«

»

يونيو 12 2011

أندونيسيا : ناسي جورين .. Nasi Goreng

هلا والله …

 

هذا الموضوع تابع لفعالية حول العالم في ٣٠ يوم.

 

 

المطبخ الأندونيسي جدا متطور وجدا معقد وجدا مختلف ومتشعب. مع هذا إحتكاكنا معه جدا ضعيف للأسف زي مطابخ كثير في شرق آسيا. المطبخ الأندونيسي يختلف بشكل كبير من جزيره لجزيره و أحيانا حتى داخل الجزر. تأثر المطبخ الأندونيسي بعدة ثقافات ساعدت إنها تشكله بشكله الحالي، المهاجرين و التجار و العرب عرفوهم على البهارات اللي جابوها من الهند ، المهاجرين من دول آسيويه ثانيه زي الصين و تايلند وغيرها علموهم كثير من الطبخات و المكونات الأساسيه في طبخهم و اللي تطورت ودخل عليها مكونات محليه بعد كذا، و آخيرا الإحتلال الهولندي دخل عليهم بعض المكونات الأوروبيه و المكونات اللي جابوها من العالم الجديد زي الفلفل و البطاطس و الطماط وغيرها.

 

الطبق اليوم واحد من أشهر الأطباق الأندونيسية وهو واحد من الأكلات الرسميه الآندونيسيه. الناسي جورين ببساطه شديده هو فرايد رايس أو رز مقلي مطعم بشكل أساسي بالكتشب الأندونيسي أو الكيكاب مانيس اللي يعتبر الصويا صوص حق أندونيسيا. الطبق هذا جدا شعبي وجدا سهل و الحلو فيه إنه ممكن يتسوى كل يوم طول السنه وما ينعاد بنفس الطريقة مرتين. الفرايد رايس في الأساس هو طبق صيني بس لكل دوله من دول شرق آسيا نسخه مختلفه له و تختلف بشكل كبير عن الفرايد رايس الصيني. الشي اللي أحبه في الفرايد رايس غير الطعم هو إنه طريقة رهيبه لإستخدام بقايا الأكل. أعشق الأكلات اللي تستخدم بقايا الأكل لأن فكره إن الواحد يحول شي ما ينوكل لشي لذيذ هي قمة الفن في الطبخ.

 

ياليت محد يتقيد بأي مقادير أو مكونات مستخدم هنا لأن زي ماقلت الأكله هذي ممكن تتسوى كل يوم طول السنه وما تنعاد مرتين. فيه مكونين بس هي اللي مطلوبه أي شي ثاني غيرها هو زياده وممكن يتغير. الرز و الكيكاب مانيس ! أي شي ثاني هو زياده و إختياري. أرجو محد يسألني هل يقدر يشيل هذا الشي أو مالقيت هذا الشي لأن زي ماقلت أي شي غير الرز و الكيكاب مانيس إختياري. أي خضار أو لحوم أو بيض ممكن يستخدم، فيه ملايين الطرق لتعديل الناسي جورين ، بس أبسط طريقة هي إنكم تفتحون الثلاجه وتشوفون وش فيه بقايا أكل وتحطونها. النوع اللي مسوي هنا مستخدم فيه ربيان و جزر و فاصوليا طازجة ( هذا موسمها ) ومطعمها بشوي صوص سمك (شوفوا موضوع تايلند إذا ما تعرفون وشو صوص السمك) و آخر شي مقدمها مع بيضه مقليه.

 


المقادير :

 

 

كوب رز بسمتي ينطبخ بعدين يتبرد تماما.

بصله أو حبتين شالوت shallot مقطعه أجنحه

فصين ثوم مقطعه صغار

بيضه

حبتين جزر مقطعه

قرنين فلفل أحمر أو أخضر حار أو حسب الرغبه

ربع كوب ربيان مقشر ومنظف

فاصوليا طازجة من النوع اللي ينوكل كامل snow peas

كيكاب مانيس ( صويا أندونيسيه )

صوص سمك ( إختياري )

بصل أخضر مقطع على زاويه للزينه

كزبره مفرومه للزينة

بيضه مقليه للزينه

 

 

* لهذا الطبق مهم إنكم تستخدمون رز بارد وعشان كذا هو ممتاز إذا كان عندكم بواقي رز. الرز الجديد بيتكسر بسهوله وينعجن مع الطبخ. الكمية اللي حاط تقريبيه تقدرون تسوونه بأي كمية رز باقيه.

 

* الشالوت للي ما يعرفه هو يجي زي البصل الأحمر بس صغير. هو تقريبا خليط بين البصل و الثوم في الشكل و الطعم لأنه يجي زي البصل له حلقات وزي الثوم له فصوص. الشالوت له طعم خاص فيه مختلف عن البصل.

 

شالوت

 

* الفاصوليا أنواع كثير بس عموما هي ٣ تصنيفات : فاصوليا ينوكل بس حبوبها زي البازلاء مثلا ، فاصوليا تنوكل كامله زي الفاصوليا الخضراء ، وفاصوليا ينوكل الكيس اللي فيه الحبوب زي الفاصوليا اللي مستخدم هنا. كل الثلاثه ممكن تستخدم هذا الشي اللي لقيت و أحب طعمه مع الربيان بس.

 


* الكيكاب مانيس أو الكتشب أو الصويا الأندونيسيه هي الشي اللي أغلب الناس عندنا يسمونه صويا صوص. هو يجي ثقيل وحلو وبطعم مختلف عن الصويا اليابانيه أو الصينيه اللي تجي مالحه وخفيفه وبدون حلاوه زايده. الكيكاب مانيس أقرب للكتشب من الصويا صوص ، هي عباره عن صويا صوص بس مع سكر و ثوم و بصل و بهارات زي اليانسون و القرفه و الكتشب عباره عن طماط مع بصل وسكر وبهارات. الكيكاب مانيس ضروري لهذا الطبق عشان يعطيه النكهة الأندونيسيه المميزه.

 


الطريقة :

 

 

الناسي جورين مطبوخ بطريقة القلي السريع أو الستير فراي stir fry. الستر فراي هي طريقة طبخ صينيه تستخدم حراره عاليه مع تحريك الأكل بسرعه وفيها ينطبخ الأكل في دقايق بس يعني هي موب قلي قلي بالمعنى المعروف. إذا عندكم المقله الصينيه هذي بتسهل عليكم شغلكم كثير كون شكلها عملي لهذا النوع من الطبخ بس إذا ما عندكم تقدرون تستخدمون أي مقله عاديه ثانيه بشرط تكون كبيره مره عشان تسمح لتحريك الأكل بسهولة.

 

الشي الثاني اللي لازم تنتبهون له في الستر فراي هو إن كل شي لازم يكون مجهز وقريب منكم قبل ما تبدون تطبخون لأن أول ما تبدون ما تقدرون توقفون. يعني البصل والثوم و الجزر يكونون مقطعين وجاهزين و الربيان منظف و الفاصوليا مغسوله و الزينه حتى مقطعه وجاهزه و الصوصات قريبه منكم، كل شي بيصير بسرعه وما ينفع توقفون وتروحون تقطعون بصل أو جزر و المقله عالنار.

 

الشي الثالث و الأخير وهو عن ترتيب الأكل. في الستر فراي ترتيب الأكل يكون حسب الوقت المطلوب لطبخه يعني نطبخ المواد اللي تحتاج وقت أطول في البدايه وبعدين اللي بعدها وبعدين اللي بعدها وكذا.

 

 

 

نسخن المقله على حراره أعلى من وسط بشوي ونخليها تحتر شوي. بعد ما تحتر نحط شوي زيت وبعدين البصل أو الشالوت و الجزر ونخليهم يطبخون إلين يبدأ الشالوت يقلب ذهبي من الأطراف ويبدأ الجزر يصير لين بعدين نحط الفلفل الحار و الثوم ونطبخه شوي إلين تطلع ريحته. نزيد شوي زيت لو إحتاج وبعدين نحط الربيان و الفاصوليا مع رشه فلفل ونطبخهم إلين يقلب الربيان برتقالي، كل هذا يصير مع التحريك بملعقة طول الوقت. الحين نكسر البيضه فوق المقادير ونحط الرز البارد عليها علطول ونقلب كل شي مع بعض ونطبخ الرز إلين يرجع يحتر من جديد. الحين نحط شوي صوص سمك وشوي كيكاب مانيس ونقلبه مع الرز ونذوق ونعدل الطعم إلين نوصل للنكهة اللي نبي ويقلب الرز ذهبي. نشيل المقله من النار ونحط الكزبره و البصل الأخضر ونقلبه مع الرز.


 

nasi goren

ناسي جورين

nasi goren

ناسي جورين

Follow TopChefCooks on Twitter

عن الكاتب

Top Chef

15 comments

4 pings

Skip to comment form

  1. Noora

    السلام عليكم
    الله يعافيك ممكن اسم السوس (الكيكاب مانيس) بالانجليزي لانه اسهل في البحث وشكرا

    1. Top Chef

      لاتشيلين هم جوجل يصلح الاخطاء هههه

      اعتقد تنكتب كذا
      Kecap manis

  2. ريما عبد الله

    حلوه الطبخه تهبل

  3. ريما عبد الله

    حلوه الطبخه مره انا ريما

  4. نانو سيتا

    شاهد “صمبل_ Sambal” على YouTube – https://www.youtube.com/watch?v=h92ZE9NjABY&feature=youtube_gdata_player طريقة الصمبل المطبوخ من مطبخي اتمنى تعجبك

    1. Top Chef

      رااااائع ما قد فكرت أسويه في البيت الصراحة قبل اليوم

  5. نانو سيتا

    السلام عليكم شيف نحن الناسئ قورينغ ضروري نقلي معاه كروبوك متوفر بالبقالات الاندونيسيه بنكهات وأشكال واحلى نكهه الروبيان وبالبصل المحمر ( باونغ قورينغ ) والصمبل ( فلفل حار مطبوخ ) وحبيت انبه صوص الصويا ينطق كيتشاب إتام مانيس المعنى ( كيتشاب اسود حالي )

    1. Top Chef

      وعليكم السلام و الرحمة …

      الكروبوك معروف ما يحتاج واحد من ألذ ألذ الأشياء عندي خصوصا اللي بالروبيان.

  6. ✿ мŏ₫мάżiļ Ɗσ∂σ

    موضوع جمييل
    تسلم الايادي

  7. ريما

    بجد مووع هايل
    واستفدت منه كتير
    لكم منى اجمل تحية

  8. khaled88

    والله شكلها يشهي صدقيني ماتدري قد ايش تفك الوصفات هاذي ازمات وقت الغربة والسفر وخاصة الاكل الاندنوسي مررة يعجبني تسلمي يانونة راح اسويها واقلك كيف صارت

  9. غير معروف

    الاكل الاندويسيس جدا لذيذ كل ماجاتنا شغاله جديده نقولها وش تعرفين تطبخين وتعلمنا منهم اكلات كثير والطبخه هذي جدا روعه وزي ماقلت لما يكون الرز قديم تطلع الذ بس غالبا نسويها بالدجاج والخضار

  10. غير معروف

    مش طبيعي..!!

    انا مبارح شفت الموقع هاد بالصدفه وانتبهت على حالي عأدان الفجر..!! عندي شغل اليوم واول شي عملته اليوم كمان انه فتحت الانترنت على موقعك

    في مدونات كتير متل هاي الفكره بس اللي عجبني المعلومات اللي بتحطها في بداية كل موضوع والاساسيات اللي كتير فادتني بأخطاء كنت اعملها

    يسلمو ايديك وانت اكيد لازم تفوت معهد طبخ بتبدع :)

  11. غير معروف

    تصدق عاد احلى شي في المدونة كلهم الموضوع هذا

    يا كثر ما ابحل في باقي الرز عندي لدرجة اني صرت احطه كل يوم للحمام .ههههههاكسب اجرهم

    الله يسلم عمرك ماقصرت

  12. نور

    انا مره شريت صويا صوص و طلعت ثقيله و حاليه و خلينها ما استخدمتها
    اتوقع هذاالصوص اللي تقصده
    انشالله بسويها قريب لان الصوص طايح بجبدي

  1. ختام فعالية حول العالم في ٣٠ يوم …. » Top Chef Blog .. مدونة توب شيف

    […] أندونيسيا : ناسي جورين […]

  2. أصابع الماك آند تشيز .. Fried Mac & Cheese » Top Chef Blog .. مدونة توب شيف

    […] toast و بودنج الخبز  bread pudding  اللي يستخدمون خبز قديم و الفرايد رايس fried rice اللي يستخدم رز قديم وغيرهم كثير بعد. هذي الأكلات […]

  3. أصابع الماك آند تشيز .. Fried Mac & Cheese « مدونة توب شيف … Top Chef

    […] toast و بودنج الخبز  bread pudding  اللي يستخدمون خبز قديم و الفرايد رايس fried rice اللي يستخدم رز قديم وغيرهم كثير بعد. هذي الأكلات […]

  4. ختام فعالية حول العالم في ٣٠ يوم …. « مدونة توب شيف … Top Chef

    […] أندونيسيا : ناسي جورين […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: