«

»

سبتمبر 21 2012

كوبلر الخوخ .. Peach Cobbler

هلا والله ….

.

الكوبلر وحده من ألذ ، أسهل وأسرع الحلويات اللي أي أحد يقدر يسويها في أي وقت. المكونات متأكد دايما متوفرة في كل بيت ما يبيلها أي تعقيد ويمكن أكثر شي بيحتاج شغل هو تقطيع وتجهيز الفواكه في حال أحتاجت أصلا. هي وحدة من الأكلات اللي أحس لازم كل واحد يعرف يسويها لأن فعلا ما يبيلها شي وممكن أي شخص يطلع بوصفته الخاصه للكوبلر حسب وش متوفر عنده. هي طريقة حلوه لعمل حلى سريع وطريقة أحلى لإستخدام أي فواكه أقل من ممتازه أو قربت تخرب.

.

للي ما يعرف الكوبلر هي تقريبا باي Pie بس أسهل بكثير و تميل للعشوائية أو زي ما يسمونه ريفي أو رستك rustic. الفرق الأساسي بين الكوبلر و الباي هو إن الباي لها قشرة من تحت بينما الكوبلر لها قشرة من فوق، هي تكون صينية فيها حشوة فواكه حاره وفوقها طبقة مقرمشة ممكن تكون أكثر من شي. فيه تقريبا ٣ أنوع أو طرق أساسية للكوبلر كلها إختلافها الأساسي في الطبقة العلوية المقرمشة اللي تنحط عليها. النوعية الأولى تستخدم عجينة باي تنفرد وتنحط فوق الفواكه يعني تصير كأنها باي عاديه مقلوبه. النوع الثاني يستخدم عجينة بسكوت biscuit فوق الفواكه. البسكوت اللي أقصد هنا هو البسكوت الأمريكي اللي أقرب ماله السكونز موب البسكوت حق الشاهي وغيره. النوع الثالث وهو اللي مستخدم هنا في هذي الوصفة يستخدم خليط يشبه خليط الكيك في الشكل ويعطي شي بين الكيك و البسكوت يكون مقرمش وفي نفس الوقت جدا هش وخفيف. طبق ثاني جدا قريب للكوبلر هو الكريسب Crisp. الكريسب عبارة عن كوبلر بس بدال الطبقة اللي فوق يستخدم غالبا خليط يسمونه شتروزل streusel يكون فيه غالبا شوفان أو أي نوع حبوب ثاني وسكر وزبده.

.

الكوبلر اللي مسوي اليوم هي كوبلر خوخ، وحده من ألذ الإستخدامات للخوخ برأيي. ممكن بسهولة تعدلون عالوصفة بحيث تمشي مع أي نوع فاكهة ثاني. أي نوع فاكهة يكون لذيذ بعد الطبخ (بالعربي أي نوع قد شفتوه في باي) ممكن يستخدم هنا. أشياء زي التفاح ، الكمثرى ، الخوخ ، المشمش ، الفراولة ، البخارى ، التوت بأنواعه ، العنب ، الكرز كلها تنفع. الشي الوحيد اللي بتحتاجون تعدلونه هو كمية السكر و النشا ووقت طبخ الحشوة بس. الفواكه اللي حلاها كثير قللوا السكر عن اللي حاط و الفواكه اللي تميل للحموضه قللوا عصير الليمون فيها و الفواكه اللي تنزل مويه كثيره يمكن تحتاج زيادة نشا عن اللي كاتب وطبعا وقت الطبخ يمكن يحتاج تغير (التفاح مثلا بياخذ في الطبخ أكثر من الخوخ و الفراولة أقل من الخوخ وكذا). بالإضافة لهذي التغيرات تقدرون دايما تضيفون لمستكم بإنكم تضيفون نكهات تحبونها بحيث تكمل وتحسن الفواكه اللي أستخدمتوا. إضافة أشياء زي بهارات أو أعشاب أو مكسرات أو فانيلا أو حتى خلط أكثر من نوع فاكهة بيعطي نتايج حلوه.

.

الوصفة اللي مستخدم هنا هي تغير بسيط على وصفة كوبلر الخوخ الأساسية اللي موجودة في صفحة الوصفات. هم تقريبا نفس الوصفة بس عدلت هنا تعديلات بسيطة من باب التجربة و التغيير وكانت ممتازه، أستخدموا هذي أو اللي في صفحة الوصفات أو عدلوا على الإثنين لو تبون. لاحظوا دايما إن التغيير يكون في الحشوة بس ! التغيير على الطبقة اللي فوق يفضل تتركونه إلا إذا فاهمين بالضبط وش قاعديت تسوون.

.

المقادير :

.

للحشوة :

.

٦ حبات خوخ كبيرة مقشرة و مقطعة شرايح عريضة أو ويدجز wedges.

١/٣ كوب سكر بني

ملعقة كبيرة عصير ليمون

ملعقة صغيرة نشا ذرة

رشة ملح

نص ملعقة صغيرة قرفة

ربع ملعقة صغيرة زنجبيل

.

للطبقة العلوية :

.

كوب طحين

نص كوب سكر

ملعقة صغيرة بيكنج باودر

نص ملعقة صغيرة ملح

٣/٤ أصبع زبدة بارد مقطع مكعبات

١/٤ كوب مويه مغليه

.

.

* زي ما شرحت فوق ممكن تستخدمون أي فاكهة هنا.

.

* الخوخ موب شرط يكون مقشر لهذي الوصفة بس أشوف إنه ألذ كذا. طريقة تقشير الفواكه شرحتها في هذا الموضوع.

.

* التعديل اللي كان على الوصفة الأصلية هو إني غيرت السكر الأبيض لبني (طعمه حلو مع الخوخ) وزدت الكمية عشان فرق الحلاوه بينهم وزدت البهارات.

.

الطريقة :

.

نسخن الفرن على ٤٢٥.

.

نقطع الخوخ بعدين نخلطه في صحن خلط مع السكر و الليمون و الملح و النشا و البهارات. نذوق الخليط ونعدل حسب الرغبة بعدين نرص الخيط في صحن بايركس أو سيراميك أو أي صحن ينفع يدخل الفرن (تقدرون تسوونها في صحون السوفليه وتقدمونها بشكل فردي لو تبون).

.

chopped peaches

.

peach cobbler.

ندخل الصحن الفرن إلين تلين الفواكه شوي (تقريبا ١٠ دقايق للخوخ) ونبدأ نسوي العجينة في هذي الفترة.

.

ننخل الطحين و السكر و الملح و البيكنج باودر في صحن. نضيف عليهم الزبدة الباردة ونبدأ نفرك الزبدة بالطحين بأطراف أصابعنا إلين يصير شكل الخليط زي الرمل الرطب تقريبا وتختفي قطع الزبدة الكبيرة.

.

butter and flour

هذا المقصود بمرحلة الرمل الرطب

.

بعد ما تلين الفواكه شوي نطلع الصينية من الفرن. نخلط الموية المغليه عالطحين ونحرك بملعقة شوي بس إلين تنخلط (لاتكثرون خلط !) وتعطينا عجينة.

.

dough.
ناخذ ملاعق كبيرة من العجينة ونوزعها فوق الفواكه في أماكن متفرقة. نخلي بينهم فراغات بسيطة عشان البخار يطلع.

.

peach cobbler.

الحين نرجع الصينية مرة ثانية للفرن إلين تتحمر الطبقة العلوية (بتاخذ تقريبا ٢٠ – ٢٥ دقيقة).

.

peach cobbler.

كوبلر الخوخ.

تنوكل وهي حاره بلحالها أو تتقدم مع إسكريم ، سوربيه ، فروزن يوجرت أو حتى كريمة مخفوقة عادية.

.

Peach cobbler.

من دخلت المطبخ مع التصوير وتقشير الخوخ الوصفة أخذت مني يمكن ربع ساعة شغل و ٥٠ دقيقة كامل ما أعتقد فيه وصفة أسهل و أسرع من كذا ؟

.

Follow TopChefCooks on Twitter

عن الكاتب

Top Chef

38 comments

Skip to comment form

  1. خدوج

    جربتها بالتفاح والخوخ الخوخ ناسبني اكتر حسيت بحموضه الخوخ
    جدن لزيزه ساويتها فوق ٤ مرات ماتوقعت المكونات البسيطه تطلع اكله لزيزه وجديد طعمها ومرره مبسوطه وانا بسويها المره الجايه حعملها بالكمثري والتوت
    حقيقي شكرا لك ويسعدك ربنا

  2. جار القمر

    السلام عليكم ههههههههههه وانا كمان مافهمت عليه لرد تبعك الا سؤال الاخير المهم القصد انا ربع كوب ااماءالمغليه ما كفت كيف انا العجين لسه ناشف محتاج ميه زياده هذا القصد الاستفسار كان الواحد يتقيد بربع كوب الميه ام لا وحبيت اعرف القياس عادة لوصفاتك بااى كوب معليش شيف تحملنا لانا انموت فى وصفاتك كلها دقيقه الله يجزيك خير

    واستفسار تانى لماسلقت الخوخ فى الماءالمغلى انت قلت لتوانى خليه اكتر شوى والقشره لسه قاسيه لين اطريت اشيلها بالسكين والله يعافيك ويحفظك على طولت بالك

    1. Top Chef

      وعليكم السلام ….

      هي موب عجينة زي عجينة خبز هي طبيعي تبان شوي خشنة بس عادي كملي. لا تزيدين موي أكثر من اللي مطلوب . دايم القياسات بالملاعق و الأكواب المعيارية …

      بعض حبات الخوخ يمكن تحتاج ثانيه أو إثنين أكثر وبعض الأنواع القشرة تكون لاصقة أكثر من أنواع وطبعا يمكن إنك ما خليتيه يبرد تماما قبل التقشير مهم جدا جدا علطول يدخل في الثلج ما يقعد يبرد لحاله.

  3. جار القمر

    السلام عليكم ورحمة الله شيف سويتها كوبلر الخوخ وطلعت واوووووووووووو لذيده جدا الله يفتحها عليك دنبا واخره وجعله فى ميزان حسناتك

    شيف استفسلر انى قست المواد كلها بالاكواب المعياريه واماوصلت فى ربع كوب الماء المغلى ضفتها للعجين العجين كان محتاج ماء زياده فازدت عادى ولا

    والمفروض القياس بالكوب العادى ام لا ومشكور

    1. Top Chef

      بالعافية…

      دايم معياري مايحتاج حتى تسألين سؤال زي كذا. اذا موب معياري اجل كيف نمشي ؟

      العجين محتاج مويه ؟ مافهمت بس وش تقصدين

  4. جار القمر

    السلام عليكم شيف الله يعطيك العافيه شيف القصد من الماء المغلى يكون سخن يعنى ولا بعد الغالى نخلوه يبر د وبعد ما وضعنا طبقة العجين الفرن يكون شغال من فوق يس ولا الجهتين فوق وتحت

    1. Top Chef

      وعليكم السلام والرحمة …

      لالا مغلي مغلي …

      الفرن في اي وصفة من تحت الا اذا قلت غير كذا (مثل وصفة البتر تشكن)

  5. dareen

    كل محد طلب مني حاجة حلوة سويته لي D;
    بس انا اسويه بالتفاح و مرة يكون لزيز
    الله يعطيك العافية ياشيف

    1. Top Chef

      لله يعافيك بالعافية على قلبك وعلى قلب من اكله. جريي بكذا فاكهة حسب وش الموجود عندك بتستغربين من النتايج

  6. Mona.Sh

    سويتها امس الليل وضبطت مره طلعت لذيذه .. انا زدت ملعقة ليمون لاني احب الحامض !

    داخل الفرن :

    http://imageshack.us/photo/my-images/854/dsc4790u.jpg/

    وقت التقديم !

    http://imageshack.us/photo/my-images/29/dsc4791d.jpg/

    يعطيك العافية

    1. Top Chef

      بالعافية شكلها رهيب ….

  7. في دنيا الأحلام

    سويتها طلعت نفس الشكل والطعم واو نجنوا عليها اهلي مره طلعت لذيذه..
    بس زوجي يقول لو تفاح احلى قهرني مع نفسه

    1. Top Chef

      ههههههه عادي بتسمعين كثير من ذا الكلام ….. الناس أذواق وكثير ناس يحط في راسه أشياء ويرفض يغيرها بسهولة مع الأسف.

  8. fofo lovely,, (@Falcon_jap)

    طيب اذا دخلناها الفرن المرة الثانية ع شان تتحمر العجينة .. من فوق ؟؟

    1. Top Chef

      لو من فوق أو فيه تغير لحراره الفرن أو أي شي ثاني بقولك لا تخافين … أمشي عالوصفة بالضبط

  9. غير معروف

    عندي خبر انها كريبسب وانا اصلا بحثت تحت نفس الاسم “كريسب التفاح ”

    طيب وش رايك ايهم باعتقادك افضل الاولى ام الثانية ؟؟ وبما انه تين هل تتوقع 10-15 دقيقة كافية

    1. Top Chef

      الكريسب نفس الشي بس سويي شتروزل بدال العجينة (شوفي وصفة فطيرة التفاح في صفحة الوصفات فيه طبقة فوقها نحطها هذي هي الشتروزل سويي نفس الطبقة ورصيها فوق التين) .. أعتقد الكريسب تكون أطعم مع التين بس ماقد جربت الصراحة.

      التين ما يستحمل طبخ طويل فأول ما تستوي الطبقة العلوية خلاص

      1. غير معروف

        تسلم لي والله ماقصرت . خلاص انا اسويها واوافيك بالاخبار

  10. غير معروف

    هلا مستر

    لو جربت التين هنا اتوقع راح يكون ممتاز جدا . لكن ودي بالعجينة الي يكون فيها شوفان لاني احبه واحب العجينة تكون مقرمشة اكثر .

    وش تتوقع يكون بهار مناسب مع التين ؟؟
    .اتوقع البندق مجروش +قليل جدا من القرفة + حبيبات الزبيب الايراني “يكون صغير ولونه احمر وطعمه حامض “

    1. غير معروف

      وينك انتظر ردك .ماتعودت منك تتجاهل اي سؤال او طلب !!

      1. Top Chef

        هلا والله …

        معليش بس ما شفت السؤال إلا يوم ذكرتيني فيه والله ؟ عارفه ماقد تجاهلت والله أي سؤال سواء عرفته أو لأ وسواء أبي أجاوب أو لأ بس إذا ما شفته مالي حيله ؟

        التين ممكن ليش لأ وبيكون لذيذ بعد بس ما يحتاج طبقة تقرمش بقوووه بتخرب الموضوع برأيي لأنه جدا جدا لين … سويي تين مع عسل وشوي بلسمك وقدميها مع جبن ماعز أحس بتكون رهيبة. أو جربي الخليط اللي حطيتي بس ما أدري …

        إذا تبين عجينة تقرمش أكثر سويي عجينة باي عاديه وأفرديها فوقهم بعدين خرميها من كذا مكان عشان البخار بس.

        1. غير معروف

          لا وش جبن يخب ام المزاج …

          بالنسبة للبلسمك ماحبيت نكهته بالمرة . ابيها مقرمشة لكن مو بالشكل الي فهمته .
          ابي مقرمشة اقرب ماتكون كرنشي بس ما تحتاج تقطيع او كذا .

          http://www.dijlh.net/showthread.php/880538-%D9%83%D8%B1%D9%8A%D8%B3%D8%A8-%D8%A7%D9%84%D8%AA%D9%81%D8%A7%D8%AD

          http://www.b4bh.com/vb/t97680.html

          هنا تشوف الي اقصده بكلمة مقرمشة .

        2. Top Chef

          هذي إسمها كريسب موب كوبلر ؟

  11. غير معروف

    ما نجحت معاي
    ما تماسكت معاي و صار فيه زي المويه مدري إذا السكر ذاب ب
    س الطعم كان رائع مع انه حالي مرره

    1. Top Chef

      زي المويه وين ؟ هي مفروض تكون زي حشوة الباي تقريبا يعني ما تكون جامدة من داخل تكون تقريبا زي الجيل، تكون فواكه مطبوخه وحولينها زي الشيره تقريبا.

      الحلاوه موضوع شخصي .. فيه ناس يقولون إن حلاها قليل وإنها تحتاج زيادة سكر ؟ ذوقي ذوقي ذوقي قبل تحطين كل السكر ذوقي وشوفي هل الكمية كبيره على ذوقك ولا تحتاج زيادة.

  12. غير معروف

    مرحبا توب شيف ان شاء الله بيعيشوا ايديك جربتها وطلعت بتاخد العقل والله دائما عم بدعيلك الله يحميك وينولك يلي ببالك ونشوفك بأعلى المراتب

    1. Top Chef

      هلا والله …

      بالعافية على قلبك وحياك الله دايما …

  13. غير معروف

    ممكن نستخدم الخوخ المعلب ؟؟؟

    1. Top Chef

      ممكن أكيد بس حطي العجينة عليها علطول. الخوخ المعلب لين ما يحتاج فترة طبخ قبل. عن نفسي ما أنصح بالمعلب أبدا لأن طعمه سيء برأيي بس لو تبين خيار أفضل هو الخوخ أو الفواكه المجمده طعمها موب بس ممتاز إلا غالبا أحسن من الطازجة إذا كانت برا موسمها. الفواكه المعلبه حاولي تبعدين عنها قدر الإمكان موب شي لذيذ أبدا !!

  14. شـغـف

    شكلها بيشهى ^^
    طيب ممكن مقادير الملح و السكر لو بستخدم فواكه تانية مثلاُ تفاح أو فراولة ؟ :)
    أحس بالفراولة بتكون شى خيال ^^

    1. Top Chef

      زي ماقلت للأخت اللي فوق …

      تعلمي تذوقين !! في الحالات اللي تكون مثلا وصفة كيك التأليف ما ينفعنا لازم تمشين عالوصفة بالضبط بس هنا عندك الحرية الكاملة تعلمي تذوقين وأنسي الوصفات. ذوقي وعدلي قبل تدخلينها الفرن ماراح تخسرين شي.

  15. غير معروف

    أخوي لو بستخدم التفاح أقلل عصير الليمون ولا أخلي المقادير زي ما عملتها مع الخوخ ؟؟

    1. Top Chef

      عن نفسي بسويها بنفس المقادير بالضبط بس بزود الطبخ. تعلمي تذوقين !! حطي أقل شوي من اللي مطلوب وذوقي الخليط وأحكمي بنفسك هل تحتاج زيادة أو لأ.

  16. غير معروف

    اقدر اسوي كوبلر قرع؟
    طيب وش التعديل اللي ممكن اسويه

    1. Top Chef

      كوبلر القرع جدا مشهورة وجدا رهيب بعد بس هو موب زي الكوبلرات الثانيه لأن تخيلي معي إنك تاكلين قطع قرع هي صح حلوه بس ماتزال نشويه وحتى لو الأطراف كانت حلوه من السكر اللي تضيفين وسط القرع بيكون نشوي فأفضل لكوبلر القرع إنك تسوين زي ما سويت في التشيز كيك حق القرع يعني تحمرين القرع وبعدين تشيلين اللحم وتسوينه بيوريه وبعدين تكملين الكوبلر عادي تخلطين البيوريه مع سكر وبهارات (القرع يمشي مع القرفة ، الزبدة البنية ، الزنجبيل ، جوزة الطيب و القرنفل بشكل رهيب) وبعدين تصبينه في الصينية وتحطين العجينة فوقه وتطبخينه إلين تتحمر العجينة.

      من ناحية تكنيك تقدرين تسوين نفس الطريقة بالضبط اللي ذكرت فوق بس من ناحية طعم ما أتصور تكون مره حلوه بقطع قرع كبيره عكس البيوريه.

  17. Zainab Abdullah (@azharalanin)

    تشهي وتشجع ع التطبيق ، ولا أسهل من كذا
    يعطيك الف عاافية

  18. الاوتار

    الف شكر على الوصفة والف شكر على المجهود

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: