«

»

مارس 05 2011

صوص البوتتانيسكا .. Puttanesca Sauce

هلا والله …

 

صوص البوتتانيسكا تفرع ثاني لصوص الطماط الأساسي. طريقة الصوص الأساسي هنا.

 

هذا الصوص واحد من أشهر الصوصات الإيطالية ومنشأه جنوب إيطاليا بس هو منشر في منطقة البحر المتوسط بشكل كبير مثل اليونان و صقلية و سردينيا. الترجمة الحرفية للصوص هو “صوص بنات الليل” هههه .. فيه قصتين تتكلم عن سبب التسميه، الأولى هي إن الصوص كانوا يسوونه بنات الليل في بيوت الدعارة كونه سريع في التحضير وما ياخذ وقت غير إن ريحته تجذب الرجال للمحل ؟؟؟ .. النظرية الثانيه تقول إن مجموعة زباين دخلوا مطعم وهو على وشك يقفل يوم من الأيام وقالهم الطباخ ماعندي أكل . فقالوا له عطنا أي شي حتى لو “قذارة” فدخل المطبخ وزي أكلات كثير أخترعت كذا ( التشكن وينجز مثلا ) جمع كم مكون باقي وخلطهم مع بعض وسوا هذا الصوص و أعجبهم لدرجة إنهم رجعوله مرة ثانيه يطلبون نفس الصوص. بغض النظر عن سبب التسميه اللي يهمني في الموضوع إن الصوص هذا رهيب. وخصوصا للناس اللي يحبون نكهات البحر المتوسط كونه مغرق فيها. الصوص عبارة عن صوص طماط أساسي مطعم بفلفل حار ، كابر ، سمك أنشوجة anchovies ، ثوم ، أوريجانو و زيتون. طعم الصوص شوي حار ( من الفلفل ) وشوي حامض ( من الكابر ) و فيه ملوحة خفيفة ( من الزيتون و الكابر و الأنشوجة ).

 

الصوص إستخداماته كثير .. ممكن ينوكل مع باستا ، مع رز ، مع دجاج ، لحم ، رهيب مع الأكل البحري أو حتى ممكن ينوكل مع خبز بس .. هذي بعض الأمثله بس .. بس هو صوص جدا مرن ويمشي مع أكلات كثير ..

 

فيه مكونات كثير ذكرتها داري إن فيه ناس كثير خافوا منها يوم سمعوها ..

 

الكابر capers :
الكابر عبارة عن براعم لنوع من أنواع النباتات اللي تعيش في هذيك المنطقة شكله زي الكور الصغيرة الخضراء. هذي البراعم تتملح أول شي بعدين تتخلل وتنحفظ. تنباع في الغالب في علب قزاز موجوده في كل السوبرماركتات جنب الخردل. الكابر يعتبر محسن نكهة يعني بيخلي طعم أي شي ينحط معه ألذ ( تقريبا زي الإم إس جي بس بدون الضرر ). طعمه تقريبا زي نوع مخلل بس غريب مع نكهة خردل خفيفة، ومافيه أي شي بيعطي نفس النكهة حقته في الأكل يعني ماله بديل. الكابر في الغالب مالح أكثر من اللازم من العلبه علطول عشان كذا يفضل نشطفه بالمويه قبل نستخدمه. الكابر كونه مخلل ومملح راح يعيش وقت طويل ( فيه ناس يقولون طول العمر ) بس تقريبا صلاحيته سنة ونص أو أكثر في الثلاجه.

 

الأنشوجة Anchovies :

 

الأنشوجة نوع من أنواع الأسماك الدهنية ( زي السردين و التونا و السالمون ) هذا النوع إذا تجفف وتملح لوقت طويل (تقريبا ٦ شهور أو أكثر ) يتغير ويصير طعمه مختلف تماما عنه وهو فريش ويستخدم في أكلات كثير حولين العالم موب بس في هذيك المنطقة، الأنشوجة في الغالب تنباع في علب معدن (أكثر شي منتشر) أو قزاز (وهي الأفضل) ويكون بس فيليه يعني بدون راس أو جلد و محفوظ في زيت ( في الغالب ) أو إذا كنتوا محظوظين في ملح ،وبتلاقونها يا في قسم الثلاجه أو عند علب التونا. الأنشوجة تختلف عن السردين و تختلف تماما عن التونه بعد، مافيه أي شي راح يعطي نفس النكهة حقت الأنشوجة في الأكل. الأنشوجة ممكن تستخدم كمكون زي فوق بيتزا مثلا بس هي في الغالب تستخدم كنكهة بس للأكل كونها تعطي الأكل نكهة خاصة وملوحة خفيفة، اللي قدر جرب سلطة سيزر صحيحة في الغالب قد أكل أنشوجة كونها مكون أساسي في الصوص حقها ، اللي قدر جرب صوص الوستشير أو صوص السمك (التايلندي) الأنشوجة تقريبا هي المكون الأساسي في الإثنين.  الأنشوجة في الغالب راح تختفي من الصوص وماراح يبقى إلا نكهتها بس. الأنشوجة كونها مجففة ومملحة راح تعيش وقت طويل، بعد ما تفتحون العلبه حطوا باقي الأنشوجة في علب تتقفل بإحكام وغطوها بزيت زيتون وراح تعيش في الثلاجة سنة تقريبا كذا.

 

 

الطريقة :

 

كمية المقادير اللي حاط غيروا فيها زي ما تبون بس هي نقطة بداية لا أكثر ..

 

زيت زيتون

فصين ثوم مقطعة شرايح

ملعقة صغيرة فلفل أحمر مجروش

٣ شرايح سمك أنشوجة مقطعة صغار

١/٢ كوب زيتون كلماتا منزوع النوى ومقطع صغار .. أو أي نوع أو خلطة أنواع زيتون حسب الرغبة

ملعقتين كبار كابر مغسول مقطعه شوي

ملعقة صغيرة أوريجانو مجفف

كوبين ونص من صوص الطماط الأساسي

 

 

نطبخ الثوم في شوي زيت زيتون على حرارة هادية إلين تطلع ريحة الثوم تقريبا ٣٠ ثانيه موب أكثر بعدين نحط الفلفل الحار ونقلبه شوي معهم بعدين نحط الأنشوجة و الكابر و الزيتون ونطبخهم مع بعض شوي بعدين نحط صوص الطماط و الأوريجانو ونخليه يطبخ شوي إلين يتطعم بالصوص.

 

puttanesca

 

بوتانيسكا

 

 

 

أمثلة :

 

 

* لينجويني مع صوص البوتانيسكا .. Linguini Alla Puttanesca :

 

تقريبا ٣٠٠  جرام باستا لينجويني أو سباقيتي أو أي نوع ثاني مناسب. طازه أو ناشفه حسب الرغبة.

شوي بقدونس أو ريحان للزينة

جبن بارمزان ( يفضل بارميجانو ريجانو ) .

صوص بوتانيسكا اللي فوق.

 

نسلق الباستا زي ماشرحت في مواضيع الباستا (هنا و هنا)  بعدين نضيفها للصوص ونقلبها معه مع شوي بارمزان ورشة بقدونس أو ريحان .

 

بوتانيسكا

 


 

* حبار محشي مع صوص البوتانيسكا .. Stuffed Calamari with Puttanesca Sauce :

 

الحبار له طريقتين عشان ينطبخ .. يا بسرعة وعلى حرارة عالية زي القلي مثلا أو على حرارة هادية بس لوقت طويل أي شي في النص بيعطينا حبار ناشف .. في هذي الوصفه بنحشي الحبار أول شي بخلطة إيطالية بعدين بنطبخة في صوص البوتانيسكا وقت طويل إلين يصير لين بعدين بنقدمه مع نفس الصوص اللي طبخناه فيه.

 

الحبار أكل بحري مافيه شحم كثير وهذا يخليه مثالي للتجميد. عشان كذا اللي مايلاقي حبار من نوعية جيدة يستخدم مجمد أحسنله من إنه يستخدم حبار قديم أو فيه ريحة كونه بيخرب كل شي.

كوب بقسماط يفضل يكون توه مطحون

حبتين طماط من علبة مقطعه صغار
بيضه
ثلث كوب بقدونس مفروم
فصين ثوم مقطعة شرايح
ملح وفلفل
ملعقتين كبار حليب
ربع كوب جبن بارمزان مبشور
نص بصلة صغيرة مقطعة صغار
٥ حبات زيتون أخضر مقطعه صغار
ملعقتين كبار زيت زيتون
تقريبا كيلويين حبار مع الراس و الزعانف

 

صوص بوتانيسكا

 

أول شي نسويه هو إننا ناخذ أحسن ٥ أو ٦ حبات من جسم الحبار عشان نحشيها. ننظف الراس لو ماكان منظف بإننا نشيل الأعضاء اللي فيه مثل العين و الفم وكيس الحبر بعدين نقطعه صغار هو و الزعانف.

 

الحين نخلط مقادير الحشوة كلها مع بعض ونخلط معها لحم الحبار اللي قطعناه .. نحشي أجسام الحبار بالحشوة بيدنا أو بإستخدام قمع بشرط إننا ما نكثر من الحشوة كونها بتنفش مع الحرارة.

 

calamari filling

 

حبار محشي

 

الحين نسخن مقلة على حرارة وسط وبعد ما تحتر شوي نحط شوي زيت زيتون ونحمر الحبار إلين يتحمر الوجه الأول (تقريبا ٤ دقايق) بعدين نقلبه عالوجه الثاني شوي شوي ونحمر الوجه الثاني.

 

حبار

 

الحين نحط صوص البوتانيسكا إلين ما تقريبا يغطي الحبار للنص . بعدين نخليه يغلي وهو مغطى على غلية جدا خفيف ٣٠ – ٤٠ دقيقه أو إلين يصير لييين مره .

 

calamari puttanesca

 

 

stuffed calamari

 

كلماري محشي

 

calamari

 

stuffed calamari

 

 

 

* توست فيليه السمك مع صوص البوتانيسكا .. Fish Fillet on Toast with Puttanesca :

 

إستخدام حلو لصوص البوتانيسكا مع فيليه سمك ..

 

زي أي طبق سمك أهم شي هو السمك ، أهم أهم شي هو إن السمك يكون طازج .. سمك طازج من نوعية عاديه أحسن من سمك شوي قديم من أحسن نوع، أي نوع سمك أبيض راح ينفع هنا..

 

سمك فيليه أي نوع

زيت زيتون

زبدة

خبز إيطالي مقطع شرايح سمكها ١ سانتي تقريبا ..

ريحان طازج

فص ثوم

ملح وفلفل

صوص بوتانيسكا

 

 

نسخن الفرن على ٣٧٥ . بعد ما يحتر نحمص شرايح الخبز شوي بعد ما نرش عليها شوي زيت زيتون ، بعد ما تتحمص نطلعها من الفرن ونمسح التوست بفص الثوم . هذا بيعطي طعم ثوم خفيف للخبز.

 

الحين عشان نطبخ السمك . نجفف الفيلية بمنديل رول زين بعدين نرش شوي ملح وفلفل على وجهين السمك بعدين نسخن مقلة تيفال على حرارة أعلى من وسط بشوي . بعد ما تحتر نحط شوي زيت زيتون وزبدة ونحط السمك ونخليها بدون تحريك إلين تبدأ الأطراف حقت السمك من الجنب تتحول أبيض و يبدأ السمك يقلب ذهبي من تحت. نقلب السمك ونطبخ الوجه الثاني إلين يستوي.

 

fish fillet

 

أكبر أكبر خطأ في طبخ السمك هو إن الناس في الغالب يطبخونه أكثر من اللازم .. كيف نعرف إن السمك  أستوى ؟ نرفع الفيليه بملعقة شوي ، أول ما يبدأ السمك يتفكك عن بعض معناها أستوى خلاص وما يحتاج أي دقيقة زيادة ولا بينشف.

 

fish donenness

لاحظوا كيف تفكك عن بعض في النص يوم رفعته شوي كذا يعني إستوى

 

السمك ما ينفع يقعد . أول ما يستوي علطول نقدمه. نحط شوي من صوص البوتانيسكا على التوست ، بعدين نحط فوقه كم ورقة ريحان ، بعدين نحط السمكه فوق الريحان ونحط شوي صوص فوق السمكه .

 

fillet

 

فيليه

 

fillet

عن الكاتب

Top Chef

44 comments

4 pings

Skip to comment form

  1. طهر الجنان

    السلام عليكم
    مشكور ع هالجهد والوصفات الجميلة اللي تحمس الواحد يطبخ
    والله يعطيك العافية ويكتب اجرك ()

    بس معليش أخوي مافهمت الوصفة مضبوط
    يعني اللحين الصوص هذا ماله دخل بالصوص الاساسي صح ؟
    أقصد اني ما اسوي الصوص الاساسي بعدين اضيف له مكونات هالصوص $:
    انا فهمت البداية بالوصفة ، بس لمن كتبت ( نحط صوص الطماط و الأوريجانو ونخليه يطبخ شوي إلين يتطعم بالصوص.) مافهمت هالنقطة
    هل تقصد بصوص الطماط الصوص الأساسي اكون مسويتة من قبل ؟!

    1. Top Chef

      وعليكم السلام و الرحمة ….

      إلا بالضبط زي ما فهمتي … تسوين الصوص الأساسي وبعدين تضيفين هذي المكونات عليه. الصوص الأساسي يفضل تسوينه بكميات كبيره وتحفظينه عندك هو شي زي المرق تقريبا. يمديك طبعا تسوين كل شي من الصفر نفس الطعم بالضبط بس حبيت أوضح فكرة إن هذا الصوص مشتق من هذاك الصوص.

  2. خوخه

    ياحظ مرتك فيك <3 <- تفكير سعودي لول
    يارب نشوفك عالمي وتعزمنا على المطعم ونذوق ببلاش خخخ
    بست وشز فور يو

  3. هبة

    يااااالهوي :$ .. فعلا انا اخذته من الشركة السعودية للاسماك الله يخسهم..خلاص مالي الا البنقلة

    شاكرة لك اهتمامك اخوي وبارك الله في مجهودك ومعلوماتك ..

  4. هبة

    شيف يعطيك العافية على الصوص اللزيز

    بس فيه مشكلة صارت معي امس ..سويت طبق توست فيليه السمك .. اخترت سمك هامور بس طالع طعمو السمك كانو نئ وولما ينوكل ينهرس معانا

    مع اني ماطلعته من المقلى الا هو مبيض ويتقطع …وعلى طول طلعته عشان مايستوي اكثر من اللازم زي ماقلت

    بس انا طلعت معي شغلة هل هي السبب او لا ..

    لصق معاي السمك وانا بقلبه ..واستوى اسرع ماتوقعت يمكن في حول 13 دقيقة .. لاني خليت النار اعلى من الوسط بشوي

    ويمكن العيب من السمكة نفسها… بجربها في اكله ثانية وبعرف السبب من وين جاي

    1. Top Chef

      السمك طازج ولا مفرز ؟ و إذا طازج جديد ولا قديم و إذا مفرز أنتم اللي مفرزينه ولا مشترينه مفرز و كيف ذوبتوه ؟

      1. هبة

        اهلا شيف

        السمك طازج .. وشركة الاسماك شرحت الهامور امامنا .. وانا فرزنته بكيسه من غير تنظيف .. بعد 3 ايام من الفرزنة طبخته .. كيف ذوبته!! خرجته من الفريزر قبلها بـ 4 ساعات الين ذاب وغسلته ورجعته الثلاجه لحين يقرب وقت الغداء واطبخه

        للمعلومية هذي المرة الاولى اللي نجيب فيها سمك فيليه طازه .. الغالبية كنا نشتريها مجمدة من السوبرماركت وماكان لها رائحة ..بس هذا الفيليه يالطيف قرفنا في شي اسمه سمك حتى المقلى والسكاكين الريحة عاااااااالقة حتى وانا منقعتهم بكلوركس وماء حار..مادري يكن عشان مافي خلفية عندنا ولا السمكة نفسها معفنة

        سؤالي .. المفروض اقل مدة ينطبخ فيها كم ؟؟ وهل غسيل السمك له دور في ابعاد الرائحة ؟؟ لاني مغسلتهم بشوية خل وملح ربع ساعة وغسلته .. وحسيت لسى الريحة قمت حطيت من جهتين الفيليه شرايح ليمون ودخلتهم الثلاجة

        1. Top Chef

          هنا المشكلة زي ما توقعت بالضبط.

          قبل كللللل شي السمك إذا فيه ريحة أعرفي إنه قديم وخربان السمك موب مفروض أبدا يكون له ريحة، هذي القاعده هي اللي ناس كثير ماقدروا يستوعبونها كيف سمك بدون ريحة ؟ عشان كذا يقعد العالم يدورون طرق “تشيل” الريحة مع العلم إن مافيه شي يشيل الريحة غير إنك تستخدمين أحسن سمك تقدرين تجيبينه ، إذا مافيه جنبك سمك زين لا تطبخين سمك. السمك ما يحتاج غسل خاص أو نقع أو حتى تتبيل بالعكس السمك لحمه جدا خفيف ولازم ما يتعرض لكمية بهارات ونكهات قويه تشيل طعمه. غسل السمك بليمون وملح ونقعه في مويه وكلها هذي كلها خطأ في خطأ ، غير إن مالها داعي هي بتخرب طعم وقوام السمك بشكل جدا كبير.

          دايما حطي في راسك سمك يعني لازم يكون جديد ، السمك ما يستحمل تفريز وحفظ . القاعده هي أشتريه وأطبخيه في أسرع وقت وفي حالة ما أمداك فرزيه بس لاتحطين الفريزر خيار أول أبدا.

          شركة الأسماك سمكها ما ينوكل الصراحة أغلبه قديييييم مره (عالأقل اللي هنا في جده مدري عن الرياض) .

          المشاكل اللي سويتيها كثيره وهي السبب في الريحة هذي. أول مشكلة هي إنه يمكن السمك قديم من الأساس (ما أعرف إذا قديم أو لأ بس زي ماقلت إذا من شركة الأسماك غالبا قديم شوي) ، ثاني مشكلة هي إنك فرزتي السمك خطأ، كان المفروض ما تفرزينه من الأساس إلا عند الضروره و إذا جيتي تفرزينه فيه طريقة معينه عشان نسوي أقل ضرر للسمك (شوفي موضوع مقدمة عن اللحوم شرحت ليش يخرب اللحم وكيف نفرزه وكيف نذوبه صح). ثالث مشكلة هي إنك ذوبتيه خطأ. رابع مشكلة هي إنك خربتيه بتنظيفك بالملح و المويه و الليمون هذي كلها تطبخ اللحم (بدون حراره ممكن ينطبخ) وتسحب المويه اللي فيه وتعطي سمك ناشف.

          أقري هذا الموضوع تكلمت عن السمك وطريقة الإختيار و الحفظ :
          http://topchefcooks.com/2011/05/24/tuna-crudo/

  5. Emi

    الطريقة كثيــــر عجبتني
    يعطيك العافية
    بس عندي سؤال ..
    تعرف إذا عندنا في السعودية جبن البرميجانو ريجانو ؟!
    لأني ما أعتقد ان هذا النوع موجود عندنا
    وينفع أشتريه من النت ؟! يعني ما يخرب أو يتأثر ؟!

    1. Top Chef

      البارميجانو ريجانو موجود في السعوديه دايما أشتريه .. أكيد فيه محل في الرياض يبيعه .. في جده دايما ألاقيه في الدانوب بس في الثلاجه جنب الحليب وكذا موب عند اللي يبيعون التشدر و الأنواع الثانيه .

  6. Fdwa

    السلام عليكم..يعطيك ربي العافيه عالمدونه والشغل الجبار :)
    عندي كم سؤال
    1- الثوم الموجود بوصفة صوص البونتنانيسكا من غير الموجود بصوص الطماطم أقصد ماراح تكون نكهة الثوم طاغيه على باقي المكونات؟
    2- احترت كثير بانواع الانشوجه هل فيه براند معينه تنصحني فيها؟ و ليش الزجاج أفضل من المعلب؟

    وجزاك الله خير

    1. Top Chef

      وعليكم السلام و الرحمة …

      ١ـ البوتانيسكا مفروض تكون نكهة الثوم واضحة . بس واضحة ما تعني قويه ومزعجة ! يعني راح تذوقين الجانب الحلو من الثوم موب الحار و الحاد .

      ٢ـ لا تسأليني والله عن الأنواع ، أنا منيب في السعوديه ما أعرف ولا شي عن الأشياء المتوفرة هناك ولا وين متوفرة. الجزاز أفضل لأنه أعلى تكلفه وغالبا اللي بيحطه في جزاز بيعطيك منتج أحسن. السبب اللي يخليهم يختارون جزاز هو إنه ما يتفاعل زي المعدن.

  7. SARA

    انا للاسف ما استسيغ زيت الزيتون ابدا ولا الزيتون
    لو ذقته بالغلط في اكله اصاب بهلع شديد وما اقدر ابلعها نهائيا
    ممكن نستغني عن المكونين هذي؟

    1. Top Chef

      ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ هذي غريبة هههه أول مره أسمع عنها .. الله يعينك ..

      تقدرين ، بتطلعين بصوص أحمر صح .. هل له ربع طعم الصوص الأصلي ؟ ما أعتقد .

  8. مرافئ

    تبارك الله وأنا أختك
    الله يحفظك في غربتك
    ويرجعك بالسلامة موفق
    من المتابعين لك منذ بداياتك ياتوب شيف
    في جسد الثقافة والمساطيل
    مبدع دائماً ومميز

    1. Top Chef

      آمين يارب الله يسمع منك .. مشكوره على مرورك .

  9. Arwa

    متى ترجع وتفتح لكـ مطعم ان شاءلله
    ونشترى هالطبخاات اللي تفتح النفس صدق اللي قال الاأكل نصه منظر كله يفتح النفس وواثقه ان طعمه خورافي .. تسلم يمناااك

    1. Top Chef

      هلا والله …

      ليش تشترينها ؟ خلي فلوسك لشي ما تقدرين تسوينه في البيت و أكيد بتكون أطعم من اللي في أي مطعم ..

      مشكوره على مرورك .

  10. ART

    تبارك الرحمن عن جد مبدع ومميز

    فى طريقة طبخك تخلى الواحد يستسهل الطبخ ويحبه

    1. Top Chef

      مشكورة وحياك الله دايما …

  11. mzajyh

    غلط.. اكبر غلط الواحد يدخل هنا وهو جوعان :(

    انت وين؟ اشوف الاغراض اللي تستخدمها مو مألوفة !

    1. Top Chef

      هلا والله ..

      أنا سلمك الله في كندا .. بس أي أغراض ؟ ما فيه شي غريب ؟

  12. غير معروف

    ما شاءالله …. خبرتك تخلي الواحد يجرب الطبخة و هو مطمن ….
    بس خسارة ليتني تعرفت على المدونة ابكر يوم انا قاعده بالبيت … الحين بنرجع للدراسة و لا راح الاقي وقت …. لكن سنعووود بإذن الله ….

    بوسام

    1. Top Chef

      هلا والله …

      المدونة قاعدة إن شاء الله .. ننتظر رجعتك ..

  13. ميمي

    ممكن توب شيف ايش هوا صوص الطماطم لااصلي

  14. غير معروف

    وااااااااااااااااااااااااااااااااو صور غير شكل الكميرا جديده ولا الاضاءة تغيرت <<<شاطحت عن الموضوض مرة الاخت

    لالا جد الصوص يفتح النفس بس سؤال الكابر والزيتون اخلية مفروم ولا اطحنه مع الطماط ؟؟

    اذا ماكان متوفره الانشوجة اقدر احط تونة او استغني عنه مو عشان شي الا انه مو متوفر حاليا بس !!!!

    وكل مرة اعيد واكرر الله يحفظك لعين ترجيك ويرجعك لاهلك سالم غانم يا رب

    الله يجعل مثواك ووالديك الجنة يا رب

    1. Top Chef

      هلا والله …

      لا والله ما تغير شي ؟؟؟

      الكابر و الزيتون ما يحتاج تطحنينيهم خليهم قطع في الصوص …

      إذا ماعندك الأنشوجة مافيه بديل .. بس نصيحة دوريها لأنها تكمل الصوص ..

      آآآمين يارب وجزاك الله ألف خير على دعواتك و الله يتقبل إن شاء الله …

      1. غير معروف

        يمكن بس عندي ان الصور صارت احلى والاضاءة اقوى

        تاخرت علي الله يهديك بالرد عشان كذا سويت الصوص مثل ماتوقعت او لاحظت قطع الكابر لذلك قطعتهم وحطيتهم على الصوص

        وش رايك بس

        http://sub5.rofof.com/img3/03tyszk7.jpg

        1. Top Chef

          والله مدري عن الصور القديمه بس الجديده يمكن عشان صرت أصور بصيغة raw ؟

          بالعافيه على قلبك … و إن شاء الله يكون أعجبكم ..

  15. غير معروف

    وش الشي الاخضر اللي فوق السمك؟

    وبعد وش نوع الرز اللي جنب الحبار؟

    اسئلتي شاطحه برا الموضوع

    ادري بس تحمل الله يعينك

    1. Top Chef

      الشي الأخضر زعتر بري …

      نوع الرز ريزوتو ..

  16. غير معروف

    طيب اللى عمره ماشترى حبار في البيت ومايدري اش اسوي به وانظفه … ايش العمل … ليتك شرحت عمليه تنظيف الحبار وتقطيعه :(

    1. Top Chef

      هلا والله …

      الموضوع موب مفصل لأنه موب موضوع عن الحبار وصعب أشرح كل كل شي يتعلق فيه هنا .. إن شاء الله فيه موضوع بعدين عن طبخ القشريات بيكون فيه كلام مفصل عن التنظيف و الحفظ و الأنواع وكل ذا الكلام .

      بس عموما الحبار أسهل شي في العالم يتنظف .. ما تحتاجين حتى سكين .. أمسكي الحبار و أسحبي راسه عن جسبمه بيطلع بسهولة ، بعدين طلعي الأشياء اللي داخل بطنة ، طبعا بطنه فاضي بس فيه زي العظمة هذي بس شيليها . الحين عندك جسم مفصول عن الراس . الحين إذا كان الجسم عليه الجلد حقه شيلي الجلد بإنك تمسيكنه وتسحبينه وبيطلع معك بسهولة .. بس هذا تنظيف الحبار .. تفصلين الراس عن الجسم بعدين تنظفين البطن ، بعدين تشيلين الجلد … لو شريتيه مجمد في الغالب بيكون منظف جاهز ولو شريتيه طازج أكيد فيه أحد ينظفه لك لو تبين .

  17. غير معروف

    لا انت مو معقول والله

    اشلون تاكله ؟؟؟
    شكله يجننننننننننننننننننننننننننننننننننننننننننننننننننننننننن
    قلبي عورني ..
    بس سؤال الزيت الي على الحواف الصحن وشو .؟؟

    الله يعطيك العافيه والله يوفقك يارب

    1. Top Chef

      الزيت اللي عالحواف زيت زيتون ..

  18. غير معروف

    woooooooooow
    عسى ربي يعطيك الصحه والعافيه … ايه اعطينا في المؤكولات البحريه … عساه مطرحه العافيه …

    1. Top Chef

      الله يعافيك … مشكوره وحياك الله دايما ..

  19. شوكولانا

    مشكور توب شيف على هالمجهود
    وفعلا شي يخلي الناس تبطل رجيم << ماتقصد نفسها :)

    1. Top Chef

      الله يعينك … عاد الصوص موب ثقيل الثقيل يمكن لو خلطتي معه باستا هذا اللي بيحوس كل الشغلة .

  20. nora

    وااااو الصور الاخيره تشهي
    طريقة التقديم روعه

    1. Top Chef

      مشكورة …. عاد عندك الطريقة مالك عذر هههه D:

  21. ام اقوبي

    كل طبخه تسويها تكون احلى من الثانيه ماشاءالله

    الحلو بالمدونه انها متنوعه وجديده في كل شي

    الى الامام وبالتوفيق …

    1. Top Chef

      مشكورة على مرورك وعلى كلامك وحياك الله دايما .

  1. البيتزا الإيطالية .. Italian Pizza » Top Chef Blog .. مدونة توب شيف

    […] يمديكم تستخدمون أي واحد من تفرعات هذا الصوص زي البوتانيسكا أو الأرباياتا […]

  2. سلطة السيزر .. Caesar Salad » Top Chef Blog .. مدونة توب شيف

    […] * سمك الأنشوجة ضروري هنا هو اللي راح يعطي النكهة المميزة للصوص، الأنشوجة تذوب في الصوص ويبقى طعمها بس. إذا تبون معلومات أكثر عن وش الأنشوجة شوفوا الموضوع هنا. […]

  3. البيتزا الإيطالية .. Italian Pizza « مدونة توب شيف … Top Chef

    […] يمديكم تستخدمون أي واحد من تفرعات هذا الصوص زي البوتانيسكا أو الأرباياتا […]

  4. سلطة السيزر .. Caesar Salad « مدونة توب شيف … Top Chef

    […] * سمك الأنشوجة ضروري هنا هو اللي راح يعطي النكهة المميزة للصوص، الأنشوجة تذوب في الصوص ويبقى طعمها بس. إذا تبون معلومات أكثر عن وش الأنشوجة شوفوا الموضوع هنا. […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: