فاهيتا اللحم .. Skirt steak fajita

هلا والله …

.

الفهيتا وحده من أشهر الأكلات اللي يسمونها تيكس ميكس . تيكس ميكس جايه من كلمة تيكساس وميكسيكو وهي الأكلات اللي في المدن اللي عالحدود بين المكسيك و وولاية تيكساس في أمريكا . الفهيتا عكس إعتقادات كثير موب طبق مكسيكي ! .الفهيتا ترجمتها الحرفيه هو الأحزمه الصغيره مقصود بهذا طبعا شكل شرايح اللحم في الصحن . الفهيتا عبارة عن ستيك متبل بنكهات هذيك المنطقه (مافيه تتبيله أصليه له ! أي تتبيله تعطي النكهات حقت هذي المنطقه تنفع ) ومشوي وبعدين مقطع شرايح نحيفه . يقدم بالعاده مع بصل وفلفل بارد و إضافات ثانيه مثل الصلصات الحمراء بأنواعها ، الجواكمولي ( بعد صلصة ) ، ساور كريم ، جبن تشيدر ، خس ، طماط ، خبز تورتيا … هذي الإضافات الكلاسيكيه بس طبعا خيارات التجديد كثيره محد قال لازم تكون هذي بس .. الفهيتا في العاده تتقدم مع أطباق جانبيه مثل الرز المكسيكي أو الفاصوليا المطبوخه .كثير ناس يحسبون الفهيتا ما ينفع تتسوى إلا في مطاعم بس صدقوني لو مشيتوا على كلامي صح راح تفهمون إن فاهيتا المطاعم زي تشيليز وغيرها تعبااااااانه موب جيده إلا تعبانه مقارنة بحقت البيت اللي تقدرون تسوونها ببساطه .

.

الفهيتا الأصليه عشان تسمى فهيتا لازم يستخدم فيها ستيك لحم من منطقه معينه في الجسم اللي يسمونه skirt steak . هذي القطعه تعتبر من القطع الرخيصه في الستيك وهي جدا لذيذه وفيها طعم مميز ماتلاقينه في القطع الثانيه الأغلى مثل الفيليه مثلا . هذي القطعه في النكهة جدا لذيذه بس مشكلتها إنه سهل تصير ناشفه وقاسيه إذا أنطبخت خطأ لو زاد الطبخ عن حده شوي تبدأ تنشف أكثر و أكثر ولو تقطعت خطأ تنشف أكثر و أكثر .

.

فهيتا الدجاج وفهيتا السمك و الربيان وغيرها كلها مجرد تسميات كونها تتقدم زي ما تتقدم فهيتا اللحم وكونها متبله بنفس النكهات حقت الفهيتا الأصليه .

.

beef cuts

.

هذي الرسمة مهمه وراح أشرحها بعدين بالتفصيل إن شاء الله …

.

الستيك اللي أبغاه إسمه skirt steak ويجي من المنطقه اللي إسمها plate . هذا هو المعتاد في الفهيتا .. في حال تبون تغيرون مثلا أو تستخدمون قطع ثانيه أو ماكانت موجوده هذي .. موب أي قطعه راح تعطي نتيجة حلوه ال flank راح يعطي نفس النتيجة وفيه ناس كثير يفضلونه أصلا على ال skirt . شخصيا قطعتي المفضله للفهيتا هي اللي إسمها bottom sirloin .. طبعا السيرلوين العادي معروف هو اللي فوق مكان الخصر تقريبا. كونهم نفس الإسم موب معناها نفس الطعم أبببدا !  هذي الثلاث قطع هي أفضل قطع للفهيتا وهي اللي راح تعطي الفهيتا النكهة حقت المطاعم . أفضل حل تطبعون الصوره هذي وتورونها الجزار وهو بيعرف وش تقصدون ..  لو تبون بديل ثاني متوفر في كل سوبرماركت في الثلاجات عادي بدون طلب خاص .. أستخدموا ال sirloin العادي . نكهته أضعف بكثير من الباقيات وألين شوي بس هو البديل الوحيد يمكن باقي القطع زي الفيليه و الريب آي وغيرها ما راح تعطي الطعم اللي أبيه .

.

ندخل علطول في الوصفه :

.

المقادير هنا لنص كيلو ستيك ضاعفوها أو غيرو زي ما تبون عادي ، التتبيلة رهيبة مع الدجاج و السمك و الربيان وغيرها .

نص كيلو ستيك من نوعية flank steak أو الأنواع اللي ذكرتها .

التتبيله :

عصير ٣ ليمونات خضر

ملعقتين كبار خل تفاح

٣ أضعاف كمية الحامض اللي فوق زيت زيتون

ملعقتين صغار كمون أو حسب الرغبه

ملعقتين صغار كزبره ناشفه

ملعقة كبيره فلفل حار مطحون

ملعقة كبيره تباسكو ويفضل لو كانت من النوع المدخن

ملعقتين كبار سكر بني

أوريجانو

فصين ثوم

١/٢ كوب تقريبا ورق كزبره

رشة ملح

الإضافات :

بصل أبيض مقطع أجنحة

فلفل بارد ألوان مشكله مقطع أجنحة

خبز تورتيا

صلصة مكسيكية حمراء

جواكمولي

ساور كريم

جبن تشدر أو مونتري جاك لو حبيتوا

.

الطريقة :

.

في خلاط حطوا كل المكونات مع بعض إلين تكون لنا تتبيله ثقيلة شوي . نحط شوي ملح وفلفل ونذوق التتبيله ونعدل..

.

الحين نحط اللحم ونتبله ساعتين على الأقل في الثلاجه . اللحم ممكن يتتبل قبلها بيوم بس موب أكثر من كذا .

.

هذا شكل الستيك هنا ولاحظوا كيف يختلف عن باقي الستيكات . لاحظوا بعد كيف شكل خطوط أو ألياف اللحم جايه طويله من اليمين لليسار.

.

فاهيتا

.

بعد ما يتتبل الستيك نطلعه من التتبيله ونشيل التتبيله الزايده اللي عليه بمنديل أو غيره . مهم إننا نجفف اللحم عشان يتشوح صح .اللحم الرطب ماراح يتشوح بسهوله غير إن التتبيله اللي عالوجه راح تنحرق وتعطي دخان . خلوا الستيك على حرارة الغرفه حوالي نص ساعة على الأقل، نص ساعة وساعة أفضل بعد. هذي الحركة تخلي الستيك يوصل لحرارة الغرفة. الستيك بارد ولو طبخناه على النار وهو بارد راح نضطر نخليه وقت أطول إلين يستوي وهذا معناه الستيك بيخسر مويه أكثر وهذا معناه ستيك أنشف .

.

الحين نسخن الشوايه اللي بنستخدم على حرارة أعلى من وسط بشوي ونخليها تسخن زيييين .أنا أستخدم شوايه داخليه مصنوعه من حديد زهري cast iron. الحديد الزهري ماده رهيبه للطبخ خصوصا في مثل هذي الحالات . جربت شوايات داخليه كثير بس مالقيت أفضل من شوايات الحديد الزهري العاديه . الحديد الزهري رخيص ، يعيش طول العمر ، يوصل الحراره بشكل رهيب ، ويمسك حرارته بعد لوقت طويل هذا يخليه خيار ممتاز للشوي . فيه شوايات تجي مصنوعه من ألمنيوم وستانلس أشوف إنها ماتجي ولا ربع الحديد هنا . الشوايات هذي كلها تحاول إنها تقلد آلية عمل الشوايه الفحم أو الغاز العاديه بس أقرب شي لهم هو الحديد الزهري . لو تبون تشوون على فحم أو شوايه غاز بعد ينفع وبيكون أحسن أكيد .

.

نسخن الفرن ل 350 . اللي راح أسويه هو إني راح أشوح الستيك على النار من الوجهين بعدين بحط الشوايه كلها في الفرن عشان تكمل طبخ . حرارة الفرن تجي من كل مكان عكس حراره الغاز اللي تجي من جهة وحده . هذا يساعد إنه يطبخ الستيك بالتساوي غير طبعا إنه أقل دخان .

.

بعد ما تسخن الشوايه نرش ملح وفلفل على الستيك من الوجهين . تذكروا إحنا ماحطينا ملح كثير عالستيك ! . بعد ما نبهر الستيك نحط شوي زيت على الستيك ونمسحه . الزيت ينحط على الأكل موب عشان مايخليه يلصق بس زي ماناس كثير يعتقدون . الزيت ينحط كونه موصل للحراره وراح يساعد الحراره توصل للستيك بشكل متساوي .

.

بعد مانلاقي إن المقله صارت حاره نحط الستيك .

.

فاهيتا

.

نشوح الستيك على الوجه الأول حوالي دقيقتين أشوفها كافيه بدون ما نحركه أو نضغط عليه بالملعقة !! . بعدين نقلب الستيك ونحط المقله كلها في الفرن . لو المقله حقتك من النوع اللي ما ينفع يدخل الفرن شوحي الوجه الثاني بعد دقيقتين بعدين شيلي الستيك وحطيه على صينية فرن ودخليه الفرن .

.

نجي للمسألة الكبيره .. كيف نعرف إنه أستوى ؟ باللون ؟ بالريحه ؟ أقطع الستيك طيب ؟ كلها خطأ … عشان تعرفون إن الستيك إنطبخ صح عندنا طريقتين . الطريقة الأولى وهي اللي لازم الواحد يتعود عليها وهي باللمس . اللحوم وهي تنطبخ تبدأ تصير قاسيه أكثر و أكثر . الطباخين يضغطون على الستيك بأصبع ويحسون هل هو مستوي ولأي درجة إستواء. هذي وحده من المهارات اللي لازم الواحد يتعلمها وهي تجي مع الوقت . الحل الثاني هو إنكم تستخدمون ميزان حراره فوري ، كل ما توصل حرارة اللحم الداخليه لحرارة معينه اللحم بيكون عند درجة إستواء معينه . الحل الثالث و السهل هو إنكم تقطعون اللحم من أسمك منطقة وتشوفون لون اللحم من داخل.

.

رير rare شبه ني . هنا اللحم يكون بارد من الداخل وطري و أحمر . من ١٢٥ – ١٣٠ فهرنهايت

.

ميديم رير medium rare أقل من الشبه ني . هنا اللحم يكون دافي من الداخل ، أحمر ، وطري . ١٣٠ – ١٤٠ فهرنهايت . ألذ شي يكون اللحم عند هذي المرحله تذوقين كل درجات اللحم فيه غير إنه يكون لييين وطري وجوووسي مره .

.

ميديم medium وسط . اللحم هنا وردي وشوي قاسي . ١٤٠ – ١٥٠ فهرنهايت للستيك اللي أنا مستخدم هنا أفضل أطبخه هذي الدرجة مو أقل ولا أكثر .

.

ميديم ويل medium well وسط إلى مستوي . شويي لون وردي في الداخل وقاسي . ١٥٠-١٥٥ فهرنهايت.

.

ويل دون well done ناس يسمونه مستوي أنا أسميه محروق !! . اللحم لونه رصاصي على بني وناشف وقاسي مره . مالقيت أي سبب مقنع ليش الناس تاكل الستيك لهذا الإستواء ؟

..

بعد ما نحط الستيك في الفرن نبدأ نطبخ الخضار . نسخن مقله على حراره أعلى من وسط بشوي ونخليها تسخن دقيقه دقيقتين . بعدين نحطي شوي زيت ونحط الخضار مع رشه ملح وفلفل ونقلبها إلين تذبل .

.

خضار الفاهيتا

.

نتأكد من الستيك حقنا كل شوي .

.

٩٥ لسا ما أنطبخ يبيله زياده . نرجع المقله للفرن .

ستيك فاهيتا

.

نشيل الستيك من النار ونحطه على شبك تبريد أو صحن عادي لو ماعندكم ونغطيه بقصدير مخروم. الحين مهم جدا إنكم تريحون الستيك بعد الطبخ . كون الستيك معرض لحراره طول هذا الوقت البروتين حقه شاد و المويه موزعه فيه بين نسيج اللحم أول ما تقطعين الستيك بتلاقين كل مويه اللحم في صحنك واللحم ناشف . عشان كذا نريح الستيك البروتين بيرجع شوي يرتخي و المويه بترجع تتوزع في اللحم بالتساوي . الترييح ياخذ تقريبا نص وقت الطبخ يعني ٥ دقايق تقريبا ممتاز . أهم شي لا تتركون هذي الخطوه !! جدا مهمه .

.

نجي للخطوة المهمه الأخيره اللي هي تقطيع الستيك . تقطيع ستيك زي الفيليه مثلا مايفرق كثير . بس في مثل هذي القطع الرخيصه مهم إن التقطيع يكون صح . لو دققتوا في الستيك هذا بتلاقون إن فيه إتجاه لخيوط اللحم. شوفوا الصوره الأولى حقت الستيك وهو ني واضحه فيه . المهم في التقطيع إنكم تقطعون اللحم بشكل عامودي مع هذي الخطوط موب في إتجاهها لو قطعتي في إتجاهها راح تلاقون اللحم قاسي . حاولوا تقطعون اللحم قطع نحيفه بعد قدر الإمكان ودايما أستخدموا سكين حاد ونحيف في التقطيع .

.

الفهيتا كلنا يعرف إنها تتقدم في صحن حار وتجيك بدخان وكذا حركات . هذا الشي جدا سهل ترى . سخنوا الصحن حق التقديم اللي يجي حديد على حرارة عاليه يمكن دقيقتين كذا بعدين حطوا شوي زيت وحطوا الخضار والستيك فوقها وبتشوفون دخان زي حق المطاعم .

.

فاهيتا اللحم

فاهيتا لحم

.

لاحظوا درجة الإستواء ميديم ١٠٠٪ . ولاحظوا كيف لون اللحم موزع بالتساوي كوننا سويناه في الفرن .

.

fajita

.

Follow TopChefCooks on Twitter

بوت دي كريم الشكولاته بالبهارات .. Spiced Chocolate Pot de Creme

هلا والله ….

.

“pot de creme” ترجمتها قدر الكسترد أو قدر الكريمة . الكسترد كلمة تعني أي خليط من بيض و منتجات ألبان و البوت دي كريم نوع من أنواع الكسترد ويمكن أدسمها و أثقلها بعد . كمية الدسم العاليه فيه هي اللي تعطيه الطعم الغني المميز و النعوووومه المعروفة في البوت دي كريم . كونه ثقيل كمية بسيطة منه تكفي وعشان كذا دايما ما يتقدم بكميات جدا بسيطة. غير كذا البوت دي كريم بعد إسم لشكل من أشكال الصحون اللي يتقدم هذا الحلى فيها ! . يعني هي إسم لحلى فرنسي مشهور وبعد إسم لصحن مصمم إنه يشيل نفس الحلى.

.

بدال ما أسوي الحلى بنكهة شوي تقليديه وطفشنا منها كثير اللي هي شكولاته ساده .. قررت أضيف شوي لمسة على هذا الحلى بإني أستخدم شوي فلفل حار وقرفة  كونه يمشي مع الشكولاته بشكل جدا ممتاز . لو ما حبيتوا الطعم أو الفكره منه يمديكم تضيفون النكهة اللي تعجبكم عالشكولاته مثل اللوز مثلا أو النعناع أو البرتقال أو حتى الزنجبيل أو البندق أي نكهة ممكن تدخل في هذا الحلى مع الشكولاته .

.

الشي الثاني الحلو فيه هو إن الحلى جدا سهل وما ياخذ وقت طويل في التجهيز و التحضير وبعد يعيش وقت في الثلاجه حوالي يومين .

.

المقادير :

.

كوبين قشطة خفق قصيرة الأجل

١١٣ جرام شكولاته غامقة من أفضل نوعية تلاقونها مقطعة.

٦ صفارات بيض

٦ ملعق كبيره سكر

رشه ملح

رشة فلفل حار مدخن أو عادي

رشة فانيلا

رشة قرفة

.

* أنا أحب الشكولاته ال ٦٤٪ بس هي مسألة أذواق ! مهم جدا إن نوعية الشكولاته تكون ممتازه كون طعمها بيكون واضح هنا . ما تحتاجون ميزان عشان الشكولاته الوزن مكتوب على العلبه . إذا تبون تعرفون كيف تختارون شكولاته وكيف تفرقون بين أنواع الشكولاته شوفوا موضوع الشكولاته هنا.

.

الطريقة :

.

نسخن الفرن على  ٣٢٥

.

نخفق البيض مع السكر و الملح إلين ينخلط زين ويصير شوي فاتح

.

بعدين نسخن الكريمه في قدر صغير إلين يبدأ بس يغلي أول ما تبدأ تطلع أول علامات الغليان نطفي النار ونحط الشكولاته كلها مره وحده ونحرك إلين تذوب .

.

الحين نبدأ نصب من خليط الشكولاته على البيض شوي شوي لو صبيتوه مره وحده ممكن يتكتل البيض عشان كذا لازم نرفع حرارة البيض شوي شوي .. نصب من الخليط ملعقة ملعقة في البدايه إلين نحس إن خليط البيض صار شوي دافي بعدين نصب الخليط كله مره وحده ونحرك .. الحين نصب الكسترد إما في قوالب صغيره حقت البوت دي كريم لو عندنا شكلها يجي زي كذا .

.

.

أو ممكن نستخدم أي صحن صغير مثل صحون السوفليه مثلا أو حتى فناجيل القهوه العربيه تنفع هنا .

.

الحين نرص الصحون في صينية فرن ونصب مويه مغليه بحيث توصل المويه المغليه تقريبا ل ٣/٤ إرتفاع الكوب . ندخلها الفرن  . نخليها في الفرن إلين تستوي إذا سوينا عليها إختبار الكسترد اللي هو إننا نهز الصحن و نشوف كيف يتحرك أو يهز . المفروض إن الأطراف حقت أي كسترد تكون شوي جامده بس الوسط يهز شوي بس . في حالتي هنا راح تاخذ يمكن ١٥ دقيقه بس تأكدوا قبلها بوقت أفضل . مافيه شي أسوأ من كسترد مطبوخ أكثر من اللازم بيكون ناشف ويمكن محبب بعد .

.

طلعوه من الحمام المائي وخلوه يبرد في الثلاجة عالأقل ساعتين و الأفضل طول الليل .

.

هنا أنا أستخدمت قشر البيض كطبق للتقديم كونه الحجم المثالي لهذا الحلى . أخذ معي في هذي الحالة أقل من ١٠ دقايق . إذا حبيتوا تستخدمون قشر البيض للتقديم زي ما أنا مسوي هنا ، أقسموا الطرف العلوي من البيضه شوي شوي بسكين مسننة جدا جدا حادة . طلعوا البيض منها و أستخدموه في الكسترد. أغسلوا قشر البيض في مويه عشان تشيلون أي أثر للبيض داخل القشر. الحين عشان تدخلون القشر الفرن نستخدم أطباق البيض (الكرتوب موب البلاستنك هنا !!) . نحط القشر في الأطباق حقت البيض ونحط الكرتوب بالقشر في صينية فرن بعدين نملأ القشر بالكسترد بعدين نحط المويه المغليه عالصينية زي ما سوينا بالطريقة العاديه وندخل الصينية بكرتون البيض للفرن (لاتخافون ما ينحرق كونه مشبع بالمويه حرارة الكرتون مستحيل تتعدى ١٠٠ درجة مئوية وهي أقل من درجة إحتراق أي شي). نكمل الحلى عادي. إذا جيتوا ترصون الحلى في صحن أستخدموا ملح خشن وثبتوا قشر البيض عليه (زي ما سويت في الصورة).

.

بوت دي كريم كسترد

بوت دي كريم شكولاته
.

Follow TopChefCooks on Twitter

Candying Fruits …..

هلا والله ….

.

جاني سؤال عالآسك أمس بخصوص صناعة الزنجبيل المسكر أو الحلو Crystallized  Ginger وكان السؤال في وقته صراحة كونه كان عندي زنجبيل وودي أسوي فيه شي . أنا تكلمت من زمان عن شي قريب مره من هذا اللي هو قشر الحمضيات المسكر أو المحلى كلهم لهم نفس المبدأ . للي ما يعرف اللي قاعد أتكلم عنه هو عباره عن شرايح زنجبيل نحيفه تنباع في السوبرماركت في الغالب وتكون كذا مغطيه بطبقة سكر وطعمها زنجبيل خفيف ومره لذيذه . ترجمة الإسم شوي صعبة صراحة بس حسب ترجمة جوجل طلع إسم حلو مره اللي هو “ملبس الزنجبيل” .هل بس ينفع الزنجبيل ؟ لا طبعا أي أي شي ثاني تقدرون تستخدمونه . مثلا قشور الحمضيات بأنواعها رهيبه كذا . المكسرات بأنواعها تصير رهيبه بعد وخصوصا إذا تحمصت شوي . الفواكه بأنواعها ممكن تستخدم مثل التفاح ، الكرز ، الأناناس ، الكمثرى … كل هذي ممكن تستخدم .. الفواكه الصغيره مثل الكرز أو اليوسف أفندي الصغير ممكن تستخدم كامله ! أو ممكن تتقطع حسب الرغبه وحسب الشكل و الإستخدام المطلوب .

.

الملبس ببساطه شديده هو عبارة عن فواكه أو أي شي ثاني بعد مثل خضار أو غيرها مطبوخه و محفوظة في شيرة سكر . الشيرة مليانه سكر صح و السكر يحب المويه وراح يسحب الرطوبه من الفواكه اللي أستخدمها وبكذا تصير الفواكه بيئة غير ملائمه للبكتيريا تعيش فيها وبكذا تعيش الفواكه فترة أطول . غير كذا السكر اللي حولين الفواكه راح يسحب الرطوبه من أي بكتيريا تجي وهذا راح يقتلها علطول . نفس المبدأ هذا هو السبب اللي يخلي شي زي المربى يعيش فترات طويله .

.

نقدر ببساطه نطبخ الفواكه هذي في شيرة وبعدين نقفل النار ونخلي الأكل في الشيره هذا بيخليها ملبس عادي أو نقدر نشيلها من الشيره ونغطيها بسكر عادي وخلاص وهذا بيكون طبقة سكر ثقيلة حولينها . أو نقدر ناخذ خطوة زيادة ونطبخها زود بعد إلين ما يرجع السكر يسكر مره ثانيه أو يتبلور يعني يتحول جامد مره ثانيه ويكون طبقة سكر خفيفه على الفواكه .

.

شوفوا الطريقة اللي تعجبكم أكثر وسوها كل الطرق تنفع .. الشي الوحيد المشترك بين كل الطرق واللي راح تلاقونه في كل الوصفات هو إن فيه شيره وفيه شي ينطبخ فيها وهذا هو المهم . شخصيا أفضل الطريقة الأخيره لأشياء زي القشر أو الزنجبيل و الطريقة الأولى لأشياء مثل الفواكه الكامله .

.

نجي للتفاصيل ، كيف نسويه بالتفصيل . راح أعطكم مثال هنا للزنجبيل وقيسوا عليه باقي الأشياء .

.

أول شي ناخذ الزنجبيل أي كمية نبي ما يفرق ونقشره ونقطعه شرايح نحيفة قد ما نقدر . موب شرط أبدا تكون نحيفه بس كون الزنجبيل طعمه قوي مره لو كانت الشرايح متينة شوي بيكون طعم الزنجبيل قوي مره .

 .

sliced ginger

.

الحين ناخذ الزنجبيل ونسلقه في مويه كافيه إنها تغطيه وزياده إلين يصير لين ويخف حدته شوي . العملية هذي ممكن تاخذ من ٢٠ – ٣٠ دقيقه حسب عمر الزنجبيل ذوقيه وشوفي هل صار لين ولا لأ . هذي العملية تستخدم بعد مع أشياء مثل قشور الحمضيات مثلا أو الفواكه القاسيه عشان نلينها شوي أو نشيل من حدة طعمها مثل لو كنت أسوي قشر جريب فروت مثلا . بس هي موب ضروريه ! مثلا مع الكرز أو الأناناس أو مثلا المكسرات هذي الخطوة مالها داعي بس مع الأشياء القاسيه أو اللي طعمها قوي مره مثل هنا تكون مهمة . بعد السلق نصفي الزنجبيل مع الإحتفاظ بمويه السلق .

.

موية سلق الزنجبيل حلوه تنخلط مع أشياء ثانيه مثل السفن أب مثلا أو العصيرات أو مثلا مع الشاهي تصير مره لذيذه عشان كذا لو تبون أحفظوا المويه حرام تنرمي. راح أستخدم المويه هنا حقت الزنجبيل عشان أسوي الشيره اللي بطبخ الزنجبيل فيها . الهدف هو إني أعطي طعم زنجبيل للتغطيه بعد بس هي موب ضروريه أبد يعني يمديكم تستخدمون مويه عاديه لو ما تبون .

.

الحين نوزن الزنجبيل اللي عندنا ونحطه في قدر ونزيد عليه بنفس الكمية سكر أبيض عادي .

.

candied ginger

.

الحين نزيد عليه شوي من مويه السلق نحط شوي من موية السلق حوالي ملاعق بس إلين يصير السكر شوي رطب وهو مع الحراره بيصير سايل .مثلا في حالتي أستخدمت ملعقتين كبار بس مع كميه السكر اللي في الصوره اللي فوق ! .

.

ginger in suyrp

.

الحين نخلي الشيره تطبخ على حرارة وسط وشوي شوي بنلاقي إن الفواكه بدت تصير شفافه .شوي شوي العملية ما تطول يمكن ١٠ دقايق تقريبا (للزنجبيل بس كل نوع فواكه بياخذ وقت غير). عند هذي المرحلة خلاص هذا ملبس ! يمديكم الحين تطفون النار وتخلون الشيره و الفواكه تبرد وتحفظونهم في الثلاجه. بتعيش لوقت طويل حوالي ٦ شهور . أو لو تبون شيلوه من الشيره وغمسوه بسكر عادي عشان تعطونه الشكل المعروف . أو كملوا معي .

خلوا السكر يطبخ على حراره وسط وهو يطبخ جهزوا شبك تبريد فوق صينية وأدهنوا الشبك بشوي زيت زي كذا :

.

.

خلوا الشيره تكمل طبخ إلين تلاقون إن السكر بدأ يتبلور مره ثانيه ويرجع سكر جامد زي كذا :

.

candied ginger

.

لاحظوا أطراف القدر كيف السكر هنا . الحين شيلوا الخليط من النار ووزعوا الزنجبيل أو الفواكه المستخدمه على لوح التبريد وخلوا الشيره الزايده تنزل من الشبك عادي .

.

زنجبيل ملبس

.

بعد يمكن ساعتين بتلاقون إن الشيره بدت ترجع سكر جامد وبيصير شكله يشبه حق السوبرماركت . بس هذا الزنجبيل الملبس جدا سهل ومقاديره متوفره في كل بيت و يعيش لوقت طويل . و نصيحة لا توقفون عند الزنجبيل فيه أشياء وفواكه كثير تصير رهيبه كذا إضافه إنها تنحفظ لوقت طويل . يعني إذا لقيتوا إن عندكم فواكه أو شي زايد بدال ما ترمونه سوووه بهذي الطريقة .

كذا شكله النهائي :

.

زنجبيل ملبس

.

أحفظوه بعلبه تتقفل زين في الثلاجه وراح يعيش وقت طويل يمكن ٦ شهور أو أكثر بعد .

هذا تطبيق ثاني بس أستخدمت قشر جريب فروت .

.

قشر جريب فروت

.

نقشر الجريب فروت زي كذا . بعدين نشيل الجزأ الأبيض هذا كونه مر مره نفس العمليه أسويها لكل الحمضيات بعد . بعدين نقطعه حسب الرغبه نقدر نخليه كبير أو شرايح نحيفه حسب الرغبه المسألة راجعتلك . هنا أنا قطعتها شرايح نحيفة .

.

قشر قريب فروت

.

الحين نعيد نفس العملية حقت الزنجبيل بالضبط . نسلق القشر إلين يصير لين شوي بعدين نصفيه ونحط عليه سكر بنفس وزنه وشوي مويه ونطبخه إلين يقلب شفاف بس . هنا بسويه بطريقتين الأولى زي الزنجبيل .

.

قشر ملبس

.

طعمه رهيب كذا . شوي يقرمش وفيه طعم جريب فروت مره حلو .

أو أسويه بدون ما أخليه يسكر علي يعني بس أطبخه في شيرة إلين يقلب شفاف زي كذا :

.

قشر جريب فروت ملبس

.

لاحظوا كيف شفاف صار ! .

طيب نجي للخلاصة وش الفايده ؟ ليش أسوي هذي الأشياء أو وش إستخداماتها ؟ إستخداماتها كثيره في الحلويات (أو الموالح زي قشر برتقال مع بط مثلا) يمديكم تقطعونهم صغار وتضيفونهم لموس أو سوفليه ، يمديك تحطونه كقطع صغيره في إيسكريم أو مع خلطة كوكيز (الجينجر سنابس ما ينفع إلا مع زنجبيل مسكر مثلا) ، مع أشياء زي حشوه جبن (زي الكانولي مثلا) ، فوق إسكريم ، فوق كيك ، مع كريب. أو حتى يمديكم تاكلونها لحالها زي الزنجبيل مثلا مع الشاهي يطلع حلو .

.

إسكريم مع ملبس قشر جريب فروت

.

Follow TopChefCooks on Twitter

 

Thousand Island Dressing .. صوص الثاوزاند آيلند

هلا والله ….

.

صوص الثاوساند آيلند أو الألف جزيره معروف عند ناس كثير . بس أغلب الناس يلخبط بين الصوص الروسي اللي هو عباره عن مايونيز وكتشب و زبادي + أي شي ثاني تحبونه و الثاوسند آيلند. المسألة موب مسألة أفضل أو أسوأ هي بس غير هذا شي وهذا شي .

.

الثاوسند آيلند في الأساس عباره عن مايونيز مع تباسكو أو شطه عاديه + أشياء ثانيه غالبا يكون منها بيض مسلوق و مخلل . هو قريب مره من صوص البيج ماك للي يعرفه .

.

إستخدامات الصوص ما تنتهي كثير يعرفونه كخلطة سلطة بس . بس هو ممكن يكون أكثر من كذا بكثير . جربوه مع الربيان أو الدجاج أو السمك أو كصوص مع البيض في السندوتشات مثلا أو حتى كديب للأكلات اللي ذكرت قبل.

.

المقادير :

.

كوب وربع مايونيز .
١/٣ كوب شطه أو تباسكو موب شرط تستخدم كلها
١/٤ كوب فلفل أحمر بارد مقطع صغاار مره
بيضه مسلوقه مقطعه صغار تسوي كل الفرق ترى في الصوص
٣ ملعقت كبيره مخلل مقطع صغار
٢ ملعقة كبيره خردل ديجون أو خردل عادي
٢ ملعقة كبيره كابر
٢ ملعقة كبيره بصل أخضر مقطع صغار
ملح وفلفل

.

الطريقة :

.

أخلطوا المكونات كلها ماعدا الشطه . بعدين حطوا شطه حسب الرغبه .
.

Follow TopChefCooks on Twitter

%d bloggers like this: