«

»

سبتمبر 27 2011

أمثلة لوصفات بيتزا .. Pizza Examples

هلا والله …

 

هذا الموضوع تكملة لموضوع البيتزا الإيطالية. في هذا الجزأ راح أحط أمثلة لكم نوع بيتزا. بحاول أنوع قدر الإمكان في محاولة إننا نكسر حاجز الخوف من الغريب و الجديد.

 

بيتزا مارجريتا .. Pizza Margherita

 

هذي البيتزا من أشهر و ألذ أنواع البيتزا حولين العالم. سبب التسمية هو زيارة الملكة مارجريتا لمدينة نابولي ( عاصمة البيتزا ) ومن باب الإحتفال سووا بيتزا فيها علم إيطاليا اللي هو الأحمر ( الصلصة ) ، الأبيض ( الجبن ) و الأخضر ( الريحان ) وهذي بالضبط مكونات هذي البيتزا. نفس المكونات لو زدنا عليها شرايح أنشوجة تصير بيتزا رومانا pizza romana أو البيتزا الرومانية. المارجرايتا اللي أسوي أستخدم فيها صلصة طماط + موزاريلا طازة وموزاريلا ناشفة + طماطم مجففة sundried tomatoes و بعد ما تطلع من الفرن أرش عليها زيت زيتون وريحان طازج وشوي بارميجانو ريجانو.

بيتزا مارجاريتا

margheritta

 

بيتزا فواكه البحر بالبيستو و جبنة الفونتينا .. Pizza e frutti de mare

 

اللي ما يعرف البيستو يشوف هنا.

 

هذي وحدة من ألذ ألذ أنواع البيتزا اللي ذقتها بحياتي. البيتزا ممكن تنعمل بأي نوع من المأكولات البحرية زي الربيان أو اللوبستر أو حتى المسل (بلح البحر) أو القواقع أو الكلماري. نقدر نستخدم وحدة منهم بس أو أكثر نخلط أكثر من نوع. نبدأ بإننا نخلط اللحم اللي بنستخدم مع شوي بيستو ريحان بعدين ندهن عجينة بيتزا بعد ما نفردها بصلصة وبعدين نحط الربيان وآخر شي طبقة من جبنة الفونتينا. جبن الفونتينا نوع من أنواع الجبن الإيطالي ، يذوب بسهولة وله تقريبا نفس قوام الموزاريلا بس بطعم أقوى شوي.

 

بيستو الربيان
seafood pesto pizza

 

 

بيتزا الفطر .. Pizza al Funghi

 

فيه آلاف الطرق اللي نقدر نسوي بيتزا بالفطر. في هذي النسخة راح أستخدم فطر بورتابيللو Portabello mushroom مع بصل أحمر وجبن موزاريلا وصلصة طماطم عادية وبعد ما تطلع من الفرن برشها بشوي زيت فقع أو truffle oil وشوي ريحان وبارميجانو ريجانو. فطر البورتابيللو فطر كبير في حجمه وله طعم “لحمي” قوي ، تقدرون تستبدولنه بفطر أبيض طازج عادي أو أي نوع فطر تحبون. في حال توفر عندكم فقع جربوا تستخدمونه مع البيتزا وشوفوا كيف الطعم. كون فترة الطبخ قصيرة في البيتزا ما تتدمر نكهة الفقع زي مايصير في أغلب الأحيان في الطبخ الشعبي.

 

pizza al funghi

 

pizza al funghi

 

بيتزا البيبروني .. Pepperoni Pizza

 

في آخر دراسة عن أكثر بيتزا مطلوبة بيتزا البيبروني فازت بأكثر عدد من الأصوات. بيتزا البيبروني سهلة .. صلصة ، بيبروني وجبن موزاريلا بس . كثير ناس سألوني عن البيبروني ، البيبروني هو نوع من أنواع السجق أو النقانق. يسوونه بإنهم يفرمون لحم مع شحم وبهارات ( بهارات كثيرة منها بابريكا وفلفل حار وثوم ) وبعدين يملحونه ويدخنونة وآخر شي يخلونه ينشف ويتعتق أو يتخمر بالأصح وهذا اللي بيعطيه طعمه.

 

pepproni pizza

بيتزا بيبروني

بيتزا البيبروني

 

 

كالزوني الخضروات .. Vegetable Calzone

 

الكالزوني نوع من أنواع البيتزا اللي تكون مقفلة زي المحفظة تقريبا. كل المباديء اللي تكلمت عنها للبيتزا تمشي هنا الفرق بس في  طريقة الفرد و اللف.

 

تقدرون تسوون الكالزوني بأي حشوة تبون أنا أستخدمت هنا صلصة طماطم مع جبن موزاريلا فريش و ناشفه ، ذرة ، فلفل أحمر مشوي ( تلاقون طريقة شوي الفلفل هنا ) ، ريحان ، بقدونس ، سبانخ وبصل أحمر. المكونات تمشي مع بعضها بشكل جدا جدا ممتاز هنا.

 

عشان نسوي الكالزوني أول شي هو إننا نفرد العجينة لأنحف شي نقدر عليه بالضبط زي ما سوينا في البيتزا العادية. بعدين نبدأ نرص المكونات في نص البيتزا بس ونخلي النص الثاني فاضي. آخر شي نقفل النص الثاني على النص الأول بحيث يعطينا شكل نص دائرة وبعدين نلصق الأطراف في بعضها.

 

ندهن الكالزوني بشوي زيت زيتون وبعدين نقطع كم فتحة فوق عشان نهوي الحشوة وما تنفجر علينا داخل الفرن. آخر شي نحط الكالزوني فوق الحجر بالضبط زي ما سوينا في البيتزا إلين تستوي من فوق وتحت.

 

Vegetable Calzone

كالزون الخضروات

vegetable calzone

 

بيتزا فطر الشيتاكي مع جبنة الماعز و الزعتر .. Shitake mushroom , thyme and goat cheese pizza

 

هذي البيتزا نوع من الأنواع اللي يسمونها بيتزا بيضاء يعني بدون صلصة طماطم. راح أستخدم هنا نوعين فطر هم الشيتاكي و الفطر الأبيض العادي. تقدرون تستخدمون أي نوعين فطر موجوده أو حتى نوع واحد لو ماكان موجود إلا هو. جبنة الماعز goat cheese من ألذ أنواع الجبن ، قوام هذا الجبن ونكهتة جدا مختلف عن أنواع جبن البقر اللي الغالبية متعود عليها. حليب الماعز يعطي الجبن هذا نكهة وقوام خاصيين.

 

بعد ما نفرد العجينة ندهنها بطبقة زيت زيتون بعدين نحط فوقها فطر الشيتاكي المقطع و الفطر الأبيض العادي وبعدين نقطع عليها قطع من جبن الماعز ونرش عليها شوي من جبن الفونتينا بعدين رشة ملح وفلفل أسود وزعتر طازج thyme وبعدين ندخلها الفرن. بعد ما نطلعها من الفرن نزينها برشة زيت فقع وجبن بارميزان.

 

moving pizza to oven

بيتزا الفطر البري و جبنة الماعز

goat cheese , shitake mushroom and fontina pizza

 

بيتزا الفونتينا و الشيتاكي

 

 

بيتزا كابريسي .. Caprese Pizza

 

كابريسي يعني على طريقة كابري اللي هي وحدة من مدن إيطاليا. فيه سلطة مشهورة جدا بهذا الإسم اللي هي سلطة الموزاريلا مع الطماطم ومكونات هذي البيتزا أبدا موب بعيدة.  البيتزا مستخدم فيها صوص بيستو بدال صوص الطماطم وفوق البيستو حطينا طماط صغار مع موزاريلا بوفالا ( موزاريلا الجاموس ). بعد ما تطلع البيتزا من الفرن رشينا عليها صوص بلسمك.

 

أول شي نسويه هو صوص البلسمك. في قدر صغير نطبخ ٣ أكواب خل بلسمك ( من النوع الرخيص ) على غليه خفيفه إلين يبقى منها كوب واحد ويثقل الخليط ويتحول لسائل ثقيل. ننقل الصوص لصحن ونخليه يبرد قبل نستخدمه. هذا الصوص جدا لذيذ وله إستخدامات كثيرة جربوه مع السلطات أو كصوص مع اللحوم أو غيره أو حتى مع الفراولة أو الإسكريم.

 

نفرد العجينة بعدين ندهنها ببيستو ريحان بعدين نقطع فوقها شوي جبن موزاريلا طازه (يفضل من نوع موزاريلا بوفالا) وبعدين نرص فوقها حبات طماط صغار مقطعه أرباع. ندخل البيتزا الفرن وبعد ما تطلع نرش عليها شوي زيت زيتون و أوراق ريحان ونبشر عليها شوي بارمزان وآخر شي نصب عليها شوي من صوص البلسمك.

 

بيتزا كابريزي

 

 

caprese pizza with balsamic reduction
بيتزا كابريزي مع صوص البلسمك

 

caprese pizza

 

 

بيتزا البيض مع الخضروات و الجرجير .. Egg and Vegetable Pizza with Arugla

 
بيض في بيتزا ليش لأ ؟ كله بروتين D-: . هذي البيتزا مثال ثاني على البيتزا البيضاء أو البيتزا بيانكا وصدقوني جدا جدا لذيذة. هذي البيتزا تنفع بالذات كفطور متأخر أو اللي يسمونه برنش brunch .  طريقة عمل هذي البيتزا تختلف شوي عن الطريقة العادية كوننا بنحط البيض بعد ما تنطبخ القشرة نص طبخة عشان ما تخربها. الخضار المستخدمة هي الفلفل الأحمر المشوي مع زيتون الكلماتا المنزوع النوى وحلقات البصل. حلقات البصل بالذات ضرورية هنا كوننا بنكسر البيض داخلها عشان تمسك البيض وهو فوق البيتزا. الجبن المستخدم هنا بيكون جبن بارمزان بس وتقدرون كالعادة تضيفون نوع ثاني لو حابين.

 

نبدأ أول شي بإننا نفرد العجينة بعدين ندهنها بشوي زيت زيتون وبعدين نحط الفلفل الرومي الأحمر المشوي ( طريقة شوي الفلفل هنا ) وبعدين زيتون الكلماتا منزوع النوى و بعدين نحط بصل مقطع حلقات عريضة ، نرش شوي جبن بارمزان وبعدين ندخل البيتزا الفرن إلين تتحمر الأطراف. بعد ما تتحمر الأطراف نطلع البيتزا من الفرن ونكسر بيضتين ( أو حسب الرغبة ) داخل حلقات البصل بعدين نرش البيض بشوي ملح وفلفل أسود ونرجع البيتزا للفرن إلين تكمل أستوى ويستوي البيض للدرجة اللي حابين. بعد ما تستوي البيتزا نطلعها من الفرن ونرش عليها كمية من الجرجير وإضافة بارمزان لو حابين.

 

بيتزا البيض و الجرجير

 

breakfast pizza

 

بيتزا بيضاء مع البيض و الجرجير و الخضروات

 

egg pizza

 

بيتزا بالبيض و الخضروات

 

Follow TopChefCooks on Twitter

عن الكاتب

Top Chef

64 comments

Skip to comment form

  1. REHAB

    طحت على مدونتك بالصدفة من قوقل كنت أدور موضوع عن كريمة الخفق ..
    من جد أنت توب ماشاء الله , مرة استمتع وأنا أقرا دروسك وتقنياتك ف الطبخ ..
    توني مسوية البيتزا بعجينتك , رغم انها ماكانت تنمط وتنفرد بسهولة إلا أنها طلعت طرية وفيها قرمشة خفيفة وفعلاً لذيذة ..
    تستحق الشكر والدعاء على كل اللي تقدمه ..

  2. ام ياسر

    طيب كمً مدة تسخين الحجر ولا يمكن الحجر يختلف من نوع لاخر

    1. Top Chef

      ذكرت هذي النقطة. ساعة عالأقل وكل مازاد أفضل

  3. ام ياسر

    انا جربت نفس عجينتك وع الحجر بس المشكله ماتطلع بنفس المنظر الجميل اتوقع السرفي فرن الكهرب

    1. Top Chef

      الكهرب والغاز مجرد مصدر حرارة لاتعطينهم أهمية أكبر من حجمهم. روحي أغلب محلات البيتزا وأفران التميس حتى وبتلاقينها تشتغل عالغاز ونفس الوصفة مجربها في عدة بيوت في أفران غاز وكهرب وبدون مشاكل. دوري عالسبب !!!

  4. Manar

    السَلام عليَكم وَ رحمَة الله وَ بركَاته ~
    مشَاء الله عليك فعلَاً شي جَميل ، انا عكَسك تمَاماً لو مثلاً في وصَفة ابغا اجربَها احب اطبقهَا بالحَرف لأني ببسَاطة ما احب
    اخترع من عندي وَ احب كل شي يكون على اصَوله ، بغَض النظر لَما انَا بنفسي ادخل المطبخ وَ اسوي اللي ابآه ، عِندي حب
    اني اتقَن كل شَي لذلك اتبَع بالحرف ، وَ بالنسبَة ليا غَير لمَا احد يختبرك في طبخَة من ابتكَارك وَ غَير لمَا انت بنفسَك حاب
    الطبخ علَى اصولَها ، اُعجبت بإيجَابيتك مع النَآس ، وَ انت جَد فنَان ليَ الشَرف انَي اتعَلم منِك ، الله يوفقك

    1. Top Chef

      وعليكم السلام و الرحمة ….

      مممممم حلو المشي عالوصفة بس بعد مهم إن الواحد يعتبرها مجرررررد خطوط عامة وذوقه هو المحدد الأساسي. طبعا حسب وش النقطة اللي نفكر نغيرها في الوصفة من الأساس. لو وصفة إيطالية تطلب رشة بقدونس في الأخير وجا واحد وحط كزبرة (شي موب مستخدم أبببدا في الأكل الإيطالي) مع إن التبديل بسيييط إلا إن الأثر كبير وممكن يسوي فرق كبير. بس لو وصفة طلبت ملعقة بقدونس وأنا أحب أكثر ليش ما أحط أكثر ؟ لو وصفة طلبت طبخ الدجاج لمدة ١٢ دقيقة بس أنا أعرف إن الدجاج يستوي إذا وصلت حرارته الداخليه لحرارة معينه فليش أمشي على خطأ في كتابه الوصفة ؟ لو وصفة خبز طلبت ٥٠٠ جرام طحين بالضبط ما أجي أقول لا فيه غلط أمشي عالنظر. لو وصفة كيك طلبت ملعقتين بيكنج باودر ما أجي أبدلها ببيكنج صودا !!!

      معرفة أساسات الطبخ مطلوبه هنا. في كل وصفة لك الخيار ، في كل وصفة فيه مجال إن الواحد يخلي الشي على ذوقه أو زي ما يشتهي بس لازم يعرف متى يوقف ويعرف متى يغير ومتى ما ينفع يغير. وصفة شوربة تطلب لتر مرق ما يجي واحد يخليها نص لتر لأن هذا بيخليها بيوريه موب شوربة مع إن الباقي نفس ماهو !

  5. إيمان الشهري

    ياخي إنت بطل بشكل !
    كل مواضيعك قريتها حرف حرف , و ما تتخيل كيف أستمتع فيها .
    و كل شي ببالي ألقاك كاتب عنه , كل سؤال مر ببالي لقيتك جاوبته و إجابة كافية و وافية بكل التفاصيل !!
    إنت مفروض و بشدة تسوي لك كتاب و تسميه ( إفهم الطبخ عشان تطبخ )
    يا شيخ الله يسعدك و يوفقك و يحقق لك كل اللي تتمناه !!

    1. Top Chef

      الله يخليك من ذوقك ….

      للأسف موب كل الناس تسأل هذي الأسئلة في راسها ولا كل الناس مهتمة حتى تقرأ هذي الأشياء قبل تطبخ ههههه هذا اللي لاحظته.

  6. nice6

    السلام عليم
    شيف انا جربت البيتزا ثلاث مرات باتباعها بحذافيرها باستخدام الحجر رائعة ولكن في ملاحظات
    بكل المرات العجبنة ماتحمشت من فوق كأنها شبه محترقة والنفخات بتصيربالاطراف كاملة مو دوائر منتفخة حيل نفس صورك
    مرة سويتها بسمك نحيف بس كنت احس اقدر اخليها أضعف وبعد الطبخ زينة ولكن أتاني شك انها يمكن مو مستوية مضبوط
    ومرة سويتها جدا جدا جدا نحيفة بحيث بعد الطبخ كانت كأنها قشرة وحشوة بدون طبقة عجين
    ماجربت بيتزا نابولي فموعارفة ايهي الاصح
    وياريت توصف العجينة من الداخل كيف تكون وماهو السمك الصحيح للبيتزا

    1. Top Chef

      وعليكم السلام و الرحمة ….

      النفشات في الأطراف ممكن ما تطلع لكذا سبب. لو البيتزا ما طبخت بسرعه مره ماراح تطلع هذي الفقاعات (زي آخر صوره في البيتزا المخبوزه في صينية). سخني الفرن على أحر شي ، خلي الحجر يحتر مع الفرن وقت كافي وإن شاء الله تطلع. لو كنتي من النوع اللي يسوي بيتزا ورا بيتزا علطول بدون ترك الحجر فترات في النص يرجع لحرارته هذا بعد ممكن يسبب المشكلة.

      أسباب ثانيه هي إنك يمكن تحطين جبن أو شي عالأطراف هذا ممكن يسبب إن الفقاعات ما تطلع …

      بشكل عام صعب جدا جدا تسوين بيتزا نيه من داخل. العجينة تنطبخ في دقايق. العجينة المقرمشة ما أحسها شي سيء ؟ بالعكس هههه داخل البيتزا مفروض ما يكون فيه طبقة “عجين” أبدا هذي بيتزا نحيفة موب زي البيتزات اللي بالستايل الأمريكي.

  7. محمود شكر

    اخويا خالد تعديل بسيط على بيتزا بيبيرونى كلمه بيبيرونى بالايطاليه يعنى فلفل عادى وليس حار انت تقصد بيتزا بيبيرينشينو وهذا هو المقصود من الشرح الى حضرتك شرحته هذا للتوضيح ليس اكتر وللك جزيل الشكر اخوك فى الله محمود

    1. محمود شكر

      اقصد بيرشوتو

      1. Top Chef

        البيبروني نوع من أنواع السجق زي المرتديلا و السلامي وغيرهم. بيبرونشيني يعني فلفل بس ما أتذكر إني نزلت أي بيتزا بالبيبرونتشيني ؟ البروشوتي نوع لحوم مملحة يشبه البيكون ماله علاقة بالبيبرونشيني أبدا …

  8. محمود شكر

    السلام عليكم :محمود شكر من مصر
    ممكن اعرف من حضرتك ايه الفرق بين البيتزا الايطالى والبيتزا الامريكى وبرجاء عايز مقادير البيتزا الامريكيه
    وشكرا للك يا شيف خالد والى الامام دائما اخوك محمود

    1. Top Chef

      وعليكم السلام و الرحمة ….

      البيتزا الإيطالية عجينتها جدا بسيطة (طحين ، خميره ، ملح ، مويه وشويييي زيت زيتون) ، تنعجن وتنفرد نحييييييفة (شوف موضوع البيتزا). البيتزا الإيطالية تكون نحيفة ، مقرمشة ، وبدون إضافات كثيره هي أكله جدا جدا بسيطة. البيتزا الأمريكية ماخذة من البيتزا شي واحد بس وهو إنها عجينة فوقها صلصة وجبنه. الباقي كله يعتمد على مين تسأل في أمريكا. بعض الوصفات جدا جدا دسمة وليانه زبدة أو زيت أو حليب وبعض الوصفات قريبة من الإيطالية بس مع إضافات كثيره فوقها. البيتزا الأمريكية زي ما ذكرت راح تختلف حسب مين تسأل ، البيتزا في شيكاغو مثلا تكون متينه ودسمه ومخبوزه في صينية بينما البيتزا في بروكلين في نيوورك تكون قريبة من الإيطالية بس مع كمية صلصة وجبنه أكثر وبدون إهتمام كبير في جودة المكونات اللي تنحط فوق زي ما يصير في إيطاليا … طبعا في أشكال ثانيه للبيتزا عندهم جدا صعب تغطيتها كلها.

      البيتزا بالنسبة لي هي بيتزا إيطالية ….

      1. محمود شكر

        الف الف الف شكر يا شيف خالد انت فعلا كبير وانا والله استفدت منك كتير
        ربنا يخليك والله انا اكتر من ممتاز

  9. غير معروف

    لك جزيل الشكر

  10. غير معروف

    السلام عليكم شيف. وين الاقي مقادير عجينة البيتزا حقتك. دورتها فوق ما لقيتها

    1. Top Chef

      في الموضوع اللي قبل اللي إسمه البيتزا الإيطالية

  11. Roro

    واو تشهيت البيتزا كتيييير

  12. sara

    تحيه طيبه ياسيدي

    استفسار بسيط اين اجد حجر البيتزا ؟؟

    1. Top Chef

      هلا والله …

      ذكرت كل شي يخص الحجر في موضوع البيتزا الأول ….

  13. انا

    السلام عليكم
    شيف ممكن تتكلم عن انواع الجبن و افضل شي للبيتزا

    لان دايم احتار اذا بغيت اشتري جبن من كثر الانواع

    اغلب الجبن الموزارلا المبشور جاهز. يكون ماله طعم ويغلب عليه الزيت ويتمطط بشكل مبالغ فيه واذا بردت البيتزا يكون الجبن زي البلاستيك ومجلد :(

    1. Top Chef

      وعليكم السلام و الرحمة ….

      عدتها كثير في الموضوع …. موزاريلا فريش !!!!

  14. نهى

    يعطيك العافيه مبدع اشاء الله عليك
    مدري وصفة العجينه حقت البيتزا منزلها انت والا لا؟

    1. Top Chef

      هههه اقري الموضوع وتعرفين

  15. غير معروف

    ما شاء الله موضوع حلو ومعلومات حلوه يعطيك العافيه

  16. lolee

    اقدر اسوي البيتزا على صاج ؟ الصاج العادي بس احطه جوا الفرن ؟

    1. Top Chef

      تقدرين بس مافيه شي جديد زيه زي صينية الفرن المقلوبه بالضبط

  17. roro

    اللحين همه نو الريحان ياللي يستخدمونه نفس الريحان اللي متعارف عليه عندنا ؟!!!

    1. Top Chef

      الريحان أنواع كثيرة بس عموما كله يشترك بالطعم الأساسي القوي

  18. ريفاند

    يعني تلقى البيبروني في قسم اللحوم المبرد هـ لااني ولامره شريته بس بعد ماشفته هنا تحمست

    1. Top Chef

      تلاقينه عند اللي يبيعون الاجبان بالكيلو

  19. ريفاند

    السلام عليكم
    بغيت اعرف وين مكان البيبروني الثقة في جده لااني احبه بس أخاف اشتريه من اي مكان وسؤال ثاني شيف الموزاريلا الجافه هل هي الي تنباع مبشور هـ جاهزه في البرادات مثل برايد والمراعي مثلا وشكرا

    1. Top Chef

      وعليكم السلام و الرحمة …

      مافهمت وش قصدك بثقة الصراحة هههههه ؟ كلهم نفس الأنواع ، كل سوبرماركت يبيع نفس الأنواع.

      الموزاريلا الجافه هي أي شي ما يجي في مويه.

  20. N

    بخصوص مكعبات الدجاج .. إذا قطعتها زي ما تقول .. تقلبها على النار ؟ والا تدخلها الفرن مع البيتزا وهي مانضجت ؟

    1. Top Chef

      كله موجود في الموضوع اللي قبل هذا . شرحت كل شي عن الحشوات.

  21. Dalia Khan

    كيف اعمل دجاج البيتزا ؟
    المكعبات

    1. Top Chef

      ؟ تاخذين صدر دجاجه ، تقطعينه شرايح طولية بعرض المكعبات اللي تبين بعدين تاخذين هذي الشرايح وتقطعينها مكعبات بحجم المكعبات اللي تبين. إذا واجهتي صعوبة لايردك إلا لسانك D-:

  22. rania

    عفوا اخي شكرا جزيلا

  23. rania

    ماشاللة عليكي فنانة مرة شكرا
    ع الجهود الرائعة

    1. Top Chef

      العفو اختي بس تراني ولد

  24. أيمي

    عندي فضول
    ماعندك مطعم او مافي بالك تفتح مطعم

    1. Top Chef

      هلا والله …

      لا والله ما عندي بس إن شاء الله في المستقبل.

  25. غير معروف

    يعطيك العافية شيف
    انا كتير حبيت مواضيعك و بصير اتابعك ان شاء الله
    بس عندي سؤال لوصفة بيتزا مرة اكلتها في مطعم اسمها garlic pizza
    ممكن اذا عندك الوصفة تنورنا فيها…
    شكرا

    1. Top Chef

      الله يعافيك ….

      مافيه شي واحد بهذا الإسم فيه كذا طريقة تقدرين تسوين بيتزا بنكهة ثوم وكلهم تقدرين تسمينهم بيتزا ثوم بدون مشاكل.

      تقدرين تسوين البيتزا مع شوي زيت وثوم بدون أي جبن ، تقدرين تسوينها زي كذا مع شوي بارمزان مثلا ، تقدرين تسوين بيتزا بصلصة طماط عادية بس تطعمين الصلصة بثوم زيادة أو تقطعين عليها ثوم كبار. تقدرين تسوين صوص ثوم أو ثوم مهروس وتدهنين البيتزا فيها بدال صوص الطماط مثلا وبعدين تحطين أي شي تبينه فوق الصوص ومتأكد لو بتفكرين فيها بتلاقين طرق ثانية كثير.

      أنتي ذقتي البيتزا هذي وش الطعم اللي تتذكرين ذقتيه أو وش المكونات اللي شفتيها ؟ ما تحتاجين وصفة لكل شي حاولي تشوفين وش كانوا حاطين وسوي زيهم.

      1. غير معروف

        انا هيك بعمل بالعادة بس ما عرفت كيف اضيف الثوم كانت نكهته قوية بس ما كان في قطع
        يعني كان فيها زيت زيتون وثوم وجبن بس..
        بس يعني اطحن الثوم او كيف اعمله مو حابة يكون قطع..
        يعني مثلا خبز الثوم بهرس الثوم وبمزجه مع زبدة وبدهن فيه الخبز .. ممكن تكون هيك انه ادهن زيت على العجين واهرس الثوم منيح واحط عليها جبنة؟؟؟
        شكرا شيف انت كتير زوء
        الله يعطيك العافية

        1. Top Chef

          زي ماقلت بدون ما اكون ذقتها صعب اعرف الطريقة بالضبط.

          فيه كذا طريقة ممكن يكونون استخدموها ممكن حتى مايكون فيها ثوم ابدا يعني مجرد زيت زيتون مطبوخ على ناو هاااادية مع فصوص ثوم بحيث تطعمين الزيت بالثوم وبعدها تستخدمين الزيت بس. ممكن يكونون مستخدمين ثوم محمر في الفرن وبعدين مطحون وبكذا يذوب تقريبا فزي ما قلت مقدر للأسف اعرف.

          اكيد جربي تخلطين زيت بثوم وتدهنينها وشوفي كيف بتطلع لذيذة اكيد حتى لو ماكانت زي حقتهم يعني ماعليك خسارة ان شا الله

      2. غير معروف

        شكرا شيف بجرب يعطيك العافية

  26. نور

    شيف عندي سؤال
    اذا كان عندي عزيمه عشاا
    ممكن افرد كل العجينه و احط الاضافات اللي ابيها فوق كل قطعه بيتزا و اخليها مده نص ساعه الى ساعه من غير لا تدش الفرن
    عشان كل شي يكون زاهب
    و اول ما يوصلون الضيوف ادخل البيتزا بالفرن وحده ورا الثانيه ؟
    و لا ما ينفع ؟

    1. Top Chef

      للأسف لأ العجينة بتشرب المويه من الصلصه وغالبا بتلصق عالخشبه حقت الفرن او بيصير صعب تحريكها من يوم تحطين كل شي عليها.

      من يوم تدخل كل حبه الفرن عندك وقت اكثر من كافي تفردين وتزينيين الحبة اللي بعدها.

  27. ali

    is sooooooooooooo good

  28. reta

    wow is vary naic emememe thanc u chef

  29. أنمار

    واااو أبغى بيتزا
    تسلم ايدك شيف

  30. روان

    يعطيك العافية والله :)
    ,
    بضيف اقتراح بعد إذنك D:
    نحط صلصة الطماطم والموزاريلا ونحط فوقها قطع طماطم وكوسة مشويين واحط حلقات فلفل حار (مكبوس في زيت زيتون وثوم)
    وبعد ماتطلع ارشها ملح خشن ورشة من زيت الفلفل

  31. نور

    شيف بالنسبه حق صوص الطماط اللي استخدمته اهو نفسه صوص الطماط الاساسي ؟
    لان اللي اعرفه ان البيتزا اللي من نابولي يكون صلصه الطماط اللي فيها مو مطبوخه
    و يخلونها تنطبخ بالفرن الخاص
    هل ينفع هالشي بهالوصفه ؟
    و شلون اسوي صلصه الطماط اللي مو مطبوخه
    و مشكور

    1. Top Chef

      أقري موضوع البيتزا الإيطاليه

  32. غير معروف

    الله يعطيك العافيه اعشق البيتزا بانواعها

    1. Roro

      وانا اعشق البيتزا مؤ بس لحلكي

  33. غير معروف

    السلام عليكم
    روعه روعه الخيارات
    الله يعطيك العافيه
    بس فيه نوع من البيتزا يكون حالي يسمونه عش البلبل
    وعلى ما اعتقد انهم يدهنون البيتزا باللبنه وبعدين الجبن واذا استوت يرشونها بالعسل

    1. Top Chef

      وعليكم السلام …

      الوصفة هذاك كتبتيها ؟ ليش الخوف ؟ جربي وسويها وشوفي وش يصير وش أقصى شي ممكن يصير ؟

    2. amany

      عش البلبل معجنات او فطاير سوريه شاميه مالها دخل بالبيزا

      1. Roro

        مع نفسك

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: