقة وكل بيت يسويها غير.. هذي الأساس ، هذي هي اللي موجوده تقريبا في كل الأنواع بعض الأنواع تزيد عليها أو تستخدم بهارات مختلفه عنها يعني هيل أسود و هيل أخضر وكذا ..

      في الهند فيه بهارات كثير و الهنود يعرفونها ويعرفون يستخدمونها أحسن من أي أحد طبيعي يكون حقهم طعمه غير ، أهل مكه أدرى بشعابها.

  6. ام فهد

    السلام
    مادري شنو صاير اكتب سؤالي 3 مرات ولايطلع :(
    على العموم سؤالي ياشيف اقدر استخدم سبانخ مثلجه بدل الطازجه لانه ماعندي؟ وكيف؟
    لاني نفسي اسويها مع جبنة الحلوم
    وشكرا…

    1. Top Chef

      وعليكم السلام .

      أكتبي السؤال مره وحده ولا تخافين يطلع بعدين .. اللي يصير إنه أحيانا يشبته إن اللي كاتبه دعايه فيروح يمنع الرسالة إلين أوافق عليها بس .. بس هي تطلعلي لا تخافين .. إذا ما تبين يطلع كذا أسهل تكتبين في خانة الإسم و الإيميل

  7. *سفونه الليمونه*

    احس الوصفه طعمها شيء لايقاوم دخلت مزاجي على طووووول

    بس الكريمه تقصد الحامضه؟؟واللا قشطة الخفق
    لو كان المقصود الحامضه؟؟ممكن استبدلها بالخفق العاديه !؟
    لان نادر احصلها الحامضه

    1. Top Chef

      كريمة يعني قشطة خفق ، كنت أكتب قشطة خفق وكان يجيني ناس يقولون كم علبه هههه كريمة أصح و أوضح أحس

  8. هيفاء

    يعطيك العافيه

  9. حمد

    تسلم والله اخوي خالد على هالجهود و الاطباق الخيالية،،
    عقبال ما نزورك في مطعمك ان شاء الله

  10. غير معروف

    مشكور شيف عالوصفة
    اقدر اسوي بهارات الجرام ماسال في البيت

    1. Top Chef

      طبعا تقدرين .. إلا يفضل بعد ..

      ملعقتين كبار هيل كامل
      ملعقتين كبار كزبرة كامله
      ملعقة كبيره كمون كامل
      ملعقة كبيره بذور خردل كامله
      ملعقتين كبار فلفل أسود كامل
      ٢٠ حبة قرنفل
      حبة فلفل مجفف كامل
      عود قرفة بحجم الإصبع تقريبا

      حمصي هذي البهارات في مقله جافه إلين تطلع ريحتها بعدين أطحنيها بطاحونه بهارات و زيدي عليها ملعقة صغيرة جوزة طيب مطحونة

  1. ختام فعالية حول العالم في ٣٠ يوم …. » Top Chef Blog .. مدونة توب شيف

    […] الهند : صاج بانيير […]

  2. ختام فعالية حول العالم في ٣٠ يوم …. « مدونة توب شيف … Top Chef

    […] الهند : صاج بانيير […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: