هلا والله …
حشوة الريكوتا يمكن أشهر حشوة للباستا الطازة ، مافيه مطعم إيطالي ما نلاقي الباستا هذي في المينيو حقهم. الحشوة تمشي مع أي باستا محشية ( كانيلوني ، رافيولي ، تورتيليني ، أو حتى في اللزانيا) . الحشوة تمشي بشكل حلو مع صوص الطماط الأساسي ( ومشتقاته ) ومع صوصات الزبدة الذايبة. الحشوة لها إستخدامات ثانيه غير الباستا ، جربوها مع السمبوسه لو تبون جدا لذيذه.
الريكوتا نوع من أنواع الجبن الإيطالي الطازج ، طعمها كريمي مره بملوحة جدا خفيفه وبدون أي حموضه ، للأسف مافيه بديل بيعطي نفس الطعم بالضبط. السبانخ هنا هي الأصل بس طبعا التبديلات أو التعديلات ممكنه ، الجرجير رهيب مع هذي الحشوة لو تبون تجربون.
المقادير :
٣ أكواب سبانخ .
كوب جبن ريكوتا
فصين ثوم مقطعه صغار
١/٣ كوب جبن بارميزان يفضل بارميجانو ريجانو
٤ ملاعق كبيره أعشاب طازجة حسب الرغبة ( بقدونس ، أوريجانو ، ريحان ، نعناع ) . شخصيا أستخدم ملعقتين كبار بقدونس وملعقتين كبار ريحان
بيضه
ملح وفلفل
رشة جوزة طيب ( إختياريه بس تسوي فرق كبييييير )
بشر ليمون
* تقدرون تستخدمون أعشاب مجففة بدال الطازة ، أستخدموا ملعقة صغيرة من الجافه لكل ملعقة كبيره طازه.
الطريقة :
نسلق السبانخ ( أو الخضار المستخدمه ) في مويه مملحة تقريبا ٣٠ ثانيه . نطلعها من المويه وعلطول نحطها في حمام ثلجي ( مويه باردة مع ثلج ) عشان نوقف الطبخ ونثبت اللون الأخضر. نشيلها من المويه ونعصرها بيدنا ونطلع كل المويه اللي فيها، أعصروها بقوة ما نبي أي مويه عشان ما تخرب الحشوة.
نفرم السبانخ بالسكين بعدين نضيفها على باقي المقادير ونخلطهم مع بعض. نذوق الحشوة ونعدل الملح والفلفل حسب الرغبة . ما أعتقد فيه أسهل من كذا ؟
كانيلوني مع حشوة الريكوتا و السبانخ .. Cannelloni with Ricotta and Spinach Filling :
باستا غنية عن التعريف .. كانيلوي طازة ( باستا أسطوانيه ) محشية ريكوتا و سبانخ ومطبوخة في صوص طماط مع صوص باشاميلا في الفرن . هذي الباستا ما تحتاج تنسلق قبل تدخل الفرن .
نسوي عجينة الباستا بكوب طحين زي ما شرحت في موضوع الباستا الطازة هنا.
نسوي كميتين من حشوة الريكوتا و السبانخ زي ما شرحت فوق . يعني ندبل كل المقادير عشان تكفي مع العجينة حقت الباستا.
نسوي صوص باشاميلا بكوبين حليب ( صوص أبيض مطعم ببصل ، ثوم ، جوزة طيب وورق غار ) زي ما شرحت في موضوع الصوص الأبيض.
نسوي صوص طماط أساسي زي ما شرحت في موضوع صوص الطماط الأساسي .
نحط الحشوة في قمع ونحشي الكانيلوني زي ما شرحت في موضوع الباستا الطازة.
في صحن فرن نحط طبقة خفيفه باشاميلا في الصحن بعدين نرص الكانيلوني المحشية فوقها وبعدين نغطيها بصوص الطماط وبعدين طبقة ثانيه باشاميلا . آخر شي نرش بارمزان عالوجه وندخلها فرن ٣٧٥ إلين يتحمر الجبن .
26 comments
Skip to comment form
ممكن اعرف حشوة للسمبوسك بالجبنه الريكوتا اي هي مكوناتها
اهلين شيف بالنسبه لي اكره العجن هل بامكاني استبدال عجن البيتزا بشراء كانليوني جاهزه ؟ واصير اعبيه بالصوص
واذا فيه نوع معين تنصح بشرائه من السوبر ماركت ..
Author
ينفع اكيد بس موب نفس الشي. تعلمي تختارين بنفسك !! اقري موضوع الباستا الجافة وبتعرفين الفروقات بين الانواع وليش هذي احسن او هذي اغلى
صباح الخير اخوي
الله يعطيك الف الف عافيه بجد مبدع الله لايضرك ويحرسك
انت من الاشخاص اللي نفتخر فيهم وربي
انا سويت الازانيا على طريقتك تبي الجد كنت موب ذاك الزود على هالطبق ماعمري اشتهيته ابببد
بس على طريقتك صار ادماااان قسم قمه باللذه واعجب كل اللي حولي واعتمدت الطريقه
عندي سؤال لاهنت لو بحشي الكانيلوني الجاهزه اسلقها والا مايحتاج احسها ما بتستوي لو ما سلقتها
وعندي اقتراح ليش ماتفكر تطلع لك كتاب وتجمع كل اصنافك فيه
الله يوفقك ويسعدك ويكتبلك الخير بكل امورك
Author
الكانيلوتي الجاهزة نص سلقة بس. ولازم تحطينه في مويه مثلجة بعد السلق بعدين تحشينه.
بالنسبة للكتاب قالوها كثير بس أنا ماجبت شي جديد عشان أحطه في كتاب ، كل شي أقوله موجود لو أحد دور ما أحس إنه شي مفيد الصراحة.
اريد وصفه مبدعه لحشوه الرافيولي
وغير تقليديه
وياريت لو بالجمبري
ممكن
Author
جيبي جمبري وحطيه في خلاط مولينكس مع ملح وفلفل أبيض وشوي بصل أخضر وصفار بيضه و أفرميهم إلين يعطيك معجون ناعم وأستخدميه كحشوة.
طيب الجمبري و البصل مش لازم يبقوا مستويين و لا نئ
Author
كونه مفروم بينطبخ في ثواني من حراره السلق ما يحتاج تطبخينهم قبل.
صباحو
هالاكله من مخي منذو اسبوع من شفتها فيذا
ورحت اليوم هايبر بنده شريت كل مقاديرها
بس للاسف مالقيت هالجبنه الريكوتا
بغغيت انجلططط
قام قالي العامل يقولي خذي العكاوي هي بديل لها
عاد شريتها بس ماراح اسويها ماجازت لي هالعكاوي هع
بليزز شيف شرايك ؟
Author
لو علي بجرب، بس إذا ما أعجبك طعم الجبن العكاوي أجل وش الهدف ؟
ممكن اسئلك ؟؟
يصلح بحشوة الريكتو اسوي الفيوتشي ؟؟
وعادي تخلى مده اطول عشان اسويها لمناسبه يقني قصدي يصلح اسويها لمده طويله تنتظر ما تلبد ؟؟
وايضا طريقه*** فيتوشيني ألفريدو ***
يصلح اسويها قبل 3 4 ساعات ما تخرب ؟؟ واقدر استبدل بدل الفطر روبيان؟
Author
هذي حشوه موب صوص لاحظي إنها موب سايلة بحيث تنفع مع شي زي الفيتوشيني.
الفيتوشيني تقدرين طبعا تحطين ربيان .
باقي الأسئلة تلاقينها في مواضيع الباستا أنصحك تقرينها.
http://topchefcooks.com/2011/02/22/an-introduction-to-pasta-cooking/
http://topchefcooks.com/2011/02/22/dry-pasta/
http://topchefcooks.com/2011/03/01/fresh-pasta/
تقصد صلصه الطماطم اللي ذكرته من قبل بدون اي اضافات ؟
Author
بالضبط
جبنة الريكوتا تلقينها في
التميمي
طيب حابة أسالك انا مالقيت جبنة الريكوتا وقالو لي انه المسكربون نفس الغرض
هل ينفع احشي بها المكرونه القواقع او نفس هذا الطبق ؟
وشكراً
Author
الشبه الوحيد بين الماسكاربوني و الريكوتا إنهم من إيطاليا. تقدرين تستخدمين ماسكاربوني وتقدرين تستخدمين أي نوع جبن مشابه ثاني بس الطعم بيكون غير يعني بتكون حشوة ثانيه تماما.
ايوا انا فتحت ع الموضوع الخاص بالصوص الاساسي بس مني متخيلة سماكته مفروض كيف تكون
زي الصوص الجاهز تبع البيتزا و الباستات؟
Author
إيه
مرحبا توب شيف .. اول شي تسلم يدك ويعطيك الف عافية
بصراحة انت انسان ملهم .. احنا جدا محتاجينك في زمن الطبخ تحول فيه الى خبص×خبص
كل مين يخترع ويألف .. والمكونات سارت بالموضة .. فجأة كل الاكلات سارت فيها كريما و بارميزان وقشطة
الاجبان بالكيلو ويعتقدو ان دا هو الفن
وفجأة كل الحلا سار دنيت وكريمة
سار اكل غير ممتع يصيب بالتخمة ويحسسك بالذنب وانت تاكله
كل الاكل سار طعمه واحد..
عموما شكرا لك و عندي لك سؤال عن دا الطبق و كمان عندي طلب
سؤالي بالنسبة لصوص الطماطم الاساسي اللي انت استخدمته ع الكانيلوني كيف كانت سماكته تقريبا؟
لاني مستغربة انو ما اتخلط مع الصوص الابيض قبل الطبخ وكذلك الصوص الابيض كيف كثافته؟
الطلب : اتمنى توضح لنا طريقة اعداد المرق سواء دجاج او لحم
وشكرا لك
Author
الله يسلمك ..
بالنسبة لكلامك أنتي قلتي اللي ودي أقوله من زمااااااان الأكلات ( عالأقل اللي في النت مدري عن الواقع ) صارت وحده كل شي نفس الشي مافيه تجديد أو تغيير .. كلها عبارة عن تشيز كيك ، سينابون ، فيتوشيني ، كنافة ، بسبوسة ، مولتن كيك أو سلطة جرجير.. هذي أحلفلك هي ٩٠ ٪ من الوصفات اللي في النت !
صوص الطماط الأساسي سماكته زي سماكة صوص طماط .. شوفي الموضوع وسويه زي ما سويت أول ما يثقل الصوص ويصير طعمه جيد خلاص وقفي ..
الباشاميل بعد نزلت موضوع كامل عن الباشاميل سويه زي ماقلت في المضوع .
المرق زي ماقلت كثير هو واحد من أهم المواضيع في الطبخ وراح أنزل طريقته إن شاء الله بالتفصيل ..
يعطيك الف عافيه
الباستا شكلها خرافي واحسها خاطبتني على مستوى شخصي لاني انسانه اعشق السبانخ
ان شاء الله اطبقها قريب
:>
Author
الله يعافيك ..
بالعافيه على قلبك مقدما أجل ههه
طيب السبانخ إذا عصرت مويتها وش بيبقى فيها من الطعم وفوائدها الغذائية
Author
يبقى كثير لا تخافين .. المويه اللي عصرنا أصلا هي مويه السلق موب المويه حقت السبانخ . الشي الثاني لا تنسين إننا طبخنا السبانخ ٣٠ ثانيه بس يعني السبانخ ما أنطبخت ١٠٠٪ .
الشي الثاني اللي لازم تفكرين فيه هو إن ما عندنا خيار ثاني هنا ، لو ما سلقناها وعصرناها بيطلع لون الحشوة على رمادي ولو سلقناها وما عصرناها بتكون مليانه مويه ويمكن تخرب الباستا .