أستراليا : سوفليه الباشن فروت .. Passion Fruit Souffle

هلا والله …

 

هذا الموضوع آخر موضوع في فعالية حول العالم في ٣٠ يوم.

 

 

الموضوع هذا المفروض كان ينزل قبل شهر بالضبط بس أنشغلت الفترة الماضيه و أضطريت أتأخر فيه شوي. تكلمنا عن المطبخ الأسترالي و النيوزلندي في موضوع البافلوفا. أستراليا دولة حديثة نسبيا وغنية بالمكونات الطبيعية المميزه ، كثير منها موجود فقط في هذي القاره. المطبخ الأسترالي نقدر نعتبره إمتداد وخليط من مطابخ الأعراق اللي تكون أستراليا مع إدخال هذي المكونات الأصليه معها. في الأصل كان فيه المهاجرين من بريطانيا و آيرلندا وبعد مدة دخل عليهم مهاجرين من مناطق من أوروبا ومن شرق آسيا زي الصين و أندونيسيا و تايلند و كوريا و الهند وحتى من الشرق الأوسط مثل لبنان و إيران وغيرهم الكثير. المطبخ الأسترالي هو تداخل هذي المطابخ مع المكونات الأسترالية.

 

اليوم عندنا طبق حلى اللي هو سوفليه الباشن فرووت. الباشن فروت ( للأسف ترجمتها للعربي تطلع شي يضحك ، فاكهة العاطفه أو شي زي كذا . ما أعرف إذا لها إسم ثاني الصراحة ) نوع من الفواكة مستخدم بكثره في الأكل الأسترالي و النيوزلندي كونها تنزرع بكثره هناك. الباشن فروت طعمها يميل للحموضه وهي ما تنوكل لحالها بالملعقة أو في عصير زي فواكه كثير بس أكثر شي يميزها هي نكهتها وريحتها الرهيبة وعشان كذا غالبا الباشن فروت ينخلط مع فواكه ثانيه أو نكهات ثانيه أو يستخدم في شي بحيث يبان نكهته بوضوح. نكهة الباشن فروت قريبه من الجوافه و الشمام مع بعض مع طعم يميل للحموضه في الغالب وطبعا له أكثر من نوع وكل نوع له طعم مختلف شوي عن الثاني. الباشن فروت يمكن ما يتوفر طازج عندكم بس غالبا بتلاقون العصير حقه ينباع سواء طازج أو معلب أو مجمد.  ما أعرف وين ينباع بالضبط و إذا كان متوفر في السعوديه أو لأ.

 

 

تكلمت عن السوفليه بشكل مفصل في موضوع قديم هنا يفضل تقرون الموضوع قبل تكملون في الوصفه.

 

المقادير :

 

 

بيضتين مفصولة على حرارة الغرفه

ملعقة كبيره + ملعقتين صغار سكر ( للمرانج )

ملعقة كبيرة + ملعقتين صغار سكر ( للأساس )

ملعقة كبيره عصير باشن فروت مصفى تقريبا ٢-٣ حبات

 

* الباشن فروت يجي بلونين أساسيين حسب المصدر ، الباشن فروت البرازيلي يكون أصفر وبحجم الجريب فروت تقريبا و غالبا ناعم من برا وهو مستوي ، الباشن فروت الأسترالي يكون بنفسجي و بحجم الليمون تقريبا ومجعد من برا وهو مستوي. داخل الباشن فروت فيه بذور مع عصير ثقيل هذا هو اللي نستخدم. نصفي القلب بصفايه ونستخدم العصير بس كون البذور مزعجه في الأكل شوي.


 

 

الطريقة :

 

 

نسخن الفرن على ٣٧٥ فهرنهايت .

 

ندهن صحنين سوفليه ( أو حتى أكواب قهوه عاديه أو أي صحون سيراميك ) بزبده دافيه بشكل جيد وبعدين نرش داخلها سكر ونغطي الداخل كله بالسكر.

 

الحين نخفق صفار البيضتين في صحن مع السكر إلين يصير لون الصفار أصفر باهت. نضيف عصير الباشن فروت ونخفق إلين يتمازج مع الصفار.

 

في صحن معدني نظيف نسوي مرانج فرنسي ببياض البيض مع السكر وناخذه لمرحلة الرؤوس الصلبه stiff peaks أو منقار الطير مع الإنتباه إننا ما نخفقه أكثر من اللازم. اللي ما يعرف يسوي مرانج أو وشو المرانج أو وش المقصود بمراحل المرانج أو منقار الطير يقرأ موضوع المرانج الفرنسي هنا.


نخلط ١/٣ المرانج مع الأساس حق السوفليه ( صفار البيض و الباشن فروت ) بقوه إلين يخف الخليط شوي بعدين نحط باقي المرانج ونخلط هذي المره شوي شوي عشان ما نفجر الفقاقيع اللي راح ترفع السوفليه. بعد ما ينخلط كل المرانج نوزع الخليط على صحون السوفليه بالتساوي شوي شوي بعدين بطرف الإبهام نمسح طرف الكوب بإننا نسوي زي الحلقه على طرف الكوب. هذي الحلقه راح تساعد الخليط ينرفع بالتساوي وتعطينا تاج حلو على السوفليه بدال ما يكون مايل أو لاصق في الكوب. لاحظوا أطراف الصحن في الصوره تحت.


سوفليه الباشن فروت

 

نحط الصحون فوق صينية فرن وندخل السوفليه الفرن إلين يرتفع ويستوي من داخل ( يعني ما يكون سايل من داخل ) ويطلع منه عود نظيف تقريبا ١٢ – ١٤ دقيقة. نرش الوجه بسكر مطحون و نقدم السوفليه علطول مع سوربيه فراولة أو أي سوربيه أو إسكريم ثاني.

 

سوفليه الباشن فروت

passion fruit souffle

سوفليه الباشن فروت

passion fruit souffle with strawberry sorbet

passion fruit souffle

سوفليه الباشن فروت مع سوربيه الفراولة


Follow TopChefCooks on Twitter

30 comments

5 pings

Skip to comment form

    • غير معروف on 16 أكتوبر, 2014 at 3:23 م
    • رد

    حلوة

  1. مرحبا ياشيف يعطيك العافيه على الوصفه اللذيذه
    الباشن فروت اشوف قناة فتافيت تترجمها الى فاكهه الجنه
    ولا ادري بس موجوده بالسوبر ماركت عندنا ……
    حبيت افيدك بالي عندي “”””

    1. يعطيك العافية ماقصرتي …. يترجمونها بعد فاكهة العاطفة أحيانا وأشوفها أصح الصراحة من فاكهة الجنه ههههه وين لقيتيها ؟ أنا لقيتها مره في محل عصيرات وأحيانا أحيانا العصير المجمد حقه في في السوبرماركت بس ناااادرا ما ألاقيه.

    • بشرى on 16 سبتمبر, 2012 at 6:29 م
    • رد

    مراحب اللي من جدة تحلصونها ب مانويل ؛ والله يعطيك العافية شيف

    1. الله يعافيك مشكورة من زمان أدوره هنا

    • fno on 10 يوليو, 2012 at 8:19 م
    • رد

    انا باستراليا وفعلا هالفاكهة مفضله عندهم والاحظهم بعد يحطونها مع كل شي حتى اكل الاطفال والزبادي
    وفيه شي ثاني عندهم عجيب بعد قوامه زي المربى يأكلونه ع الفطور وطعمه الله يكرم النعمه أتوقع يسوونه من هالفاكهة
    فيه شي يعجبني بطبخاتك هو الاسهاب والتفاصيل كأنك تأخذنا برحلة طبخ ممتعه
    لكن احس ناقصك ذكر القيمة الغذائية
    يعني بحكم اني درست تغذية كنا نطبخ حتى المقالي لكن لازم قبل نطبخها نعرف تاريخها وقيمتها الغذائية
    بازين ذيك الايام
    حول تخصصك بس لقسم تغذية صدقني ممتع هالقسم ويناسبك

    1. هلا والله ….

      أنا طباخ ومهتم بالطبخ و الأكل و الطعم قبل كل شي ماعندي المعلومات الكافيه إني أتكلم عن القيمة الغذائية غير إنه موب موضوع يهمني صراحة شخصيا ، فيه ناس مهتمين بهذي المواضيع وفيه آلاف الكتب اللي تتكلم عن فوائد كل مكون بالتفصيل الممل و اللي مهتم بيقدر ببساطة يقرأ هذي الكتب ويطبق اللي فهمه على أي وصفة يقرأها. قرأت كتب طبخ كثيرة (كثيرة مره بعد) وما أتذكر قد لقيت كتاب يتكلم عن القيمة الغذائية للوصفة إلا بكلام بسيط زي هذي الفاكهة مفيدة لأمراض القلب مثلا وغيرها بس مافيه أحد يتكلم بتفصيل وبعدين يدخل في تفاصيل الطبخه بتفصيل بعد …

    • MissHiruma on 15 مايو, 2012 at 2:36 ص
    • رد

    سويت السوفليه بالشوكولاته
    ماصدقت عيوني نفشت والله نفشت وصارت تجنن
    استخدمت 99% شوكولاته وطلعت مرّه على اهلي خخخخخ
    أنا ما احب الحلو احب المر …:)

    بس يتحزن لما نفش … احس تعبي راح
    سؤال ممكن تنحط بالثلاجه وتسخن ؟
    ما يغير طعمها ولا قوامه؟

    والله يعطيك العافيه من جد جزاك الله الخيرالجزيل ^ــ^

    1. من الفرن عالفم مافيه طريقة حفظ. ٩٩ في المية !!! خافي ربك هذي مرررررة . في شكولاته غامقة ولذيذة بس هذي شكولاته مره موب حقت اكل اصلا

  2. ايش اتكلم ايش اقول !!!!!!
    وصفه خياليه وصورها تجنن تفتح النفس

    • Muneera on 30 ديسمبر, 2011 at 8:46 م
    • رد

    تسلم يدينك chef
    ممكن طريقة سوفليه الشكولاته ؟ =$

    1. شوفي هنا :
      http://www.shamoa.com/vb/showthread.php?t=19571

    • الاوتار on 14 ديسمبر, 2011 at 9:40 م
    • رد

    ماشاء الله عليك شيف اموت على السوفلية واتمنى احصل الباشن فروت طيب ابسألك كل الفواكه اذا بغيت اسوي منها سوفلية
    نفس الطريقة مع تقدير الكميات

    1. هههههه صبرك علي حبتين ، السوفليه واحد من أعقد مواضيع الطبخ ورعب كل الطباخين صعب صراحة ألخصلك الموضوع بكلمة إيه أو لأ !!!! فيه آلاف الطرق اللي تقدر تسوي سوفليه معين من شي معين كيف تختار وكيف تسوي أي سوفليه من راسك هذي عاد موضوعها موضوع.

  3. يعطيك العافية يا شيف بصراحة عجبتني المدونة لأني أحب أغير في أصناف الأكل اللي اسويها في البيت

    بس لالأسف ما في موضوعك هذا ما حددت كم ملعقة سكر للسوفليه وكم للمرانج بالتحديد وهل اطحنه ولا لأ؟

    وبصراحة نفسي اسوي سوفليه تمام عشان أولادي نفسهم يذوقوه من يدي

    .
    .

    مشكور مرة ثانية

    1. هههههه كيف ماحددت ؟ أكثر من الطريقة اللي محدد في الموضوع ما أعتقد فيه ؟ ما أعتقد فيه طريقة ممكن تنكتب أسهل من كذا ؟

      السكر في أي أي وصفة هو سكر عادي إلا إذا قلنا سكر مطحون.

  4. شكها روعة
    يسلمو الايادي
    ام ديما
    http://www.umdeema.com

    • غير معروف on 28 يوليو, 2011 at 3:43 م
    • رد

    أتمنى الحصول على فرع للباشن فروت للزراعة
    شكرا على الوصفة

    • غير معروف on 27 يوليو, 2011 at 3:33 م
    • رد

    هل بالامكان ان استخدم البرشومي بدل الباشن لاحظت انه يشبه

    1. الإثنين لهم بذور مايعني إن الإثنين لهم نفس الطعم. أرجع و أقول من جديد ، ينفع بمعنى إنه راح يعطيك سوفليه اللي يذوقه يقول هذا سوفليه باشن فروت لأ طبعا. بس راح يعطيك سوفليه برشومي، لو بتسوين سوفليه بالبرشومي زيدي كمية البرشومي عن اللي حطيت هنا ( على مسؤوليتك ) عشان يعطيك طعم قوي لأن البرشومي طعمه جدا ضعيف وهادي.

    • غير معروف on 4 يوليو, 2011 at 6:45 م
    • رد

    الله يعطيك العافية

    • غير معروف on 4 يوليو, 2011 at 4:30 م
    • رد

    حابه اغير الفاكهه لاني مو محصلتها شو تقترح علي والقياس نفسه

    1. صعب التبديل. بنزل وصفات سوفليه ثانيه بس كل شي بوقته.

    • awache on 4 يوليو, 2011 at 4:25 م
    • رد

    اتصدق ياا شييف
    انه هاي الفااكهة اكثر فااكهة احبها
    و هي موجوودة بكثرررة في كل مكاان
    بس يتغير الطعم اشوي
    يعني وحدة كانت يايبتنه من سريلانكا كان طعمه اشوي غير عن الموجودة في الجمعية (السوبرماركت)
    و في بعضه حاامض واايد و بعضهم يحتوون على سكر زياادة
    و مشكوور واايد على الوصفة
    بس عندي سؤاال !
    الوصفة تكفي حق كم شخص ؟

    1. الوصفة تكفي شخصين تقريبا بس حسب حجم الصحن. الصحون اللي مستخدم سعتها ٣/٤ كوب .

    • استثنائيه on 4 يوليو, 2011 at 4:05 م
    • رد

    موجود الباشن في السوبر ماركتات الكبيره
    انا شفته قبل فتره في لولو هايبر ماركت
    وفيه في كارفور والدانوب اعتقد

    والمعلب في كل مكان

    وشكرا لك ياشيف

  5. السلام وعليكم احنا بالاردن موجود عنا بالبيت مزروع وزراعنة ناجحة وسهله وهو عشكل مداد يغطي معرشات بس انا مش عارف سبب ارتفاع اسعاره بالسوق انا شفته بالمولات كثير غالي

    1. والله مدري الصراحة غريبه ؟

  6. السلام عليكم
    ماشاء الله يا شيف

    بس فاكهة الباشن احسها قريبه من فاكهة الكاكا اللي تجي برتقالي او حمراء
    http://pictures.msharkat.com/u/image-57773.jpg

    1. وعليكم السلام …

      ما أعتقد الطعم مختلف مره. فيه فواكه كثير لها نفس التركيب و أعتقد يقربون لبعض زي عندك الكيوي مثلا و ال dragon fruit بس لكل وحدة طعم مختلف زي ما البرتقال و اليوسف أفندي و الليمون غير .

  1. […] كثير وخصوصا عندنا في السعودية يسمون المولتن كيك “سوفليه شكولاته” هذا خطأ كبير (وبيني وبينكم أعتبره بعد غش) […]

  2. […] مع شوي سكر ويتحول لرغوة كثيفة تفتحلنا أبواب ثانية زي السوفليه و الكيك الإسفنجي وأنواع و أنواع من الكوكيز و البيتي […]

  3. […] مع شوي سكر ويتحول لرغوة كثيفة تفتحلنا أبواب ثانية زي السوفليه و الكيك الإسفنجي وأنواع و أنواع من الكوكيز و البيتي […]

  4. […] كثير وخصوصا عندنا في السعودية يسمون المولتن كيك “سوفليه شكولاته” هذا خطأ كبير (وبيني وبينكم أعتبره بعد غش) […]

  5. […] أستراليا : سوفليه الباشن فروت […]

اترك تعليقاً

لن ينشر بريدك الإلكتروني.

%d مدونون معجبون بهذه: