الفاصوليا المقلية المكسيكية .. Mexican Refried Beans

هذي وحدة من أهم أهم الأكلات المكسيكية و المنتشرة كالعادة حتى خارج المكسيك زي في أمريكا أو باقي أمريكا اللاتينية و الجنوبية. سواء أستخدمتوها كديب مع تورتيا مقلية مثلا أو كحشوة لتاكو أو بوريتو أو غيره أو كطبق جانبي أو حتى لحالها مع شوي جبن وصلصة فوقها هي واحد من ألذ ألذ الأشياء اللي طلعت من المطبخ اللاتيني. للي ما يعرف وش الفاصوليا المقلية هي المعجون البني اللي تلاقونه تحت الجبن في الناتشو عند المطاعم هذي هي الفاصوليا المقلية بإختصار.

 

الإسم الأسباني لهذي الأكلة هو Frijoles Refritos واللي تترجم للإنجليزية ب Refried Beans يعني الفاصوليا المقلية مرتين أو مقلية بشكل مكرر. هذا الأسم ماله أي علاقة بطريقة الطبخ كونها موب مقلية وأبدا موب مقلية مرتين !! الترجمة الإنجليزية خاطئة ، المقصود بالفعل الإسباني هي الفاصوليا المقلية بشكل جيد تقريبا.

 

في عدة عدة طرق للفاصوليا المقلية و الطريقة اللي راح أحط هي الطريقة اللي أستخدم في الغالب بس هذا ما يعني أبد إنها هي بس الصحيحة أو الأصلية. كل منطقة في المكسيك هذا إذا ماكان كل شخص يسويها بإضافات مختلفة. بعض الناس يسوونها بفاصوليا سوداء ، بعضهم بأنواع فاصوليا ثانية ، بعضهم يسويها بزيت ، بعضهم بدهن حيواني ، بعضهم يستخدم مرق بعضهم لأ ، بعضهم يستخدم بصل أو ثوم أو الإثنين وبعضهم يتركهم نهائيا ، بعضهم يستخدم معهم فلفل حار طازج أو مجفف أو حتى فواكه أو خضروات أو بهارات مختلفة وبعضهم لأ، بعضهم يحبها ناعمة جدا وبعضهم يحبها مهروسة بشكل بسيط بس. في عدة عدة طرق ممكن إنكم تعدلون على هذي الوصفة حسب ذوقكم.

 

 

المكونات :

 

٣ ملاعق كبيرة دهن حيواني (سواء دجاج ، بقر ، بط ، دهن بيكون أو غيرهم) أو زيت زيتون

بصلة صغيرة مقطعة صغار

فصين ثوم مقطعة صغار

كوب ونص فاصوليا سوداء black beans مطبوخة

كوب مرق دجاج أو خضار أو بقر أو حتى موية الفاصوليا اللي في العلبة أو اللي أنطبخ فيها

ملح وفلفل

نص ملعقة صغيرة كمون مطحون

ملعقة صغيرة خل تفاح أو عنب أو حتى عصير لايم أو ليمون

 

* لو أستخدمتوا زيت نباتي أو زيت زيتون بيعطيكم فاصوليا جدا لذيذة بس إذا تبون طعم ثاني تماما لا يقارن أستخدموا شحم حيواني. (لعمل الشحم حطوا جلد الدجاج أو البط أو حتى شحم البقر أو غيره بعد ما تقطعونه في قدر مع شوي مويه ، غطوا القدر وحطوه على أقل أقل نار ممكنه إلين يذوب الشحم ويتجمع في القدر، أحفظوه في الثلاجه بيعيش شهور).

 

* بإمكانكم هنا تستخدمون فاصوليا جافة وتطبخونها بنفسكم أو أسهلكم بعد تستخدمون فاصوليا معلبة متوفرة بكل مكان (لو بتستخدمون معلبة بتحتاجون علبة فاصوليا وحده لهذي الوصفة)

 

* موب شرط أبدا تستخدمون فاصوليا سوداء هنا بإمكانكم تستخدمون فاصوليا حمراء red beans أو حتى اللي يسمونها فاصوليا البينتو pinto beans وكلهم متوفرين في أي سوبرماركت هنا.

 

* شرحت طريقة عمل المرق هنا وعطيت وصفة لمرق الدجاج هنا. في حال ما تبون تستخدمون مرق أستخدموا مويه الفاصوليا اللي في العلبه أو اللي طبختوها فيها أو أستخدموا مويه عاديه بعد ، أهم شي لا تستخدمون ماجي أو غيره.

 

 

الطريقة :

 

في قدر صغير على حراره أقل من وسط نحط الزيت أو الشحم اللي ذوبنا.

 

نحط عليه البصل مع رشة ملح ونقلبه فيه ونطبخه إلين يقلب البصل ذهبي خفيف تقريبا ٦ دقايق (موب محروق).

 

نحط الحين الثوم ونقلبه مع البصل إلين تطبع ريحته بس (تقريبا ٣٠ ثانيه موب أكثر).

 

نحط عليهم الفاصوليا و المرق ونطبخهم على غليه خفيفة مع بعض تقريبا ٥ دقايق.

 

الحين الخيار راجعلكم وللشي اللي بتستخدمون الفاصوليا له. بإمكانكم تنقلون الخليط لخلاط وتخلطونه بحيث يعطيكم فاصوليا مقلية ناعمه أو بإمكانكم تهرسون الفاصوليا بملعقة خشبيه أو بهراسة بطاطس بحيث تعطيكم فاصوليا أخشن شوي. شخصيا أفضل الناعمه لو بحطها فوق تورتيا مقليه أو كديب مثلا بينما الخشنة أفضل لو كانت طبق جانبي أو حشوة بس في النهاية الخيار راجعلكم.

 

عدلوا القوام حسب الرغبة بإنكم تطبخونها شوي لو تبونها أثقل أو تضيفون مويه أو مرق لو تبونها أخف (خلوها دايم سايلة أكثر مما تبون بشوي لأنها بتثقل شوي إذا بردت).

 

حطوا رشة ملح وفلفل والكمون و الخل وذوقوا الفاصوليا وعدلوا الطعم حسب الرغبة.

 

refried beans

الحفظ و التسخين :

 

الفاصوليا ممكن تقعد في الثلاجه ٥ أيام تقريبا بدون مشاكل. سخنوها بإنكم تحطونها في قدر مع شوي مويه وتسخنونهم مع بعض إلين توصل غليه خفيفه وتسخن من جديد.

 

Leave a Reply

Your email address will not be published.

%d bloggers like this: