«

»

أبريل 15 2011

خبز النان .. Naan Bread

هلا والله …


خبز النان واحد من الأسباب اللي الناس يروحون مطاعم هنديه ، ما أعرف أحد يروح مطعم هندي وما يطلب نان . عكس الإعتقاد الشائع خبز النان موب خبز هندي بس ، خبز النان موجود في باكستان و إيران ( يقال إن أصله من هناك ) و المناطق المحيطة .


النان عبارة عن خبز تنور مسطح له قشرة خفيفه تقرمش و جدا جدا طري ولين ، غالبا مدهون بزبدة أو سمن بعد ما يطلع من الفرن وفيه تفرعات كثير يكون محشي بحشوات مختلفه . فيه آلاف الوصفات للنان حتى الهنود نفسهم ما أتفقوا على وصفه وحده أو حتى طريقة وحده له ، اللي أكيد هو إن معه طحين و زبادي وحليب غير كذا كل وصفه غير .. بعض الوصفات معها دهن وبعضها لأ ، بعضها معها بيض وبعضها لأ ، بس اللي مستغرب أكثر و أكثر هو إن بعضها معها خميرة وبعضها تعتمد على بيكنج باودر للرفع !.


في النان اللي أهم من العجينة هو طريقة طبخ الخبز ، الأصل هو إستخدام تنور زي ما يسوون في التميس ( واللي عنده أنصحة وبشده يستخدمه ) .  التنور يوصل حرارات جدا عالية تقريبا ٩٠٠ أو أكثر وهذا شي مستحيل نوصله في فرن البيت اللي إن كثر وصل ٥٠٠ بس . الحراره العاليه تطبخ الخبز بسرعة وتحمر الوجه في وقت قصير وهذا يعني تبخر أقل وهذا يعني خبز رطب ولين أكثر .  فيه ناس يحطون الخبز على صينية ويدخلونه الفرن بس هذا بيعطي نان جدا سيئ و أقرب لطعم المناقيش من النان، إذا نبي نسوي نان صح لازم نحاول نقلد الظروف الموجوده في التنور ولازم الخبز يستوي بسرعه مره زي ما يصير في التنور. بعد تجارب كثير مع خبز النان وصلت لهذي الوصفه وهذي الطريقة و طعمها رهيب وزي حقت المطاعم بالضبط .


المقادير :

نص كوب + ملعقة كبيرة حليب دافي.

نص كوب + ملعقة كبيره زبادي كاملة الدسم.

ملعقتين كبار سكر.

ملعقتين وربع صغار خميرة فوريه instant yeast.

١/٢ ملعقة صغيرة ملح.

ملعقتين كبار سمن ( أو زيت ).

بيضه على حرارة الغرفة.

٤٥٠ جرام طحين أبيض ( تقريبا ٣ أكوب ونص + ملعقة كبيرة ).

ملعقتين كبار سمن أو زبده لدهن الوجه بعدين .


الطريقة :

نخلط الحليب مع الزبادي و البيضه و السكر و السمن و الملح في صحن. نضيف عليهم نص الطحين و الخميره ونحرك إلين يكونلنا زي المعجون . نبدأ نضيف الطحين شوي شوي ونعجن إلين يكونلنا عجينة شوي رطبة بس .


نعجن العجينة بيدنا أو بعجانة ٥ – ٧ دقايق إلين تصير لينه وتلصق شوي بس . ندهن العجينة بشوي زيت ونحطها في صحن مدهون شوي زيت ونخليها تتخمر إلين يتضاعف حجمها.


نسخن الفرن ( من تحت بس ) على أحر شي يوصله ونحط على آخر رف تحت صينية فرن مقلوبه( يفضل ما تبونها كونها بتنحرق ) ونخليها تحتر مع الفرن . يفضل تشغلون الفرن قبل الطبخ بساعة كون حرارة الفرن شي ضروري هنا.


بعد ما تتضاعف العجينة نقسمها ٦ أقسام ، نفرد كل قسم على شكل دائره نحيفة أو أي شكل ثاني تحبون . نخلي العجينة المفروده على جنب ٥ دقايق تقريبا ترتاح .


naan

الحين هنا الخطوة المهمة كيف ندخلها الفرن . نطلع الصينية الحارة من الفرن ( أنتبهوا تراها حااااااارة ) ونحط عليها الخبز بيدنا بعدين علطول نرجع الصينية الفرن ونخليها تطبخ إلين تنفش شوي وتبدأ تتحمر ( ماراح تاخذ وقت طويل تقريبا دقيقه بس ) بعدين نطلع النان من الفرن وندهن الوجه بسمن ونرجعه مره ثانيه الفرن إلين يتحمر . لا تسوون كل الخبز مره وحده كل مره سووا إثنين بالكثير عشان ما نبرد الفرن أكثر من اللازم.


نان

naan

نان

عن الكاتب

Top Chef

47 comments

8 pings

Skip to comment form

  1. jojo

    من البوم جالسه ادور طريقة خبز النان اخرتها قلت كني اذكر لك موضوع عنه
    سبحان الله مردي مدونتك :)
    عالعموم جزاك الله خير من جد هاذي افضل وصفه لقيتها وان شاءالله اني اجربها يوم
    بس حابه اسألك كيف اقدر اسوي اكثب من صنف في يوم
    مثلا اليوم سويت ماسالا دجاج ورز ابيض وسمبوسه بالعحينه عاديه محشوه بجبن مالح
    بس ابي ابسط زوجي سويت سفره هنديه بس السمبزسه مغشوشه بس هو مايدقق
    سويت الماسالا والرز واخر شي السمبوسة حسيت ضاع وقتي وانا في المطبخ وتعبت
    والمره الجايه ابي أضيف خبز النان على طريقتك..ياليت تقول لي اشياء تختصر علي الوقت
    مثلا ينفع اسوي الماسالا قبل بيوم وثاني اسخنها واضيف الكريمه؟
    وعجينة خبز النان اقدر افرزنها؟ نفس الشي السمبوسه ماتلصق في بعض اذا فرزنتها لانها بالعجينه
    للعلم هاذي الماسالا اللي رح اعتمدتها بإذن الله
    مُمَيز Murgh Makhni مورغ مخاني | ماسآلا هندية عالأصول – منتديات شمواه|SHAMOA FORUM ® – http://www.shamoa.com/vb/showthread.php?t=52549
    واسفه عالاطاله

    1. Top Chef

      عليك بالعافية ….

      أكيد بتتعبين في المطبخ وبيضيع وقتك لأن اللي تسوين نوع من الجنون هههههه لاتفهميني غلط برافو عليك طبعا الطموح بس لاتحاولين تسوين نظام مطعم في بيتك وأنتي لحالك اللي تشتغلين ، بتتعبين كثير كذا.

      غلطك إنك تبين تسوين كذا شي كلهم يحتاجون طبخ في اللحظات الأخيره وكلهم بتقدمينهم مع بعض وهذا كله وأنتي لحالك وفي مطبخ واحد بس يعني غاز واحد وفرن واحد ، هذا محد يقدر يسويه.

      لو علي بترك السمبوسه (أو أسوي نوع ثاني يتسوى بالفرن بحيث أتركها في الفرن وأنساها) وممكن أبدلها بشي زي شوربة عدس أو غيره يسوى قبلها بوقت (إلى عدة أيام قبل) ، وبختار يارز أو خبز مع المسالا (تقديم رز وخبز مع بعض غريب الصدق) وبس. الكاري ممكن يتسوى قبلها بوقت طويل بس إذا كان زي هذا النوع بصدور دجاج يفضل توقفين طبخ إلين المرحلة اللي ينحط الدجاج وبعدين تكملين من هذيك النقطة. لو كان كاري مصنوع بشي ما ينشف مع طول الطبخ بالعكس ممكن يلين أكثر زي فخوذ دجاج مثلا أو غنم ممكن أسويه قبلها بوقت وأسخنه بس. الخبز طبعا يمديك تسوينه قبل تبدين بالكاري وبس تسخنينه في الفرن كم دقيقة.

  2. اروى

    من أجمل والذ ماخبزت .. رهييييب لأبعد حد .. جزاك الله خير ..

  3. غير معروف

    يعطيك العافية شيف سويت نصف المقادير ولما جيت افرد العجينة حسيت حبوب الخميرة كأنها محببة في الخميرة ولما خبزته تنفخ من أجزاء فقط ايش السبب

    1. Top Chef

      حبوب الخميرة بالعادة تذوب بسهولة ؟ الصراحة أول مره أسمع عن هذي المشكلة ، ما أعرف

  4. آلاء

    السلام عليكم

    خبز النان كذا شكله ؟! ( ياحليلي )

    انا شفت طرق بالنت لخبز النان .. تعجن عجينة بعدين تحشيها جبن تشيدر بعدين تفردها وتدخلها الفرن
    تنتفش بسرعه رهيبة وتتشقر بعدين نطلعها !
    الصراحة طعمها وريحتها خرافية حتى شكلها كور منفوشه جميلة

    ( وكل مارحت لمطعم هندي ماأطلب خبز النان )

    أيهم خبز النان أجل ؟
    وممكن اذا عندك خبر تقول ( وش معنى اسم خبز النان ! ) ؟

    على فكرة أسويه على صينية الفرن اللي تجي معاه ( اللي لونها اسود )

    1. Top Chef

      خبز النان خبز مسطح تقريبا زي التميس زي اللي مسوي بالضبط هذا النان عمره ما يكون كوره واكيد اكل هندي موب صاير فيه تشدر

    2. Top Chef

      ما اعرف الصراحة معنى الاسم

  5. تويت

    نسيت اقول يعطك العافية,,,انته من الأشخاص اللي تغرس في نفوسنا الذمة والأمانة بالعمل ماعاد نلقى بالعمل احد متميز ومتقن من كثر مااشغلنا السرعة والمنافسة…ثانك يو

  6. تويت

    قرأت لك باقلاع وبشمواه واليوم دخلت ابحث عن طريقة النان ووصلت هنا وانا اقرا تذكرت ذاك الشيف اللي اسمه توب شيف اللي اخذت منه طريقة الباستا , السبب لأني تعلمت منه اصول الطبخ وكيف تتمازج المكونات وتقبل بعض ,,,اقول في نفسي زي ذاك الشيف مافيه …يوم جيت احفظ الموقع بمفظلتي الا هو انته…سعيدة بوجودي بموقعك واتمنى تديني ميلك لأني مهتمة اوريك طبخاتي ,,,ودي اوريك المربى والكوكيز والبراونيز تبعي واشوف رأيك فيهم

    1. Top Chef

      هلا والله ….

      هههههههه أنا نفسه اللي في شامواه بس الإقلاع مانزلت أي موضوع هناك ؟ صح عندي حساب بس مانزلت مواضيع ؟

      الصور حطيهم هنا لو تبين أو أرسليهم في صفحة الإتصال بنا فوق.

  7. ام نواف

    هلا اخوي الشيف في طريقه قالتها اخت فلسطنيه ان اذا ماتوفر فرن التنور في حركه يسونها بفرن البيت ويعطي نفس النتيجه

    بجربها وبصور واحطلك الطريقه كلها بس كيف احط الصور بمدونتك يعني احطهم بنفس الرد ولاكيف

    لان الطريقه روووعه بمعنى الكلمه وسهله حتى للناس الي ماتقدر تشتري صينيه البيتزا

    وحبيت افيدك مثل مااستفدنا منك وافيد الي يدخلون مدونتك عاد رد علي بسرعه عشاني متحمسه

    وعلى فكره انا اجهز مشروعي المطعم نسائي عشان كذا ناشبه فيك

    تحياتي اخوي

    1. Top Chef

      هلا والله ….

      تقدرين ترفعين الصور على أي سيرفر وتحطين الروابط هنا في الردود.

      بالتوفيق في مطعمك إن شاء الله.

  8. الاوتار

    مشكور اخوي على الوصفة . الله يعين الفرن حقي حرارته ضعيفة الحمد الله اني ما ارغب فيه مره افضل التميز علية اكثر
    على طاري التميز هو خبز افغاني ؟

    1. Top Chef

      موب بعيدين عن بعض ترى . التميز حسب علمي أفغاني.

      1. غير معروف

        خبز التميز أصله حسب علمي من المنطقه الواقعه غرب أيران وشرق تركيا والكلمه باللغه التركيه تعني النظيف …..وهناك ممكن تشتري من خبازات القرى رغيف تميز طوله متر الى متر ونصف ويشوى في تنور مبطن بالحصى الناعم عاده وطعمه رهيب لم أذق مثله في حياتي في أي مكان أخر…..الف شكر على هذه المدونه المميزه يا أخ خالد

        1. Top Chef

          شاكرلك أخوي التصحيح وشوقتني أجرب التميس الحقيقي ….

  9. تهاني

    حددده يشوق
    ,,, تسلم الأيادي :)

  10. غادة

    الله يعافيك ياشيف جريت خبز النان بس ياهو بهذلني بشكل لدرجه من الحماس وانا ادخل بهالخبز واطلع من الفرن شعري من الغره انحرق شوي ولادريت :(
    انا خفت استعمل الصواني حقتي لانك قلت بتنحرق وانا صوانيي غاليه علي اعتبرهم مثل عيالي
    فسويت زي واحده من الاخوات هنا حطيت الصاج حق المصابيب على ارضيه الفرن مباشره
    بس يوم سويت اول ثلاث حبات ما رضت تنفش لان شكل الصاج سميك بزياده وانا فرني حرارته مو مره …..قلت يابنت الحلال حطي صينيه واتوكلي على ربك وحطيت صينيه نفس حقتك والحمد لله اخر ثلاث حبات نجحوا وصاروا ياسلام
    الله يعافيك ويجزاك الجنه

  11. dreamy

    انا متابعه بصمت لكل طبخاتك ربي يحميك
    جربت اكثر من نوع وكلها ضبطت معي حمدالله
    بس عندي مشكله بالخبز كل ماجربت طريقه يطلع ناشف مثل البسكوت ولاينفش معي

    بس بغامر وبجرب طريقتك لان اكيد مابعد الفشل الا نجاح ان شاء الله

    بس سؤالي هو طريقه الفرد اخلي فرد العجين رقيق او لا ؟
    واذا دخلته الفرن كيف ينفش معي يعني اذا كان رقيق ماراح ينفش او ماله دخل

    1. Top Chef

      هلا والله …

      دوريي السبب ، فيه أكثر من سبب يخلي الخبز ناشف ممكن يكون قلة عجن ، طحين زايد ، وقت تخمير أكثر أو أقل من اللازم ، خطأ في التشكيل ، خطأ في حرارة الفرن ، خميرة ميتة أو ضعيفة أو قياسات خطأ .. لو مثلا خميرتك كانت ضعيفة مهما كانت الوصفة اللي تسوين النتيجة بتكون فاشلة ..

      الفرد تقريبا خليه بسمك ربع سانتي .. أقول تقريبا يعني ما يحتاج مسطرة وكذا …

      بينفش في جميع الحالات سواء كان رقيق أو متين المهم ماتكون العجينة مخرومه .

  12. sweety

    السلام عليكم

    لو سمحت ماني فاهمه المقادير بالظبط يعني انت كاتب

    نص كوب + ملعقة كبيرة حليب دافي.

    نص كوب + ملعقة كبيره زبادي كاملة الدسم

    يعني نص كوب وازيد عليه ملعقه ؟؟ بس كذا

    1. Top Chef

      بالضبط ..

  13. bent el deera

    ما شاء الله الخبز طلع معاي مميز
    الله يعطيك العافيه على هالوصفه الحلوة
    وان شاء الله انزل الصور ببلوقي بعد شوي

    تسلم يمينك :>

    1. Top Chef

      الله يعافيك وبالعافية على قلبك إن شاء الله

  14. غير معروف

    طيب عندي سؤال الخبز ما يحتاج ينعجن كثير لاحظت تقول نعجنه 5-7 دقايق بس انا فاهمة صح والا ملخبطة في شي يعني ممكن اعجن بيدي بدون ما اتعب لووووووول

    1. Top Chef

      ٥- ٧ دقايق كثير ولا شوي ؟ العجن عموما ما يتعب العجينة لينه وسهل عجنها مره .

      1. cwmaebfh

        rnzotjho

  15. bent el deera

    يعطيك العافيه
    شكل الخبز لذيذ ما شاء الله

    انا جربت مره سويتها بطريقه اخذتها من اليوتيوب من وحده اعتقد اسمها مانجيلا

    تقريبا نفس المكونات بس من غير بيض مثل ما ذكرت بالبدايه … وان شاء الله اجرب طريقتك قريب :>

    اتوقع حجز البيتزا بيطعي نفس مفعول الصينيه … صح؟؟؟

    سؤال ثاني الله لا يهينك لاحظت بالمقدمه استغرابك من استخدام البيكنغ بودر لحاله فحابه اسئل ليش هالشي مستغرب ؟… احنا بالخبز اللي نسويه عاده بالبيت من غير خميره نحط فيه رشه بيكنغ بودر وانا ماني عارفه السبب طبعا بس اتوقع عشان تنفش بالفرن

    ان شاء الله بهالويكند تشوف تطبيقي حق هالخبز ببلوقي :>

    1. Top Chef

      الله يعافيك ….

      حجر البيتزا راح يعطي نتيجة أفضل ( بيني وبينك هو اللي أستخدم دايما ) بس اللي خلاني ما أتكلم عنه هو إني تكلمت عن الحجر في موضوع البيتزا ( بينزل قريب إن شاء الله ) وكثير ناس سألوني هل بتعطي الصينية نتيجة جيدة ؟ وبس حبيت إني أوضح إنها بتعطي نتيجة ممتازة .

      إستغرابي كان إن كيف نفس الخبز تكون طريقته مختلفه من شخص لشخص لذي الدرجة الكبيره. الخبز اللي مصنوع بالبيكنج باودر أو بيكنج صودا هذا نوع خاص من المعجنات يسمونهم الخبز السريع ( تحت نفس المجموعة نلاقي الوافل و البان كيك و المفن ) ، بينما الخبز اللي مصنوع من خميرة هذا نوع معجنات ثاني تماما وله شروطه و أحكامة اللي تختلف بشكل كبير عن الخبز السريع .. البيكنج باودر ما يعتبر بديل للخميرة لأنه ضعيف ويشتغل لفترات بسيطة وما يقدر يرفع الخبز بنفس الطريقة اللي الخميرة ترفعها . غير كذا البيكنج باودر ما يعطي طعم زي ما الخميرة تعطي وعشان كذا النان المصونع ببيكنج باودر يختلف في الطعم عن النان الأصلي .

      1. bent el deera

        مشكور اخوي وما قصرت
        نورتني بالنسبه للبيكنغ بودر
        اعترف اني جاهله بهالاشياء او ما قدرت اربط خيوطها مع بعض .. ذكرتني الحين بالخبز الايرلندي ماذكر ان من مقاديره خميره بس يعتبر خبز وغني ما شاء الله نفس الشي احس بالمفن قوامه وغناه خبزي هههه

        يعطيك العافيه مره ثانيه

        والخبز مهما اختلف احسه وهو بالفرن وريحته تارسه البيت مضاد للاكتئاب بالنسبه لي :>

        1. Top Chef

          الخبز الأيرلندي فعلا خبز سريع زي ماقلتي ما معه خميرة و المفن بعد ولو إن الناس يعتبرونه كيك إلا إنه خبز سريع بعد ..

  16. غير معروف

    ماشاءالله تبارك الله
    اشتهيته مره رغم اني لسه فاطره
    بس بسألك اخوي لو استخدمت صينيه الفرن ممكن يعطيني نفس النتيجه
    لان صراحه ماعندي صينيه فرن ابي اعدمها هههه !
    ولو بحشيها جبن او اي شي كيف الطريقه ؟!

    1. Top Chef

      هلا والله …

      كتبت في الموضوع .. صينية الفرن ماراح تعطي ولا ربع النتيجة .. هل ينفع طبعا ينفع بيعطيك خبز في النهاية .. هل بيعطيك خبز نان ؟ لأ ! ولا حتى شي قريب منه .

      إذا عالصينية أنصحك أعدمي وحده وخصصيها لذي الأشياء لأني بسوي أشياء كثيييييير بهذي الطريقة ..

  17. غير معروف

    بالنسبة للفرن الشبك يكون على اول رف يعني مرة قريب من النار او ثاني رف

    1. Top Chef

      آآآآخر رف تحت مره كل ما قربتيه من النار أحسن

  18. loly

    صلحتها اليوم ..

    وصلحت لها حشوات , من جد لذييييذه ووطريه

    دخلت صينية التاوه او التيفال المسطحه اللي نصلح عليها البانكيك داخل الفرن تحت
    واذا خلص الخبز من تحت احطه بصينيه واكون رافعه الشبك حق الفرن فوق وادخلها تتحمر من فوق
    وبعدين ادخل الرد الثاني .. سريع وماخذ معي وقت وعطاني نتيجه حلوه وجداً طري

    يعطييييييك العافيه ..

    1. Top Chef

      الله يعافيك …

      بالعافية على قلبك .. بس أنتبهي من التيفال تراه ما ينفع يدخل الفرن .. بعض الأنواع بتتقطع عليك ويصير الأكل يلصق عليها بعد فترة

  19. غير معروف

    تكفى طلبتك

    غيير صوانيك تحوم الكبد وتجيب المرض

    1. Top Chef

      سويي نان زي ما سويت وصوريلي صينيتك بعدها D:

  20. هدى

    الحين انت تقول نسخن الفرن من تحت بس

    وشلون يتحمر الوجه

    1. Top Chef

      لازم تفهمين إن الفرن ما يطبخ الأكل بحرارة مباشرة !! .. وش فرق الفرن عن البوتوجاز لو كذا ؟ الفرن فكرته إنه يحتر وبعدين الهواء الحار يحيط بالأكل من كل مكان وهذا يوفر حراره محيطة تطبخ الأكل بنفس الدرجة .. يعني الحراره بتجي من فوق ومن تحت ومن الجنب .. وين بتتركز الحرارة يعتمد على أي رف حطيتي الأكل .

  21. غير معروف

    يا هلا والله

    بدينا بالشغل الهندي هههههه

    زين هالفترة دخلت على الاكلات او الاطباق المالحة من اول نفسي اشوف اطباق مالحة غير الباستاوالبيتزا

    صراحة ما اخفيك كنت اسوي خبز هندي واشكال كثيرة لكن اختك تعبت وراسها يدوخ بين الطبخ والخبز

    يعني اسوي الايدامات الهندية واخلي الخبز من المخبز هههه

    يسلمو ايدياتك يا اخوي وعساك على القوة ماقصرت سلمت وسلمت يدينك والله

    1. Top Chef

      هلا والله …

      موضوع الباستا كان نازل من زمان ( مدري إذا شفتي الموضوع القديم حقه ؟ ) ما حبيت أنزله بشكل مقطع فنزلته كله دفعه وحده عشان أغطي اللي أقدر عليه بشكل مفصل .

      الإيدامات ماتاخذ شغل كثير هي شي تخلينه يطبخ عالنار يعني غالبا بتكونين فاضيه و أنتي تشتغلين عالعجين بس زي ماقلتي الواحد يكسل أكيد .. إذا عندك مخابز تسوي خبز زي الناس ليش لأ بس زي حالتي هنا مافيه مخابز عربيه أو هنديه .

      1. غير معروف

        لا وانت الصادق اذا اشتهيت اكله مضبوط صح عندي شغالة اهلي وشغالة جيراني كلهم هنديات اطلبة منهم ومايمنع ايدام على مزاجها خصوصا العدس بالكاري شيييييييي ويجيك مفلفل وعلى كيف كيفك

  22. Top Chef

    انا من الناس اللي جربوا بالنان وسالت ويمكن كمان سالتك عن وصفه متميزه له
    فعلا له نكهه مميزه والمحشي بالجبن اكثر واكثر
    ومن ضمن تجاربي بعد .. بعد مايستوي من تحت احط عليه حشوة بيتزا صوص وجبن وفطر وبهارات بيتزا
    يكون شي لذيذ < طريقة نايجيلا :)

    تسلم على الطريقة واجربها قريب

    1. Top Chef

      هلا والله …

      بيتزا النان قد جربتها هنا في مطعم ، كانت الحشوة حلوه بس صراحة ككل موب شي أسويه يعني مافيها شي مميز.. أحس يعني لو بسوي بيتزا أسوي عجينة بيتزا صحيحة أطعم .. بس لو كان عندي نان زايد ومدري وش أسوي فيه ممكن وقتها أسويه بيتزا …

      الله يسلمك وننتظر رأيك في الطريقة .

  1. البتر تشيكن الهندي (دجاج بالزبدة) .. Indian Butter Chicken » Top Chef Blog .. مدونة توب شيف

    […] البيتزا الإيطالية .. Italian Pizza » Top Chef Blog .. مدونة توب شيف على خبز النان .. Naan Bread […]

  2. البيتزا الإيطالية .. Italian Pizza » Top Chef Blog .. مدونة توب شيف

    […] مقلوبة وتحطونها زي الحجر بالضبط زي ماسويت في موضوع خبز النان . الصينية راح توصل الحراره بسرعه للبيتزا بس راح تخسر […]

  3. البتر تشيكن الهندي (دجاج بالزبدة) .. Indian Butter Chicken « مدونة توب شيف … Top Chef

    […] نذوق مرة ثانية ونعدل الطعم بعدين نقدم البتر تشيكن مع خبز نان ، رز أبيض أو أي شي ثاني […]

  4. خبز نان بالزبده لذيذ « My Kitchen

    […] غربته… جربوها صدقوني مرح تندمون لينك الوصفه الاصلي http://topchefcooks.com/2011/04/15/naan-bread-2   كنت حاطه ببالي هالوصفه اسويها بالويكند مع حمسات بس […]

  5. البيتزا الإيطالية .. Italian Pizza « مدونة توب شيف … Top Chef

    […] مقلوبة وتحطونها زي الحجر بالضبط زي ماسويت في موضوع خبز النان . الصينية راح توصل الحراره بسرعه للبيتزا بس راح تخسر […]

  6. خبز نان بالزبده لذيذ | My Kitchen

    […] غربته… جربوها صدقوني مرح تندمون لينك الوصفه الاصلي http://topchefcooks.com/2011/04/15/naan-bread-2/ كنت حاطه ببالي هالوصفه اسويها بالويكند مع حمسات بس […]

  7. الهند : صاج بانيير .. Saag Paneer « مدونة توب شيف … Top Chef

    […] مفروم مع قطع بانيير بدال اللحم أو الدجاج ومقدمة مع خبز نان أو رز أبيض عادي. الأكله جدا لذيذه وجدا سهلة وهي طعم […]

  8. دجاج كاري مدراس بجوز الهند .. Madras Chicken Curry with Coconut « مدونة توب شيف … Top Chef

    […] من حليب جوز الهند وكزبرة مفرومه. نقدمه مع رز أبيض أو مع خبز نان […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: