صوص البيستو .. Pesto Sauce

هلا والله ….



صوص البيستو صوص إيطالي جدا مشهور وواحد من ألذ و أسهل الصوصات برأيي. بيستو يعني معجون أو مطحون و الأسم يجي من النطق الإيطالي للهواند اللي هو الجهاز اللي في الغالب يسوون البيستو فيه. البيستو في الأساس يجي من مدينة جنوا في شمال إيطاليا بس لا تلخبطون بينه وبين صوص ثاني بإسم قريب اللي هو البيستوو الفرنسي pestou اللي تقريبا نفس الشي بس بدون مكسرات أو جبن وبزيت أكثر.


بيستو جنوا الأصلي عبارة عن صنوبر وثوم و ريحان إيطالي و ملح و جبن قاسي زي البارمزان أو الرومانو أو غيره .. ينفرمون مع بعض بهاوند بعدين ينصب عليهم زيت زيتون عشان يرطبه. بس الحين كلمة بيستو صارت عامه لآي خليط من مكسرات + أساس نكهة  ( زي الريحان مثلا ) + جبن قاسي + زيت زيتون .. أي شي فيه العوامل هذي ومطحون يسمى بيستو . عشان التفريق البيستو الأصلي صار يسمى جينوفيز بيستو Genovese pesto أو البيستو الجنوي ( يعني من مدينة جنوا ) .


خيارات عمل البيستو كثيره وماتخلص أي شي تشوفون إنه ممكن يمشي كأساس بيستو حطوه. المكسرات ممكن تكون أي نوع مكسرات فستق ، لوز ، صنوبر ، فول سوداني ، كاجو ، جوز .. إلخ .. ممكن المكسرات تتحمص لو تحبون عشان تعطي طعم مكسرات أعمق شوي أو ممكن تنحط زي ماهي .. أهم شي لو حمصتوا المكسرات أنتبهوا لا تحرقونها عشان لا تعطي طعم مر.

أساس النكهة هو الشي اللي فعلا بيغير طعم البيستو وبعد هنا الخيارات كثيره وما تخلص وموب شرط أعشاب فيه أساسات كثير ممكن تستخدم. أي شي له طعم واضح وبيمشي مع مكونات البيستو الثانيه بينفع هنا. الريحان ، البقدونس ، النعناع ، طماط مجفف ، زيتون ، شبت ، كراث ، جرجير ، سبانخ ، فطر ، أو حتى فلفل مشوي ومقشر سواء كان حار أو بارد ممكن يتسوى منه بيستو .. خلط أكثر من مكون بعد بيعطي بيستو بطعم جديد تماما.

الجبن فيه عندكم أكثر من خيار أي جبن بشرط يكون قاسي ممكن يستخدم. البارمزان (ملك الأجبان برأيي) رهيب مع البيستو وخصوصا لو كان من النوع الأصلي اللي يسمونه بارميجانو ريجانو . جبن الرومانو رهيب مع البيستو أو حتى الجرانا بادانو grana padano اللي يبيعونه عندنا في السوبرماركت على أساس إنه بارمزان ومحد داري هههه ..


خيارات عمل البيستو زي ما شفتوا كثيره وهذا يخليه مكون جدا عملي وله إستخدامات كثير. أستخدموه بدال صوص الطماط في البيتزا ، مع الساندوتشات كصوص ، دب مع خبز أو غيره ،زينة فوق أشياء زي شوربة أو بولينتا أو ريزوتو مثلا ، مع السلطات أو في تتبيلة السلطات و التتبيلات حقت اللحم أو أي شي ثاني .. غير كذا لا ننسى إنه صوص و وواحد من أشهر صوصات الباستا اللي مستحيل يغيب عن مينيو أي مطعم أخلطوه مع باستا مطبوخه ورشوا زيادة زيت زيتون وهذي أسهل باستا ممكن تسوونها.



المكونات :



١/٣ كوب جبن رومانو مبشور(جبن رومي) إذا مافيه أستخدموا بارمزان

٢/٣ كوب جبن بارمزان مبشور .

فص أو فصين ثوم حسب الرغبة

كوب ورق ريحان

ربع كوب ورق بقدونس

١/٣ كوب مكسرات ممكن تحمصونها لو تبون

١/٢ كوب زيت زيتون من أحسن أحسن نوعية

ملح حسب الرغبة


* هذي المكونات أعتبروها بس خط عام غيروا الكميات و المقادير حسب ذوقكم .


الطريقة :


PESTO SAUCE

 

أول شي بسويه بحمص المكسرات. نحط المكسرات في مقله تيفال على حرارة وسط ونحركها دايما إلين تبدأ تتحمر وتتحمص ويتغير طعمها شوي. بعض المكسرات زي الصنوبر مليان دهن وبينحرق بسرعة إذا ما حطيتوا عينكم عليه طول الوقت. لو الطريقة هذي شوي صعبة عليكم حطوا المكسرات في فرن 350 تقريبا 10 دقايق مع التحريك من وقت لوقت وبكذا أصعب تنحرق. بعدين نشيلهم من النار ونخليهم يبردون شوي.


ROASTING NUTS


الحين عشان نفرم الصوص فيه أكثر من خيار. اللي عندهم هواند هذا أفضل خيار هنا ، نفرم الثوم بعدين المكسرات ( نخليها شوي خشنة ما يحتاج نفرمها 100٪ ) بعدين نحط الريحان و البقدونس و الأجبان ونفرمهم إلين يطلعلنا صوص شبه ناعم. الحين نحط الزيت ونقلبه معهم بعدين نحط الملح حسب الرغبة.


اللي ماعندهم ( زيي ) تقدرون تستخدمون خلاط المولينكس ( جهاز تحضير الطعام ) أو الخلاط العادي أو حتى تفرمون كل شي بسكين أهم شي هنا لا تخلطون أكثر من اللازم وتخلونه ناعم مره. بخلاط المولينكس نحط الثوم و نطحنه شوي بعدين نحط المكسرات ونطحنها شوي بس بدون ما نخليها ناعمه مره بعدين نحط الجبن و الأساس و نفرمهم بإننا نضغط ضغطات متفرقه يعني ما نخلي الخلاط يشتغل طول الوقت عشان ما نطلع بشي ناعم مره آخر شي نحط الزيت و الملح حسب الرغبة وبس هذا البيستو.


PESTO SAUCE

الحفظ :


نحفظ البيستو في علبه تتقفل بإحكام في الثلاجه ، حسب نوع الأساس المستخدم بس عموما بيعيش أسبوعين تقريبا كذا، أكثر من كذا لازم نحظه في الفريزر. في الفريزر بعد التذويب بنلاحظ إن لونه تغير شوي بس الطعم ماراح يختلف كثير.



أمثلة


سلطة الطماط المحشي بالموزاريلا مع صوص البيستو Mozzarella stuffed tomatoes with pesto vinaigrette:


هنا بعطيكم مثال لإستخدامه كخلطة سلطة وتتبيلة . هنا بنحشي طماط بموزاريلا طازه متبلة ببيستو وبنقدمها مع صوص سلطة بالبيستو.


٦ حبات طماط طازه .

كورتين موزاريلا طازه يفضل موزاريلا حليب الجاموس لو متوفرة

صوص بيستو ريحان ( الطريقة فوق )

ملعقتين كبار زيت عصير ليمون

ملعقة كبيره خل عنب

ملعقة كبيره خردل ديجون


* الموزاريلا الطازه تلاقونها في السوبرماركت عند ثلاجات الأجبان تنباع في مويه زي الجبنه البيضاء وكذا .. في حال ما توفرت لا تستخدمون موزاريلا عاديه ! أستخدموا أي جبن طازج زي الفيتا أو الجبنه البيضاء.


* الريحان مع الطماط وحده من ألذ النكهات في العالم حاولوا ما تبدلون شي بدال بيستو الريحان هنا.


أول شي بنسويه هو إننا نقشر الطماط. نسوي علامة + بالسكين على راس الطماط بعدين نحط الطماط في مويه مغليه مع رشة ملح ٣٠ ثانية تقريبا. نشيل الطماط من المويه ونخليها إلين تبرد. بعد ما تبرد نقشر الطماط من الطرف اللي سوينا علامة + عليه وبنلاقي القشر طلع بسهولة. نحط الطماط في الثلاجه يبرد إلين نجهز الحشوة.


نخلط البيستو مع عصير الليمون و الخل و الديجون ورشة ملح وفلفل . الحين نقطع الموزاريلا مكعبات صغيرة بعدين نحط نص الخلطة عليها ونقلب. نذوق الحشوة ونعدل المكونات حسب اللي تشوفون.نحط الحشوة في الثلاجه إلين نجهز الطماط.


الحين عشان نحشي الطماط ، في الجهة اللي سوينا علامة + نقطع قطعه صغيرة مره بالسكين بعدين نستخدم ملعقة صغيرة ونبدأ نفرغ الطماط شوي شوي بدون ما نخرم الجدران. نحشي الطماط بالحشوة بعدين نقدمها مع باقي الخلطة حقت السلطة.


stuffed tomatoes

طماط بالبيستو

طماط بالبيستو

ساندوتش الدجاج مع بيستو الجرجير و الطماط المجفف .. Chicken Sandwich with Arugala Pesto and Dried Tomatoes :



هنا بستخدم بيستو جرجير بدال الريحان . الساندوتش جدا سهل ومقاديره متوفرة في كل بيت. تجفيف الطماط يركز طعم الطماط في الساندوتش ويخليه شي ثاني.


٣ صدور دجاج أو صدرين في حالة كانت الصدور كبار زي اللي هنا.

بيستو جرجير ( الطريقة فوق بس بدلوا جرجير )

ملح وفلفل

ملعقة كبيره زبده

شوي زيت

روزماري طازج ( لو عندكم أبدا موب ضروري )

مايونيز

خس مغسول ومجفف زيييين يعني لا يصير رطب

خبز ساندوتش أي نوع تشوفون إنه بيطلع حلو هنا ( أنا أستخدمت خبز البرجر بس شكلته على شكل خبز ساندوتش ، الطريقة هنا للي مستعد يسوي الخبز)

 

الطماط المجفف :


كمية طماط مقسومة بالنص

ملح وفلفل

أوريجانو أو أي أعشاب مجففه تحبونها

ثوم

زيت زيتون

 


أول شي بنسوي الطماط المجفف .. الطماط المجفف اللي هنا موب مجفف زي حق السوبرماركت يعني هو لسا رطب .كون الطماط ياخذ وقت يفضل تسوون كمية كبيرة وتحفظونها في الثلاجه لذيذ مع أشياء كثير.


نسخن الفرن على ٣٠٠ بعدين نجيب صينية فرن ونفرشها بقصدير بعدين نرص الطماط بحيث يكون الوجه المقطوع على فوق. الحين نرش شوي زيت زيتون ورشة ملح وفلفل و شوي أعشاب مجففه وثوم عالطماط بعدين نحطها في الفرن ساعتين عالأقل أو إلين توصل درجة التجفيف اللي نحب ، كل ماخليناها أكثر كل ما جفت أكثر و كل ماصار طعم الطماط مكرمل أكثر ومركز أكثر. إذا جينا نحفظ الزايد نحطه في علبه تتقفل بإحكام ونغطيه بزيت زيتون ونحطه في الثلاجه.


oven dried tomatoes

 

الحين عشان نطبخ الدجاج .. مافيه تتبيله ولا شي !! وما نحتاج أي تتبيله ..ناخذ الصدور و نحطها بين طبقتين نايلون بعدين نضربها ضرب خفيف بإستخدام فرادة عجين أو ظهر مقله شوي شوي بس عشان نخلي الصدر ألين شوي و عشان يصير كله نفس السماكه ما نبي منطقه أسمك من منطقه بس ما يحتاج تضربونه وتخلونه نحيف مره . نجفف صدور الدجاج بمنديل رول زيييين ( عشان يتحمر بعدين ) ، بعدين نرش ملح وفلفل عالوجهين . اللي يبي يتبل الدجاج ببهارات أو أعشاب ثانيه ينفع طبعا.


الحين نسخن مقله يفضل ستانلس على حرارة أعلى من وسط بشوي ونخليها تسخن شوي تقريبا دقيقه دقيقتين . الحين نحط طبقة زيت خفيفة (موب زيت زيتون) بعدين نحط الدجاج  . الحين نحط الزبده و الروزماري ونشوح وجه الدجاج الأول إلين يتحمر زين بعدين نقلبه ونشوح الوجه الثاني ونكمل طبخ إلين يستوي الدجاج من داخل بس ويروح اللون الوردي بس موب أكثر من كذا ! لا نطبخ الدجاج أكثر من كذا عشان ما ينشف.


chicken pesto sandwich

دجاج بالبيستو

لاحظوا كيف الدجاج متحمر .. هذا المهم موب التتبيله

 

بعد ما يستوي الدجاج نشيله من المقله على صحن ونغطيه بقصدير مخروم عشان يرتاح دقيقه دقيقتين .. هذي الخطوة مهمة عشان المويه ترجع تتوزع في الدجاج .


الحين نسخن الخبز لو نبي بعدين ندهن وجهين الخبز بالمايونيز . نحط الخس تحت بعدين الدجاج فوقه وبعدين البيستو فوق الدجاج وبعدين الطماط المجفف .. وبس هذا الساندوتش ..



chicken sandwich

دجاج بالبيستو

دجاج مبتكر

chicken pesto


51 comments

6 pings

Skip to comment form

    • سعيد on 11 نوفمبر, 2013 at 1:32 م
    • رد

    طيب شيف انت قلت في موضوع صوص الطماطم ان الألمنيوم يتفاعل مع الطماط فكيف حطيت هنا قصدير مع انه يتفاعل؟

    1. معاك حق ولو تبي أستخدم بارتشمنت بعد بس هنا وسط جاف ماراح يكون لأي تفاعل أثر عالطعم زي في حاله قدر كبير من صوص طماط .. لاتنسى إن الطماط هنا قشره بس اللي يلمس الألمنيوم.

    • Afaf abduljalil on 28 أغسطس, 2013 at 5:59 م
    • رد

    كل وصفاتك عندي ثقة و فعلاً طعم أصلي و مميز ..
    عساك عـ القوة ..

  1. يعطيك العافيه شيف ..
    شكلها مشهي

    • غير معروف on 13 يناير, 2013 at 8:58 م
    • رد

    طيب ماعندي النوعين الي ذكرتها
    ينفع تشيدر ؟
    بس يعني لو مو زي طعمه بس تسليك عادي

    1. إذا ما عندك المكونات دايما فيه شي تقدرين تسوينه باللي عندك أهم شي ما تسوين شي ناقص أو أقل من ممتاز. التشيدر أبدا ما ينفع هنا. تقدرين تسوينه بدون جبن بس موب طالع نفس الشي تماما بتكونين سويتي صوص فرنسي اللي هو البيستوو pestou (تنطق بشكل مختلف).

    • Layla on 4 يناير, 2013 at 11:19 ص
    • رد

    سلام عليكم
    اخوي ممكن تقول لي شنو نوع الخبز اللي استخمته في هذي الساندويتشات؟ انا شفت انك تمدح في بعض انواع خبز paul فهل ممكن تعطيني امثلة اجربها منه؟ لاني الصراحة ما افهم ولا شي في الخبز واوقف متحيرة ولا اعرف اختار
    مشكور والله يعطيك العافية

      • Layla on 4 يناير, 2013 at 5:18 م
      • رد

      سوري يا شيف توني منتبهة لتوضيحك عن الخبز في الوصفة

      1. ههههه لا عادي ….

        إذا رحتي paul جربي قد ما تقدرين من الأنواع اللي هناك. كبداية ، الخبز الفرنسي البجايت baguette داااايما بداية ممتازة هو خبز بسيط بس واحد من ألذ ألذ أنواع الخبز.

          • غير معروف on 28 يناير, 2013 at 11:24 ص

          شيف الخبز في المحلات ينباع مكشوف ولمن اشتريه واقطع جزء منه واحطه بكيس يصير مجلد وتروح القشرة القاسية الي اعتبرها من الاشياء اللذيذة في الخبز
          لو خليته مكشوف حينشف الجزء المقطوع!

          • Top Chef on 28 يناير, 2013 at 6:53 م
            Author

          إيه طبيعي تروح القشرة لأن الرطوبة اللي داخل الخبز ترطبها وتخليها لينه. حطي الخبز في الفرن على ٣٧٥ كم دقيقه وبيرجع زي ماكان …

    • غير معروف on 31 ديسمبر, 2012 at 12:13 ص
    • رد

    مراحب شيف
    حبيت اسألك عن الطماط الجفف ، جربت اجففه مره تحت الشمس في عز الصيف واليوم الثاني لما جيت اخذ الطماط كان ناشف بس ريحته ابدا مو حلوة، هل هو كذا ريحته ولا يكون فيه شي خطأ في عملية التجفيف؟
    حتى لما اسوي صلصة طماطم بعد ما اطحن الطماطم اطبخها على النار فتره عشان تثقل ويكون لونها احمر وبرضو تطلع منها ريحه مو حلوه ، وتكون ماسكه في الصلصه حتى بعد ما افرزنها ، ياليت تساعدني لو عندك فكرة.
    تحياتي 🙂

    1. هلا والله ….

      ما أعرف الصراحة ؟ كلمة ريحته موب حلوه ما توصف شي وبدون ما أشمها مقدر أعرف إذا هي كذا وأنتي ما تعجبك الريحة ولا هي فعلا ريحة غريبة ؟ أشتري من السوبرماركت أول وشوفي هل الريحة نفسها ولا ريحة حق السوبرماركت غير.

      الصلصة شوفي موضوع صوص الطماط الأساسي في المدونة تكلمت عن كل شي يخص الصلصة وطريقتي لها هناك.

    • Rehab on 7 أكتوبر, 2012 at 6:37 م
    • رد

    بصراحه شغلك عال العال
    وقد جربت طريقه تجفيف الطماطم , بجد روعه احلى من غيرها
    وكنت بسئلك ليش ماتزل بيتزا بطماطم المجفف احس بتطلع امممممممممم

    1. بالعافية ….

      عدتها كثير وأرجع أقولها مره ثانيه أكره الوصفات وأكره فكرة إن الواحد ما يطبخ شي إلين يلاقي وصفة مكتوبه بالحرف ويمشي عليها. فكرتي هي إني أعطيك التكنيك اللي تحتاجينه و أحاول أساعدك تطلعين بأفكارك وبعد فترة بتطبخين بدون وصفات … فكرتك حلوه ليش لازم أنزلها ؟ جربيها وشوفي … كذا الوصفات تطلع شي تحسينه لذيذ ، تطبقينه وخلاص …

    • غير معروف on 24 أغسطس, 2012 at 5:11 ص
    • رد

    انت تحذر في بعض الوصفات لاتستخدمون زيت زيون ولا وجهتنا لنوع الزيت المستخدم هل هو ذرة او دوار الشمس او كانولا او نخيل او مزيج من الكل ؟

    1. أي زيت نباتي ماله طعم ينفع… بعدين نتكلم عن أنواع الزيوت وتعرفين الفروقات بينها ، زيت الزيتون له نكهة بس هو ما يتحمل حرارات عاليه هذا غير إن طعمه ممكن يكون متعارض مع نكهات ثانيه وعشان كذا نتجنبه في بعض الوصفات ونستخدم زيت ثاني يتحمل حراره أو ما يكون له طعم قوي وواضح زي زيت الكانولا ودوار الشمس و الخضروات و الذره و غيرها

    • د. محمد حسن - القاهرة on 15 أغسطس, 2012 at 6:56 م
    • رد

    برجاء شرح طريقة اللازنيا العادية وكذلك لازانيا البيستو و grazie molto

    1. نزلت طريقة للزانيا البولونيزي وباقي الأنواع إن شاء الله أنزلها مع الوقت

    • د. محمد حسن on 15 أغسطس, 2012 at 6:52 م
    • رد

    ما شاء الله عليك … اود أن احييك وأشكرك على وصفلتك الرائع والتى شرحتها بكل حرفية ودقة عالية اتمنى لك كل التوفيق والنجاح ودائما للامام . للعلم انا مصرى وكنت اعيش فى ايطاليا – وبالذات فى جنوا – لاكثر من عشرين عاما ومن طريقة وصفاتك وشرحك احس بانك كنت تعمل فى ايطاليا . مضبوط كلامى أم ماذا ؟ أرجو الافادة ولك خالص الشكر والتحية. د. محمد حسن

    1. شكرا هذا من ذوقك أخوي ….

      ههههه ولو إني أعتبرها شهادة الصراحة بس للأسف ماحصلي أشتغل في إيطاليا أو أي مكان ثاني وكل طبخي تعلمته من طبخي في البيت لا أكثر …

    • غير معروف on 14 يوليو, 2012 at 9:59 ص
    • رد

    صباح الخير شيف :
    الخميرة و الباكنج باودر و الفانيلا البودره والدقيق
    فين اللي ممكن يظل برى واللي يتحط بالفريزل
    غير كذا استخدام البيض واحد للكيك يعني مثلا
    اطلع البيض اذا بستخدمة للكيكة من الثلاجة وعلي طول
    اخفقه او انه لازم يظل بحراره الغرفه .. او يعتمد علي
    كيكة نفسها .. يعني مرات يكون البيض برى مو كل
    الكيكات نفس الطريقة

    1. الخميرة بس هي اللي يحتاج تحطينها في الفريزر الباقي لأ. حتى الخميرة موب لااازم تحفظينها في الفريزر بس لأن العلبه مفتوحه وتتعرض للهواء بعد فترة الرطوبة البسيطة اللي في الهواء تبدأ تخرب الخميره يعني هي موب ضروريه بس بتخليها تعيش أطول.

      بشكل عام أفضل كل المقادير موب بس البيض يكونون على حراره الغرفة (إلا إذا الوصفة طالبه غير كذا). بعض الكيكات زي الكيكات الإسفنجيه تطلب رغوة بيض وهذي دايما تتكون أحسن إذا البيض كان دافي وبيساعد إنه يعطي كيك نافش أحسن.

    • غير معروف on 30 يونيو, 2012 at 10:23 م
    • رد

    ايوه شيف بس انا قصدي الطماطم المجففة بالشمس

    1. ما أختلف شي ؟ هي اللي قصدتها في الموضوع. أرجعي رطبيها أول بعدين أستخدميها . فيه طريقتين عشان ترطبينها :

      تقدرين تغطينها في زيت وتحطينها في الثلاجه ٢٤ ساعة بعدين تستخدمينها (والزيت بعد لذيذ). أحفظيها كذا في الثلاجه إلى أسبوعين بدون مشاكل. كل ما لقييتي الزيت صار ما يغطي الطماط زيدي زيت. الزيت لازم يغطي الطماط تماما.

      تقدرين تنقعين الطماط المجفف في مويه حاره نص ساعة (أو أي سائل حار زي مرق مثلا) وبعدين تجففينها من المويه الزايدة وتستخدمينها (المويه بعد بتكون لذيذة). الطماط الزايد كذا تقدرين تحفظينه في علبة تتقفل في الثلاجه يومين تقريبا أو تغطينه بزيت وتحفظينه أسبوعين.

    • غير معروف on 28 يونيو, 2012 at 11:17 م
    • رد

    توب ممكن طريقة البيستو بالطماطم المجففة

    1. اعتقد واضح زي ما شرحت في الموضوع ؟

    • Reham on 31 مارس, 2012 at 10:02 م
    • رد

    مآ شآء الله عليكِ فنَّآنة إن شاء الله أحآول أطبِّق ساندوتش الدجاج المشوي بالبيستو لأني مرررّة مآ أحب الطمآطم

    1. هلا والله …

      ههههه تراني ولد ؟

    • mody on 10 فبراير, 2012 at 1:54 ص
    • رد

    لوحبات اعرف بديل للجبنة البارميزان يا ترى يكون ايه لان الجبنة دى غالية جدا

    1. هلا والله …

      كتبت شروط إختيار الجبن في الموضوع أكيد راح تلاقي شي ينفع ويمشي مع ميزانيتك.

    • Muneira on 9 فبراير, 2012 at 1:52 م
    • رد

    وين ممكن ألاقي البرميجانو ريجانو في السعودية ؟

    • alanoud.m on 4 سبتمبر, 2011 at 2:20 ص
    • رد

    مررررة شكرا 🙂

    • j0j0 on 29 مايو, 2011 at 12:37 م
    • رد

    ana al_9ra7h ma jrbtha bs asm3 3nha o0 ma a3rf 6re8tha o0 al_7md llh l8eetha >>yslm0o

    • مها on 21 مايو, 2011 at 11:18 م
    • رد

    وين القى الريحان في جدة؟؟

    وهل هو نفسه الريحان الي مزروع تحت كل عماره ههههههههه

    1. تلاقينه في الدانوب أو تحت عمارتك زي ماقلتي ههه

    • ندى on 12 أبريل, 2011 at 9:17 ص
    • رد

    ماشاء الله عليك
    بالنسبه للريحان هل هو نفسه الحبق اذا لا واين القى الريحان بالرياض
    حابه اعمل البيستو و استخدمه في طبق رولات البادنجان المحشيه شعيريه

    1. هلا والله ..

      الريحان غير الحبق . مدري بالضبط لأني منيب من سكان الرياض أصلا بس أذكر قد شفته ينباع في التميمي

    • ABEER on 26 مارس, 2011 at 9:16 ص
    • رد

    انا جربتها
    ما طلعت حلوه ريحة الجبن الرومانو مره قويه ومو مقبوله

    1. الناس أذواق ..

  2. ماشاء الله لاقوة الا بالله ,, بصراحه طبقت البيستو وعملت منه كميه الطعم والريحه والشكل النهائي رووعه

    وعيالي مارضوا يوقفوا من لذته يعطيك العافيه شيف على المقادير المظبوطه .

    • ام صبا on 19 مارس, 2011 at 11:54 م
    • رد

    يعطيك العافية
    من جد طعمه وريحته جنااااااااان
    قبل فتره اخذت بيستو جاهز وصراحه ما اعجبني
    وكنت ابغى اجرب اسويه لكن كنت متردده لاني ما احب الصنوبر لكن لما شفت وصفتك
    واني اختار اي مكسرات على طول طبقتها .
    والله طلعت مرررررررره لذيذه

    1. الله يعافيك …

      البيستو الجاهز صح عليك موب دايما يكون رهيب .. بعض الأنواع يكون مقبول بس ما يوصل زي حق البيت .. لو قريتي المكونات بتعرفين ليش .. غالبا يستخدمون بقدونس وبكثره كونه أرخص من الريحان وبعد يستخدمون زيت عادي موب زيت زيتون وطبعا الجبن مستحيل بيكون بارمزان أصلي و الصنوبر بعد غالي فيستخدون جوز أو لوز كونهم أرخص.. يعني كل مكونات البيستو اللي يستخدمون رخيصه هذا غير إنه يجي مالح أكثر من اللازم …

    • غير معروف on 18 مارس, 2011 at 8:52 ص
    • رد

    ينفع اسوي البيستو بريحان مجفف

    1. البيستو دايما بأعشاب طازه .. الريحان المجفف عموما ماله أي أي طعم ..

    • غير معروف on 14 مارس, 2011 at 7:17 ص
    • رد

    اهلين شيف
    الريحان كيف اقيسه
    يعني املا الكوب ريحان منفوش
    او ارصه بيدي لحدما يملا الكوب
    او افرمه بعدين اقيسه

    1. رصيه بيدك إلين يملأ كوب .. لا تدققين كثير .. حطي الكمية اللي تشوفينها بتعطي أحسن طعم ماعليك من الوصفه ووش مكتوب فيها ..

    • غير معروف on 13 مارس, 2011 at 9:22 ص
    • رد

    يعطيك العافيه يارب …
    ياربي معقوله يلعبون علينا بجبن البارميزان ويدونا نوع ثاني واحنا ماندري .!!!!!
    المصيبه نسخت اسم الجبن اللى انت كاتبه grana padano وشفت الصور ياربي نفس اللى دايم اشتريه وعمري ماقد اشترين باميزان ريجانوا كلما سالت عنه في الرايه وبنده يقولونمافي الا هذا 🙁
    طيب شيف كيف افرق بينهم من مواصفاتها من غير الاسم ؟؟؟؟ ياشين لما تحس انه مضحوك عليك بسبه جهلك شي ينرفز :S

    1. الله يعافيك ..

      هم ما يلعبون عليك هم ما يكتبون بارميزان على ما أعتقد ؟ في اللوحه و الفاتوره ما ينكتب بارمزان بس إذا قلتي للرجال المتعارف عليه عندنا إن هذا البارمزان. كيف تعرفين صعب شوي .. بالطعم طبعا بس إذا كنتي تعرفين البارمزان بتفرقين … أسهل شي هو إنك تقرين الختم حق الجبن .. الحين الجبن صح يجي السوبرماركت في قرص كبير أقري وش محفور عالجنب بتلاقين زي الأختام إذا كان parmesano regano يعني هذي بارمزان .. بالشكل صعب مره تفرقين بس لو دققتي في بارميجانو ريجانو بتلاقين إن داخل الجبن فيه بلورات هذي تتكون مع التعتيق الطويل وهذي دليل على جودتها شوفي الصوره هنا :

      http://www.fromage-alleosse.com/UserFiles/Image/produits/vaches/parmesan.jpg

      هذي النقط البيضاء هي البلورات اللي أتكلم عنها .. كل ماكان البارمزان معتق أكثر كل مازادت .. لاحظي كميتها كبيره نسبيا هنا ..

      بس شوفي الجرانا بدانا هنا :

      http://www.marions-kochbuch.de/index-bilder/grana-padano.jpg

    • غير معروف on 13 مارس, 2011 at 6:24 ص
    • رد

    يا سلام عليك
    توني كنت بسألك عن خيارات استخدام البستو… والموضوع يرد وبقوه…
    انا مترددة كثير لاني كميه الريحان كبيرة.. وانا ما قد ذقت طعمه.. افكر اذوفه في معطعم اول..

    هذا ايطالي يسوي البستو في دقيقة واحدة فقط
    http://www.jamieoliver.com/videos/watch/gennaro-contaldo-making-pesto/241

    1. هلا والله ….

      تخافين من وشو ؟ أعشاب و جبن و مكسرات وزيت ؟ مافيه والله شغل إنك تقولين يبيله تجهيز قبلها بيومين أو كذا .. أنتي بنفسك شفتي سواه بدقيقه يعني حتى لو أخذ معك ٣ دقايق يبقى شي تافه D-: …

  1. […] البيتزا الإيطالية .. Italian Pizza » Top Chef Blog .. مدونة توب شيف على صوص البيستو .. Pesto Sauce […]

  2. […] تستخدم كصوص بعد كثيرة وموب شرط أبدا تكون صلصة طماطم. البيستو بأنواعه خيار جدا ممتاز للصوص، معجون الزيتون أو حتى […]

  3. […] « صوص البيستو .. Pesto Sauce […]

  4. […] اللي ما يعرف البيستو يشوف هنا. […]

  5. […] تستخدم كصوص بعد كثيرة وموب شرط أبدا تكون صلصة طماطم. البيستو بأنواعه خيار جدا ممتاز للصوص، معجون الزيتون أو حتى […]

  6. […] الأوريكيتتي شكل من أشكال الباستا يعني الآذان الصغيرة كونه يشبه الأذن. الصوص المستخدم هنا هو صوص كريمة يشبه الألفريدو بس مطعم بالبيستو. […]

اترك تعليقاً

لن ينشر بريدك الإلكتروني.

%d مدونون معجبون بهذه: