هلا والله …
اليوم السادس من فعالية حول العالم في ٣٠ يوم. المطبخ البرازيلي متشعب ومتنوع بشكل جدا كبير وهذا راجع لطبيعة السكان المختلفه أعراقهم و لطبيعة المكونات المتوفرة في كل منطقة. البرازيل كانت تحت الإحتلال البرتغالي لوقت طويل وهذا طبعا أثر على أكلهم غير كذا المهاجرين اللي جو في الفترات اللي بعدها أضافوا أشياء كثير للمطبخ البرازيلي.
الطبق اللي بسويه اليوم موب حلى تقليدي برازيلي بس فكرته مأخوذة من المكونات و الأكل البرازيلي وفيه الطعم اللي مربوط بالمطبخ البرازيلي وهذا اللي يهمني أكثر شي في الفعالية. الطبق عبارة عن أناناس متبل بدبس و ببهارات و مشوي في الفرن ومقدم مع إسكريم بنكهة جوز الهند و الدولتشي دي ليتشي مع قطع من “اللوز البرازيلي” Brazil nut و الريحان (الأناناس و الريحان رهيبيين مع بعض). أغلب الناس تعاملة مع الفواكه ما يتعدى أكلها نيه وهذا مافيه مشكلة، بس الطبخ يغير كل شي، نفس الفواكه راح تذوقونها بطعم وقوام غير تماما إذا أنطبخت. راح نسوي الإسكريم من الصفر وياليت تقرون موضوع الإسكريم اللي هنا قبل تبدون لأني ماراح أشرح بشكل مفصل مره.
المقادير :
للإسكريم :
كوبين قشطة خفق
علبة حليب جوز هند ( تقريبا كوب ونص )
نص كوب حليب
١٠ صفارات بيض
كوب سكر
رشة ملح
ملعقتين صغار من نكهة جوز الهند ( إختيارية )
وصفة كاملة من صوص الدولتشي دي ليتشي اللي سويت هنا
تقريبا نص كوب من اللوز البرازيلي Brazil nut محمص ومقطع قطع كبيرة
للأناناس :
أناناس مقشر ومقطع حسب الرغبة
١/٣ كوب دبس سكر
٣ ملاعق كبيرة زبدة
٨ حبات هيل كاملة
ملح وفلفل أسود
شوي يانسون + جوزة طيب + قرفة
ريحان وجوز هند محمص للتزيين ( إختياري )
* مقادير الإسكريم تقدرون تعدلون عليها لو تبون ، أقروا الموضوع عشان تعرفون كيف.
* اللوز البرازيلي للي ما يعرفه يجي شكله زي كذا :
* للوصفة هذي أختاروا أناناس وتأكدوا إنه طازج وإنه حلو موب حامض. إذا تبون تعرفون الأناناس الطازج أسحبوا وحده من الأوراق إذا طلعت بسهولة فغالبا الأناناس مستوي. الأناناس موب زي الموز أو التفاح بعد ما ينقطف من الشجر ماراح يصير أحلى ولا راح يصير ألين ولا راح يستوي أكثر عشان كذا تأكدوا إنكم تشترون أناناس مستوي من الأساس.
* دبس السكر هنا تقدرون تستخدمون بداله دبس تمر.
* أنا مستخدم هنا ريحان تايلندي لأني أحب طعمه مع الأناناس بس أستخدموا أي ريحان تبون عادي.
الطريقة :
للإسكريم :
نخلط حليب جوز الهند و قشطة الخفق و الحليب في قدر ونخليه يطبخ إلين يبدأ يغلي بس.
في صحن ثاني نخفق صفار البيض و السكر و الملح بخفاقة بيض إلين يتحول الخليط للون أفتح.
نبدأ نخلط خليط الحليب و الكريمة شوي شوي عالبيض ، ملعقة كبيرة في البداية بعدين نزيد شوي شوي مع التحريك بإستمرار.
الحين نحط الخليط كله في قدر نظيف ثقيل ونضيف عليه خلاصة جوز الهند. نطبخ الكسترد على نار هاديه مع التحريك بإستمرار ( بدون توقيف أبدا ولا راح يتكتل ) إلين توصل حرارته ١٧٥ فهرنهايت إذا قسناه بميزان. إذا ما عندكم ميزان غطسوا ملعقة في الكسترد و سوا خط بأصبعكم في ظهر الكسترد ، إذا حافظ الخط على شكله يعني خلص الكسترد.
صفوا الكسترد في صحن ثاني محطوط في حمام ثلجي ( عشان نبرده بسرعة ) وبعد ما يبرد دخلوه الثلاجه ١٢ ساعة عالأقل.
بعد ما يبرد الكسترد نحطه في مكينة الإسكريم حسب التعليمات اللي تجي مع الكتاب حق المكينة. في آخر ٥ دقايق في المكينة حقت الإسكريم نحط الإضافات اللي هي الدولتشي دي ليتشي و المكسرات. الحين نطلع الإسكريم من المكينة ونحطه في علبه ونغطيه بشكل جيد بعدين ندخل الإسكريم الفريزر إلين يجمد تماما تقريبا ١٢ ساعة.
* اللي ما يقدر يسوي الإسكريم في البيت صح لا يسويه أهم شي لا يسوي شي مجمد ويسميه إسكريم !. إذا ماعندكم مكينة تقدرون تشترون إسكريم جوز هند من أي محل ممتاز وتخلونه يدفى شوي إلين يصير شوي لين بعدين تخلطون عليه بالملعقة دولتشي دي ليتشي و مكسرات زي ما سويت هنا وبس رجعوه الفريزر وهذا بيعطيكم إسكريم ممتاز.
للأناناس :
نحط رف الفرن على أعلى شي فوق بعدين نشغل الشواية.
في قدر صغير نطبخ الدبس مع الهيل و الزبدة إلين تذوب الزبده بعدين نخليه يطبخ إلين يثقل شوي تقريبا ٥ دقايق.
ندهن وجهين الأناناس بشوي زيت بعدين نرش عليهم شوي ملح وفلفل أسود و البهارات اللي هي القرفة و جوزة الطيب و اليانسون.
نحط الأناناس في صينية فرن مغطية بقصدير بعدين ندخلها الفرن في الرف العلوي يعني قريبة من الشواية. نشوي الأناناس إلين يقرب يستوي الوجه الأول بعدين ندهنه بشوي من التتبيلة ونرجعة الفرن إلين يبدأ الوجه الأول يتكرمل. نقلب الأناناس وندهن الوجه الثاني بالتتبيلة ونرجع الأناناس الفرن إلين يتكرمل الوجه الثاني.
نحط الأناناس المشوي بصحن ونقدمة مع الإسكريم و الريحان و نرش عليه من تتبيلة الدبس الباقية.
22 comments
2 pings
Skip to comment form ↓
غير معروف
12 ديسمبر, 2012 الساعة 3:34 م (UTC 3) Link to this comment
شيف دبس السكر هو نفسه سكر الجلوكوز
يجي زي العسل ثقيل لونه ابيض
Top Chef
12 ديسمبر, 2012 الساعة 3:45 م (UTC 3) Link to this comment
لا الجلوكوز غير. دبس السكر يجي زي العسل ، اسود وثقيييل وشوي مر
غير معروف
1 ديسمبر, 2012 الساعة 6:29 م (UTC 3) Link to this comment
انا ما لقيت لوز برازيلي !!
ايش ممكن استخدم بداله
Top Chef
1 ديسمبر, 2012 الساعة 7:03 م (UTC 3) Link to this comment
لوز عادي أو بيكان أو جوز كلهم حلوين هنا
الاوتار
7 ديسمبر, 2011 الساعة 1:34 م (UTC 3) Link to this comment
ياسلام عليك مثل ذوقي في الايس كريم هاجن داز افضلة شكراً
الاوتار
7 ديسمبر, 2011 الساعة 10:51 ص (UTC 3) Link to this comment
مشكور اخوي على الوصفة انا الحين سويت صوص الدولتشية والايسكريم بشترية جاهز فيه نوع تنصحني فيه وبرش زيادة على الاناناس سكر اسمر وزنجبيل وش رايك
Top Chef
7 ديسمبر, 2011 الساعة 1:22 م (UTC 3) Link to this comment
الآيسكريم أحسن أنواع هاجن داز أو موفنبيك فانيلا وبعدين أخلط عليها اللي تبي لو تحب. السكر البني و الزنجبيل حلو ليش لأ ماشين مع النكهة.
hano
28 أكتوبر, 2011 الساعة 11:25 م (UTC 3) Link to this comment
تسلم يدينك
وصصصصفه ولآ آحلى
انا من آشد تابعينك
طبخ
8 يونيو, 2011 الساعة 3:11 م (UTC 3) Link to this comment
ماشاء الله إبداع
غير معروف
7 يونيو, 2011 الساعة 11:09 ص (UTC 3) Link to this comment
اسفه على الازعاج بس حابه اوضح لك قصدي
هذا اقتباس لك من موضوع الايس كريم (.
ﻓﻴﻪ ﻧﻮﻋﻴﻦ ﻣﻦ ﺃﺳﺎﺳﺎﺕ ﺍﻹﺳﻜﺮﻳﻢ:
*ﺇﺳﻜﺮﻳﻢ ﻓﻴﻼﺩﻟﻔﻴﺎ:ﻳﻜﻮﻥ ﺍﻷﺳﺎﺱ ﻋﺒﺎﺭﺓ ﻋﻦ
ﻣﻨﺘﺠﺎﺕ ﺃﻟﺒﺎﻥ ﻭﺑﺪﻭﻥ ﺃﻱ ﺑﻴﺾ. !),
انا ابي هذا الاساس اللي يكون بحليب بس من غير بيض ممكن
Top Chef
7 يونيو, 2011 الساعة 11:18 ص (UTC 3) Link to this comment
طيب قلتلك سويي نفس الشي بس بدون بيض ؟
يعني كوبين حليب وكوبين قشطة وطعميها زي ما تسوين في إسكريم الكسترد و بعدين برديها وبعدين في المكينة بس …
عمة احلى بنوته
6 يونيو, 2011 الساعة 11:08 م (UTC 3) Link to this comment
لو سمحت ممكن طريقة الايس كريم اللي بالالبان بس من غير استخدام البيض.
في مكونات الايس كريم الجاهز الاقي بذور اللفت وشراب الذره فاايش الغرض منها .
Top Chef
7 يونيو, 2011 الساعة 3:28 ص (UTC 3) Link to this comment
اللبان ماله علاقة بعمل الإسكريم . تقدرين تسوين إسكريم بدون بيض بدون أي إضافه ثانيه ، لو قريتي الموضوع شرحت هذي النقطه زيين .
اللبان ينحط في الإسكريم عشان النقل ، كون الإسكريم يتفرز بعدين ينقلونه بسيارات وبعدين للمحلات ، الإسكريم في هذي المراحل أكيد يذوب شوي ويرجع يجمد من جديد وهذا يكون بلورات ثلج كبيره وهذا يعني إسكريم خشن أكثر. عشان يخلون الإسكريم يستحمل النقل شوي يحطون لبان معه بس هذي الفكره منه. طبعا هذا موب شي ماله أثر على الجوده ، اللبان يلعب في قوام الإسكريم ويخليه غريب لأنه من إسمه لبان وهذا واحد من الأسباب اللي يخلي إسكريم البيت أطعم و أفضل قوام.
بذور اللفت غالبا والله أعلم الغرض منها اللون . منيب متأكد من المعلومه بالضبط بس أعرف إن واحد من الإضافات حقت الأكل هي اللون الأحمر الطبيعي و اللي مستخرج من اللفت . شراب الذرة له كذا فايده ، أولا هو أحلى من السكر وفي نفس الوقت رخيص وهذا يعني تكلفه أقل . غير كذا هو سكر سايل وهذا يعني إنه يخلي الإسكريم يذوب أبطأ وهذا يعني إنه يستحمل النقل لفترات أطول. السبب الثالث هو إنه ما يحتاج يتذوب في أساس الإسكريم كونه سايل أصلا ، لو حاولتي تذوبين كمية سكر كبيره في سائل بارد بتلاحظين إنه ما يذوب و لازم تسخنينه وهذا يعني فلوس وتكلفه بس شراب الذره يقدرون يخلطونه مع الأساس علطول وهو بارد. غير كذا هو يعطي لمعة للإسكريم.
غير معروف
28 مايو, 2011 الساعة 11:15 ص (UTC 3) Link to this comment
السلام عليكم
اش اسم الة الايسكريم ؟؟ يعني اش الماركة …
وشكرا ..
Top Chef
28 مايو, 2011 الساعة 11:25 ص (UTC 3) Link to this comment
وعليكم السلام ..
شوفي الرابط اللي حطيت تكلمت فيه عن المكاين
NAS
21 مايو, 2011 الساعة 1:35 م (UTC 3) Link to this comment
الوصفة واضحة زي الشمس .. لكن في اسئلة تسأل لمجرد السؤال لااا غير ..
غير معروف
17 مايو, 2011 الساعة 6:03 ص (UTC 3) Link to this comment
ممكن اعرف كيف قطعت الاناناس بده الشكل ؟؟
وماينفع يتاكل مدور؟؟
والله يعطيك الف عافية
Top Chef
17 مايو, 2011 الساعة 6:43 ص (UTC 3) Link to this comment
ينفع يتاكل مدور ، مثلثات ، مكعبات .. أي شكل تحبين …
تاخذين حلقات الأناناس وتشيلين الزوائد منها وتخلينها مربعة كذا
شقآوة فضل
12 مايو, 2011 الساعة 11:43 ص (UTC 3) Link to this comment
يسلمو فكرة غريبة
الله يديك العافيه يارررب ~
ام صبا
10 مايو, 2011 الساعة 6:49 م (UTC 3) Link to this comment
يمي يمي
تعجبني الفواكة المشوية
زي الموز والخوخ والاناناس
تسلم ويعطيك العافية
Top Chef
10 مايو, 2011 الساعة 7:18 ص (UTC 3) Link to this comment
شي حلو جدا
طريقة اعجبتني كثير ولي تجربه ان شالله
كل الشكر توب على هالجولات … تسلم يدينك
um nwaf
10 مايو, 2011 الساعة 5:48 ص (UTC 3) Link to this comment
فعالية اليوم من العيار الثقيل..وشغل محترفين بجد
يعطيك العافية
ختام فعالية حول العالم في ٣٠ يوم …. » Top Chef Blog .. مدونة توب شيف
27 ديسمبر, 2012 الساعة 5:10 ص (UTC 3) Link to this comment
[…] […]
ختام فعالية حول العالم في ٣٠ يوم …. « مدونة توب شيف … Top Chef
5 يوليو, 2011 الساعة 9:26 م (UTC 3) Link to this comment
[…] […]