الماكرون ( الماكرون الفرنسي ) …. French macaron

هلا والله …..

الماكرون الفرنسي هو المحطة الأخيره في مواضيع الماكرون اللي نزلتها الفترة اللي راحت . هذا الحلى ما أنتشر حولين العالم وصارت الصجه و اللجه عليه إلا قريب ، ما أتكلم عن الإنتشار في السعوديه بس أنا أتكلم عن الإنتشار العالمي . من زمان كان الماكرون معروف بس في فرنسا تقريبا وفيه بعض المحلات اللي تسويه برا فرنسا . بس مع الوقت بدأ ينتشر في كل أنحاء العالم وبشكل سريع بعد .هذا فتح مجال كبير للإبتكار وصرنا نشوف نكهات جديده وغير مألوفه .


الوصف و التركيب


الماكرون عبارة عن كوكيز بياض بيض قريب جدا للماكروون الأمريكي . كل حبتين كوكيز في الغالب ملصقة بحشوة عشان تكون الماكرون اللي نعرفه .

الماكرون مفروض يكون لذيذ ( يعني مافيه ريحة أو طعم غريبة ) ولين ويتكسر و يذوب في الفم من أول قضمة بدون ما تواجهون أي صعوبه من إنه يكون ناشف أكثر من اللازم أو يكون لين بحيث الحشوه تطيح و أنتم ماسكينة .

ماكارون

هذا شكل الكوكيز حق الماكرون . نلاحظ هنا إن القبة ناعمة ومتماسكة بدون أي تشققات . نلاحظ بعد شي مهم جدا اللي هو الرجول أو الياقة حقت الماكرون . الحجم أو قطر الحبة يتراوح حسب الرغبة بعض الماكرون يكون كبار مره وبعضة يكون صغير مره ينوكل مرة وحدة . شي مهم بعد هو إن الكوكيز ما يكون فيه فراغ هواء كبير تحت القشرة . الماكرون موب صعب أبدا بس هو موب واحد من الأشياء المتسامحة مرة في الأخطاء في التفيذ .



المكونات و الأدوات


الماكرون الفرنسي يتكون من بياض بيض ، دقيق لوز ، سكر مطحون وسكر عادي . هذا في الأساس طبعا بس ألوان الأكل و إضافات لتغيير أو تعديل النكهة بعد ممكنة . طريقة العمل بإختصار شديد هي إننا راح نسوي مرانج عادي ببياض البيض و السكر العادي وبعدين نخلط عليهم اللوز و السكر المطحون عشان نكون الخليط .

* البيض :

في الماكرون راح نستخدم بس بياض البيض . البياض هنا راح نسوي منه مرانج فرنسي أو إيطالي عشان يوفر الرفع للماكرون حقنا . عشان كذا مهم إننا نسوي أفضل و أقوى مرانج نقدر عليه .
البيض المستخدم دايما يكون على حرارة الغرفة ومخفوق بنفس الشروط اللي حطيت في موضوع المرانج الفرنسي . طريقة الماكرون بالمرانج الإيطالي تستخدم أحيانا ومفضلة من طباخين كثير كون المرانج الإيطالي ثابت أكثر و راح يستحمل أكثر و هذا يعني فرص نجاح أكبر للماكرون . بالنسبة للطعم المرانج الإيطالي و الفرنسي واحد . طريقة الماكرون بالمرانج الإيطالي هي المفضلة بعد في الحالات اللي يكون الجو رطب فيها كون المرانج الفرنسي يتأثر بقوة بالرطوبة حقت الجو .
لو كان الوقت موب مشكلة وراح تسوون الماكرون بمرانج فرنسي يفضل إنكم تتركون البياض بعد ما توزنونه على حرارة الغرفة ٢٤ ساعة . هذا راح يعطي تأمين للماكرون حقكم شوي ، البيض وهو قاعد راح يتبخر جزأ من المويه اللي فيه وهذا يعني مرانج ثابت أكثر . هو موب شرط أساسي للنجاح بس حلو الواحد ياخذ تأمين .

* اللوز :

اللوز هو النكهة الأساسية للماكرون الفرنسي . اللوز المستخدم هو اللوز المطحون الناعم . نعومة اللوز هي اللي راح تخلي القبة حقت الماكرون ناعمة بدال ما تكون خشنة . لو كان اللوز فيه قطع كبيره يمكن تمنع المرانج ينفش ويرفع الماكرون .
أكثر الناس يسأل من وين أجيب اللوز ؟ اللوز المطحون متوفر ومنتشر في كل سوبرماركت أو محل مكسرات أهم شي تأكدوا إنكم تنخلون اللوز قبل الوزن . ممكن تبديل جزأ من اللوز بنوع مكسرات ثانيه مطحونة ( بيكان ، جوز ، صنوبر ، فستق ، كاجو ولو إنه صعب ، مكادميا … إلخ ) أو حتى بودرة كاكاو ( عشان تسوون ماكرون بالشكولاته ) أو جوز هند ( عشان تعطي طعم جوز هند للماكرون ) . في حالة التبديل مافيه قاعدة معينة جربوا بكمية وبعدين زيدوا أو نقصوا حسب النتيجة المطلوبة . أبدأوا مثلا بربع وزن اللوز وبعدين شوفوا النتيجة ، هل أثر التبديل على نفش الماكرون ؟ هل الطعم و اللون المرغوب من التبديل واضح ولا لأ ؟ إذا مثلا لقيتوا إن الماكرون ما نفش زين معناها إن التبديل يمكن أثر بالسلب نقصوا الكمية . لو لقيتوا إنه نفش بس مثلا مافيه طعم كاكاو واضح معناها إنه يمديكم تزيدون الكمية عشان تزيدون الطعم و اللون .
جودة اللوز و المواد المستخدمه عموما لها تأثير كبير على طعم الماكرون ، تذكروا إن هذا هو النكهة الأساسية له وهذا اللي بيعطيه كل الطعم عشان كذا تأكدوا إن اللوز المستخدم من نوعية جيده وإنه موب خربان . المكسرات عموما كونها مليانه دهون هذي الدهون تتفكك و تتأكسد وتعطي نكهات وروائح سيئة . الطحن يسرع هذي العملية عشان كذا لو كان عندكم لوز باقي ( أو أي مكسرات عموما ) أحفظواه في علبة تتقفل بإحكام على حرارة الغرفة في مكان بارد وجاف حوالي شهر أو في الثلاجه 3 شهور أو أفضل حل في الفريزر إلى سنة .
طحن اللوز في البيت ممكن و جربتها للماكرون ونفعت عادي بس هي عملية شوي متعبة وغير عملية أبدا . أسهل حل هو شراء اللوز مطحون جاهز . الميزة الوحيدة من طحن اللوز في البيت هي إنكم متأكدين من جودة اللوز . المشكلة في طحن المكسرات في البيت هو كمية الدهن العالية فيها . إذا طحنا المكسرات الخلاط يسخن المكسرات وهذا يطلع الدهن فيها ويخليها تتحول لمعجون بدال ما تتحول لبودرة . إذا وصلنا مرحلة المعجون خلاص مافيه رجعة .

هذي أفضل طريقة لطحن المكسرات في البيت :

١ـ إذا كانت المكسرات مقشرة روحوا للخطوة رقم ٣ علطول . لو كانت المكسرات المستخدمه عليها قشرها أول شي تسوونه هو إنك تحطونها في مويه مغليه حوالي ٣٠ ثانية بعدين علطول شيلوها من المويه وحطوها على فوطة مطبخ كبيرة وغطوها بنص الفوطة الثاني . الحين أفركوا المكسرات بالفوطه زيييين وراح تلاقون القشر طاح .

٢ـ شيلوا المكسرات من الفوطه على فوطة مطبخ ناشفة ثانيه . خلوها طول الليل تجف . بعدين ثاني يوم حطوها في فرن بارد حرارته ٢٠٠ فهرنهايت حوالي ١٠ دقايق عشان تنشف تماما . طلعوها من الفرن و الحين صار عندكم مكسرات مقشرة زي حقت السوبرماركت .

٣ـ الحين عشان الطحن . حطوا المكسرات في الفريزر عشان تبرد تماما . هذا راح يخلي المكسرات باردة إذا جينا نطحنها وهذا راح يعطينا شوي وقت في الطحن وهذا يعني بودرة أنعم .

٤ـ حطوا كمية بسيطة من المكسرات في طاحونة قهوة نظيفة . ممكن إستخدام جهاز تحضير طعام بس ماراح يعطي بودرة ناعمة زي طاحونة القهوة . حطوا مع المكسرات جزأ من السكر المطحون اللي راح نخلطة مع للماكرون . هذا راح يشرب جزأ من الرطوبة و الزيت اللي يطلع  وبكذا يأخر الطحن أكثر .

٥ـ أطحنوا على ضغطات سريعة يعني لا تخلون الطاحونة شغالة وخلاص . إلين يبدأ يكون بودرة ناعمه . طلعوا الخليط و أنخلوه . و القطع اللي ما تنطحن رجعوها للطاحونة مع شوي لوز زياده .

٦ـ أستمروا على هذي الطريقة إلين ينطحن كل اللوز .

في حال تحول اللوز لمعجون و أنتم تطحنون لا تشيلون هم ولا ترمونه هو صح ما ينفع للماكرون بس هو لذيييييييذ لإستخدامات ثانيه هذا المعجون هو زبدة مكسرات زي ما زبدة الفول السوداني أو البينت بتر مصنوعة من فول سوداني هذي نفس المنتج بس مصنوع من مكسرات ثانيه .

*السكر :

في الماكرون نستخدم في الغالب نوعين سكر . سكر مطحون وسكر خشن عادي .
السكر المطحون هو اللي راح يحلي الماكرون . غير كذا السكر المطحون مع التحريك بيسحب جزأ من الرطوبة حقت المرانج وهذا اللي بيخلي الخليط حق الماكرون سايل يعني هو السائل في الكوكيز هذا وعشان كذا الكميات المضبوطه مهمه . تأكدوا إنكم تنخلون السكر المطحون قبل الإستخدام و الوزن . تأكدوا بعد إن السكر المطحون نااااااااعم يعني بودرة لا يكون خشن ولا ممكن يخرب الماكرون عليكم .

السكر الخشن يستخدم بكمية بسيطة عشان يثبت المرانج بس ( راجعوا موضوع المرانج الفرنسي ) .

* الألوان :

الألوان هي اللي راح تعطي الماكرون الألوان اللي معروف فيها . في الغالب اللون له علاقة بالحشوة يعني ما أسوي ماكرون أزرق و أحشيه شكولاته مثلا .

ألوان الأكل عموما المطلوب منها تلون بشكل جيد بدون ما تأثر في الوصفه نفسها سواء من ناحية الطعم أو غيره . فيه ثلاث أنواع رئيسية للألوان :

١ـ ألوان سايلة : هذي أسهل نوع ينخلط مع الأكل يعني ما تحتاج خلط كثير عشان تلون الأكل وهذي ميزة طبعا . بس مشكلتها إنها ضعيفة يعني ما تصبغ بشكل جيد غير كذا كونها سايله هذا ممكن يسبب مشكلة في بعض الوصفات . الشي الثاني هو إن هذي الألوان أحيانا ينحط معها إضافات وبعض هذي الإضافات تتفاعل مع الأكل بشكل غير مرغوب ويعطي نتيجة مختلفة عن المطلوب . مثلا بعضها معها جلسرين و الجلسرين مع شي زي الرويال آيسنج مثلا يخليه لين بدال ما يكون يتكسر في الفم ( طبعا في حال كان هذا المطلوب أصلا ) . عشان كذا هو خيار سيء للألوان . غير كذا بعضها إذا ماكان كلها لها تاريخ إنتهاء ، صح إنها مووب صايرة مضره لو أستخدمت بعد هذا التاريخ بس ممكن يضعف لونها أكثر . عموما مع هذا إلا إني قد سويت ماكرون بهذا النوع من الصبغات وما أثر أبدا .

٢ـ ألوان جيل : هنا يكون اللون على شكل سايل ثقيل تقريبا زي ثقل العسل . هذي الصبغات ينطبق عليها كل شي ينطبق على السايلة سواء من ناحية الإجابيات أو السلبيات بس راح تصبغ بشكل أفضل من السايلة . هذي بعد ما أفضل إستخدامها .

٣ـ ألوان بودرة : هنا عندنا لون صافي بدون أي إضافات أو تاريخ إنتهاء . هذي راح تصبغ أفضل من غيرها وبنفس الوقت ماراح تغير نسب المواد لبعض زي السائلات . هذي هي الخيار الأفضل لألوان الأكل .

في حال عدم توفر اللون المطلوب من الألوان تقدرون دايما تخلطون عدة ألوان عشان تكونون اللون المطلوب .

النكهات :

ممكن خلط نكهات سواء سائلة أو جامدة مع الخليط حق الماكرون . ممكن مثلا خلط خلاصات الفانيلا أو القهوة أو الموز أو أي خلاصة ثانيه عشان تعطي طعم يمشي مع الحشوة اللي راح تنحشى بعدين . ممكن بعد إستخدام أشياء زي البهارات عشان تأدي نفس الغرض .

الشي الوحيد اللي لازم تنتبهون له هنا هو إن الكمية تكون جدا بسيطة بحيث ما تأثر على نسب المواد لبعض بشكل كبير ممكن يخرب الماكرون .


ميزان :

مهم جدا يكون عندكم ميزان إذا حبيتوا تسوون ماكرون . من الحين أقول مافيه بديل ، الميزان مطلوب هنا . موازيين المطبخ متوفرة في كل مكان متأكد إن أي محل أواني منزلية عنده ميزان و بعد أسعارها جدا رخصية . عموما موازيين الطبخ موب بس للماكرون الميزان هو أدق طريقة لقياس المواد الجافة . كوب طحين عن كوب طحين يختلف و الإختلاف بعد كبير بس كيلو طحين هو كيلو طحين .

الموازيين الديجيتال أسهل للإستخدام كونها توفر خصائص ثانيه مثل تصفير الوزن و تغيير الوحده من الموازيين الأمريكية ( الباوند و الأونصة ) إلى الموازيين المترية ( الكيلو ، الجرام ) . إستخدام ميزان الديجيتال شي تافة :

١ـ نحط صحن فوق الميزان بعد ما نشغله .

٢ـ نختار الوحده اللي راح نقيس هل هي متري ولا أمريكي . غالبا فيه زر لتحويل الوحدة .

٣ـ نصفر الوزن حق الصحن . بعد غالبا في زر كذا .

٤ـ نحط الشي اللي نبي نوزنه إلين نوصل للوزن المكتوب في الوصفه .

٥ـ نبي نوزن شي ثاني سهل . نشيل الصحن ونحط صحن ثاني ونصفر ونرجع نقيس عااااادي .. بس .


كيس حلويات :

أي كيس حلويات ينفع أهم شي الراس يكون ١ سم على الأقل .

سيلبات ( سجادة سيليكون ) أو ورق بارتشمنت :

الماكرون مصنوع من بياض بيض وهو بروتين و البروتين يحب يلصق في أي شي عشان كذا مهمة جدا هذي الخطوة . راح تحتاجون ياورق بارتشمنت parchment اللي بعض الناس يسمونه ورق زبده أو لو عندكم سيلبات اللي هي سجادة السيليكون يكون أسهلكم بعد . السيلبات موجوده ومتوفرة في السعودية وشفتها في كذا محل أسألوا عن سجادة سيليكون وهم بيعرفون ما يحتاج يكون نوعها سيلبات هي بس ماركة لا أكثر . ورق البارتشمنت بعد في كل سوبرماركت جنب القصدير في الغالب .

ورق الزبده الأصلي وورق الشمع ما ينفع في حالتنا هنا .

هذي صورة للأدوات :

MACARON



الوصفة و الطريقة


المقادير :

110 جم بياض بيض

30 جم سكر عادي

125 جم لوز

225 جم سكر مطحون

ألوان أكل حسب الرغبة

هذي الوصفة الأساسية للماكرون بالمرانج الفرنسي .

الطريقة :

١ـ نجهز كل شي . ننخل اللوز و السكر المطحون ، بعدين نوزنهم ونحطهم في صحن واحد . أرجع و أقول زي ماقلت كثير مافيه بديل للوزن في الماكرون لحد يجيني يقوللي أبغى المقادير بالكوب و الكاس و الملعقة لأن صعب جدا عمل ماكرون بقياسات موب دقيقة . بعدين نخلط اللوز و السكر المطحون مع بعض بشوكه عشان يتداخلون في بعض . نوزن البيض ونجهزة . ونوزن السكر العادي بعد .

MACARON

٢ـ   نسوي مرانج بالبيض و السكر ونخليه يوصل مرحلة منقار الطير . اللي ما شاف موضوع المرانج أو ما يدري وش المرانج يشوف هنا. المرانج اللي في الموضوع مرانج فرنسي بس ممكن عمل الماكرون بالمرانج الإيطالي بعد ،بنفس الخطوات الجاية تقريبا يعني بس نوع المرانج هو اللي يتغير .

٣ـ الحين نكب خليط اللوز و السكر و الألوان و النكهات المستخدمه على المرانج .

٤ـ الحين الخطوة الأهم الخلط . أغلب المشاكل حقت الماكرون تجي من الخلط . اللي يسير و إحنا نخلط موب بس إن المقادير راح تنخلط مع بعض . السكر البودرة راح يسحب شوي من الرطوبة حقت المرانج وهذا راح يفجر بعض الفقاعات حقت الهواء مع التحريك العملية هذي تتسرع بعد . عشان كذا كل ما خلطنا بنلاقي إن الخليط صار سايل أكثر و أكثر . لو حركنا أكثر من اللازم فقاعات كثير راح تتفجر ويمكن ما توفر الرفع اللازم للماكرون وينتج ماكرون مسطح . لو خلطنا أقل من اللازم بيصير عندنا خليط ثقيل مره وصعب تشكيلة وبعد بيصير عندنا هواء أكثر من اللازم في الخليط وهذا يعني نفش أكثر من اللازم في الفرن و الماكرون راح ينفش في البدايلة بعدين راح يطيح ويصير بعد مسطح ومشقق . عشان كذا الخلط للدرجة المثالية مهم .
أخلطوا المواد الجافة مع المرانج بملعقة مطاط شوي شوي في البداية إلين تترطب المواد بعدين كملوا خلط عادي إلين توصلون الدرجة المثالية . في البداية الخليط بيكون ثقيل شوي وقاسي بس مع الخلط بيلين شوي . عشان تختبرون الخليط إنه وصل للمرحلة المثالية أرفعوا الملعقة حقت الخلط والمفروض يطيح الخليط من الملعقة على شكل كتل .

شوفوا الفيديو هذا من دقيقة ٥ بالذات هذا بالضبط هو القوام اللي تبغونه .

macaron

٥ـ الحين ننقل الخليط لكيس الحلويات ونجهز صياني الفرن بعد ما نغطيها ببارتشمنت أو سيلبات .

٦ـ الحين نبدأ نصب الخليط على شكل دوائر قطرها ١-٢ سم أو حسب الرغبة . خلوا مساحات بين حبات الماكرون عشان تعطونها مساحة تنتشر وعشان الهواء يسخنهم بالتساوي في الفرن . أفضل طريقة للصب هي إنكم تحطون الراس قريب من الصينية وتصبون في مكان واحد وخلوا الخليط ينتشر وهذا راح يعطيكم دائرة متساوية . لو لقيتوا حبات شكلها غلط أو لها راس موب مشكلة راح نصلحها في الخطوة اللي بعدها .

ماكارون

لاحظوا الأشكال فيها مشاكل عاااادي لا تشيلون هم .

٧ـ الحين عشان نصلح أخطاء الصب . نبلل أصبع بشوي مويه ونبدأ نصلح الخليط المصبوب بيدنا شوي شوي .

macaron


٨ ـ الحين نشغل الفرن على ٣٢٥ من تحت بس !! وتأكدوا إن المروحة اللي في الخلف لو كانت موجودة طافية هذي المروحة قوية على الماكرون وممكن تخربه . بعدين نحط الصياني اللي شكلناها على طاولة المطبخ نص ساعة  على الأقل ترتاح ( سامعين على طاولة المطبخ موب في الفرن هههه ) . هذي الفترة راح تعطي الماكرون قشرة عالوجه هذي راح تساعده ينفش بالتساوي في الفرن ويكون ياقة . لو كنتوا مستخدمين مرانج إيطالي هذي الخطوة مالها داعي وغير مطلوبة يعني أخلطوا ، شكلوا وحطوها في الفرن علطول .


٩ـ الحين نحط الصينية في الفرن في الرف الأوسط حوالي ١١ دقيقة  . المفروض الماكرون يكون له ياقة وما يكون تلون بلون غامق أو صار قاسي أكثر من اللازم . حطوا الصياني صينية صينية لا تحطونهم كلهم مع بعض .

macaron

١٠ ـ خلوها تبرد تماما . راح تلاحظون إنها لاصقة بالصينية وهي حارة هذا شي طبيعي خلوها تبرد وراح تفك .

بس هذا الماكرون . تقدرون تحشونة وتاكلون على طول أو لو تبون أحسن بعد خلوه في الثلاجه يوم قبل تاكلونه عشان النكهات تتمازج صح بعدين طلعوه من الثلاجه و خلوه يوصل حرارة الغرفة قبل الأكل . لو تبون تحفظونه وقت أطول ممكن بعد حطوه في أكياس وخلوه في الفريزر بدون حشي ! كثييييير أصلا من محلات الماكرون وحتى الكبار مره يسوون كذا . الماكرون ماراح يتأثر بالفريزر كثير . أهم شي تخلونه يذوب زين وتاكلونه على حرارة الغرفه موب بارد .


الحشوات


كل يوم أشوف حشوات ماكرون مبتكرة وجديدة ، شفت حشوات بكبد البط ، بالكتشب ، بالفاصوليا الحلوه وحتى بالفقع ومتأكد إن فيه غيرها أغرب بعد . بس هذا إن دل على شي فهو يدل إن مافيه قواعد هنا أي شي تشوفون إنه ممكن يمشي مع الماكرون ينفع يتسوى منه حشوه .

الحشوات ممكن تكون جاناش سواء عادي أو حتى مخفوق ، نوتيلا ،  ممكن تكون موس مثبت من أي نوع وبأي نكهة، ممكن تكون كريمة مخفوقة مثبتة بجيلاتين وبعد بأي نكهة ، ممكن تكون بتر كريم أي نوع و بأي نكهة، ممكن إستخدام تقريبا كل تغطيات الكيك ، ممكن إستخدام أي معجون لذيذ مثل البينت بتر مثلا أو مثلا فستق مطحون ، ممكن إستخدام مارزبان أو ممكن إستخدام مربى عادية . ممكن بعد خلط كذا واحد من هذي الحشوات عشان تسوون حشوات مبتكرة مثل حشوة البينت بتر مع المربى مثلا . مافيه قواعد كثير هنا أهم شي الحشوة ما تكون سايلة أكثر من اللازم بحيث تذوب الماكرون ولا تكون قوية مره بحيث إنها تغطي على طعم الكوكيز تقريبا بس هذي القواعد هنا .

إذا جيتوا تحشون ممكن تستخدمون يا كيس حلويات صغير أو حتى ملعقة عادية .


مشاكل الماكرون وحلولها


إذا ما ضبط الماكرون معكم أول كم مرة لا تستعجلون كل فشل هو خطوة للنجاح أهم شي تعرفون وش المشكلة وليش فشل وتحلونها بس . الماكرون كوكيز شوي حساس خلط خطأ أو فرن حار أكثر من اللازم ممكن يخربه بغمضة عين .عشان كذا دايما نحاول إننا نثبت الوصفه هنا بحيث إننا نتأكد إن الخطأ كان من التنفيذ موب في الوصفه نفسها وعشان كذا إحنا نستخدم الوزن في القياس هنا .

حرارة الفرن بعد عامل ثاني ، الأفران لها دورة يعني تشتغل بعدين تطفى بعدين تشتغل وتطفى وكذا بحيث الحرارة الداخليه تكون قريبه من الحرارة اللي مطلوبة .. بس بعض الأفران دقيقه أكثر من غيرها وبعضها بعيدة تمام عن الحرارة المطلوبة منها . الحل هنا هو إنكم تستخدمون ميزان حرارة فرن عشان تراقبون الحرارة داخل الفرن حقكم .

نجي للمشاكل العامة و إن شاء الله حلولها :


١ـ إذا الماكرون شكله سليم بس ماله ياقه أو الياقة صغيرة مره :


فيه ثلاث إحتمالات هنا . إما إنكم ما ريحتوه وقت كافي ، أو إنكم خلطتوه أكثر من اللازم أو إن الفرن شوي بارد .

خلوه يرتاح وقت أطول وجربوا ، لو ما راحت المشكلة جربوا تخلطون أقل يمكنكم خالطين أكثر من اللازم لو ماراحت كحل أخير أرفعوا حرارة الفرن شوي بس وجربوا من جديد .

macaron

ماكرون بدون ياقة

 

٢ـ إذا الماكرون ما له ياقة والقشرة من فوق مكسرة :
هنا في الغالب السبب هو الخلط أكثر من اللازم أو أقل من اللازم أو حرارة الفرن فيها مشكلة أو ما أرتاحت وقت كافي . الحل أخلطوا للدرجة الصح وبعدين تأكدوا من حرارة الفرن . في بعض الأفران ما يكون فيها تهوية للهواء حار هنا ممكن تحلين المشكلة بإنك تحطين ملعقة خشب على باب الفرن وتقفلينه بحيث يكون الباب شوييييي مفتوح .

ماكروون

ماكرون مكسر

٣ـ الماكرون له ياقة بس بدال ما ينفش على فوق الياقة عالجنب :


في الغالب معناها فرن حار أكثر من اللازم.

ماكرون فرنسي فاشل

ياقة عالجنب

٤ ـ الخلطة سايلة :

في الغالب محركة أكثر من اللازم .

٥ ـ الخلطة ثقيلة :

في الغالب محركة أقل من اللازم .

٦ ـ القشرة موب ناعمة :

في الغالب اللوز شوي خشن .

٧ ـ القشرة فاضية ( فتحة هواء كبيره داخلها ) :

مخلوطة أكثر من اللازم ومطبوخة أقل من اللازم .

٨ ـ ماكرون لين وينكسر بسهولة :

مطبوخ أقل من اللازم ، فرن بارد ، مخلوط أكثر من اللازم ، مرانج فاشل .

٩ ـ ماكرون ناشف :

أنطبخ أكثر من اللازم .

بس هذا تقريبا كل شي عن الماكرون .

النتائج

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

313 comments

4 pings

Skip to comment form

    • الاوتار on 16 August, 2012 at 8:36 pm
    • Reply

    السلام عليم يصلح قبل ما احطه في كيس الحلواني اقسم الخليط في كم صحن عشان اضيف
    الالوان والنكهات وشكراً

    1. وعليكم السلام و الرحمة …

      أفضل تسوي كل لون دفعه عشان ما تطيح في مشاكل كثره خلط أو قلة خلط أو ألوان ما أنخلطيت بشكل متساوي أو غيرها.

    • روح وريحان on 15 August, 2012 at 10:21 pm
    • Reply

    مشكور اخوي على مساعدتك اخيرااااااااا نجحت الحمد لله وفرحانه كثير
    كل شرحك تمام بس اللي اول مره يجرب الماكرون لازم يغلط اقولها للي غلطوا وتركوا المحاوله عرفت غلطتي في الخلط المره هذي خلطته بخفه وشوي
    و خليت على باب الفرن ملعقه خشب زي ما ذكرت في موضوعك لان فرني احس يمسك الحراره ويخليها تتحمر وتتكسروتصير مجوفه

    1. وقلنا هذا الكلام كثيييييير … أغلب الناس يقول أنا سويت كل شي بالحرف ويبدأ يدور في المقادير أو الفرن أو غيره بينما السبب في الغالب هو في التكنيك وطريقة العمل وهي اللي لازم الواحد يتعلمها بنفسه …

      ما تحتاجين ملعقة أو غيره على باب الفرن …

    • روح وريحان on 15 August, 2012 at 2:21 pm
    • Reply

    شكرا لسرعة ردك درجات الفرن عندي بالدرجة المئوية وحولتها بالفرهنهيت بموقع يحول من فرهنهيت الى مئوية والعكس يعني نفسها وكنت شايفه لك نفس الموضوع في منتدى ثاني وكنت ذكرت ردجة الحرارة كذا وهنا الموقع اللي يحول درجة الحراره http://www.convertworld.com/ar/temperature/%D9%81%D9%87%D8%B1%D9%86%D9%87%D8%A7%D9%8A%D8%AA.html
    طيب لو بغيت اسوي الميرانق الايطالي للماكرون وانا قريت موضوعك اذوب السكر 30 جرام بكم من الماء وبعدين اضيفه للبياض وهو حار عادي صح بس بشويش

    1. ماقلنا شي عالتحويل بس تقولين خفضتها ل ١١٠ وخليتها تكمل إستواء ؟

      هذا موب ميرانج إيطالي هذا سويسري وما ينفع بالبساطة هذي خلي موضوع المرانج الإيطالي بعدين وركزي وأرجع و أعيد ركزي أكثر في التكنيك حق شغلك لأن هو اللي بيفرق !!! موب كل الخرابيط الثانية.

    • Anonymous on 15 August, 2012 at 5:15 am
    • Reply

    سويته مرتين ولاضبط مشكلتي بالياقه مع إني سويت الخطوات بالضبط والفرن نفس الحراره إلي قلت شكله جميل وناعم من فوق بس بدون ياقه تتوقع المشكله من الصياني لازم شيء خاص ولاعادي اي نوع

    1. التكنيك التكنيك التكنيك هو أهم شي !!! كمية الخلط غالبا هي السبب لا تدورين في الوصفة ولا تدورين في حراره الفرن إلين تتأكدين إنك ضابطه الأشياء اللي تعتبرينها تافهة. لا صياني فرن خاصه ولا غيرها !!

    • روح وريحان on 15 August, 2012 at 3:31 am
    • Reply

    السلام عليكم ورحمة الله وبركاته
    معليش المفروض ما اسال وخجلاته اسال بس صراحة الطبخه دقييييييييقه واي شيء يخربها جربتها كثير واستهلكت اللوز ومافيني اجرب الحين غير مره حتى اجيب لوز
    بس سؤال لو سمحت انا الان قست المقادير وجهزتها حتى اطبقها بكره باذن الله وما اعيد غلطتي
    غلطتي اني خلطت اكثر شوي وحرارة الفرن مشكله بالرغم اني خليتها على درجة 160لمدة عشر دقائق وبعدين خفظتها الى 110وراقبتها حتى تستوي
    وبعدين قلت اسالك انا استخدم ايسنج شوقر الناعم بالمره لاني شفت روابط فيديو لطباخين يستخدمونه فاستخدمته بحيث طحنته مع اللوز لانه اللوز شرائح طبعا كنت وازنه السكر ووازنه اللوز هل هذا سبب المشكله

    1. وعليكم السلام و الرحمة …

      ما طلبت تغيير الحراره في الوصفة ؟ كتبت ٣٢٥ !!!

      وأنا طلبت في الوصفة سكر بودرة اللي هو الآيسنج شوجر ؟

      التكنيك هو اللي غالبا يسبب المشاكل في الماكرون …

    • روح وريحان on 12 August, 2012 at 8:16 am
    • Reply

    السلام عليكم ورحمة الله وبركاته
    شرح ماله مثيل الله يعطيك العافيه انا لقيت عند تافولا سجادة السليكون ولقيت ورق الزبده البارتشمنت بس ما حصلت الوان الطعام البودره
    للافاده للي سالو ومتحمسه اجرب الوصفه
    بس بغيت اسال عن النوع اللي جربته في اللوز المطحون الجاهز لاني ما ابغى اطحن اللوز بنفسي حتى اجيد عمل الماكرون قريت الشرح وبحثت عن الادوات وما باقي غير اللوز وشكرا

    1. وعليكم السلام و الرحمة …

      كل الألوان و اللوز موجوده في أي سوبرماركت وحتى البارتشمنت في الغالب بعد. اللوز المطحون أشتري من اللي يبيعون بالكيلو روحي أي محل مكسرات أو حتى محل المكسرات اللي يكون داخل السوبرماركت وبيبيعونك وتقدرين تذوقينه بعد وتتأكدين إنه موب محمض أو خربان

    • روح وريحان on 12 August, 2012 at 7:53 am
    • Reply

    السلام عليكم ورحمة الله وبركاته شرح وافي ولا له مثيل شكرا
    بغيت اسال عن نوع اللوز اللي تستخدمه النوع الجاهز لو تكرمت

  1. الله يبارك فيك ..

    لسة ماسويت الحشوات كنت حآآبة اتأكد من القوام اول..

    جزاك الله خير شيف ..

  2. السلام عليكم ورحمه الله وبركاته

    هذي تجربتي للماكروون ..

    بس حآآبة اسأل هل قوامهآآآ كذآآ من الداخل او فيها خطأ ؟؟

    http://www.3roos.com/files/ups/2012/84885/21344652059.jpg
    http://www.3roos.com/files/ups/2012/84885/11344652059.jpg
    http://www.3roos.com/files/ups/2012/84885/01344652059.jpg

    وشكرآآآآ

    1. وعليكم السلام و الرحمة ….

      ممتازة …. ألف مبروك … يمكن لو شوي زيادة حشوة بيكون أحسن بس.

    • Anonymous on 8 August, 2012 at 8:58 pm
    • Reply

    وين ألقى دقيق اللوز دورت بالسوبرماركت مالقيت كيف شكله وإيش اسمه بالضبط انا بالرياض

    1. وين تلقين أي مكون هذا موب شي أنا بفيدك فيه ؟ كيف تستخدمينه ممكن أساعدك بس وين تلقينه أنا وش علاقتي في الموضوع ههههه

      إسمه طحين أو دقيق لوز almond meal أو Almond flour مدري الصراحة كيف أوضح أكثر …

  3. السلام عليكم شيف خالد

    حآآآبة اسأل سؤال بخصووص الألوان للشوكولا
    اللي تعطي لوون قوي

    في الوان خاصة بالشوكولا في محلات فنون الكيك
    بس الوانهآآ خفيفة ..وانا ابغى الواان تكون صريييحه

    وشكرآآ

    1. ما اعرف شي اسمه الوان شكولاته الصراحة ومافهمت وش علاقة هذا بالماكرون ؟

    • Leen on 31 July, 2012 at 3:03 am
    • Reply

    الله يعطيك العافيه على المجهود الجميل ..
    حبيت اسأل عن السكر المطحون تقصد فيه السكر البودره والا هو نفس السكر الخشن بس مطحون !

    1. البودرة

    • Anonymous on 30 July, 2012 at 11:00 pm
    • Reply

    صراحة المكرون تلوع بلجبد استغفر الله

    1. ههههه والله مدري وش الماكرون اللي ذقتي … عموما أذواق

  4. ماشاء الله عمري مافكرت اسويه دايما اشتريه جاهز من الفستفال وبعد ماشفت كيف اتسوونه بظل اشتريه صراحه شغله صعب والله يعطيكم الصحه على هذا المجهود

    • hadeel on 28 July, 2012 at 6:19 pm
    • Reply

    السلام عليكم ..
    حبيت استفسر اذا ماعندي ميزان عشان اوزن المقادير اقدر
    اسوي الماكروون ولا اصرف النظر الين ما يتوفرلي ميزان .. ؟!!
    وشكرا

    1. وعليكم السلام و الرحمة …

      تكلمت عن هذي النقطة بوضوح شديد في الموضوع

    • Shaikha on 18 July, 2012 at 10:40 pm
    • Reply

    مساء الخير شيف خالد،
    أول مرة اتجرأ اسوي ماكرون قبل شوي و أخذت اكثر من ساعتين عشان اكون دقيقة في المقادير خصوصاً اني مو متعودة على الأدوات المعيارية، في البداية كنت أشوفها وهي تنتفخ في الفرن و انبسطت مره
    لكن طلعت ياقتها جداً كبيرة و ناشفة، غير ان الخليط كان شبه سايل مش متماسك زي حقك 🙁
    أنا قسمت الخليط الجاف حق السكر و اللوز على ٣ صحون عشان أنوع بكل صحن لون،
    ثم أضفت المرانغ على كلاً منهم.. تتوقع ان المشكلة هنا؟
    رغم انها جداً أتعبتني و النتيجة فشل، الا اني زي ماقلت بعيدها من جديد ولكن بعد ما اعرف أخطائي
    عشان ما أكررها.
    شكراً لك بحجم الكون يا شيف خالد، أنا (والكثير) نتعلّم منك والله ❤

    1. هلا والله ….

      وزعتي الخليط الجاف على ٣ صحون طيب ما فكرتي كيف بتوزعين المرانج بالتساوي على الثلاثة ؟ كأنك كنتي دقيقه في كل شي وخربتيها في النص …. ما تقدرين تعرفين السبب إلين تحلين هذي المشكلة أول. سويه زي ما أنا كاتب أول مره قبل لا تسوين أي تعدلي بعد ما تضبطينه أبدي خذي راحتك شوي.

      هذا ماكرون كل ما تشوفينه صعب تذكري إنهم يبيعون الحبة ب ٥ ريال في المحلات الرخيصة بعد .. أعتقد الحين عرفتي ليش ؟

        • Shaikha on 19 July, 2012 at 6:38 am
        • Reply

        اهااا صح والله..
        اجل ماكان المفروض اسوي فيها خطيرة و اقعد اقسم على كيفي.. ههههه صادق
        اجل يوم ثاني ان شاءالله اعيده و أخبرك بالنتيجة، ما بستسلم.. مثل ماعودتني ❤

          • Top Chef on 19 July, 2012 at 3:45 pm
            Author

          عالأقل موب أول مره تجربين وصفة …

    • Anonymous on 12 July, 2012 at 4:24 pm
    • Reply

    شيف ممكن اسال اذا فيني استبدل بياض البيض ببودرة الميرانغ .. وقديش بتكون الكمية
    وشكرااااااااااااا

    1. دايما يمديك.

      سويي زي ماهم كاتبين عالعلبة اكيد مكتوب كم تخلطين عشان يعطيك بيضه. سويي مقدار ٣-٤ بيضات بعدين اوزني زي ما كتبت في الوصفة

  5. السلام عليكم
    شيف انا سويت المكرون و كلشى طلع اوكي يعني إذا شفت شكله تقول اوكي بس كان لين وايد او مو مستوي من الداخل شنو الحل

    1. وعليكم السلام و الرحمة ….

      هو مفروض يكون لين ويذوب في الفم بس إذا كان ما أستوى من داخل خليه شوي زيادة بس … عمرك لا تمشين عالأوقات في الوصفات هي تقريبية ، دايما أطبخي الأكل إلين يستوي موب إلين يخلص الوقت المكتوب.

    • Anonymous on 7 July, 2012 at 9:57 pm
    • Reply

    يعطيك العافية ابقى طريقة حشوة جوز الهند

    1. موجودة في صفحة الوصفات

    • amany on 24 June, 2012 at 1:58 pm
    • Reply

    هلا شيف
    سويته مره اخرى لكن و طلع شكله زين
    لكن بعد ماخليته يبرد قبل ما اشيله هبط ؟
    هل له دخل بحرارة الفرن و بروده الغرفه لان المطبخ بارد كثير ؟ او ايش السبب

    1. غالبا يحتاج طبخ زيادة

    • Anonymous on 23 June, 2012 at 11:15 pm
    • Reply

    السلام عليكم …….
    موقع رائع و اعجبني طريقة الشرح .
    خصوصا التفاعل بين المواد يعطيك العافية
    انا مجربه وصفة من موقع اجنبي قبل الاقي وصفتك
    سويتها الماكرون بالمرانج الايطالي .
    النتيجة منفوخ مفرغ و طعمه مسكر بزيادة .

    • Eman on 9 June, 2012 at 9:42 am
    • Reply

    السلام عليكم ورحمة الله وبركاته
    الله يعطيك العافية شيف

    عندي سؤال الله يعافيك الفرن عندي درجات الحرارة مرقمة من 1 الى 13 اي درجة فيهم تساوي ٣٢٥ ؟؟؟؟؟

    وبالنسبة للحشوات ايش اكثر حشوة ترشحها بنظرك تكسر حلاوة الماكرون ؟ انا ابغا حشوة حلاوتها معتدلة واقل وفي نفس الوقت تكون جامدة مو زي المربى مثلا وبما اني اعتبر الماكرون من أكثر الحلويات مفيدة وصحية ومافيها دهون ماأفضل اني استخدم حشوة من الزبدة .. وأفكر اسوي ماكرون بينك ايش تقترحلي حشوة مناسبة ؟ وهل ممكن ادخل فيها قطع فاكهة ستروبري مثلا .. مع العلم اني راح أحفظها بس اخاف تتأثر الفاكهة ؟؟

    بصراحة كنت مرة متحمسة وواثقة من نفسي انو راح يطلع تمام معايا من اول مرة لكن بعض التعليقات احبطتني !!! معقول عدد المحاولات الفاشلة 🙁 !!!

    أشكرك على سعة البال وتراني قرات الموضوع اكثر من مرة والتعليقات ايضا خوفا من انو يكون تساؤلي مكرر وبصراحه مالقيت اجابة فقررت اسأل ,, خوفي أطلع دايخه وقديمة وضعيفة تركيز وملاحظة ويطلع سؤالي مكرر والمعلومة المطلوبة مذكورة فوق وانا ماشفتها مما يجعل شخصكم الكريم يعصب ….

    1. وعليكم السلام و الرحمة ….

      درجات الفرن اللي كذا الصراحة صعب ، ما أدري كم بالضبط يكون على ٣٢٥ والماكرون الصراحة يحتاج دقة.

      إذا قد ذقتي ماكرون من محل بتعرفين إن كل الحشوات اللي أقترحت مناسبة بس فيه ناس مستغربين من حلاوته يمكن لأنهم ما توقعوها بس هو دايما كذا. عموما صعب أقترح وحده منهم لأن كلهم أستخدمهم ومعجبيني.

      هههههه لا الماكرون أبدا موب صحي. صح هو قليل دهون بس بكمية السكر اللي فيه هو أبدا موب صحي. متى ما أكلتي حلى أنسي الصحة ودوري الطعم ….

      ماكرون بنك حطي حشوة ورد أو راسبري أو أي نوع توت أحمر أو فراولة . ينفع تحطين فواكه طازه بس بينقص من عمر الماكرون كثير.

      أي أكله تسوينها إن ما ضبطت من أول مره موب مشكله .. أستغرب من اللي يتوقع كل شي يضبط من أول مره خصوصا شي صعب زي الماكرون. تذكري هنا إن الحبه تنباع ب 5 ريال وهي لوز وسكر وبياض بيض ؟

    • ابتهال on 7 June, 2012 at 5:00 pm
    • Reply

    السلام عليكم ..
    كم ساعة اقدر اخليه برا ؟ يعني لو اخذته معي لطلعة ينفع اخليه برا بدون ثلاجة ؟
    لأن المارينغ انا اذا سويته وخليته فترة برا يلصق ويذوب ..
    جزاك الله خير شيفنا ..

    1. وعليكم السلام و الرحمة …

      حسب وين أنتي. الرطوبة هي المشكلة ، في مكان رطب بتخرب أسرع ، كم أسرع عاد هذا شي ما أعرفه بس هي ما تصير في لحظات يعني عطيها كم ساعة كأقل تقدير في أسوأ الظروف.

      المرانج مافيه طحين يمسكه المرانج سكر وبياض بيض إذا الرطوبة ذوبت السكر وش يبقى ؟ عشان كذا الرطوبة أثرها عالمرانج أقوى بكثير من الماكرون.

    • amany on 26 May, 2012 at 7:50 pm
    • Reply

    الحمد الله مع تنفيذ اغلب الملاحظات قدرت اظبط نص ماكرون
    شكله حلو و له ياقه خفيفه لكن من تحت كان يبي له يستوي بعد ؟
    هل من الافضل احطه في الرف الرابع من الفرن بدل الثالث الوسطي ؟
    ثاني شي كثير حالي طعمه هل يصير ابدل كميه السكر المطحون بالوز ؟

    1. ألتزمي بالوصفة ، ألتزمي بالوصفة ، ألتزمي بالوصفة …. هذي مافيها نقاش …. كل الماكرون حالي لحاله (كل كوكيز بياض بيض حالي بزيادة موب بس الماكرون). حطي حشوة تكسر الحلاوه الزايدة وماراح تحسينه حالي بزيادة.

      الفرن حطيه في نص الفرن ما يهمني أي رف المهم إن الماكرون يكون في نص الفرن.

    • amany on 22 May, 2012 at 12:12 pm
    • Reply

    شيف و الله المعذرة لو اني اسال كثير
    لكن و الله جاده و ودي اسويها
    1- فيه مشكله لو سويت ثلث المقدار ؟ السبب خسارة اللوز 🙁
    2- اقدر احط بالخليط بودرة الكابتشينو ؟ و شلون احطه لو بغيت يعني عشان ماياثر ع المقدار ؟
    3- لازم ادخله الحرارة توصل ل ٣٢٥ و اواحطه بالفرن لما تترفع حرارة الفرن ؟
    4- انا شريت من النت السيليكون الخاص للماكرون هل هو افضل او يعطي عجين الماكرون حريه 🙂 و ديمقراطيه 🙂
    لان عندي بعد السيليكون اللي سيدا
    http://www.pastrychef.com/zoomify.asp?catalogid=2071&image=http://www.pastrychef.com/assets/images/large/macaron_silicone_mats_large1.jpg

    1. ١ـ لا مافيه مشكلة بس نسبة الفشل أكبر كذا… سويه بالمقادير اللي حاط إلييين تتعلمين عليه تمام ويضبط معك بعدين ضاعفي أو نقصي المقادير على كيفك.

      ٢ـليش ؟ مافهمت وش الهدف ؟

      ٣ـ شغلي الفرن على الحرارة اللي تبين. خليه إلين يحتر ويوصل الحراره اللي حددتي (غالبا بيكون فيه لمبة تنطفي أو شي زي كذا) وبعدين حطي الأكل. موب بس لهذي الوصفة هذي طريقة إستخدام أي فرن في العالم.

      ٤ـ ما أعرف الصراحة غير إن الحجم مالك تحكم فيه فكرت القوالب هذي حلوه بس أول مرة أشوفها هنا الصراحة ما أعرف.

    • amany on 20 May, 2012 at 2:47 pm
    • Reply

    و الله سويته ٤ مرات
    لكن ولا مره ظبط بعدين مرتين سويته بالنارجين قلت اوفر ظبط بس شفت انك كاتبه مكرون امريكي
    بجربه مره تاليه و الله يعين
    في الغالب الغلطه عندي تكون كثير سايله ؟ مش عارفه ليه ؟

    1. أنتي ٤ مرات وأنا قعدت أسويه ٣ مرات كل يوم لمدة أسبوع إلين ضبط. شوفي الخطأ وين وعدليه خطأ خطأ وبيضبط أكيد. شوفي رقم ٤ في الحلول كل شي في الموضوع حطيته

        • amany on 22 May, 2012 at 10:12 am
        • Reply

        شكرا لك كثير بعيده بس هالمره زي ماقلت لك اني بسويه بسكر بودره جاهز

    • shreena on 25 April, 2012 at 2:07 pm
    • Reply

    السلام عليك يا شيف ….

    سويت الماكرون بكل المقادير و بالوزن المطلوب و خليته ينشف و كون طبقة و سخنت الفرن بس للاسف يوم حطيته فالفرن القشرة الي فوق تشققت و كونت ياقة و الطعم كان لذيذ فا هل المشكله فالخفق اني ما خفقت زيادة و خليت فيها هوا ؟؟
    كيف اعرف الخفق المثالي للعجينة ؟؟

    1. وعليكم السلام و الرحمة ….

      أعتقد مشكلة خفق أو حرارة عالية بس الغالب هو الخفق جربي تخفقينها أكثر وشوفي.

      الخفق المثالي زي اللي وريتك في الفيديو اللي حطيت نفس القوام ماعليك من الوصفة اللي هناك بس شوفي قوام الخليط كيف بعد الخلط.

    • وفاء on 17 April, 2012 at 7:05 pm
    • Reply

    سويت الماكررون أكثر من مررره وفي كل مره طعمه يصير بس سكر :/
    لا وناشف بعد ..

    بس من أول مرره سويته بطريقتك .. أكلت ماكرون <3
    يعطيك العافية ..!
    بس للحين ما ضبطته بالوان ..الألوان عندي سايلة ، إذا حطتيها وأنا أحركه على ما يتوزع اللون كويس أكون خربتها من كثر التحريك ونفس الشيء اللون ما أقدر اضيفه كثير حتى يوضح يخرب علي .. الله يخلي الكاكاو مع أنه خرب علي مرره : )

    طيب لو حطيت اللون مع البيض أثناء إعداد المارينج يصير!! وإلا بيخرب البيض بعد ؟

    1. طعم اللوز في الماكرون موب شي قوي مررره. اللي ما يعرف نكهة اللوز مرة زين صعب يعرف ان الماكرون مصنوع من لوز.

      اللون ينفع تحطينه مع المرانج

    • Anonymous on 16 April, 2012 at 2:52 am
    • Reply

    صباح الخير اشكرك جداً على الطرح الرائع أنا متحمسه جداً لعمل الماكرون غداً لذلك اطلعت على تفاصيل هذا الطبق واتمنى ربي يوفقني لأني متميزه بصنع الحلويات شكرًا

  6. آبـــــــــــيه 🙁

    • ام يزيد on 31 March, 2012 at 8:02 pm
    • Reply

    ياليت ياشيف ترد علي. سويت الماكرون بعد قراءه.تمعن. بس صددفتني مشكلة عدف انتفاش الدوائر يعني صارت ياقه بس ما أنتفش. ياليت ترد وماتهمل رسالتي

    1. هلا والله …

      بدون ما تقولين ماقد أهملت سؤال أحد ولله ؟

      إذا كنتي سويتيه مره وحده فسويه مرتين وثلاثة و أربعة و أرجعي أقري الموضوع مره ثانيه وثالثه بعد فيه كل شي.

      • Anonymous on 13 April, 2012 at 1:03 am
      • Reply

      أنا أقول يا أم يزيد إن خلطك كان زايد فصارت الخلطة سايلة وخلت الدوائر تنبطح وتصير خفيفة طبقتها وما تنتفش. والله أعلم

    • لموناضة on 27 March, 2012 at 3:39 pm
    • Reply

    أستاذ شيف توي اشتريت لوز مطحون من محل صغير للمكسرات وللأسف جاني مطحون عادي بس مررة مدهن وفيه زيت كتير فصار متكتل مو ناشف زي العادة،، اعتقد انه ما يصلح للماكرون كده صح؟؟
    طب هل في طريقة لتجفيفه؟؟ لانه مو عجينة بس مدهن،، انا قاعدة الان احاوا اجففه في الفرن على اخف حرارة وماعرف ايش بيصير!!

    1. الدهن ما يتبخر مع الحرارة. الدهن يطلع لأن المكسرات محفوظة أو مطحونة خطأ أشتري لوز ثاني أفضل أو لو تبين جربي بهذا اللوز بس شخصيا ما أنصح.

    • لموناضة on 18 March, 2012 at 3:12 pm
    • Reply

    أحب بس اذكر تجربتي للإفادة لاني انا ما كانت تتكون لي قشرة على سطح الماكرون مع انه طريقتي كلها صحيحة لكن بسبب رطوبة الجو يمكن ما تتكون القشرة،،
    ارشدني الشيف انه انشفه في الفرن على اقل درجة بس هذي الطريقة كانت ربما خاطئة بالنسبة لي لان الماكرون نشف كمان من تحت وهذا ما سمح للماكرون يسويله ياقه،،
    الحل اللي ابتكرته وهو اني حطيته جنب الفرن عالطاولة وسخنت الفرن علي اقل حرارة وخليت الباب مفتوح شوويية فجفف الفرن الرطوبة من الجو وبالتالي نشف الناكرون بعد نصف ساعة او اكثر بقليل.

    1. طريقة التجفيف في الفرن تنفع وضبطت مع ناس كثير بس لازم تضبطين التوقيت بس. السبب اللي خلاني ما أكتب هذي الطريقة إلا كحل أخيييير مره لتجفيف الماكرون هو إنها أصعب تتسوى لأن زي ماقلت لازم لازم تراقبينه زين عشان ما ينشف.

      1. إذا عالرطوبة ما تحتاجين الفرن عشان يشيلها من الجو شغلي المكيف قبلها بوقل وغالبا تنحل المشكلة.

    • لموناضة on 18 March, 2012 at 2:55 pm
    • Reply

    أستاذ أخييييرا ظبطتها بعد ١٢ محاولة وصار شكلها مررة حلو،،
    بس حابة أسألك عالحشوات مثلا انا باحط كريمة كيف اثبتها زي ما قلت بالجيلاتين ما فهمتك!؟
    لاني انا لنا باحشيها باحس انه حشواتي رطبة شوية مو جامدة فأثرت عالماكرون وصار هش اكثر من اللازم ويتكسر بعد ما كان جاف ويابس.!!!

    1. ههههه مبروك ، متصور فرحتك كيف صارلي نفففس الشي ترى يوم كنت أحاول فيه.

      الكريمة فيه موضوع في المدونة إسمه الكريمة المخفوقة شرحت طريقة التثبيت و الكميات.

  7. السلام عليكم
    صراحه يا شيف اشرك جزيل الشكر . . .
    ضبط معاي الماكرون وبشكل ناجح جدا بعد ماقريت كل الي كتبته وطبقته … والكل يسالني هل معقوله انتي مصلحته مو جاهز ؟
    ……
    سويت بالضبط مثل مقادير ميرانج فرنسي وباقي المقادير وطبعا بالميزان وزنتها وبدقه
    واضفت عليها خليط مكون من ( 3 ملاعق كاكاو بورده + 3 ملاعق ماء حار ) لان
    ماكان متوفر عندي نكهات مركزة او الوان طعام وقلت بجربها والحمد الله نجحت نجاح احمد الله عليه
    ** بس عندي سؤال الخليط شوي معاي كان سائل وماكنت الحق اشكله دائرة تماما وبنفس الحجم للكل فصار شي كبير وشي صغير
    ودي باضافه يخلي قوام الخليط شوي اقل سيوله ! هل من حل ؟
    وهل اقدراضيف مقدار من اللوز المطحون حتى تقل كميه السيوله ؟
    جدتي قالت ان الماكرون السكر زايد .. هل من حل اقدر اقلل السكر واخلي الماكرون يعجبها ؟
    وعذرا للاطاله …

    1. هلا والله ..

      الشكولاته سويي زي ما قلت في الموضوع. ما تحتاجين مويه حاره بس نقصي من اللوز وحطي كاكاو. عشان نحل اي مشكله لازم اول نتأكد هي من وين وإذا ما مشيتي على نفس الطريقه بالضبط صعب نحل المشاكل في اي وصفه موب بس هنا.

      ما تحتاجين شي يثقل الخليط لأنه موب مفروض يوصل هذي المرحله اصلا. التزمي بالوصفه وركزي في الخلط إنك ما تخلطين اكثر من اللازم كل ما تخلطين كل ماخف الخليط اكثر انتي لازم تعرفين متى توقفين.

      هههه هذي الوصفه تستخدم سكر اقل من باقي الوصفات صدقيني ما تقدرين تعدلين اكثر من كذا . التزمي بالوصفه بالحرف. الحشوه المستخدمه بتأثر كثيييير في حلاوه الماكرةن ككل. الحشوات لازم تكون دسمه مره او حامضه او شوي مره عشان تقلل الحلاوه في الماكرون ككل.

        • لمياء on 18 March, 2012 at 3:04 pm
        • Reply

        اختي فطومة انا جربت طريقة تانية السكر فيها اخف وظبطت معايا مرة،،
        انه يكون السكر البودرة ٢١٠ جرام
        واللوز ١٢٥ جرام
        والسكر العادي ٣٠ جرام اللي ينضاف للمارينج
        حسيت السكر صار اقل وظبط

        بالنسبة للسيولة انا قريت في منتدى انه ممكن نضيف شي اسمه cream of tarter كريم اوف تارتر ملعقة صغيرة عشان نحافظ على سيولته،، وبرضه انا باستخدمه لما احط الوان سايلة عشان احافظ عالسيولة.
        بس زي ما قال الشيف اهم شي ما تزودين خلط وما تكثري مويا
        انا باحط ملعقة صغييرة مويا دافية مع ملعقة صغيرة نسكافيه لما باسوي نكهة الكابتشينو وبتطلع روعة بس الشوكولاتة باحطها من غير مويا
        والله يوفقك

          • Top Chef on 18 March, 2012 at 3:46 pm
            Author

          مع أحترامي لك بس الطريقة موب طريقة ثانية هي نفس الطريقة بالضبط مع تقليل السكر البودرة ١٥ جرام ، ١٥ جرام سكر بودرة هذي أقل من ملعقة صغيرة هههههه صدقيني موب هي اللي سوت الفرق في الحلاوه. في الحلويات إحنا نمشي على نسب ثابتة للمواد لبعض وعند الطباخ حرية بسيطة في هذي النسب بس بشكل عام كل الوصفات اللي بتشوفين هي نفس الوصفة تقريبا.

          الكلام اللي قرأتيه في المنتدى خطأ ، كريمة الترتار مالها أي أي أي علاقة بسيولة المرانج لو قرأتي موضوع المرانج اللي تكلمت فيه بالتفصيل عن دور الأحماض بتعرفين إن كريمة الترتار وظيفتها تثبت المرانج بس ! يعني تخليه يحافظ على قوامه وقت أطول هذا مهم لو كنا بنسوي شي زي كيك إسفنجي أو مرانج في الفرن بس في الماكرون إحنا قاعدين أصلا نهدم المرانج حقنا بالخلط بس الهدم هذا يكون موزون إننا ما نهدم منه أكثر من اللازم وبكذا يصير سايل أكثر من اللازم وعشان كذا قلت إن المشكلة في الخلط.

    • mouzan on 13 March, 2012 at 10:11 am
    • Reply

    ما شاء الله تبارك الله شرح وافي ومفصل جاري التطبيق دعواتكم لي بالنجاح

    • SoMh on 23 February, 2012 at 11:24 pm
    • Reply

    يعطيك العافيه شيف

    انت تقول موجوده في السعوديه سجادة السيليكون
    ممكن تقولي فين احصلها ؟؟ علما باني في جده ؟؟؟؟

    وبالنسبه للالوان البورده فين ممكن احصلها كمان ؟؟؟؟

    وشكراً …

    1. موجودة في تافولا وموجودة في أي محل متخصص في الكيك مفروض ، الألوان البودرة شفتها بكذا سوبرماركت، أحيانا بيكتبون عليها أشياء زي صفار بيض يقصدون هنا أصفر مثل صفار البيض مالها علاقه بصفار البيض كماده وبتلاقين ألوان ثانيه بعد بس كلها موصوفة بأكلات.

    • لموناضة on 3 February, 2012 at 1:12 am
    • Reply

    بما أني في طور التدريب ينفع استخدم نصف الكمية من كل شي عشان لا اضيع مواد عالفاضي؟؟؟؟ شكرًا

    1. ينفع بس ما أنصحك. خلط الكميات البسيطة مره هذي غير كل شي يصير أسرع.

    • حنان on 3 February, 2012 at 12:26 am
    • Reply

    تسلم أخوي عالوصفة الدقيقة الواضحة،،
    وبس سؤال لو تكرمت:
    أنا الماكرون عندي ما تتكون له قشرة كويس! مع اني باخليه برا اكثر من ساعة! ايش السبب برأيك؟؟

    1. غالبا السبب الرطوبه عندك. شغلي الفرن على أقل حراره عندك وحطي الصياني فيها كم دقيقه تجف بعدين طلعي الصياني وشغلي الفرن على حراره الطبخ وكملي عادي . بالعربي جربي تجففين القشرة في الفرن.

      1. يعني ينفع أخلي الفرن على 100 درجة لمدة 5 دقايق مثلا؟؟؟؟

          • Top Chef on 3 February, 2012 at 10:23 pm
            Author

          أقل حراره وإلين ما تجف. إذا أقل حراره فرنك يشتغل عليها ١٠٠ حطيها على ميه. كم تقعد ما أعرف بس إلين ما تجف يعني يتكون عليها قشره وتصير ما تتلصق إذا لمستيها بطرف أصبعك.

    • حنان الشامسي on 30 January, 2012 at 9:30 pm
    • Reply

    مرحبا .. اول شي حابة اشكرك على المعلومات القيمة والمجهود الواضح .. الله يعطيك العافية ويبارك فيك . .
    بالنسبة لسؤالي عملت المكرون بالطريقة المذكورة وتركته يرتاح تقريبا ساعة الا ربع ودخلته الفرن لمدة 12 دقيقة وكان في الفرن شكله ممتاز لكن بعد ماطلعته هبط شوي هو مااخترب شكله لكن كان افضل وهو بالفرن وتكونت معاي ياقة متوسطة يعني بشكل عام كان جيد جدا لكن لما برد شوي وجيت اشيل الحبات كانت لينة من تحت كانها مااستوت مضبوط ولاصقة ولما اشيلها تنشال معي القشرة وباقي المكرون لاصق رغم اني استعملت قوالب سليكون خاصة بالمكرون بس مو عارفة ايش المشكلة حبيت انزل صورة للمكرون لكن ماعرفت الطريقة اتمنى الاقي عندك الحل

    1. الماكرون راح يهبط أكيد بعد ما يطلع من الفرن هذي دايما تصير عادي. بعد ما تطلعينه خليه يبرد تماااااما قبل تحاولين تشيلينه بعد ما يطلع بيكون شوي لين لازم السكر اللي في الماكرون يتصلب ويبرد عشان تقدرين تشيلينه بسهولة.

  8. MashAllah , Your explanation is very clear =)
    I don’t understand Why some people don’t wanna read
    before they ask !!! : … you are patient …
    well done Top Chef
    I’ll try your recipe soon inshAllah ^_^
    keep up your great work

    1. مشكوره …

      وإذا على الأسئلة مسكينه والله ما شفتي شي واللي يقهر إن كثير يزعلون إذا قلت شوفي الموضوع.

  9. يسعد أيامك بكل ماهو جميل…
    السلام عليكم ورحمة الله…

    من خلال مدونتك..شجعتني أجرب الكثير من أطباقك..
    فلك جزيل الشكر وخالص الدعوات..الله يوفقك يارب

    أكثر طبق متحمسة له…الماكرون
    أمنيتي يضبط معي..

    سويته ثلاث مرات
    المرة الأخيرة هي اللي كانت أقرب للنجاح
    وهي اكثر وحدة كنت ملتزمة فيها بالقياسات والطريقة 🙂 >>كان طعمها بيرفكت رائع جدا
    لكن النتيجة فاشلة…

    ومع هذا تحمست أكثر أسويها مرة ثانية..لأن طعمها كان فوق ما أتصورت … أحلا بكثير من الجاهز
    لكن قبل ما أتجرأ واسويها ودي بملاحضاتك على,, طريقتي وسبب النتيجة..”الفاشلة” ..><"

    http://upload.traidnt.net/upfiles/1O439832.jpg

    هنا كانت قبل الفرن..باستراحة النص ساعة

    http://upload.traidnt.net/upfiles/7vw40435.jpg

    http://upload.traidnt.net/upfiles/lJY40474.jpg

    .أتوقع ان الفرن ما كان بدرجة الحرارة المطلوبة ..!!

    http://upload.traidnt.net/upfiles/DBk40525.jpg

    هنا خليتها وقت أكثر..
    ومازلت المشكلة…فتوقعت أنها تحتاج وقت أكثر
    أو أني ما حركتها كثير .
    ما أدري ش السبب بالضبط

    أعتذر عن الأطالة…
    شاكرة لك ومقدرة…

    1. وعليكم السلام و الرحمة ….

      أفضل شي سويتيه هو إنك صورتي النتيجة ما تتخيلين كيف هذا يسهل الموضوع علي وعليك.

      ما أتوقع عندك مشاكل خلط اللي باين من الصوره الأولى هو إن الخلط كذا ممتاز.

      فيه كذا سبب للمشكله اللي عندك راح أعطيك حلولهم بالتدريج إن شاء الله الحل يكون من أول سبب وما تضطرين تجربين أكثر.

      الإحتمال الأول هو إن الماكرون ما كون قشره قويه قبل يدخل الفرن. إذا كنتي في مكان رطب أو كان بيتكم رطب يمكن ياخذ الموضوع أكثر من نص ساعة تجفيف. خلي الماكرون ينشف إلين يصير إذا لمستيه ما يلصق على يدك يعني يكون عليه طبقه جافه. أتوقع هذا هو السبب الأكبر جربي تخلينه ينشف زي ماقلت قبل تجربين باقي الحلول.

      الإحتمال الثاني هو إن الفرن فيه مشكلة توزيع حراره ، لو لاحظتي في الصوره بتلاقين القشره تنفش من أماكن وأماكن لأ وهذا يصير إذا وصلت الحراره لأماكن أسرع من أماكن ثانيه. إذا كان الفرن فيه مروحه طفيها هذي ممكن تسبب هذي المشكله هنا هذا أول شي. الشي الثاني هو إنه يبيلك تحطين صينيتين فرن فوق بعض عشان توزعين الحراره بشكل أفضل.

      الإحتمال الثالث هو إن فرنك شوي أبرد من المطلوب لو أستمرت المشكله جربي ترفعين الحراره ل ٣٥٠ وتجربين مره ثانيه.

      إذا ما نفعت هذي الطرق فيه حل ثاني بس بعيد شوي بس أتوقع إن شاء الله إن حلها في الحل الأول.

  10. طيب لو سمحت يا أستاذ شيف,, أنا فرني مافيه حرارة من تحت,, بس من فوق !! ينفع أخلي صينية الماكرون في آخر رف من تحت؟؟ أمس عملت كده وكان كل شيء مظبوط لكن للأسف خرجت الخلطة من تحت الماكرون رغم انه القشرة اللي فوق ما صار لها شي وكانت روعة! هل يكون هذا بسبب الفرن؟؟
    وإذا بسببه فأنا عندي فرن صغييير فيه من تحت أو من فوق أقدر أضبطه,, لكن ماعرف كم الحرارة المطلوبه فيه!! لأنه يسخن بسرعة مو زي الفرن الكبير,,
    وشكككرا جزيلا

    1. من الأخير عشان لا تتعبين نفسك ، للماكرون تحتاجين فرن زي الناس. موب بس المكارون كل المعجنات الحساسه تحتاج فرن مضبوووووط.

      صدقيني أقولك الكلام هذا عشان لا تتعبين نفسك عالفاضي، بأفران جيده وشوفي تحت كم وحده تشتكي إنه ما ضبط فإنك تزيدين عامل ثاني على الموضوع ممكن يسبب خرابه عليك تصعبين الموضوع على نفسك أكثر و أكثر.

      1. بس هو من الأفران الجديدة توني مشتريته!!!
        طيب ما رديت لي ممكن أستخدم الفرن الصغير؟؟ وعلى أي حرارة؟؟ مع العلم إنه في مرة ظبط معايا فيه بس كان فيه فقاعة هواء داخله.
        وبالنسبة للفرن الكبير جربت كذا مرة فيه ظبط شوية بس ما برتفع الماكرون ولا بيحصل له ياقة! عشان كده تصير له شقوق خفيفة عالسطح! فيه حل؟
        وجزيت خيرا

          • Top Chef on 7 January, 2012 at 4:49 pm
            Author

          أنا ماقلت فرن جديد أنا قلت فرن طبيعي يشتغل من تحت وله حراره تنضبط عادي.

          الفرن سواء صغير أو كبير تمشين على التعليمات اللي في الموضوع. الأفران الصغيره ٩٩٪ ما تكون مضبوطه وتمسك حراراتها بشكل جيد وهذا الشي هو عدو الماكرون.

          مافيه ماكرون نص ظابط يا يكون مضبوط يا لأ المفروض يكون بالمواصفات اللي كتبت في الموضوع له ياقه وهش وبدون فراغ من داخل.

    • ساره on 16 December, 2011 at 6:59 am
    • Reply

    لقيت الجواب بعد ماطلعت عيوني وانا اعيد القراءه في الموضوع ليتك قايل لي في فقرة اللوز علشان اروح لها على طول على بالي لها فقرة بالحالها 🙂

    طيب الحين مقدار اللوز 125 غ ,, اقدر ابدل 65 غ لوز ببودرة كاكاو ؟؟ هل المقدار جيد او قليل او كثير ؟؟ افدني بخبراتك الله يجزاك خير

    1. “أبدأوا مثلا بربع وزن اللوز وبعدين شوفوا النتيجة ، هل أثر التبديل على نفش الماكرون ؟ هل الطعم و اللون المرغوب من التبديل واضح ولا لأ ؟ إذا مثلا لقيتوا إن الماكرون ما نفش زين معناها إن التبديل يمكن أثر بالسلب نقصوا الكمية . لو لقيتوا إنه نفش بس مثلا مافيه طعم كاكاو واضح معناها إنه يمديكم تزيدون الكمية عشان تزيدون الطعم و اللون .” الجواب في الموضوع زي ماقلت أول.

      الموضوع فيه كل شي عشان كذا الصراحة أستغرب إذا جاني أحد يسألني عن نقطه مكتوبه وبوضوح في الموضوع. اللي يسأل عن شي زي كذا غالبا يا إنه ما قرأ الموضوع وهنا أقوله رح أقرأ الموضوع فيه الجواب أو إنه ما يبي يقرأ الموضوع ويبيني أعطيه الجواب عشان لا يتعب نفسه في القراءه وهنا بعد أقوله أقرأ الموضوع لأني أعطيك المعلومه كامله عشان أتفادى الإجابه على أجوبه فرديه.

  11. السلام عليكم
    ماشاءالله عليك والله لايضرك
    الماكرون اكله لما اسافر كثير وخبصت الدنيا لجل اصلحه صلحته تقريبا ١٦ مره وكل مره يصير فيه شي احد داعي عليه او لاني متحمسه جدا له
    يا يصير سايل ويتمدد بالفرن او يصير شكله تمام بس تتكسر القشره من فوق او يصير كوكيز فاقد هشاشته وكاني اكل بسكوت او يحترق من القاعده ومن فوق حدث ولا حرج 🙂 مااعرف وش الخطا صراحه جربت كثير وصفات مختلفه وجربت كثير مقادير مافيه فايده وحرام نعمة ربي وتعبي كله ينرمى بالاخر شبيه الماكرون بالسله تكرمون
    ابي اسالك ولا هنت بما اني مافقدت الامل ومازلت لهاليوم احاول فيه وبكل الطرق الممكنه لجل يصير ماكرون عاقل وتمام
    شبيه الماكرون ممكن اعيد استخدامه واستفيد منه بشي ثاني بدل ماينرمى ؟ ولا خلاص ماينفع ؟
    واذا كان ممكن استفيد منه علمني لاهنت وش الوصفات الي ممكن استخدمه فيها ؟
    مع ان طعمه عادي جدا جدا
    ممكن تفيدني لو سمحت وبكذا نكون استفدنا ومابذرنا بنعم ربي لان اكيد مو بس انا الي يخرب معاي وارميه اكيد فيه غيري يصلحون ويخرب وبالاخر يرمونه
    اخيرا اسفه عالاطاله
    والله يعطيك العافيه

    1. وعليكم السلام و الرحمه …

      كل مشكله لها سبب وإذا قعدتي تدورين وصفات غير كل مره عمرك مابتحلين هذي المشاكل، بكون جدا صريح معك بس أحيانا الخطأ من التطبيق هذا إذا ماكان ٩٠٪ من المشاكل اللي موجوده في الطبخ الخطأ من التطبيق موب الوصفه. أبدي حلي مشاكلك مشكله مشكله ، سويي وصفه وشوفي المشكله وحليها بدون تغير أي شي وبعدين عيديها وأستمري على هذي الطريقة إلين يضبط الأكل.

      الماكرون الخربان له إستخدامات ، لا تنسين إنه كوكيز أولا و أخيرا. أغلب الماكرون الخربان ممكن يستخدم إلا إذا كان محروق هنا مالك إلا ترمينه لأنه موب بس ماله فايده بيخرب بعد طعم أي شي ينحط معه. جربي تكسرين الماكرون الخربان وتستخدمينه كطبقه مقرمه في الحلويات تعطي قرمشه حلوه مع أشياء زي الموس أو في إسكريم أو كزينه على صحن أو تغطين فيه أطراف كيك مثلا أو حتى يمديك ترصينه وتستخدمينه قاعده لتشيز كيك بارد (ماجربتها بس أعتقد ينفع) ، يمديك بعد تحطينه كطبقه في ترايفل أو أي بارفيه أو حلى طبقات. يمديك تحطينه في خلاط مع حليب وتصفينه وتسوين شي زي ملك شيك ماكرون ( فيه ناس يقدمونه مع الماكرون بعد حركه حلوه ) ….

    • ساره on 14 December, 2011 at 11:21 am
    • Reply

    قصدك بالمقطع اليويوب بلقاه ؟
    اوكي عرفت مقادير مسحوق اللوز 250 غ , السكر البودرة 450 غ ,ومسحوق الكاكاو 40 غ صح ؟؟
    لكن لما جا يسوي المرانج حط مقدار بيض ماعرفت كم واليمون والسكر بعد ماعرفت كم مقاديرهم ؟؟؟

    اذا انا مافهمت ياليت تعلمني واسسفه على هالازعاج

    1. الجواب في الموضوع قصدي بالموضوع الكلام اللي كاتب المقطع هذا مالي علاقه فيه هو بس عشان تعرفين قوام الخليط كيف مفروض يكون لا أكثر ماعليك من الكميات اللي مكتوبه هناك.

    • ساره on 14 December, 2011 at 8:39 am
    • Reply

    السلام عليكم اخوي

    الله يجزاك خير على هالمجهود الرائع ماشاءالله تبارك الله

    ابي اسالك كيف اسوي ماكارون بالشوكولاتة يعني لونه بني بدون اضافة لون بني ؟؟؟

    1. جربتي تقرين الموضوع وتدورين الجواب هناك ؟

    • hanan on 10 December, 2011 at 9:57 pm
    • Reply

    :):):)
    مليون شكر لك اليوم سويته بدون اضافات واول ماشفت القاعده وانا طايره من الفرح ربي يسعدك وبعد اذنك عندي سؤال لمن اعمله المره الجايه واضيف الوان باودر يعني ملعقه صغيره لون يستدعي انزع ملعقه من اللوز او السكر او ما يأثرواذا سايل اضيفه في اخر مرحله للميرانج وممكن مثلا اضيف lemon essence بدون ما يخربه علي .
    وماقصرت على طولت بالك وذوقك

    1. كل الإضافات هذي كونها بكميات صغيره مره ما تأثر.

    • hanan on 8 December, 2011 at 3:36 pm
    • Reply

    ,والله ياشيف قريته يوميا و ممكن لي شهراعيد وازيد فيه وقريت موضوعك اكثر شي ومواضيع اجنبيه بس الحق ينقال موضوعك اجمل وأوفى شي قريته وعملته اول مره عرفت الغلط من كثر خوفي اخلطه اكثر من اللازم وطلع معاي ميرانج كوكيز ومرتين طلع سايل وماني عارفه ايش المشكله ومصممه يضبط معاي
    والف الف شكر على سرعة ردودك انا ميمبر في كثير منتديات اجنبيه للطبخ عمره ماحد رد بسرعة ردك ربي يحقق لك كل امنياتك مثل مانتا مساعدنا

    1. جربي أخلطي أقل و أقل حتى لو حسيتي إنك ماخلطتي أبدا شوي شوي بتعرفين الفرق بين الخلط أكثر من اللازم و أقل من اللازم. المرانج ماراح يتحول من جامد لسايل كذا في لحظه أكيد فيه مرحلة في النص يكون صح.

  1. […] ثانية زي السوفليه و الكيك الإسفنجي وأنواع و أنواع من الكوكيز و البيتي فور ، ندهن المعجنات بشوي بيض وتعطيها لمعة […]

Leave a Reply to ]ديما Cancel reply

Your email address will not be published.

%d bloggers like this: