«

»

يناير 28 2011

البافلوفا … Mixed Fruit Pavlova

هلا والله …

 

البافلوفا واحد من أشهر الحلويات الموجوده في المطاعم الفاخرة وخصوصا في بريطانيا و نيوزلندا و أستراليا. منشأ الحلى هذا موضوع خلاف كبييير بين أستراليا ونيوزلندا وكل واحد يقول إحنا اللي مخترعينه قبلكم. الطبق هذا مخترع بسبب زيارة راقصة باليه مشهورة في هذاك الوقت إسمها “آنا بافلوفا” لنيوزلندا و أستراليا و تسمى الطبق بإسمها. البافلوفا طبق جدا سهل وبسيط في تركيبه و الحلو فيه إنه سهل جدا تغيرون فيه بحيث يتماشى مع حشوات و إضافات كثيره.

 

البافلوفا في الأساس عبارة عن قشرة مرانج مجففه في الفرن ومحشيه كريمة مخفوقه وفواكه بس. القشرة موضوع شخصي شوي فيه ناس يحبونها نحيفة وتقرمش كلها وفيه ناس يحبونها مقرمشة من برا و زي المارشمالو من جوا.

 

 

 

المقادير :

 

للمرانج :

 

4 بياضات بيض

كوب سكر

ملعقة صغيرة نشا ذرة

 

 

للحشوة :

 

كوب كريمة خفق

تشكيلة فواكه حسب الرغبة ( خوخ ، موز ، برتقال ، كيوي ، أنواع توت مختلفه … إلخ .. )

 

 

للتغطية :

 

نص كوب مربى مشمش

ملعقة كبيره مويه

أوراق نعناع( إختياري )

سكر مطحون ( إختياري )

كوليه فواكه حسب الرغبة( إختياري )

 

 

الطريقة :

 

 

القشرة :

 

1 ـ أول شي نسوي مرانج سويسري بالبيض و السكر ونخليه يوصل مرحلة منقار الطير . نخلط نشا الذرة مع السكر في المرانج . اللي ما يعرف شي عن المرانج أو المرانج السويسري يقرأ الموضوع حق المرانج الفرنسي و السويسري.

 

2 ـ نشغل الفرن على 150 فهرنهايت أو 65 مئوي ( الفرن يعتبر بارد نسبيا هذا يسمونه فرن تجفيف ) .

 

3 ـ الحين نشكل المرانج . راح أستخدم كيس حلويات براس نجمة هنا بس ممكن إستخدام أي راس عادي. نصب المرانج على صينية فرن مدهونة بشوي زيت أو أفضل بعد نستخدم ورق زبده أو سيلبات. نصب القشرة على شكل دائرة بعدين نسوي للدائرة زي الجدران عشان تشيل الحشوة. اللي ما عنده كيس أو ما يبي يستخدم كيس يقدر يسوي نفس الشي بإستخدام ملعقة يحط شوي من المرانج على ورق الزبده أو الصينية وبعدين يسوي زي الفتحه داخلها جدا سهله. هنا أنا أحب القشرة تكون من داخل زي المارشمالو عشان كذا أسويها شوي متينة بس اللي يحبها تقرمش يسويها أنحف. اللي يحتاج مساعده في صب دوائر مضبوطه يقدر يرسم دوائر على ظهر ورق الزبده ( زي ما أنا سويت ).

 

 

بافلوفا

 

 

4 ـ ندخل المرانج الفرن إلين يجف تماما راح ياخذ حوالي ساعتين ونص إلى ثلاث ساعات . نطلعه من الفرن ونخليه إلين يبرد تماما قبل نشيله من الورق . لو كنا بناكل البافلوفا في وقت ثاني نحفظ القشرة حقت البافلوفا في علبه تتقفل بإحكام على حرارة الغرفه أسبوعين أو شهرين في الفريزر.


 

PAVLOVA

الحشوة :

 

نقطع الفواكه إذا كانت تحتاج تقطيع. بعدين نسوي كريمة مخفوقه بالفانيلا بس بدون سكر. اللي ما يعرف كيف يسوي كريمة مخفوقه يشوف الموضوع هنا.

 

التغطية :

 

هنا راح ندهن الفواكه بمربى مشمش. هذي العملية تستخدم عشان تعطي الفواكه لمعة حلوه غير إنها راح تحفظ الفواكه وقت أطول. نخلط المربى مع المويه في قدر صغيره ونخليها توصل غليه بعدين ندهنها على الشي اللي نبي بفرشه وهي حاره.

 

التجميع :

 

أول شي ناخذ قشرة بافلوفا ونحشيها بكريمة مخفوقه . بعدين نرص الفواكه عالكريمة ( حاولوا تنوعون في الأشكال و الألوان حقت الفواكه عشان تطلع بشكل حلو ) . الحين ندهن الفواكه بتغطيه المشمش وهي حاره . نخليها تبرد ثواني بعدين نرش شوي سكر بودره و تتزين بورق النعناع حسب الرغبة. تقدم البافلوفا مع كوليه فواكه لو حبيتوا . طريقة الكوليه هنا.

 

 

 

PAVLOVA

الفواكه بدون التغطية

 

pavlova

الفواكه مع التغطيه

 

بافلوفا

 

pavlova

 

 

بلفلوفا

pavlova

 

 

 

الحفظ :

 

 

القشرة حقت البافلوفا راح تعيش وقت طويل لحالها بدون ما تتأثر بس أول ما نحشي المرانج الكريمة المخفوقه راح تبدأ تطيح و المرانج راح يبدأ يترطب و الفواكه راح تبدأ تخرب. البافلوفا راح تنحفظ يوم تقريبا في الثلاجه بدون ما تتأثر كثير بس أفضل لو تنوكل بعد ما تتسوى بفترة موب طويله يعني تقريبا ٤ – ٥ ساعات ممتاز .

 

 

 

كلمة أخيرة :

 

 

البافلوفا في الأساس قشرة مرانج مع حشوة بس هذا المهم … شكل القشرة ونوعيتها هذي مسألة راجعه لكم . الحشوات بعد أي حشوة ممكن تستخدم مثلا ممكن تحشونها كسترد بدال الكريمة . الفواكه هذي بعد موضوع ثاني خيارات الفواكه ما تخلص و الصوصات اللي ممكن تتقدم معها بعد خياراتها ما تخلص.

 

اللي أبغى أوصله هو إنه خيارات التعديل هنا كثيره فلا تقفلون مخكم للأفكار بس.

عن الكاتب

Top Chef

62 comments

1 ping

Skip to comment form

  1. فاطمه

    السلام عليكم ماهو افضل حل حتى لا يتغير لونها فى الفرن مع انى اخفض النار كتيرا لكن يصبح لونها بيج فما الحل هل يمكن تغطيتها حتى لا يتغير لونها وهل يمكن ان نضع لها الالون

  2. MT

    مرحبًا شيف وعساك عالقوة والله يعطيك العافية
    أنا فرني غاز وكهرب من فوق، وحااار..سويت البافلوفا أول مره من وصفه بتشفلير كانت تجربة سيئبة جدًا:) الوصفه فيها أغلاط وما اقتنعت ببعض المكونات مع كذا سويتها من حماس التعليقات وثقة راعية الوصفة. ولسّى فيني أمل لأنها سهله وصيفية وتشوق..السؤال: هل لازم أفتح الفرن قبل؟ والصاجة أنزلها ولا أخليها بالوسط؟ وأقصّر النار عالآخر؟ آسفه على قصة حياتي :p

  3. sasa

    الحين خاطري أصلحها بس النشا مافهمت متى أحطه
    في المرانج السريسري تخلط السكر مع البيض في صحن على البخار ثم نعمل نفس طريقة الميرانج الفرنسي نخلطهم بالعجانه لحد مانوصل لمنقار الطير
    يعني النشا والبيض والسكر في البدايه اعملهم في صحن على بخار ثم في العجانه؟؟؟

  4. raghda

    شيف طلعت حمراء خﻻص وﻻ كويسه مرا حار الفرن الكهربائية كم احط درجه الحراره اهي من 500 الى 150

    1. Top Chef

      حمرا أجل غالبا طولتي عليها أو الفرن حار … أقري الردود تحت فيه وحده جتها نفففس المشكلة.

  5. سارا

    السلام عليكم شيف
    اممم انا عملت البافلوفا زي ما ذكرت والحمد الله زبطت معي بس واجهت مشكله مو عارفه كيف اضبط حرارة الفرن لأني حطيته على 150 وصار لونهم يميل للبيج شوي
    فلما بحثت بمقاطع ثانيه لاعداده حصلت مقطع لمنال العالم ذكرت ان درجة الحراره 130 وبعيد ان شاء الله الطريقه بمقياس الحراره اللي ذكرت
    لكن قريت في ردك على احد الاخوان ان اذابت السكر يكون شرط مهم بينما منال قالت درجة الحراره الاهم مو شرط اذابت السكر حبيت اتأكد من هالنقطه رغم اني استخدمت سكر بودره
    وطالع معي الشكل مزبوط ولله الحمد …. طلب اخير ياليت لو سمحت تقدر لي وقت خلط البيض لحتى يصل لمرحلة منقار الطير تقريبا او بالضبط انا تركته تقريبا ل 7 دقائق وما احس انه تجمد بالمره لكنه نجح …. صحيح في مقطع منال وضعت خل مع مقادير البافلوفا ومدة طبخه تقريبا ساعه ايش السبب بفارق المده بين وصفتها ووصفتك
    وآسفه عالإطاله

    1. Top Chef

      وعليكم السلام و الرحمة ….

      تغير اللون شي طبيعي يصير بعد ما تتبخر كمية كبيره من المويه في البافلوفا يعني تجف أكثر من اللازم يبدأ السكر و البروتين في البيض يتفاعلون مع بعض ويتكرملون وهذا هو سبب اللون. طبعا غير اللون أنا متأكد إن قوام البافلوفا عندك كان أقرب للبسكوت من قوام المراشمالو اللي مفروض يكون داخل.

      حاولي تراقبين البافلوفا وهي في الفرن وفي أخر ربع ساعة أفتحي الفرن وشوفي هل جفت بشكل كافي أو لأ مو شرط أبدا يخلص الوقت المكتوب في الوصفة. الوقت عندي أختلف عن الوقت عندك ممكن لأسباب كثيره ، إما إن الفرن عندك شوي يشتغل أحر من عندي أو سبب أبسط من كذا وهو إنك شكلتي البافلوفا أنحف شوي من اللي عندي (تنقيص سماكة البافلوفا للنص يسرع وقت الطبخ ٤ أضعاف !!!) فحتى فرق بسيط في السماكه ممكن يسبب فرق كبير في وقت الطبخ.

      تذويب السكر هو الأهم (عندي تحفظ الصراحة على كثير من وصفات منال العالم). التفسير علمي ماراح أعطيك رأيي شخصي. المعروف إن المواد تذوب في السوائل الساخنه أسرع وأكثر من البارده (حاولي تذوبين نفس كمية السكر في مويه بارده وحاره وشوفي وش يذوب أسرع). بعد تسخين البيض البيض راح يكون في أقصى درجات تقبله لذوبان السكر، ولكن بعد الخفق راح يبرد البيض طيب وش راح يصير في السكر اللي ماذاب ؟ راح يضل معلق في المرانج كحبيبات سكر. المرانج السويسري يستخدم كمية سكر أكبر من الفرنسي (تقريبا الضعف) وعشان كذا مهم تذويب السكر. في المرانج الإيطالي نسوي نفس العملية بس بشكل منفصل، نذوب السكر في شيره وبعدين ندخل الشيره في المرانج. في الحالتين الهدف سكر ذائب في المرانج بدال حبيبات سكر.

      حرارة طبخ البيض مهمة في تعقيم البيض فقط طبعا للبافلوفا هذا غير مهم كونه بيدخل الفرن بعدها بس لبعض التطبيقات للمرانج السويسري اللي يستخدم فيها ني يعتقد إن هذا يعطي مرانج بخطر تسمم أقل.

  6. رائد

    كيفك شيف
    انا صارت عندي مشكله اول مره بحياتي اسوي هل وصفه سويت مورنغ من قبل بالفرن وظبت
    بس جيت اليوم بسوي هاي الوصفه حطيتها بالفرن بدرجه 65 مثل ما هو مكتوب والفرن كان بارد نسبيا فعلا وقعدت 3 ساعات ومع هيك لما جيت امسكها لقيت لسه طريه كتير يعني نشفت نوعا ما بس طريه كتير وكماااان الغريب كان في حواليها مثل القطر هو فعلا كان قطر من وين اجا ما اعرف
    رحت عليت النار ل 150 وخليتها كمان نص ساعه يالله نشفت وتغير لونها وحطيت فوقها ورقه زبده عشان تحافظ عاللون وستوت
    وتركتها تبرد وكمان كان في مشكله تطلع من ورقه الخبز وتكسرت وحالتها حاله
    مو عارف ايش المشكله هل لانو كانت الطبقه نحيفه لاني عملتها دائره كبيره ما اعرف لازم اعيدها بس حاب اعرف خطئي وين ممكن يكون

    1. Top Chef

      بخير عساك بخير …..

      مشكلة معروفه وتصير كثير.

      طبعا مشكلتك الرئيسية هي القطر وهي اللي سببت باقي المشاكل وأتوقع لو تحلها بتنحل الباقيات أكيد.

      مشكلة القطر اللي يطلع وهي في الفرن ممكن يسببها شيئين ، إما إن السكر ماذاب وقت عمل المرانج وهنا لازم تطبخ البياض والسكر للحراره المطلوبه وإلين ما يذوب السكر بشكل جيد.

      المشكلة الثانيه هي إنك غالبا خفقت الخليط أكثر من اللازم. كثير ناس يحسب إن من يوم يصير شكل المرانج ثابت خلاص هو نجح بس ينسى إن الخلط الزايد زي الخلط الناقص كلهم خطأ !! وكلهم يسببون مشاكل.

      السكر له دور جدا جدا كبير في شكل فقاعات الهواء في المرانج (أرجع لموضوع المرانج الفرنسي) وإذا السكر كله نزل على شكل قطر كذا إختلف شكل فقاعات المرانج وعشان كذا بتلاقيه يتكسر.

      1. رائد

        شكرا يا شيف علي الرد وانشالله بجربها لحد ما تزبط معي <3

  7. غير معروف

    يعطيك العافية

    (نصب المرانج على صينية فرن مدهونة بشوي زيت أو أفضل بعد نستخدم ورق زبده أو سيلبات.)
    انت قلت اي دهون او زيوت بتخرب المارنج كيف ادهن بزيت ؟ وادا بيزبط يكون الدهن زيت ورشة طحين؟

    1. Top Chef

      الدهون و الزيوت تعيق “تكون” الفقاعات في المرانج. بس إحنا هنا خلاص كوننا الفقاعات وكل شي. لو لاحظتي طرق الكيكات الإسفنجية بأنواعها والموسات وغيرها من التطبيقات اللي تستخدم مرانج كلها تخفق المرانج لحاله بس من يوم يتكون نقدر نضيف عليه أي شي زي كسترد (في سوفليه مثلا أو موس) أو زبدة وحليب وطحين (في كيكة إسفنجية مثلا) أو غيره بدون ما يأثر.

      أفضل تستخدمين سيلبات أو ورق زبدة ، خلي الزيت حل أخير. لو بتستخدمين زيت بدون طحين أو أي شي ثاني. غير إن الطحين موب مطلوب هنا ولا راح يسوي شي تذكري إن الفرن هنا بارد و الطحين ماراح ينطبخ بدرجة كافيه في الفرن إن طعم النشا يروح منه وبيقعد هذا الطعم في البافلوفا.

  8. غير معروف

    شيف هذي المقادير كم تعطي حبات بافالوفا عندي عزيمة لست أشخاص هل تكفيهم هذي المقادير أو أضاعف الكمية ؟؟ وكم حجم الحبات اللي عملتها انت او قطر الدائرة تقريبا؟؟ ومشكووور

  9. غير معروف

    شيف هذي المقادير كم تعطي حبات بافالوفا عندي عزيمة لست أشخاص هل تكفيهم هذي المقادير أو أضاعف الكمية ؟؟

    1. Top Chef

      حسب كم حجم الحبات اللي تسوين. هنا سوتلي ٤ حبات بس كانت كبيرة الصدق يعني حقت نفرين يمديك تصغرينها وتسوين ٨ حبات تقريبا. وفي حال لقيتي كمية المرانج ما تكفي قبل ما تدخل الفرن فتذكري إن راس مالها بياض بيض وسكر موب شي يحتاج مقادير غريبة أو شغل كثير ، سويي كمية أولى وقرري بعدها تحتاجين زيادة أو لأ.

  10. ام احمد

    يعطيك العافية
    ليش وضعت نشاء وينفع نعمله بدون نشاء
    والبافلوفا بينفع تنعمل بالمرنج الفرنسي والايطالي مثل السويسري

    1. Top Chef

      الله يعافيك ….

      النشا موب ضروري أبدا هو ينحط عشان في حال صار عندنا حالة ال weeping أو تدميع أو بكاء المرانج تقريبا. الحالة تصير بإن المويه اللي داخل المرانج المطبوخ تطلع عالوجه في بعض الحالات، غالبا في المرانج المخفوق أكثر من اللازم أو المطبوخ لفترات أقل ومحفوظ فترات طويلة. يمديك تسوينه بدون النشا عادي.

      ممكن عمل البافلوفا بأي نوع مرانج بس القوام راح يختلف شوي (موب أحسن ، موب أسوأ بس غير !)

  11. Hano0ofky

    مررة شكرا يابختك بالحسنات :)
    ودي اسوي ميني بافلوفا يعني تقريبا زي حجم فناجيل القهوه العربية ،اتوقع باحتاج وقت افل من ساعتين صح؟ سؤالي
    هل ينفع اني افتح الفرن واسكرة كذا مرة عشان اتاكد ؟
    وهل احسن اني اكون مسخنه الفرن قبل بفتره؟
    والمرحلة اللي لازم اوصل لها هي انه ماينضغط لو ضغطتة ؟
    شكررا

    1. Top Chef

      إذا كانوا أصغر راح يجفون أسرع أكيد …

      يمديك تفتحين باب الفرن عادي …

      تسخين الفرن قبل بفترة دااايما دايما مطلوب إلا إذا الوصفة طلبت بالتحديد إنك تحطين الشي في فرن وبعدين تشغلينه.

      المرحلة الأخيره بيكون قاسي وناشف من برا ولو حاولتي تضغطينه مفروض ينكسر موب ينضغط.

  12. غير معروف

    شيف سؤوال لخبطني .. السكر اضيفه مع البياض في الحمام المائي ؟ والا بعد ماينفش شوي ؟

    انت كاتب نحط البيض والسكر في حمام حمائي وبعد ما يوصل مرحلة منقار الطير اضيف السكر والنشا؟
    افيدني جزاك الله خير

    1. Top Chef

      بالضبط زي ما كتبت حطي البيض والسكر في الحمام المائي. لا تصبين السكر شوي شوي مع التحريك ولا تصبين السكر بعد ما يوصل مرحله معينه.

  13. غير معروف

    هلا ادري اني غثه بس تخيل له ٤ ساعات لو للحين اذا لمسته القشره تنزل اقصد تنضغط و ما تنكسر…شالسوات؟ ازيد درجة الحرارة؟؟  

    1. Top Chef

      خليه زيادة

  14. غير معروف

    تكملة السؤال: انا سويتها وحده كبيره مب صغار و كنها شوي دبه (مقارنتن بحقتك) اخليها كثر من ٣ ساعات؟

    1. Top Chef

      غالبا هذا السبب . لأنها كبيره بتاخذ وقت أطول عشان تنشف بس

  15. غير معروف

    هلا عندي سؤال سريع انا الحين ودخلته لي ٣ ساعات على حرارة ١٧٠ فرني ما ينزل اكثر….المهم اني لمسته و للحين انضفط بس ما صار كريسبي…أطلعه؟ ولا اتركه؟

    1. Top Chef

      خليه خليه إلين يستوي ويصير يقرمش

  16. غير معروف

    Looks good mashallah,Q:I only have frozen raspberries and stawberries… is it okay if i made a home made raspberry sauce and I am gonna toss all the frozen berries with it, and then drizzle it over the cream? or do I have to use ONLY FRESH FRUITS??

    1. Top Chef

      it’s up to you. I love frozen fruit but I hate their texture. I would use them in sauces and cooked preparations but I would never use them when I need the texture.

  17. جار القمر

    السلام عليطكم شيف سالت واكيد ما شوفت السؤال فوق فى نفس الوصفه البافلوفا مره شوفتها بشوكلاته اى مع المرنج ضافو كاكاو بودره وبعد النضج حشوها اتشوكلت ممكن تقولى كيف ومشكور الله يجزاك كل خير

    1. Top Chef

      وعليكم السلام و الرحمة …

      ماجاني سؤال ؟

      ممكن أكيد ….

      ما أعرف بالحجم الصراحة لأن في الحلويات عمرهم ما يمشون بالحجم في هذي الأمور. حطي ربع وزن البياض شكولاته بودره.

      سويي نفس الوصفة بالضبط بس لاتحطين الكاكاو إلا بعد ما تبدأ تتكون الرؤوس يعني في الأخير وحطيه شوي شوي. كملي باقي الوصفة عادي. الحشوة ممكن تسوين موس شكولاته (تلاقينه في صفحة الوصفات) أو جاناش مخفوق.

  18. غير معروف

    شيف ٱ‏​نـِْ♡̨̐ـِْا سويت حلى المرانج بنفس طريقة البافلوفا وكله تمام وحطيتها ف الفرن ع حرارة ١٣٠ وبعد نصف ساعه انحرقت كلها وصار لونها بني ايش المشكله؟
    يمكن لاني خليتها طبقه نحيفه حاولت اخليها متينه ما صارت

    1. Top Chef

      ١٣٠ فهرنهايت ولا مئوي

      1. غير معروف

        وَ اللـَّـهـ̯͡. بصراحه مدري ياشيف ٱ‏​نا مو كتير خبرة فـي درجات الحرارة بِــ̯͡سّ هي اقل درجه عندي في الفرن واعلى درجه ٢٤٠

        1. غير معروف

          والفرن حقي غاز

        2. Top Chef

          لا إذا هذي أقل درجة أجل صح عليك ؟ وش قصدك بطبقة نحيفة طيب ؟ إذا نحيفة مررره مره بتستوي أسرع أكيد بس كيف سويتي بالضبط بالضبط عشان توصل الفكرة أفضل

  19. amany

    هاذي اللي يصير داخلها مارشملو ؟
    شفتها بماستر شيف لكن بمقادير مختلفه مثل الخل
    هل راح يطلع لي مارشملو بهالوصفه و لا بس مارينج ؟
    فكره الاحجام الصغيره روووعه

    1. Top Chef

      لا لا مافيه داخلها مارشمالو هي طعمها بعد ما تطلع يشبه المارشمالو .

      الخل عشان يثبت المرانج بس موب ضروري.

  20. vioolet

    طريقتك بالتقديم..خلتني أعشقها :)

    سويتها .وكانت أكثر من رائعة..

    الف شكر ..

  21. جار القمر

    السلام عليكم

    شيف الله يجزك كل خير انا اموت فى البافلوفا بس بنكهات مره شفت بفتافيت انجيلا اكيد تعرفها عملتها بشوكولاته من الداخل ببودرة الكاكاو ممكن شيف تسويهنا اوتعطينا الطريقه

    المشكله بحت فى النت ما لقيت وصفة انجيلا للا بفافلوفا بشوكلت ومشكور خوى والله يعطيك العافيه

  22. غير معروف

    انا عارفه انها بياض بيض بس اقصد مايكون نفس قوام المارشملو يكون شبه سائل ، وكنت ابي اعرف ايش الخطأ اللي يكون بهالحاله .

    1. Top Chef

      ما أنطبخت كفاية

  23. غير معروف

    الله يعطيك العافيه ، حاولت كذا مره اسوي البافلوفا بس ما ضبطت معاي ومشكلتي هي انها من برى تكون اوكي بس من داخل تحس فيها بياض البيض . طبعا ما اقصد وصفتك اللي جربتها لا وصفات من مواقع اجنبيه . شكرا 

    1. Top Chef

      الله يعافيك ….

      هي بياض بيض ؟ وش متوقعه يكون داخلها هههه من داخل بيكون قوامها زي المارشمالو تقريبا … عموما أنا أعرف وصفتي ما أعرف مشاكل الناس الثانين ، جربيها وشوفي لو صار مشاكل كلها تنحل إن شاء الله.

  24. روح وجيه

    يعطيك العافيه يارب
    انا من يومين طحت على مدونتك بالصدفه وعملتلها ادد في المفضله اباع ماشاء الله
    بس حبيت اسأل عن المرانج انت تقول احطو بالفرن الين يجف تقريا الى3 ساعات انا اخاف يبدا يصير لونو احمر او يحترق علي وانا اشوف صورك المرانج فيها ابييييض فمادري ايش رايك ؟؟

    1. Top Chef

      الله يعافيك …

      ما يتغير لونه لو الحراره صح .

  25. غير معروف

    قصدي انك تحب طل حلويات الاجانب ماقد شفت لك حلويات عربيه ..

    لاتقولي هي نفس الشي لا ترى زيها زي حلويات هالحمر اللهم هم ياخون الوصفه الاصليه ويقومون يعدلون عليها عشان تناسب مزاجهم والا؟

    1. Top Chef

      أهااا .. أحب الحلويات العربيه بس ما أشتهيها دايما ، هي زيها زي الأجنبيه في الطرق وكذا وكلها يمديك تعدلين عليها .

  26. غير معروف

    شيف تتذكر انا اللي قلت لك اني سويت مرانغ وكان كنه حجر من قساوته هههههههه

    بغيت اقولك انه طلع زي اللي انت اللي مسويه والله حتى انه تكسر بس ماكنت اعرف انه كذا ينوكل هههههه

    الله يعطيك العافيه ياحبك لكل الاجانب

    1. Top Chef

      هو موب شرط شرط يكون حجر .. زي ما قلت هو يكون زي المارشمالو من داخل يعني شوي رطب بس هو مسألة شخصيه تحبينه حجر خليه حجر ..

      الله يعافيك …

      وشلون ياحبي لأكل الأجانب ؟

  27. شغف

    الشكل النهائي تحفه
    ولا تقديم فندق خمس نجوم
    أحس حرام تنوكل مفروض بس للفرجه 😛

    لاهنت ، وأكيد ننتظر الجديد

    1. Top Chef

      مشكوره على كلامك ومرورك …..

  28. غير معروف

    اولا حلوة مرة فكرتك.

    شفتها مع انا جارتن مسويتها لعيد ميلاد زوجها لكن بحجم كبير وحاشيتها فروالة وصوص فروالة بعد .

    هذه مو لازم حتى يكون معها شي هي لحالها نشتريها وناكلها مو معقول ما احد يعرفها .اتذكر جاني ادمان عليها مو طبيعي

    يسلمو خيو ماقصرت

    1. Top Chef

      هلا والله …

      هذي موب فكرتي .. هذا حلى جدا مشهور …

      القشرة صح تنوكل لحالها هي كوكيز مرانج أصلا …

  29. غير معروف

    عجبتني حييييل …. احسها تصلح حلى عشاء خفيف خصوصا بوجود الفواكه واذا استبدلنا الكريمه بكسترد بتطلع امممممممم لذيذه …
    خفيفه لا دسم ودهون ولا ثقل …الله يعطيك العافيه يارب ….
    ياخي والله كسبت فينا معروف ورحمتنا من النستله والكيري والدريم وب اللى كلا قام يبربس فيها وقال حلى … ولا انواع االسكريات والدهون الضاره وياليتها طبيعيه ….

    1. Top Chef

      هلا والله …

      صحيح جدا خفيفه وصيفيه مره .

      غير الكسترد فيه ألف خيار ثاني بعد .. يمديك تحشينها مثلا جبن ريكوتا أو ماسكاربوني …. أو حتى جاناش مثلا ..

  30. Top Chef

    جت بقوتها يالله انت رهيب
    عندي بياض بيض .. بس ممكن تقيس لي بالكوب لاني مااعرف كم بياض اللي عندي :( مشكله صح
    انتظرك << متحمسة

    1. Top Chef

      هلا والله …

      والله بالكوب بالضبط بالضبط صعبه شوي .. بس هي تقريبا ملعقتين وربع كبار لكل بياض يعني تقريبا ١٠ ملاعق كبيره . بالوزن أسهل . كل بياض ٣٠ جرام يعني أستخدمي تقريبا ١٢٠ جرام وخلاص .

  31. غير معروف

    يعطيك العافيه توب شيف
    شكله بيطلع روووعه بس ليه الكريمه بدون سكر؟ هل البسكوت بيكون مررره حالي؟ مدري أحس لازم سكر

    مره متحمسه أسويه بس فرني الكهرب أحس حرارته عاليه ومشكلته اذا اشتغل وقت طويل فصل من حاله
    كونه بيض هل ممكن يصير منه ضرر لو فصل الفرن عنه فتره ورجعت شغلته؟
    وبصراحه ما قدد سويت مرانج وبالفرن فما أعرف متى بيكون نشف كونه من الشكل أحس ما يتغير لونه
    تتوقع ينفع بفرن غاز على اقصر شي؟

    1. Top Chef

      الله يعافيك …

      بتحطين سكر حطي .. بس أشوف إنه ما يحتاج … الفواكه حلوه و التغطيه حلوه و ينرش فوقهم سكر مطحون و المرانج بعد حلو ..

      كل الأفران تفصل وتشتغل على فترات .. حطيه على أقل حرارة و إنشاء الله بيستوي عادي .. ممكن تسوينه على حراره أعلى شوي بس كذا أسهل . فحتى لو كان فرنك خربان موب مشكله كبيره .. وسعي صدرك ترى حلى سهل … و الفرن الغاز بعد ينفع .. حتى لو حطب بينفع لا تشيلين هم .

      البيض هنا مطبوخ ومخلوط مع سكر … يمديك تاكلينه ني لو تبين بدون أي ضرر . أقري موضوع المرانج السويسري .

      المرانج بتعرفين إنه نشف صدقيني بمجرد ما تمسكينه بتشوفين .

  32. الخُزامى

    ياعيني روعة اشتهيتها مقرمشة ,,,

    وبدون فواكه !!!

    نتركها تجف بدون تشغيل الفرن ؟

    دائما تتحفنا بالرائع والمميز ..

    شكرااا

    1. Top Chef

      هلا والله …

      بدون فواكه ممكن .. بس أنا حبيت أحط الأساس أول شي ..

      إلا تجف في الفرن على حراره هاديه ١٥٠ فهرنهايت .

  1. أستراليا : سوفليه الباشن فروت .. Passion Fruit Souffle « مدونة توب شيف … Top Chef

    […] فيه شوي. تكلمنا عن المطبخ الأسترالي و النيوزلندي في موضوع البافلوفا. أستراليا دولة حديثة نسبيا وغنية بالمكونات الطبيعية […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: