«

»

مارس 24 2011

حشوة الفطر ( دوكسل الفطر ) .. Mushroom Duxelle

هلا والله …

 

الدوكسل نوع من أنواع حشوات الفطر المستخدمة بكثره في الأكل الفرنسي، الفرنسيين يحطون الدوكسيل في كل شي سواء كان ساندوتش ، تارت ، باستا ، طبق جانبي ، كريب ، أو حتى حشوة للحم. لا تخلون الإسم يخوفكم أبدا الدوكسيل عبارة عن فطر مطبوخ بزبده مع إضافات ثانيه بس.

 

أي نوعية فطر أو تشكيلة ممكن تستخدم عشان تسوون دوكسيل ، كل نوع بيعطي دوكسيل طعمه مختلف عن الثاني. ممكن إستخدام فطر مجفف عشان يعطي طعم فطر قوي أو خليط من الفطر المجفف و الطازج وهذا بيعطي طعم فطر قوي وبنفس الوقت قوام حلو من الفطر الطازج.

 

المقادير :

 

علبتين فطر أبيض أو لو كان متوفر أختاروا تشكيله فطر بري مقطعه شرايح سميكة شوي.

نص بصله مقطعه صغار أو لو كان متوفر حبة بصل فرنسي shallot

فصين ثوم مقطعه صغار

4 ملاعق كبيره زبده

ملعقة كبيرة زيت

ملح وفلفل

عصير ليمون

زعتر بري thyme طازج .. إذا كان موجود

بقدونس

 

 

الطريقة :

 

نسخن مقله على حراره أعلى من وسط بشوي ونخليها تحتر شوي بعدين نحط ملعقة كبيره زبده وملعقة كبيره زيت.

 

بعد ما تذوب الزبده نحط الفطر كله مع رشة ملح وفلفل ونقلبه من وقت لوقت إلين يتحمر .

 


 

فطر دوكسيل

الحين نزلوا الحراره شوي وحطوا ملعقتين زيادة زبده و بعدين البصل الفرنسي أو العادي و الثوم و الزعتر و أطبخوهم إلين يذبل البصل.

 

mushroom duxell

 

آخر شي أعصروا الليمونه وحطوا البقدونس وذوقوا الخليط وعدلوا الملح والفلفل بعدين حطوا باقي الزبده وطفوا النار.

 

 

 

رافيولي مفتوحة بالفطر .. Open Faced Mushroom Ravioli :

 

هي إسمها رافيولي مفتوحة بس هي أقرب شي لها اللازانيا تقريبا ..

 

نسوي عجينة باستا على شكل لازانيا زي ما شرحت في موضوع الباستا الطازه بعدين نقطعها مربعات حسب حجم الرافيولي اللي نبي. الحين نسلق الباستا زي ما شرحت في الموضوع.

 

الحين نحط اللزانيا على صحن ونحط فوقه دوكسيل فطر بعدين شريحة لازانيا ثانيه ودوكسيل فطر بعدين شريحة لازانيا ثانيه .. آخر شي نحط فوقه تويي بارمزان عشان يعطيه شوي قرمشة ونقدمه مع الصوص اللي نحب . تبون صوص فطر تبون صوص طماط اللي تحبون .

 

ravioli mushroom

 

مشروم رافيولي

 

mushroom ravioli

 

عن الكاتب

Top Chef

11 comments

Skip to comment form

  1. الاوتار

    مشكور على الوصفة وعلى طاري الفطر قريت موضوع عن زراعة الفطر الصراحة تعور الراس بس ممكن احد يستفيد منها

  2. عاسفة الخيل

    بسم الله تبارك الرحمن ..ما شاء الله شغل مرتب وشرح واضح ..يعطيك الف الف عاااااااافية..للاسف ما عرفت مدونتك الا قبل يومين …واحس انه راح على كثير …من ناحية الفطر انا ما اشوف عندنا في جدة غير نوع واحد الى هو الفطر الابيض .بس ماشي حالة ..سؤالى هل الفطر المجفف يصلح بعد ما ننقعة بالماء لمدة نصف ساعة ؟

    1. Top Chef

      الفطر المجفف يستخدم غالبا للنكهة بس هو مايعطي نفس قوام الفطر الطازج وعشان كذا بيكون شوي مطاطي لو أستخدمتيه خليك عالطازج أفضل.

  3. نوسا

    تسلم بجد على هالحشوه جدا رائعه
    لاحظت انو الفطر يتشرب النكهات كتير والحوامض والموالح
    يعني مرا اضفت دبس رمان عليه ملعقة صغيره جدا لكن سار طعمو دبس رمان وفلفل اسود
    وانا استخدم المعلب لكن ماقد جربت الطازج للاسف اهلي مايتقبلوه نهائيا

    مشكور مرا تااانيه على هالحشوه الرائعه
    انت مبدع بكل اطباقك

  4. j0j0

    ana a3sh8 al_f6er o0 7eel 3jbtny al_wa9fah o0 al_9ra7h ahneek 3la heek wa9fat >>yslmo0

  5. *سفونه الليمونه*

    انا بصراحه احب الفطر على ان طعمه مو باين ابد يعني اللي يجهله يشوف وجوده زي عدمه بس دايما لما اخذ طبق يحوي الفطر يعجبني مرررره مدري صدفه او لا
    يعني الفقع ريحته طالعه قبل طبخه لكن هذا مافيه اي طعم؟؟
    القهر اللي حولي ومجتمعي من زوج واهل كلهم مايحبووون وجود الفطر:(

    طيب اخوي يعني هل فيه فطر معين اختاره لانه الافضل دايما؟؟وهل فيه فطر سيء اتجنبه؟

    1. Top Chef

      الفطر طعمه موب باين ؟؟؟ وشلون هذي ؟ إذا كنتي تستخدمين معلب فأكيد موب باين طعمه …

      الفطر يعتبر محسن نكهة ، فطبيعي إن الأكل اللي بفطر يكون ألذ حتى لو كان الفطر كميته بسيطة .. في الطبخ الفرنسي ما يرمون الجذر و القشور حقت الفطر ( في حال قشروه أحيانا ) .. يضيفونها مع الشوربات و الأكل عموما كمحسن نكهة زي الإم إس جي تقريبا بس طبيعي وما يضر …

      الفقع أنتي تتكلمين عن شي ثاني تماما .. المشكلة عندنا ماتلاقين إلا نوع فطر واحد اللي هو الأبيض وهذا أخف أنواع الفطر نكهة بس مع هذا له طعم خاص وواضح ..

      ما أحب كلمة الأفضل دائما لأني أحسها تظلم أشياء كثير .. لكل شي طعم خاص ويمشي مع نكهات غير الشي الثاني فأفضل لو تحاولين تتعلمين الفروقات بين الأنواع وكيف كل نوع يبان أطعم في طبق غير الثاني ..

      وش أحسن الدجاج أو اللحم ؟؟؟ ما أعتقد فيه جواب ؟ لأن مهما كان الواحد يحب واحد منهم أكثر من الثاني إلا ما يكون فيه أطباق تفشل بدون الثاني ..

  6. رنا

    صباح الورد
    ف جسد الثقافة ننتظرك
    وحشتنا… طولت الغياب

    1. Top Chef

      هلا والله ..

      أطلطل عليكم من فترة لفترة بس بالسر هههه

  7. غير معروف

    السلام عليكم
    انا اشوف في السوبر ماركت فطر حجمه كبير ويشبه البنجر وشكله مثل جوز الهند
    هل هو المقصود بالفطر البري؟
    طيب كيف نستخدمه؟هل هو نفس استخدام الفطر الابيض؟وليه ما يكثر استخدامه في الوصفات؟
    وهل نقشره؟

    1. Top Chef

      وعليكم السلام …

      متأكده إنه فطر ؟ إذا فطر يمديك تستخدمينه ..

      الفطر أنواع كثيييييييييييير كثير مره بعد ، الفطر البري هو فطر يكون موسمي يعني زي الفقع تقريبا شي يجيك في أوقات من السنة مافيه نوع واحد بري بس فيه أنواع كثير مره هو تقريبا أي فطر غير مزروع.

      مدري عن النوع اللي تقصدين صراحة ماقد شفت شي زي كذا .. بس إذا فطر فهو ينوكل عادي بدون تقشير أو أي شي .. مايكثر في الوصفات مين قال ؟؟؟ بالعكس بس هو غالبا أصعب تلاقينه من الفطر العادي وعشان كذا أغلب الوصفات العربيه بيكتبلك فطر عادي غير طبعا إن الناس تتخوف من كل شي جديد

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: