ماكاروني آند تشيز .. Macaroni and Cheese

هلا والله …

.

اليوم قمنا الصباح على أجواء رائعة ماشاء الله ( ٣٨  تحت الصفر !! ) وعلى حظي كان عندي مشاوير ضروريه يعني البرد فيني فيني . بعد معاناة رجعت البيت وأبي أي شي يدفيني و فكرت علطول في الماك آند تشيز . مقاديرها متوفرة و مايحتاج أطلع أجيب أغراض و الأهم من كل هذا شي يدفي هههه.

.

الماك آند تشيز هي تقريبا اللي الناس يسمونها مكرونه بالباشاميل . الفرق إن الباشاميل لحاله مع باستا ما أشوفه شخصيا شي لذيذ بس إذا أنخلط معه جبن بكميات كبيره يصير شي ثاني.

.

الماك آند تشيز طبق أمريكي شعبي ماله أي علاقة بإيطاليا . هو عبارة عن صينية مكرونه أكثر من كونه طبق باستا . الأكله تتكون من مكرونه مسلوقه مخلوطه مع صوص يسمونه مورنيه ( صوص الجبن ) اللي هو واحد من تفرعات الباشاميل . هذي المكرونه لها مليون تفرع وتفرع وكل يوم يطلع أكثر و أكثر .. اللي دخل عليها مكونات غاليه مثل الفقع و اللوبستر و اللي سواها بلمسات صينية وهنديه و يابانيه و اللي يسويها بالبيكن و اللي يسويها بأنواع أجبان نادرة وغريبه … و كل شخص تقريبا عنده نسخه غير للأكله هذي..

.

اليوم ماراح أتكلم عن أي تفرعات اليوم مسوي الوصفه الكلاسيكيه بنفس المقادير الموجوده في العادة في كل ماك آند تشيز . بس هذا ما يمنع إن فيه تفاصيل مهمه تخلي حتى أبسط الأشياء مميزه إذا تطبقت صح.

.

المقادير :

.

ربع كيلو تقريبا مكرونه “ماكاروني” أو اللي يسمونها أكواع elbow macaroni .

٣ ملاعق كبيرة زبدة

تقريبا ٣ ملاعق كبيرة طحين

ملعقة كبيرة خردل بودرة .. ( لا تبدلون بخردل عادي ) .

٣ أكواب حليب كامل الدسم .

١/٢ كوب بصل مقطع صغار .

ورقة غار

رشة جوزة طيب ( إختياري )

فص ثوم كامل

١/٢ ملعقة صغيرة بابريكا

بيضه

٣٥٠ جرام تقريبا جبن تشيدر حاد sharp أو mature مبشور.

ملح وفلفل أسود .

.

التغطيه :

٣ ملاعق كبيره زبده

كوب بقسماط ويفضل لو كان بقسماط ياباني panko .

.

* شكل المكرونه مهم هنا. اللي ما يعرف شكل المكرونه اللي أقصد يكون شكلها زي الصورة اللي تحت. في حال ما توفرت أستخدموا أي شكل أسطواني ثاني زي البينني مثلا penne.

.

ماك آند تشيز

.

* بودرة الخردل هي عبارة عن بذور خردل مطحونه لا أكثر. متوفرة في أغلب السوبرماركتات ولو ما لقيتوها أكيد بتلاقون بذور خردل mustard seeds أطحنوها بطاحونة بهارات وخلاص.

.

* نوعية الجبن جدا مهمة هنا. تقدرون تستخدمون كذا نوع جبن : تشيدر ، جرويير ، إمنتال ، جودا ، ماسكاربوني ، فيلادلفيا ، بارمزان ، رومانو ، جرانا بادانو، بلو تشيز ، جوت تشيز أو جبنة ماعز أو أي خليط منهم. أهم شي إنكم تستخدمون جبن من نوعية جيدة وإن الصوص في النهاية يكون له نكهة جبن. أشياء زي الموزاريلا مالها نكهة قويه ولاراح تضيف أي شي للصوص. أنا حددت تشيدر حاد أو معتق mature هنا وبيضبط دايما بس لو تبون تستخدمون نوع جبن ثاني الخيار لكم. إقتراحات ثانيه رهيبة : ٣/٤ الكمية جروير و الربع الباقي بارمزان ، نص ماسكاربوني أو فيلادلفيا وربع إمنتال وربع بارمزان ، نص جودا ونص تشيدر و الخيارات الثانيه كثيرة.

.

الطريقة :

.

سخنوا الفرن على ٣٥٠ .

.

أسلقوا الباستا في قدر كبير فيه مويه مملحة كثيره على حرارة عالية . بدون أي زيت ! (شوفوا هذا الموضوع إذا تبون تعرفون أكثر عن الباستا) .إذا وصلت الباستا مرحلة “ألدنتي” يعني تكون مستويه يعني مافيها طعم نشا بس لسا شوي قاسيه نشفوها و أغسلوها بمويه بارده عشان نوقف الطبخ وما تصير مطبوخه أكثر من اللازم.

.

و الباستا قاعده تطبخ نسوي الصوص. في قدر نذوب الزبده على حرارة وسط ، بعد ما تذوب نحط الطحين و الخردل ونحرك إلين يكون لنا معجون ناعم بعدين ننزل الحرارة شوي. نطبخ المعجون هذا حوالي ٥ دقايق إلين يقلب لونه أشقر شوي. الحين نرفع الحراره شوي بعدين نبدأ نضيف الحليب . نحط دفعه حليب ونحرك إلين تبدأ تغلي بعدين نحط الدفعه اللي بعدها وكذا إلين يخلص كل الحليب . نضيف البصل و الثوم وورق الغار و البابريكا و جوزة الطيب ونطبخهم على غلية جدا خفيفه ١٠ دقايق تقريبا . بعد العشر دقايق نشيل فص الثوم وورقة الغار ونطفي النار.

.

الحين نخلط حوالي ملعقتين كبار من الباشاميل على صحن صغير فيه البيضه ونحركهم مع بعض زين. بعدين نصب اللي في الصحن الصغير عالصوص ونحرك. هذي العملية مهمه كوننا لو حطينا البيضه عالصوص علطول بتتكتل بس كذا لأ . نضيف الحين ٣/٤ الجبن على الصوص على دفعات ونحرك إلين يذوب بعد ما يذوب الجبن نذوق الصوص ونزيد الملح و الفلفل حسب الرغبة . حاولوا يكون الصوص يميل للملوحة لأنه بينخلط مع الباستا.

.

bechamel sauce.

نخلط الباستا مع الصوص بعدين نصبهم في صحن فرن . أو عدة صحون صغيرة لو تبون .بعدين نغطيها بباقي الجبن .

.

الحين نذوب الزبدة حقت التغطيه بعدين نخلطها مع البقسماط . نحط طبقة من التغطيه فوق الجبن وندخلها الفرن .

.

mac and cheese

.

نخليها في الفرن إلين يذوب الجبن و تبدأ التغطيه تقلب ذهبي . حوالي نص ساعة .  نطلعها ونخليها تبرد ٥ دقايق بعدين ناكلها علطول وهي حاره .

.

mac and cheese

ماك آند تشيز مع ريش الغنم

توب شيف ماك آند تشيز

توب شيف ماك آند تشيز



Follow TopChefCooks on Twitter

65 comments

4 pings

Skip to comment form

    • غير معروف on 10 فبراير, 2013 at 7:36 ص
    • رد

    شيف يعطيك العافية ع المدونة الأكثر من روعة جد أفادتني بس عندي كم سؤال بسيط:
    اول شي:أنا بكنسل البصل لأن مرة ما اتحمله
    ثاني شي:إذا دخلتها الفرن أشغله من فوق ولا تحت؟
    ثالث شي:هذي الكمية تقريبا كم بيطلعلي لو بستخدم اكواب نفس حجم الي بالصورة تقريبا او اصغر شوي؟

    1. ايه عادي اتركي البصل لو تبين.

      الكمية بتكفي تقريبا ٧ او ٨ اكواب زي هذي

    • سماء on 20 يناير, 2013 at 4:51 م
    • رد

    شغل خباااااااال
    شغل خيااااااااااااال
    عمل متتتتقن ماااااشاااااااءالله
    والله والله ونا أكتب ميتة يوع وجتني الرجفة مالت اليوع ومومحصلة يدامي إلا مكسرات وقاعدة آكلها بقهر ونا أتصفح موقعك الراقي
    وأشبع عيوني بصور الأكلات الطيبة اللذيذة
    بالعااافيه عليك
    بسير أطبخلي شي سريع

    • غير معروف on 7 ديسمبر, 2012 at 11:42 ص
    • رد

    يعطيك العافية شيف جالسة أتخيل طعمها مع اضافة خلطة البيستو ايش رايك تنفع

    1. إممممم ما أدري بدون ما أجرب بس ما أعتقد .. نكهات كثير …

    • simply algerian on 28 أكتوبر, 2012 at 12:53 م
    • رد

    ما شاء الله. مدونة قمة فى الروعة. ياريت شيف تتكرم و تعطينا معلومات عن الطريقة الصحيحة لطبخ روستو الغنم. بارك الله فيك و عيد مبارك عليك و على الاسرة الكريمة

    1. الله يخلييك وآسف جدا عالتأخير ….

      بإذن الله راح أغطي الموضوع بشكل مفصل جدا في موضوع خاص. صعب جدا هنا أتكلم عنه

    • Speranza on 17 أكتوبر, 2012 at 12:40 م
    • رد

    لك فلسفه جميلة بالطبخ ياشيف يعطيك الف الف عافيه

    1. الله يعافيك ….

    • لمى on 26 سبتمبر, 2012 at 8:41 ص
    • رد

    السلام عليكم
    توب شيف لو ملحت ماء السلق المكرونه كثيرررر م بيأثر بطعم المكرونه و تطلع لي مالححه !
    و تسلم يدك صراحه اقل م اقول انك مبدع لا اله الا الله

    1. وعليكم السلام و الرحمة ….

      الوقت الوحيد اللي الباستا بتتملح فيه هو وقت السلق والباستا ما تشرب كل الملح الموجود فلأ صعب جدا تحسين بطعم الملح في الباستا .. طبعا موب معنى هذا إنك تكبين علبه ملح في لتر مويه !! بس كمية كافيه إلين تصير المويه مالحه تقريبا زي مويه البحر.

  1. وآآآآآآآآآآآآآآآآو (TωT)
    آعععععشق آلآكلآت آللي كذآ
    بصيييييييييييييح .. حسستني بآلجوع
    آن شآلله رآح آططبقهـآ قريب
    تسسلم آيدنك

  2. ايش هذا الفن كله
    انا صراحه دخلت هنا عن طريق قوقل وماقدرت اخرج
    جوعتني ياشيف ):
    مبدع مو بس في الطبخ كمان في التصوير والتقديم
    ماشاء الله تبارك الله لاقوة الا بلله

    • ام حمزه on 16 نوفمبر, 2011 at 7:03 م
    • رد

    سلام

    توب شيف بسئلك عن الجبن
    انا مرة اشتريت جبنة تشدر ينقال عنها معتقه اسمها كان جولدن كيري
    فتحتها بالبيت وانقرفت من ريحتها
    مدري طبيعي يكون له ريحه التشيدرررررر ؟؟ والله رميتها لانو خفت تخرب لي الطبخه وريحتها ماتنطاق

    1. وعليكم السلام و الرحمة …

      من هنا ما أقدر أعرف إذا كانت خربانه اللي عندك أو هي طبيعيه بس أنتي ما أستسغتيها. شخصيا أحب الجبن بكل أنواعه بس فيه ناس ينقرفون من بعض الأنواع غالبا لإنهم تعودوا على الأنواع الهاديه زي الموزاريلا وتشدر المعلب فيستغربون الأنواع القويه.

  3. الوصفة شكلها آآليمه ومرة سهله >> وحده فسله :p |
    ناويه اعملها اليوم ع الغداا ،، كل شئ متوفر ماعدا الخردل بودرة

    ضروري احط ض1 >> انا وحده ما أحب طعم الخردل

    1. كل مره أرجع و أقول نفس السؤال. وش قصدك بضروري ؟ هل الوصفه ماراح تنجح بدونه ؟ هو مجرد نكهة إذا هذا الجواب اللي تدورين بس هل هو شي ماراح تحسين فيه لو تركتيه ؟ لو كان كذا أجل ليش نحطه ؟

    • توت أزرق on 29 سبتمبر, 2011 at 11:33 م
    • رد

    ماشاءالله تبارك الله .. آهنيك على الإبداع ..

    احب استفسر عن عن مكرونة الأجبان الأربعه طريقتها وايش الآجبان المستخدمه فيها..

    شاكره لك

    1. هلا والله …

      الأجبان الإربعة ممكن تكون أي أجبان تحبين غالبا يستخدمون ٤ أنواع مختلفه عن بعض بحيث كل واحد يعطي صفة حلوه للصوص بس المسألة راجعتلك. الأصل هو إستخدام أجبان إيطاليه بس يمديك تستخدمين أنواع فرنسيه أو إنجليزيه ( التشدر مثلا )

      غالبا الأجبان المستخدمه تكون فونتينا ( يشبه الموزاريلا بس بنكهة عكسه ) ، جورجونزولا ( نوع جبن أزرق ) ، بارميزان وريكوتا.

      http://topchefcooks.com/2011/03/15/cream-sauces/

      شوفي الرابط اللي فوق بتلاقين وصفة لباستا بكريمة البيستو سويي نفس الشي بالضبط إلين المرحلة اللي تحطين البيستو حطي بداله جبن على دفعات شوي شوي مع التحريك. كمية الجبن وكمية كل نوع للثاني راجعتلك.

  4. واااااااااااااو

    ياعيني على الابداع
    اذا البرد يسوي كذا طبخات ان شاء الله دوم ههههههههههههههههههه

    • جيلآتينو on 15 مايو, 2011 at 11:14 ص
    • رد

    بآلعآفية هذآ و أنت كنت بردآن أجل لو كنت رآيق أخر روقآن وش بتسوي . .

    مشآء الله تبآرك آلرحمآن

    طبق بسسيط بس ألطعم أكيد روعة . .

    لأ تجرمنآ من هيك عذآب ” أنا عندي آلأكل صآير عذآب بحكم أنو أسوي رجيم . .

    دعوآتك أنقص 9 كيلو و أرتآآح

    • شقآوة فضل on 13 مايو, 2011 at 10:27 ص
    • رد

    الله حبيتها شكلها مشهي جدا
    تسلم يدك والله يقويك يارب

    • Fdwa on 12 مايو, 2011 at 1:52 ص
    • رد

    يعطيك العافية اخوي….
    بودرة الخردل المقصوده هي اللي تجي بعلبة معدن صفراء صغيره؟؟
    وعندي سؤال عن الديجون مسترد <<<<برا الموضوع 🙂
    كم مدة صلاحيته ؟لأن جلس عندي بالثلاجه بعد الفتح لمدة اسبوع حسيت ريحته تغيرت؟؟!!
    استخدمه عادي؟

    و شاكرة لك

    1. الله يعافيك ..

      بودرة الخردل مكتوب عليها بودرة خردل مدري عن شكل العلبة والله …

      الديجون مسترد يعيش طول العمر تقريبا .. الخطر الوحيد هو إنه ينشف بس ..

    • SARA on 28 أبريل, 2011 at 6:24 ص
    • رد

    اقصد في تشيدر يذوب بس فاتح جدا وماله طعم قوي زي كرافت و في تشدر ما يذوب في الفرن يصير محروق وناشف رغم ان فيه نكهة التشدر 🙁

    1. هلا والله …

      المقصود هو التشدر الأصلي موب التشدر المعالج و الملعوب فيه ( الكرافت ) . التشدر تلاقينه غالبا في الثلاجات جنب باقي الأجبان ينباع بالكيلو .

    • SARA on 27 أبريل, 2011 at 5:25 م
    • رد

    ايش هو الخردل البودة ؟ كيف شكله ؟
    وكمان التشدر ؟ كيف نعرف النوع الجيد منها ؟ وهل في ماركة محددة تنصح فيها؟

    1. الخردل البودرة بذور خردل مطحونه ؟

      التشدر نوع جبن .. تعرفين الجيد من السيء بإنك تذوقين وتختارين النوع اللي طعمه يعجبك .

    • لمياء on 20 فبراير, 2011 at 6:26 ص
    • رد

    اهلين ..
    جدااا لذيذه انا داييم اسوي الشاميل خفييييف واحط كل الاجبان اللي عندي اللي متوهقه فيها
    الفكره هنا مو اني سويتها وعجبتني

    انزنقت بضيوف ماستعديت لهم وسويت المكرونه واعتمدت طريقتك بالتقديم
    بس ماسويت اضلاع قدمت معاها اجنحة دجاج وسلطة زعتر
    طلعت حاجة القنت وكأني تعبانه فيها مع انها ماتعبتني

    لذا عزيزي
    ياليت تتفضل علينا وتقولنا على اشياء الديكوريشن هذاك الخط البني حسيته خدم الصحن وعطاه نظرة غير
    لاني انسانه اكل بعيوني قبل بطني 🙂

    1. أنا نزلت الموضوع عن المكرونه … وش تقدمين جنبها الخيارات كثييييييييييييره هنا ممكن تكون أكثر من شي ..

      الأكله في الأساس كانت ريش مع صوص دبس رمان و المكرونه عالجنب ..يعني هم طبقين مالهم علاقة ببعض ..

      بالنسبة للديكور ، الديكور مفروض يكون من أساس الشي اللي تقدمين معه ما يكون شي ماله أي علاقه بالصحن وبس شكل. يعني ما أزين هذا الطبق بخيار مثلا ؟ الخط هذا هو الصوص اللي سويته مع اللحم وما أشوف إنه منطقي تسوين الصوص بس عشان الشكل إذا ماكان بيمشي مع الشي اللي بتقدمينه معه ؟ مثلا سويتي الأجنحة أكيد معها صوص لو تبين تقدرين تسوين خط بهذا الصوص .. أعتقد بيكون أحلى كذا من إنك تسوين خط من شي ماله أي علاقة بالصحن .

    • غير معروف on 14 فبراير, 2011 at 10:07 ص
    • رد

    جربت الوصفة طلع طعم الخردل جدا مر

    1. الخردل لحاله مر قصدك ولا كل المكرونه طلعت مره ؟ ما أدري صراحة بس موب شي طبيعي إنها تطلع مره كذا .

    • غير معروف on 11 فبراير, 2011 at 12:06 م
    • رد

    شكلها سهل .
    اقررب روحه للسوبر ماركت بشتري اغراضهااا

    الله لايضررررك 🙂

    • غير معروف on 3 فبراير, 2011 at 10:20 م
    • رد

    الوصفه هذي اجراااااام

    1. مشكورة وحياك الله دايما .

  5. مرحبا
    مررررررررررررررررررررررره رهيبه سويته قبل كم يوم >الاربعاء
    طعمها رهيب وخفيفه مع الباشميل
    قلت اصورها لك بس ماصرفتني امي جوعانه وقالت مارااح انتظرك
    قلت بالعافيه

    الف شكر لك شيفنا على هالابداع..:)

    1. بالعافيه على قلوبكم …

      اللي يهمني إنها أعجبتكم بس … ما يحتاج تتعبين نفسك بصور أو غيره .. أهم شي الطعم .

    • غير معروف on 27 يناير, 2011 at 1:32 م
    • رد

    كسرت الباقيات عشان تصير طقم زبادي بدل ماهي نص زبادي ونص اكواب وانا ضايعه في النص ما عرفت استخدمها .اقول ترى الي حدني كلها طقم من 6 اكواب “وقسم يوم كسرتها ارتحت نفسيا قلت هالحين بسوي مولتن ووسوفلية”. لاني مأجلتهم بس عشان الزبادي .هالحين ماعاد صار عندي عذر هههههههههه

    1. هههههههههه مبروك أجل ….

    • غير معروف on 27 يناير, 2011 at 10:54 ص
    • رد

    ماشاء الله – فن

    1. مشكورة على مرورك .. وحياك الله دايما .

  6. تسلم ايدك على هالطبق انا والباستا صحبة وفعلا سمعت الكثير عن الطبق هذا
    ومنهم من يعتبره وجبة سناك من سهولته ولذته عندهم
    انا جربته بس صراحه بالاجبان والزبده بدون الباشميل والخردل
    لي تجربة واعطيك النتيجة .. 🙂 الف شكر

    1. هلا والله …

      الله يسلمك … والله سناك شوي صعبه الطبق ثقييييييل . بس هو صح سريع ومريح …

      الباشاميل هنا مو مكون أساسي الباشاميل هو وسط بس لتذويب الجبن لو حطيتي الجبن علطول عالباستا ماراح يذوب بنعومه ويمكن يتكتل فنحط شي زي الصمغ اللي هو الباشاميل هنا يربط الباستا في بعض .

    • غير معروف on 24 يناير, 2011 at 10:53 م
    • رد

    مدري ليش ضحكت يوم قلت يدفي قلت اجل ما جرب ياكل عفيس ههههههه

    يلبد في البطن ويدفي صح الصح

    اجل هو باشميل تصدق اشوف الافلام يصلحونها كثير كنت احسب انها بس جبن !!!

    الصينية اسويها دايم بجبن سايل وموزيريلا لكن لك عد مني المرة الجاية اسويها بطريقتك

    يسلموووووووووووووووووووووووووووووو

    1. هههههه لا والله بلاك ما تدرين … العفيس كنه قهوة عند الوالدة ناكله طول السنة حتى في عز الصيف هههه

      حياك ومشكورة على مرورك ..

        • غير معروف on 27 يناير, 2011 at 5:17 ص
        • رد

        هذا انا رجعت لك ومعي احلى صحن

        http://sub3.rofof.com/img4/01swdjy27.jpg

        ابي تشوف الريش هذه اي نستوى تقريبا انا حسيت انها ميديم وش رايك صح انا خمنت انها وصلت المرحلة بالضغط عليها

        http://sub3.rofof.com/img4/01ijgva27.jpg

        لو تدري من وين جبت صحون المكرونة ؟؟؟؟

        ذكرت مرة ان الصحون مو مهمة وليش الوحده تعذب نفسها عشان تدور عليها اي كوب يصلح !!!

        هنا تذكرت عندي اكواب نصها مكسرة عراويها وراكنتها على جنب . قامت اختك في الله جابتها وكسرت العرواي الباقيه ورتبها وكانها زبادي مو باين انها اصلا مكسورة وش رايك بس ^_^

          • Top Chef on 27 يناير, 2011 at 11:57 ص
            Author

          هلا والله …

          أما حركة الصحون صح عليييييك .. برافو …..

          الريش والله شوي مطبوخه أكثر يعني هي على ميديم ويل أكثر .. بس حلو عرفتي الشعور ..

          بس السؤال هههههه الحين عندك صحون مكسره طيب أستخدميها حلو عادي . بس وش الحكمه من تكسير باقي العراوي ههههههه

    • nora on 24 يناير, 2011 at 7:37 م
    • رد

    واااااو
    الصور روووعه وطريقة التقديم مررره اعجبتني
    ماشاء الله ..

    1. مشكورة وحياك الله معنا .

    • 3beer on 24 يناير, 2011 at 6:50 م
    • رد

    ماشاء الله..
    الصوورة تصرررعع :d
    اشتهيت الاضلاع اكثر وكنت بسالك عن طريقتها بس فية من سبقني
    الله يعطيك العافية

    1. مشكورة على مرورك … و الأضلاع مافيها أي شي صعب أضلاع تتبل شوي وتنشوي على حرارة عاليه بس .

    • غير معروف on 24 يناير, 2011 at 4:57 م
    • رد

    مدري ماحبيتها يمكن لاني ماقد ذقتها مو عارفه شو طعمها ؟؟

    بس من ناحيه الباشميل مع الباستا شي خورافي وانا من النوع اللي يحط عليها اجبان ولو يحصلي جميع الاجبان احط ماعندي مانع …

    1. هلا والله …. وشلون ما فهمت ؟ تقولين ما حبيتيها بعدين تقولين أنا أحب الباستا مع الباشاميل و الأجبان ؟ طيب هي باستا مع باشاميل و أجبان بس في الفرن هذا الفرق ههههه .

    • aaa on 24 يناير, 2011 at 1:24 م
    • رد

    في اكثر من مكان منها Tavern on the Square
    في الوست ماونت سكوير
    وبعد jack astor’s بس اعتقد صارلهم فتره ماعاد يسونها
    وكمان ابل بيز بس اللي في نياجرا كان جدا رائع الطبق
    هذا الطبق جدا مفضل عند بنتي ان شا الله اجرب طريقتك

    1. أهااا … يعطيك العافيه … اللي في الويست مونت قد جربته بس ما ذقت الماك آند تشيز هناك .

  7. أقل مايقال عنه إغراء

    ماشاء الله واضح انهها لذيذه جداً

    وأنا في الحقيقه أوافقك الرأي بالنسبه للبشاميل العاديه أحس أبد مافيها طعم !

    يعطيك العافيه لاهنت ، والله الله بالتدفي أجل -٣٨ 😐

    1. هلا والله …

      مشكورة وحياك الله دايما ..

      الباشاميل موب مافيه طعم بس مع الباستا لحاله ما أشوف وش الفكرة ؟ يعني مثلا مع الدجاج أو السمك يكون كريمي ورهيب بس مع الباستا ؟

    • aaa on 24 يناير, 2011 at 5:01 ص
    • رد

    ذكرتني مونتريال واجمل واحلى ماك اند تشيز ذقته فيها ….كنت اتضارب انا وبنتي على الوجبه
    اه بس لو ترجع الخمس سنوات ذيك ….
    عاشت اياديك

    1. هلا والله ….

      أي محل بالضبط ؟ عاد تصدقين هنا بالذات ماقد والله ذقتها برا البيت ؟

  8. yumm yummmi

    1. مشكورة .. وحياك ..

    • غير معروف on 24 يناير, 2011 at 4:27 ص
    • رد

    ( ٣٨ تحت الصفر !! ) … ياساتر !! اجل احنا ارحم الحمد لله 😀
    صراحه الفكره حلوه ويبيلها تطبيق ….
    شكلها لذيذ وفكره استخدام قوالب السوفليه عجبتني اكثر …
    بس لو سمحت ايش هو الخردل البودره ….هي نفس الحبوب واطحنها ولا جاهزه ؟؟؟

    1. إي والله ياساتر ….

      الخردل البودرة هو بذور الخردل المطحونة بالضبط .

    • suha on 24 يناير, 2011 at 3:51 ص
    • رد

    اللي جنبها ريش ؟

    ممكن طريقتها

    شكرا

    1. هلا والله ..

      الريش تبلتها بزيت زيتون ودبس رمان وروزماري وثوم ساعة تقريبا .. بعدين نشفتها ورشيت عليها ملح وفلفل وشويتها على نار حااااارة لحظات بس على كل وجه عشان أبغاها ميديم من جوا .. لو تبغين خليها أكثر .

  1. […] الأمريكيه بالذات حولين العالم. الأكله عبارة عن ماك آند تشيز مقلي. يمكن فكرة باستا مقلية تكون غريبة وتبان مقرفة بس […]

  2. […] نقدر نعتبره مورنيه، هذا الصوص لو خلطنا معه باستا صار ماك آند تشيز ، أو مكرونه بالباشاميل . لو صبينه فوق ذيل لوبستر […]

  3. […] الأمريكيه بالذات حولين العالم. الأكله عبارة عن ماك آند تشيز مقلي. يمكن فكرة باستا مقلية تكون غريبة وتبان مقرفة بس […]

  4. […] نقدر نعتبره مورنيه، هذا الصوص لو خلطنا معه باستا صار ماك آند تشيز ، أو مكرونه بالباشاميل . لو صبينه فوق ذيل لوبستر […]

اترك تعليقاً

لن ينشر بريدك الإلكتروني.

%d مدونون معجبون بهذه: