مكعبات الليمون بعشبة الليمون و جوز الهند .. Lemon Bars with Lemongrass and Coconut shortcurst

هلا والله …..

 

مكعبات الليمون أو مربعات الليمون  lemon squares واحد من ألذ و أسهل و أشهر الحلويات. الحلى هذا يشبه الكوكيز أو البسكوت تقريبا في طريقة التقديم يعني هو بالعادة شي ينوكل باليد في الحفلات أو العزايم وغالبا يكون مقطع مربعات ومن هنا جت التسمية. الحلى عبارة عن قشرة crust مصنوع من عجينة قصيرة shortcrust ( العجينة القصيرة عجينة تتفتت في الفم وتكون مليانة دهن ) وفوق هذي القشرة حشوة عبارة عن كسترد ليمون وغالبا مرشوشة بسكر بودرة في الأخير. القشرة تتفتت في الفم وفي نفس الوقت تعطي قرمشة خفيفة و الكسترد يتحول لطبقة زي الكيك من فوق ولينه من داخل تعطي طعم رهيب مع القشرة. الحلى جدا خفيف ومنعش وأي واحد يحب الليمون بيدمن عليه.

 

اللي بسويه اليوم مكعبات ليمون بس مع لمسات إضافيه شوي. أول شي هو موب مكعبات صاير مثلثات عندي ، سبب التغيير هنا هو للتصوير لا أكثر ، تقدرون تسوونه بالشكل اللي تحبون. القشرة اللي مستخدم مطعمه بجوز الهند واحد من أحب المكونات علي و اللي أشوف إنه يمشي بشكل رهيب مع الليمون. الكسترد مطعم بعشبة الليمون lemongrass بالإضافة لليمون. اللي ما يعرف عشبة الليمون هي عشبة تستخدم بشكل كبير في شرق آسيا في تايلند وسيريلانكا و فيتنام ولها نكهة ليمون “حلوه” وعطريه تغيير عن اللي مستخدم بالعادة وهو قشر الليمون.

المقادير :

 

 

القشرة :

 

 

كوب ونص طحين

كوب جوز هند محلى مبشور ( نارجيل )

١/٢ كوب سكر بودرة

أصبع ونص زبدة دافيه

١/٢ ملعقة صغيرة ملح

 

الحشوة :

 

 

كوب وربع سكر

٤ عيدان من عشبة الليمون Lemongrass

٥  ملاعق كبيرة عصير ليمون

٣ بيضات

١/٤ كوب طحين

 

 

* في حال ما توفر جوز هند محلى ممكن يستبدل بجوز هند غير محلى

 

* عشبة الليمون متوفرة في السعودية في كل سوبرماركت في قسم الثلاجة. في حال ما توفر أو ما حبيتوا تستخدمونه بدلوا بداله بشر ليمونتين بشرط إنكم ما تبشرون الجزأ الأبيض المر اللي تحت القشر.

 

عشبة ليمون

الطريقة :


نسخن الفرن ل ٣٥٠ بعدين ندهن بزبدة صينية معدنية مربعة ( أو أي شكل ) حجمها تقريبا ١٣ في ٩ إنش.

 

بخلاط يدوي نخلط الطحين مع جوز الهند و السكر و الملح إلين ينخلطون بشكل جيد بعدين نضيف الزبدة ونكمل خلط على سرعة بطيئة إلين تتكون كتل رطبة. الكتل راح تكون زي الرمل تقريبا بس قوامها رطب وتلصق في بعض إذا ضغطناها بيدنا.

قشرة قصيرة

نرص العجينة في قاعدة الصينية و شوي على الأطراف ونحاول نخليها بنفس السماكة قدر الإمكان.

 

 

ندخل الصينية الفرن إلين تصير القشرة ذهبية تقريبا ٢٥ دقيقه بعدين نطلعها من الفرن وننزل الحرارة ل ٣٢٥.


نسوي الحشوة و القشرة في الفرن. للحشوة أول شي بنسويه هو إننا نجهز الليمون جراس أو عشبة الليمون. الجزأ المستخدم من عشبة الليمون هو الثلث الأول بس اللي منتفخ. أول شي نسويه هو إننا نقطع الثلث الأول ونشيل الجذر حقه. الحين نشيل القشر الخارجي اليابس إلين نوصل للقلب بعدين نقطع القلب صغار مره.

 

ناخذ عشبة الليمون اللي قطعنا وندقها بالهاوند إلين تصير قطع جدا جدا صغيرة وتطلع ريحتها القوية. عشبة الليمون جدا قاسية ولا راح تذوب مع الطبخ فعشان كذا مهم إننا نقطعها قطع جدا صغيرة قدر الإمكان.

 

الحين في خلاط مولينكس نحط السكر مع عشبة الليمون اللي دقينا ونخلطهم مع بعض شوي ، تقريبا دقيقة. نضيف عصير الليمون ونكمل خلط دقيقة بعدين نضيف البيض ونخلط إلين يدخلون في الخليط بس. آخر شي نضيف الطحين ورشة ملح ونخلطهم شوي بس إلين يدخلون في الخليط.

 

نصب الحشوة في القشرة الحارة ونرجعها الفرن إلين تجمد الحشوة تقريبا ٢٢-٢٣ دقيقة. نطلعها من الفرن ونخليها تبرد في الصحن قبل التقطيع و نرشها بسكر بودرة قبل التقديم وممكن نقدمها مع كوليه فواكه أو فواكه مقطعه عالجنب لو تحبون.

 

هذا الحلى بيكون ألذ شي في نفس اليوم بس بيعيش تقريبا ٣-٤ أيام في الثلاجه بدون مشاكل.

 

مكعبات الليمون جراس

lemo bars

مكعبات ليمون بجوز الهند

lemon squares

Follow TopChefCooks on Twitter

40 comments

Skip to comment form

    • افنان on 11 مارس, 2014 at 1:59 ص
    • رد

    اممم صار يعني فوق الطبقة الي فوق طبقة بيضا تتكسر بالتقطيع زي الميرانج اذا دخل الفرن
    يارب فهمت علي هههه

    1. لو فيه صوره يمكن أوضح ، مممم ما أعرف الصراحة

    • غير معروف on 8 مارس, 2014 at 11:55 م
    • رد

    يعطيك العافية شيف ، لفتني تزيين الصحن بالشي الأحمر هذا وش يكون ياتُرى ؟؟؟؟ دايم أشوف هالحركة بالمطاعم ومافهمتها

    1. كل شي في الصحن لازم يكون له هدف موب بس ديكور. هذا كوليه توت أحمر واللي يمشي مع الليمون بشكل رهيب. تلاقين طريقة عمل الكوليه في موضوع كامل خاص فيه.

    • tota on 5 مارس, 2014 at 9:26 م
    • رد

    شيف ناوية أسوي هالحلى بس سؤالي ينفع أسويه بنفس يوم ما نطلع رحلة مثلا يعني ناكله برا بما انك قلت مثل الكوكيز ينفع؟؟

    1. بالعافية ….

      أكيد ينفع.

    • افنان on 5 مارس, 2014 at 7:39 م
    • رد

    توي مجربتها لذييييذه وسهله مره
    بس صار على الطبقه الي فوق زي قشرة الميرانج مدري هذا غلط ولا هي كذا لان مابينت بصورتك
    ربي يسعدك ويوفقك على هالوصفات

    1. بالعافية ……

      مممم مافهمت الصدق كيف زي قشرة المرانج ؟

    • إيمان on 19 نوفمبر, 2013 at 11:05 م
    • رد

    روعة توني مسويتها الله يجزاك خير ويوفقك إن شاء الله يعجبك تطبيقي عاد لا تدقق ( وجه مستحي )
    http://img594.imageshack.us/img594/7692/wetu.jpg

      • إيمان on 19 نوفمبر, 2013 at 11:06 م
      • رد

      بس تدري طلعت رفيعة شوي الظاهر صينيتي اكبر من صينيتك .

        • إيمان on 20 نوفمبر, 2013 at 5:02 ص
        • رد

        للأسف ما أمداني أفرح مع الوقت صارت الطبقة اللي تحت ( القشرة ) قاسية ليش وين الغلط 🙁 صارت كأنها بسكوت …

          • Top Chef on 21 نوفمبر, 2013 at 9:26 م
            Author

          شكلك أكلتيها وهي حاره عشان كذا كانت لينه وتوقعتي هي مفروض كذا ؟

          هي مفروض تكون قاسيه بس موب للدرجة اللي مزعجه. هي بالضبط مفروض تكون زي ماقلتي زي البسكوت.

    • غير معروف on 11 أكتوبر, 2013 at 10:08 م
    • رد

    لذيذه سريعه وبسيطه شكرا جدا لك

    • غير معروف on 5 سبتمبر, 2013 at 9:16 ص
    • رد

    بالنسبه لي اعتبرها مشكله كبيره يعني لازم اتقن الشي او مااطبخ غيره لحد مااتمكن منه ولازم اوفر الاشياء وبجوده احياناً احس اني اعقد الامور ودي اتخلص شوي من الدقه هاذي ماادري متعبتني هالنقطه لاتقول بلاش طبخ احس الطبخ حاجه فن وابداع وتميز الشخص عن غيره .

    1. هذي مو دقة هذا إسمه وسواس قهري هههههه. أجل من كثر الدقة ما أبغى أطبخ إلين أضبط اللي قدامي ؟ أضبطي اللي قدامك وأطبخي غيره.

    • غير معروف on 10 أغسطس, 2013 at 5:44 ص
    • رد

    تحمست اسويه لكن عندي مشكله وهي أني زيك يا شيف دقيقه مره موثانيه هههههههه وهذا الي يتعبني في الطبخ وما اقبل إلا التوب

    1. مين قال هذي مشكلة ؟

    • وفا on 11 يناير, 2013 at 11:12 م
    • رد

    الله يعاطيك العافيه جربت الوصفه شي خرافي
    الله يبارك لك قي كل امورك يارب

    • Salma on 1 ديسمبر, 2012 at 3:18 م
    • رد

    وااااو توي جربتها طعمها في الصميييم
    شكرًا على هالوصفات اللي تفتح النفس

    • رغدة on 8 سبتمبر, 2012 at 8:27 ص
    • رد

    يعطيك العافية شيف ..
    عندي استفسار يمكن بعيد شوية عن الموضوع ..
    كذا مرة جربت وصفات حلويات تجمع بين الليمون والبيض ( زي الليمون كيرد ) .. ويطلع فيها طعم حديد ..
    هل هادا الشيء عادي ؟ وكيف اتفادى حصولة ؟
    شكرا جزيلاً ..

    1. لا هو مشكلة في الغالب. الغالب والله العالم إن المشكلة في الصحون حقت الخلط أو القدور اللي تستخدمين. لو كانت ألمنيوم أو حديد زهري هذي كلها تتفاعل مع الأحماض وبتعطي فعلا طعم حديد قوي للأكل. حتى لو كنتي تستخدمين قدور تيفلون وكانت مخدوشة إحتمال جدا كبير الطبقة اللي تحت تكون ألومنيوم وبتعطي هذي المشكلة.

      هذا السبب الوحيد اللي أقدر أفكر فيه الصراحة ؟

  1. ماشاء الله على موقعك روعة

    • amany on 21 مايو, 2012 at 10:17 ص
    • رد

    طلع من الفرن و لذيذ جدا جدا
    لكن شوي حالي و اتوقع السبب انه سكر بودره اللي عندي انا طاحنته
    لان طلع بالمكرون بعد حالي ،
    هل صحيح اضع معاه نشا اذا كنت بسويه بالبيت

    1. هو مفروض يكون حالي عشان يكسر حموضة الليمون بس لو حسيتي انه حالي اكثر من اللازم يمكن فيه مشكلة. المشكلة غالبا هي يمكن بسبب طحنك للسكر في البيت. اذا الوصفة طلبت سكر مطحون دايما استخدمي سكر مطحون جاهز لان مافيه اي جهاز في البيت يعطيك نفس نعومة الجاهز. كون السكر اللي عندك اخشن من اللي طالب وكوننا نحسب بالكاس هنا الكمية اللي استخدمتي مختلفة عن اللي حددت وعشان كذا صعب تعرفين وين الخطأ بالضبط.

      النشا ينحط بكمية بسيطة عشان يمنع انه يترطب ويلصق مع بعض بس زي ماقلت اشتري سكر مطحون

        • amany on 21 مايو, 2012 at 5:44 م
        • رد

        شكرا و باذن الله راح اشتريه لان الف مره سويت الماكرون و لاضبط

    • amany on 20 مايو, 2012 at 4:51 م
    • رد

    الطبق في الفرن انتظر يطلع 🙂
    انا احب الليون بار و سويته قبل و كان حلو بس هالوصفه مميزه و باين كثير حلوه

  2. تسلم ايديك شيف ..شي من الآخر

    • Bushra on 29 يناير, 2012 at 6:03 م
    • رد

    يعطيك الف عافية شيف ،
    الصراحة شي ما يتقاوم ابد
    صلحت الحلى بس لما طلعته من الفرن الحشوة كانت حلوه
    ولما تركتها تبرد تشققت !

    الله يسلمك ويسعدك
    طعمها لذيذ لذيذ مررره
    الله يوفقك يارب ..

    1. الحشوة بتتشقق إذا قعدت وقت أطول من اللازم وبتكون حلوه أكثر من اللازم إذا كان الليمون حلو شوي للأسف مافيه طريقة إننا نقيس كم نبي حموضه الليمون بالضبط.

  3. مرحبا شيف..
    تسسلم ع الوصفه ..بطبقها ان شاء الله..
    بس قبل لاسويها حبيت اسألك عن عشبة الليمون..
    هي متوفرة عندي بس اسمها غير اعتقد يسمونها “بصصل أخضر”
    بس نفس شكل العشبه الي فوق..يعني نفسسها ولامختلفه؟

    1. هههههههههههههه لا أما بصل أخضر، لا لا فيه شي إسمه عشبة ليمون يجي زي العود قاسي موب لين زي البصل الأخضر.

    • الاوتار on 16 ديسمبر, 2011 at 4:28 م
    • رد

    تسلم على الوصفة ماشاء الله عليك

  4. شكرا على الوصفه الحلوة

    • غير معروف on 15 سبتمبر, 2011 at 1:05 ص
    • رد

    مرحبا شيف.

    طبقت الحلى اليوم وكلي ثقة ان اطباقك من اروع مايكون.

    وكان فعلا مثل ماتوقعت تماماً , طبعا ماعندي عشبة الليمون استبدلتها ببشر الليمون الاصفر وكان الطعم رهيب قليل عليه .

    اتمنى من كل قلبي ان الله يوفقك ويسهل امورك وتتخرج بتفوق+A وترجع لاهلك وتقر عينهم .

    1. هلا والله …

      بالعافية على قلبك و الله يسمع منك .

    • غير معروف on 14 سبتمبر, 2011 at 12:52 م
    • رد

    مرحبا شيف .

    شي ممتع عودت الاطباق من جديد لاني افتقدها كثير ,ولاني من محبي الليمون وجوز الهند حسيت الصنف هذا في قمة اللذة .

    والوصف في اول الموضوع يخليك تحس بالنكهة داخل فمك وطعم الحموضة بين اسنانك “وصف رهيب”.

    اشكرك من جديد على العودة القوية وبالتوفيق ان شاء الله

    1. هلا والله …

      هههههه أي جديد ؟ الموضوع صارله حول السنه ههههه

    • غير معروف on 14 سبتمبر, 2011 at 12:04 م
    • رد

    جميل جدا ، بسويها بأسرع وقت بإذن الله ، سلمت لنا

      • لولو on 27 أغسطس, 2012 at 1:58 ص
      • رد

      جربته تو مع امي
      طعمه يعور القلب من زينه
      اتعب وانا اقول لذيذ
      كانه مربى او حلاو او باوناي تحتار فيه
      بس انا القشره عرضتها شوي المره الجايه بسخفها
      وياجعل حياتك كلها حلوه زي وصفتك

      1. بالعافية على قلوبكم

اترك تعليقاً

لن ينشر بريدك الإلكتروني.

%d مدونون معجبون بهذه: