مارون جلاسيه .. Marron glacé

هلا والله …

 

المارون جلاسيه للي ما يعرفه هو نوع من أنواع الحلويات الفرنسية الفاخرة مصمم إنه ينوكل لحالة مع قهوه مثلا أو يستخدم كمكون لعمل حلويات ثانية. المارون جلاسيه ببساطة هو عبارة عن أبو فروة أو كستناء chestnut مسكرة أو ملبسة يعني مطبوخه ومحفوظه في شيرة سكر مطعمة بالفانيلا. تكلمت في موضوع قديم عن عملية التسكير أو التلبيس candying هنا ووضحت كيف إنها ممكن تستخدم لطبخ وحفظ أشياء كثير زي الفواكه و قشورها و الزنجبيل و حتى المكسرات زي في حالتنا هنا.


الفكرة من عملية التلبيس أو التسكير ما أختلفت في حالة المارون جلاسيه بس الطريقة اللي راح نستخدمها عشان نوصل للنتيجة هي اللي راح تختلف شوي عشان تمشي مع تركيب أبو فرة الغريب شوي. العملية تاخذ وقت طويل، تقريبا أسبوع بس ماراح يكون فيها شغل صعب أو طويل. المارون جلاسيه ينباع في المحلات بسعر جدا غالي (٣-٤ يورو للحبة !) و أكيد كل شخص أستغرب من سبب إرتفاع السعر بس اللي بيجرب يسويه بيعرف ليش. في الطريقة اللي راح أستخدم راح نبدأ أول شي بتقشير أبو فروة بعد كذا بنطبخه في مويه إلين ينطبخ تماما وبعدها نبدأ عملية التسكير بإننا نطبخه ونشربه شيرة سكر بتركيز مختلف كل يوم و آخر شي نجففه ونحط عليه التغطيه الأخيره.


أول تجربة لي في عمل المارون جلاسية كانت لعمل حلى إسمه مون بلان Mont blanc يستخدم فيه كريمة مارون جلاسيه يعني مارون جلاسيه مطحون مع شوي كريمة. المارون جلاسيه اللي سويته كان لذيذ بس كان مكسر لمليون قطعه وما ينفع للأكل لحاله بس نفع للحلى بدون مشاكل. بعد البحث لقيت إن هذي مشكله شائعة في عمل المارون جلاسيه وهي وحده من أكثر المشاكل شيوعا وللأسف كثير من الطرق الموجوده ما تتكلم عنها والنتيجة هي إن أغلب الكمية اللي نستخدم تتكسر قبل نوصل لليوم الأخير بس الحمد لله الطريقة الأخيره اللي جربت تحل هذي المشكلة وبكل بساطة بعد.


الصفات اللي نبغاها في النتيجة النهائية هي حبات كاملة وكبيره وشكلها حلو ولامع ولها نكهة أبو فروة قوية مع نكهة فانيلا خفيفة بس واضحة وما تكون حلوه أكثر من اللازم بحيث ما نذوق أي شي ثاني. قوام المارون جلاسيه مفروض يكون لين بس متماسك يعني ما يكون قريب من قوام أبو فروه المشوي مثلا اللي يكون شوي نشوي ويتفتت بشكل خفيف.

 

الكستناء أو أبو فروة نوع من أنواع المكسرات بصفات خاصة شوي. أول صفة تميزه هو إنه رطب أكثر من باقي أنواع المكسرات وهذا يخليه يخرب أسرع من باقي الأنواع ولازم ينحفظ في الثلاجه وعشان كذا هو موب متوفر طول السنه زي اللوز أو البندق مثلا. ثاني صفة تميزة هو إنه عكس أغلب المكسرات اللي تخزن طاقتها على شكل دهون الكستناء تخزن أغلب طاقتها على شكل نشويات وعشان كذا هو لازم ينطبخ عشان يصير صالح للأكل وعشان كذا هو له طعم أو قوام يشبه البطاطس تقريبا بعد الطبخ أكثر من كونه يشبه اللوز مثلا. لهذي الأسباب الكستناء غالبا ما يتعامل معها في الطبخ كأنها خضار أكثر من كونها نوع مكسرات. أبو فروه له قشرتين وحده خارجيه صلبه و الثانيه داخليه خفيفه وبطعم مر ، تقشير أبو فروه وحده من أكثر الخطوات المتعبه واللي لازم تتسوى باليد. إذا جينا نختار أبو فروه دايما ندور على الحبات الكبيره و المدورة و اللي تكون قاسية، إذا ضغطنا على حبة وكانت لينه هذا يعني إنها قديمه وغالبا خربانه داخل وما ينفع تستخدم هنا للمارون جلاسيه. محلات الحلويات يستخدمون أكبر و أفضل و أغلى حبات الكستناء للمارون جلاسه ، هذي بيكون لها أفضل نكهة و بسبب كبر حجمها راح تقلل من التعب وقت التقشير عشان كذا يفضل لو تشترون كمية أكبر بكثير من اللي تحتاجون وتستخدمون أكبر و أفضل حبات للمارون جلاسيه و الباقي للأكل أو لإستخدامات ثانيه.

 

 

المقادير :

 

كيلو أبو فروه بحبات كبيره ( كيلو قبل التقشير موب بعده )

١٥٠٠ جرام سكر

لتر ونص مويه

عود فانيلا مقسوم بالطول

١٠٠ جرام سكر بودرة

 

* الميزان هنا ضروري و الحساب مهم هنا إنه يكون بشكل جدا دقيق لأننا راح نزيد تركيز الشيره بإننا نضيف كمية سكر معروفه بدال ما إننا نطبخ الشيره لحرارة معينه زي ما وصفات ثانيه تستخدم هذا أسهل غير إنه يجنبنا الحاجة لإستخدام ميزان حراره.

 

* راح تحتاجون كمية أبو فروه أكبر من اللي مطلوب عشان تطلعون منها كيلو بحبات كبيرة. كثير من الحبات بتكون خربانه أو ما تتقشر أو تتكسر وقت التقشير وعشان كذا نبدأ بكمية أكبر من اللي نحتاج.

 

* عود الفانيلا هنا أشوف إنه ضروري ، الوصفه راح تصير بدونه ويمديكم تستخدمون شي ثاني زي بودرة فانيلا أو فانيلا سايلة أو تتركونها حتى من الأساس بس من ناحية الطعم مافيه شي بيكون قريب من الفانيلا الحقيقية.

 

 

الطريقة :

 

* اليوم الأول :

 

اليوم الأول هو اللي فيه كل الشغل تقريبا باقي الأيام الشغل فيها ما يتعدى دقيقه تقريبا.

 

الخطوة الأولى : تقشير أبو فروة :

 

يمكن أصعب خطوة في المارون جلاسيه هي تقشير أبو فروة بحيث يطلع معنا بقطعه وحدة. القشرة الداخليه بالذات هي اللي بتتعبنا شوي، بعض الأحيانا تطلع بسهولة بدون أي تعب وبعض الأحيانا تحتاج شوي فرك وبعض الأحيان بيكون مستحيل تنشال القشره الداخليه ويفضل تروحون للحبة اللي بعدها وماتضيعون وقتكم. يفضل تجمعون كم شخص يساعدكم في التقشير هذا أفضل حل الصراحة.

 

أبو فروة (كستناء)

أول خطوة عشان نقشر أبو فروه هو إننا نسوي بطرف سكين حاد علامة X على الجهة المسطحة منه. نستخدم هنا راس السكين بس ونسوي فتحة في القشره الخارجيه بدون ما نوصل للحم داخل. هذي الحركة تستخدم عشان ما ينفجر علينا إذا جينا نقشره وعشان تكون مكان نبدأ منه في التقشير بعدين.

 

peeling chestnut

 

الحين نسلق ٥ حبات أبو فروه تقريبا في مويه مغليه دقيقتين أو ثلاثه كافيه بعدين نطلعها ونبدأ نقشرها وهي حاره قبل لا تبرد، إذا بردت بتلصق القشره الداخلية عليها وعشان كذا نسويها على دفعات صغيره. فيه ناس يستخدمون طريقة ثانيه للتقشير بإنهم يحطون أبو فروه في الفرن أو على جمر وهذي طريقة جيده لو كنا نبي ناكله بس موب للمارون جلاسيه كونه ينشفه وعشان كذا نسلقه هنا.

 

chestnut

 

نحط الحبات اللي نقشر في صفايه معدنيه تكفي داخل قدر عندكم.

 

أبو فروه مقشر

الخطوة الثانية : طبخ أبو فروه :

 

هذي الخطوة جدا مهمة ومهم إننا نسويها صح بعد. هذي الخطوة لها أثر جدا كبير على قوام وشكل المارون جلاسيه بعدين وهي اللي كانت تسبب تكسر الحبات عندي أول. زي ما ذكرت فوق الكستناء مليان نشا و النشا لازم ينطبخ قبل نقدر نسوي فيه أي شي ، إذا ما أنطبخ أبو فروه للدرجة المناسبه ماراح يكون لين زي ما نبي ولا راح يشرب الشيره بعدين زي مانبي. أغلب الوصفات الموجوده تهمل هذي الخطوه وتطلب مننا نسلق أبو فروه في مويه مغليه كم دقيقه بس. حسب ما فهمت الغليان هو سبب إن أبو فروه يتكسر معنا وطبخه لدرجة أقل من المطلوب بيخليه هش وسهل يتكسر بعدين وعشان كذا هذي الخطوة مهمه.

 

نحط الصفايه اللي فيها أبو فروة داخل قدر يكفيها ونزيد عليها مويه إلين نغطي الصفايه و أبو فروه ب ٢ إنش تقريبا. نحط القدر عالنار ونطبخه إلين يوصل غليه بعدين ننزل الحراره ونخليه يطبخ على غليه جدا جدا هاديه.

 

cooking chestnut

 

نطبخ أبو فروه إلين ما نقدر ندخل عود أسنان في قاعدة الحبة ونلاقيه يدخل بسهولة وبدون ما تنكسر الحبة. الطبخ بياخذ من ٤٥ دقيقه إلى ساعتين حسب كمية أبو فروه ونوعيته. يفضل تجربون الحبات اللي ما يكون شكلها حلو لأن وقت التجربه كثير من الحبات راح تنكسر.

 

بعد الطبخ نطفي النار ونشيل الصفايه من القدر ونخليها عالجنب إلين نسوي الخطوة اللي بعدها.

 

cooked chestnut

 

 

الخطوة الثالثة : عملية التسكير أو التلبيس :

 

الحين خلص الجزأ الصعب من الموضوع كله الباقي كله تافه.

 

في نفس القدر اللي أستخدمنا في الخطوه حقت الطبخ (بعد ما ننظفه طبعا) نحط ٧٥٠ جرام من السكر مع المويه و الفانيلا ونخليه يوصل غليه بعدين نخليه يغلي دقيقتين تقريبا. الحين ننزل الحراره لأقل شي ونحط الصفايه بأبو فروه المطبوخ اللي داخلها داخل الشيره ونخليهم يطبخون دقيقه بس بعدين نطفي النار ونحط القدر عالجنب ٢٤ ساعة.

 

شيرة الفانيلا للمارون جلاسيه

* اليوم الثاني :

 

بعد ٢٤ ساعة من الخطوة الأخيره نشيل الصفايه من القدر ونضيف ١٢٥ جرام سكر ونخلي الشيره تغلي من جديد. بعد ما توصل غليه نخليها تطبخ لمدة دقيقه وحده بس بعدين نطفي النار ونرجع الصفايه في الشيره من جديد ونخليها ٢٤ ساعة ثانيه.

 

* اليوم الثالث و الرابع و الخامس :

 

نكرر اللي سوينا في اليوم الثاني وبنفس كمية السكر كل ٢٤ ساعة نعيد نفس العملية.

 

* اليوم السادس :

 

اليوم السادس نعيد نفس العملية بعد بس هذي المره نحط ٢٥٠ جرام سكر بدال ١٢٥ زي الأيام اللي قبل ونتركه ٢٤ ساعة.

 

* اليوم السابع و الأخير :

 

بعد ٢٤ ساعة من الخطوه الأخيره نكون خلصنا عملية التسكير.

 

الخطوة الرابعة : التجفيف :

 

نشيل حبات المارون جلاسيه من الشيره شوي شوي (لاترمون الشيره !!) ونحطها على صينية فرن مغطيه بسيلبات أو ورق بارتشمنت أو أحسن بعد نحطها على شبك تبريد لو عندكم. نترك المارون جلاسيه يجف تقريبا ساعة.

 

drying marron glace

 

الخطوة الخامسة و الأخيرة : التغطية :

 

نشغل الفرن على ٤٢٥.

 

ناخذ نص كوب من الشيره ونضيف عليها السكر البودرة ونطبخها عالنار إلين يذوب السكر تماما بعدين بإستخدام فرشه ندهن حبات المارون جلاسيه بهذا الخليط ونحاول نغطيها فيه قدر الإمكان. نحط الصينيه أو شبك التبريد في الفرن ٣٠ ثانيه بس إلين تجف التغطيه اللي عليه لا أكثر.

 

الحين المارون جلاسيه جاهز حطوه على ورق حق كب كيك و أحفظوه في علبه تتقفل بإحكام ١٠ أياما تقريبا. الشيره الباقيه لاترمونها !! الشيره هذي جدا جدا لذيذه وبتعيش شهور في الثلاجه. أستخدموا الشيره زي ما تستخدمون أي شيره ثانيه أو عسل للحلويات ، صبوها على البانكيك أو الوافل أو الفرينش توست ، سووا فيها سوربيه أو حتى أستخدموها كتغير عن الشيره اللي دايما تستخدمون للحلويات الشرقيه زي الكنافه و البسبوسه نكهة الفانيلا و أبو فروه يمشي معاهم بشكل جدا رهيب.

 

marron glace

candied chestnut

أبو فروه مطبوخ في سكر

marron glace

مارون جلاسيه

Follow TopChefCooks on Twitter

48 comments

2 pings

Skip to comment form

    • غير معروف on 6 ديسمبر, 2016 at 2:29 ص
    • رد

    اول شي مره شكرا
    لي سنين اروح وارجع ع المدونة اعتبرها مرجع لاني ما أقرأ كثير ماعندي وقت كثير
    طيب سوال ايش افضل وقت للغلي اول مره عشان ماتتكسر معي؟

    • غير معروف on 18 فبراير, 2014 at 12:13 ص
    • رد

    ارجو الرد على هذا السؤال هوه المرون جلاسيه بيتباع بكام فى المحلات

    1. حسب المحل. للأنواع الممتازه ممكن تنباع الحبه ب ٢ يورو يعني حوالي ١٠ ريال

    • Eman on 19 ديسمبر, 2013 at 9:10 ص
    • رد

    يعطيك العافية انشالله رح جربها لانو هي من اطيب الحلويا و افخرها، بس سؤال انا بأميركا و عم لاقي بالمحلات ابو فروة كياس مغلفة مسلوقة ومقشرة خالصة بقدر استعملون؟؟ طعمتون ما بتبين انها مغلفة… وشكرا

    1. الله يعافيك ….

      حتى هنا متوفرة هذي اللي تقصدين ، المشكلة هي إن اللي تقصدين مجففة بشكل بسيط وأتوقع ماراح تعطي نفس النتيجة. طبعا ماجربت شخصيا وبإمكانك تجربين بس أتذكر كنت أشوف في النت كم شخص جرب وما مدح النتيجة.

        • tota on 25 ديسمبر, 2013 at 1:43 م
        • رد

        الله يخليك شيف لكن انا كنت أفكر كمان اني استعملهم هو انتاج صيني ومكتوب عليه مشوي ومقشر ونكهته لذيذة انا توقعت نفس ما قلت بس كنت مفكرة أسلقها سلقة سريييعة أو انقعها بماء فاتر شو رأيك شيف ينفع؟ وشكرا

          • Top Chef on 27 ديسمبر, 2013 at 5:00 ص
            Author

          مممم فكري فيها شوي. لو نقعتي تفاح مجفف في مويه هل يرجع تفاح طبيعي ؟ التجفيف يغير ….. والنقع ما يرجع المجفف لأصله. منيب أقولك ماراح ينفع لأني ما جربت شخصيا بس شفت كم شخص جرب في النت وما مدح النتيجة.

          إحنا قاعدين نحاول نسوي منتج ينباع بسعر غالي. هو ينباع بسعر غالي ليش ؟ لأن عمله يحتاج مهاره ووقت ونوعية المكونات والجهد اللي بتحطينها فيه هي اللي بتبين في الطعم النهائي. لو بدلنا الفانيلا بفانيلا سايلة هل ممكن يطلع زي اللي مستخدم فيه فانيلا طبيعية ؟ طبعا لأ .. ونفس الشي هنا.

    • Afnan on 14 نوفمبر, 2013 at 3:18 ص
    • رد

    آهلا شيف ..
    الصدق إنها وصفة طويلة بس تستحق التجربة ..
    عندي سؤالين : الآول في آيام التسكير لما آجي آضيف السكر ما آحط مويه زيادة على الشيرة الآولى؟
    الثاني: كيف نخلي الكستناء يحافظ على لون الآشقر وما يغمق مره ؟
    وشكرا جزيلا

    1. لا ماينحط مويه. الهدف هو زيادة تركيز السكر بشكل متدرج اصلا.

      مممم مافهمت الصدق. قصدك متى يغمق ؟

        • Afnan on 15 نوفمبر, 2013 at 6:38 ص
        • رد

        لآ ، قصدي آحيانا لما لما تشتري المارون جلاسيه فيه حبات تكون غامقة وحبات تكون فاتحة ٫ في التقديم الفاتحة شكلها آجمل وآشهى ..
        سؤالي : كيف نقدر نخليهم كلهم بنفس اللون الفاتح؟

        وشكرا على الرد <<

          • Top Chef on 18 نوفمبر, 2013 at 1:22 ص
            Author

          أها ….

          سبب تغير اللون هو تسكر السكر عالمارون جلاسيه. السكر يتسكر في الجو الجاف البارد وطبعا مع الوقت.

          السكر إذا تسكر يسوي بلورات سكر وهذي تعكس الضوء بدال ما تمرره وتخلي شكل المارون جلاسيه يبان باهت أو حتى أبيض في بعض الأحيان.

          نمنع هذا الشي غالبا بالحفظ الصحيح. تأكدي إنك تغطين الحبات بطبقة من الجليز (التغطيه الأخيره) بشكل جيد من جميع الجهات. أحفظيه على حراره الغرفه ولو بتحفظينه وقت طويل أفضل تلفين الحبات بورق حق حلويات (اللي يجي شفاف).

          التسكر ماله تأثير كبير عالطعم (له تأثير عالقوام وخصوصا لو كان باين كثير) بس أعتقد ممكن ترجعين مارون جلاسيه متسكر لحالته الطبيعيه بإنك تحطينه كم ثانيه في المايكروييف. ماجربتها شخصيا بس ما أشوف ليش ما ينفع إحنا نسوي كذا بالسكر البني ؟

    • غير معروف on 14 أكتوبر, 2013 at 12:11 م
    • رد

    كنت متشجعه اسويه بس طريقتك تحتاج وقت وايام

    1. طريقته وليست طريقتي هههه هذا المارون جلاسيه كذا موب شي أنا معقده أو مطوله بالقصد.

    • Rami on 26 أغسطس, 2013 at 9:04 م
    • رد

    يعطيك العافية شيف

    وصفة رائعة بصراحة على الاكيد رح اجربها بس يجي موسم الكستنا احنا نسميها كذا عنا في الاردن

    استفساري صغير وما بيخص الواصفة لانها ما شاء الله واضحة بس يخص المكسرات بشكل عام

    انا كنت احفظ المكسرات بعلب زجاج خارج الثلاجة بس لقيت بعد فترة انها بترطب وكنت ارميها
    الحين صرت احفضها بمرطبانات زجاج في الثلاجة بس لقيت انها تكون حشرات شو الحل برأيك لافضل تخزين للمكسرات
    وشكرا كثير

    1. الله يعافيك.

      مشكلة الحشرات مشكلة خارجيه هي مالها علاقة بطريقة الحفظ، غالبا العلب اللي تحفظ فيها المكسرات أو حتى المكسرات نفسها فيها بيض هذي الحشرات وهذا يفقس مع الوقت.

      بالنسبة لحفظ المكسرات إما إنك تحفظها على حرارة الغرفة في علبة مقفلة بإحكام لمدة قصيرة (شهرين إلى ٤ شهور حسب متى كانت محصودة). أو للحفظ الطويل هو الأحسن أحفظها في الفريزر.

      في كل الحالتين هي راح تترطب هذا طبيعي ، حطها في فرن ٣٥٠ كم دقيقة قبل الأكل وراح ترجع زي الجديدة.

    • مريم بنت عبد الرحمن on 17 يناير, 2013 at 2:34 ص
    • رد

    شيف في مرحلة التسكير لازم أغمر جميع الحبات بالشيرة؟

    1. أكيد … هي لازم تتشربها. أستخدمي أضيق قدر عندك هنا ، لو أستخدمتي قدر عريض يمكن ما يغطيها.

    • qbo0ola on 19 مايو, 2012 at 1:34 م
    • رد

    تسلم دياتك شيف ويعطيك الف عافيه ننتظر جديدك 🙂

    • sahar on 20 أبريل, 2012 at 2:15 ص
    • رد

    ماشاد الله ابداع،بس حبيت اسأل كل يوم اضيف السكر على نفس الشيره القديمه وبعد ماتغلي اقفل النار واخلي ابوفروه في الشيره،طيب هل اقفل النار لما يكون ابوفروه في الشيره؟واتركه بره والا في الثلاجة؟وشكرا

    1. كم يوم مكتوب بشكل جدا واضح أحس ؟

      ما تفرق تطفينه بعد ما تحطين أبو فروه أو لأ هي بس عشان نذوب السكر الجديد هذا المهم إحنا ما نبي نطبخه أكثر من كذا.

      برا الثلاجه

    • اسماء on 24 فبراير, 2012 at 4:45 ص
    • رد

    النتيجه اعجبتني كثير ومبين لذيذه ،، يعطيك العافيه
    عندي مارون جلاسيه في علبه جايني من تركيا صح لذيذ بس حالي مررره
    اقدر اسوي فيه حلى ﻣﻮﻧﺖ ﺑﻼ‌ﻥ ؟

    1. أكيد ليش لأ

    • غير معروف on 23 فبراير, 2012 at 9:36 م
    • رد

    والله كان روعة عذبني شوي التسكير بس وقت رجعته عالنار ذاب السكر ومشي الحال

    1. التسكير سببه غالبا التحريك ، إذا حطيتي سكر في أي شيره عمرك لاتحريكنها.

    • غير معروف on 23 فبراير, 2012 at 9:32 م
    • رد

    اسفة مانزلت الصورة كيف بقدر نزلها بالمدونة

    1. للأسف ما تنزل في الردود بس الروابط كذا

    • غير معروف on 23 فبراير, 2012 at 9:13 م
    • رد

    [url=http://www.gulfup.com/show/X3e7i754cabs9][img]http://im19.gulfup.com/2012-02-23/1330020663512.jpg[/img][/url]

    تفضل توب شيف المارون جلاسيه

    1. بالعافية على قلبك إن شاء الله ضبط ؟

    • غير معروف on 19 فبراير, 2012 at 8:01 م
    • رد

    توب رح عذبك معي اليوم الرابع للمارون صار في طبقة سكر عليه
    رجعوا عالنار او ضيف شوية ماء

    1. السكر تسكر معك شوي، إذا جيتي تضيفين باقي السكر بيرجع زي ماكان مفروض ، لا تحركين الخليط بعد ما تضيفين السكر !

    • غير معروف on 18 فبراير, 2012 at 2:19 م
    • رد

    مرحباتوب شيف
    اليوم الثالث للمارون جلاسيه عندي بس اللون أغمق من حباتك اللون بني وحباتك لونها أشقر شو رأيك السبب هل هو نوع أبو فروة

    1. دايما في الطبخ في شيره اللون يتغير مع الوقت ، على آخر يوم بتلاقينها تقلب شوي شفافه حتى

    • سوشي on 8 فبراير, 2012 at 2:32 م
    • رد

    الله يسلمك اخوي سويته قبل سنتين لكن للاسف طلع ستين مليون قطعة صغيرة ولاحظت انه تغير لونه للسواد فرميته بعد اليوم الرابع . افكر اسويه بطريقتك باذن الله

    1. بالضبط نفس اللي صار معي أول

    • La Rosa on 6 فبراير, 2012 at 5:23 ص
    • رد

    لزيز بس متعب شوي

    أنا قد جربت التلبيس بس بالجوز و بعدها طحنته و زينت فيه يعطي طعم غير طبيعي و يغير طعم الجوز بشكل رهيب

    أبو فروة للأمانة ما أحبه و لا قد جربت أتعامل معاه بس حلو كتزيين جداً شييك ..

    يعطيك العافية ..

    • غير معروف on 2 فبراير, 2012 at 12:44 ص
    • رد

    سويت بحث في صورقوقل عن حلى مونت بلان طلعت لي صور تجنن يا ليت لو ما عليك كلافه تعلمني طريقته

    1. الطريقة سهلة هو ببساطة كريمة مخفوقه مع كريمة ماروون جلاسيه أي شي ثاني تشوفينه هو إضافه من الشخص نفسه. الطريقة اللي أسويه هو إني أسوي ميني تارت وأطبخ القشره لحالها بعدين أحشي القشره بعد ما تبرد كريمة مخفوقه عاديه و أحط فوق الكريمة المخفوقه حبه أو حبتين مارون جلاسيه. الحين للطبقه اللي فوق اللي هي كريمة المارون ، نجيب كم حبة مارون جلاسيه ونطحنها بخلاط مع شوي كريمة إلين تعطينا شي زي المعجون تقريبا بكثافه النوتيلا تقريبا. نحط الخليط هذا في كيس حلويات براس صغييييييييييير مره أصغر شي نلاقي ونبدأ نصب زي الخيوط فوق التارت حقتنا ، آخر شي نزين التارت بقطع مارون جلاسيه مكسره.

        • غير معروف on 2 فبراير, 2012 at 2:47 م
        • رد

        الله يسعدك ويجزاك خير على طولة بالك

    • غير معروف on 2 فبراير, 2012 at 12:04 ص
    • رد

    ياااالله ماتوقعت القى طريقته فى النت مشكوووور شيف

    • غير معروف on 1 فبراير, 2012 at 8:28 م
    • رد

    اتذكر ذقتها مره بتركياا ،، فعلا لذيذه بس غاااليه اكثر من اللازم

    تسلم ايدك .. لها التجربه ان شالله

  1. هذا المارون قلاسية حق سعاد عبدالله في درس خصوصي !!

    الله لا يحرمنا منك يا توب شيف !

    • غير معروف on 31 يناير, 2012 at 9:30 ص
    • رد

    السلام عليكم
    الله يعطيك العافيه
    اللي فهمته اني اطبخ الشيره يوميا واخليها تغلي غلوه بعدين احط ابوفروه (بدون ما يغلي ) واغطيهم واخليهم يبردون بالراحه 24ساعه برا الثلاجه
    وبالنسبه للخطوه الاخيره التغطيه ليه ما اغمس الحبات في الخليط ؟
    في عملية الطبخ الاولى نبدا بمويه بارده وبعدين نتركه يغلي ونهدي النار هل نغطي القدر؟

    1. وعليكم السلام …

      إيه ، تشيلين أبو فروه بعدين تحطين السكر الجديد وتخلينها توصل غليه وتغلي دقيقه تقريبا بعدين تطفين النار وتحطين أبو فروه من جديد وتخلينه يتشرب الشيره ٢٤ ساعة.

      يمديك تغمسين الحبات في الخليط بس هدفنا نحافظ على أكبر عدد بدون ما يتكسرون ، لو سويتيه بتشوفين كيف هو هش.

      لا تغطين القدر هنا لأنه مهم إننا نقدر نتحكم بالحراره إنها تكون على غليه جدا جدا ضعيفه لو غطيتي القدر غالبا ترتفع الحراره أعلى من اللي نبي.

    • غير معروف on 30 يناير, 2012 at 2:50 م
    • رد

    شغل متعوب عليه ، بوركت أياديك
    أتمنى ان يسعني الوقت لتجربتها قبل انتهاء موسم بو فروة ..

    • غير معروف on 30 يناير, 2012 at 12:57 ص
    • رد

    يسلمو خيو .

    حاولت مرة اجربه ولو اني ما املك الفكرة الكاملة عنه بخصوص الشيرة وسماكتها والايام . لكن مجرد اني حاولت اقشرها ولا قدرت اكتفيت منها ووقفت محاولة , خصوصا اني لقيتها في السوق معباة وجاهزة الكيسة ب 5 ريال عند الي يبيع الذرة في الاكشاك في السوق.

    • غير معروف on 29 يناير, 2012 at 10:58 م
    • رد

    ان شاء الله بيعيشوا هالايدين
    شغلوا صعب شوي بس يستاهل من زمان نفسي اتعلم طريقته ألف شكر لك

    • كوكو on 29 يناير, 2012 at 10:42 م
    • رد

    شكلو بجد لزيز
    ان شاء الله اجرب الطريقه

  1. […] بشكل مطول وسويت شكل من أشكال تسكير المكسرات في موضوع المارون جلاسيه. الفكرة بإختصار شديد هي إننا نطبخ شي في شيره سكر بحيث […]

  2. […] بشكل مطول وسويت شكل من أشكال تسكير المكسرات في موضوع المارون جلاسيه. الفكرة بإختصار شديد هي إننا نطبخ شي في شيره سكر بحيث […]

اترك تعليقاً

لن ينشر بريدك الإلكتروني.

%d مدونون معجبون بهذه: