جزر بالدبس .. Molasses Glazed Carrots

هلا والله …

 

الناس دايما ماخذين فكرة عن الجزر إنه خضار ممله وغالبا يكون في الخلفيه بس أو يكون مخلوط مع ألف نوع خضار ثانيه ويضيع بينهم. هنا الجزر هو المكون الأساسي ، الأكله عبارة عن جزر جليز glazed يعني مغطى بطبقة شوي حلوة وثقيلة تقريبا نفس كثافة العسل . الأكله جدا رهيبة كطبق جانبي لأكلات كثير مره خصوصا الأكلات الدسمة شوي، حلاوة الجزر هنا تكسر الدسم بشكل حلو. الأكله لها آلاف الطرق كالعاده ،غيروا البهارات و الأعشاب حسب ذوقكم أنا أخترت البهارات هذي عشان تمشي مع الأكله اللي قدمتها معها.

 

المقادير :

 

كيلو ونص جزر مقشر

٦ ملاعق كبيرة زبدة

ملعقتين كبار دبس سكر molasses

ملعقة كبيره سكر بني

ملعقتين كبار خل بسلمك

بابريكا ولو عندكم بابريكا مدخنة رهيبة هنا

ملعقة صغيرة كاراويه

ملح وفلفل أسود

ربع كوب مويه

 

* إذا ماعندكم دبس سكر تقدرون تزيدون ملعقة كبيره سكر بني


الطريقة :

 

أول شي نسويه نقطع الجزر بالشكل اللي نبي ، الشكل موب مهم المهم إنهم يكونون نفس الحجم عشان يستوون بنفس الوقت. عن نفسي أستخدمت جزر صغار مره وقدمته كامل.

 

نرص الجزر في قدر بعدين نحط فوقه باقي المقادير . الحين نشغل النار على القدر على حراره وسط ، أول ما تبدأ المويه تغلي ننزل الحراره ونغطي القدر. نخلي الجزر يطبخ إلين يصير شبه مستوي يعني بدأ يلين بس لسا قاسي شوي في الوسط ( تقريبا ٣ – ٤ دقايق ) بعدين نشيل الغطاء. الحين نرفع الحراره لوسط ونخليه يطبخ إلين ما يصير الصوص ثقيل ( تقريبا زي العسل ) ويغطي الجزر ..

 

جزر مطبوخ

 

glazed carrots





10 comments

Skip to comment form

    • Anonymous on 16 November, 2013 at 8:09 pm
    • Reply

    احنا كمان عندنا حلاوة الجزر بس هو جزر مبشور مع سائل شيرة تقريبا نفس فكرة المربى بس السائل قليل جدا جدا بس احنا نستعمله كحلويات وممكن نرشه بجوز الهند

    1. معروف ما يحتاج وممكن يستخدم فيه قرع بعد بس هذا شي مختلف تماما. هنا الجزر مغطى بطبقة خفيفه من الزبده وشوي حلاوه هي مو حلاوه قويييه اذا كان هذا اللي تتخيلينه وهذا يستخدم كطبق جانبي يمشي بالذات مع الأكلات الدسمه كونه يكسر الدسامه بشكل رائع.

    • إيمان on 16 November, 2013 at 2:50 am
    • Reply

    أولاً الله يوفقك ويسعدك يا رب والله اني ادعيلك من قلبي الله يتقبل مني
    بسألك ممكن استخدم دبس التمر ؟ او ما ينفع ؟

    1. آمين الله يسمع منك ومشكوره عالدعوه…..

      هو ينفع بس كيف بيكون الطعم ما أعرف الصراحة. أستخدمي عسل ؟ العسل مع الجزر رهيب.

    • yaman on 2 January, 2013 at 7:58 pm
    • Reply

    هلا خالد ..
    فيه شي اسمه حلاوة جزر اصلها عراقي اذا ماني غلطانه ! اذا ماذقته لازم تذوقه شي لذيذ جدا
    مكوناته عباره عن نشا وجزر وزعفران وهيل وزبده و فستق
    قوامه اشبه بحلوى البحرين ههه

    1. للأسف والله ماقد سمعت عنها أو ذقتها الصراحة … إن حصلي إن شاء الله …

    • Anonymous on 14 April, 2011 at 8:57 pm
    • Reply

    حياك الله يا غالي

    تقول الجزر مهضوم حقة !!!!!

    ماشفتني وعيالي نقرض فيه تقل ارانب ههههه

    لكن مفعلا مثل ماقالت الاخت الكوسى مهضومة عندنا ولو ان زوجي تغيرت نضرته لها وقدرت اخليه ياكلها لكن عيالي ابدً غير محشي ماياكلونة لو ايش نفس الكلام ينطبق على الباذنجان

    سؤالي هو : اقدر ابدل الكوسى هن او باذنجان او حتى قرع <<<تموت اختك على هذه الثلاث

    شؤل ثاني اقدر ابدل الدبس السكر بدبس رمان او عسل ؟؟؟

    شاكرة لك حضورك المميز اخوي والله يعطيك الصحة والعافية

    1. الله يحيك هلا والله ..

      ههههه بالعافيه عليكم ..

      هي الفكرة من هذي الأكله إن الحلاوه حق التغطيه تمشي بشكل رهيب مع الجزر كونه حلو أصلا .. الكوسا ما ينفع أو بالأصح ينفع بس ماراح يكون الطعم مقبول مره و الباذنجان نفس الكلام .. من ناحية تقدرين تسوينهم تقدرين أكيد بس هل بيكون الطعم حلو أو لأ هذي قضية ثانيه ..

      القرع ممكن و البطاطس الحلوه بعد ممكن و النتيجة بتكون حلوه أهم شي تأكدي إذا أستخدمتي هذي المكونين إنك ما تطبخينهم أكثر من اللازم عشان لا تصير مهريه .

      تقدرين تحطين شوي دبس رمان عشان يعطي طعم رمان بس لا تحطين نفس الكمية لأن دبس الرمان يميل للحموضه أكثر من الحلاوه .. العسل ممكن و السكر الأبيض العادي ممكن بعد زي ماقلت هذي الأكله لها نسخ كثييييييير .

    • *سفونه الليمونه* on 10 April, 2011 at 5:32 am
    • Reply

    الله يعطيك العافيه دايما تنصر المظلومين … القرع والجزر بس باقي الكوووسه كثير اللي مايرغبونها:/
    طيب بشكل عام دبس السكر لونه بني؟؟؟والسكر الاسمر برضو بني؟؟
    انا مرتين شريت سكر اسمر
    كيس شريته وكان مطحون وبينات البودره مثل الكسر البنيه اللي مانطحنت (تعبئه محليه)…وريحته كأن فيه حموضه خفيفه او مثل ريحة التمر لما يخرب او بالاحرى لما يجيه نقطة مويا يخوووز ويخرب= اووم الوصف
    ومكتوب عليه دبس السكر- انا جاء على بالي ان هو السكر الاسمر واستخدمته للسينبون وكان طعمه لذيذ مره…وشريت مره ثانيه سكر اسمر من المنتجات الامريكيه وكان مطحون نااعم مره بس هذا سكر اسمر مو دبس سكر …والنتيجه في السينبون طلع دبس السكر اللذ من السكر الاسمر
    وبعد كل هالقصه الطويله هل الاثنين ممكن ناخذ هذا بدل هذا لو ماتوفر!؟!؟

    1. الله يعافيك …

      الكوسه كثير ما يرغبونها ؟ بالعكس أشوف بالذات عندنا ماخذه أكثر من حقها هههه هي و الباذنجان ..

      دبس السكر يجي لونه بني غامق على سواد بعد . لو شفتي الصور فوق فيه صوره فيه سائل أسود على الزبده هذا هو الدبس كذا لونه . طبعا هو درجات يجي خفيف وثقيل هذا الثقيل .

      دبس السكر سائل يشبه العسل ، السكر البني سكر لونه بني ؟؟؟ هم صح مستخرجين من بعض ولهم علاقة في بعض بس ما أقدر أقول إن هذا بديل لهذا أبدا . الدبس حامض وموب حلو زي السكر البني إلا يميل للمراره بعد .. غير كذا الدبس سايل الفرق كبير مره .

Leave a Reply

Your email address will not be published.

%d bloggers like this: