مولتن كيك .. Molten Chocolate Cake

هلا والله ….

.

المولتن كيك وحدة من أشهر وصفات الحلويات حولين العالم. الحلى هذا جدا بسيط ، مقاديره متوفره وسهلة ، سهل نغير نكهته بحيث نخليه يتماشى مع أي مينيو بنقدم و الأهم من كل هذا هو الدراما اللي يوفرها إذا جاء الشخص يكسر الحلى ويشوف الوسط السايل ينزل ويسيح في الصحن و عشان كذا الناس يحبونه و المطاعم يحبونه. المولتن كيك بتلاقونه بكذا إسم ، فيه ناس يسمونه لافا كيك lava cake بسبب الشكولاته اللي تسيح كأنها لافا (حمم بركانية) ، وفيه ناس يسمونه تشوكلت فوندانت chocolate fondant وفيه أسامي ثانيه منتشره زي تشوكلت بودينج وغيرها.

.

فيه ناس ومطاعم كثير وخصوصا عندنا في السعودية يسمون المولتن كيك “سوفليه شكولاته” هذا خطأ كبير (وبيني وبينكم أعتبره بعد غش) كون السوفليه كائن مختلف تماما. السوفليه نوع من الأكلات ممكن تكون حلوة أو مالحة وهو عبارة عن أساس نكهة (شكولاته ، كريم باتسييه أو حتى صوص أبيض أو باشاميل) مرفوع بمرانج ومطبوخ في الفرن إلين يطلعله تاج أو قبه عاليه ويستوي من داخل تماما. قوام السوفليه يكون خفيف ورطب (تقريبا زي السيريلاك) بس يكون مستوي من داخل تماما يعني ما يكون سايل . السوفليه بشكل عام صعب ومعقد ويحتاج دقة في العمل ويعتبر عقدة لكثير طباخين. المولتن كيك هو نوع من أنواع الكيك اللي بدون طحين flourless cake  و اللي يكون مطبوخ إلين ما تستوي الأطراف بس سايل من داخل.

.

أي واحد بيكتب مولتن كيك أو سوفليه شكولاته بالعربي في جوجل بيلاقي آلاف الوصفات وكثير من هذي الوصفات حاولت أفهمها وعجزت ؟ الوصفه الأصليه تحتاج ٤ مكونات أساسية تقريبا (بيض ، شكولاته ، زبده وسكر) وهي المستخدمه في كل المطاعم حتى أفخم المطاعم تستخدمها ودايما تضبط وبدون مشاكل. كثير من الوصفات اللي شفت تستخدم مكونات مالها أي داعي مثل خليط كيك شكولاته مثلا ، قشطة خفق ، نسكويك ؟ ، حليب بودرة أو حتى بيكنج باودر وغيرهم كثير وهذي كلها مالها أي داعي هي ما تضيف أي شي للكيك هي بس تخرب في الطعم و القوام عن الطعم اللي مفروض يكون.

.

الوصفة اللي راح أنزل هنا نزلتها قبل وكثير ناس طبقوها وبنجاح. أغلب الناس اللي عانوا من مشاكل مع الوصفه كانت لسببين أساسيين يا إنهم غيروا في الوصفه من راسهم سواء بتبديل مكون أو تغير الكميات أو حساب خطأ للمقادير أو إنهم غلطوا في التوقيت اللي هو مفتاح هذي الوصفه. أطبخوها أقل وراح تتكسر إذا طلعتوها من القالب ، أطبخوها أكثر وبتجمد وماراح تصير سايلة من داخل زي ما هي مفروض تكون. جودة هذا الحلى بتعتمد على جودة الشكولاته أولا و أخيرا. أستخدموا أحسن أحسن نوعية شكولاته تلقونها لهذا الحلى بيفرق كثير عن النوعيات الرخيصة ، تكلمت عن الشكولاته بالتفصيل في موضوع الشكولاته يفضل تقرأونه إذا ما تعرفون كيف تميزون بين الشكولاته.

.

.

المقادير :

.

٥٦ جرام زبدة غير مملحة (تقريبا نص أصبع أمريكي) مقطعه مكعبات صغيره + شوي زيادة لدهن القوالب

٥٦ جرام شكولاته غامقة Dark Chocolate من أحسن نوع مقطعة صغار

١/٣ كوب سكر أبيض

ملعقتين كبار بودرة كاكاو

بيضة + صفار بيضتين

رشه ملح

ملعقتين صغار طحين

.

.

* الشكولاته الغامقة لاتزيد نسبة الكاكو فيها عن ٧٠٪ (راجعوا موضوع الشكولاته إذا ما تفهمون وش أقصد). إذا بتستخدمون شكولاته أغمق يمكن تحتاجون تزودون السكر شوي عن اللي حاط. أنا قللت السكر شوي في الوصفه لأن كثير من اللي أستخدموا شكولاتات أفتح لقوا إنها حلوة أكثر من اللازم.

.

* الوصفة تسوي تقريبا حبتين إلى ثلاث حبات مولتن كيك بس تقدرون تضاعفون المقادير حسب الحاجة.

.

.

الطريقة :

.

نشغل الفرن على ٣٥٠ فهرنهايت.

.

ندهن صحون سيراميك Ramekins (يعني صحون سوفليه) من داخل بزبدة دافيه بشكل جيد ونتأكد إننا غطينا كل المناطق بعدين ندخلها الثلاجه إلين نحتاجها.

.

نخلط السكر مع الملح و الكاكاو البودرة في صحن صغير.

.

نسوي حمام مائي عشان نذوب الشكولاته. نحط شوي مويه في قدر صغير ونحط فوقه صحن ستانلس أو قزاز بحيث الصحن ما يلمس المويه اللي تحته. نشغل النار إلين توصل المويه لغليه جدا جدا خفيفه بعدين نحط الشكولاته و الزبده في الصحن اللي فوق. نحرك الشكولاته و الزبده من وقت لوقت و أول ما يذوبون نشيل الخليط من النار (لا تخلونه أكثر من اللازم عشان لا تنحرق الشكولاته).

.

.

نضيف خليط الكاكاو و السكر و الملح على الشكولاته الذايبة ونحرك إلين يصير خليط ناعم بعدين نضيف صفار البيض ونخلطهم مع الخليط وبعدين البيضه الكاملة إلين يدخلون في الخليط و آخر شي الطحين.

.

الخليط بعد إضافه البيض و السكر و الطحين

.

نوزع الخليط على صحون السوفليه بالتساوي. الحين نقدر نطبخ الخليط علطول أو نقدر نحطه في الثلاجه لوقت ثاني (بعد ما نغطيه بنايلون) أو حتى لليوم الثاني.

.

.

ندخل الصحون الفرن في الرف الأوسط ونخليها إلين ما تصير الأطراف مستويه شوي وجامدة بس الوسط يلمع و إذا دخلنا عود يطلع وهو رطب تقريبا أخذ معي ٢٠ دقيقة بس يمكن يختلف عندكم، أفضل تبدون تشيكون عليها قبل الوقت وتطلعونها إذا أستوت وصارت زي ما وصفت.

.

.

الحين نفك الأطراف بسكين نحيف بعدين نقلبها على صحن شوي شوي ونرش عليها شوي سكر مطحون للتزيين لو نبي. نقدر ناكلها لحالها أو نقدمها مع إسكريم أو صوص فواكه أو فواكه كاملة أو كريمة مخفوقة (زي ما سويت بس مع شوي سكر عشان تكسر الحلاوة).

.

.

.

.