أسبانيا : بلح البحر ( مسل ) بالزعفران .. Mussels with Leeks and Saffron

هلا والله …

هذا الموضوع تابع لفعالية حول العالم في ٣٠ يوم.

المطبخ الأسباني واحد من أهم المطابخ حولين العالم. لو نظرنا للمطبخ الأسباني راح نلاقي إنه يميل للنكهات القويه أكثر من الهادية . إذا تبون تتخيلون الطعم ، تخيلوا المطبخ المكسيكي مع الشمال أفريقي و الفرنسي وبعد أكل البحر المتوسط في طبق واحد وهذي هي النكهة الأسبانية تقريا.

الطبق اللي بسويه اليوم جدا سهل ، هو عبارة عن بلح البحر أو المسل mussels مطبوخة بالبخار مع صوص بنكهة أسبانية. المسل نوع من أنواع الصدفيات زي المحار تقريبا بس طعمه مختلف شوي ، يجي بقشرة سوداء أو في حالات نادرة تكون مايلة للخضرة. مدري الصراحة عن توفر المسل عندنا في السعودية ( ولازم تكون حية !! )  بس في حال ما لقيتوها تقدرون تستخدمون المحار العادي ( بعد لازم يكون حي ).

المقادير :

ملعقتين كبار زبدة

حبتين كراث كبيره ( كراث هندي ) منظفة ومقطعة شرايح نحيفة. الجزأ الأبيض بس .

تقريبا ٥٠ حبة مسل mussels منظفة 

ملعقة صغيرة خل عنب أبيض أو عصير ليمون

شوي زعفران

رشة بابريكا

١/٢ كوب قشطة خفق

بقدونس مفروم للتزيين

خبز فرنسي أو إيطالي محمص للتغميس

* الكراث الهندي طعمه تقريبا زي البصل بس أهدأ و أحلى شوي. تقدرون تستخدمون بصل أخضر أو حتى بصل عادي كبديل . إذا جيتوا تستخدمون الكراث الجزأ المستخدم هو الجزأ الأبيض و الأخضر الفاتح بس، في هذي الوصفة نبي بس الجزأ الأبيض.



* إذا ما لقيتوا مسل تقدرون تستخدمون محار أبيض عادي أو أي نوع محار ثاني أهم شي تأكدوا إنه حي و يفضل تطبخونه بنفس اليوم. أول ما تشترون أي صدفيات شيلوا الحبات اللي قشرتهم مكسوره. بعدين إذا لقيتوا حبات مفتوحة أضربوها ضرب خفيف و إذا ما قفلت الفتحة يعني إنها ميتة و أرموها بعد. إذا كنتوا بتحفظون الصدفيات حطوها في صحن و حطوا فوقها منشفة مرطبة بمويه وحطوها في أبرد مكان في الثلاجة، لاتغطونها في مويه ولا تحفظونها في الفريزر و طبعا لا تحطونها في كيس في الثلاجه تذكروا إنها ماتزال حية. الشروط اللي ذكرت فوق لا تتهاونون فيها أبدا لأن التسمم من الأكل البحري موب موضوع هين أبدا.

* تنظيف المسل mussels : إذا سويتوا الخطوات اللي فوق وشلتوا الحبات الميته و اللي قشرتها مكسوره غالبا التنظيف موب ضروري خصوصا إذا كانت المسل من مزرعة بس التأكد حلو. عشان تنظفون المسل حطوها في مويه باردة قبل الطبخ بنص ساعة ، المسل راح تشرب المويه وراح تطلع أي غبار أو شي موجود داخلها. بعد النقع صفوها من المويه و أمسكوها حبة حبة و شيلوا أي أشياء عالقة فيها زي الطحالب أو غيرها بإستخدام فرشة قويه ، بعض الحبات راح تلاقون عالجنب فيه زي “الشنب” طالع أنتفوه بإنكم تسحبونه وبيطلع معكم بسهولة. تنظيف المسل وخصوصا نتف الشنب لازم يصير قبل الطبخ بفترة قصيرة لأن المسل تموت إذا راح الشنب.

الطريقة :

المسل أسهل و أسرع شي في العالم ينطبخ. وقت الطبخ مايتعدى ١٠ دقايق .

نذوب الزبدة على حرارة وسط بعدين نحط الكراث مع رشة ملح إلين يذبل. نحط الخل ونطبخة إلين تقريبا يتبخر بعدين نحط الكريمة و الزعفران و البابريكا ونخليها تطبخ على حرارة هادية إلين تنقص شوي. الحين نحط المسل و نغطي القدر ونخليها تطبخ تقريبا ٥ دقايق إلين تفتح المسل معنا. نشيل الحبات اللي ما فتحت بعدين نرش ملح وفلفل حسب الرغبة و نزينها بالبقدونس.

spanish mussels


مسلز إسبانية


15 comments

3 pings

Skip to comment form

    • Anonymous on 8 September, 2012 at 8:06 am
    • Reply

    مشاء الله شكله يشهي

  1. سؤال

    لازم تنطبخ واهي حيه -_- ؟؟

    يعني ما اقدر اموتهم بالاول وبعدين اطبخهم على طول TTOTT

    1. ههههه خايفة على مشاعرهم ؟

  2. يعطيك العافيه شيف قد اكلتها عند شخص طعمها جيد علني الطريقه تقريباً نفس طريقتك شيف بس حذرني من انها لازم تكون حيه فظاهر اشتر كيلو يطلعلك نصف كيلو يعطيك العفيه شيف

    1. ؟ طيب ذكرت هذا في الموضوع و أكدت إنها لازم تكون حيه ؟

      بالنسبة للعدد هي تعتمد حسب المزرعه و الشخص اللي يبيعك ، في كندا كونها تجينا طازه مره ومن مكان قريب ألاقي كم حبه بس خربانه بس لو كان من مكان موب مضمون أو كان بري موب مزروع بتلاقين كثير أحيانا أكثر من نص الكمية.

    • 2011 on 19 October, 2011 at 12:20 am
    • Reply

    ابي اعرف وشلون ينوكل $=

    1. ههههه سؤال حلو ترى ناس كثير ياكلونه خطأ. تاخذ حبه بيدك وتفك الصدف نصين. بعدين تستخدم وحده من الأنصاص زي الملعقة وتطلع اللحم اللي في الحبات الثانيه.

  3. صدف!!!!!

    جريئه على اهل الجبال خخخخ
    بس ياليت توصف لي طعمه يعني مثل ايش تقريبا؟؟؟اقرب للربيان او السمك؟؟واللا شيء ثاني
    لان احيان ادخل بوفيهات بحريه وتطير عيوني صراحه ولااتجرأ عليها

    يعطيك العافيه وجزيت خيرااااا

    1. كنكهة أقرب للربيان تقريبا … عموما طعمه خاص وبعد يختلف من نوع لنوع بشكل كبير ..

      جربيه مافيه شي يستاهل كل ذا الخوف وش أقصى شي ممكن يصيرلو ما أعجبك ؟

    • um nwaf on 15 May, 2011 at 3:07 pm
    • Reply

    ماشاء الله نقله نوعية كنا أمس وين وصرنا اليوم وين 🙂

    بس اسمحي في كم سؤال
    كيف طعم الصدف؟
    ويتقدم الطبق لوحده أو معاه اضافات ؟ لأني أشوفه مايشبع !

    1. مدري كيف أوصف الطعم هههه طعمه بحري ، لين ، وبنكهة خفيفة من الإضافات .. لذيذ وبس …

      تقدرين تقدمين معه إضافات زي بطاطس مقلي مثلا أو تقدرين تقدمينه كمقبلات بس بالنسبة لي أحبها لحالها وتكون وجبة مثالية ولا شي جنبها إلا خبز حامض ممتاز ولا أروع. عموما الكمية اللي تشوفين في الصورة هذي حقت شخص واحد بس ! الكمية اللي حاط في الوصفة هذي حقت شخصين .

    • Anonymous on 15 May, 2011 at 9:43 am
    • Reply

    معليه بس سؤال
    كيف طريقة اكل الطبق؟
    لأنو باين انو شهي …

    1. الطريقة الصح هي إنك تمسكين أول حبة وتاكلين اللي داخلها بعدين تكسرين الصدفة نصين وتستخدمين واحد من الأنصاص زي الملعقة . آخر شي بعد ما يخلص كل شي تغمسين الخبز في المرق الرهيب اللي باقي .

    • Anonymous on 15 May, 2011 at 3:25 am
    • Reply

    صباحك قشطة يا ريس

    بس الموضوع اليوم ماش لك عليه حبتين

    يعني ما حطيت الا شي ما القاه هنا “السعودية” لالالا تبي واحد ثاني مالي شغل

    على فكرة دايم اشوف في السوبرماركت اصداف كيف اعرف اذا كانت حية او ميته او حتى سوق السمك بم اني مو في مدينة ساحيلة وشلون اميزه ؟؟؟

    على فكرة سالتك عن احلى حق الكسكس بس مارديت علي ابيه بالتفصيل او عطني اسمه ابحث عنه براحتي يكفي انه محتاس بروحك >_<

    1. غالبا الأصداف لو ماتت تفتح ، يمكن تكون فاتحة كامل أو فتحة صغيرة مره عشان كذا دايما تأكدي بإنك تضربين القشرة بأصبعك إذا قفلت يعني حية إذا لأ يعني ميتة.

      حلى الكسكي هو تقريبا بودنج تقدرين تقولين ..سخني نص كوب حليب مع ٣ ملاعق كبيرة سكر ( أو حسب الرغبة ) وعود فانيلا وربع كوب فواكه مجففة (على كيفك أي نوع ينفع ) على حرارة وسط إلين يوصل غليه بعدين طفي النار وغطيه وخليه يتطعم ١٠ دقايق . صبي الخليط على كوب و نص كسكسي مطبوخ وزيدي عليه كوب زبادي وحركيهم مع بعض . وزعي الخليط على كاسات وخليه في الثلاجه يبرد ساعة بعدين رشية بقرفة قبل التقديم .. لو تبين تعطينه شوي قرمشة كسري فوق البودنج شوي كوكيز زنجبيل .

  1. […] أسبانيا : بلح البحر ( مسل ) بالزعفران […]

  2. […] أسبانيا : بلح البحر ( مسل ) بالزعفران […]

  3. […] الكراث الهندي اللي ما يعرفه يشوف موضوع أسبانيا هنا ANY CHARACTER […]

Leave a Reply

Your email address will not be published.

%d bloggers like this: