مولتن كيك .. Molten Chocolate Cake

هلا والله ….

.

المولتن كيك وحدة من أشهر وصفات الحلويات حولين العالم. الحلى هذا جدا بسيط ، مقاديره متوفره وسهلة ، سهل نغير نكهته بحيث نخليه يتماشى مع أي مينيو بنقدم و الأهم من كل هذا هو الدراما اللي يوفرها إذا جاء الشخص يكسر الحلى ويشوف الوسط السايل ينزل ويسيح في الصحن و عشان كذا الناس يحبونه و المطاعم يحبونه. المولتن كيك بتلاقونه بكذا إسم ، فيه ناس يسمونه لافا كيك lava cake بسبب الشكولاته اللي تسيح كأنها لافا (حمم بركانية) ، وفيه ناس يسمونه تشوكلت فوندانت chocolate fondant وفيه أسامي ثانيه منتشره زي تشوكلت بودينج وغيرها.

.

فيه ناس ومطاعم كثير وخصوصا عندنا في السعودية يسمون المولتن كيك “سوفليه شكولاته” هذا خطأ كبير (وبيني وبينكم أعتبره بعد غش) كون السوفليه كائن مختلف تماما. السوفليه نوع من الأكلات ممكن تكون حلوة أو مالحة وهو عبارة عن أساس نكهة (شكولاته ، كريم باتسييه أو حتى صوص أبيض أو باشاميل) مرفوع بمرانج ومطبوخ في الفرن إلين يطلعله تاج أو قبه عاليه ويستوي من داخل تماما. قوام السوفليه يكون خفيف ورطب (تقريبا زي السيريلاك) بس يكون مستوي من داخل تماما يعني ما يكون سايل . السوفليه بشكل عام صعب ومعقد ويحتاج دقة في العمل ويعتبر عقدة لكثير طباخين. المولتن كيك هو نوع من أنواع الكيك اللي بدون طحين flourless cake  و اللي يكون مطبوخ إلين ما تستوي الأطراف بس سايل من داخل.

.

أي واحد بيكتب مولتن كيك أو سوفليه شكولاته بالعربي في جوجل بيلاقي آلاف الوصفات وكثير من هذي الوصفات حاولت أفهمها وعجزت ؟ الوصفه الأصليه تحتاج ٤ مكونات أساسية تقريبا (بيض ، شكولاته ، زبده وسكر) وهي المستخدمه في كل المطاعم حتى أفخم المطاعم تستخدمها ودايما تضبط وبدون مشاكل. كثير من الوصفات اللي شفت تستخدم مكونات مالها أي داعي مثل خليط كيك شكولاته مثلا ، قشطة خفق ، نسكويك ؟ ، حليب بودرة أو حتى بيكنج باودر وغيرهم كثير وهذي كلها مالها أي داعي هي ما تضيف أي شي للكيك هي بس تخرب في الطعم و القوام عن الطعم اللي مفروض يكون.

.

الوصفة اللي راح أنزل هنا نزلتها قبل وكثير ناس طبقوها وبنجاح. أغلب الناس اللي عانوا من مشاكل مع الوصفه كانت لسببين أساسيين يا إنهم غيروا في الوصفه من راسهم سواء بتبديل مكون أو تغير الكميات أو حساب خطأ للمقادير أو إنهم غلطوا في التوقيت اللي هو مفتاح هذي الوصفه. أطبخوها أقل وراح تتكسر إذا طلعتوها من القالب ، أطبخوها أكثر وبتجمد وماراح تصير سايلة من داخل زي ما هي مفروض تكون. جودة هذا الحلى بتعتمد على جودة الشكولاته أولا و أخيرا. أستخدموا أحسن أحسن نوعية شكولاته تلقونها لهذا الحلى بيفرق كثير عن النوعيات الرخيصة ، تكلمت عن الشكولاته بالتفصيل في موضوع الشكولاته يفضل تقرأونه إذا ما تعرفون كيف تميزون بين الشكولاته.

.

.

المقادير :

.

٥٦ جرام زبدة غير مملحة (تقريبا نص أصبع أمريكي) مقطعه مكعبات صغيره + شوي زيادة لدهن القوالب

٥٦ جرام شكولاته غامقة Dark Chocolate من أحسن نوع مقطعة صغار

١/٣ كوب سكر أبيض

ملعقتين كبار بودرة كاكاو

بيضة + صفار بيضتين

رشه ملح

ملعقتين صغار طحين

.

.

* الشكولاته الغامقة لاتزيد نسبة الكاكو فيها عن ٧٠٪ (راجعوا موضوع الشكولاته إذا ما تفهمون وش أقصد). إذا بتستخدمون شكولاته أغمق يمكن تحتاجون تزودون السكر شوي عن اللي حاط. أنا قللت السكر شوي في الوصفه لأن كثير من اللي أستخدموا شكولاتات أفتح لقوا إنها حلوة أكثر من اللازم.

.

* الوصفة تسوي تقريبا حبتين إلى ثلاث حبات مولتن كيك بس تقدرون تضاعفون المقادير حسب الحاجة.

.

.

الطريقة :

.

نشغل الفرن على ٣٥٠ فهرنهايت.

.

ندهن صحون سيراميك Ramekins (يعني صحون سوفليه) من داخل بزبدة دافيه بشكل جيد ونتأكد إننا غطينا كل المناطق بعدين ندخلها الثلاجه إلين نحتاجها.

.

نخلط السكر مع الملح و الكاكاو البودرة في صحن صغير.

.

نسوي حمام مائي عشان نذوب الشكولاته. نحط شوي مويه في قدر صغير ونحط فوقه صحن ستانلس أو قزاز بحيث الصحن ما يلمس المويه اللي تحته. نشغل النار إلين توصل المويه لغليه جدا جدا خفيفه بعدين نحط الشكولاته و الزبده في الصحن اللي فوق. نحرك الشكولاته و الزبده من وقت لوقت و أول ما يذوبون نشيل الخليط من النار (لا تخلونه أكثر من اللازم عشان لا تنحرق الشكولاته).

.

melting chocolate

.

نضيف خليط الكاكاو و السكر و الملح على الشكولاته الذايبة ونحرك إلين يصير خليط ناعم بعدين نضيف صفار البيض ونخلطهم مع الخليط وبعدين البيضه الكاملة إلين يدخلون في الخليط و آخر شي الطحين.

.

مولتن كيك

الخليط بعد إضافه البيض و السكر و الطحين

.

نوزع الخليط على صحون السوفليه بالتساوي. الحين نقدر نطبخ الخليط علطول أو نقدر نحطه في الثلاجه لوقت ثاني (بعد ما نغطيه بنايلون) أو حتى لليوم الثاني.

.

molten cake.

ندخل الصحون الفرن في الرف الأوسط ونخليها إلين ما تصير الأطراف مستويه شوي وجامدة بس الوسط يلمع و إذا دخلنا عود يطلع وهو رطب تقريبا أخذ معي ٢٠ دقيقة بس يمكن يختلف عندكم، أفضل تبدون تشيكون عليها قبل الوقت وتطلعونها إذا أستوت وصارت زي ما وصفت.

.

لافا كيك

.

الحين نفك الأطراف بسكين نحيف بعدين نقلبها على صحن شوي شوي ونرش عليها شوي سكر مطحون للتزيين لو نبي. نقدر ناكلها لحالها أو نقدمها مع إسكريم أو صوص فواكه أو فواكه كاملة أو كريمة مخفوقة (زي ما سويت بس مع شوي سكر عشان تكسر الحلاوة).

.

مولتن كيك مع ويب كريم وتوت.

مولتن كيك مع ويب كريم

.

.
Follow TopChefCooks on Twitter

198 comments

Skip to comment form

  1. اول شي السلام عليكم …

    ثانيا هذي ثاني مره اسويه وتنكب ماغير خساير كاكاو وبيض …الله يزيد شكر النعمه

    ثالثا والاهم اسلوبك بابا ??? هون عليك تراك طباخ تحسسن انك عالم ذره وانت تنزر وتهوش على اللي يستفسرون ??

    وتمنن وحركات االبزران الطافين ?

    ولا بيتزتك تراه من الفرن للزباله حتى البساسه كشرو حصاة وفوقه جبن وين الطعم بالموضوع ?

    توووبه ونوبه ادخل مدونتك وععع لاوصفات مضبوطه ونفسن خايسه

    اعنبوك الشيف اسامه ماسوا سواتك ???

    قطططع

    1. وعليكم السلام و الرحمة ….

      ههههه افترضي انه كتاب ما اعجبك ارميه وانتهينا جايه تنفسين هنا ليش الله يهديك ؟ الوصفات معجبتني شخصيا وهذا المهم انا ما جيت بعتها عليك او على أي أحد او حتى حطيت اعلان اكسب منه او غيره، هي وصفات معجبتني وحاطها وكثيرين جربوها وعجبتهم وضبطت معهم (بعضهم من اكثر من محاولة وكثير من اول مره) وكثيرين لا وكثيرين غيروا فيها عشان تمشي على ذوقهم.

      كون وصفتين فشلت معك ونجحت مع كثيرين غيرك يمكن صحيح السبب إن الوصفة سيئة (ولو إن لو كذا مدري كيف نجحت مع كثيرين غيرك) بس بعد في إحتمال إنك أنتي غلطتي في التطبيق إما لخطأ في التنفيذ أو القياس أو الأدوات أو المواد المستخدمه ، حطيها بس بس كإحتمال إن يمكن الغلط من عندك بدال ما ترمين أي فشل يجيك على غيرك حاولي تحلينه ….

      بشكل عام أنا أقدر وأحترم كل شخص طول ماهو محترمني واللي يعرفني في الواقع يعرف هذا الشي. أسلوبي في المدونة عملي أنا أجاوب عالسؤال باللي أعرف بدون مجاملات وبدون تسليك وأجاوب بشكل علمي موب بناء على إحساس أو تخمين وأقول رأيي وأتراجع وأتأسف إذا غلطت على شخص أو حتى في معلومه أتضح إنها غلط أو وصفة أنكتبت غلط. لاتاخذين أي جواب على أي أحد إنه شي شخصي ناحية هذا الشخص هو مجرد جواب على سؤال ما يهمني بأي أي أي حال من الأحوال من اللي قاعد يسأل ولا عندي أي إحساس لا حب ولا كره ولا إحتقار لهذا الشخص هو مجرد سؤال مكتوب وأنا بس أجاوب عليه.

      بجميع الأحوال حتى لو أسلوبي سيء يمكن في لو شخص واحد أستفاد من كلامي في ذا المدونة مع سوء أسلوبي أبقى أفضل من شخص أسلوبه وكلامه قذر وبعد مامنه أي أي فايده.

      للمعلومية دخولك المدونة أو تجريب وصفاتي شي راجعلك أولا وأخيرا هو مايأثر علي ولا على المدونة بشي.

    • Nn on 17 September, 2014 at 7:18 pm
    • Reply

    مشيت على نفس الخطوات بالضبط بس ماضبطت معي استوت لكن لما قلبتها ساحت على بعض ومغصني بطني من ريحه البيض ‘(
    على فكره هي انتفخت من فوق وصار شكلها حلو لكن لما ساحت حسيت من داخل ما استوت نيه ؟؟ ايش السبب !!

    • شهد on 1 September, 2014 at 6:33 am
    • Reply

    هل يكون الفرن سابق التسخين و لا لأ !!

    • شهد on 1 September, 2014 at 6:29 am
    • Reply

    هل لمن ادخلها الفرن يكون سابق التسخين و لا لأ !!

    • 5iz on 24 May, 2014 at 11:37 am
    • Reply

    ماششاء الله بس عليك
    اولاه لو تجي تعلّم اخواني شوي منك -تضحك-

    عشق المولتن وابجربه من وصفتك مع انهه كل ماسويت وصفه منك ماتضبط
    جربت الانجل فود كيك ما ضبطت
    جربت الكوبلز الخوخ ماضبط
    احب الحلويات والكيك واتحمس بشغلهم بس ماش الحظ زفت

    المهم طلبي يَ عزيزي ابي وصفه كيك تكون نفس كيك المحلات منفوشه وهشه وخفيفه
    وطريقه عجينه السكر للتزيين لانو جربت كثير طرق ولا وحده ضبطت معي -اسراف-

    وقووهه شكرا 🙂

    1. مافي شي مايضبط من حظ !! دوري السبب ….

      في كثير وصفات كيك في صفحة الوصفات …. بالنسبة لي عجينة السكر موب شي أستخدمه أبدا لأن طعمه الله يكرم النعمة الصدق.

  2. مرحبا شيف
    انا كثير سويت هذي الوصفة وهي اللي اعتمدها
    وفي كل مرة اسويها دايما الوجه يطلع له فقاقيع مو مثلك ناعم
    يا ترى من ايش ؟ الشوكولاته الي استخدمها شوكولاته غامقة
    والطحين اعتقد مكتوب انه للحلويات وبودرة الكاكاو نوع رخيص

    ما ادري هل الخطا بالمكونات او بطريقة الخبز

    لكن الطعم خياااااااااال جداً لذيذ
    بس نفسي اتقن القبة

    1. أهلين …

      كونه بينقلب في الأخير موب مهم شكل الوجه لاتزعج نفسك كثير عالموضوع. الغالب إنك تخلط بقوة بس وقت الخلط فيدخل هواء كثير في الخليط لا أكثر.

  3. الف شكر توب شيف .. سويتها لعريسي و انبسط على طعمها كثيييييير .. دائما وصفاتك محل ثقتي و ما تخذلني ابد .. للامام دوما ..

    1. العفو ، حياك وعليكم بالعافية …

  4. مرررره شكرا شيف الله يوفقك ويسعدك نجح معي عندي نقطتين ابي اذا طلع من الفرن مايهبط
    ودي اضيف ملعقة سيرلاك بالقمح للنكهه ابدلها بملعقة كاكو البودر او ملعقة الطحين وشكرا الف مرره

    1. بالعافية …..

      هو موب مفروض ينفش عشان تقولين ما يهبط ! هذا موب كيك والنفش هنا موب المطلوب أصلا.

      ما أشوف الهدف الصدق من ملعقة السيريلاك ؟ بإمكانك تجربين طبعا.

    • lamia on 26 December, 2013 at 3:17 pm
    • Reply

    اهلين شيف ..

    هذي احلااا والذ وصفه مولتن كيك جربتهااا … لذييييذة جدا يعطيك العافيه
    سويتها عشرين مره كل مره احلا من الثانية

    الحين ودي اجربها بنكهات ثانيه ..
    قد جربت فمطعم (لافا كيك باللوز) كانت خرااااافيه مافيها شوكولاته يعني لونها تقريبا بيج وسايله من جوا وناعمه
    ممكن تفيدني كيف اسويها؟؟ هل استبدل الكاكاو بدقيق اللوز وبس؟

    1. بالعافية …..

      ممممم ماقد ذقت شي زي كذا الصدق، ما أقدر أفتيك.

    • سوفليه on 23 September, 2013 at 8:55 pm
    • Reply

    يعني اللي جواته شوكلا سايحه مو سوفليه. بصراحه مفاجأه انا ذقته فنحل فابها اسمو سوفليه والشيف كان من المغرب العربي توسمت فيه الشيفيه بصراحه وكمان المحل مليان حلويات فاخره وفرسنيه مدري ايطاليه ماكرون وسابليه وهيك اشيا واول مره اذوقه وقلت ابي اذوقه ع اصوله وكان روووووعه وذحين تقولي مو سوفليه لانو كلن سايح من داخل بس ثقيل ومسوينه في الصحون القصدير المربعه
    الزبده وش ذا اللي ذقته سوفليه والامولتن

    1. إذا داخله سايل هو موب سوفليه. السوفليه ما يكون سايل سايل وأهم شي إنه يكون مرتفع فووووووق ، إذا جاك غير كذا فهو موب سوفليه.

    • Anonymous on 17 September, 2013 at 7:58 am
    • Reply

    رووعه وينك من زمان يا مبدع

    1. من ذوقك مشكوره.

    • Anonymous on 12 September, 2013 at 10:55 pm
    • Reply

    شف شرايك في شوكولاتا كاليبوت لهذه الوصفه ؟!

    1. القاعده سهلة. اذا الشكولاته ممتازه وتحبين طعمها توكلي على الله.

    • Anonymous on 5 September, 2013 at 12:47 pm
    • Reply

    شيف أنا جربت هدي الوصفة وزبطت معي من ثثاني مرة أول مرة طلع السائل قليل جدا مع اني مشيت على وصفك لشكلها في الفرن ثاني مرة كانت الوجه غير جامد ومع هيك أخرجتها من الفرن وتركتها دقيقتين وقلبتها طلع السائل أكثر من المرة الأولى هيك صح ولا فيه غلط لكن عندي ملاحظة أنا أول مرة ذقت المولتن كانت من دومونيز بيتزا أعجبتني جدا الكيكة الخارجية ناشفة شوي أو يابسة تقريبا أشبه بالكوكيز الطري ومن الداخل سائلة وكمية السائل كبيرة أنا طلع معي قوام الكيك اسفنجي وطري كيف أخليه زيهم بدون ما ينشف الوسط؟؟ ومشكووور

    1. أنتي بنفسك شفتي أثر وقت الطبخ. طبختيه أول مره طلع سائل قليل. قللتي الطبخ وزاد السائل داخل. قلليه أكثر وشوفي. فكرة الكيك جدا بسيطة، هو خليط كيك ينحط في الفرن ، الأطراف تنطبخ أكثر من اللازم وتجمد و الوسط يكون مطبوخ بشكل بسيط بس لسا ما تصلب. كل ما طبختيه أطول كل ما تصلب الوسط أكثر . بس هذا كل الموضوع. عدلي التوقيت إلين يوصل للنتيجة المرضيه بالنسبة لك.

        • Anonymous on 7 September, 2013 at 1:05 am
        • Reply

        طيب شيف وبالنسبة للأطراف يعني الكيكة اللي من برة كيف تكون يابسة شوي يعني ما تكون طرية بقوام الكيك؟؟

          • Top Chef on 7 September, 2013 at 2:36 am
            Author

          أي شي ذقتيه في مطعم وخصوصا مطعم سريع ما أعرف عنه.

          • Anonymous on 7 September, 2013 at 3:38 am

          معك حق أنا اسفة لكن اعتقدت انه ممكن تكون بسبب حرارة الفرن العالية لأنه مطعم بيتزا وعارف كيف بتكون أفرانهم رح أحاول أعلي الفرن بس بسألك فيه احتمال تخرب علي الوصفة؟؟صراحة انا أعجبتني جدا وكانت ناجحة لكن سبحان الله أول مرة جربت المولتن كانت من دومينوز بيتزا وطحت فيها وصرت أجرب كل وصفة أجدها للمولتن 🙁

          • Top Chef on 7 September, 2013 at 3:46 am
            Author

          لو مافي إحتمال ليش نحدد حرارة معينة في الوصفة ؟

    • jghawas on 5 September, 2013 at 12:22 pm
    • Reply

    مرحبا شكرا جزيلا جاري التطبيق ..

    لكن عندي سؤال لقيت وانا ابحث بالقوقل كثير وصفات للمولتن منها الي تكون فوق بالوجهه شوكلاته وفوقها
    نوع كيندر ومنها نوتيلا
    السؤال كيف نعمل صوص الككاو الي بالوجهه ؟؟!!

    1. ما أعرف الصراحة وش الأنواع اللي تقصدين أبدا ماقد شفتها ؟ فيه أنواع اللي يكون كيك مفرغ من الداخل ومحشي صوص وهذي ما تتعدى كونها كيك محشي هي موب مولتن أو لافا كيك حقيقي.

    • Anonymous on 27 August, 2013 at 11:22 am
    • Reply

    أريد تطبيق المولتن الى وضعت طريقته لكن المشكلة عندى ان الفرن عندى يسوى يحمر من فوق قبل تحت وأخاف ان تلصق المولتن فى الصحن من تحت ولا استطيع أخرجها فما الحل وشكرا على كل ماتقدميه لنا من شفافيته فى الرد

    1. إذا كان الفرن زي كذا فالخطر إنه يستوي من فوق قبل تحت موب إنه يلصق. الصراحة ما أعرف سبب المشكلة بس جربي تحطين الكيك في الرف السفلي من الفرن بعيد عن الحرارة العلوية . في حال ماضبط إنه يطلع من القالب هو مازال جددددا لذيذ إنك تاكلينه من الصحن نفسه.

    • Rlwfak on 27 July, 2013 at 2:31 pm
    • Reply

    سويت المولتن كيك ستمية الف مره بنفس وصفتك وككل مره تطلع الذ من الثانيه .. يعطيك الف عاافيه

    1. الله يعافيك . عليك بالعافية …

    • Anonymous on 24 April, 2013 at 9:58 pm
    • Reply

    بصرراحة زعلانه ثاني مرة اسوي المولتين مرة طريقة حورية المطبخ وثاني مرة اليوم بطريقنك وما طلع لي من الداخل سائل
    والطعم عادي جدا

    اليوم استخذمت شوكلاته ممتازة مستودرة من برا لا يحضرني اسمها
    بس سويتها يقوالب سليكون نفس حجم الكب كيك العادي خليتها بالفرن اقل من عشرين دقيقة

    ما ساحت من الداخل

    شي ثاني السكر اخذ وقت طويل على ماذاب

    اقدر احط سكر بودرة وكم احط

    وجزاك الله خير

    1. غالبا طبختيه أكثر من اللازم …. ٢٠ دقيقة وطلع جامد يعني فرنك يطبخ أسرع وقللي الوقت المره الجايه إلين تلاقين الوقت اللي يضبط عندك. بس هذا كل اللي في الموضوع وشرحت هذا الكلام في الموضوع إن التوقيت هو كل شي لهذا الحلى.

      السكر ما راح يذوب تماما هو بيصير زي خليط الكيك … أمشي عالوصفة لو الوصفة تحتاج سكر بودره راح أطلب سكر بودرة …

    • RaWaN on 14 April, 2013 at 7:13 am
    • Reply

    ممممم دوبي مخلصه وحده لزييييييزة
    إذا بغيت شيء دسسم ولذيذ خياري هو المولتن *.*
    هذي ثالث مره اسويها بطريقتك
    اشوف أن الوصفه تعتمد ع نوع الشوكلاته كثيير يفرق الطعم
    المرتين الأولى سويتها بلندت هذي المره سويتها بشوكلاته طبخ خام ماشي حالها بس مو زي لندت
    وكمان شكلها أنحاس مو زي المرتين الأولى 🙂
    يعطييك العافيه

    1. ههههه هذا موب شيف جديد أكييييييييد نوعية أي أي أكل تعتمد على جودة المكونات أستغرب أحد يسوي حلا أكثر ما فيه شكولاته وما يعطي نوعية الشكولاته أي إهتمام ؟

    • Anonymous on 21 February, 2013 at 3:19 am
    • Reply

    شيف انا لما رحت اشتري الصحون كان فيه أحجام مختلفة أي حجم تقصد لأني احترت فيهم ولا عرفت المناسب:(

    • Anonymous on 21 February, 2013 at 3:17 am
    • Reply

    ممكن أعرف حجم صحون السوفليه المناسب للتقديم واللي استخدمتها حضرتك تيجي تقريبا بحجم الكب كيك العادي ؟؟

    1. اللي أستخدمت سعة كل صحن ٣/٤ كوب إلى كوب تقريبا … تقريبا حجم مفن كبير

    • Anonymous on 30 January, 2013 at 4:46 pm
    • Reply

    ممكن أسويها بزبادي حجم صغير وأقلل المدة فالفرن؟

    1. أكيد ممكن هو كلللله في التوقيت ولو إني بنصحن إنك ترفعين حرارة الفرن شوي ل ٣٧٥ يمكن .. طبعا وقت الطبخ بيتغير كثير فيبيلك تجربين كم حبه إلين تلاقين الوقت المناسب لك والصراحة الشكل أحس ماراح يكون له نفس التأثير وقت التقديم .

    • Anonymous on 30 January, 2013 at 12:57 am
    • Reply

    سؤال شيف لو سمحت, ممكن أخبزها بزبادي الي تجي المنيوم بدال السيراميك اذا غير متوفرة ولا رح تخرب الوصفة؟

    1. عن نفسي ما جربتها بس أقري تحت وشوفي … ناس ضبطت معهم ، ناس لأ وناس يشتكون من شكلها في القوالب الألمنيوم … الصراحة ما أعرف بالضبط …

    • شذا on 7 January, 2013 at 5:36 pm
    • Reply

    ااسلام عليكم
    كم حن بتكفي الوفة تقريبا و شكرا

    1. وعليكم السلام و الرحمة ….

      حسب الحجم بس تقريبا من ٢-٣ صحون

    • Anonymous on 22 December, 2012 at 3:23 am
    • Reply

    شكرا جزيلا يامبدع

    • Anonymous on 19 December, 2012 at 1:16 pm
    • Reply

    ممكن اسال احط المولتن في الرف الاوسط
    لكن اي شعله في الفرن العلويه ام السفليه
    وشكرااا جزيلا

    1. دايما في النص ودايما من تحت إلا إذا الوصفة حددت غير كذا خذيها قاعدة.

    • Anonymous on 15 December, 2012 at 4:17 am
    • Reply

    المولتن صراع معه
    صلحته بطريقتك كذا مرة وما تعجبني النتيجة
    واستخدمت طرق غير طريقتك وماحبيتهم ><

    واليوم صلحته تقريبا ضبطت إلا شوي، ماصارت مثلك منتفخة ولميعية من فوق :p
    بس جميييلة جدددددن ♥ وحبيييتها ♥_♥

    وهذي النتيجة ^^
    http://sub5.rofof.com/img3/012oekcs14.jpg

    1. بالعافية بس وش اللي ما حبيتيه في الطريقة ؟ مدري بس حسيتك تدورين شي معين يمكن موب المولتن هو اللي تبينه ؟

      الصوره رهيبة (صراحة لولا الفراولة خربت الشكل شوي) بس شكله ضابط …..

        • Anonymous on 15 December, 2012 at 11:14 pm
        • Reply

        طريقتك جميلة ، بس ماتضبط معي مرات تنشب ومرات تنكسر أو تستوي زيادة وهكذا..
        الطرق الثانية هي إللي ماحبيتها، أحسها ثقيلة أكثر من اللازم وتصير جامدة بزيادة

        إي حتى أنا أشوف كذا، بس للإسف ما انتبهت للصورة إلا عقب ما خلصتها :/

      • Anonymous on 19 December, 2012 at 4:48 pm
      • Reply

      اخوي ممكن تقولنا ايش الفرق بين طريقتك وطريقة الشيف بعد إذن الشيف طبعا
      لاني عملت وصفة الشيف اكثر من مره كطعم رااائعة جدا بس حصلت معاية نفس المشاكل اللي حصلت معاك
      الكيكة ناشفة من جوا ومافيها لمعة من برا
      غير كذا هل عادي يكون الوسط سائل وهي في الفرن ولا هذا معناه ما استوت

      1. طيب جربتي تفهمين الوصفة زي ماقلت قبل تتهمين الوصفة بمشكلة ؟ قلت إذا الوصفة جمدت في الفرن هي مطبوخة أكثر من اللازم وشددت وركزت وعدت مليون مره في الموضوع إن التوقيت التوقيت التوقيت هو سر الوصفة. أطبخيها أقل وبتطلع مضبوطة زي ماطلعت مع ناس كثير.

        الوسط بيكون سايل بس بتكون مطبوخه لحرارة كافيه إنها تموت أي بكتيريا موجوده.

          • Anonymous on 21 December, 2012 at 4:16 pm

          بالعكس أنا متأكدة إن الوصفة ممتازة وهذا اللي خلاني اجربها اكثر من خمس مرات
          وانا ماشية عالخطوات بالضبط
          طلعت معاية ناشفة من جوا أوعلى الاقل مو زي مالمفروض يكون المولتن والحرارة كانت 350 والرف في الوسط القوالب قطرها 7 سم
          وتركتها تقريبا 17 – 20 دقيقة ما تكونتلي قشرة زي ما طلعت معاك ولا كان فيه لمعة ونفشة في الوجه
          المرة الثانية قلت باخليها اقل تقريبا خليتها 15 دقيقة اول ما شفت الأطراف نشفت واستوت ما قلبتها على طول في الصحن تركتها دقيقتين تكمل سوا
          لما قلبتها ما كانت ماسكة شكلها بالتمام وهبطت شوي والوسط طلع معاية نص سائل تقريبا
          نفس النتيجة طلعتلي لما غيرت الطريقة ذوبت الزبدة مع الشوكلاته والملح وخفقت البيض مع السكر والفانيلا بعدين اضفت الشوكلاتة بالتدريج بعدين اضفت الدقيق والكاكاو المنخول
          ما ادري وين المشكلة بالضبط

          مرات استخدم شوكلاتة 70 % واحيان 75 % ما ادري اذا هذا الشي يؤثر ولا لأ

          • Top Chef on 22 December, 2012 at 4:23 am
            Author

          صدقيني الموضوع سهههل … أمشي عالوصفة … عدلي التوقيت زي ما سويتي أول مره وثاني مره بس … لا تفترضين خطأ في الوصفة وتجربين حلول تشوفينها منطقية زي طريقة الوصفة .. سويي كل شي بالضبط وعدلي الشي اللي قلت عليه وهو وقت الطبخ بس ! أقري الردود تحت وبتشوفين كم واحد عانا من الوصفة وضبطت معه بعدين بالضبط زي ماشرحت بس الفكرة في التوقيييييت …

    • نورهـ on 13 December, 2012 at 8:02 pm
    • Reply

    باذن الله ناويه اجربها بس تبدا الامتحانات (:

    لاتهاوش انا معلمه مو طالبه , والامتحانات اريح وقت لنا

    1. ههههههه الله يقويك متى ما سويتيها ما تفرق معي ههههه … بس الفكرة إنها ما تحتاج تفرغ أحس الموضوع ما ياخذ ولا نص ساعة شغل ؟

    • هدى٩٩ on 13 November, 2012 at 3:23 pm
    • Reply

    مرحبا
    عجبتني الطريقه وودي اجربها
    بس اللي مخليني متردده
    الجزء السايل داخل الكيك ما يعتبر بيض نيئ لم يستوي جيدا
     

    1. مطبوخ للحراره اللي تموت اي بكتيريا … اتركي عنك الوسوسة

    • sincerity on 13 November, 2012 at 9:24 am
    • Reply

    الله يعطيك العافية و يوفقك و ييسر أمرك يا شيف … كل من ذاقها اندهش ، بس أنا بعد ما أدهن القالب أبطنه بدقيق ، و قتها نجحت معايا …

    1. ان مانفع ماضر . بس هو غير مطلوب

  5. سويتها وطلعت جامده مافيه سوائل !!
    مع العلم اني اتبعت نفس الوصفه !!!!

    1. طبختيها اكثر من اللازم. اقري الوصفة زييييين اقريها زيييييين ولاحظي وش قلت عن اهمية التوقيت هنا. اقري الردود تحت لو تبين معلومات اكثر بعد ومنها تشوفين تجارب اللي ضبطت معهم.

    2. طيب نقفل المدونة وتكملين وش رايك

  6. جميلله , شكراً مرة مرة ,, جربت أكثر من وصفة , لكن وصفتك الوحيدة الي عجبتني , أحب الشوكلاته الغامقة و أحب طعم المرارة فيها كنت أسويها بقشطة وهذا يغطي على مرارة الشوكلاته , بس وصفتك رائعه فيها توازن بين مرارة الشوكلاته و حلاوة السكر , مشكوور =))

    1. بالعافية على قلوبكم ….

    • Anonymous on 5 November, 2012 at 3:38 pm
    • Reply

    . طيب اقدر احط ورق زبدة ؟؟ عشان اتفادى سالفة ان الاطراف تلصق ؟؟

    1. الأطراف ماراح تلصق إلا إذا ماأنطبخت الكيكة زين. تقدرين تجربين لو تبين بس ورق الزبدة موب ورق سحري يمنع أي شي يلصق عليه …

  7. ماشاء الله تبارك الله يكفيني افتخر فيك انك عربي مبدع بهذي الطريقة المتواضعة
    جزاك الله خير ويعطيك الف عافية

    • Najah on 10 October, 2012 at 1:38 pm
    • Reply

    السلام عليكم

    كيف ممكن أعمل rasberry fondan ؟
    لأني أحبها أكثر من اللي تكون شوكولاتة بس،،

    ومشكور

    1. وعليكم السلام و الرحمة …

      جدا سهلة .. أهرسي شوي راسبري (ممكن مجمد لو تبين) وحطيها عالخليط آخر شي قبل الطحين وبس ..

        • Najah on 10 October, 2012 at 9:04 pm
        • Reply

        شكراً 🙂

    • Noga on 2 October, 2012 at 8:31 pm
    • Reply

    السلام عليكم
    جربتها أمس وكانت رااااائعة تسلم عالوصفة..
    بس استغربت إنه مع كمية البيض هذي كلها مافي فانيليا في الوصفة؟
    اتفلسفت من عندي وحطيت شوووووية فانيليا عشان أسكت ضميري بس

    1. وعليكم السلام و الرحمة …

      وش علاقة البيض بالفانيلا ؟ الفانيلا مجرد نكهة هو موب مكون له تأثير عالأكل زي الطحين أو الزبدة مثلا. السؤال هو هل تذوقين الفانيلا في اللي حطيتي ؟ مستحيل مع كمية الشكولاته هذي وعشان كذا هو ماله داعي …

    • Anonymous on 2 October, 2012 at 2:36 am
    • Reply

    طيب لو صار سطحها ناشف ومتكسر أقرب ماله البروانيز، إيش المشكلة؟

    1. غالبا مطبوخه أكثر من اللازم أو الفرن يشتغل من فوق

    • هلا on 28 September, 2012 at 4:09 pm
    • Reply

    ماقلت كم درجه حراره الفرن ؟؟

    1. موجود في الموضوع ؟

    • Anonymous on 26 September, 2012 at 11:13 pm
    • Reply

    جربت اسويها بنفس الطريقه بالظبط اول مره الطعم طلع كويس بس لما جيت اطلعها في الصحن علق نصها وخرب الشكل قلت يمكن عشان ماخليتها تستوي مره .. المره الثانية خليتها تستوي أكثر .. كمان لما طلعتها تقطعت وماصار في الجز الذايب صار كلها كيك ولسا عالقه كيف اقدر اخليها ما تعلق تطلع بسهوله ومحافظة علي الشكل وشكرا

    1. مفروض إذا كل شي تمام تطلع بسهولة وتكون مستويه من برا وسايلة من داخل ؟ تأكدي إنك تدهنين القوالب زيييييين و الشي الثاني هو إنك تذكري دايما إن هذي الكيكة جدا جدا حساسيه بعد ما تطلع من الفرن . إذا كان الكيك العادي المستوي حساس وممكن ينكسر بسهولة فما بالك هنا ؟ مرري السكين عالأطراف شوي شوي و أقلبيها عالصحن وإذا ما نزلت لحالها دخلي سكين من الجنب وفكيها شوي شوي أحيانا يعلق هواء تحت يسوي زي الشفط يخليها ما تنزل بسهولة.

    • Nora on 26 September, 2012 at 5:34 pm
    • Reply

    انا سويتها بس طلعت جاااامده مدري هل انا كثررت الدقيق او طولت بالفرن :S
    وش تتوقع الغلط مع العلم اني حاطه جالكسي و ماحطيت الا ملعقة سكر ،،

    1. جربتي تسوينها زي ما أنا قايل بالضضضضضبط قبل ؟

      إذا أنتي ما مشيتي عالوصفة من البدايه وشلون أعرف وين الخطأ هل هو بسبب التغيرات اللي سويتي ولا بسبب خطأ في التنفيذ ؟

        • Nora on 26 September, 2012 at 8:11 pm
        • Reply

        نفسها نفسسها بالضبطط ..

          • Top Chef on 26 September, 2012 at 8:33 pm
            Author

          بالضبط بالضبط … في المعجنات خذيها قاعده لا تلعبين في المكونات إلا إذا عارفه بالضضضبط وش تسوين.

    • Anonymous on 24 September, 2012 at 6:06 pm
    • Reply

    يعني كثير جداً البيض 😐 !
    المهم سوّيت 12 حبة , كل 4 أو ثلاث أحطهم في القالب و بعدين أسوّي من جديد إلى أن وصلت 12 حبه
    و مرة لذيذ + حطّيت معاه كيوي عشان يكسر الحلاوة 🙂
    + البنات يقولون لي هذا سوفليه :# و أشرح لهم إنّ هذا مولتن يقولون بالمطعم كذا , أقولهم غلطان و كذا :#
    يعني حرام عليهم :” مالهم داعي أبداً 😐

    1. كثير إذا كثرتي باقي المقادير ؟ هي نسبة وتناسب ؟

      حلو الكيوي يكسر الحلاوه فعلا … هههههه موضوع السوفليه و المولتن عقدني الله يعينك …

    • Anonymous on 23 September, 2012 at 5:21 pm
    • Reply

    ما شاء الله :””) , طبخ لذيذ و شرح مُمتاز 🙂
    امممم لو كنت حابة أسوّي 20 حبّة , معقولة يصير 7 بيضات , و 14 صفار بيض 😐

    1. هلا والله ….

      ولو ٤٠ بتحطين ١٤ بيضه و ٢٨ صفار …. لاتنسين إن تضاعفين كل شي ثاني وين الغريب ؟

    • Najah on 17 September, 2012 at 1:05 pm
    • Reply

    السلام عليكم
    صراحةً انت مرررة رائع ،، ما تفكر تفتح مدرسة طبخ؟
    لأنه يا كثر المطاعم وبينما مافي مدارس تعليم طبخ وأشوف إنك تشرح وتتوسع في المعلومات ،،
    أنا دايماً أعمل chocolate brownie pudding اللي في الرابط هذا
    http://www.foodnetwork.com/recipes/ina-garten/brownie-pudding-recipe/index.html
    لاحظت في وصفتك إنه ممكن نجهز الخليط ونحطه في الثلاجة ،، هل ممكن أعمل الحركة ذي مع الوصفة هذي كمان؟!! لأنه المقادير تقريباً نفس الشي
    ومشكور 🙂

    1. وعليكم السلام و الرحمة ….

      مشكورة من ذوقك …. المطاعم كثيرة وسيئة ومهنة الطبخ مالها سوق هنا فمدرسة الطبخ بعد مالها فايدة برأيي.

      ما أشوف ليش لأ بس أفضل تجربين مره …

    • سها on 15 September, 2012 at 10:14 pm
    • Reply

    مشكور يا اروع شيف
    صار معي مشكلة انو لما طالعتها من الفرن تجعد وجهها ولما بردتها وحاولت اطلعها من القالب كانت لازقة مع العلم اني دهنت القالب بالزبدة منيح
    الطعم خيااالي…صحيح شكلها مازبط معي بس طعمها روعة

    1. يمكن كانت تحتاج كم دقيقة زيادة بس. احيانا ما تكون لاصقة بس الهواء بين الكوب والكيك يخليها تبان لاصقة جربي تحركين الكوب شوي شوي وغالبا تطلع.

    • Anonymous on 11 September, 2012 at 2:28 am
    • Reply

    مرحبا ..
    المولتن يجي بس كذا بالشكولاته ما يجي بنكهات ثانية ؟
    يصير نسويه بشكولاته بيضاء

    وممكن وصفة سوفلية بالتفاح ؟
    والله يعطيك الصحة والعافية

    1. ما قد سمعت عن مولتن غير شكولاته ….

      فكرة المولتن إنه يعتمد على البيض و النشا الموجود في الكاكاو وبودرة الكاكاو عشان يكون هيكل الحلى هذا، الشكولاته البيضاء لو قرأتي موضوعي عن الشكولاته هنا في المدونة بتعرفين إنه مافيها أي شكولاته ! هي بس زبدة كاكاو وسكر وعشان كذا ما تعطي الهيكل المطلوب هنا.

      ماعندي صراحة شي مجرب لسوفليه التفاح.

    • Anonymous on 5 September, 2012 at 9:51 pm
    • Reply

    ماشاللله تجننن واخيرا لقيت مرجع عربي فيه طرق الوصفات العالميه بدون تخبيص يسلمووو

    • Anonymous on 5 September, 2012 at 2:59 pm
    • Reply

    مرحبا توب شيف
    يصير نسويه بشكولاتة بالحليب ؟
    مو جالكسي .. اي شكولاتة بالحليب زي لندت مثلا

    1. كتبت كل شي في الموضوع كلامي كان واضح

    • ملاك on 5 September, 2012 at 9:44 am
    • Reply

    يمي يمي يمي فنانه

    1. هههه اذا مصره قولي فنان منيب بنت

    • Anonymous on 5 September, 2012 at 2:17 am
    • Reply

    انا ويني عن هالمدونه من زمان
    فنان ماشاء الله
    مبدع
    الله لا يضرك

    1. مشكورة … هذا من ذوقك

Leave a Reply

Your email address will not be published.

%d bloggers like this: