الجواكمولي .. guacmole dip

هلا والله …

.

الجواكمولي عباره عن صلصه منتشره في دول أمريكا اللاتينيه . أساس الصلصة هذي هو الأفوكادو مع إضافات ثانيه بس المهم هو الأفوكادو بالدرجة الأولى . الجواكمولي له إستخدامات كثير ممكن مثلا يستخدم كصوص فوق ستيك ، فهيتا، برجر ، ممكن ينحط مع السندوتشات ، أو حتى ممكن يستخدم كديب dip مع قطع خبز مثلا أو تورتيا محمصه أو مقليه . كثير ناس يسألوني عن صوصات للسندوتشات والجواكمولي خيار حلو للي يبي يسوي شي جديد ومميز وأكيد جدددا لذيذ . الجواكمولي لذيذ مع الدجاج ومع السمك ومع الربيان و الكراب و المأكولات البحريه كلها تقريبا وحتى مع الخضار عشان كذا هو إضافه حلوه وسهله الواحد يسويها في ثواني .

.

نبدأ أول شي بالأفوكادو . الأفوكادو تجي نوعيين رئيسيين تقريبا هي اللي ممكن تلاقينها في كل مكان الأول اللي هو العادي يجي شكله زي كذا :

والثاني يجي زي كذا :

.

النوع الأفضل هنا هو النوع الثاني أو اللي يسمونه هاس . وخصوصا اللي يكون إنتاج كالفورنيا هذا أفضل أفوكادو . السبب هو إنه أكثر دسم من الأنواع الثانيه وهذا يخليه ناعم مره وطعمه رهيب . بس كل الإثنين تنفع عادي .للي ماقد ذاق الأفوكادو هو فاكهه جدا دسمه قوامها زي الزبده اللينه تقريبا ( وموب غريبه عشان كميه الدهن العاليه ) . طعمها جدا خفيف بس رهيب . الأفوكادو مليان دهون صح بس كلها دهون غير مشبعه ومفيده جدا .

.

الأفوكادو في الغالب ينباع قاسي وهو يستوي في البيت زي الموز . راح يستوي في الغالب في خلال ٤-٦ أيام . ممكن تسرعون العمليه بإنكم تحطون الأفوكادو في كيس ورق مع موزه في دولاب أو كذا برا الثلاجه . تعرفون إن الأفوكادو مستوي بإنكم تضغطون عليه من فوق و المفروض ينضغط شوي بس يكون فيه شوي مقاومه يعني ما يكون لين مره .

.

الأفوكادو أول ما ينفتح ويبدأ اللحم حقه يلمس الهواء يبدأ يتأكسد بفعل أنزيل موجود فيه ويسود زي التفاح بالضبط بس راح تصير في الأفوكادو بشكل أسرع بكثير . عشان نوقف الأنزيم هذا نغطي الوجه المقطوع بعصير ليمون هذا بيوقف الأنزيم و بكذا ما يسود.

.
نفتح الأفوكادو بإننا نقسمها نصين بالطول .

.

أفوكادو

.

الحين لازم نشيل البذره بدون ما نقعد نحفر حولينها زي ما ناس كثير يسوون .

.

جواكمولي

.

ندخل السكين بضربه جدا خفيفه زي كذا . بعدين نلف السكين وهي بتطلع بسهوله وبدون ما نخرب شكل الأفوكادو أو نخليها تسود أسرع .

.

أفوكدو للجواكمولي

.

الحين ناخذ نص ليمونه ونمسح الوجهين المقطوعات علطول عشان ما تسود علينا .

.

خلصنا من الأفوكادو نرجع للجواكمولي . الجواكمولي في الغالب معه طماط ، بصل أخضر أو بصل أبيض ، كزبره ، فلفل حار ، ليمون أخضر ، كمون وملح وفلفل .. بس ! .

.

المقادير ( وطبعا غيروها حسب الرغبه عادي ) :

.

حبة أفوكادو تشيلون اللحم منها بملعقة وتحطونه في صحن .

٣ ملاعق كبيره تقريبا كزبره طازه مفرومه

٣ ملاعق كبيره بصل أبيض أو أخضر

نص طماطه كبيره مقطعه مكعبات صغيره

ملعقتين كبار فلفل حار مقطع صغار بالبذور أو بدونها حسب الرغبه . لو تبين الجواكمولي حار خلي البذور أو شيليها براحتك

عصير ليمونه خضراء

رشه كمون

ملح وفلفل ..

زيت زيتون

.

الطريقة :

.

نهرس الأفوكادو بشوكه حسب النعومة اللي نبيها يكون (شخصيا أحبه شوي خشن موب مره مهروس بس حسب رغبتكم) . بعدين نحط عصير الليمون عليها ونخلط شوي . الحين نحط باقي المكونات ونخلط ونذوق إلين نوصل للطعم اللي نبي .

.



Follow TopChefCooks on Twitter

24 comments

2 pings

Skip to comment form

    • غير معروف on 15 مايو, 2014 at 5:06 ص
    • رد

    شيف ممكن اقترح عليك طريقة تسوي الجواكمولي ديب فيها بشكل جداً جميل

    تعلمتها من شيف مكسيكي وهي قريبه جداً من طريقتك

    حبة افوكادو
    ربع برتقاله
    ليمونه خضرا (LIME)
    كزبرة ملح وفلفل
    وهلابينو
    والي عطاها الطعم هو الطماطم مشويه ومتقشره

    وبالعافيه
    انا اضفت لها Cayeen pepper لاني مدمن سبايسي

    1. شكرا جزيييلا …

      النسخة اللي تتكلم عنها معروفة وهي تجي من منطقة أو مقاطعة يوكاتان yukatan وغالبا صديقك بتلاقيه يجي منها. بس المستخدم هنا حسب علمي موب أي برتقال لازم برتقال مر للطعم.

  1. اهلا
    شيف سؤالي بعيد عن الصوص
    انا اذا اسوي عصير الافوكادو احط معه ليمون ونفس الشي يصير اسود
    عكس اذا اشتريه من بره يظل بالايام ليييه

    1. غالبا يضيفون معه شي مضاد أكسده زي حمض أسكوربيك (فيتامين سي). طبعا عصير الليمون مضاد أكسده صحيح بس إذا أستخدمت الأسكوربيك أسيد ascorbic acid اللي هو تقريبا فيتامين سي بيعطي نتيجة أقوى بكثير وبدون حموضه إضافية.

    • غير معروف on 23 أكتوبر, 2012 at 3:20 ص
    • رد

    بغيت أسأل شيف اكثر من مرة جربت الترتار صوص بس دايما يطلع ثقيل وطعم المايونيز الله يديم النعمه يلوع الجبد ودي اسوي صوص مثل الصوص مال مطعم شرمبي الللي بالكويت وبلبنان احلى ترتار صوص ذقته عندهم لدرجة اني اطلب منهم مخصوص عشان الصوص مادري اذا عندكم مطعم شرمبي بالسعوديه عشان تذوقه وتعرف الطعم والقوام اللي اقصده ؟؟ هل المشكله بالميونيز اللي استخدمه استخدمت اكثر من نوع كله طلع ثقيل

    1. ما أعرف حق شرمبي بس أعرف أسوي صوص تارتار …. أنتي قلتي بنفسك المشكلة … طعم المايونيز يلوع الكبد !!! إذا كنتي تستخدمين مايونيز جاهز هذا اللي بيطلعلك مهما كان النوع .. المايونيز الجاهز ولا شي زي المايونيز الحقيقي وأعتقد هذا هو السبب.

      طبعا يمكن أسباب ثانيه زي كمية الإضافات اللي تحطين ووزن الملح والليمون وغيرها ممكن تكون هي السبب…

    • ABEER on 9 أبريل, 2011 at 6:59 م
    • رد

    ههههه خلاص انا اتصرف مع الكابر

    اقصد الجواكمولي

    وبعد اذنك ابي طريقة حلقات البصل مع البقسماط

    دورتها بالاسك مي ، ما حصلتها البحث هنا مو دقيق

    1. الجواكمولي ما يطول .. يوم بالكثير ويسود .

      حلقات البصل أطعم تكون بخلطة :
      حلقات بصل يفضل لو كان بصل حلو
      ٧٥ جرام طحين
      ملعقتين كبار نشا
      ١/٢ ملعقة صغيرة بيكنج باودر
      رشة بابريكا
      ١/٢ ملعقة صغيرة سكر
      بيضه
      ١٢٠ مل حليب

      أخلطي المواد كلها مع بعض بس بدون ما تخلطين أكثر من اللازم إلين تكونلك خلطة .

      الحين سخني الزيت على ٣٥٠ ..

      خذي حلقات بصل وحطيها في صحن فيه طحين ، شيلي الطحين الزايد من الحلقات بعدين غمسيها في الخلطة وبعدين أقليها إلين تقلب ذهبي وتستوي من جو

      لو تبين تسوينها ببقسماط سهل ، غطسيها بطحين مع نكهات ، بعدين بيض بعدين بقسماط .

    • ABEER on 9 أبريل, 2011 at 6:00 م
    • رد

    هههههههههه
    لا مو خس شي اخضر فوق طالع ع جمب

    وهذا (مايونيز تشيبوتلي اللي هو هلابينو مدخن ) كيف اسويله بليز:)
    وع فكره شريت كابر لقيت فيه زي القشره المفتوحه اشيلها ؟
    والخلطه كم تقعد بالثلاجه؟

    1. أهاااا مخلل خيار اللي فوق ..

      عندك تشيبوتلي ؟ ما يتسوى التشيبوتلي شي تشرينه جاهز من السوبرماركت بس مدري إذا تلاقينه في السعوديه ولا لأ هو يجي معلب زي الطماط وكذا تلاقينه في القسم المكسيكي .

      كابر عليه قشرة ؟ ما أعرف والله أول مره أسمع شي زي كذا ؟ أي خلطة اللي كم تقعد في الثلاجه ؟ إذا قصدك المايونيز يقعد أسبوع أسبوعين .

    • ABEER on 9 أبريل, 2011 at 2:06 م
    • رد

    والله شكراااااا كثير ربي يسعدك

    بس في خلطه بالكاتشب انت حاطها مع البرجر ابي طريقتها

    وابي اعرف ايش الشي الاخضر اللي مع البرجر

    1. ؟؟؟؟؟ أي كتشب ؟ كل شي مع البرجر كتبته في الموضوع .. الشي الأحمر هذا مايونيز تشيبوتلي اللي هو هلابينو مدخن . الشي الأخضر والله العالم تقصدين الخس ههه .

    • ABEER on 9 أبريل, 2011 at 12:12 م
    • رد

    يعطيك العافيه

    انا بكرا بسوي البرجر
    وبحط هذي الخلطه الجواكمولي بس المشكله الافوكادو قاسي 🙁 واتوقع اللي شريته مثل حقك
    بس بعد اذنك ابغـى خلطه ثانيه
    خلطة المايونيز مع الهالبينو
    وخلطة البيق ماك

    وتسلم يارب

    1. كل الخلطتين مايونيز مع أشياء ثانيه ..

      خلطة الهالابينو أخلطي على المايونيز هالابينو طازج موب مخلل ، و عصير لايم ، وشوي كمون .. طبعا هذي خلطة من راسي ! مدري إذا كنتي تقصدين شي ذقتيه في مطعم ولا لأ !

      البيج ماك بعد مايونيز مطعم بخردل ، بصل ، بودرة ثوم ، مخلل و خل .. زيدي على مايونيز بصل مقطع صغااااار مره ، مخلل خيار ، شوي خردل ، وشوي بودرة ثوم بعدين زيدي خل أبيض عادي إلين يوصل للطعم اللي تبين ..
      طبعا فيه ناس يقولون البيجماك سر هههه بس هذي كلها مكتوبه على العلبة حقت البيج ماك في المكونات.

    • غير معروف on 13 ديسمبر, 2010 at 11:08 ص
    • رد

    طلعنا من الصفحة بدبنق … وعصير مع الموز …. وعصير مع البرتقال …. ولوحدها بالليمون والزيت ….. وخيار آخر غير المايونييز …….. ياشيخ رووووووح … ربي يخليلك هاللّمة الحلوة 🙂

    1. حياك مرة أخرى هههه ..

    • غير معروف on 7 ديسمبر, 2010 at 4:04 م
    • رد

    طيب كان وريتنا الشكل النهائي ؟

    1. موجود ؟ تلاقينه في موضوع الفاهيتا تحت . شوفيها في الإضافات حقت الفهيتا . أخذت نص القشره حقت الأفوكادو وحشيتها فيها .

    • غير معروف on 7 ديسمبر, 2010 at 11:49 ص
    • رد

    انا احب الافوكادو كعصير مع موز وحليب
    اما كصلصات صراحه ماعمري غامرت وجربت

    يعطيك العافيه

    1. ؟؟؟؟؟ غريبه والله ؟ أغلب الناس ، إلا كل الناس العكس ههههههه . أغلب الناس يعرفونه كأكل أصلا لو قلتي لأحد عصير أفوكادو ملامحه تتغير ههههه … جربيه هنا ماراح تندمين .

    • غير معروف on 5 ديسمبر, 2010 at 4:39 م
    • رد

    الحلو فيها ممكن تستخدم بدل المايونيز في السلطات والشندويشات لمحبي التغيير او الحمية ممتازة لهم

    ام العصير فهي لذيذه جدا مع عصير البرتقال

    يسلمو شيف -_-

    1. الله يسلمك ….

      صح هي أخف بكثيييييير من المايونيز . ملعقة الجواكمولي تقريبا 25 سعره ، ملعقة المايونزي 90 !! … بس لاتنسين إنها تعطي طعم غير يعني ماتقدرين تعتبرينها بديل بديل .. هي بس شي غير …

    • شوكولانا on 5 ديسمبر, 2010 at 3:30 م
    • رد

    تسلم يدينك
    فعلا ديب ممتاز ومانستغني عنه

    واحلا شي بالافوكادو انها تصل مالح وحلو 🙂

    كل الشكر

    1. هلا والله …

      إيه فعلا يمديك تسوينها عصير وكذا … بس اللي صدق أحبه آكلها لحالها رهيييييبه مع ليمون وزيت زيتون وملح وفلفل .

  1. […] كنت بقدمه مع شي زي البرجر. الكتشب أكيد ، الخردل بعد ، الجواكمولي و الباربيكيو صوص رهيبيبن مع البرجر ، الصلصات المكسيكيه […]

  2. […] كنت بقدمه مع شي زي البرجر. الكتشب أكيد ، الخردل بعد ، الجواكمولي و الباربيكيو صوص رهيبيبن مع البرجر ، الصلصات المكسيكيه […]

اترك تعليقاً

لن ينشر بريدك الإلكتروني.

%d مدونون معجبون بهذه: