هلا والله ….
.
المولتن كيك وحدة من أشهر وصفات الحلويات حولين العالم. الحلى هذا جدا بسيط ، مقاديره متوفره وسهلة ، سهل نغير نكهته بحيث نخليه يتماشى مع أي مينيو بنقدم و الأهم من كل هذا هو الدراما اللي يوفرها إذا جاء الشخص يكسر الحلى ويشوف الوسط السايل ينزل ويسيح في الصحن و عشان كذا الناس يحبونه و المطاعم يحبونه. المولتن كيك بتلاقونه بكذا إسم ، فيه ناس يسمونه لافا كيك lava cake بسبب الشكولاته اللي تسيح كأنها لافا (حمم بركانية) ، وفيه ناس يسمونه تشوكلت فوندانت chocolate fondant وفيه أسامي ثانيه منتشره زي تشوكلت بودينج وغيرها.
.
فيه ناس ومطاعم كثير وخصوصا عندنا في السعودية يسمون المولتن كيك “سوفليه شكولاته” هذا خطأ كبير (وبيني وبينكم أعتبره بعد غش) كون السوفليه كائن مختلف تماما. السوفليه نوع من الأكلات ممكن تكون حلوة أو مالحة وهو عبارة عن أساس نكهة (شكولاته ، كريم باتسييه أو حتى صوص أبيض أو باشاميل) مرفوع بمرانج ومطبوخ في الفرن إلين يطلعله تاج أو قبه عاليه ويستوي من داخل تماما. قوام السوفليه يكون خفيف ورطب (تقريبا زي السيريلاك) بس يكون مستوي من داخل تماما يعني ما يكون سايل . السوفليه بشكل عام صعب ومعقد ويحتاج دقة في العمل ويعتبر عقدة لكثير طباخين. المولتن كيك هو نوع من أنواع الكيك اللي بدون طحين flourless cake و اللي يكون مطبوخ إلين ما تستوي الأطراف بس سايل من داخل.
.
أي واحد بيكتب مولتن كيك أو سوفليه شكولاته بالعربي في جوجل بيلاقي آلاف الوصفات وكثير من هذي الوصفات حاولت أفهمها وعجزت ؟ الوصفه الأصليه تحتاج ٤ مكونات أساسية تقريبا (بيض ، شكولاته ، زبده وسكر) وهي المستخدمه في كل المطاعم حتى أفخم المطاعم تستخدمها ودايما تضبط وبدون مشاكل. كثير من الوصفات اللي شفت تستخدم مكونات مالها أي داعي مثل خليط كيك شكولاته مثلا ، قشطة خفق ، نسكويك ؟ ، حليب بودرة أو حتى بيكنج باودر وغيرهم كثير وهذي كلها مالها أي داعي هي ما تضيف أي شي للكيك هي بس تخرب في الطعم و القوام عن الطعم اللي مفروض يكون.
.
الوصفة اللي راح أنزل هنا نزلتها قبل وكثير ناس طبقوها وبنجاح. أغلب الناس اللي عانوا من مشاكل مع الوصفه كانت لسببين أساسيين يا إنهم غيروا في الوصفه من راسهم سواء بتبديل مكون أو تغير الكميات أو حساب خطأ للمقادير أو إنهم غلطوا في التوقيت اللي هو مفتاح هذي الوصفه. أطبخوها أقل وراح تتكسر إذا طلعتوها من القالب ، أطبخوها أكثر وبتجمد وماراح تصير سايلة من داخل زي ما هي مفروض تكون. جودة هذا الحلى بتعتمد على جودة الشكولاته أولا و أخيرا. أستخدموا أحسن أحسن نوعية شكولاته تلقونها لهذا الحلى بيفرق كثير عن النوعيات الرخيصة ، تكلمت عن الشكولاته بالتفصيل في موضوع الشكولاته يفضل تقرأونه إذا ما تعرفون كيف تميزون بين الشكولاته.
.
.
المقادير :
.
٥٦ جرام زبدة غير مملحة (تقريبا نص أصبع أمريكي) مقطعه مكعبات صغيره + شوي زيادة لدهن القوالب
٥٦ جرام شكولاته غامقة Dark Chocolate من أحسن نوع مقطعة صغار
١/٣ كوب سكر أبيض
ملعقتين كبار بودرة كاكاو
بيضة + صفار بيضتين
رشه ملح
ملعقتين صغار طحين
.
.
* الشكولاته الغامقة لاتزيد نسبة الكاكو فيها عن ٧٠٪ (راجعوا موضوع الشكولاته إذا ما تفهمون وش أقصد). إذا بتستخدمون شكولاته أغمق يمكن تحتاجون تزودون السكر شوي عن اللي حاط. أنا قللت السكر شوي في الوصفه لأن كثير من اللي أستخدموا شكولاتات أفتح لقوا إنها حلوة أكثر من اللازم.
.
* الوصفة تسوي تقريبا حبتين إلى ثلاث حبات مولتن كيك بس تقدرون تضاعفون المقادير حسب الحاجة.
.
.
الطريقة :
.
نشغل الفرن على ٣٥٠ فهرنهايت.
.
ندهن صحون سيراميك Ramekins (يعني صحون سوفليه) من داخل بزبدة دافيه بشكل جيد ونتأكد إننا غطينا كل المناطق بعدين ندخلها الثلاجه إلين نحتاجها.
.
نخلط السكر مع الملح و الكاكاو البودرة في صحن صغير.
.
نسوي حمام مائي عشان نذوب الشكولاته. نحط شوي مويه في قدر صغير ونحط فوقه صحن ستانلس أو قزاز بحيث الصحن ما يلمس المويه اللي تحته. نشغل النار إلين توصل المويه لغليه جدا جدا خفيفه بعدين نحط الشكولاته و الزبده في الصحن اللي فوق. نحرك الشكولاته و الزبده من وقت لوقت و أول ما يذوبون نشيل الخليط من النار (لا تخلونه أكثر من اللازم عشان لا تنحرق الشكولاته).
.
.
نضيف خليط الكاكاو و السكر و الملح على الشكولاته الذايبة ونحرك إلين يصير خليط ناعم بعدين نضيف صفار البيض ونخلطهم مع الخليط وبعدين البيضه الكاملة إلين يدخلون في الخليط و آخر شي الطحين.
.
.
نوزع الخليط على صحون السوفليه بالتساوي. الحين نقدر نطبخ الخليط علطول أو نقدر نحطه في الثلاجه لوقت ثاني (بعد ما نغطيه بنايلون) أو حتى لليوم الثاني.
.
ندخل الصحون الفرن في الرف الأوسط ونخليها إلين ما تصير الأطراف مستويه شوي وجامدة بس الوسط يلمع و إذا دخلنا عود يطلع وهو رطب تقريبا أخذ معي ٢٠ دقيقة بس يمكن يختلف عندكم، أفضل تبدون تشيكون عليها قبل الوقت وتطلعونها إذا أستوت وصارت زي ما وصفت.
.
.
الحين نفك الأطراف بسكين نحيف بعدين نقلبها على صحن شوي شوي ونرش عليها شوي سكر مطحون للتزيين لو نبي. نقدر ناكلها لحالها أو نقدمها مع إسكريم أو صوص فواكه أو فواكه كاملة أو كريمة مخفوقة (زي ما سويت بس مع شوي سكر عشان تكسر الحلاوة).
.
.
200 comments
Skip to comment form
السلام عليكم ورحمة الله وبركاته
الشيف المحترم توب شيف الصراحه بخاطري كلمه وهي ان اصفك بالمدرسه فعلا كل ما اخذت وصفه منك اخذ فكره شامله وتاريخ كامل لهالوصفه وهذا فعلا الشي اللي انا ارغبه واحبه جزاك الله عنا خير الجزاء وجعله في ميزان اعمالك لاني لا استطيع المشاركه في دوات الطبخ وطافني كثير منها ومن مدونتك ومشاركاتك بالمنتديات استفدت منك الكثيربعد هذي المقدمه المتواضعه احب اسألك عن نوع من انواع المواتن ان كان فعلا يسمى بهذا الاسم راح اشرح لك شكل النوع اللي ذقته وكان مره لذييذ وهو طلبته من جوكليت نييس في الكويت عندنا حاولت اكتشف طريقتهم وناويه اجرب قلت قبل اجرب باخذ رايك يمكن يطلع نفس تخميني او ممكن يكون عندك فكره اكثر مني هو كان عباره عن قطعة كيك تشبه خليط البيتي كروكر والغريب الشكولاته ماتطلع منها لا الشكولاته تحت هذي القطعه من الكيك سايله وساخنه وتظل لثاني يوم وهي سايله ماتثقل ابدا وحابه اعرف الطريقه منك اذا عنك فكره وتفيدني الله يجزاك خير
Author
وعليكم السلام والرحمة ….
احرجتيني بكلامك اختي، انا مؤمن بهذي الطريقة في فهم الطبخ موب بس تعلم وصفات تطلع شي لذيذ وخلاص. تذوق الاكل عملية جدا معقدة ما تتم بس في الفم زي ما يؤمن كثيرين هي لها علاقة كبيرة بالنظر والسمع والشم وحتى الذاكرة. كمثال بسيط الاكلات اللي الواحد تربى عليها من الطفولة او اكلها في مناسبة سعيدة دايما لها معزة خاصة وطعم مختلف وشعور نستالجا زي ما يقولون مع العلم ان نفس الاكلة هذي ماراح يكون لها نفس الطعم عند شخص ما عاش نفس التجربة حقت الشخص الاول. بعدت عن الموضوع بس النقطة هي ان تعلم كل شي عن الطبق بيساعد الشخص يفهم الطبخ بشكل افضل.
بخصوص اللي تقصدين ما اعرف بالضبط بس اعتقد انه كيك عادي مفرغ من الوسط ومحشي صوص شكولاته وبعدين مسخن. بالضبط نفس الشي اللي يعطونك اياه تشيليز
مرحبا توب شيف
صور تجربتي الى السوفلية بس تشقق من فوق .. ما كنت ادري متي يستوي .. انت تقول اذا طلع عود نظيف او عليه شوي .. طيب لو سويته مرة تانية وكنت ابي اشوفه متى اقدر افتح الفرن ؟
http://im18.gulfup.com/2012-09-02/1346555784372.jpg
.
http://im18.gulfup.com/2012-09-02/1346555784213.jpg
مشكور
Author
هذا شوي مستوي أكثر من اللازم …..
يعني بعد ربع ساعة على أقل شي و فكي الفرن بسرعة.
مرحبا
توب شيف كيف اعرف انو السوفلية استوا ؟
Author
عود يطلع نظيف أو عليه شوي فتات
يعطيييك العافيه شيف ،، جربت المولتن ولذيذ من قلب
بس دسسسم يعني في السنة مرة كويس :p
جربت وصفة السوفليه ،، وحبيت مكوناتها خفيفه ومو دسمة
وجربتها على حذافيرها ض1 وضبطت معاي
http://img02.arabsh.com/uploads/image/2012/09/02/0d37454a60fb06.png
ايش رااايك بالتطبيق ؟! طبعا هذه الوحيدة يلي ضبط التاج البقيه صاروا قبه وتكسروا :/ مع اني مسحت الكل
نجيي للطعم 🙂
انا حبيتها طعمها حلو وخفيف بسس كنت متخيلتها ألذ ض1
طبعا انا الوحيده يلي حبيتها :/ الباقي هازبندي واخوي ما أكلوها >> تحطييم
يحبون الحلاا الدسم ض1 على قولتهم مرة خفيف ومافيه طعم على ماحبوا الطعم وهيك
بس واخيرا جربتهاا 🙂 ويعطيييك الف عافيه شيف
وو ممكن تكثر وصفات الخبز وهيك 🙂
وشكرا >> من اشددد المتابعين لك
Author
ههههه والله ما عرفنالك المولتن دسم و السوفليه خفيف ههههه هم كذا ….
السوفلليه ما أقدر أتخيله يضبط أكثر من كذا ما شاء الله … ناس يقعدون سنين يحاولون يوصلون للنتيجة هذي ترى. هذا طعم السوفليه هو خفيف تقريبا كأنه موس حار لو الواحد اللي يذوقه يذوقه وفي باله شي دسم ثقيل وسايل أكيد بيشوف فيه مشكلة بس هذا هو السوفلية الصدقي.
مرحبا توب شيف لو كنت بسوي قبل وبدخلها الثلاجة !
اذا جيت بخبزها اخليها تصير ع حرارة الغرفة ؟
والمكونات تكون ع حرارة الغرفة صح ؟ لو ما تفرق هنا
Author
من الثلاجة علطول.
المكونات ما تفرق هنا على حرارة الغرفة أو لأ.
شيف ياريت تكتبي المقادير من غير الجرام لأني ماعرفت
Author
ما عرفتي تعلمي الموضوع سهل …
جيبي ميزان بتلاقين زر حق تشغيل الميزان شغليه ، حطي الشكولاته عليه وبيطلع رقم زيدي شكولاته إلين يصير قد الرقم اللي كتبت في الوصفة، شيلي الشكولاته هذي وحطيها في صحن ، الحين طفي الميزان وبعدين شغلي الميزان من جديد وعيدي نفس العملية بس هذي المره عاد بالزبدة وبس أنحلت. إذا واجهتي أي صعوبة مستعد أبسط أكثر لو تبين بس صوريلي الميزان اللي عندك.
جربتها وطلع طعمها ووووااااااو مرررة مع اني تلخبطت فيها شوي ,, بس اهم شي اني استانست يوم اكلتها حسيت اني شيف ماهرة
يعطيك العافية ^_^
طيب شيف يصلح احط ورق زبدة ع القاعدة ؟؟
Author
ما يحتاج بس ما أعتقد فيه مشكله … جربي لو تبي بس منيب متأكد.
سؤال عن Ramekins، اشوف ناس تحطه فوق صينية وبعدين تدخله الفرن هل هذا عشان نفس الاطباق ما تنكسر ولا عشان التحكم بالحرارة؟
Author
أحيانا السبب أبسط من كذا …. غالبا عشان أسهل في التدخيل و التطليع من الفرن خصوصا إذا عندك أكثر من واحد. الأطباق نفسها ما تتكسر بسهولة زي كذا .
بصراحة شرح روعه وان شاءالله بجربها
بِــ̯͡سّ سؤال تتوقع ممگن ينفع أحطهـم بقوالب الربل الخاصة بالفرن ؟؟
Author
قوالب وشو ؟ ما أعرفها والله وريني شكلها
هذولي بِــ̯͡سّ ماادري تطلع الصورة او لا لاني ارسل من الايفون
http://mzn-mall.com/images/uploads/anigif11.gif
وسويتها واحترقت يمكن حرارة الفرن لاني مااعرف اتحكم فـ♡ـيــه مااعرف للدرجات
Author
الفرن لازم يكون مضبووووط والقوالب هذي ما انصح فيها هنا لأن الكيك جدا حساس
جربت اسويها وانكسر معاي الكيك لمااجي اقلبه ودرجة الحرارة اللي تقصدها ١٨٠ س ،؟؟ انَـَY̷̳̜̩̐̌̋O̷̳̜̩̐̌̋U̷̳̜̩̐̌̋ـَتَ قلت ٣٥٠ ف واول مرة سويتها علي ٢٥٠ والظاهر الفرن حرارته سيليزي
المهم لما اقلب الكيك لازم اخليه يبرد واقلبه والا اقبله فورا ؟؟ لانه انكسر الكيك معاي 🙁
Author
الكيك ما يبرد … تقدرين تخلينه دقيقه دقيقتين يبرد بس لا يبرد مره لأنه مستمر يطبخ وهو يبرد.
الكيك غالبا محتاج كم دقيقه في الفرن إذا إنكسر عليك أو يمكن ما دهنتيه من داخل زين. التوقيت هو كل شي في ذا الكيك !! قلت هذا الكلام كثير
طيب ما وضحت نفتح الفرن من فوق او تحت؟
Author
حطيها قاعدة في هذي الوصفة أو غيرها. الفرن ينفتح من تحت إلا إذا الوصفة قالت غير كذا
اخي عملتها وطلعت احس تقيلة مرة يعني شوية كانها عجينة …المرات الي راحت ماحسيت كدا …..المقادير تقريبا مخبوصه لاني عملتها لعشرة أشخاص فحست ام الحوسة في طريقة اقدر اصلح الموضوع بيها ولا لا ؟؟
وايش السبب الي خلاها تسير زي العجينة ؟؟ احس والله اعلم انو بودرة الكاكو هي السبب لاني اول ماحطيتها تقل بشكل غريب .. اخر سؤال تتوقع قوامها كيف بعد ما تطلع من الفرن ؟؟ انا مرعوبة جداً ،،،، وشكراً اخي
Author
المقادير تكون بالضبط وماراح تخبص معك. في الحلويات و المعجنات الدقة مطلوبة.
أنتي وحظك الصراحة ما أعرف كيف تطلع معك ممكن تضبط ممكن لأ وممكن تطلع أحسن حتى من اللي أنا حاط هههه يعني الله معك ….
السلآم عليكم ..
اخوي بالنسبه للشوكولاته ينفع احط جالكسي ساده ..؟ اذا نيفع كم حبه؟
و الزبده عندي زبده المراعي صغار الوحده تقريبا 10 غرام .. تنفع ؟ والا اجيب اصبع؟
Author
وعليكم السلام و الرحمة ….
نفس نوعية الشكولاته اللي طالب ….
الزبدة زبدة سواء كانت في علب ١٠ جرام أو في علب ١٠ كيلو ما يفرق المهم إنك تحطين نفس الكمية اللي مطلوبه في الوصفة.
الله يعطيك العافية
أنا عندي مشكلة إن فرني يشتغل من فوق وتحت بنفس الوقت :/
هل بيضبط المولتن ولا أغطيه بقصدير مثلاً .؟؟
Author
بيضبط عادي ما يحتاج تغطينه بشي.
نسبة الكاوكا مو مذكوره
الكوكاو جاي رابع صنف بعد السكر والزيت وزبدة الكاوكاو
اذا نفس الشكولاته الغامقه فهو نفس الطعم
بالاضافه الى الزيت ضفت شوية مويه
بالنسبه للرقم لقيت على الجنب ارقام ثلاثة ارقام فااي واحد تقصد يمكن تقصد هذا 4600009286 0111 282045 133935
ماادري ليش انت مستبعد ان المراره تكون من البودره اصلا البودره خلقه مره الطعم
Author
خلاص عرفنا المشكلة … مافيه مشكلة هي طعمها بالضبط زي ما طلع معك إذا كانت زي طعم الشكولاته الغامقة حسب ما قلتي. هل أنتي تحبين هذا الطعم أو لأ هذي مشكلة ثانية هي مالها علاقة بالكاكو ولا غيره هي ذوق شخصي ، شخصيا أحبه بس كثير ناس وخصوصا اللي متعودين عالشكولاته بالحليب ما يحبونه.
عارف إن الكاكاو مر و عشان كذا نحط سكر معه .. . سكر + مراره يعادلون بعض بس طعم الكاكو القوي اللي الكاكو البودرة يعطيه يبقى وهذا نبيه ، الكاكو هنا موب بس نكهة الكاكو هنا زي الطحين في الكيكات (الكاكو فيه نشا) يعني مكون ضروري. أذا تبينها أحلى زيدي شوي سكر أو أستخدمي كاكاو بنسبة كاكاو أقل من اللي أنتي مستخدمه بس موب شكولاته بالحليب ! شكولاته غامقة بنسبة كاكاو أقل إذا ما تعرفين وش أقصد بنسبة الكاكو أقري موضوع الشكولاته اللي حطيت رابطة في الوصفة.
الشكولاته طعمها حلو مافيها ابدا مراره اسمها ليندت
انا متأكدة ان سبب المراره بودرة الكوكاو
المولتن كيف يكون طعمه بصراحه ماعمري ذقته
Author
كم مكتوب عالشكولاته ؟ فيه رقم مكتوب كم مكتوب ؟ كم نسبة الكاكو في الشكولاته اللي أستخدمتي ؟
الكيك يكون طعمه زي الشكولاته الغامقة ….
بودرة الكاكو موب سبب للمراره إذا مشيتي على كل شي كاتبه !!!
صدق اني غبيه اكيد السبب من البودرة كيف اقدر ازيل هذي المراره
ترى سويتها بالزيت
سويته بالزيت وضبط شكلا بس الطعم فيه مراره
هل السبب من بودرة الكوكاو
Author
بدلتي شي غير الزيت ؟ إذا مشيتي عالكلام اللي قايل بيطلع ممتاز غير كذا مقدر أضمنلك شي الصراحة. بودرة الكاكو موجودة حتى في الوصفة اللي حاط ليش بتكون مره عندك بس ؟ وش الشكولاته اللي أستخدمتي ؟
مرحبا
ينفع استخدم زيت بدل الزبدة
وكم راح تكون الكمية
Author
الطعم بيكون سيء الصراحة هي كلها ٣ مقادير من يوم تنقص واحد وش بقى ؟ اعتقد بيضبط بس منيب متأكد عشان اكون صريح
السلام عليكم ..
انا جربتها مرتين بنفس الطريقه المره الاولى كأنها كيك ما فيها اي شوكلاته سايحه ..
المرة الثانيه كانت سايحه الشكولاته لكن الاطراف ما اتحمرت فما استوت تمام ..
اش الحل ؟ هل درجة حرارة الفرن عاليه جدا !
Author
وعليكم السلام و الرحمة …
المره الأولى كانت مطبوخة أكثر من اللازم و الثانيه أقل دور الخط الفاصل في النص بينهم. تكلمت كثير عن التوقيت وكيف إنه أهم شي لهذا الحلى
الموضوع سهل لكن انا ماتعامل بالوزن لانه ماعندي ميزان ،،
اتعامل بالاكواب او الملاعق ،،
Author
اشتري ميزان ضروري وسهل وتعلمي تستخدمين الوزن … الموضوع تااااافه لا تعقدينه
السلام عليكم ,,
اخي خالد ممكن اعرف مقادير المولتن كيك لـ30 صحن مثل صحنك ,,
اسفه اعرف متعب لكن الله الغرامات تلحس المخ ,,
Author
وعليكم السلام و الرحمة …
إذا هذي تسوي ٢-٣ أضربيها بعشره ؟ ما أعتقد الموضوع صعب ولا يلحس ؟
مجهود رائع تشكر عليه وفلسفة طبخ احترافيه ومبهرة اعطت بعد مختلف لفن الطبخ
سويتها وكانت فاشلة !
لما أضفت البيض تكتل الخليط وانفصل الدهن ما صار
مع إنه كان دافي ما كان حار لما أضفت البيض
ايش تتوقع يكون السبب ؟
Author
طبيعي إذا حطيتي البيض بتلاقين الخليط ثقل شوي وتغير شكله كملي عادي. لو الخليط كان حار بيتكتل ، أني تقولين كان دافي بس يمكن كان حار أكثر من اللازم …
عجبني وكنت اتمنى اسويها
عندي سؤال اذا تسمح لي
اقدر اسويها بصينيه الكب كيك
دورت صحون سوفيليه مالقيت نفس الي عندك او عميقه ومدوره
🙁
و انا شريت كاكاو بس طلع فيه مكسرات بعد ماسويتها
وطلعت حلوه ولذيذه
بس محترقه من فوق نسيتها بالفرن ☺
اول مره اجرب عادي صح ؟!
Author
عن نفسي منيب مجربها بصينية كب كيك الصراحة …
أكيد عادي كل الناس حرقوا شي في الفرن …
انا تخيلت الطعم بيصير طحين طاغي لاني ذقت عند وحده تسويه بالمايكرويف فيه شوي طعم طحين ليه ؟
Author
علمي علمك … ماله علاقه بالأكله نفسها هي يمكن راجع لطريقتها
اللي فهمته بس من تحت 20 دقيقه واطفي النار مظبوط؟
Author
من تحت إلين يستوي زي ما شرحت …. أقدر أقولك ١٤ دقيقه ونص وتسوينها وما تضبط وتقولين ليش ما ضبط زي ما صار مع بنات كثير بس إذا تبين الصح أمشي عالنظر وتعلمي التوقيت عشان بعدين تسوينها بسهولة.
مرحبا
بس بسالك اشغل الفرن عليها من تحت وفوق او بس من تحت وشكرا
Author
أي وصفة في العالم تشغلين عليها من تحت بس إلا إذا أنكتب غير كذا
تسلم ايدينك
بس عندي استفسار
السكر .. سكر بودره ؟
Author
أي وصفة إذا ما قالت سكر بودرة يعني سكر عادي
وااااااااااو اعععععشق المولتن تسسلم يدينك دايما ادور وصفه مضمونة لها .. يعطيك العافية
استاذي بسألك يصير أسويها بكاسات الحليب ؟؟ وإلا لازم مثل اللي انت مستخدمها ؟؟
Author
اي كاس يدخل الفرن ينفع بس كله على مسؤليتك فأنتبهي احسن للتوقيت كذا.
تدوينة رائعه للغاية ومواضيعها هايله
تحياتى لكم
اخوي حابة اسألك اذا بسوي مولتن كيك بالكاكاو الابيض ، بس احذف مكون بودره الكاكاو الغامج ، ولا شلون
والله يجزاك كل خير
Author
لا هي وصفة غير
ولا عليك امر ، بعد اذنك ، ممكن الوصفة 🙂
Author
ماعندي للأسف
صباح الخير شيفنا العزيز
متابع المدونه وبشغف بحكم اني محب لطبخ الحقيقي موب مطرسة ربعنا *_*
الي جربته ولا زبط معي فكيت اطراف المولتن كيك بالسكين لما اقلبها على الصحن ما تنكلب على طول اخليها ولا اطقطق القالب تنزل والقاعده تبقى بالصحن ناشبه مع اني دهنت الجوانب والقاع حق الصحن ومره جربت بدون مدهن القاع ومره جربت صحن قاعدته كرويه ومره جربت قاعده مسطحه وهبل بي لازم تنشب القاعده وتنقطع ..
فضنك وش المشكله ؟!
Author
أدهن القاع و تأكد تأكد إنه مدهون زييييييييين. لو منطقة صغيره ماكانت مدهونة ماراح تطلع بسهولة.
بعد ما تفك الأطراف أقلب المولتن على صحن شوي شوي بعدين دخل طرف السكين بس تحت القاعدة من الجنب. أحيانا يكون فيه هواء بين الصحن و الكيكة وهذا يخلي الكيك يلصق شوي.
المشكلة الثانية اللي ممكن تكون السبب هي إنك تطبخ الحلى أقل من المطلوب و الأطراف تكون أستوت بس القاعدة ما تكون تصلبت بشكل كافي.
مستر خالد
بما ان الاحتمال الاكثر هو الدهن
ممكن اخذ منك افضل طريقه للدهن مع اني استدخدم يا افرك الذبده نفسها ولا بالاصبع تقول ادهن بزر بفازلين ولا اتطور اذا عندي احد وبالفرشه
بعدين احطهم بالبراد ثم اعطيهم وجه ثاني تقول كني بصبغ جدار المجلس
فافضل طريقه وش تشوفها .. خبرتك تهمني ..
ويمكن الي يخليها انكسرت معي اني اقلبها وهي حاره مره ؟!
اشكر لك وقتك رغم ان تخصصك الدراسي يحتاج وقت عظيم
Author
عن نفسي أمسك شوي زبده دافيه وأدهنها بالأصبع ، يمديك بالفرشة وكذا بس ما تفرق كثير. طريقتك في الدهن صحيحة مافيها شي بس قصدي ركز إنك تغطي كل زاوية بس هذا المقصود.
بجد المدونة ممتازة ، وأسلوب العرض متميز
السلام عليكم ورجمة الله
توي من قريب اكتسفت المدونة حقتك
مشالله تبارك الله
الله لا يضرك
وحابة اجرب المولتن كيك
بس عندي سوال
قلت شوكولاته 60 في المية كاكاو يعني خام ؟؟؟ صح
طيب ما يطلع طعمه مر لان الخام مر
Author
وعليكم السلام والرحمة ….
افضل شي تقرأين موضوع الشكولاته اللي في المدونة راح تفهمين كل شي
السلام عليكم
شكراً عملك دائما رائع ماشاءالله ، ولك طريقة شرح مميزة تنبأ عن حب وشغف للطبخ
وعلى فكرة انا سجلت في المنتدى اللي انت تشارك فيه عشان استفيد من خبرتك، لانه نادر اللي يعطي زي شرحك وكمان تعطينا مفاتيح تساعدنا نخترع نكهة او طعم آخر
سؤالي : اذا ممكن تجاوب عليه
افضل الاماكن اللتي تختار منها الدقيق ؟ يعني مثلا كثير اعرفهم يحبو محلات معينه اللي يكون الدقيق جاهز ومهيأ انه يكون لكيك او خبز
لكن انا مثلا اروح المطحنة نفسها وأشوف الحبوب بنفسي بس الحلويات ماتضبط بالشكل الاحترافي اللي ابغاه؟!
مدري ايش السبب؟!هل فيه اضافات خاصة”غير الفانيليا السائلة والبكربونات واحيانا الخل”اضيفها على الدقيق للحلويات عشان تعطيني الطعم ؟! اما الخبز أحس طعمه جميل ورائحته روعه من دقيق المطحنة
اكرر شكري واتمنى فهمت سؤالي الطويل
Author
وعليكم السلام و الرحمة ….
مشكورة على كلامك وهذا من ذوقك والله يحيك دايما.
الطحين أكثر من مجرد حب مطحون. لو أخذتي حب وطحنتيه بتطلعين بطحين صحيح بس هل بيشتغل زي ما أنتي متعودة إن الطحين يشتغل ولا لأ هنا السؤال. فيه كذا مشكلة لازم تنتبهين لها في شراء الطحين بنفسك وطحنه عند مطحنة.
أول شي هل الطحين أبيض ولا أسمر ؟ إذا كان أبيض وش الطريقة اللي هم يستخدمون عشان يشيلون قشر القمح ؟ فيه كذا طريقة ممكن تستخدم. طبعا في المصانع الكبيرة مرة عندهم أجهزة متطورة تقدر تفصل قشر القمح بنسب كبيرة يعني كمية القشر اللي يبقى في الطحين النهائي بسيطة بس غالبا في مثل هذي المحلات يستخدمون طرق جدا بدائية. قشر القمح مفيد ويعطي القمح نكهة حلوة صحيح بس هو يغير الطحين بشكل جدا كبير. هو بيأثر في كيف الطحين يشرب المويه وكيف يكون الجلوتن وعشان كذا لو حاولتي تستخدمين طحين بنسبة قشر قمح كبيرة (يسمون هذي النسبة نسبة رماد ash content) في وصفات موب دايما راح تطلعين بنفس النتيجة اللي تعودتي وكثير من الوصفات ممكن تفشل فشل كامل بعد موب بس تكون غير.
الشي الثاني والمهم جدددا هو كم نسبة البروتين اللي في الطحين ؟ البروتين هو المسؤول عن تكون الجلوتن في الخبز. بروتين عالي يعني العجينة بتكون قويه وتقدر تحبس كمية هواء كبيرة زي ما نبي في الخبز مثلا ، بروتين قليل يعني إن العجينة ماراح تكون بروتين كثير وهذا بيعطينا كيك لييين مرة. هل الطحين اللي تشرينه طحين خبز عالي البروتين ولا طحين كيك قليل البروتين ولا هو طحين متعدد الإستخدامات متوسط البروتين ؟ مصانع الطحين تبيعك الطحين بنسبة بروتين محددة ومكتوبة هذا يعني إذا شريتي كيس اليوم وكيس بعد سنه هم بيسوون إختباراتهم ويعوضون النقص أو الزيادة في البروتين بحيث يعطونك طحين بالنسبة اللي مكتوبة عالكيس بس هل المحلات الصغيرة تقدر توفر هذا الشي ؟ النتيجة النهائية هي نسبة نجاح في الوصفات أكبر.
الشي الأخير هو الإضافات. الطحين لازم يتعالج بكذا طريقة عشان تقدرين تستخدمينه بشكل جيد للطبخ. لو زرعتي مثلا طحين في البيت وحاولتي تطحنينه وتسوين منه خبز ماراح تلاقين إن النتيجة جيدة . الطحين لازم لازم يتعتق وقت قبل ينطحن عشان يبدأ شوي يتأكسد بدون هذي الفترة من التعتيق البروتينات ماراح تترابط مع بعض وتسويلك الجلوتن اللي نبيه في الخبز (الأوكسجين مهم لتكون الجلوتن). مصانع الخبز نادرا ما تسوي هذي الخطوة بالتعتيق (مكلفة بس تعطي نتيجة أفضل) بس هم يلفون عليها بإنهم يبيضون الطحين بمواد تبييض وهذي تسوي نفس الأثر بوقت أسرع غير إنها تخلي الخبز أبيض (صفة الناس يحبونها). طبعا المبيضات هذي وحدة من الإضافات بس هي أبدا موب الوحيدة لو قرأتي أي كيس طحين بتلاقينه عليه إضافات ثانيه كثيرة زي الحديد ، حمض الأسكوربك ( فيتامين سي) ، وأكيد طبعا بتلاقين ملت أو أنزيم يأدي نفس الغرض. هذي الإضافات لها فوائد كثيرة للخبز ، حمض الأسكوربك مثلا ينشط الخميرة ويخليها تشتغل أسرع ، الملت ضرووووري في الخبز كونه هو اللي يحول النشا اللي في الطحين لسكر وهذا اللي الخميرة تتغذى عليه بدونه الخميره بتشتغل أول كم دقيقه بعدين ما تلاقي أكل وتموت.
خلاصة الكلام هي : الطحين مكون ضروووري يكون مضمون عشان نقدر نشتغل فيه في المعجنات أو الحلويات وإعتمادنا على طحين مطحون في مكان موب مضمون ما يوفرلنا هذا الشي وعشان كذا فرص نجاح وصفاتك أكبر إذا أستخدمتي طحين جيد من مصنع طحين ممتاز.
شكراااااااااً
وصلت المعلومة
وخلاص بخلي الفلسفة حقتي في اختيار الحبوب والطحن
مع إني احب ابدأ من الصفر في المكونات
بس زي ماقلت انه نسبة النجاح حتكون ضئيلة
كعادة شرحك مميز ، جزاك الله خير
لذيييييييييذه TTuTT ..
سعابيلي قوطرت ماشاء الله تبارك الله ..
شكلها سهلة جداً ولذييييذه، بقول لأختي تسويها إن شاء الله #ترسل رابط المدونة للي عندها بتويتر
آآآه ييياربببببيييي =”(
ممرا أليييمم =’( ..
ودي اشوف شكلك P: >.<
احس دووبب وابيض مثثل المصارية الطباخين P:
بس جد جد فننان *-*
ومبدع *-*
وكل ابو شي *-*
وواصصل ^-* << جت ببالي واصلي يابلادي واصلي .. وحنا وراكي واصلي وحنا وراكي خخخخ < !؟
تقبل مروري *-^
اليوم ان شاء الله باجربها وانا متأكدة ان ان شاء الله بتضبط
لان وصفاتك دائما ضابطة ماشاء الله عليك
وجزاك الله خير وللامام
وش الفرق بينه وبين السوفليه ؟
أحس نفس الطعم ..
Author
إذا قصدك السوفليه السعودي إيه نفس الشي. إذا قصدك السوفليه الأصلي لأ طبعا مافيه أي وجه شبه بعد كل واحد طعمه غير.
السوفليه ما يكون سايح من جوا هو يكون منفوش كأنه تقريبا كيك رطب وحار بس المولتن يكون سايح هذا الفرق الأكبر.
مشكور اخوي على الحلى الحلى هذا خيار الاول في اي مطعم او كوفي اروحله هو والسوفليه وللاسف قليل يظبطونه يا اما يكون
مطبوخ زياده او طعم البيض واظح . واتمنى تعذرني لاني من زمان ماعلقت هالفتره مشغول
جزاك الله خير
هجربها ان شاء الله
بس ليا سؤال انا مش عندى قوالب السوفليه
ممكن اعمله فى صنيه عاديه
ولو ينفع ممكن تقولى مقادير صنيه مقاس 30
Author
ما ينفع للأسف.
يعطيك العافية على الوصفة ..
بس عندي استفسار بسيط ..
البيض كم بيضة كاملة و كم صفار بيض ؟
فالشرح و في المقادير مختلفين ..
Author
عدلناها خلاص
جربت هذي الوصفه كذا مره مع إعجاب الاهل بلذته ونفس مستوى كوفي الشوبات الراقيه ❤
جربتها بالندت شوكلت بار طبعا الدارك 70% واللحينه بسير اسويها لطلب خصوصي ❤.❤
تسلم الايادي
وسيتم التجربِة
|سعيدة بك
Author
الله يسلمك وبالعافية مقدما.
تسلم الايادي..
تسلم الايادي..
وش اقول ووش اخلي انت ماشاء الله عليك بجد فنان طبخ
لي فتره ادور هالطريقه وفي محل بجده يزبطها وعلى قولة اخوي سوفليه دوبني ادري ان اسمه مولتن كيك
وبجرب طريقتك هددي وانا واثقه انها حتزبط معااياا
جربت اغلب وصفاتك واعجبت اهلي والكل طلب طريقة عجينة البيتزا ..يحسبوني جبتها جاهزه
تسلم ايدينك
Author
الله يسلمك و بالعافية مقدما.