«

»

أبريل 10 2011

ماشد بوتيتو خضراء .. Green Mashed Potato

هلا والله …

 

الماشد بوتيتو واحد من أسهل الأطباق اللي تقدرون تسوونها وواحد من أسهل الأكلات اللي ممكن يتعدل عليها بعد. الأكله بإختصار شديد عبارة عن بطاطس مطبوخ بعدين مهروس مع أي منتج ألبان ودهن بس. كل واحد يحب الماشد بوتيتو حقته غير فيه ناس يحبونها ناعمه وفيه ناس يحبونها مع قطع وطبعا النكهات عد و أغلط ! كل واحد يحط معها أشياء غير. أهم شي في الماشد بوتيتو هو إننا ما نطبخ البطاطس أكثر من اللازم ، نهرسها وهي حاره ، نضيف السوائل الثانيه وهي حاره . لو بردت الباطس بتبدأ تصير شمعيه وطعمها قريب من الصمغ وعشان كذا مهم تنهرس وهي حاره.

 

الماشد بوتيتو اللي بسويها هنا بتكون ناعمه مره ومطعمه بزيت زيتون وكراث وبقدونس . مره ثانيه أعيد .. كل واحد يسويها بالطعم اللي يبي أنا أخترت هذي النكهات عشان تمشي مع الأكله الرئيسية اللي بقدمها معها.

 

المقادير :

 

لزيت الكراث و البقدونس :

كوب كراث مقطع

نص كوب بقدونس

زيت زيتون

 

للبطاطس :
كيلو بطاطس ( تقريبا حبتين كبار ) مقشره ومقطعه كبار

كوب قشطة خفق

ملح وفلفل أبيض

 

 

الطريقة :

 

في خلاط نحط الكراث و البقدونس بعدين نغطيه بزيت الزيتون ونفرمهم مع بعض زين . نصفي الزيت بصفايه ناعه ونحفظة في الثلاجه إلين وقت الحاجة . الزيت هذا رهيب مع أشياء كثير بس أهم شي إنه ينحفظ في الثلاجه ولا تحفظونه أكثر من أسبوع . أنا هنا سويت الزيت بكراث وبقدونس بس تقدرون تستخدون أي أي أعشاب تشوفون إنها بتعطي طعم حلو مع البطاطس ..

chive oil

الحين في قدر نحط البطاطس ونغطيها بمويه بارده وشوي ملح بعدين نسلقها على سلقة جدا هاديه إلين تستوي البطاطس . نعرف إنها أستوت بإننا ندخل سكين صغير في أكبر قطعه إذا دخلت بسهوله يعني أستوت .

 

mashed potatoes

 

 

بعد ما تستوي البطاطس نصفيها من المويه ونرجعها لنفس القدر اللي سلقناها فيه ( بعيد عن النار طبعا ) . الهدف هنا هو إن الحراره الباقيه اللي في القدر تبخر المويه الزايده اللي في البطاطس.

 

الحين في قدر ثاني نسخن قشطة الخفق . و القشطة قاعده تحتر نبدأ نهرس البطاطس . نقدر نستخدم هراسة بطاطس عاديه أو أحسن بعد لو عندكم الطاحونة اليدويه زي اللي سويت فيها صوص الطماط الأساسي شكلها يكون زي كذا :

 

tomato sauce

الطاحونة صورتها في اليسار آخر شي

 

mashed potato

 

 

الحين نحط قشطة الخفق الحاره ونخلط إلين نوصل للثقل اللي نبي. الماشد بوتيتو راح تشرب القشطة وتثقل زيادة فدايما خلوها أخف مما تبغون وهي بتثقل بعد فترة. بعد ما نحط كمية القشطة اللي نبي نبدأ نحط من الزيت إلين توصل للطعم اللي نبي . آخر شي نعدل الملح و الفلفل حسب الرغبة ونكون خلصنا .

 

green mashed potato

 


عن الكاتب

Top Chef

10 comments

Skip to comment form

  1. ra

    يعطيك العافية على هاد الطبق
    استفسار بسيط انساء الله
    اقدر استخدم كميات كبيرة قصدي يعني بالسلق اقدر اسلق كميات كبيرة واخليها في الفريزير او الثلاجة واطلعها عند الحاجة واسخنها واكمل الوصفة عادي
    وهل هالد الاشي بيفرق كثير في الطعم ؟
    وشكرا

    1. Top Chef

      الله يعافيك.

      يمديك تهرسين البطاطس وبعدين تحفظينها في الثلاجه ومتى ما بغيتي تحطينها عالنار مع شوي كريمة وتسخنينهم مع بعض إلين يوصلون للقوام اللي يعجبك (هذا اللي يسوونه كل المطاعم). الصراحة القوام راح يختلف شوي لو كنتي تدورين أففففضل نتيجة بس أغلب الناس ماراح تفرق.

      الفريزر ممكن بس موب حل مفضل أبدا.

  2. a

    السلام عليكم و رحمة الله و بركاته

    جربت الماشد و كان طعمه جميل جداً بس عندي شوية أسئله :

    بالنسبة للزيت الكراث أقطعه كامل مع العرق الأخضر ولا بس أخذ الجزء الأبيض ؟

    البطاطس دايم يقولون إنها أسرع شي ينطبخ وما تأخذ وقت لكن دايم يوم أسلقها تجنني ما تستوي بسرعه أحياناً تأخذ معي فوق الساعه أقل شي هل هذا ممكن يكون إن نوعيه البطاطس رديئه ولا هالقاعده ما تنطبق على البطاطس ؟

    الماشد ما يطلع معاي ناعم ومافيه إي كتل مثل اللي إنت مسويه ماشاء الله + إنه ما طلع معي لونه أخضر وين المشكله ؟

    يعطيك العافيه

    1. Top Chef

      وعليكم السلام و الرحمة ….

      لا لا الكراث اللي مستخدم هنا هو الكراث العادي النحيف موب الكراث الهندي العريض الكبير. عموما ينفع تستخدمين هذاك وبيعطي طعم مختلف شوي بس حلو بس ماراح يعطي نفس اللون.

      لا البطاطس أبدا موب أسرع شي ينطبخ بس عموما ما ياخذ ساعة إلا إذا عندك كمية جدا جدا جدا كبيره. مدري بس هل تخزنين البطاطس في الثلاجه ؟ جربي قطعيها أصغر ، حطيها في مويه بارده مع شوي ملح وخليها توصل غليه خفيفه بس ، إذا دخلتي فيها سكين ودخلت وطلعت بسهوله فهي مستويه لا تخلينها أكثر من كذا.

      الماشد الناعم موب مشكلتك لحالك هذي مشكله معروفه في الطبخ صدقيني ناس كثييييير يعانون منها. لو طبختي البطاطس صح وهرستيها زي ما هرستها وهي حاره بتجيك ناعمه. لو تبين أنعم بعد لا تستخدمين اللي أنا مستخدم أستخدمي صفايه جدا جدا جدا ضيقه ومرري البطاطس عليها وهي حاره أهم شي.

  3. غير معروف

    يارب يسلم عمرك ويحقق لك كل امالك زي ماتفيدنا
    من زمان وانا ابيه

  4. غير معروف

    احلى واغلى سلام لك

    يا حبي لهذا الطبق اغليه فعلا يمكن متاثرة بالافلام يجوز .لكن مافكرت اني اغير كثير غير اضافات بسيطة ريحان او بهارت ايطالية . لاني احب النكهة الاصلية للبطاطس . وما اخفيك غالبا الغي الزبدة لاني ما احب النكهة دسمة .

    لكن هذا مايمنع نجرب طريقتك وراح اجربها بعون الله اليوم

    سؤال لو تكرمت :احيانا اكون اضفت كمية الحليب كثيرة شوي وطلع لين او طري وشلون اخليه يرجع او يتماسك

    يعني انا احبه يكون ثقيل حبتين وهل الحليب هنا افضل ولا قشطة الخفق ؟؟

    تسلم لنا وتسلم اياديك وتدوم لنااطباقك .الله يحفظك من كل شر

    1. Top Chef

      هلا والله …

      البطاطس مالها طعم قوي خاص فيها بالضبط زي الرز الأبيض أو غيره .. عشان كذا هي ممتازة كطبق جانبي كونها تشرب الصوصات اللي تطلع من الأكلات الثانيه . عشان كذا نطعم البطاطس دايما بأي نكهة حتى لو كانت شي بسيط زي فلفل أبيض .

      بالنسبة للزبدة للأسف هي ضرورية في حالة البطاطس المهروسه .. موب شرط زبدة زي هنا مثلا حطيت زيت المهم إنه لازم دهن في الموضوع . سواء كان زبدة ، زيت أو قشطة خفق أو حتى قشطة خفق خفيفه وهو أقل شي تقدرين تحطين المهم لازم زيت .. السبب يطول شرحة هنا بس عشان أسهلها عليك شفتي الصمغ حق ورق الجدران هذا تقريبا تقريبا بطاطس بدون دهن ههههه .. المسألة لها علاقة بالنشا وكيف يتوزع ويثقل السوائل بوجود الحراره وكيف إذا برد يصير صمغ ..

      في الحليب الأفضل تزيدين شوي شوي إلين توصلين قوام أخف من اللي تبين بشوي بعدين تخلينه وهو بيثقل وهو يبرد شوي . لو زدتي الحليب خليه على جنب يبرد شوي وبيثقل لحاله لا تخافين ..

      الفرق بين الحليب وقشطة الخفق هو نسبة الدسم بس إذا تقدرين تحطين حليب وزبدة أو قشطة خفق لحالها وخلاص أو تقدرين تحطين قشطة خفق و زبدة مع بعض عشان تسوين ماشد بوتيتو كريمية مره هي مسألة راجعلتك .. أنصحك تجربين وتذوقين بنفسك وش الفروقات بينهم .

  5. Top Chef

    شي عجيب .. احبه موت >> وبكل النكهات :)

    تسلم ايدك وعساك ع القوه

  6. غير معروف

    يا سلام عليك شيفنا ..

    دايما ابغى اجرب نكهه مختلفه مع الماشد بتيتو .. سويتها مره مع صلصة البابريكا وكانت حلوه..

    اكيد رح اجربها مع خلطة البقدونس والكراث هذي..كتغيير عن الطعم التقليدي

    يعطيك العافيه شيفنا من جد استفدنا منك كثييييير ..

    1. Top Chef

      الماشد بوتيتو بالذات لو تسوينه كل يوم لآخر يوم في حياتك تقدرين تسوينه كل يوم بطعم جديد .. أسهل شي في العالم يتعدل عليه و كونه بطاطس يمشي مع كل أنواع الأكل تقريبا ..

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: