ماكاروني آند تشيز .. Macaroni and Cheese

هلا والله …

.

اليوم قمنا الصباح على أجواء رائعة ماشاء الله ( ٣٨  تحت الصفر !! ) وعلى حظي كان عندي مشاوير ضروريه يعني البرد فيني فيني . بعد معاناة رجعت البيت وأبي أي شي يدفيني و فكرت علطول في الماك آند تشيز . مقاديرها متوفرة و مايحتاج أطلع أجيب أغراض و الأهم من كل هذا شي يدفي هههه.

.

الماك آند تشيز هي تقريبا اللي الناس يسمونها مكرونه بالباشاميل . الفرق إن الباشاميل لحاله مع باستا ما أشوفه شخصيا شي لذيذ بس إذا أنخلط معه جبن بكميات كبيره يصير شي ثاني.

.

الماك آند تشيز طبق أمريكي شعبي ماله أي علاقة بإيطاليا . هو عبارة عن صينية مكرونه أكثر من كونه طبق باستا . الأكله تتكون من مكرونه مسلوقه مخلوطه مع صوص يسمونه مورنيه ( صوص الجبن ) اللي هو واحد من تفرعات الباشاميل . هذي المكرونه لها مليون تفرع وتفرع وكل يوم يطلع أكثر و أكثر .. اللي دخل عليها مكونات غاليه مثل الفقع و اللوبستر و اللي سواها بلمسات صينية وهنديه و يابانيه و اللي يسويها بالبيكن و اللي يسويها بأنواع أجبان نادرة وغريبه … و كل شخص تقريبا عنده نسخه غير للأكله هذي..

.

اليوم ماراح أتكلم عن أي تفرعات اليوم مسوي الوصفه الكلاسيكيه بنفس المقادير الموجوده في العادة في كل ماك آند تشيز . بس هذا ما يمنع إن فيه تفاصيل مهمه تخلي حتى أبسط الأشياء مميزه إذا تطبقت صح.

.

المقادير :

.

ربع كيلو تقريبا مكرونه “ماكاروني” أو اللي يسمونها أكواع elbow macaroni .

٣ ملاعق كبيرة زبدة

تقريبا ٣ ملاعق كبيرة طحين

ملعقة كبيرة خردل بودرة .. ( لا تبدلون بخردل عادي ) .

٣ أكواب حليب كامل الدسم .

١/٢ كوب بصل مقطع صغار .

ورقة غار

رشة جوزة طيب ( إختياري )

فص ثوم كامل

١/٢ ملعقة صغيرة بابريكا

بيضه

٣٥٠ جرام تقريبا جبن تشيدر حاد sharp أو mature مبشور.

ملح وفلفل أسود .

.

التغطيه :

٣ ملاعق كبيره زبده

كوب بقسماط ويفضل لو كان بقسماط ياباني panko .

.

* شكل المكرونه مهم هنا. اللي ما يعرف شكل المكرونه اللي أقصد يكون شكلها زي الصورة اللي تحت. في حال ما توفرت أستخدموا أي شكل أسطواني ثاني زي البينني مثلا penne.

.

ماك آند تشيز

.

* بودرة الخردل هي عبارة عن بذور خردل مطحونه لا أكثر. متوفرة في أغلب السوبرماركتات ولو ما لقيتوها أكيد بتلاقون بذور خردل mustard seeds أطحنوها بطاحونة بهارات وخلاص.

.

* نوعية الجبن جدا مهمة هنا. تقدرون تستخدمون كذا نوع جبن : تشيدر ، جرويير ، إمنتال ، جودا ، ماسكاربوني ، فيلادلفيا ، بارمزان ، رومانو ، جرانا بادانو، بلو تشيز ، جوت تشيز أو جبنة ماعز أو أي خليط منهم. أهم شي إنكم تستخدمون جبن من نوعية جيدة وإن الصوص في النهاية يكون له نكهة جبن. أشياء زي الموزاريلا مالها نكهة قويه ولاراح تضيف أي شي للصوص. أنا حددت تشيدر حاد أو معتق mature هنا وبيضبط دايما بس لو تبون تستخدمون نوع جبن ثاني الخيار لكم. إقتراحات ثانيه رهيبة : ٣/٤ الكمية جروير و الربع الباقي بارمزان ، نص ماسكاربوني أو فيلادلفيا وربع إمنتال وربع بارمزان ، نص جودا ونص تشيدر و الخيارات الثانيه كثيرة.

.

الطريقة :

.

سخنوا الفرن على ٣٥٠ .

.

أسلقوا الباستا في قدر كبير فيه مويه مملحة كثيره على حرارة عالية . بدون أي زيت ! (شوفوا هذا الموضوع إذا تبون تعرفون أكثر عن الباستا) .إذا وصلت الباستا مرحلة “ألدنتي” يعني تكون مستويه يعني مافيها طعم نشا بس لسا شوي قاسيه نشفوها و أغسلوها بمويه بارده عشان نوقف الطبخ وما تصير مطبوخه أكثر من اللازم.

.

و الباستا قاعده تطبخ نسوي الصوص. في قدر نذوب الزبده على حرارة وسط ، بعد ما تذوب نحط الطحين و الخردل ونحرك إلين يكون لنا معجون ناعم بعدين ننزل الحرارة شوي. نطبخ المعجون هذا حوالي ٥ دقايق إلين يقلب لونه أشقر شوي. الحين نرفع الحراره شوي بعدين نبدأ نضيف الحليب . نحط دفعه حليب ونحرك إلين تبدأ تغلي بعدين نحط الدفعه اللي بعدها وكذا إلين يخلص كل الحليب . نضيف البصل و الثوم وورق الغار و البابريكا و جوزة الطيب ونطبخهم على غلية جدا خفيفه ١٠ دقايق تقريبا . بعد العشر دقايق نشيل فص الثوم وورقة الغار ونطفي النار.

.

الحين نخلط حوالي ملعقتين كبار من الباشاميل على صحن صغير فيه البيضه ونحركهم مع بعض زين. بعدين نصب اللي في الصحن الصغير عالصوص ونحرك. هذي العملية مهمه كوننا لو حطينا البيضه عالصوص علطول بتتكتل بس كذا لأ . نضيف الحين ٣/٤ الجبن على الصوص على دفعات ونحرك إلين يذوب بعد ما يذوب الجبن نذوق الصوص ونزيد الملح و الفلفل حسب الرغبة . حاولوا يكون الصوص يميل للملوحة لأنه بينخلط مع الباستا.

.

bechamel sauce.

نخلط الباستا مع الصوص بعدين نصبهم في صحن فرن . أو عدة صحون صغيرة لو تبون .بعدين نغطيها بباقي الجبن .

.

الحين نذوب الزبدة حقت التغطيه بعدين نخلطها مع البقسماط . نحط طبقة من التغطيه فوق الجبن وندخلها الفرن .

.

mac and cheese

.

نخليها في الفرن إلين يذوب الجبن و تبدأ التغطيه تقلب ذهبي . حوالي نص ساعة .  نطلعها ونخليها تبرد ٥ دقايق بعدين ناكلها علطول وهي حاره .

.

mac and cheese

ماك آند تشيز مع ريش الغنم

توب شيف ماك آند تشيز

توب شيف ماك آند تشيز



Follow TopChefCooks on Twitter

الجاناش .. Chocolate Ganache

هلا والله …..


الجاناش هو الشكولاته بأجمل صورها وواحد من أكثر الأشياء مرونه في المطبخ .الجاناش هو مصطلح فرنسي لخليط الشكولاته و الكريمة. منشأ الجاناش فيه خلاف كبير ناس يقولون إنه إختراع فرنسي وناس يقولون سويسري بس محد يعرف بالضبط إلى الآن . الجاناش سهل وسريع تحضيره ومكوناته متوفره في كل مكان . أي واحد يحب الحلويات راح يفهم علطول كيف هذا المكون ممكن يساعده في المطبخ إذا عرف كيف يسويه حسب ما يبغى.


الجاناش ببساطه شديده هو خليط كريمي ،ناعم من قشطة الخفق و الشكولاته . بعبارة أدق الجاناش هو مستحلب دهن ومويه ( الدهن من القشطة ومن زبدة الكاكاو و المويه من القشطة ) . مستحلب يعني خليط متجانس من مادتين ما يذوبون في بعض بشكل طبيعي زي المويه و الزيت مثلا . اللي يسوي الإستحلاب هنا هو مادة الليسثن اللي تكلمت عنها هنا في موضوع الشكولاته و الموجوده في الشكولاته وبكميات بسيطه في القشطة بعد . شكولاته وقشطة خفق هي كل اللي راح نحتاجه عشان نسوي جاناش .



إستخدامات الجاناش




الجاناش أنواع وكل نوع له فائده و إستخدام غير الثاني . بتغيير حرارة الخليط و نسبة المواد لبعض نغير الجاناش حسب رغبتنا . الجاناش ممكن يكون :


حشوة filling : لكيك مثلا أو ماكرون أو سويسرول أو حتى كانولي أو إكلير أو ملفيه  . جربوا تسوون كيك شكولاته عادي حتى لو من علبه و أحشوا الكيك بجاناش وشوفوا كيف يتحول لشي مميز ورهيب .


تغطيه frosting : الجاناش ممكن يتسوى منه تغطيات للكيك أو الكب كيك . الشي الحلو فيها هو إنها تتحمل الحراره ومايحتاج تتخزن في الثلاجه و التغطيه لحالها تعيش وقت طويل . سواء كانت التغطيه المرغوبه مخفوقه وخفيفه أو ثقيله شوي كلها ممكنه بالجاناش .


طلاء glaze : الجليز هو عبارة عن طبقة  (لامعة في الغالب)  فوق الحلويات أو الأكل عموما . التغطيه تكون في الغالب ثقيله بينما الجليز يكون طبقه خفيفه ولامعه . الجاناش ممكن يستخدم كجليز للكيكات أو الإسكريمات أو الموس . الجليز حق الجاناش ممتاز كونه لذيذ و الحلو فيه إنه يحفظ رطوبة الكيك غير إنه يعطي شكل إحترافي للكيكات مهما كانت بسيطة .


ganache frosting

مثال لإستخدام الجاناش كطلاء

ترفل truffle : الترفل في الأساس هو إسم الفقع بالإنجليزي ومن الفقع جت فكرة حلى الترفل اللي يشبه الفقع وهو طالع من الأرض . الترفل عبارة عن كور جاناش مغطيه بطبقة شكولاته ذايبة و بودرة كاكاو عشان تصير تشبه الفقع الأصلي . راح أغطي الترفل إن شاء الله بعدين .



ترفل جاناش

ترفل مصنوع من جاناش


زينة أو ديكور decoration : الجاناش ممكن يتشكل بأشكال ويتزين فيه الكيكات أو الصحون . الصب يكون إما إنه ينحط في قوالب إلين يجمد أو مثلا بإستخدام كيس حلويات و راس .


صوص : الجاناش أسهل صوص شكولاته ، جربوا تسوون صوص شكولاته بجاناش مصنوع بشكولاته ممتازه وبتفهمون وش أقصد . للي سألوني عن نافورة الشكولاته أو فوندو الشكولاته الجاناش بعد ممتاز هنا .


 

المكونات و الأنواع


المكونات الأساسية للجاناش هي الشكولاته و الكريمة ( قشطة الخفق )  بس فيه إضافات ثانيه بعد ممكن تنحط مع الجاناش .


* الشكولاته : أهم مكون في الجاناش وماله أي بديل هنا . اللي ما قرأ الموضوع حق الشكولاته يشوفه هنا . أي نوع شكولاته ( إلا البودرة ) ممكن يستخدم عشان يتسوى منه جاناش. يعني الشكولاته الغامقة أو اللي بالحليب أو المره أو البيضاء كلها تنفع . النوع اللي بتكلم عنه و الوصفه اللي بعطيها كلها راح تكون بالشكولاته الغامقة .

الشي المهم اللي لازم تعرفونه هنا هو إن جودة الشكولاته هي المحدد لجودة الجاناش . مافيه أي قناع ممكن نتخفى وراه هنا، لو الشكولاته ما تعجبنا لو أكلناها لحالها لا نسوي منها جاناش ماراح يكون لذيذ لو نسوي اللي نسويه . لو الشكولاته موب ناعمه الجاناش راح يكون خشن لو الشكولاته حامضه أو مره أكثر من اللازم الجاناش راح يكون كذا بعد . عشان كذا هذي وحده من الحالات اللي أستخدموا فيها أحسن شكولاته ممكنة . اللي ما يعرف وشلون يختار أحسن شكولاته يقرأ موضوع الشكولاته .


* الكريمة ( قشطة الخفق whipping cream ) : بعد زي الشكولاته الجوده مهمه هنا . لو الكريمة طعمها جيد الجاناش بيكون أطعم و ألذ . أفضل كريمة هي النوعية اللي تكون قصيرة الأجل . أبعدوا عن الكريمه النباتيه هنا !! . اللي يبي يعرف أكثر عن الأنواع حقت الكريمة يقرأ هنا .  الدهن اللي في الكريمة يعطي الجاناش نعومة إضافيه ولمعة و بروتين الحليب يساعد إنه يمسك الخليط مع بعض . الدريم ويب موب كريمة ! الدريم ويب مركب صناعي ما ينفع هنا …


* الزبدة : الزبدة مكون إختياري . الزبدة تعطي لمعة حلوه للجاناش وبتعطي طعم زبدة لذيذ وبتخلي الجاناش أنعم . الزبدة المستخدمه ( وكل الإضافات عموما ) لازم تكون على حرارة الغرفه عشان تذوب بسهولة .


* شراب الذرة corn syrup : بعد مكون إختياري . شراب الذرة يعطي حلاوة ( في حال أحتاج الجاناش ) بدون أي نكهة خاصة فيه ، الحلو فيه هو إنه سايل يعني ما يحتاج إنه يذوب وسهل ينخلط مع الخليط . أغلب الوصفات اللي تستخدم شراب الذرة تستخدمه لأنه يعطي لمعة قويه للجاناش . شراب الذرة بعد بيحفظ الجاناش ولو بشكل بسيط وبيخليه لين أكثر حتى في الثلاجه . الكمية المستخدمه تكون بشكل جدا بسيط في الغالب بس عشان تعطي اللمعة المطلوبه .


* إضافات ثانيه : السكر بأشكاله سواء سايل أو جامد مثل الجلوكوز أو العسل أو الميبل سيرب هذي كلها ممكن تستخدم كتحليه للجاناش . الدهون مثل الزيت بعد ممكن تستخدم ولو إن الزبده هي المستخدمه في الغالب . إضافات ثانيه ممكن تكون عشان تغيير النكهة مثل خلاصات الفانيلا أو اللوز أو البندق أو البرتقال أو النعناع أو أي نكهة ثانية عموما ممكن تستخدم . البهارات و الأعشاب ممكن تستخدم ، بهارات مثل الزنجبيل أو القرفة أو غيرة و أعشاب مثل اللافندر و النعناع مثلا . المربيات و عصيرات الفواكه مثل مربى التوت مثلا أو البرتقال ممكن تستخدم بعد . المكسرات بعد ممكن تستخدم في الجاناش عشان تعطي طعم مكسرات لها أو حتى ممكن تكون على شكل قطع داخل الجاناش . محسنات النكهات مثل الملح ممكن إضافاتها .  أهم شي في الإضافات هذي كلها هو إنها تكون على حرارة الغرفة.


أنواع الجاناش :


فيه شيين أساسيات نتحكم فيها بنوعية الجاناش وإستخدامه : نسبة المواد لبعض و حرارة الخليط . كل مازادت نسبة الشكولاته للكريمة نتج عندنا جاناش ناشف أكثر وكل ما قلت كل ما صار عندنا جاناش لين وكريمي أكثر . الجاناش وهو حار بيكون سايل وسهل ينصب وكل ما يبرد بيبدأ يجمد أكثر و أكثر .


* الجاناش الثقيل : نستخدم هنا ٣ أجزاء شكولاته غامقة ( بالوزن ) لكل جزأ كريمة ( بعد بالوزن ) . يعني لو أستخدمنا ١٠٠ جم كريمة نحط ٣٠٠ جرام شكولاته . هذا الجاناش هو المستخدم إذا جينا نسوي جليز أو طلاء .

* الجاناش الوسط : نستخدم هنا جزئين شكولاته غامقة ( بالوزن ) لكل جزأ كريمة ( بعد بالوزن ) . يعني لو أستخدمنا ١٠٠ جم كريمة نستخدم ٢٠٠ جم شكولاته . هذا الجاناش ممتاز كحشوة ثقيلة لترفل مثلا أو كيك أو ماكرون  أو تارت مثلا .


* الجاناش الخفيف : هنا نستخدم جزأ شكولاته غامقة ( بالوزن ) لكل جزأ كريمة ( بعد بالوزن ) . هذا الجاناش بيعطينا حشوة خفيفه ممتازه لشي زي الإكلير أو الماكرون مثلا . هذا الجاناش بعد بيعطينا تغطيه ممتازة للكيك أو أستخدموه وهو حار كصوص شكولاته لذيذ أو نافورة شكولاته أو فوندو .خلوه يبرد شوي و تقدرون تسوون فيه ديكورات للكيك وغيره بإستخدام قوالب أو كيس حلويات وراس .


* الجاناش المخفوق : مافيه شي جديد هذا جاناش خفيف بس متروك على حرارة الغرفه إلين يبرد تماما بعدين ينخفق بخلاط يدوي أو خفاقة يدويه عاديه عشان ينفش شوي . هذا بعد ممكن يستخدم كتغطيه أو حشوة خصوصا للكيكات الخفيفه مثل السويسرول مثلا .


أنواع الجاناش هذي عبارة عن خطوط عامة بس . مثلا مين قال إني ما أقدر أسوي حشوة بإستخدام ١٠٠ جم كريمة و ١٥٠ جم شكولاته ؟ .


شي ثاني لاحظوا إني قلت في كل الحالات هذي شكولاتة غامقة ! . هذي النسب للشكولاته الغامقة بس لو أستخدمتوا هذي النسب لشكولاته بيضاء أو شكولاته بالحليب النتيجة ماراح تكون نفس الشي . مثلا لو كنتوا تبون جاناش وسط وحطيتوا جزئين شكولاته بيضاء مع جزأ كريمة الناتج هنا جاناش خفيف موب وسط ! هذي يمكن تسبب مشاكل . عشان كذا في حالة الشكولاته البيضاء و الشكولاته بالحليب دايما زيدوا كمية الشكولاته للكريمة . مثلا بدال ٣ أجزاء شكولاته غامقة لجزأ كريمة عشان جاناش ثقيل أستخدموا ٥ أجزاء شكولاته بيضاء و ٤ أجزاء شكولته بالحليب .. وزي كذا ….


الطريقة

مهما كان نوع الجاناش المستخدم أو الإضافات اللي معه كلهم سووا نفس الطريقة بالضبط .

١ـ نقطع الشكولاته قطع صغيرة . مهم إن الشكولاته ما تكون قطع كبار عشان ما تتعبنا بعدين في الذوبان . أفضل طريقة لتقطيع الشكولاته هو إستخدام سكين خبز ولوح تقطيع كبير . نحط القطع في صحن قزاز أو ستانلس ( بعدوا عن الألمنيوم يعطي طعم ولون للأكل ) .

٢ـ نسخن الكريمة  في قدر صغير مع التحلية المستخدمه سواء كانت سكر أو شراب ذرة أو غيره ( طبعا لو كنا نستخدم موب شرط ) إلين توصل غليه قويه بعدين نطفي النار .

٣ ـ نصب الكريمة على الجاناش ونخليها دقيقتين بعدين نضيف الزبده ( لو كنا بنستخدم ) و نبدأ نحرك الخليط بملعقة شوي شوي إلين ما يتحول لخليط متجانس بدون أي قطع لا تخلطون أكثر من اللازم ! . مكن نستخدم خفاقة بيض للخلط أهم شي أنتبهوا تخلطون بقوه و تدخلون هواء للخليط . عند هذي النقطة نضيف النكهات الثانيه لو كنا بنستخدم .

ganache
ganache

جاناش خفيف

جاناش

 


 

 

تعديل النكهة

الشكولاته مكون يمشي مع نكهات كثير وعشان كذا حلو إننا نقدر نسوي جاناش بنكهات مختلف عشان يمشي مع النكهات اللي إحنا نقدم الجاناش معها .

طريقة تطعيم الجاناش  بنكهة معينة تكون بإحدى طريقتين :

١ ـ إما إننا نضيفه بشكل مباشر للخليط . خلاصات النكهة ( الفانيلا ، اللوز ، البندق ، البرتقال ، النعناع … إلخ ) ، البهارات ، المربيات و العصيرات هذي أمثله لهذي المواد . هنا  لازم تكون على حرار الغرفة عشان ما يجمد الجاناش ويتكسر عليكم .نضيفه آخر شي ونحرك إلين يتمازج كل شي .

٢ ـ نطعم الكريمة بنكهة معينة ونسوي جاناش بهذي الكريمةالمطعمه . نطعم الكريمة بإننا نخليها تغلي مع الشي المطلوب بعدين نطفي النار ونخليها تتطعم فترة ( كل ماطالت أحسن ) . الفانيلا الأعواد ، قشور الحمضيات ( برتقال ، ليمون … إلخ ) ، الأعشاب ( النعناع ، اللافندر كمثال ) ، المكسرات بأنواعها ( لوز ، جوز ، صنوبر … ) ، جوز الهند . بعد ما تتطعم الماده نصفي الكريمة ( لو حبينا طبعا إلا إذا نبيها بقطع ) بعدين نرجع نسوي جاناش عادي زي اللي بدون نكهة .

كمية الإضافات هذي تعتمد على الطعم المطلوب منها . أفضل حل هو إننا نذوق ونشوف هل الطعم قوي بشكل كافي ولا نبغاه أقوى .

المشاكل و الحلول

مع إن الجاناش سهل إلا إن المشاكل ممكنه .

 

١ ـ جاناش محبب : إما إن الشكولاته نوعيتها سيئة أو خلط سريع أكثر من اللازم . الحل : صفوا الخليط بعدين أخلطوا شوي شوي و إذا ما ضبط ماله حل .

 

٢ ـ جاناش جامد من الثلاجه أو الجلوس لوقت طويل : هذا شي طبيعي الحل هنا هو إنكم تحطون الصحن فوق صحن فيه مويه حاره شوي وتحركون شوي شوي عشان ما تدخلون هواء .

 

٣ ـ جاناش فصل ( يعني الدهن و الشكولاته مفصولين عن بعض ) : في الغالب السبب هو الإستعجال في الخلط . الدهن هنا ماراح يكون المستحلب وراح يكون طبقة على وجه الخليط . الحل تضيفون شوي كريمة باردة وتخلطون .

 

٤ـ جاناش ما يجمد : في حالة كانت النسب مضبوطه يكون السبب في الغالب إن الكريمة ما وصلت غليه .

 

٥ـ قطع شكولاته ماذابت : السبب في الغالب هو إن الشكولاته حجمها كبير . حطوا الخليط في حمام مائي إلين تذوب الشكولاته أو أستخدموا خلاط مولينكس .

الحفظ

الجاناش ينحفظ على حرارة الغرفة ( شرط تكون الغرفة باردة ) يومين تقريبا . حطوا طبقة نايلون على الوجه عشان ما يكون قشرة . الكيك اللي يتزين بالجاناش ممكن ينحط على حرارة الغرفة يومين بعد بدون أي ضرر ( بشرط الكيكه تكون تنفع تتخزن برا الثلاجه طبعا ) .

 

أطول من يومين حطوه في الثلاجه إلى أسبوع تقريبا أو ثلاث شهور في الفريزر . طلعوه من الفريزر وحطوه في حمام مائي وسخنوه إلين يرجع سايل بس .

 

الشكولاته .. Chocolate

هلا والله ….

اليوم راح أتكلم عن الشكولاته كمكون . الشكولاته مكون مستخدم وبكثرة في الطبخ ، سواء كان في الموالح أو الحلويات .  مهم إن الواحد يعرف يختار الشكولاته المناسبه وبعد مهم إنه يعرف يختار وحده من نوعية جيده . راح أشرح هنا وش الأنواع وراح أشرح بعد كيف تختلف الجوده من ماركه لماركه . إختيار نوعية شكولاته جيده أحيانا هو الفرق بين ترفل شكولاته ممتاز وترفل عادي أو كيكيه رهيبه وكيكية عاديه .

الشكولاته في الأساس كانت عبارة عن شراب يستخدمونه سكان الأزتك في أمريكا الجنوبيه . كانوا أول من خمر الحبوب و طحنها إلين حولها لشراب مر . إسمه الشكولاته في لغتهم يعني المويه المره . من هنا أخذوا الشراب الأسبان ونشروه في أوروبا .

شكولاته


التصنيع



الشكولاته مصنوعه من بذور شجرة الكاكو  هذي البذور تجي على شكل فصوص بيضاء داخل ثمرة كاكاو . البذور لحالها في حالتها النيه تكون حامضة ومره ومالها أي طعم قريب من الشكولاته اللي نعرفها . في ٣ أنواع من أشجار الكاكاو تختلف في الجوده و طبعا في السعر هذا واحد من العوامل الأساسية اللي تحدد طعم الشكولاته .

 


 

هذي البذور بعدين لازم تتخمر . التخمير هو أول خطوة لتكوين طعم الشكولاته اللي نعرفه . التخمير لازم يتم بشكل دقيق بحيث الشكولاته ما تتخمر أكثر أو أقل من اللازم كونه راح يأثر في المنتج النهائي بشكل كبير .

 

بعد التخمير البذور تتجفف سواء في الشمس أو في نشافات ميكنايكية وبعدها تنغسل و تتعبى في أكياس وتنشحن . الحين هنا يجي دور المصنع حق الشكولاته .


في المصنع يحمصون البذور حقت الكاكاو لدرجة معينة عشان تعطي الشكولاته طعمها المعروف ( زي القهوة ) التحميص عملية جدا معقده وكيفية التحميص ولأي درجة تفرق كثير في الشكولاته . بعد التحميص البذور هذي تتقشر بعدين تنطحن وينتج عندنا مادة يسمونها شراب الشكولاته cocoa liquor . هذا الشراب أسود وثقيل ومر وخشن .

 


 

شراب الشكولاته هذا ينضغط بمكاين خاصه إلين تفصل مكوناته إلى كاكاو صافي ( اللي هو الشكولاته البودرة ) و منتج غاااالي اللي هو زبدة الكاكاو .

 

 

الحين إلى هنا كل أنواع الشكولاته وحده . بعد ما تنفصل مكونات الشكولاته يبدأ المصنع يرجع هذي المكونات( الكاكو البودرة و زبدة الكاكاو )  مع بعض بنسب مختلفه عشان يكون أنواع الشكولاته كلها طبعا مع إضافات ثانيه مثل السكر و الفانيلا .

 

بعدين تجي مرحلة التنعيم اللي هي إنهم يحطون الخليط هذا في مكاين خاصه وتتنعم الشكولاته فيها عشان تصير ناعمه و تطلع نكهتها الكاملة . التنعيم خطوة ممكن تاخذ من ٣ ساعات إلى ٣ أيام حسب جودة الشكولاته . المصانع الجيده بتخليها وقت أطول وبكذا شكولاته أطعم و أنعم .. المصانع الرخيصة عشان يوفرون يخلونها وقت أقل .

 

بعد التنعيم الشكولاته تتسخن وبعدين تتبرد لحرارات محدده tempring ( عشان تجمد وعشان تصير تلمع إذا بردت ) وبعدين تنصب في قوالب وتبرد وتباع .

 

كل خطوة في هذي العملية لها علاقة قويه بجودة الشكولاته الأخيرة وكل خطوة عشان تتم بشكل جيد تحتاج مواد أو وقت أو مكاين وهذي كلها تكلف وعشان كذا الجوده تختلف من جلكسي بريالين مثلا للندت ب ٥ ريال .

 

الأنواع


الشكولاته تجي بصور و أشكال ونكهات كثيرة ومهم الواحد يعرف وش مكونات كل نوع وكيف يفرق عن الثاني وكيف الوصفه اللي تطلب نوع راح تختلف لو تبدل بنوع ثاني .

 

١ـ الشكولاته المره  unsweetened chocolate , bitter chocolate . هذي الشكولاته مافيها سكر . نسبة الكاكو فيها ٩٩٪ تقريبا وعشان كذا طعمها شكولاته قوي ومره و صعب تنوكل لحالها . هذي الشكولاته تستخدم في وصفات أحيانا مع مواد ثانيه زي السكر مثلا و نكهات إضافيه عشان تعطي طعم شكولاته قوي . هذي بعد نوع الشكولاته اللي في الغالب مستخدم للوصفات المالحة . الشكولاته تستخدم في الصوصات أحيانا وفيه أمثلة مشهورة مثل الستيك بصوص الشكولاته مثلا أو بعد أشهر مثال صوص المولي المكسيكي اللي يستخدم فيه شكولاته عشان يتثقل .

 

٢ـ الشكولاته الغامقة dark chocolate . الشكولاته الغامقة هي شكولاته مره بس مع إضافات . الإضافات اللي في الغالب تنحط عليها هي ( سكر ، زبده كاكاو إضافيه غير اللي أصلا موجود في شراب الشكولاته عشان تعطيها نعومه أكثر ، فانيلا ، و ليسثين ( مادة مستحلبة طبيعيه ) ) . نسبة الكاكو هنا هي اللي تحدد قوة الشكولاته وغالبا مكتوبه النسبة على العلبة من قدام أو ورا عند المكونات . كل ماكانت النسبة أعلى كل ماكان طعم الشكولاته أقوى وكل ماكانت الشكولاته مره أكثر . يعني الشكولاته اللي مكتوب عليها ٨٠ ٪ هذي مره أكثر و طعم الكاكاو فيها أقوى من اللي مكتوب عليها ٧٠ ٪ . الشكولاته الغامقة نسبة الكاكو فيها تتراوح من ٥٥-٨٥ في الميه أي شي في هذا النطاق يسمى شكولاته غامقة.

الشكولاته الغامقة هي أكثر شكولاته تستخدم في الحلويات كونها تذوب بنعومه وبنفس الوقت تعطي طعم ممتاز للأكل اللي تنخلط معه .

اللي يقرأ وصفات أمريكيه أحيانا بيلاقي أسماء زي bittersweet chocolate أو شكولاته حلوه ومره أو semisweet chocolate أو شكولاته شبه حلوه . هذي كلها أسماء للشكولاته الغامقه الفرق هو إن الأمريكان من زمان ما يعرفون نظام النسب حق الشكولاته وعشان كذا يستخدمون هذي التسميات للوصف . عموما الشكولاته الشبه حلوه تكون من ٥٥ – ٧٠ في الميه . و الشكولاته الحلوه و المره تكون من ٧٠ – ٨٠ في الميه .

 

٣ـ الشكولاته بالحليب milk chocolate . الشكولاته بالحليب أشهر شكولاته أكل ، بس إستخدامها في الوصفات أقل بكثير كون طعمها يضيع إذا أنخلط مع نكهات ثانيه أقوى . هذي الشكولاته زي ما هو باين من الإسم عباره عن شكولاته غامقة في الأساس بس مع حليب بدال جزأ من الكاكو . نسبة الكاكو هنا تتراوح من ٣٠ – ٤٠ في الميه . الحليب يعطي هذي الشكولاته طعم أهدأ و نعومه وليونه أكثر .

 

٤ـ الشكولاته البيضاء white chocolate . هذي الشكولاته موب شكولاته من الأساس ولا تصنف كشكولاته لأن مافيها أي كاكاو . الشكولاته البيضاء مصنوعه من سكر و فانيلا وليسيثن و زبدة كاكاو و حليب بس بدون أي كاكاو . الشكولاته البيضاء لونها تقريبا عاجي يميل للصفرة لو كانت بيضاء فأعرفوا إن مافيها في الغالب زبده كاكاو .

 

٥ـ شكولاته التغطيه ( الكوفرتشر ) couverture chocolate . الكوفرتشر هو إسم ينعطى لأي نوع شكولاته من اللي فوق إذا كان فيه نسبة زبدة كاكاو أكثر من ٣٢٪ . زبده الكاكو تعطي هذي الشكولاته لمعه خاصه و تخليها أنعم بكثير وعشان كذا هي تستخدم في الغالب كتغطيه أو طبقه أولى . هذي الشكولاته هي أغلى أنواع الشكولاته وتستخدم في الغالب بس في محلات الحلويات . هذي الشكولاته ما ينفع تتبدل بالأنواع الثانيه في كل التطبيقات كون الزبده الزياده ممكن تخرب الوصفات أحيانا .

 

٦ـ بودرة الكاكو الطبيعيه natural cocoa powder . زي ماقلت فوق الشكولاته بعد ما تنطحن تتحول لشراب شكولاته اللي يستخرج منه زبدة كاكاو و كاكاو صافي . الكاكاو الصافي هو بودرة الشكولاته . هذي البودرة في حالتها الأصلية لونها أحمر على بني ( موب أسود ) وطعمها طعم شكولاته قوي جدا و جدا حامضه . هذي الشكولاته صعب أكلها لحالها.هذي البودرة هي اللي تعطي كيكة الريد فيلفيت ( الأصلية ) طعمها ولونها الأحمر موب الصبغه الحمراء اللي مستخدمه الحين .

 

7ـ بودرة الكاكو المعالجة ( الهولنديه ) dutched cocoa powder . يمكن الإسم غريب بس هذي هي بودرة الكاكو اللي تقريبا كل الناس يعرفونها . إذا أخذنا بودرة الكاكاو الطبيعيه وعالجنا البذور بمادة قاعدية ( يعني عكس حمضية  مثلا بيكنج صودا ) بعدين سوينا منها بودرة كاكاو ينتج عندنا هذا المنتج . الماده القاعدية راح تعادل الحموضة حقت الكاكو وتهدي طعمها وبعد راح تقلب اللون أسود غامق .

 


 

٨ـ زبدة الكاكاو cocoa butter . هذا المنتج ينباع لحاله أحيانا ولو إنه شوي غالي وصعب تلاقونه . عموما له إستخدام في الحلويات ( وبعد في غير الحلويات ) .

 


 

إختيار الشكولاته


أغلب الناس إذا راح السوبرماركت يحتار إذا شاف أنواع الشكولاته الكثيره دايما فيه سؤال وش أحسن واحد ؟ وفي إيش تفرق ؟ وليش هذي أغلى من هذي ؟ . عشان نعرف نجاوب على هذي الأسئلة لازم نعرف وش الصفات اللي نبغاها في الشكولاته .


الشكولاته الممتازه لذيذة وتنوكل لحالها هذا أول شي . إذا طعمها سيء لا تتوقعون إن الأكل اللي بتسوونه منها بيطلع جيد سواء كان كيكه أو سوفليه أو جاناش أو غيره مافيه شي ممكن يحسن طعم شكولاته سيئة .الطعم راح يختلف من ماركه لماركه لأن كل ماركه تستخدم خلطة غير وكل ماركه تستخدم بذور كاكاو من مناطق مختلفه ( بالضبط زي القهوة ) . الطعم راح يكون فيه حموضه ، مراراه ، وحلاوه و النكهة تكون نكهة شكولاته واضحة . الطعم مفروض يكون متوازن يعني ما تكون حامضة أكثر من اللازم أو مره أكثر من اللازم .


الشي الثاني هو الذوبان . الشكولاته الجيده تذوب على حرارة الجسم ( كون زبدة الكاكو تذوب على حرارة الجسم تقريبا ) . الشكولاتات الأقل يخلطون معها دهون ثانيه وهذي الدهون تذوب على حراراة أعلى وعشان كذا ماراح تذوب بسهولة في الفم وراح تعطي طعم شمعي على اللسان . حطوا قطعة من الشكولاته على اللسان بدون أي تحريك وشوفوا كيف تذوب . المفروض إنها تذوب بنعومه وتكون كريمية .


الشي الثالث هو النعومه . الشكولاته الجيده ناعمه على اللسان إذا ذابت . خلوا الشكولاته تذوب لحالها على اللسان بعدين شوفوا القوام حقها هل فيه حبوب صغيره ؟ ولا ناعمه ؟


الشي الرابع هو الريحة . الشكولاته لها ريحة مميزه . بعض الأنواع تكون الريحة هذي مكتومه عشان مشاكل التصنيع وبعضها تكون الريحة كريهة عشان الدهون اللي فيها بدت تحمض .


الشي الخامس هو الشكل و الصوت . شكل الشكولاته مفروض يكون ناعم وعليه لمعه . اللون مفروض يكون متساوي في كل مكان بدون أي خطوط رماديه أو مناطق فاتحة . إذا لقيتوا أي شي غير كذا هذا دليل إن الشكولاته ما أنحفظت صح . إذا كسرتوا الشكولاته مفروض تنكسر بصوت واضح وخصوصا في الشكولاته الغامقة . الشكولاته بالحليب و البيضاء مالها صوت قوي إذا أنكسرت .


آخر شي اللي هو الطعم الأخير أو الطعم الباقي بعد ما تنوكل الشكولاته aftertaste . الطعم الباقي على اللسان مفروض ما يكون محروق أو مر .


إنتاج الشكولاته الممتازه عملية مكلفه زي ما شفتوا في خطوات التصنيع . عشان الطلب عالي على الشكولاته كثير مصانع لازم تقلل تكلفتها عشان تقدر تبيع . عملية تقليل التكلفه هي المرحلة اللي تبدأ جوده الشكولاته عندها تخرب . بدال ما يستخدمون أنواع البذور الجيده يبدون يستخدمون حبوب أرخص شوي من مزارع كبيره تنتج بوفره بس بدون جوده . بدال ما تتحمص الشكولاته على حرارات هاديه لوقت طويل يستخدمون حرارات عاليه لوقت قصير وبكذا يقللون التكلفه . بدال ما يستخدمون زبدة كاكاو في الشكولاته بعضهم يستخدمون دهون مهدرجة عشان يقلل التكلفه أو يستخدم زبده كاكاو بس بكميات جدا بسيطة . بعض الشركات بدال ما تستخدم شراب شكولاته يستخدمون بودره كاكاو بس ! . بدال ما يستخدمون فانيلا طبيعيه يستخدمون فانيلا صناعيه . بدال ما ينعمون الشكولاته وقت طويل يكتفون بساعات قليلة بس ، عشان التكلفه . آخر شي عشان يغطون على كل هذا الموضوع وما يحسون الناس بهذي التغييرات يبدون يضيفون محسنات نكهة ومثبتات و نكهات صناعية ويزيدون كمية السكر .


طيب وش أول خطوة عشان نعرف الشكولاته الجيده ؟ أسهل خطوه عشان تعرفون الشكولاته الجيده هو ببساطة إنكم تشوفون الغلاف و تشوفون المكونات ووش مكتوب فيها . الغلاف في الغالب مكتوب عليه نوع الشكولاته مثلا شكولاته غامقه أو حتى نسبة الكاكاو بس . بعض الماركات اللي جدا ممتازه راح تكتب نسبة زبدة الكاكو وبخط واضح على الغلاف وبكل فخر دلالة إنهم مستخدمين كمية كبيره .بعض الأنواع راح تلاقون مكتوب عليها إسم دولة أو منطقة دلالة إن الشكولاته المستخدمه بس من هذي المنطقة .


نجي للمكونات وكيف تعرفون الشكولاته الجيده منها . الشكولاتات الجيده ماصار فيها لعب كثير وعشان كذا المكونات راح تكون قصيرة ومختصره وكلها مكونات واضحة ومعروفه وكلها تقريبا شرحتها فوق . ماراح تلاقون مثلا ثنائي صوديم البنزين أو مثلا e333 , e434 وهذي الخرابيط . كل المواد مواد معروفه وطبيعيه . دايما في كتابة المكونات مطلوب من الشركات يكتبونها من الأكثر للأقل يعني إذا لقيتوا مثلا أول شي سكر فهذا معناه إن الشكولاته أكثر مكون فيها السكر بعدين المواد الثانيه وكذا .أبعدوا عن الشكولاتات اللي تستخدم أشياء زي “زيت نباتي مهدرج أو شبه مهدرج” أو مواد غريبه عموما .


١ ـ الشكولاته الغامقة : أول مكون مكتوب هنا في الغالب يا كاكاو ، كتلة كاكاو ، شراب كاكاو ، أو بذور كاكاو, cocoa , cocoa mass , cocoa liquor , cocoa beans . لو كان أول شي بودرة كاكاو cocoa powder أبعدوا عن هذا المنتج . بعد الكاكاو بيجي السكر في الغالب وبعد السكر زبدة كاكاو . بعد زبدة الكاكو يجي الفانيلا و الليسثن ، لو كان مكتوب فانيلا طبيعيه هذا أفضل من لو أنكتب نكهة فانيلا بس . الليسثن هذي ماده مستحلبه مستخرجه من البيض أو الصويا . فايدتها هي إنها تذوب الشكولاته في زبدة الكاكو يعني تسوي مستحلب .


٢ـ الشكولاته بالحليب : في الغالب هنا أكثر شي السكر و الحليب وبعدين الكاكاو و زبدة الكاكاو . غالبا المكونات تبدأ بسكر بعدين ، حليب أو بودرة حليب ، وبعدين كاكاو أو كتلة كاكاو أو بذور كاكاو أو شراب كاكاو وبعدين زبد الكاكو و بعدين الفانيلا و الليسثن .


٣ ـ الشكولاته البيضاء : هنا المكونات تبدأ بسكر ، حليب أو بودرة حليب ، زبدة كاكاو ، فانيلا وليسثين .


كل شخص غير وكل واحد له ذوق مختلف في الشكولاته زي القهوة بالضبط . لحد يجي يسألني وش النوع اللي أنا أستخدم لأن هذا ماراح ينفعكم بشي لو كان النوع اللي أستخدمه ما يعجبكم . روحوا السوبرماركت ودوروا في الأنواع وراح تلاقون أنواع كثير ينطبق عليها الشروط اللي حطيت هنا بعدين ذوقوا هذي الأنواع وشوفوا وش النوع اللي يعجبكم أكثر . اللي يشرون من النت يقدرون يطلبون أنواع من النت بكميات كبيره و أسعار جدا ممتازه ( شخصيا أشتري من النت ) بتلاقون الشراء من النت فيه تنوع أكبر و أرخص بكثير لو شريتوا بكميات كبيره . كثير ناس يتخوفون من التجريب مع العلم إنها شكولاته بس ؟ وين الضرر ؟ وش أسوأ شي ممكن يصير ؟ شكولاته !! . نقطة ثانيه أكرهها هي إستخدام الشكولاته الخام ! كيف تستخدمون شكولاته ما تنوكل في الطبخ ؟ كثير ناس يقرون الإسم ويحسبونها شكولاته حقت محترفين لمجرد إن تغليفها بسيط ومكتوب عليها “خام” ! إذا الشكولاته ما تنوكل لا تستخدمونها … خذوا طله على المكونات حقت الشكولاته الخام قبل تشرونها وبتفهمون هي مصنوعه من إيش …



الحفظ و التخزين


الشكولاته مكون حساس للحرارة و الرطوبه . الشكولاته لو أنحفظت بشكل جيد راح تعيش حوالي سنة . أفضل بيئة للحفظ هو مكان شوي بارد وجاف بعيد عن النور و الحرارة و الروائح القويه . لو كانت الشكولاته مفتوحه من العلبه حقتها غلفوها زين بقصديروبعدين أحفظوها في دولاب مطبخ مثلا بشرط إن المطبخ ما يكون حار أكثر من اللازم . بهذي الطريقة الشكولاته ممتازه للأكل و الطبخ في أي وقت . لو المكان كان شوي حار الشكولاته راح يتغير لونها وتقلب أفتح شوي ويمكن تكون طبقة سكر خفيفه على الوجه أو خطوط بيضاء . هذي الخطوط ماراح تأثر في طعم الشكولاته لو كانت راح تذوب بس للأكل الطعم و القوام راح يتغير بشكل كبير .


خيار ثاني هو الفريزر بإنكم تغلفون الشكولاته زين وتحطونها في علبه تتقفل بإحكام وبعدين تفرزونها . إذا جيتوا تستخدمون الشكولاته طلعوها قبلها بفترة وخلوها في العلبه على حرارة الغرفه قبل ما تفتحونها . الشكولاته في الفريزر في الغالب راح تكون خطوط بيضاء وعشان كذا هي جيده للطبخ بس . لو طلعتوا الشكولاته من الفريزر بدون ما تخلونها توصل حراراة الغرفه داخل العلبه هذا ممكن يكون ندى على الشكولاته و إذا جيتوا تذوبون الشكولاته راح تجمد عليكم ( نقطة مويه وحده بس كافيه إنها تخلي الشكولاته تجمد إذا ذوبتوها ) . عشان كذا لا تهملون هذي النقطه .


الماكرون ( الماكرون الفرنسي ) …. French macaron

هلا والله …..

الماكرون الفرنسي هو المحطة الأخيره في مواضيع الماكرون اللي نزلتها الفترة اللي راحت . هذا الحلى ما أنتشر حولين العالم وصارت الصجه و اللجه عليه إلا قريب ، ما أتكلم عن الإنتشار في السعوديه بس أنا أتكلم عن الإنتشار العالمي . من زمان كان الماكرون معروف بس في فرنسا تقريبا وفيه بعض المحلات اللي تسويه برا فرنسا . بس مع الوقت بدأ ينتشر في كل أنحاء العالم وبشكل سريع بعد .هذا فتح مجال كبير للإبتكار وصرنا نشوف نكهات جديده وغير مألوفه .


الوصف و التركيب


الماكرون عبارة عن كوكيز بياض بيض قريب جدا للماكروون الأمريكي . كل حبتين كوكيز في الغالب ملصقة بحشوة عشان تكون الماكرون اللي نعرفه .

الماكرون مفروض يكون لذيذ ( يعني مافيه ريحة أو طعم غريبة ) ولين ويتكسر و يذوب في الفم من أول قضمة بدون ما تواجهون أي صعوبه من إنه يكون ناشف أكثر من اللازم أو يكون لين بحيث الحشوه تطيح و أنتم ماسكينة .

ماكارون

هذا شكل الكوكيز حق الماكرون . نلاحظ هنا إن القبة ناعمة ومتماسكة بدون أي تشققات . نلاحظ بعد شي مهم جدا اللي هو الرجول أو الياقة حقت الماكرون . الحجم أو قطر الحبة يتراوح حسب الرغبة بعض الماكرون يكون كبار مره وبعضة يكون صغير مره ينوكل مرة وحدة . شي مهم بعد هو إن الكوكيز ما يكون فيه فراغ هواء كبير تحت القشرة . الماكرون موب صعب أبدا بس هو موب واحد من الأشياء المتسامحة مرة في الأخطاء في التفيذ .



المكونات و الأدوات


الماكرون الفرنسي يتكون من بياض بيض ، دقيق لوز ، سكر مطحون وسكر عادي . هذا في الأساس طبعا بس ألوان الأكل و إضافات لتغيير أو تعديل النكهة بعد ممكنة . طريقة العمل بإختصار شديد هي إننا راح نسوي مرانج عادي ببياض البيض و السكر العادي وبعدين نخلط عليهم اللوز و السكر المطحون عشان نكون الخليط .

* البيض :

في الماكرون راح نستخدم بس بياض البيض . البياض هنا راح نسوي منه مرانج فرنسي أو إيطالي عشان يوفر الرفع للماكرون حقنا . عشان كذا مهم إننا نسوي أفضل و أقوى مرانج نقدر عليه .
البيض المستخدم دايما يكون على حرارة الغرفة ومخفوق بنفس الشروط اللي حطيت في موضوع المرانج الفرنسي . طريقة الماكرون بالمرانج الإيطالي تستخدم أحيانا ومفضلة من طباخين كثير كون المرانج الإيطالي ثابت أكثر و راح يستحمل أكثر و هذا يعني فرص نجاح أكبر للماكرون . بالنسبة للطعم المرانج الإيطالي و الفرنسي واحد . طريقة الماكرون بالمرانج الإيطالي هي المفضلة بعد في الحالات اللي يكون الجو رطب فيها كون المرانج الفرنسي يتأثر بقوة بالرطوبة حقت الجو .
لو كان الوقت موب مشكلة وراح تسوون الماكرون بمرانج فرنسي يفضل إنكم تتركون البياض بعد ما توزنونه على حرارة الغرفة ٢٤ ساعة . هذا راح يعطي تأمين للماكرون حقكم شوي ، البيض وهو قاعد راح يتبخر جزأ من المويه اللي فيه وهذا يعني مرانج ثابت أكثر . هو موب شرط أساسي للنجاح بس حلو الواحد ياخذ تأمين .

* اللوز :

اللوز هو النكهة الأساسية للماكرون الفرنسي . اللوز المستخدم هو اللوز المطحون الناعم . نعومة اللوز هي اللي راح تخلي القبة حقت الماكرون ناعمة بدال ما تكون خشنة . لو كان اللوز فيه قطع كبيره يمكن تمنع المرانج ينفش ويرفع الماكرون .
أكثر الناس يسأل من وين أجيب اللوز ؟ اللوز المطحون متوفر ومنتشر في كل سوبرماركت أو محل مكسرات أهم شي تأكدوا إنكم تنخلون اللوز قبل الوزن . ممكن تبديل جزأ من اللوز بنوع مكسرات ثانيه مطحونة ( بيكان ، جوز ، صنوبر ، فستق ، كاجو ولو إنه صعب ، مكادميا … إلخ ) أو حتى بودرة كاكاو ( عشان تسوون ماكرون بالشكولاته ) أو جوز هند ( عشان تعطي طعم جوز هند للماكرون ) . في حالة التبديل مافيه قاعدة معينة جربوا بكمية وبعدين زيدوا أو نقصوا حسب النتيجة المطلوبة . أبدأوا مثلا بربع وزن اللوز وبعدين شوفوا النتيجة ، هل أثر التبديل على نفش الماكرون ؟ هل الطعم و اللون المرغوب من التبديل واضح ولا لأ ؟ إذا مثلا لقيتوا إن الماكرون ما نفش زين معناها إن التبديل يمكن أثر بالسلب نقصوا الكمية . لو لقيتوا إنه نفش بس مثلا مافيه طعم كاكاو واضح معناها إنه يمديكم تزيدون الكمية عشان تزيدون الطعم و اللون .
جودة اللوز و المواد المستخدمه عموما لها تأثير كبير على طعم الماكرون ، تذكروا إن هذا هو النكهة الأساسية له وهذا اللي بيعطيه كل الطعم عشان كذا تأكدوا إن اللوز المستخدم من نوعية جيده وإنه موب خربان . المكسرات عموما كونها مليانه دهون هذي الدهون تتفكك و تتأكسد وتعطي نكهات وروائح سيئة . الطحن يسرع هذي العملية عشان كذا لو كان عندكم لوز باقي ( أو أي مكسرات عموما ) أحفظواه في علبة تتقفل بإحكام على حرارة الغرفة في مكان بارد وجاف حوالي شهر أو في الثلاجه 3 شهور أو أفضل حل في الفريزر إلى سنة .
طحن اللوز في البيت ممكن و جربتها للماكرون ونفعت عادي بس هي عملية شوي متعبة وغير عملية أبدا . أسهل حل هو شراء اللوز مطحون جاهز . الميزة الوحيدة من طحن اللوز في البيت هي إنكم متأكدين من جودة اللوز . المشكلة في طحن المكسرات في البيت هو كمية الدهن العالية فيها . إذا طحنا المكسرات الخلاط يسخن المكسرات وهذا يطلع الدهن فيها ويخليها تتحول لمعجون بدال ما تتحول لبودرة . إذا وصلنا مرحلة المعجون خلاص مافيه رجعة .

هذي أفضل طريقة لطحن المكسرات في البيت :

١ـ إذا كانت المكسرات مقشرة روحوا للخطوة رقم ٣ علطول . لو كانت المكسرات المستخدمه عليها قشرها أول شي تسوونه هو إنك تحطونها في مويه مغليه حوالي ٣٠ ثانية بعدين علطول شيلوها من المويه وحطوها على فوطة مطبخ كبيرة وغطوها بنص الفوطة الثاني . الحين أفركوا المكسرات بالفوطه زيييين وراح تلاقون القشر طاح .

٢ـ شيلوا المكسرات من الفوطه على فوطة مطبخ ناشفة ثانيه . خلوها طول الليل تجف . بعدين ثاني يوم حطوها في فرن بارد حرارته ٢٠٠ فهرنهايت حوالي ١٠ دقايق عشان تنشف تماما . طلعوها من الفرن و الحين صار عندكم مكسرات مقشرة زي حقت السوبرماركت .

٣ـ الحين عشان الطحن . حطوا المكسرات في الفريزر عشان تبرد تماما . هذا راح يخلي المكسرات باردة إذا جينا نطحنها وهذا راح يعطينا شوي وقت في الطحن وهذا يعني بودرة أنعم .

٤ـ حطوا كمية بسيطة من المكسرات في طاحونة قهوة نظيفة . ممكن إستخدام جهاز تحضير طعام بس ماراح يعطي بودرة ناعمة زي طاحونة القهوة . حطوا مع المكسرات جزأ من السكر المطحون اللي راح نخلطة مع للماكرون . هذا راح يشرب جزأ من الرطوبة و الزيت اللي يطلع  وبكذا يأخر الطحن أكثر .

٥ـ أطحنوا على ضغطات سريعة يعني لا تخلون الطاحونة شغالة وخلاص . إلين يبدأ يكون بودرة ناعمه . طلعوا الخليط و أنخلوه . و القطع اللي ما تنطحن رجعوها للطاحونة مع شوي لوز زياده .

٦ـ أستمروا على هذي الطريقة إلين ينطحن كل اللوز .

في حال تحول اللوز لمعجون و أنتم تطحنون لا تشيلون هم ولا ترمونه هو صح ما ينفع للماكرون بس هو لذيييييييذ لإستخدامات ثانيه هذا المعجون هو زبدة مكسرات زي ما زبدة الفول السوداني أو البينت بتر مصنوعة من فول سوداني هذي نفس المنتج بس مصنوع من مكسرات ثانيه .

*السكر :

في الماكرون نستخدم في الغالب نوعين سكر . سكر مطحون وسكر خشن عادي .
السكر المطحون هو اللي راح يحلي الماكرون . غير كذا السكر المطحون مع التحريك بيسحب جزأ من الرطوبة حقت المرانج وهذا اللي بيخلي الخليط حق الماكرون سايل يعني هو السائل في الكوكيز هذا وعشان كذا الكميات المضبوطه مهمه . تأكدوا إنكم تنخلون السكر المطحون قبل الإستخدام و الوزن . تأكدوا بعد إن السكر المطحون نااااااااعم يعني بودرة لا يكون خشن ولا ممكن يخرب الماكرون عليكم .

السكر الخشن يستخدم بكمية بسيطة عشان يثبت المرانج بس ( راجعوا موضوع المرانج الفرنسي ) .

* الألوان :

الألوان هي اللي راح تعطي الماكرون الألوان اللي معروف فيها . في الغالب اللون له علاقة بالحشوة يعني ما أسوي ماكرون أزرق و أحشيه شكولاته مثلا .

ألوان الأكل عموما المطلوب منها تلون بشكل جيد بدون ما تأثر في الوصفه نفسها سواء من ناحية الطعم أو غيره . فيه ثلاث أنواع رئيسية للألوان :

١ـ ألوان سايلة : هذي أسهل نوع ينخلط مع الأكل يعني ما تحتاج خلط كثير عشان تلون الأكل وهذي ميزة طبعا . بس مشكلتها إنها ضعيفة يعني ما تصبغ بشكل جيد غير كذا كونها سايله هذا ممكن يسبب مشكلة في بعض الوصفات . الشي الثاني هو إن هذي الألوان أحيانا ينحط معها إضافات وبعض هذي الإضافات تتفاعل مع الأكل بشكل غير مرغوب ويعطي نتيجة مختلفة عن المطلوب . مثلا بعضها معها جلسرين و الجلسرين مع شي زي الرويال آيسنج مثلا يخليه لين بدال ما يكون يتكسر في الفم ( طبعا في حال كان هذا المطلوب أصلا ) . عشان كذا هو خيار سيء للألوان . غير كذا بعضها إذا ماكان كلها لها تاريخ إنتهاء ، صح إنها مووب صايرة مضره لو أستخدمت بعد هذا التاريخ بس ممكن يضعف لونها أكثر . عموما مع هذا إلا إني قد سويت ماكرون بهذا النوع من الصبغات وما أثر أبدا .

٢ـ ألوان جيل : هنا يكون اللون على شكل سايل ثقيل تقريبا زي ثقل العسل . هذي الصبغات ينطبق عليها كل شي ينطبق على السايلة سواء من ناحية الإجابيات أو السلبيات بس راح تصبغ بشكل أفضل من السايلة . هذي بعد ما أفضل إستخدامها .

٣ـ ألوان بودرة : هنا عندنا لون صافي بدون أي إضافات أو تاريخ إنتهاء . هذي راح تصبغ أفضل من غيرها وبنفس الوقت ماراح تغير نسب المواد لبعض زي السائلات . هذي هي الخيار الأفضل لألوان الأكل .

في حال عدم توفر اللون المطلوب من الألوان تقدرون دايما تخلطون عدة ألوان عشان تكونون اللون المطلوب .

النكهات :

ممكن خلط نكهات سواء سائلة أو جامدة مع الخليط حق الماكرون . ممكن مثلا خلط خلاصات الفانيلا أو القهوة أو الموز أو أي خلاصة ثانيه عشان تعطي طعم يمشي مع الحشوة اللي راح تنحشى بعدين . ممكن بعد إستخدام أشياء زي البهارات عشان تأدي نفس الغرض .

الشي الوحيد اللي لازم تنتبهون له هنا هو إن الكمية تكون جدا بسيطة بحيث ما تأثر على نسب المواد لبعض بشكل كبير ممكن يخرب الماكرون .


ميزان :

مهم جدا يكون عندكم ميزان إذا حبيتوا تسوون ماكرون . من الحين أقول مافيه بديل ، الميزان مطلوب هنا . موازيين المطبخ متوفرة في كل مكان متأكد إن أي محل أواني منزلية عنده ميزان و بعد أسعارها جدا رخصية . عموما موازيين الطبخ موب بس للماكرون الميزان هو أدق طريقة لقياس المواد الجافة . كوب طحين عن كوب طحين يختلف و الإختلاف بعد كبير بس كيلو طحين هو كيلو طحين .

الموازيين الديجيتال أسهل للإستخدام كونها توفر خصائص ثانيه مثل تصفير الوزن و تغيير الوحده من الموازيين الأمريكية ( الباوند و الأونصة ) إلى الموازيين المترية ( الكيلو ، الجرام ) . إستخدام ميزان الديجيتال شي تافة :

١ـ نحط صحن فوق الميزان بعد ما نشغله .

٢ـ نختار الوحده اللي راح نقيس هل هي متري ولا أمريكي . غالبا فيه زر لتحويل الوحدة .

٣ـ نصفر الوزن حق الصحن . بعد غالبا في زر كذا .

٤ـ نحط الشي اللي نبي نوزنه إلين نوصل للوزن المكتوب في الوصفه .

٥ـ نبي نوزن شي ثاني سهل . نشيل الصحن ونحط صحن ثاني ونصفر ونرجع نقيس عااااادي .. بس .


كيس حلويات :

أي كيس حلويات ينفع أهم شي الراس يكون ١ سم على الأقل .

سيلبات ( سجادة سيليكون ) أو ورق بارتشمنت :

الماكرون مصنوع من بياض بيض وهو بروتين و البروتين يحب يلصق في أي شي عشان كذا مهمة جدا هذي الخطوة . راح تحتاجون ياورق بارتشمنت parchment اللي بعض الناس يسمونه ورق زبده أو لو عندكم سيلبات اللي هي سجادة السيليكون يكون أسهلكم بعد . السيلبات موجوده ومتوفرة في السعودية وشفتها في كذا محل أسألوا عن سجادة سيليكون وهم بيعرفون ما يحتاج يكون نوعها سيلبات هي بس ماركة لا أكثر . ورق البارتشمنت بعد في كل سوبرماركت جنب القصدير في الغالب .

ورق الزبده الأصلي وورق الشمع ما ينفع في حالتنا هنا .

هذي صورة للأدوات :

MACARON



الوصفة و الطريقة


المقادير :

110 جم بياض بيض

30 جم سكر عادي

125 جم لوز

225 جم سكر مطحون

ألوان أكل حسب الرغبة

هذي الوصفة الأساسية للماكرون بالمرانج الفرنسي .

الطريقة :

١ـ نجهز كل شي . ننخل اللوز و السكر المطحون ، بعدين نوزنهم ونحطهم في صحن واحد . أرجع و أقول زي ماقلت كثير مافيه بديل للوزن في الماكرون لحد يجيني يقوللي أبغى المقادير بالكوب و الكاس و الملعقة لأن صعب جدا عمل ماكرون بقياسات موب دقيقة . بعدين نخلط اللوز و السكر المطحون مع بعض بشوكه عشان يتداخلون في بعض . نوزن البيض ونجهزة . ونوزن السكر العادي بعد .

MACARON

٢ـ   نسوي مرانج بالبيض و السكر ونخليه يوصل مرحلة منقار الطير . اللي ما شاف موضوع المرانج أو ما يدري وش المرانج يشوف هنا. المرانج اللي في الموضوع مرانج فرنسي بس ممكن عمل الماكرون بالمرانج الإيطالي بعد ،بنفس الخطوات الجاية تقريبا يعني بس نوع المرانج هو اللي يتغير .

٣ـ الحين نكب خليط اللوز و السكر و الألوان و النكهات المستخدمه على المرانج .

٤ـ الحين الخطوة الأهم الخلط . أغلب المشاكل حقت الماكرون تجي من الخلط . اللي يسير و إحنا نخلط موب بس إن المقادير راح تنخلط مع بعض . السكر البودرة راح يسحب شوي من الرطوبة حقت المرانج وهذا راح يفجر بعض الفقاعات حقت الهواء مع التحريك العملية هذي تتسرع بعد . عشان كذا كل ما خلطنا بنلاقي إن الخليط صار سايل أكثر و أكثر . لو حركنا أكثر من اللازم فقاعات كثير راح تتفجر ويمكن ما توفر الرفع اللازم للماكرون وينتج ماكرون مسطح . لو خلطنا أقل من اللازم بيصير عندنا خليط ثقيل مره وصعب تشكيلة وبعد بيصير عندنا هواء أكثر من اللازم في الخليط وهذا يعني نفش أكثر من اللازم في الفرن و الماكرون راح ينفش في البدايلة بعدين راح يطيح ويصير بعد مسطح ومشقق . عشان كذا الخلط للدرجة المثالية مهم .
أخلطوا المواد الجافة مع المرانج بملعقة مطاط شوي شوي في البداية إلين تترطب المواد بعدين كملوا خلط عادي إلين توصلون الدرجة المثالية . في البداية الخليط بيكون ثقيل شوي وقاسي بس مع الخلط بيلين شوي . عشان تختبرون الخليط إنه وصل للمرحلة المثالية أرفعوا الملعقة حقت الخلط والمفروض يطيح الخليط من الملعقة على شكل كتل .

شوفوا الفيديو هذا من دقيقة ٥ بالذات هذا بالضبط هو القوام اللي تبغونه .

macaron

٥ـ الحين ننقل الخليط لكيس الحلويات ونجهز صياني الفرن بعد ما نغطيها ببارتشمنت أو سيلبات .

٦ـ الحين نبدأ نصب الخليط على شكل دوائر قطرها ١-٢ سم أو حسب الرغبة . خلوا مساحات بين حبات الماكرون عشان تعطونها مساحة تنتشر وعشان الهواء يسخنهم بالتساوي في الفرن . أفضل طريقة للصب هي إنكم تحطون الراس قريب من الصينية وتصبون في مكان واحد وخلوا الخليط ينتشر وهذا راح يعطيكم دائرة متساوية . لو لقيتوا حبات شكلها غلط أو لها راس موب مشكلة راح نصلحها في الخطوة اللي بعدها .

ماكارون

لاحظوا الأشكال فيها مشاكل عاااادي لا تشيلون هم .

٧ـ الحين عشان نصلح أخطاء الصب . نبلل أصبع بشوي مويه ونبدأ نصلح الخليط المصبوب بيدنا شوي شوي .

macaron


٨ ـ الحين نشغل الفرن على ٣٢٥ من تحت بس !! وتأكدوا إن المروحة اللي في الخلف لو كانت موجودة طافية هذي المروحة قوية على الماكرون وممكن تخربه . بعدين نحط الصياني اللي شكلناها على طاولة المطبخ نص ساعة  على الأقل ترتاح ( سامعين على طاولة المطبخ موب في الفرن هههه ) . هذي الفترة راح تعطي الماكرون قشرة عالوجه هذي راح تساعده ينفش بالتساوي في الفرن ويكون ياقة . لو كنتوا مستخدمين مرانج إيطالي هذي الخطوة مالها داعي وغير مطلوبة يعني أخلطوا ، شكلوا وحطوها في الفرن علطول .


٩ـ الحين نحط الصينية في الفرن في الرف الأوسط حوالي ١١ دقيقة  . المفروض الماكرون يكون له ياقة وما يكون تلون بلون غامق أو صار قاسي أكثر من اللازم . حطوا الصياني صينية صينية لا تحطونهم كلهم مع بعض .

macaron

١٠ ـ خلوها تبرد تماما . راح تلاحظون إنها لاصقة بالصينية وهي حارة هذا شي طبيعي خلوها تبرد وراح تفك .

بس هذا الماكرون . تقدرون تحشونة وتاكلون على طول أو لو تبون أحسن بعد خلوه في الثلاجه يوم قبل تاكلونه عشان النكهات تتمازج صح بعدين طلعوه من الثلاجه و خلوه يوصل حرارة الغرفة قبل الأكل . لو تبون تحفظونه وقت أطول ممكن بعد حطوه في أكياس وخلوه في الفريزر بدون حشي ! كثييييير أصلا من محلات الماكرون وحتى الكبار مره يسوون كذا . الماكرون ماراح يتأثر بالفريزر كثير . أهم شي تخلونه يذوب زين وتاكلونه على حرارة الغرفه موب بارد .


الحشوات


كل يوم أشوف حشوات ماكرون مبتكرة وجديدة ، شفت حشوات بكبد البط ، بالكتشب ، بالفاصوليا الحلوه وحتى بالفقع ومتأكد إن فيه غيرها أغرب بعد . بس هذا إن دل على شي فهو يدل إن مافيه قواعد هنا أي شي تشوفون إنه ممكن يمشي مع الماكرون ينفع يتسوى منه حشوه .

الحشوات ممكن تكون جاناش سواء عادي أو حتى مخفوق ، نوتيلا ،  ممكن تكون موس مثبت من أي نوع وبأي نكهة، ممكن تكون كريمة مخفوقة مثبتة بجيلاتين وبعد بأي نكهة ، ممكن تكون بتر كريم أي نوع و بأي نكهة، ممكن إستخدام تقريبا كل تغطيات الكيك ، ممكن إستخدام أي معجون لذيذ مثل البينت بتر مثلا أو مثلا فستق مطحون ، ممكن إستخدام مارزبان أو ممكن إستخدام مربى عادية . ممكن بعد خلط كذا واحد من هذي الحشوات عشان تسوون حشوات مبتكرة مثل حشوة البينت بتر مع المربى مثلا . مافيه قواعد كثير هنا أهم شي الحشوة ما تكون سايلة أكثر من اللازم بحيث تذوب الماكرون ولا تكون قوية مره بحيث إنها تغطي على طعم الكوكيز تقريبا بس هذي القواعد هنا .

إذا جيتوا تحشون ممكن تستخدمون يا كيس حلويات صغير أو حتى ملعقة عادية .


مشاكل الماكرون وحلولها


إذا ما ضبط الماكرون معكم أول كم مرة لا تستعجلون كل فشل هو خطوة للنجاح أهم شي تعرفون وش المشكلة وليش فشل وتحلونها بس . الماكرون كوكيز شوي حساس خلط خطأ أو فرن حار أكثر من اللازم ممكن يخربه بغمضة عين .عشان كذا دايما نحاول إننا نثبت الوصفه هنا بحيث إننا نتأكد إن الخطأ كان من التنفيذ موب في الوصفه نفسها وعشان كذا إحنا نستخدم الوزن في القياس هنا .

حرارة الفرن بعد عامل ثاني ، الأفران لها دورة يعني تشتغل بعدين تطفى بعدين تشتغل وتطفى وكذا بحيث الحرارة الداخليه تكون قريبه من الحرارة اللي مطلوبة .. بس بعض الأفران دقيقه أكثر من غيرها وبعضها بعيدة تمام عن الحرارة المطلوبة منها . الحل هنا هو إنكم تستخدمون ميزان حرارة فرن عشان تراقبون الحرارة داخل الفرن حقكم .

نجي للمشاكل العامة و إن شاء الله حلولها :


١ـ إذا الماكرون شكله سليم بس ماله ياقه أو الياقة صغيرة مره :


فيه ثلاث إحتمالات هنا . إما إنكم ما ريحتوه وقت كافي ، أو إنكم خلطتوه أكثر من اللازم أو إن الفرن شوي بارد .

خلوه يرتاح وقت أطول وجربوا ، لو ما راحت المشكلة جربوا تخلطون أقل يمكنكم خالطين أكثر من اللازم لو ماراحت كحل أخير أرفعوا حرارة الفرن شوي بس وجربوا من جديد .

macaron

ماكرون بدون ياقة

 

٢ـ إذا الماكرون ما له ياقة والقشرة من فوق مكسرة :
هنا في الغالب السبب هو الخلط أكثر من اللازم أو أقل من اللازم أو حرارة الفرن فيها مشكلة أو ما أرتاحت وقت كافي . الحل أخلطوا للدرجة الصح وبعدين تأكدوا من حرارة الفرن . في بعض الأفران ما يكون فيها تهوية للهواء حار هنا ممكن تحلين المشكلة بإنك تحطين ملعقة خشب على باب الفرن وتقفلينه بحيث يكون الباب شوييييي مفتوح .

ماكروون

ماكرون مكسر

٣ـ الماكرون له ياقة بس بدال ما ينفش على فوق الياقة عالجنب :


في الغالب معناها فرن حار أكثر من اللازم.

ماكرون فرنسي فاشل

ياقة عالجنب

٤ ـ الخلطة سايلة :

في الغالب محركة أكثر من اللازم .

٥ ـ الخلطة ثقيلة :

في الغالب محركة أقل من اللازم .

٦ ـ القشرة موب ناعمة :

في الغالب اللوز شوي خشن .

٧ ـ القشرة فاضية ( فتحة هواء كبيره داخلها ) :

مخلوطة أكثر من اللازم ومطبوخة أقل من اللازم .

٨ ـ ماكرون لين وينكسر بسهولة :

مطبوخ أقل من اللازم ، فرن بارد ، مخلوط أكثر من اللازم ، مرانج فاشل .

٩ ـ ماكرون ناشف :

أنطبخ أكثر من اللازم .

بس هذا تقريبا كل شي عن الماكرون .

النتائج

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

الماكروون ( الماكرون الأمريكي ) … Macaroon

هلا والله ….

داري طفشناكم بنفس الموضوع كل مره ماكروون ، ماكرون ، كرات ثلج إلخ ….. بس هي زي السلسة وحبيت أنهيها . هي كلها إمتداد لموضوع الماكرون الفرنسي اللي راح ينزل إن شاء الله قريب مع تعديلات شوي عليه .

 

الماكروون الأمريكي ( بحرفين واو ) يختلف عن الماكرون الفرنسي كثير من ناحية الطعم و الشكل ، بس بنفس الوقت هو يتشابه معه بشكل كبير من ناحية المكونات و الطريقة . هذا الحلى له نسخ كثييير لأن كل شخص يحبه بطريقة غير فلا تستغربون إذا لقيتوا وصفات كثير له في النت . بعض الناس مثلا يفضل إنه يكون ناشف زي الحجر وعشان كذا يحطونه في فرن بارد وقت طويل يمكن ٤ ساعات إلين ينشف تماما … وفيه ناس يحبونه يكون يقرمش من برا شوي بس طري من الداخل . فيه ناس يسوونه بمرانج عشان يكون خفيف من الداخل وفيه ناس تستخدم بياض بيض بس عشان يمسك الخليط مع بعض .

 

أنا أحبه يكون خفيف من الداخل شوي وعشان كذا أستخدم مرانج فرنسي عادي . أحبه بعد يكون شوي طري من جوا أو تقريبا له طعم قريب من المارشمالو السايح مع طعم جوز هند قوي . هو مصنوع من جوز الهند بالأساس بس أي نوع مكسرات أو خلطة مكسرات ممكن تستخدم هنا بس ماراح تكون على شكل بودرة زي الماكرون الفرنسي يعني خلو المكسرات لو حبيتوا تكون مقطعه كبار بس . بدلوا بنفس كمية جوز الهند اللي حاطها تحت يعني لو بحط كوب لوز مثلا أزيد عليه كوب نارجيل وكذا ..

 

كوبين جوز هند ( نارجيل ) .

بياض بيضتين

٢/٣ كوب سكر

رشة ملح

رشة فانيلا سايلة أو بودرة إذا مافيه

ملعقتين كبار طحين ( عشان يمسك شكله بس )

 

 

نشغل الفرن على ٣٢٥ فهرنهايت .

نسوي مرانج فرنسي بالبيض مع الملح . اللي ما يعرف وش المرانج وكيف يسويه يشوف هنا .

الحين نضيف جوز الهند مع السكر و الفانيلا و الطحين على المرانج ونخلط شوي شوي إلين ينخلط .

نغطي صينية فرن بورق زبده (بارتشمنت) أو سيلبات .

بعدين نشكل الماكروون على ورق الزبده بالشكل اللي نبغاه ، ممكن نستخدم ملعقة عاديه ، ممكن نستخدم ملعقة إسكريم عشان نطلعها كور ممكن نستخدم قوالب حتى لو نبغى نطلعها بشكل مختلف . أو ممكن نسوي الشي التقليدي ونشكلها بيدنا على شكل أهرام . أنا شكلتها على شكل بيضاوي .

ندخلها الفرن إلين توصل للدرجة اللي نبغى أنا أحب الأطراف شوي تقرمش ولونها ذهبي عشان كذا أخليها إلين تقلب الأطراف شوي ذهبي حوالي ١٥ – ٢٠ دقيقه بالكثير . اللي يبيها ناشفة أكثر أو متلونه أكثر يخليها أكثر .

 

نطلعها من الفرن ونخليها تبرد شوي قبل التقديم ..

 

بس هذا الماكرون الأمريكي جدددا سهل ..

 

macroon

ماكرون

macroon

فيه ناس يحبون يضيفون أشياء مع الخليط حق الماكروون مثل إنهم يبدلون جزأ من جوز الهند بمكسرات مثلا أو إنهم يضيفون أشياء مثل بشر ليمون ( الليمون الأخضر رهيب هنا ) . أو ممكن تضيفون مثلا زبيب أو فواكه مجففه أو بهارات لو حابين .

 

بعد ما يخلص الماكروون ويطلع من الفرن ممكن بعد تغطونه بطبقة شكولاته ذايبه أو بعد كاراميل لو تبون .


 

 


 


%d bloggers like this: