«

»

مايو 07 2011

جامايكا : جرك تشكن .. Jerk Chicken

هلا والله …

ANY CHARACTER HERE

اليوم الرابع من فعالية حول العالم في ٣٠ يوم و اليوم عندنا جامايكا. جامايكا دولة في البحر الكاريبي و أكل البحر الكريبي متشابه في النكهات و المكونات تقريبا. المطبخ الجامايكي تأثر بعدة ثقافات على مر السنين ، السكان الأصليين لهم طبعا الأثر الأكبر على أكلهم وبعدين تأثر بالمطبخ الأسباني و البريطاني اللي بدورهم جابوا الأكل الهندي و الصيني و الأفريقي للجزيرة . لو جينا نشوف النكهات الكاريبية نلاقي إنها مبهرة بقوة ، وفي نفس الوقت طعم كل بهار واضح وباين إنه موجود . أهم البهارات الموجوده غالبا في الأكل الكاريبي هي الفلف الحار ( بعضها يكون حار جدا ) ، القرنفل ، القرفة ، جوزة الطيب , وطبعا البهار الحلو allspice اللي يسمونه أصلا فلفل جامايكا. في الكاريبي شي ثاني يميز أكلهم وهو إنه يعتمد على كثير من الفواكه الإستوائية المتوفرة بكثرة هناك مثل الأناناس و جوز الهند و الجوافة .

ANY CHARACTER HERE

الأكلة اللي بسويها اليوم إسمها جيرك تشيكن أو دجاج ببهارات الجرك وهي يمكن الأكلة الرسمية لجمايكا.  الأكلة عبارة عن دجاج متبل ببهارات جيرك بعدين مشوي أو محمر في الفرن.  أخترت الجيرك تشيكن لأنه سهل ومقاديره متوفرة ومن أول مره تجربونه بتفهمون وش اللي أقصد بنكهة الكاريبي. الجيرك هو خلطة بهارات أو تتبيلة لها ملايين الطرق بس غالبا فيها بهار حلو allspice وفلفل إسمه “هابانييرو” أو “سكوتش بونيت” ( واحد من أحر أنواع الفلفل في العالم ). خذوا راحتكم في التتبيلة وحطوها مع أي شي ثاني غير الدجاج هي تمشي مع السمك أو الخضار أو حتى اللحم .

ANY CHARACTER HERE

المقادير :

ANY CHARACTER HERE

١/٢ كوب خل ملت أو تفاح. (لأ ما ينفع خل عادي)

بشر وعصير نص ليمونه خضراء

١٠ حبات بصل أخضر مقطعه قطع كبار

٤ فصوص ثوم

ملعقتين كبار زعتر بري thyme مجفف أو طازج . ( يختلف عن الأوريجانو هذا شي وهذاك شي )

حبتين فلفل هابانييرو  أو سكوتش بونيت

١/٢ كوب زيت

٤ ملاعق صغيرة بهار حلو allspice

٤ ملعق صغيرة زنجبيل مطحون

ملعقتين صغار جوزة طيب

ملعقتين صغار ملح

ملعقتين صغار فلفل أسود

ملعقتين كبار سكر بني

6 فخوذ ورجول دجاج.

للصوص :


نص كوب كتشب

٣ ملاعق كبيره صويا صوص.

ANY CHARACTER HERE

* تقدرون تستخدمون صدور دجاج أو أي لحم ثاني تبون بعد.

ANY CHARACTER HERE

* المكونات كلها أعتقد سهلة ومتوفرة الشي الوحيد اللي يمكن ما تلاقونه هو فلفل الهابانييرو. فلفل الهابنييرو واحد من أحر أنواع الفلفل في العالم بس تحت هذي الحرارة في حلاوه وطعم فواكه حلو ومميز. فيه مقياس لحرارة الفلفل إسمه “مقياس سكوفيل” Scoville scale و الهابانييرو تتراوح حرارته من ١٠٠٠٠٠ – ٣٥٠٠٠٠ وحده. عشان تتخيلون الحرارة الفلفل البارد العادي مقياسه صفر سكوفيل و فلفل حار نسبيا زي الهالابينو حرارته ٢٥٠٠ – ٨٠٠٠ هههه يعني تقدرون تتخيلون الفرق في الحرارة .

ANY CHARACTER HERE

habaneero chilie

هذا هو شكل الفلفل صغير ومجعد و ألوانه تتراوح بين الأحمر و البرتقالي. فيه أنواع فلفل كثير تشبهه زي فلفل الكرز اللي يجي أملس بس هذاك أبرد بكثير. في حال لقيتوا هذا الفلفل أستخدموا لوح تقطيع ثاني له و يفضل لو تلبسون قفاز و أنتم تستخدمونه لأن لو قطعتوه ممكن يحرق الجلد أو العين. في حال مالقيتوا هذا النوع أستخدموا أحر أحر فلفل تلاقونه ويفضل لو يكون من الأنواع الحمراء ( فيها طعم حلاوه عكس الخضراء ) بس زيدوا الكمية شوي. كقاعدة عامة كل ماكان الفلفل نحيف أكثر و أقصر و مجعد أكثر كل ماكان أحر ( ولو إن هذا الفلفل مخالف لكل هذي النقاط عشان كذا قلت قاعدة عامة بس لها شواذ ).  داري إن فيه ناس ما يحبون الأكل حار مره وتقدرون تسوون الأكل بدون الفلفل بس تذكروا الأكل الجامايكي أكل حار وحاولوا لو مره وحده تجربونه زي ماهو.

ANY CHARACTER HERE

الطريقة :

للتتبيلة :

ANY CHARACTER HERE

حطوا الخل مع كل مكونات التتبيلة الباقية في خلاط مولينكس و أخلطوه إلين يعطيكم تتبيله. ذوقوا التتبيلة وعدلوا عليها حسب الرغبة. خذوا ملعقتين كبار من التتبيله عالجنب عشان نسوي فيها الصوص بعدين. حطوا الدجاج في صينية ( أو كيس يتقفل لو تحبون ) وصبوا فوقه التتبيلة وأخلطوه معها زين بعدين غلفوه وحطوه في الثلاجه 4 ساعات عالأقل.

للصوص :

ANY CHARACTER HERE

أخلطوا مقادير الصوص مع بعض اللي هي الكتشب و الصويا و الملعقتين من اللتبيلة اللي حفظناها وحطوه عالجنب.

طبخ الدجاج :

ANY CHARACTER HERE

الدجاج الحين متبل وجاهز وممكن ينطبخ بكذا طريقة. تقدرون تشوونه عالفحم لو تبون أو بإستخدام شوايه حديد أو حتى تحمرون الدجاج في الفرن.  ما أنصح أبدا بالشوايات الكهربائية لأن جربت كثير منها وعمرها عمرها ما توصل حرارة كافيه وغالبا توزيعها للحرارة سيء يعني تسخن في مناطق أكثر من مناطق. أنا بوريكم طريقتين هنا وجربوا اللي تعجبكم.

ANY CHARACTER HERE

قبل الطبخ بساعة عالأقل طلعوا الدجاج من التتبيله بعدين جففوه بمناديل رول ( مهم عشان يتحمر وعشان الجلد يصير يقرمش وبعد عشان ما يطلع دخان كثيرويمكن ينحرق إذا لمس المقله ) و رشوه بشوي ملح  عالجهتين.

ANY CHARACTER HERE

بالفرن :

ANY CHARACTER HERE

سخنوا الفرن ل 350 .

سخنوا مقله حديد أو ستانلس على حرارة أعلى من وسط بشوي وخلوها تسخن شوي بعدين حطوا شوي زيت نباتي. حطوا الدجاج بحيث يكون الجلد على تحت و أطبخوه إلين يتحمر الجلد شوي بعدين أقلبوه وحمروا الوجه الثاني. الحين لو المقله حقتكم من النوع اللي ينفع يدخل الفرن ( يعني ما يفيها بلاستك ) حطوا المقله كلها داخل الفرن. لو كان فيها بلاستك خذوا الدجاج وحطوه في صينية فرن ودخلوه الفرن. خلوا الدجاج في الفرن إلين يستوي من جوا ولا دقيقه أكثر من كذا عشان ما ينشف. تعرفون إن الدجاج إستوى بإنكم تخرمون خرم صغير بالسكين في أسمك مكان في الفخذ إذا كان فيه لون وردي أو طلعت مويه حمراء يعني الدجاج لسا ما أستوى أو تقدرون تقيسون الحراره بميزان ومتى ما وصلت 165 يعني أستوى.

ANY CHARACTER HERE

أو لو تبون أسهل حطوا الدجاج في صينية فرن على حرارة 425 إلين ما يتحمر وينطبخ من داخل زي ما شرحت فوق. الدجاج بيكون ممتاز بس الجلد ماراح يكون متحمر بنفس الطريقة ولا راح يكون يقرمش زي إذا كان مشوح أول بس الخيار راجعلكم.

بالشواية :

ANY CHARACTER HERE

نسخن شواية حديد ( أو فحم أو غاز ) على حرارة أعلى من وسط بشوي. بعدين ندهن الدجاج بشوي زيت نباتي ونحطه عالشوايه ونطبخة إلين يتلون الوجه الأول بعدين نقلبه ونكمل طبخ الوجه الثاني إلين يستوي الدجاج من جوا زي ما شرحت فوق.

ANY CHARACTER HERE

دجاج مشوي

ANY CHARACTER HERE

بعد ما يستوي الدجاج لازم نريحة بإننا نحطه في صحن ونغطيه بقصدير مخروم . نخلي الدجاج يرتاح ثلث وقت الطبخ تقريبا. ترييح اللحم جدا مهم ، ترييح اللحم بيخلي البروتين حق اللحم يرتاح و المويه ترجع تتوزع بالتساوي في اللحم هذا بيعطي لحم رطب أكثر و لين أكثر. لو ماريحنا اللحم بنلاقي المويه نزلت كلها في الصحن بدال ما تكون داخل الدجاج.

ANY CHARACTER HERE

نقدم الدجاج مع الصوص و ساور كريم ( عشان يخفف من الحراره شوي ).

ANY CHARACTER HERE

دجاج جرك

jerk chicken

دجاج بالجرك

jerk chicken

دجاج بالجرك


عن الكاتب

Top Chef

20 comments

3 pings

Skip to comment form

  1. nana

    الوصفة حلوة
    مشكووور

  2. هدى

    السلام عليكم

    ابشرك زينتها اليوم وشويتها بالفرن

    الصراحه ريحة التتبيله ماعجبتني عشاان انا مااحب ريحة خل التفاح يجيب لي غثيان بس قلت بجرب موب ضارني

    يوم نشفتها بمنديل قبل الشوي راحت الريحه وشويتها بالفرن وقطعتين صدر زينتها فوق زيك

    الصراحه رهيييييييبه مررره مره مره بس انا مازينت الصوص قدمتها مع رز ابيض

    وخلاص ان شااء الله اعتمدت الطريقه عندي

    الله يسعدك ويوفقك ويسهل لك كل عسير ويردك لاهلك سالم محقق كل اللي تبي يارب

    1. Top Chef

      وعليكم السلام و الرحمة …..

      بالعافية على قلبك … جربيها مع الصوص المرات الجايه ، الصوص رهيب موب بس مع الدجاج …

  3. غير معروف

    اخوي ممكن احذف الفلفل او احط معاه فلفلروي؟!؟!؟لاني اللي عندي ماياكلون حارابد وممكن يعيفون الأكله:(
    وبالنسبه للساور كريم هي نفسها القشطه الرائبه وشكل عبوتها مثل علب الزبادي؟؟؟؟وطعمها جاي بين القشطه والزبادي

    1. Top Chef

      هلا والله …

      تكلمت عن النقطة هذي في الموضوع .

      عليك نور هي نفسها القشطة الرائبة.

  4. كيك

    لو سمحت بغيت اسويها بس ماعرفت البهار الحلو؟؟

    1. Top Chef

      هو اللي يسمونه all spice يعرفونه حقين البهارات

  5. نور

    شيف عادي احط بدال الدياي ربيان ؟
    و اذا اي جم دقيقه اتبله ؟
    و اذا لا، عندك وصفه ربيان من جميكا اسمها جاميكن بلاك بيبر شريمب ؟ موجوده اب تشيز كيك فاكتوري

    1. Top Chef

      أكيد عادي ، يمديك تستخدمين التتبيلة لأ شي. أي ربيان أو سمك عمرك لا تتبلينه أكثر من نص ساعة أكثر من نص ساعة يبدأ اللحم ينطبخ بالأحماض و الملح وهذا يخرب قوام اللحم بعد ما ينطبخ عالنار.

      ما أعرف اللي تقصدين بس هذي بتعطيك نكهة جمايكية في الربيان وبتكون جدا لذيذة.

  6. cutei

    مشآلله آلله يسلم آيدينك
    شكلهآ لذيذه
    بس سؤآل غبي شويآت
    طعمهآ زي جرآند فآهيتآ حقت هآرديز؟
    هههههههه
    لآني ميته على طعمهآ وآبي آعرف آلتتبيله
    آو آي شي قريب منهآ ولآتقولي تقدرين تسوين آي تتبيله لآني مييح فآلطبخ للأسف وانشالله اتعلم على ايدك

    1. Top Chef

      جراند فهيتا ؟ إسم الأكله جرك تشكن ههههه

  7. ABEER

    عفوا انا ماشفت بصل اخضر عالدجاج اللي مسويه!
    والصوص نحطه وهو ينطبخ؟

    1. Top Chef

      البصل الأخضر مع التتبيلة تفرمينه كله في الخلاط .

      الصوص تسوينه لحاله ما تطبخينه ولا شي هو زي الباربيكيو صوص تقريبا

  8. شقآوة فضل

    يسلمو شيف
    الله يديك العافيه يارررب ~

  9. غير معروف

    يسلمو خيوو

    تصدق عاد فعلا كانت قاعدتي كل ماكان الفلفل نحيف ومجعد وحبوبة كثيرة واذا كسرته طلع صوت قوي دليل انه حاااار . لكن يوم شفت الي معك قلت يا حليلها حلوات صعنونات كانها الفلفل الحلو هههه طلعت مقلب اجل هذه . فلفل الكرز واي فلفل ثاني ما المسة الا بقفاز لان جلدي بسرعة يتاثر بهم وما اتحمل ابدا المسهم

    اجل هذا وش يصير فيني ههههه

    الله يبارك بعمرك يا بعد حيي ما قصرت سفرة دايمة >_<

  10. نور

    مشالله الاكله شكلها عجيبه و لذيذه
    انشالله بسويها هالاسبوع
    بس بخفف الفلفل اكيد
    و بقدمها مع روب قليل الدسم بدال السوركريم عشان الرجيم

  11. um nwaf

    بصراجة أول مره أعرف منك إن الزعتر البري غير الأوريقانو
    لأن حتى بالعلبه يكتبون زعتر بري وتحته اسمه بالانجليزي (أوريقانوا)
    فإما إن اللي عندنا زعتر بري والاوريقانوا مجهول أو العكس
    عشان كذا حابه أعرف الفرق وحتى أقدر احكم على اللي موجود عندي هل هو زعتر بري أو أوريقانوا
    اللي عندي عباره عن ورق اخضر صغير ومجفف وريحته تشبه الريحان نوعا ما

    1. Top Chef

      كلمة زعتر أصلا خطأ في الوصف بس مالها إسم عربي ؟ أو عالأقل مالها إسم عربي أعرفه الصراحة .. عشان كذا دايما أكتب جنبها الإسم الإنجليزي اللي يعطيك بالضبط اللي أنا أبي.

      الزعتر وشو .. الزعتر عبارة عن خليط أعشاب مع سمسم وسماق .. مافيه نوع عشب واحد إسمه زعتر .. كل منطقة وكل بيت يسوي الزعتر بطريقة مختلفه كل واحد يحط نوعية أعشاب وبكميات غير الثاني. وهنا تبدأ اللخبطة كل واحد يسمي نبات معين زعتر وهو غير الثاني .. أسهلك تدورين بالإنجليزي إذا كتب oregano يعني أوريجانو و إذا كتب thyme “تايم” فهذا اللي أقصد بالزعتر البري.

      الإثنين عبارة عن ورق أخضر صغير ومجفف وكلهم ريحتهم عطريه صعب أوصفها .. للمعلوميه بعد غير الإثنين هذي فيه أنواع ثانيه كثيييييير وكل الناس بيسمونها زعتر بري !

  12. غير معروف

    ماشاء الله
    روعه الطبق
    المشكله مع الفلفل مش في أيدينا أو في عيوننا ! المشكلة كيف بطننا بيتحمل الـ ١٠٠٠٠٠ – ٣٥٠٠٠٠

    وممكن أعرف الفرق بين الزعتر البري والاريجانوا ؟
    والفرق بين الروز ماري وإكليل الجبل ؟

    ويعطيك ألف عافية.

    1. Top Chef

      الفلفل مع الطبخ و الحمض راح يصير أبرد بكثير من لو أكلتهي لحاله .. الطبق النهائي حار صح بس موب شي مزعج يعني محد يقدر ياكله أو ما تذوقين شي غير الحار .

      الزعتر البري زعتر بري و الأوريجانو أوريجانو كل واحد غير عن الثاني وكل واحد له طعم وريحة مختلفة عن الثاني .

      الروزماري هو نفسه أكليل الجبل .

  1. ختام فعالية حول العالم في ٣٠ يوم …. » Top Chef Blog .. مدونة توب شيف

    […] جامايكا : جرك تشكن […]

  2. ختام فعالية حول العالم في ٣٠ يوم …. « مدونة توب شيف … Top Chef

    […] جامايكا : جرك تشكن […]

  3. نيجيريا : أكارا .. Akara « مدونة توب شيف … Top Chef

    […] ملعقة صغيرة أحر فلفل عندكم . أنا أستخدمت الهابانييرو اللي في موضوع الجرك تشكن . […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: