مكعبات الليمون بعشبة الليمون و جوز الهند .. Lemon Bars with Lemongrass and Coconut shortcurst

هلا والله …..

 

مكعبات الليمون أو مربعات الليمون  lemon squares واحد من ألذ و أسهل و أشهر الحلويات. الحلى هذا يشبه الكوكيز أو البسكوت تقريبا في طريقة التقديم يعني هو بالعادة شي ينوكل باليد في الحفلات أو العزايم وغالبا يكون مقطع مربعات ومن هنا جت التسمية. الحلى عبارة عن قشرة crust مصنوع من عجينة قصيرة shortcrust ( العجينة القصيرة عجينة تتفتت في الفم وتكون مليانة دهن ) وفوق هذي القشرة حشوة عبارة عن كسترد ليمون وغالبا مرشوشة بسكر بودرة في الأخير. القشرة تتفتت في الفم وفي نفس الوقت تعطي قرمشة خفيفة و الكسترد يتحول لطبقة زي الكيك من فوق ولينه من داخل تعطي طعم رهيب مع القشرة. الحلى جدا خفيف ومنعش وأي واحد يحب الليمون بيدمن عليه.

 

اللي بسويه اليوم مكعبات ليمون بس مع لمسات إضافيه شوي. أول شي هو موب مكعبات صاير مثلثات عندي ، سبب التغيير هنا هو للتصوير لا أكثر ، تقدرون تسوونه بالشكل اللي تحبون. القشرة اللي مستخدم مطعمه بجوز الهند واحد من أحب المكونات علي و اللي أشوف إنه يمشي بشكل رهيب مع الليمون. الكسترد مطعم بعشبة الليمون lemongrass بالإضافة لليمون. اللي ما يعرف عشبة الليمون هي عشبة تستخدم بشكل كبير في شرق آسيا في تايلند وسيريلانكا و فيتنام ولها نكهة ليمون “حلوه” وعطريه تغيير عن اللي مستخدم بالعادة وهو قشر الليمون.

المقادير :

 

 

القشرة :

 

 

كوب ونص طحين

كوب جوز هند محلى مبشور ( نارجيل )

١/٢ كوب سكر بودرة

أصبع ونص زبدة دافيه

١/٢ ملعقة صغيرة ملح

 

الحشوة :

 

 

كوب وربع سكر

٤ عيدان من عشبة الليمون Lemongrass

٥  ملاعق كبيرة عصير ليمون

٣ بيضات

١/٤ كوب طحين

 

 

* في حال ما توفر جوز هند محلى ممكن يستبدل بجوز هند غير محلى

 

* عشبة الليمون متوفرة في السعودية في كل سوبرماركت في قسم الثلاجة. في حال ما توفر أو ما حبيتوا تستخدمونه بدلوا بداله بشر ليمونتين بشرط إنكم ما تبشرون الجزأ الأبيض المر اللي تحت القشر.

 

عشبة ليمون

الطريقة :


نسخن الفرن ل ٣٥٠ بعدين ندهن بزبدة صينية معدنية مربعة ( أو أي شكل ) حجمها تقريبا ١٣ في ٩ إنش.

 

بخلاط يدوي نخلط الطحين مع جوز الهند و السكر و الملح إلين ينخلطون بشكل جيد بعدين نضيف الزبدة ونكمل خلط على سرعة بطيئة إلين تتكون كتل رطبة. الكتل راح تكون زي الرمل تقريبا بس قوامها رطب وتلصق في بعض إذا ضغطناها بيدنا.

قشرة قصيرة

نرص العجينة في قاعدة الصينية و شوي على الأطراف ونحاول نخليها بنفس السماكة قدر الإمكان.

 

 

ندخل الصينية الفرن إلين تصير القشرة ذهبية تقريبا ٢٥ دقيقه بعدين نطلعها من الفرن وننزل الحرارة ل ٣٢٥.


نسوي الحشوة و القشرة في الفرن. للحشوة أول شي بنسويه هو إننا نجهز الليمون جراس أو عشبة الليمون. الجزأ المستخدم من عشبة الليمون هو الثلث الأول بس اللي منتفخ. أول شي نسويه هو إننا نقطع الثلث الأول ونشيل الجذر حقه. الحين نشيل القشر الخارجي اليابس إلين نوصل للقلب بعدين نقطع القلب صغار مره.

 

ناخذ عشبة الليمون اللي قطعنا وندقها بالهاوند إلين تصير قطع جدا جدا صغيرة وتطلع ريحتها القوية. عشبة الليمون جدا قاسية ولا راح تذوب مع الطبخ فعشان كذا مهم إننا نقطعها قطع جدا صغيرة قدر الإمكان.

 

الحين في خلاط مولينكس نحط السكر مع عشبة الليمون اللي دقينا ونخلطهم مع بعض شوي ، تقريبا دقيقة. نضيف عصير الليمون ونكمل خلط دقيقة بعدين نضيف البيض ونخلط إلين يدخلون في الخليط بس. آخر شي نضيف الطحين ورشة ملح ونخلطهم شوي بس إلين يدخلون في الخليط.

 

نصب الحشوة في القشرة الحارة ونرجعها الفرن إلين تجمد الحشوة تقريبا ٢٢-٢٣ دقيقة. نطلعها من الفرن ونخليها تبرد في الصحن قبل التقطيع و نرشها بسكر بودرة قبل التقديم وممكن نقدمها مع كوليه فواكه أو فواكه مقطعه عالجنب لو تحبون.

 

هذا الحلى بيكون ألذ شي في نفس اليوم بس بيعيش تقريبا ٣-٤ أيام في الثلاجه بدون مشاكل.

 

مكعبات الليمون جراس

lemo bars

مكعبات ليمون بجوز الهند

lemon squares

Follow TopChefCooks on Twitter

40 comments

Skip to comment form

    • افنان on 11 March, 2014 at 1:59 am
    • Reply

    اممم صار يعني فوق الطبقة الي فوق طبقة بيضا تتكسر بالتقطيع زي الميرانج اذا دخل الفرن
    يارب فهمت علي هههه

    1. لو فيه صوره يمكن أوضح ، مممم ما أعرف الصراحة

    • Anonymous on 8 March, 2014 at 11:55 pm
    • Reply

    يعطيك العافية شيف ، لفتني تزيين الصحن بالشي الأحمر هذا وش يكون ياتُرى ؟؟؟؟ دايم أشوف هالحركة بالمطاعم ومافهمتها

    1. كل شي في الصحن لازم يكون له هدف موب بس ديكور. هذا كوليه توت أحمر واللي يمشي مع الليمون بشكل رهيب. تلاقين طريقة عمل الكوليه في موضوع كامل خاص فيه.

    • tota on 5 March, 2014 at 9:26 pm
    • Reply

    شيف ناوية أسوي هالحلى بس سؤالي ينفع أسويه بنفس يوم ما نطلع رحلة مثلا يعني ناكله برا بما انك قلت مثل الكوكيز ينفع؟؟

    1. بالعافية ….

      أكيد ينفع.

    • افنان on 5 March, 2014 at 7:39 pm
    • Reply

    توي مجربتها لذييييذه وسهله مره
    بس صار على الطبقه الي فوق زي قشرة الميرانج مدري هذا غلط ولا هي كذا لان مابينت بصورتك
    ربي يسعدك ويوفقك على هالوصفات

    1. بالعافية ……

      مممم مافهمت الصدق كيف زي قشرة المرانج ؟

    • إيمان on 19 November, 2013 at 11:05 pm
    • Reply

    روعة توني مسويتها الله يجزاك خير ويوفقك إن شاء الله يعجبك تطبيقي عاد لا تدقق ( وجه مستحي )
    http://img594.imageshack.us/img594/7692/wetu.jpg

      • إيمان on 19 November, 2013 at 11:06 pm
      • Reply

      بس تدري طلعت رفيعة شوي الظاهر صينيتي اكبر من صينيتك .

        • إيمان on 20 November, 2013 at 5:02 am
        • Reply

        للأسف ما أمداني أفرح مع الوقت صارت الطبقة اللي تحت ( القشرة ) قاسية ليش وين الغلط 🙁 صارت كأنها بسكوت …

          • Top Chef on 21 November, 2013 at 9:26 pm
            Author

          شكلك أكلتيها وهي حاره عشان كذا كانت لينه وتوقعتي هي مفروض كذا ؟

          هي مفروض تكون قاسيه بس موب للدرجة اللي مزعجه. هي بالضبط مفروض تكون زي ماقلتي زي البسكوت.

    • Anonymous on 11 October, 2013 at 10:08 pm
    • Reply

    لذيذه سريعه وبسيطه شكرا جدا لك

    • Anonymous on 5 September, 2013 at 9:16 am
    • Reply

    بالنسبه لي اعتبرها مشكله كبيره يعني لازم اتقن الشي او مااطبخ غيره لحد مااتمكن منه ولازم اوفر الاشياء وبجوده احياناً احس اني اعقد الامور ودي اتخلص شوي من الدقه هاذي ماادري متعبتني هالنقطه لاتقول بلاش طبخ احس الطبخ حاجه فن وابداع وتميز الشخص عن غيره .

    1. هذي مو دقة هذا إسمه وسواس قهري هههههه. أجل من كثر الدقة ما أبغى أطبخ إلين أضبط اللي قدامي ؟ أضبطي اللي قدامك وأطبخي غيره.

    • Anonymous on 10 August, 2013 at 5:44 am
    • Reply

    تحمست اسويه لكن عندي مشكله وهي أني زيك يا شيف دقيقه مره موثانيه هههههههه وهذا الي يتعبني في الطبخ وما اقبل إلا التوب

    1. مين قال هذي مشكلة ؟

    • وفا on 11 January, 2013 at 11:12 pm
    • Reply

    الله يعاطيك العافيه جربت الوصفه شي خرافي
    الله يبارك لك قي كل امورك يارب

  1. وااااو توي جربتها طعمها في الصميييم
    شكرًا على هالوصفات اللي تفتح النفس

    • رغدة on 8 September, 2012 at 8:27 am
    • Reply

    يعطيك العافية شيف ..
    عندي استفسار يمكن بعيد شوية عن الموضوع ..
    كذا مرة جربت وصفات حلويات تجمع بين الليمون والبيض ( زي الليمون كيرد ) .. ويطلع فيها طعم حديد ..
    هل هادا الشيء عادي ؟ وكيف اتفادى حصولة ؟
    شكرا جزيلاً ..

    1. لا هو مشكلة في الغالب. الغالب والله العالم إن المشكلة في الصحون حقت الخلط أو القدور اللي تستخدمين. لو كانت ألمنيوم أو حديد زهري هذي كلها تتفاعل مع الأحماض وبتعطي فعلا طعم حديد قوي للأكل. حتى لو كنتي تستخدمين قدور تيفلون وكانت مخدوشة إحتمال جدا كبير الطبقة اللي تحت تكون ألومنيوم وبتعطي هذي المشكلة.

      هذا السبب الوحيد اللي أقدر أفكر فيه الصراحة ؟

  2. ماشاء الله على موقعك روعة

    • amany on 21 May, 2012 at 10:17 am
    • Reply

    طلع من الفرن و لذيذ جدا جدا
    لكن شوي حالي و اتوقع السبب انه سكر بودره اللي عندي انا طاحنته
    لان طلع بالمكرون بعد حالي ،
    هل صحيح اضع معاه نشا اذا كنت بسويه بالبيت

    1. هو مفروض يكون حالي عشان يكسر حموضة الليمون بس لو حسيتي انه حالي اكثر من اللازم يمكن فيه مشكلة. المشكلة غالبا هي يمكن بسبب طحنك للسكر في البيت. اذا الوصفة طلبت سكر مطحون دايما استخدمي سكر مطحون جاهز لان مافيه اي جهاز في البيت يعطيك نفس نعومة الجاهز. كون السكر اللي عندك اخشن من اللي طالب وكوننا نحسب بالكاس هنا الكمية اللي استخدمتي مختلفة عن اللي حددت وعشان كذا صعب تعرفين وين الخطأ بالضبط.

      النشا ينحط بكمية بسيطة عشان يمنع انه يترطب ويلصق مع بعض بس زي ماقلت اشتري سكر مطحون

        • amany on 21 May, 2012 at 5:44 pm
        • Reply

        شكرا و باذن الله راح اشتريه لان الف مره سويت الماكرون و لاضبط

    • amany on 20 May, 2012 at 4:51 pm
    • Reply

    الطبق في الفرن انتظر يطلع 🙂
    انا احب الليون بار و سويته قبل و كان حلو بس هالوصفه مميزه و باين كثير حلوه

  3. تسلم ايديك شيف ..شي من الآخر

    • Bushra on 29 January, 2012 at 6:03 pm
    • Reply

    يعطيك الف عافية شيف ،
    الصراحة شي ما يتقاوم ابد
    صلحت الحلى بس لما طلعته من الفرن الحشوة كانت حلوه
    ولما تركتها تبرد تشققت !

    الله يسلمك ويسعدك
    طعمها لذيذ لذيذ مررره
    الله يوفقك يارب ..

    1. الحشوة بتتشقق إذا قعدت وقت أطول من اللازم وبتكون حلوه أكثر من اللازم إذا كان الليمون حلو شوي للأسف مافيه طريقة إننا نقيس كم نبي حموضه الليمون بالضبط.

  4. مرحبا شيف..
    تسسلم ع الوصفه ..بطبقها ان شاء الله..
    بس قبل لاسويها حبيت اسألك عن عشبة الليمون..
    هي متوفرة عندي بس اسمها غير اعتقد يسمونها “بصصل أخضر”
    بس نفس شكل العشبه الي فوق..يعني نفسسها ولامختلفه؟

    1. هههههههههههههه لا أما بصل أخضر، لا لا فيه شي إسمه عشبة ليمون يجي زي العود قاسي موب لين زي البصل الأخضر.

    • الاوتار on 16 December, 2011 at 4:28 pm
    • Reply

    تسلم على الوصفة ماشاء الله عليك

  5. شكرا على الوصفه الحلوة

    • Anonymous on 15 September, 2011 at 1:05 am
    • Reply

    مرحبا شيف.

    طبقت الحلى اليوم وكلي ثقة ان اطباقك من اروع مايكون.

    وكان فعلا مثل ماتوقعت تماماً , طبعا ماعندي عشبة الليمون استبدلتها ببشر الليمون الاصفر وكان الطعم رهيب قليل عليه .

    اتمنى من كل قلبي ان الله يوفقك ويسهل امورك وتتخرج بتفوق+A وترجع لاهلك وتقر عينهم .

    1. هلا والله …

      بالعافية على قلبك و الله يسمع منك .

    • Anonymous on 14 September, 2011 at 12:52 pm
    • Reply

    مرحبا شيف .

    شي ممتع عودت الاطباق من جديد لاني افتقدها كثير ,ولاني من محبي الليمون وجوز الهند حسيت الصنف هذا في قمة اللذة .

    والوصف في اول الموضوع يخليك تحس بالنكهة داخل فمك وطعم الحموضة بين اسنانك “وصف رهيب”.

    اشكرك من جديد على العودة القوية وبالتوفيق ان شاء الله

    1. هلا والله …

      هههههه أي جديد ؟ الموضوع صارله حول السنه ههههه

    • Anonymous on 14 September, 2011 at 12:04 pm
    • Reply

    جميل جدا ، بسويها بأسرع وقت بإذن الله ، سلمت لنا

      • لولو on 27 August, 2012 at 1:58 am
      • Reply

      جربته تو مع امي
      طعمه يعور القلب من زينه
      اتعب وانا اقول لذيذ
      كانه مربى او حلاو او باوناي تحتار فيه
      بس انا القشره عرضتها شوي المره الجايه بسخفها
      وياجعل حياتك كلها حلوه زي وصفتك

      1. بالعافية على قلوبكم

Leave a Reply

Your email address will not be published.

%d bloggers like this: