هلا والله …..

الماكرون الفرنسي هو المحطة الأخيره في مواضيع الماكرون اللي نزلتها الفترة اللي راحت . هذا الحلى ما أنتشر حولين العالم وصارت الصجه و اللجه عليه إلا قريب ، ما أتكلم عن الإنتشار في السعوديه بس أنا أتكلم عن الإنتشار العالمي . من زمان كان الماكرون معروف بس في فرنسا تقريبا وفيه بعض المحلات اللي تسويه برا فرنسا . بس مع الوقت بدأ ينتشر في كل أنحاء العالم وبشكل سريع بعد .هذا فتح مجال كبير للإبتكار وصرنا نشوف نكهات جديده وغير مألوفه .

الوصف و التركيب

الماكرون عبارة عن كوكيز بياض بيض قريب جدا للماكروون الأمريكي . كل حبتين كوكيز في الغالب ملصقة بحشوة عشان تكون الماكرون اللي نعرفه .

الماكرون مفروض يكون لذيذ ( يعني مافيه ريحة أو طعم غريبة ) ولين ويتكسر و يذوب في الفم من أول قضمة بدون ما تواجهون أي صعوبه من إنه يكون ناشف أكثر من اللازم أو يكون لين بحيث الحشوه تطيح و أنتم ماسكينة .

هذا شكل الكوكيز حق الماكرون . نلاحظ هنا إن القبة ناعمة ومتماسكة بدون أي تشققات . نلاحظ بعد شي مهم جدا اللي هو الرجول أو الياقة حقت الماكرون . الحجم أو قطر الحبة يتراوح حسب الرغبة بعض الماكرون يكون كبار مره وبعضة يكون صغير مره ينوكل مرة وحدة . شي مهم بعد هو إن الكوكيز ما يكون فيه فراغ هواء كبير تحت القشرة . الماكرون موب صعب أبدا بس هو موب واحد من الأشياء المتسامحة مرة في الأخطاء في التفيذ .

المكونات و الأدوات

الماكرون الفرنسي يتكون من بياض بيض ، دقيق لوز ، سكر مطحون وسكر عادي . هذا في الأساس طبعا بس ألوان الأكل و إضافات لتغيير أو تعديل النكهة بعد ممكنة . طريقة العمل بإختصار شديد هي إننا راح نسوي مرانج عادي ببياض البيض و السكر العادي وبعدين نخلط عليهم اللوز و السكر المطحون عشان نكون الخليط .

* البيض :

في الماكرون راح نستخدم بس بياض البيض . البياض هنا راح نسوي منه مرانج فرنسي أو إيطالي عشان يوفر الرفع للماكرون حقنا . عشان كذا مهم إننا نسوي أفضل و أقوى مرانج نقدر عليه .
البيض المستخدم دايما يكون على حرارة الغرفة ومخفوق بنفس الشروط اللي حطيت في موضوع المرانج الفرنسي . طريقة الماكرون بالمرانج الإيطالي تستخدم أحيانا ومفضلة من طباخين كثير كون المرانج الإيطالي ثابت أكثر و راح يستحمل أكثر و هذا يعني فرص نجاح أكبر للماكرون . بالنسبة للطعم المرانج الإيطالي و الفرنسي واحد . طريقة الماكرون بالمرانج الإيطالي هي المفضلة بعد في الحالات اللي يكون الجو رطب فيها كون المرانج الفرنسي يتأثر بقوة بالرطوبة حقت الجو .
لو كان الوقت موب مشكلة وراح تسوون الماكرون بمرانج فرنسي يفضل إنكم تتركون البياض بعد ما توزنونه على حرارة الغرفة ٢٤ ساعة . هذا راح يعطي تأمين للماكرون حقكم شوي ، البيض وهو قاعد راح يتبخر جزأ من المويه اللي فيه وهذا يعني مرانج ثابت أكثر . هو موب شرط أساسي للنجاح بس حلو الواحد ياخذ تأمين .

* اللوز :

اللوز هو النكهة الأساسية للماكرون الفرنسي . اللوز المستخدم هو اللوز المطحون الناعم . نعومة اللوز هي اللي راح تخلي القبة حقت الماكرون ناعمة بدال ما تكون خشنة . لو كان اللوز فيه قطع كبيره يمكن تمنع المرانج ينفش ويرفع الماكرون .
أكثر الناس يسأل من وين أجيب اللوز ؟ اللوز المطحون متوفر ومنتشر في كل سوبرماركت أو محل مكسرات أهم شي تأكدوا إنكم تنخلون اللوز قبل الوزن . ممكن تبديل جزأ من اللوز بنوع مكسرات ثانيه مطحونة ( بيكان ، جوز ، صنوبر ، فستق ، كاجو ولو إنه صعب ، مكادميا … إلخ ) أو حتى بودرة كاكاو ( عشان تسوون ماكرون بالشكولاته ) أو جوز هند ( عشان تعطي طعم جوز هند للماكرون ) . في حالة التبديل مافيه قاعدة معينة جربوا بكمية وبعدين زيدوا أو نقصوا حسب النتيجة المطلوبة . أبدأوا مثلا بربع وزن اللوز وبعدين شوفوا النتيجة ، هل أثر التبديل على نفش الماكرون ؟ هل الطعم و اللون المرغوب من التبديل واضح ولا لأ ؟ إذا مثلا لقيتوا إن الماكرون ما نفش زين معناها إن التبديل يمكن أثر بالسلب نقصوا الكمية . لو لقيتوا إنه نفش بس مثلا مافيه طعم كاكاو واضح معناها إنه يمديكم تزيدون الكمية عشان تزيدون الطعم و اللون .
جودة اللوز و المواد المستخدمه عموما لها تأثير كبير على طعم الماكرون ، تذكروا إن هذا هو النكهة الأساسية له وهذا اللي بيعطيه كل الطعم عشان كذا تأكدوا إن اللوز المستخدم من نوعية جيده وإنه موب خربان . المكسرات عموما كونها مليانه دهون هذي الدهون تتفكك و تتأكسد وتعطي نكهات وروائح سيئة . الطحن يسرع هذي العملية عشان كذا لو كان عندكم لوز باقي ( أو أي مكسرات عموما ) أحفظواه في علبة تتقفل بإحكام على حرارة الغرفة في مكان بارد وجاف حوالي شهر أو في الثلاجه 3 شهور أو أفضل حل في الفريزر إلى سنة .
طحن اللوز في البيت ممكن و جربتها للماكرون ونفعت عادي بس هي عملية شوي متعبة وغير عملية أبدا . أسهل حل هو شراء اللوز مطحون جاهز . الميزة الوحيدة من طحن اللوز في البيت هي إنكم متأكدين من جودة اللوز . المشكلة في طحن المكسرات في البيت هو كمية الدهن العالية فيها . إذا طحنا المكسرات الخلاط يسخن المكسرات وهذا يطلع الدهن فيها ويخليها تتحول لمعجون بدال ما تتحول لبودرة . إذا وصلنا مرحلة المعجون خلاص مافيه رجعة .

هذي أفضل طريقة لطحن المكسرات في البيت :

١ـ إذا كانت المكسرات مقشرة روحوا للخطوة رقم ٣ علطول . لو كانت المكسرات المستخدمه عليها قشرها أول شي تسوونه هو إنك تحطونها في مويه مغليه حوالي ٣٠ ثانية بعدين علطول شيلوها من المويه وحطوها على فوطة مطبخ كبيرة وغطوها بنص الفوطة الثاني . الحين أفركوا المكسرات بالفوطه زيييين وراح تلاقون القشر طاح .

٢ـ شيلوا المكسرات من الفوطه على فوطة مطبخ ناشفة ثانيه . خلوها طول الليل تجف . بعدين ثاني يوم حطوها في فرن بارد حرارته ٢٠٠ فهرنهايت حوالي ١٠ دقايق عشان تنشف تماما . طلعوها من الفرن و الحين صار عندكم مكسرات مقشرة زي حقت السوبرماركت .

٣ـ الحين عشان الطحن . حطوا المكسرات في الفريزر عشان تبرد تماما . هذا راح يخلي المكسرات باردة إذا جينا نطحنها وهذا راح يعطينا شوي وقت في الطحن وهذا يعني بودرة أنعم .

٤ـ حطوا كمية بسيطة من المكسرات في طاحونة قهوة نظيفة . ممكن إستخدام جهاز تحضير طعام بس ماراح يعطي بودرة ناعمة زي طاحونة القهوة . حطوا مع المكسرات جزأ من السكر المطحون اللي راح نخلطة مع للماكرون . هذا راح يشرب جزأ من الرطوبة و الزيت اللي يطلع  وبكذا يأخر الطحن أكثر .

٥ـ أطحنوا على ضغطات سريعة يعني لا تخلون الطاحونة شغالة وخلاص . إلين يبدأ يكون بودرة ناعمه . طلعوا الخليط و أنخلوه . و القطع اللي ما تنطحن رجعوها للطاحونة مع شوي لوز زياده .

٦ـ أستمروا على هذي الطريقة إلين ينطحن كل اللوز .

في حال تحول اللوز لمعجون و أنتم تطحنون لا تشيلون هم ولا ترمونه هو صح ما ينفع للماكرون بس هو لذيييييييذ لإستخدامات ثانيه هذا المعجون هو زبدة مكسرات زي ما زبدة الفول السوداني أو البينت بتر مصنوعة من فول سوداني هذي نفس المنتج بس مصنوع من مكسرات ثانيه .

*السكر :

في الماكرون نستخدم في الغالب نوعين سكر . سكر مطحون وسكر خشن عادي .
السكر المطحون هو اللي راح يحلي الماكرون . غير كذا السكر المطحون مع التحريك بيسحب جزأ من الرطوبة حقت المرانج وهذا اللي بيخلي الخليط حق الماكرون سايل يعني هو السائل في الكوكيز هذا وعشان كذا الكميات المضبوطه مهمه . تأكدوا إنكم تنخلون السكر المطحون قبل الإستخدام و الوزن . تأكدوا بعد إن السكر المطحون نااااااااعم يعني بودرة لا يكون خشن ولا ممكن يخرب الماكرون عليكم .

السكر الخشن يستخدم بكمية بسيطة عشان يثبت المرانج بس ( راجعوا موضوع المرانج الفرنسي ) .

* الألوان :

الألوان هي اللي راح تعطي الماكرون الألوان اللي معروف فيها . في الغالب اللون له علاقة بالحشوة يعني ما أسوي ماكرون أزرق و أحشيه شكولاته مثلا .

ألوان الأكل عموما المطلوب منها تلون بشكل جيد بدون ما تأثر في الوصفه نفسها سواء من ناحية الطعم أو غيره . فيه ثلاث أنواع رئيسية للألوان :

١ـ ألوان سايلة : هذي أسهل نوع ينخلط مع الأكل يعني ما تحتاج خلط كثير عشان تلون الأكل وهذي ميزة طبعا . بس مشكلتها إنها ضعيفة يعني ما تصبغ بشكل جيد غير كذا كونها سايله هذا ممكن يسبب مشكلة في بعض الوصفات . الشي الثاني هو إن هذي الألوان أحيانا ينحط معها إضافات وبعض هذي الإضافات تتفاعل مع الأكل بشكل غير مرغوب ويعطي نتيجة مختلفة عن المطلوب . مثلا بعضها معها جلسرين و الجلسرين مع شي زي الرويال آيسنج مثلا يخليه لين بدال ما يكون يتكسر في الفم ( طبعا في حال كان هذا المطلوب أصلا ) . عشان كذا هو خيار سيء للألوان . غير كذا بعضها إذا ماكان كلها لها تاريخ إنتهاء ، صح إنها مووب صايرة مضره لو أستخدمت بعد هذا التاريخ بس ممكن يضعف لونها أكثر . عموما مع هذا إلا إني قد سويت ماكرون بهذا النوع من الصبغات وما أثر أبدا .

٢ـ ألوان جيل : هنا يكون اللون على شكل سايل ثقيل تقريبا زي ثقل العسل . هذي الصبغات ينطبق عليها كل شي ينطبق على السايلة سواء من ناحية الإجابيات أو السلبيات بس راح تصبغ بشكل أفضل من السايلة . هذي بعد ما أفضل إستخدامها .

٣ـ ألوان بودرة : هنا عندنا لون صافي بدون أي إضافات أو تاريخ إنتهاء . هذي راح تصبغ أفضل من غيرها وبنفس الوقت ماراح تغير نسب المواد لبعض زي السائلات . هذي هي الخيار الأفضل لألوان الأكل .

في حال عدم توفر اللون المطلوب من الألوان تقدرون دايما تخلطون عدة ألوان عشان تكونون اللون المطلوب .

النكهات :

ممكن خلط نكهات سواء سائلة أو جامدة مع الخليط حق الماكرون . ممكن مثلا خلط خلاصات الفانيلا أو القهوة أو الموز أو أي خلاصة ثانيه عشان تعطي طعم يمشي مع الحشوة اللي راح تنحشى بعدين . ممكن بعد إستخدام أشياء زي البهارات عشان تأدي نفس الغرض .

الشي الوحيد اللي لازم تنتبهون له هنا هو إن الكمية تكون جدا بسيطة بحيث ما تأثر على نسب المواد لبعض بشكل كبير ممكن يخرب الماكرون .

ميزان :

مهم جدا يكون عندكم ميزان إذا حبيتوا تسوون ماكرون . من الحين أقول مافيه بديل ، الميزان مطلوب هنا . موازيين المطبخ متوفرة في كل مكان متأكد إن أي محل أواني منزلية عنده ميزان و بعد أسعارها جدا رخصية . عموما موازيين الطبخ موب بس للماكرون الميزان هو أدق طريقة لقياس المواد الجافة . كوب طحين عن كوب طحين يختلف و الإختلاف بعد كبير بس كيلو طحين هو كيلو طحين .

الموازيين الديجيتال أسهل للإستخدام كونها توفر خصائص ثانيه مثل تصفير الوزن و تغيير الوحده من الموازيين الأمريكية ( الباوند و الأونصة ) إلى الموازيين المترية ( الكيلو ، الجرام ) . إستخدام ميزان الديجيتال شي تافة :

١ـ نحط صحن فوق الميزان بعد ما نشغله .

٢ـ نختار الوحده اللي راح نقيس هل هي متري ولا أمريكي . غالبا فيه زر لتحويل الوحدة .

٣ـ نصفر الوزن حق الصحن . بعد غالبا في زر كذا .

٤ـ نحط الشي اللي نبي نوزنه إلين نوصل للوزن المكتوب في الوصفه .

٥ـ نبي نوزن شي ثاني سهل . نشيل الصحن ونحط صحن ثاني ونصفر ونرجع نقيس عااااادي .. بس .

كيس حلويات :

أي كيس حلويات ينفع أهم شي الراس يكون ١ سم على الأقل .

سيلبات ( سجادة سيليكون ) أو ورق بارتشمنت :

الماكرون مصنوع من بياض بيض وهو بروتين و البروتين يحب يلصق في أي شي عشان كذا مهمة جدا هذي الخطوة . راح تحتاجون ياورق بارتشمنت parchment اللي بعض الناس يسمونه ورق زبده أو لو عندكم سيلبات اللي هي سجادة السيليكون يكون أسهلكم بعد . السيلبات موجوده ومتوفرة في السعودية وشفتها في كذا محل أسألوا عن سجادة سيليكون وهم بيعرفون ما يحتاج يكون نوعها سيلبات هي بس ماركة لا أكثر . ورق البارتشمنت بعد في كل سوبرماركت جنب القصدير في الغالب .

ورق الزبده الأصلي وورق الشمع ما ينفع في حالتنا هنا .

هذي صورة للأدوات :

الوصفة و الطريقة

المقادير :

110 جم بياض بيض

30 جم سكر عادي

125 جم لوز

225 جم سكر مطحون

ألوان أكل حسب الرغبة

هذي الوصفة الأساسية للماكرون بالمرانج الفرنسي .

الطريقة :

١ـ نجهز كل شي . ننخل اللوز و السكر المطحون ، بعدين نوزنهم ونحطهم في صحن واحد . أرجع و أقول زي ماقلت كثير مافيه بديل للوزن في الماكرون لحد يجيني يقوللي أبغى المقادير بالكوب و الكاس و الملعقة لأن صعب جدا عمل ماكرون بقياسات موب دقيقة . بعدين نخلط اللوز و السكر المطحون مع بعض بشوكه عشان يتداخلون في بعض . نوزن البيض ونجهزة . ونوزن السكر العادي بعد .

٢ـ   نسوي مرانج بالبيض و السكر ونخليه يوصل مرحلة منقار الطير . اللي ما شاف موضوع المرانج أو ما يدري وش المرانج يشوف هنا. المرانج اللي في الموضوع مرانج فرنسي بس ممكن عمل الماكرون بالمرانج الإيطالي بعد ،بنفس الخطوات الجاية تقريبا يعني بس نوع المرانج هو اللي يتغير .

٣ـ الحين نكب خليط اللوز و السكر و الألوان و النكهات المستخدمه على المرانج .

٤ـ الحين الخطوة الأهم الخلط . أغلب المشاكل حقت الماكرون تجي من الخلط . اللي يسير و إحنا نخلط موب بس إن المقادير راح تنخلط مع بعض . السكر البودرة راح يسحب شوي من الرطوبة حقت المرانج وهذا راح يفجر بعض الفقاعات حقت الهواء مع التحريك العملية هذي تتسرع بعد . عشان كذا كل ما خلطنا بنلاقي إن الخليط صار سايل أكثر و أكثر . لو حركنا أكثر من اللازم فقاعات كثير راح تتفجر ويمكن ما توفر الرفع اللازم للماكرون وينتج ماكرون مسطح . لو خلطنا أقل من اللازم بيصير عندنا خليط ثقيل مره وصعب تشكيلة وبعد بيصير عندنا هواء أكثر من اللازم في الخليط وهذا يعني نفش أكثر من اللازم في الفرن و الماكرون راح ينفش في البدايلة بعدين راح يطيح ويصير بعد مسطح ومشقق . عشان كذا الخلط للدرجة المثالية مهم .
أخلطوا المواد الجافة مع المرانج بملعقة مطاط شوي شوي في البداية إلين تترطب المواد بعدين كملوا خلط عادي إلين توصلون الدرجة المثالية . في البداية الخليط بيكون ثقيل شوي وقاسي بس مع الخلط بيلين شوي . عشان تختبرون الخليط إنه وصل للمرحلة المثالية أرفعوا الملعقة حقت الخلط والمفروض يطيح الخليط من الملعقة على شكل كتل .

شوفوا الفيديو هذا من دقيقة ٥ بالذات هذا بالضبط هو القوام اللي تبغونه .

٥ـ الحين ننقل الخليط لكيس الحلويات ونجهز صياني الفرن بعد ما نغطيها ببارتشمنت أو سيلبات .

٦ـ الحين نبدأ نصب الخليط على شكل دوائر قطرها ١-٢ سم أو حسب الرغبة . خلوا مساحات بين حبات الماكرون عشان تعطونها مساحة تنتشر وعشان الهواء يسخنهم بالتساوي في الفرن . أفضل طريقة للصب هي إنكم تحطون الراس قريب من الصينية وتصبون في مكان واحد وخلوا الخليط ينتشر وهذا راح يعطيكم دائرة متساوية . لو لقيتوا حبات شكلها غلط أو لها راس موب مشكلة راح نصلحها في الخطوة اللي بعدها .

لاحظوا الأشكال فيها مشاكل عاااادي لا تشيلون هم .

٧ـ الحين عشان نصلح أخطاء الصب . نبلل أصبع بشوي مويه ونبدأ نصلح الخليط المصبوب بيدنا شوي شوي .

٨ ـ الحين نشغل الفرن على ٣٢٥ من تحت بس !! وتأكدوا إن المروحة اللي في الخلف لو كانت موجودة طافية هذي المروحة قوية على الماكرون وممكن تخربه . بعدين نحط الصياني اللي شكلناها على طاولة المطبخ نص ساعة  على الأقل ترتاح ( سامعين على طاولة المطبخ موب في الفرن هههه ) . هذي الفترة راح تعطي الماكرون قشرة عالوجه هذي راح تساعده ينفش بالتساوي في الفرن ويكون ياقة . لو كنتوا مستخدمين مرانج إيطالي هذي الخطوة مالها داعي وغير مطلوبة يعني أخلطوا ، شكلوا وحطوها في الفرن علطول .

٩ـ الحين نحط الصينية في الفرن في الرف الأوسط حوالي ١١ دقيقة  . المفروض الماكرون يكون له ياقة وما يكون تلون بلون غامق أو صار قاسي أكثر من اللازم . حطوا الصياني صينية صينية لا تحطونهم كلهم مع بعض .

١٠ ـ خلوها تبرد تماما . راح تلاحظون إنها لاصقة بالصينية وهي حارة هذا شي طبيعي خلوها تبرد وراح تفك .

بس هذا الماكرون . تقدرون تحشونة وتاكلون على طول أو لو تبون أحسن بعد خلوه في الثلاجه يوم قبل تاكلونه عشان النكهات تتمازج صح بعدين طلعوه من الثلاجه و خلوه يوصل حرارة الغرفة قبل الأكل . لو تبون تحفظونه وقت أطول ممكن بعد حطوه في أكياس وخلوه في الفريزر بدون حشي ! كثييييير أصلا من محلات الماكرون وحتى الكبار مره يسوون كذا . الماكرون ماراح يتأثر بالفريزر كثير . أهم شي تخلونه يذوب زين وتاكلونه على حرارة الغرفه موب بارد .

الحشوات

كل يوم أشوف حشوات ماكرون مبتكرة وجديدة ، شفت حشوات بكبد البط ، بالكتشب ، بالفاصوليا الحلوه وحتى بالفقع ومتأكد إن فيه غيرها أغرب بعد . بس هذا إن دل على شي فهو يدل إن مافيه قواعد هنا أي شي تشوفون إنه ممكن يمشي مع الماكرون ينفع يتسوى منه حشوه .

الحشوات ممكن تكون جاناش سواء عادي أو حتى مخفوق ، نوتيلا ،  ممكن تكون موس مثبت من أي نوع وبأي نكهة، ممكن تكون كريمة مخفوقة مثبتة بجيلاتين وبعد بأي نكهة ، ممكن تكون بتر كريم أي نوع و بأي نكهة، ممكن إستخدام تقريبا كل تغطيات الكيك ، ممكن إستخدام أي معجون لذيذ مثل البينت بتر مثلا أو مثلا فستق مطحون ، ممكن إستخدام مارزبان أو ممكن إستخدام مربى عادية . ممكن بعد خلط كذا واحد من هذي الحشوات عشان تسوون حشوات مبتكرة مثل حشوة البينت بتر مع المربى مثلا . مافيه قواعد كثير هنا أهم شي الحشوة ما تكون سايلة أكثر من اللازم بحيث تذوب الماكرون ولا تكون قوية مره بحيث إنها تغطي على طعم الكوكيز تقريبا بس هذي القواعد هنا .

إذا جيتوا تحشون ممكن تستخدمون يا كيس حلويات صغير أو حتى ملعقة عادية .

مشاكل الماكرون وحلولها

إذا ما ضبط الماكرون معكم أول كم مرة لا تستعجلون كل فشل هو خطوة للنجاح أهم شي تعرفون وش المشكلة وليش فشل وتحلونها بس . الماكرون كوكيز شوي حساس خلط خطأ أو فرن حار أكثر من اللازم ممكن يخربه بغمضة عين .عشان كذا دايما نحاول إننا نثبت الوصفه هنا بحيث إننا نتأكد إن الخطأ كان من التنفيذ موب في الوصفه نفسها وعشان كذا إحنا نستخدم الوزن في القياس هنا .

حرارة الفرن بعد عامل ثاني ، الأفران لها دورة يعني تشتغل بعدين تطفى بعدين تشتغل وتطفى وكذا بحيث الحرارة الداخليه تكون قريبه من الحرارة اللي مطلوبة .. بس بعض الأفران دقيقه أكثر من غيرها وبعضها بعيدة تمام عن الحرارة المطلوبة منها . الحل هنا هو إنكم تستخدمون ميزان حرارة فرن عشان تراقبون الحرارة داخل الفرن حقكم .

نجي للمشاكل العامة و إن شاء الله حلولها :

١ـ إذا الماكرون شكله سليم بس ماله ياقه أو الياقة صغيرة مره :

فيه ثلاث إحتمالات هنا . إما إنكم ما ريحتوه وقت كافي ، أو إنكم خلطتوه أكثر من اللازم أو إن الفرن شوي بارد .

خلوه يرتاح وقت أطول وجربوا ، لو ما راحت المشكلة جربوا تخلطون أقل يمكنكم خالطين أكثر من اللازم لو ماراحت كحل أخير أرفعوا حرارة الفرن شوي بس وجربوا من جديد .

ماكرون بدون ياقة

٢ـ إذا الماكرون ما له ياقة والقشرة من فوق مكسرة :
هنا في الغالب السبب هو الخلط أكثر من اللازم أو أقل من اللازم أو حرارة الفرن فيها مشكلة أو ما أرتاحت وقت كافي . الحل أخلطوا للدرجة الصح وبعدين تأكدوا من حرارة الفرن . في بعض الأفران ما يكون فيها تهوية للهواء حار هنا ممكن تحلين المشكلة بإنك تحطين ملعقة خشب على باب الفرن وتقفلينه بحيث يكون الباب شوييييي مفتوح .

ماكرون مكسر

٣ـ الماكرون له ياقة بس بدال ما ينفش على فوق الياقة عالجنب :

في الغالب معناها فرن حار أكثر من اللازم.

ياقة عالجنب

٤ ـ الخلطة سايلة :

في الغالب محركة أكثر من اللازم .

٥ ـ الخلطة ثقيلة :

في الغالب محركة أقل من اللازم .

٦ ـ القشرة موب ناعمة :

في الغالب اللوز شوي خشن .

٧ ـ القشرة فاضية ( فتحة هواء كبيره داخلها ) :

مخلوطة أكثر من اللازم ومطبوخة أقل من اللازم .

٨ ـ ماكرون لين وينكسر بسهولة :

مطبوخ أقل من اللازم ، فرن بارد ، مخلوط أكثر من اللازم ، مرانج فاشل .

٩ ـ ماكرون ناشف :

أنطبخ أكثر من اللازم .

بس هذا تقريبا كل شي عن الماكرون .

النتائج

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

ماكرون بحشوات مختلف : جاناش شكولاته ، فانيلا بتر كريم ، جوز هند ولوز