«

»

سبتمبر 30 2012

الجارام ماسالا .. Garam Masala

هلا والله ….

.

الجارام ماسالا خليط بهارات هندي يستخدم بكثرة في كثير أكلات هندية. الترجمة الحرفية للإسم هي جارام وتعني حار أو بالأصح مبهر spicy وماسالا وتعني خليط. يعني هي تعني الخليط المبهر أو الخليط الحار. الجارام ماسالا موب حار بمعنى إن طعمه حار ولاذع بس هو قوي بطعم البهارات.

.mm

ممكن يستخدم الجارام ماسالا على شكل بهارات كاملة وهنا ممكن ينحط في بداية الطبخ أو ممكن ينطحن وهنا غالبا ما ينحط في نهاية الطبخة بحيث يعطي نكهة بهارات جديدة غير مطبوخة عالأكلة (الحرارة تغير كل شي !). فيه ملايين ملايين النسخ للجارام ماسالا في الهند ومافيه أي وصفة أحد يقدر يقول إنها الصحيحة أو الأصلية. وصفات الجارام ماسالا تختلف حسب المكان (جنوب الهند يستخدم بهارات غير الشمال مثلا) وحتى حسب البيت ، تقريبا كل بيت في الهند عنده وصفته الخاصة فيه واللي يفتخر فيها. تقريبا جميع الوصفات تشترك في بعض المكونات زي الكمون و الكزبرة الناشفة و القرنفل و الهيل و القرفة و الفلفل الأسود. نسب البهارات هذي لبعض والبهارات الإضافية اللي ممكن تنضاف هي اللي تسوي كل الفروقات بين الأنواع.

.

شراء الجارام ماسالا مطحون جاهز جريمة كبيرة برأيي ! أولا لأن عمله في البيت جدا جدا سهل وثانيا لأن المطحون ماله أي طعم مميز هذا غير إن نكهته جدا ضعيفة لأنه مطحون من فترة طويلة في الغالب. أنا جربت عدة عدة وصفات للجارام ماسالا بس زي هذي اللي بنزل تحت ماشفت ! مقاديرها كلها متوفرة وبسهولة هنا و طعمها عطري والبهارات موزونه صح مافيه شي يبان أكثر من الثاني.

.

المقادير :

.

٣ ملاعق كبيرة كمون حب

٣ ملاعق كبيرة كزبرة حب

٢٠ حبة هيل أخضر كامل

١٠ حبات هيل أسود كامل

١٠ كسر قرفة طول كل واحد ١ إنش تقريبا

ملعقتين كبار قرنفل حب

٣/٤ فص جوزة طيب مكسر بالسكين كسر كبيره

ملعقة كبيرة فلفل أسود حب

٤ أوراق غار مكسرة

ملعقة كبيرة ورق ورد مجفف (طبعا حق الأكل)

ملعقة كبيرة ونص شمر حب

.

* الهيل الأسود يختلف تماما في الطعم عن الهيل الأخضر هو متوفر عند أغلب العطارين وحتى في أي سوبرماركت أو حتى في البقالات الصغيرة موجود.

.

* الورد المجفف يجي شكله زي كذا :

.

ورق ورد.

هذي العلبة أشتريتها من الدانوب بس ما أعتقد إنه شي نادر أو صعب تلاقونه ؟

.

.

الطريقة :

.

نخلط كل البهارات اللي فوق مع بعض بشكل جيد ونحطها في علبة تتقفل بإحكام مع البهارات.

.

garam masala.

نطحن البهارات حسب إحتياجنا في كل طبخة. نحط شوي من البهارات في مقلة على حرارة وسط ونحمصها شوي إلين نبدأ نشم ريحتها بعدين نشيلها من النار و نخليها تبرد وبعدين نطحنها ونستخدمها.

.

garam masala.

Follow TopChefCooks on Twitter

عن الكاتب

Top Chef

21 comments

2 pings

Skip to comment form

  1. ام لين

    لو سمحت توب شيف
    بسال عن استخدامات الهيل الاسود غير الجرام مسالا
    لايش ممكن نضيفه؟؟

    1. Top Chef

      يستخدم بكثرة في المطبخ الهندي. كالعادة موب لحاله غالبا معه عدة أنواع ثانية من البهارات.

  2. tota

    شيف عندي سؤال بالنسبة للبهارات الصحيحة زي حقتك مخلوطة مع بعض لما اخذ منها ملعقة كيف أضمن ان كل الكونات موجودة وبالنسب الصحيحة ؟؟

    1. Top Chef

      سؤال جدا وجيه. للأسف صعب جدا خصوصا اذا كمية جدددا بسيطة

      1. tota

        طيب والحل قصدي انت شو بتعمل في هذه الحالة

        1. Top Chef

          غالبا أطحن كمية أكبر من اللي أحتاج وأحاول أكسر البهارات الكبيره قدر الإمكان.

  3. ساره

    جوزة الطيب مو يقولون ممنوع بالسعوديه وهل فعلاً مايجوز

    1. Top Chef

      لا متوفرة عادي.

      مممم فيها خلاف هي ، لو أشوفها حرام ما نزلتها شخصيا.

    2. غير معروف

      عفواا على المداخلة بس حبيب أستفسر ليه جوزة الطيب يقولون انها حرام ؟؟

      1. Top Chef

        مهلوسة بكميات كبيرة

  4. غير معروف

    اخوي الورد المجفف هو اسمه الورد المحمدي ؟؟ عندي نفسه بس يجي نفس الجوري مسكر اوراقه مو مقطع مثل هذا ؟

    1. Top Chef

      والله ما أعرف الصراحة إذا شكله زي هذا ففي الغالب هو هذا .. أي ورد مجفف صالح للأكل ممكن تستخدمينه عموما وهذا ترا موب مفرق أنا أفركه عشان أفرق الورق عن بعض.

  5. تيماء

    شيف تسلم ايدينك ،، جداااا اسعدتنا بالمواضيع اللي تتعلق بالمطبخ الهندي لأنه جداً مطلوب ونحبه ونستمتع فيه
    بعد إذنك ياشيف خالد
    بالسوبرماركت فيه أوراق خضراء صغيرة ناحية الخضرة بيقولولها ورق كاري
    وحتى لما بطلب من شيزان بشوفها وسط الايدامات والبرياني
    ونكهتها جداً جميلة ومميزة
    هل ما تفضل تستخدمها ؟
    ولا ده شئ راجع حسب المنطقة والذوق

    1. Top Chef

      ورق الكاري معروف ما يحتاج .. أستخدمته في وصفة دجاج كاري مدراس في المدونة لو دورتيها تلاقينها.

      ورق الكاري مستخدم بكثره في الطبخ الهندي بس هذا ما يعني إني أحطه في كل شي. هو مستخدم أكثر شي في أكل جنوب الهند.

  6. شوشو

    اخوي طيب ابي اسوي كميه كبيره بعلبه مقاس وسط كم أحط لأني فاششله بالقياس

    ثاني شغغله أحمصها واطحنها ويراجعها العلبة

    ولا وقت لطبخ فقط

    وكم استخدم ملعقه منها وقت الطبخ !!

    1. Top Chef

      سويي كمية وحده من اللي فوق واذا ما كفاك ضاعفي المقادير حسب الرغبة.

      طريقة الاستخدام زي ما شرحت في الموضوع

  7. غير معروف

    مشكور على جهدك انا اضيف معاها nutmeg و شي يشبه الحلبة بس لونه احمر، فرق اللي يتسوى بالبيت عن اللي في السوق

    1. Top Chef

      موجود معها جوزة طيب ؟

      يشبه الحلبه بس لونه أحمر ؟ ما أعرفه والله …

  8. غير معروف

    رائع.،،

  9. وكالة

    شكراااااااااااااا لك

  1. البتر تشيكن الهندي (دجاج بالزبدة) .. Indian Butter Chicken » Top Chef Blog .. مدونة توب شيف

    […] « الجارام ماسالا .. Garam Masala […]

  2. البتر تشيكن الهندي (دجاج بالزبدة) .. Indian Butter Chicken « مدونة توب شيف … Top Chef

    […] ١/٢ ملعقة صغيرة جارام ماسالا […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: