الماكرون ( الماكرون الفرنسي ) …. French macaron

هلا والله …..

الماكرون الفرنسي هو المحطة الأخيره في مواضيع الماكرون اللي نزلتها الفترة اللي راحت . هذا الحلى ما أنتشر حولين العالم وصارت الصجه و اللجه عليه إلا قريب ، ما أتكلم عن الإنتشار في السعوديه بس أنا أتكلم عن الإنتشار العالمي . من زمان كان الماكرون معروف بس في فرنسا تقريبا وفيه بعض المحلات اللي تسويه برا فرنسا . بس مع الوقت بدأ ينتشر في كل أنحاء العالم وبشكل سريع بعد .هذا فتح مجال كبير للإبتكار وصرنا نشوف نكهات جديده وغير مألوفه .


الوصف و التركيب


الماكرون عبارة عن كوكيز بياض بيض قريب جدا للماكروون الأمريكي . كل حبتين كوكيز في الغالب ملصقة بحشوة عشان تكون الماكرون اللي نعرفه .

الماكرون مفروض يكون لذيذ ( يعني مافيه ريحة أو طعم غريبة ) ولين ويتكسر و يذوب في الفم من أول قضمة بدون ما تواجهون أي صعوبه من إنه يكون ناشف أكثر من اللازم أو يكون لين بحيث الحشوه تطيح و أنتم ماسكينة .

ماكارون

هذا شكل الكوكيز حق الماكرون . نلاحظ هنا إن القبة ناعمة ومتماسكة بدون أي تشققات . نلاحظ بعد شي مهم جدا اللي هو الرجول أو الياقة حقت الماكرون . الحجم أو قطر الحبة يتراوح حسب الرغبة بعض الماكرون يكون كبار مره وبعضة يكون صغير مره ينوكل مرة وحدة . شي مهم بعد هو إن الكوكيز ما يكون فيه فراغ هواء كبير تحت القشرة . الماكرون موب صعب أبدا بس هو موب واحد من الأشياء المتسامحة مرة في الأخطاء في التفيذ .



المكونات و الأدوات


الماكرون الفرنسي يتكون من بياض بيض ، دقيق لوز ، سكر مطحون وسكر عادي . هذا في الأساس طبعا بس ألوان الأكل و إضافات لتغيير أو تعديل النكهة بعد ممكنة . طريقة العمل بإختصار شديد هي إننا راح نسوي مرانج عادي ببياض البيض و السكر العادي وبعدين نخلط عليهم اللوز و السكر المطحون عشان نكون الخليط .

* البيض :

في الماكرون راح نستخدم بس بياض البيض . البياض هنا راح نسوي منه مرانج فرنسي أو إيطالي عشان يوفر الرفع للماكرون حقنا . عشان كذا مهم إننا نسوي أفضل و أقوى مرانج نقدر عليه .
البيض المستخدم دايما يكون على حرارة الغرفة ومخفوق بنفس الشروط اللي حطيت في موضوع المرانج الفرنسي . طريقة الماكرون بالمرانج الإيطالي تستخدم أحيانا ومفضلة من طباخين كثير كون المرانج الإيطالي ثابت أكثر و راح يستحمل أكثر و هذا يعني فرص نجاح أكبر للماكرون . بالنسبة للطعم المرانج الإيطالي و الفرنسي واحد . طريقة الماكرون بالمرانج الإيطالي هي المفضلة بعد في الحالات اللي يكون الجو رطب فيها كون المرانج الفرنسي يتأثر بقوة بالرطوبة حقت الجو .
لو كان الوقت موب مشكلة وراح تسوون الماكرون بمرانج فرنسي يفضل إنكم تتركون البياض بعد ما توزنونه على حرارة الغرفة ٢٤ ساعة . هذا راح يعطي تأمين للماكرون حقكم شوي ، البيض وهو قاعد راح يتبخر جزأ من المويه اللي فيه وهذا يعني مرانج ثابت أكثر . هو موب شرط أساسي للنجاح بس حلو الواحد ياخذ تأمين .

* اللوز :

اللوز هو النكهة الأساسية للماكرون الفرنسي . اللوز المستخدم هو اللوز المطحون الناعم . نعومة اللوز هي اللي راح تخلي القبة حقت الماكرون ناعمة بدال ما تكون خشنة . لو كان اللوز فيه قطع كبيره يمكن تمنع المرانج ينفش ويرفع الماكرون .
أكثر الناس يسأل من وين أجيب اللوز ؟ اللوز المطحون متوفر ومنتشر في كل سوبرماركت أو محل مكسرات أهم شي تأكدوا إنكم تنخلون اللوز قبل الوزن . ممكن تبديل جزأ من اللوز بنوع مكسرات ثانيه مطحونة ( بيكان ، جوز ، صنوبر ، فستق ، كاجو ولو إنه صعب ، مكادميا … إلخ ) أو حتى بودرة كاكاو ( عشان تسوون ماكرون بالشكولاته ) أو جوز هند ( عشان تعطي طعم جوز هند للماكرون ) . في حالة التبديل مافيه قاعدة معينة جربوا بكمية وبعدين زيدوا أو نقصوا حسب النتيجة المطلوبة . أبدأوا مثلا بربع وزن اللوز وبعدين شوفوا النتيجة ، هل أثر التبديل على نفش الماكرون ؟ هل الطعم و اللون المرغوب من التبديل واضح ولا لأ ؟ إذا مثلا لقيتوا إن الماكرون ما نفش زين معناها إن التبديل يمكن أثر بالسلب نقصوا الكمية . لو لقيتوا إنه نفش بس مثلا مافيه طعم كاكاو واضح معناها إنه يمديكم تزيدون الكمية عشان تزيدون الطعم و اللون .
جودة اللوز و المواد المستخدمه عموما لها تأثير كبير على طعم الماكرون ، تذكروا إن هذا هو النكهة الأساسية له وهذا اللي بيعطيه كل الطعم عشان كذا تأكدوا إن اللوز المستخدم من نوعية جيده وإنه موب خربان . المكسرات عموما كونها مليانه دهون هذي الدهون تتفكك و تتأكسد وتعطي نكهات وروائح سيئة . الطحن يسرع هذي العملية عشان كذا لو كان عندكم لوز باقي ( أو أي مكسرات عموما ) أحفظواه في علبة تتقفل بإحكام على حرارة الغرفة في مكان بارد وجاف حوالي شهر أو في الثلاجه 3 شهور أو أفضل حل في الفريزر إلى سنة .
طحن اللوز في البيت ممكن و جربتها للماكرون ونفعت عادي بس هي عملية شوي متعبة وغير عملية أبدا . أسهل حل هو شراء اللوز مطحون جاهز . الميزة الوحيدة من طحن اللوز في البيت هي إنكم متأكدين من جودة اللوز . المشكلة في طحن المكسرات في البيت هو كمية الدهن العالية فيها . إذا طحنا المكسرات الخلاط يسخن المكسرات وهذا يطلع الدهن فيها ويخليها تتحول لمعجون بدال ما تتحول لبودرة . إذا وصلنا مرحلة المعجون خلاص مافيه رجعة .

هذي أفضل طريقة لطحن المكسرات في البيت :

١ـ إذا كانت المكسرات مقشرة روحوا للخطوة رقم ٣ علطول . لو كانت المكسرات المستخدمه عليها قشرها أول شي تسوونه هو إنك تحطونها في مويه مغليه حوالي ٣٠ ثانية بعدين علطول شيلوها من المويه وحطوها على فوطة مطبخ كبيرة وغطوها بنص الفوطة الثاني . الحين أفركوا المكسرات بالفوطه زيييين وراح تلاقون القشر طاح .

٢ـ شيلوا المكسرات من الفوطه على فوطة مطبخ ناشفة ثانيه . خلوها طول الليل تجف . بعدين ثاني يوم حطوها في فرن بارد حرارته ٢٠٠ فهرنهايت حوالي ١٠ دقايق عشان تنشف تماما . طلعوها من الفرن و الحين صار عندكم مكسرات مقشرة زي حقت السوبرماركت .

٣ـ الحين عشان الطحن . حطوا المكسرات في الفريزر عشان تبرد تماما . هذا راح يخلي المكسرات باردة إذا جينا نطحنها وهذا راح يعطينا شوي وقت في الطحن وهذا يعني بودرة أنعم .

٤ـ حطوا كمية بسيطة من المكسرات في طاحونة قهوة نظيفة . ممكن إستخدام جهاز تحضير طعام بس ماراح يعطي بودرة ناعمة زي طاحونة القهوة . حطوا مع المكسرات جزأ من السكر المطحون اللي راح نخلطة مع للماكرون . هذا راح يشرب جزأ من الرطوبة و الزيت اللي يطلع  وبكذا يأخر الطحن أكثر .

٥ـ أطحنوا على ضغطات سريعة يعني لا تخلون الطاحونة شغالة وخلاص . إلين يبدأ يكون بودرة ناعمه . طلعوا الخليط و أنخلوه . و القطع اللي ما تنطحن رجعوها للطاحونة مع شوي لوز زياده .

٦ـ أستمروا على هذي الطريقة إلين ينطحن كل اللوز .

في حال تحول اللوز لمعجون و أنتم تطحنون لا تشيلون هم ولا ترمونه هو صح ما ينفع للماكرون بس هو لذيييييييذ لإستخدامات ثانيه هذا المعجون هو زبدة مكسرات زي ما زبدة الفول السوداني أو البينت بتر مصنوعة من فول سوداني هذي نفس المنتج بس مصنوع من مكسرات ثانيه .

*السكر :

في الماكرون نستخدم في الغالب نوعين سكر . سكر مطحون وسكر خشن عادي .
السكر المطحون هو اللي راح يحلي الماكرون . غير كذا السكر المطحون مع التحريك بيسحب جزأ من الرطوبة حقت المرانج وهذا اللي بيخلي الخليط حق الماكرون سايل يعني هو السائل في الكوكيز هذا وعشان كذا الكميات المضبوطه مهمه . تأكدوا إنكم تنخلون السكر المطحون قبل الإستخدام و الوزن . تأكدوا بعد إن السكر المطحون نااااااااعم يعني بودرة لا يكون خشن ولا ممكن يخرب الماكرون عليكم .

السكر الخشن يستخدم بكمية بسيطة عشان يثبت المرانج بس ( راجعوا موضوع المرانج الفرنسي ) .

* الألوان :

الألوان هي اللي راح تعطي الماكرون الألوان اللي معروف فيها . في الغالب اللون له علاقة بالحشوة يعني ما أسوي ماكرون أزرق و أحشيه شكولاته مثلا .

ألوان الأكل عموما المطلوب منها تلون بشكل جيد بدون ما تأثر في الوصفه نفسها سواء من ناحية الطعم أو غيره . فيه ثلاث أنواع رئيسية للألوان :

١ـ ألوان سايلة : هذي أسهل نوع ينخلط مع الأكل يعني ما تحتاج خلط كثير عشان تلون الأكل وهذي ميزة طبعا . بس مشكلتها إنها ضعيفة يعني ما تصبغ بشكل جيد غير كذا كونها سايله هذا ممكن يسبب مشكلة في بعض الوصفات . الشي الثاني هو إن هذي الألوان أحيانا ينحط معها إضافات وبعض هذي الإضافات تتفاعل مع الأكل بشكل غير مرغوب ويعطي نتيجة مختلفة عن المطلوب . مثلا بعضها معها جلسرين و الجلسرين مع شي زي الرويال آيسنج مثلا يخليه لين بدال ما يكون يتكسر في الفم ( طبعا في حال كان هذا المطلوب أصلا ) . عشان كذا هو خيار سيء للألوان . غير كذا بعضها إذا ماكان كلها لها تاريخ إنتهاء ، صح إنها مووب صايرة مضره لو أستخدمت بعد هذا التاريخ بس ممكن يضعف لونها أكثر . عموما مع هذا إلا إني قد سويت ماكرون بهذا النوع من الصبغات وما أثر أبدا .

٢ـ ألوان جيل : هنا يكون اللون على شكل سايل ثقيل تقريبا زي ثقل العسل . هذي الصبغات ينطبق عليها كل شي ينطبق على السايلة سواء من ناحية الإجابيات أو السلبيات بس راح تصبغ بشكل أفضل من السايلة . هذي بعد ما أفضل إستخدامها .

٣ـ ألوان بودرة : هنا عندنا لون صافي بدون أي إضافات أو تاريخ إنتهاء . هذي راح تصبغ أفضل من غيرها وبنفس الوقت ماراح تغير نسب المواد لبعض زي السائلات . هذي هي الخيار الأفضل لألوان الأكل .

في حال عدم توفر اللون المطلوب من الألوان تقدرون دايما تخلطون عدة ألوان عشان تكونون اللون المطلوب .

النكهات :

ممكن خلط نكهات سواء سائلة أو جامدة مع الخليط حق الماكرون . ممكن مثلا خلط خلاصات الفانيلا أو القهوة أو الموز أو أي خلاصة ثانيه عشان تعطي طعم يمشي مع الحشوة اللي راح تنحشى بعدين . ممكن بعد إستخدام أشياء زي البهارات عشان تأدي نفس الغرض .

الشي الوحيد اللي لازم تنتبهون له هنا هو إن الكمية تكون جدا بسيطة بحيث ما تأثر على نسب المواد لبعض بشكل كبير ممكن يخرب الماكرون .


ميزان :

مهم جدا يكون عندكم ميزان إذا حبيتوا تسوون ماكرون . من الحين أقول مافيه بديل ، الميزان مطلوب هنا . موازيين المطبخ متوفرة في كل مكان متأكد إن أي محل أواني منزلية عنده ميزان و بعد أسعارها جدا رخصية . عموما موازيين الطبخ موب بس للماكرون الميزان هو أدق طريقة لقياس المواد الجافة . كوب طحين عن كوب طحين يختلف و الإختلاف بعد كبير بس كيلو طحين هو كيلو طحين .

الموازيين الديجيتال أسهل للإستخدام كونها توفر خصائص ثانيه مثل تصفير الوزن و تغيير الوحده من الموازيين الأمريكية ( الباوند و الأونصة ) إلى الموازيين المترية ( الكيلو ، الجرام ) . إستخدام ميزان الديجيتال شي تافة :

١ـ نحط صحن فوق الميزان بعد ما نشغله .

٢ـ نختار الوحده اللي راح نقيس هل هي متري ولا أمريكي . غالبا فيه زر لتحويل الوحدة .

٣ـ نصفر الوزن حق الصحن . بعد غالبا في زر كذا .

٤ـ نحط الشي اللي نبي نوزنه إلين نوصل للوزن المكتوب في الوصفه .

٥ـ نبي نوزن شي ثاني سهل . نشيل الصحن ونحط صحن ثاني ونصفر ونرجع نقيس عااااادي .. بس .


كيس حلويات :

أي كيس حلويات ينفع أهم شي الراس يكون ١ سم على الأقل .

سيلبات ( سجادة سيليكون ) أو ورق بارتشمنت :

الماكرون مصنوع من بياض بيض وهو بروتين و البروتين يحب يلصق في أي شي عشان كذا مهمة جدا هذي الخطوة . راح تحتاجون ياورق بارتشمنت parchment اللي بعض الناس يسمونه ورق زبده أو لو عندكم سيلبات اللي هي سجادة السيليكون يكون أسهلكم بعد . السيلبات موجوده ومتوفرة في السعودية وشفتها في كذا محل أسألوا عن سجادة سيليكون وهم بيعرفون ما يحتاج يكون نوعها سيلبات هي بس ماركة لا أكثر . ورق البارتشمنت بعد في كل سوبرماركت جنب القصدير في الغالب .

ورق الزبده الأصلي وورق الشمع ما ينفع في حالتنا هنا .

هذي صورة للأدوات :

MACARON



الوصفة و الطريقة


المقادير :

110 جم بياض بيض

30 جم سكر عادي

125 جم لوز

225 جم سكر مطحون

ألوان أكل حسب الرغبة

هذي الوصفة الأساسية للماكرون بالمرانج الفرنسي .

الطريقة :

١ـ نجهز كل شي . ننخل اللوز و السكر المطحون ، بعدين نوزنهم ونحطهم في صحن واحد . أرجع و أقول زي ماقلت كثير مافيه بديل للوزن في الماكرون لحد يجيني يقوللي أبغى المقادير بالكوب و الكاس و الملعقة لأن صعب جدا عمل ماكرون بقياسات موب دقيقة . بعدين نخلط اللوز و السكر المطحون مع بعض بشوكه عشان يتداخلون في بعض . نوزن البيض ونجهزة . ونوزن السكر العادي بعد .

MACARON

٢ـ   نسوي مرانج بالبيض و السكر ونخليه يوصل مرحلة منقار الطير . اللي ما شاف موضوع المرانج أو ما يدري وش المرانج يشوف هنا. المرانج اللي في الموضوع مرانج فرنسي بس ممكن عمل الماكرون بالمرانج الإيطالي بعد ،بنفس الخطوات الجاية تقريبا يعني بس نوع المرانج هو اللي يتغير .

٣ـ الحين نكب خليط اللوز و السكر و الألوان و النكهات المستخدمه على المرانج .

٤ـ الحين الخطوة الأهم الخلط . أغلب المشاكل حقت الماكرون تجي من الخلط . اللي يسير و إحنا نخلط موب بس إن المقادير راح تنخلط مع بعض . السكر البودرة راح يسحب شوي من الرطوبة حقت المرانج وهذا راح يفجر بعض الفقاعات حقت الهواء مع التحريك العملية هذي تتسرع بعد . عشان كذا كل ما خلطنا بنلاقي إن الخليط صار سايل أكثر و أكثر . لو حركنا أكثر من اللازم فقاعات كثير راح تتفجر ويمكن ما توفر الرفع اللازم للماكرون وينتج ماكرون مسطح . لو خلطنا أقل من اللازم بيصير عندنا خليط ثقيل مره وصعب تشكيلة وبعد بيصير عندنا هواء أكثر من اللازم في الخليط وهذا يعني نفش أكثر من اللازم في الفرن و الماكرون راح ينفش في البدايلة بعدين راح يطيح ويصير بعد مسطح ومشقق . عشان كذا الخلط للدرجة المثالية مهم .
أخلطوا المواد الجافة مع المرانج بملعقة مطاط شوي شوي في البداية إلين تترطب المواد بعدين كملوا خلط عادي إلين توصلون الدرجة المثالية . في البداية الخليط بيكون ثقيل شوي وقاسي بس مع الخلط بيلين شوي . عشان تختبرون الخليط إنه وصل للمرحلة المثالية أرفعوا الملعقة حقت الخلط والمفروض يطيح الخليط من الملعقة على شكل كتل .

شوفوا الفيديو هذا من دقيقة ٥ بالذات هذا بالضبط هو القوام اللي تبغونه .

macaron

٥ـ الحين ننقل الخليط لكيس الحلويات ونجهز صياني الفرن بعد ما نغطيها ببارتشمنت أو سيلبات .

٦ـ الحين نبدأ نصب الخليط على شكل دوائر قطرها ١-٢ سم أو حسب الرغبة . خلوا مساحات بين حبات الماكرون عشان تعطونها مساحة تنتشر وعشان الهواء يسخنهم بالتساوي في الفرن . أفضل طريقة للصب هي إنكم تحطون الراس قريب من الصينية وتصبون في مكان واحد وخلوا الخليط ينتشر وهذا راح يعطيكم دائرة متساوية . لو لقيتوا حبات شكلها غلط أو لها راس موب مشكلة راح نصلحها في الخطوة اللي بعدها .

ماكارون

لاحظوا الأشكال فيها مشاكل عاااادي لا تشيلون هم .

٧ـ الحين عشان نصلح أخطاء الصب . نبلل أصبع بشوي مويه ونبدأ نصلح الخليط المصبوب بيدنا شوي شوي .

macaron


٨ ـ الحين نشغل الفرن على ٣٢٥ من تحت بس !! وتأكدوا إن المروحة اللي في الخلف لو كانت موجودة طافية هذي المروحة قوية على الماكرون وممكن تخربه . بعدين نحط الصياني اللي شكلناها على طاولة المطبخ نص ساعة  على الأقل ترتاح ( سامعين على طاولة المطبخ موب في الفرن هههه ) . هذي الفترة راح تعطي الماكرون قشرة عالوجه هذي راح تساعده ينفش بالتساوي في الفرن ويكون ياقة . لو كنتوا مستخدمين مرانج إيطالي هذي الخطوة مالها داعي وغير مطلوبة يعني أخلطوا ، شكلوا وحطوها في الفرن علطول .


٩ـ الحين نحط الصينية في الفرن في الرف الأوسط حوالي ١١ دقيقة  . المفروض الماكرون يكون له ياقة وما يكون تلون بلون غامق أو صار قاسي أكثر من اللازم . حطوا الصياني صينية صينية لا تحطونهم كلهم مع بعض .

macaron

١٠ ـ خلوها تبرد تماما . راح تلاحظون إنها لاصقة بالصينية وهي حارة هذا شي طبيعي خلوها تبرد وراح تفك .

بس هذا الماكرون . تقدرون تحشونة وتاكلون على طول أو لو تبون أحسن بعد خلوه في الثلاجه يوم قبل تاكلونه عشان النكهات تتمازج صح بعدين طلعوه من الثلاجه و خلوه يوصل حرارة الغرفة قبل الأكل . لو تبون تحفظونه وقت أطول ممكن بعد حطوه في أكياس وخلوه في الفريزر بدون حشي ! كثييييير أصلا من محلات الماكرون وحتى الكبار مره يسوون كذا . الماكرون ماراح يتأثر بالفريزر كثير . أهم شي تخلونه يذوب زين وتاكلونه على حرارة الغرفه موب بارد .


الحشوات


كل يوم أشوف حشوات ماكرون مبتكرة وجديدة ، شفت حشوات بكبد البط ، بالكتشب ، بالفاصوليا الحلوه وحتى بالفقع ومتأكد إن فيه غيرها أغرب بعد . بس هذا إن دل على شي فهو يدل إن مافيه قواعد هنا أي شي تشوفون إنه ممكن يمشي مع الماكرون ينفع يتسوى منه حشوه .

الحشوات ممكن تكون جاناش سواء عادي أو حتى مخفوق ، نوتيلا ،  ممكن تكون موس مثبت من أي نوع وبأي نكهة، ممكن تكون كريمة مخفوقة مثبتة بجيلاتين وبعد بأي نكهة ، ممكن تكون بتر كريم أي نوع و بأي نكهة، ممكن إستخدام تقريبا كل تغطيات الكيك ، ممكن إستخدام أي معجون لذيذ مثل البينت بتر مثلا أو مثلا فستق مطحون ، ممكن إستخدام مارزبان أو ممكن إستخدام مربى عادية . ممكن بعد خلط كذا واحد من هذي الحشوات عشان تسوون حشوات مبتكرة مثل حشوة البينت بتر مع المربى مثلا . مافيه قواعد كثير هنا أهم شي الحشوة ما تكون سايلة أكثر من اللازم بحيث تذوب الماكرون ولا تكون قوية مره بحيث إنها تغطي على طعم الكوكيز تقريبا بس هذي القواعد هنا .

إذا جيتوا تحشون ممكن تستخدمون يا كيس حلويات صغير أو حتى ملعقة عادية .


مشاكل الماكرون وحلولها


إذا ما ضبط الماكرون معكم أول كم مرة لا تستعجلون كل فشل هو خطوة للنجاح أهم شي تعرفون وش المشكلة وليش فشل وتحلونها بس . الماكرون كوكيز شوي حساس خلط خطأ أو فرن حار أكثر من اللازم ممكن يخربه بغمضة عين .عشان كذا دايما نحاول إننا نثبت الوصفه هنا بحيث إننا نتأكد إن الخطأ كان من التنفيذ موب في الوصفه نفسها وعشان كذا إحنا نستخدم الوزن في القياس هنا .

حرارة الفرن بعد عامل ثاني ، الأفران لها دورة يعني تشتغل بعدين تطفى بعدين تشتغل وتطفى وكذا بحيث الحرارة الداخليه تكون قريبه من الحرارة اللي مطلوبة .. بس بعض الأفران دقيقه أكثر من غيرها وبعضها بعيدة تمام عن الحرارة المطلوبة منها . الحل هنا هو إنكم تستخدمون ميزان حرارة فرن عشان تراقبون الحرارة داخل الفرن حقكم .

نجي للمشاكل العامة و إن شاء الله حلولها :


١ـ إذا الماكرون شكله سليم بس ماله ياقه أو الياقة صغيرة مره :


فيه ثلاث إحتمالات هنا . إما إنكم ما ريحتوه وقت كافي ، أو إنكم خلطتوه أكثر من اللازم أو إن الفرن شوي بارد .

خلوه يرتاح وقت أطول وجربوا ، لو ما راحت المشكلة جربوا تخلطون أقل يمكنكم خالطين أكثر من اللازم لو ماراحت كحل أخير أرفعوا حرارة الفرن شوي بس وجربوا من جديد .

macaron

ماكرون بدون ياقة

 

٢ـ إذا الماكرون ما له ياقة والقشرة من فوق مكسرة :
هنا في الغالب السبب هو الخلط أكثر من اللازم أو أقل من اللازم أو حرارة الفرن فيها مشكلة أو ما أرتاحت وقت كافي . الحل أخلطوا للدرجة الصح وبعدين تأكدوا من حرارة الفرن . في بعض الأفران ما يكون فيها تهوية للهواء حار هنا ممكن تحلين المشكلة بإنك تحطين ملعقة خشب على باب الفرن وتقفلينه بحيث يكون الباب شوييييي مفتوح .

ماكروون

ماكرون مكسر

٣ـ الماكرون له ياقة بس بدال ما ينفش على فوق الياقة عالجنب :


في الغالب معناها فرن حار أكثر من اللازم.

ماكرون فرنسي فاشل

ياقة عالجنب

٤ ـ الخلطة سايلة :

في الغالب محركة أكثر من اللازم .

٥ ـ الخلطة ثقيلة :

في الغالب محركة أقل من اللازم .

٦ ـ القشرة موب ناعمة :

في الغالب اللوز شوي خشن .

٧ ـ القشرة فاضية ( فتحة هواء كبيره داخلها ) :

مخلوطة أكثر من اللازم ومطبوخة أقل من اللازم .

٨ ـ ماكرون لين وينكسر بسهولة :

مطبوخ أقل من اللازم ، فرن بارد ، مخلوط أكثر من اللازم ، مرانج فاشل .

٩ ـ ماكرون ناشف :

أنطبخ أكثر من اللازم .

بس هذا تقريبا كل شي عن الماكرون .

النتائج

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

macaron

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

ماكرون فرنسي

تشكيلة ماكرون بحشوات مختلفة : مربى توت ، فراولة ، فانيلا بتر كريم ، كاراميل مملح ، بينت بتر ومربى

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

ماكرون بحشوات مختلف : جاناش شكولاته ، فانيلا بتر كريم ، جوز هند ولوز

macaron

313 comments

4 pings

Skip to comment form

    • hanan on 8 December, 2011 at 2:59 pm
    • Reply

    مرحبا شيف,,,,والف شكر على كل طبق اجتهدت فيه وانا مره فخوره في انو شاب سعودي بارع في هالمجال
    عندي حب للطبخ وحمدلله كل شي ناجح معاي بس اصبت بأحباط لمن عملت الماكرون مع انو اتبعت كل التعليمات بدقه واسف ماطلع ياقه 🙁
    الفرق الوحيد انو اضفت لون ونكهة رازبيري باودر عالميرانج وخلطت مو خلط زايد بس طلع سائل على شوي تحطمت مره ساعدني بليز الله يسعدك دنيا واخره وشكرا لك

    1. هلا والله …

      قبل ما تسألين فكرتي ترجعين تقرين الموضوع وتشوفين وين مشاكلك ؟ متأكد لو قريتي الموضوع بتقرين إني سويته ألف مره قبل لا يضبط وبتقرين بعد حلول المشاكل.

    • nano on 10 October, 2011 at 8:46 pm
    • Reply

    فن دوق ابداع ماشاء الله عليك وشرح مفصل
    ان شاء الله باس انجح فيه

    • ms.n on 9 October, 2011 at 8:15 pm
    • Reply

    السلام عليكم ..
    لو سمحت أنا مشيت على الخطوات تمام لكن واجهت هالمشكله وماني عآرفه سببها !!
    http://imageshack.us/photo/my-images/26/img05917201110091930.jpg/

    1. وعليكم السلام و الرحمة …

      فيه كذا شي ممكن يكون السبب :

      يا إن الخليط محرك أكثر من اللازم يعني سايل بزياده.

      يا إن المرانج ماكان مضبوط إما إنه مخلوط أكثر أو أقل من اللازم

      يا إن الفرن بارد

      يا إنها ما أرتاحت وقت كافي

      يا إنها ما أنطبخت في الفرن وقت كافي

      ………..

      سويي المرانج صح وتأكدي إنه للدرجة الصحيحة.

      أخلطي الخليط بشكل جيد لا أقل ولا أكثر من المطلوب.

      خلي الخليط يرتاح إلين يكون قشرة على الوجه يعني إذا لمستيه بأصبعك لمسة خفيفه ما يلصق شي.

      شغلي الفرن قبلها بوقت طويل وتأكدي إن فرنك مافيه مشاكل لو أمكن

      أطبخي الماكرون إلين يضبط موب إلين يخلص الوقت اللي حاط في الموضوع، الأكل يستوي إذا أستوى موب إذا خلص الوقت.

  1. اهلين

    انا سويت الماكرون اكثر من مره

    ويخرب معي

    والبيض يطلع سايح مرررره ينفش بس شوي

    الخلاط عندي حق الكيك العادي ماعندي هذا الكبير والفرن فرن غاز مو كهرب ولا ماله دخل

    انا تازمت نفسيا بليز ساعدني

    ومايصير زي اللي طلع بالفديو يطلع سايح شوي

    ابي الحل

    وشكرا

    1. ماعندي كلام أقوله أكثر من اللي قلته في الموضوع. أقري هذا الموضوع زيييييين و أقري موضوع المرانج زييييين وإن شاء الله تنحل مشاكلك

    • MS.R on 16 September, 2011 at 12:03 pm
    • Reply

    تحمست اجربو
    بس مدري ليه احس بأنتظاري فشل شنيع :/

    • Reme on 15 September, 2011 at 5:58 pm
    • Reply

    مرحباا 🙂
    اخوي لو سمحت عندي كم سؤال..
    انا جربت الالوان اللي تكون على شكل جل بس ماعطت لون قوي !!! مع اني قريت ان هالنوعيه تأثيرها وايد قوي!!

    وفي سؤال ثاني .. ان يوم اسوي الماكارون كل شي يطلع تمام بس القا حبات تكون فاظيه من داخل .. شو السبب؟؟ حاولت اغير في طريقة الخلط بس ماتغيرت النتيجه!

    1. حسب الكمية ودرجة اللون وحتى نوعية الألوان.

      القشرة الفاضية كتبت السبب ليش في الموضوع.

  2. وييين يوجد بآلخخخبببر ؟؟! بليييييز آحد يرد علي وين ممكن آلقآه بآلخبر ؟ آو قطر ؟

      • أمل on 10 September, 2011 at 4:59 pm
      • Reply

      في فوشون او لنوتر

    • Anonymous on 6 September, 2011 at 5:28 pm
    • Reply

    الله يعطيك العافيه
    شيف عندي سؤال انا حاولت اعمل الماكرون اول شي بياض البيض فصلته تماما عن الصفار خفقته يوم بدات تطلع الرغوه اضفت السكر بالتدريج ولكن البياض صار شبه سائل ومع ذلك استمريت بالخفق وللاسف فشلت تتوقع ايش السبب؟؟
    شكرا جزيلا

    1. يا إنك حطيتي سكر كثير أو إنك حطيتيه مره وحده بسرعة ، السكر مفروض تحطينه شوي شوي مع التحريك

  3. السلام عليكم،

    يعطيك العافيه شيف ^^

    في كم سؤال محيريني بالماكرون،
    يوم نترك المرانج يوم كامل، مايعتبر بيئه مثاليه للجراثيم ؟

    الشي الثاني، هل في فرق بين الطريقه الايطاليه والفرنسيه، بالطعم أو القوام النهائي؟

    في خطوه آعتبرها ممله، وهي ضرب طحين اللوز و السكر المطحون في الطحانه، هل لها داعي؟

    *مشكور على توضيحك الاسباب اللي تخلي الماكرون يفشل، لما كنت اسويه في البيستري كيتجن، كان يطلع بيرفكت،
    بس فالبيت ماظبط معاي أبدا، والحين اكتشفت السبب خلاط القهوه وحرارته –“

    1. كثير ناس يتخوفون من بياض البيض بس هذا شي خطأ !!! بياض البيض بيئة غير مناسبه لعيش الجراثيم سواء كان في الثلاجه أو حراره الغرفه. يعني لو بتسوين موس فيه بياض بيض أو مرانج أو غيره كليه و أنتي متطمنه. غير كذا حتى لو كان فيه مشكله لاتنسين إننا نطبخه في الفرن وهذا يشيل أي خطوره طبعا في حال كان يعيش عليه جراثيم.

      ضرب اللوز مع السكر خطوه ما طلبتها هنا ؟ طبعا في حال كان اللوز أصلا مطحون بس لو بتطحنين لوز في البيت لازم تحطين معه شوي سكر عشان لا يتحول زبده بسرعه.

      نوعيه المرانج مالها علاقه بالطعم أو القوام بس بتأثر في نجاح أو فشل الماكرون.

    • dan on 23 August, 2011 at 6:02 pm
    • Reply

    ماشاء الله تبارك الله شغل مرتب والله بس المشكله عندي انو اول مرره سويتو وطلع تمام وكل شي المرة التانية والتالتة مو رااضي يطلللللع كويس يعني يطلع من فوق زي المكسر مو املس ومافي من تحت الباقة الصغيره مني عارفه ايش السبب :'( :'( انواع الاحباط

    1. مدام ضبط أو مره أجل حلو يعني مافيه شي يمنع إنه يضبط المرات الثانيه … بالنسبه للمشاكل كلها حلولها موجوده في الموضوع

    • ]ديما on 15 August, 2011 at 3:16 am
    • Reply

    بصراحه ابداع الشرح والتوضيح يعطيك العافيه
    قريت كثير عن الماكرون لكن بصراحه متخوفه اجربه
    مع اني بيرفكت بس لو اجربه وماضبط اتحطم راح اغامر واجرب
    طريقتك يارب يضبط

    1. مافيه شي يخوف ولا فيه شي يزعل لو ماضبط أول مره مصيره يضبط لو عرفتي كل مره وين غلطتي وماكررتي نفس الخطأ.

    • سلام on 29 July, 2011 at 11:05 am
    • Reply

    مرحبا ..
    الله يعطيك العافيه على الوصفات الحلوه هذي
    بس عندي سؤال . هذي وصفه اساسيه للماكارون .. اقدر اضيفلها الوان بودره؟ وكم المقدار اللي ممكن اضيفه؟ ربع ملعقه صغيره مثلا؟

    1. هلا والله .

      الجواب جدا واضح في الموضوع

    • sawsan on 27 July, 2011 at 8:47 pm
    • Reply

    ماشاء الله تبارك الله يسلم

    • احمد on 22 July, 2011 at 3:16 am
    • Reply

    السلام عليكم ورحمة الله وبركاته

    شاكر لك مجهودك

    اخوي لو بشتري منك تبيع ..؟

    • Om ghalia on 6 June, 2011 at 7:57 pm
    • Reply

    كيفك توب شيف أهنئك الصراحه علي ابداعك وكل مااشوف مواضيعك احب المطبخ اكثر واكثر وان شاالله اوصل لمستواك بس عندي مشكله في الماكرون
    مشيت علي كل خطوه بالحرف الي انت كاتبه عن الماكرون
    تخيل يمكن عاشر مره اسويه ومو راضي يضبط معاي بس طبعا كل مره احسه احسن من الي قبله بس اخر مره سويته وكل شي ضابط وريحته وقت كافي بس اتشققت القشره من فوق وكان منتفخ في الفرن بس بمجرد مانزلته هبط ياريت كمان تعطيني وصفه بالمارينج الايطالي وبجربه يمكن يضبط

    1. هلا والله …

      مدام كل مره أحسن أجل إن شاء الله بتوصلين لاتخافين …

      كان منتفخ وهبط وتشقق هذا غالبا خلط أقل من اللازم .

      المرانج الإيطالي مايعالج هذي المشكلة.

      عموما لو مصره على وصفه ميرانج إيطالي دوري في جوجل بتلاقين آلاف الوصفات بس حاليا صعب أكتبها عالسريع الصراحة .

    • بشرى .. on 1 June, 2011 at 6:19 pm
    • Reply

    السلام عليكم ,
    بسأل ليش الشيف ضرب الصينيه من تحت ؟ ونسوي زيه ولا مهب ضروري ؟
    ونخلط اللوز والسكر المطحون مع بعض ونحطه بالتدريج على المرانج ؟ ولا نخلي كل واحد لحاله
    ونحط بالتناوب ؟
    وشكراً

    1. وعليكم السلام ..

      ضربها عشان يشيل الرؤس اللي تطلع في الصب. تقدرين تضربينها بس لا تتحمسين في الضرب عشان لا تخربين شغلك بس ، عشان كذا أفضل تسوينها باليد.

      ما يفرق لو خلطتي اللوز مع السكر أو لأ .

      أنتي أمشي على كلامي وبس شوفي اللي قاصد في الفيديو اللي هو كثافة العجين ..

  4. اي والله انا شفته في شيف استراليا وعجبني مرة
    بس قلت في نفسي اني مستحيل اعرف اسوية
    لكن بصراحة شرحك مرة حلوووو
    الله يبارك فيك

    بس عندي سؤال محيرني

    فيه محل يبيعه ويريحناااا << وحدة باااايرة ههههه

    1. أكيد فيه محلات تبيع . دوريه عند لنوتر أعتقد يبيعه .. عندك بعد محل إسمه الفرن و غالبا أغلب محلات الحلويات الكبيرة تلاقينه عندهم يا جاهز يا بالطلب

      1. شكرا لك

    • الأمـل on 15 May, 2011 at 7:04 pm
    • Reply

    هههههههههههه
    هذا اللي وهق المتدربين في برنامج توب شيف الاسترالي يانا رحمتهم
    وقلت مستحييييييل اسويه يوم شفته ..
    اذا روقت مره صلحته احس صدمني يوم شفتهم هههههههه
    تسلم ايديك شكله تحفه وزي مابغوه بالضبط .. تبارك الله *)

    • dreamy on 8 May, 2011 at 11:34 pm
    • Reply

    مرحبا

    سؤالي هو انك كاتب نقدر نستبدل طحين اللوز بـ بودره شوكلت صحيح هالشي ؟

    ثاني شي اذا لنا الحريه بااختيار النكهات ليه مانسويه بطحين الابيض العادي؟

    ثاني شي ماعندي جهاز الوزن اقدر استغني عنه بمقياس ثاني يعني مثلا بعض العلب تكون بنفس الوزن اللي مطلوب بالمقادير < ادري ذكيه

    شكرا

    1. هلا والله …

      قلت نقدر نستبدل “جزأ” ببودرة اللوز عشان نعطي طعم شكولاته .. الأساس مازال لوز الشكولاته بس عشان تعطي لون ونكهة شكولاته خفيفه للماكرون.

      طحين اللوز ماله علاقة بالطحين العادي .. هو إسمه طحين بس لأنه ناعم لا أكثر .

      العلب اللي تكتب الوزن تعطي وزن تقريبي ، عموما راح تحتاجين توزنين البيض كذا ولا كذا ..

    • AB on 8 May, 2011 at 4:18 pm
    • Reply

    ابداااااااااااااع صراحه انا سويته كم مره ولا ضبط .. 🙁
    مادري وش السبب ؟؟؟؟؟

    1. هو موب شي سهل ، عيدي أكثر و أكثر إلين تضبطينه .. وشوفي الأسباب كلها إن شاء الله كتبتها .

    • joly on 7 May, 2011 at 7:05 pm
    • Reply

    شغلك مره حلو و النتيجه احلى
    مشكور وما قصرت ^^

    • شقآوة فضل on 7 May, 2011 at 4:12 pm
    • Reply

    حبيتهم يسلمو
    الله يديك العافية يارررب

  5. finally

  6. اتقااااان ما بعده و الاحلى صبرك وطيبتك الله يوفقك و ينفع بك و تنال اعلى الدرجات

    1. مشكورة علي كلامك وعلي مرورك والله يسمع منك .

    • rasha on 20 April, 2011 at 5:56 am
    • Reply

    ممكن تقولي المقادير بالكوب المعياري

    1. للآسف ما ينفع . كتبت السبب في الموضوع

    • Maha on 10 April, 2011 at 11:49 am
    • Reply

    مرحبا ..
    ماشاءالله عليك وربي يعطيك الصحه والعافيه صراحه دا شغل يجنن ومظبوط ونظيف .
    بس بغيت اعرف كيف الطريقه باني اخزنه بالفريزر؟
    وتسلم يا اخي

    1. هلا والله ..

      حطيه في كيس يتقفل زين و طلعي أكبر كمية هواء بس ..

    • Reme89 on 6 April, 2011 at 7:34 pm
    • Reply

    لوسمحت بس بغيت اسالك .. قريت في وصفه للماكارون .. اول شي يسوون الميرانج الايطالي ويضيفون له نص كميه بياض البيض بعد مايوصل لمرحله منقار الطير ويخلطون .. والنص الثاني من بياض البيض يخلطونه مع السكر البودره واللوز بدون مايسوونه ميرانج..
    انا احترت صراحه.. هل هذي وصفه صحيحه وينجح معاها الماكرون؟ والا لا؟

    1. ينفع طبعا .. فيه أراء تقول إن هذا يعطي ماكرون يلمع أكثر ويخلي اللوز و السكر يذوب أسرع في المرانج .

      لو تذكرين أنا قلت إننا في الماكرون إحنا نسوي مرانج بعدين نفقع جزأ من الفقاعات حقت المرانج بالقصد .. كل ما فقعنا أكثر كل ماصارت الخلطة سايلة أكثر وهذا اللي يخلي الخلط خطوة شوي معقدة .

      في الحركة هذي يختصر القصة ويحط بيض مافيه رغوة جاهز .. بكذا الخلط بيكون أقل من لو سوينا مرانج بكل البيض.. في الكميات الكبيرة الخلط يكون شوي مشكلة كونه صعب نخلط كل اللوز وكل السكر بسهولة زي لو سوينا كميات صغيرة وعشان كذا هذي الحركة يمكن ما يبان فايدتها إلا لمحلات الحلويات اللي تسوي كميات جدا كبيره ..

      إذا سويتي هذي الحركة أنتبهي من موضوع الخلط كونه بيحتاج خلط أقل بكثير !! .

        • Reme89 on 7 April, 2011 at 4:25 pm
        • Reply

        شكرا على التوضيح 🙂 والله يعطيك العافيه ..
        جربته اليوم ونجح الحمدلله .. وصح مثل ماقلت .. مايحتاي خلط واايد 🙂
        شكرا مره ثانيه

    • Reme89 on 13 March, 2011 at 6:01 am
    • Reply

    مشكووور ع الرد 🙂
    انشالله نكهه التمر بجربها ف اقرب وقت ..
    بالنسبه للنكهات المالحه انا اقصد اللي يكون فيها شوي سويت .. طبعا مااقدر اغامر واسوي اللي بكبد البط وهالشغلات 🙂
    شكرااا ع النصيحه اللي عن الشاي انشالله بعد بجربها

    • Reme89 on 12 March, 2011 at 2:00 pm
    • Reply

    مرحبااا 🙂
    لو سمحت عنديه كمن سؤال عن الماكرون 🙂
    اريد اسوي ماكرون بطعم التمر .. ينفع اسوي الماكارون نفسه بطعم التمر والا اضمن اذا سويت الحشوه بس؟
    وفي عندك فكره عن حشوات مالحه؟؟
    لانيه ادور وصفات للماكرون تكون مبتكره والطعم جديد وغريب 🙂
    ووو بعد فكرت اسوي ماكرون بطعم الشاي بس ماعرفت كيف اضيف النكهه :/
    ياليت القى الحل عندك
    ومشكوووور وايد 

    1. هلا والله …

      بالتمر أحسن لو تخلين التمر في الحشوة ، عموما طعم القشرة ما يبان كثير في الماكرون الحشوة هي اللي تفرق في الطعم أكثر.

      حشوات مالحه زي دجاج مثلا قصدك ؟ ولا قصدك مالحة يعني حالية بس فيها شوي ملوحة زي الكراميل مع الملح ؟ .. عموما الماكرون دايما فيه سكر وحالي فإذا بتحطين حشوة مالحه لازم تحسبين حساب ذا الشي موب بس تحطينها لمجرد التغيير . شفت حشوات بإستخدام كبد البط و البيكون و بإستخدام كليه غنم و بإستخدام فقع و حلزون بعد .. بس كلها كانت حلى ماكانت موالح يعني مثلا كبد بط مع شكولاته صح الفكرة غريبة بس الهدف هنا هو إن كبد البط دسم تقريبا زي الزبده وهذي الخاصية اللي يبيها الطباخ هنا.

      ماكرون شاهي تكلمت عنه في الموضوع .. حطي بودرة شاهي أخضر مع اللوز . أو لو تبين يمديك تسوين حشوة مطعمه بشاهي مثلا ناخذ فكرة كلنا نعرفها اللي هي الآيس تي ونسوي حشوة تشبهها في الفكرة .. نخلط مثلا مربى خوخ مع شوي شاهي ثقيييييل عشان تعطينا حشوة آيس تي ..

    • Ash on 7 March, 2011 at 5:36 am
    • Reply

    الله يعطيك العافية توب شيف…

    أنا من عشاق الماكرون، و الحمد لله الحظ حالفني و نجحت في إعداده من أول تجربة! و تقدر تقول إني خبيرة في صنعه 🙂

    لكن المشكلة اللي صادفتني في الشتا، هي برودة الجو و الرطوبة! يمكن في الرياض عندكم الجو يساعد على نجاح الماكرون، لكن في الشرقية الجو دايماً غير متوقع! و في النهاية كنت أضطر إني استخدم مجفف الشعر D:

    إحدى الصديقات أعطتني رابط لصفحتك بعد ما شافت شغلي، حبيت شرحك المفصل و معلوماتك القيمة اللي أكيد راح تكون مفيدة للمبتدأين 🙂

    في النهاية ما حبيت أمر من هنا بدون ما أشكرك على مدونتك الرائعة… تسلم إيدك و عساك عالقوة…

    و هذي هدية لك 🙂

    http://www.freepicsupload.com/?di=13129949375615

    1. الله يعافيك ..

      أول شي أحب أهنيك على شغلك النظيف .. باين الإحترافيه فيه ما شاء الله ..

      بالنسبة للجو هو صح مشكلة .. اللي لاحظته التكييف يحل جزأ كبير منها بس لو المطبخ موب مكيف زين تكبر المشكلة أكثر و أكثر .. أفضل حل هنا هو إنك تسوين مرانج إيطالي بيثبت أحسن في هذي الحالات.

      مشكورة على مرورك وحياك الله في أي وقت ..

        • Ash on 13 March, 2011 at 6:50 pm
        • Reply

        الله يحييك و يسلمك…

        المارينغ الإيطالي ما جربته… أول شي لأني ما شريت مقياس الحرارة الخاص بالحلويات إلى الآن، و ثاني شي، أحسه ياخذ وقت أطول بالشغل، فالمارينغ الفرنسي أريح لي بكثير 🙂

        بس ما يمنع إني أجربه في المستقبل إن شاء الله!

        شكراً عالنصيحة 🙂

          • Top Chef on 13 March, 2011 at 6:59 pm
            Author

          أكيد الفرنسي أريح .. بس وش فايدة أريح إذا فيه أمل كبير يخرب من رطوبه شي مالنا أي تحكم عليه .. أحيانا الواحد لازم ياخذ إحتياطاته بس …

    • Reme89 on 6 March, 2011 at 5:01 am
    • Reply

    اوكييي مشكوور ع التوضيح 🙂

    • danh on 5 March, 2011 at 11:23 pm
    • Reply

    السلام عليكم ..
    مشاء الله الله يعطيك الصحة والعافيه ..
    انا بس عندي طلب صغير :$ ..
    ممكن تحط لي حشوة بيضا ؟ بطعم الكريمة او الفانيلا يعني ..
    ابيها تتماسك مثل الي بالصور
    وبس شكراً جزيلاً

    1. وعليكم السلام و الرحمة …

      فيه ألف حشوة بيضاء :

      هنا جاناش تقدرين تسوينه بشكولاته بيضاء :
      http://topchefcooks.com/2011/01/22/chocolate-ganache/

      هذا بتر كريم بعد تقدرين تسوينه بأي نكهة منها الفانيلا :
      http://topchefcooks.com/2011/02/11/swiss-meri/

      هذا موضوع عام عن البتر كريم يفضل تقرينه قبل تسوينه :
      http://topchefcooks.com/2011/02/11/buttercream/

      وهذي طريقة الكريمة المخفوقة اللي بعد ممكن تتسوى بأي نكهة من ضمنها الفانيلا :
      http://topchefcooks.com/2010/12/11/whipped-cream/

    • Reme89 on 5 March, 2011 at 4:48 pm
    • Reply

    ههههههه لا اقصد مافهمت كيف يعني ادبل المقادير 🙂 ممكن. تشرحليه

    1. يعني ضاعفي المقادير …

      بدال ما تحطين ١١٠ جرام بيض حطي ٢٢٠ أو ٣٣٠ وكذا في كل المقادير .

    • Reme89 on 5 March, 2011 at 3:24 pm
    • Reply

    ههههههههه كيف يعني :/ مافهمت!!! <<<<< مسطله ع الاخر

    1. لا بس تصير كثير عشان كذا أضحك بس .

    • Reme89 on 5 March, 2011 at 3:22 pm
    • Reply

    اوبسسس سوري كنت اتحسبك حرمه لين قريت التعليقات :/ السموووحه

    • Reme89 on 5 March, 2011 at 3:16 pm
    • Reply

    الله يباركلج و يعافيج 🙂
    بس حبيت اعرف اذا عنديه عزيمه وبغيت اضاعف عدد الماكرون .. كيف ؟؟
    في مقادير ثانيه لعدد اكبر؟
    وشكراااا 🙂

    1. هههههه قبل كللللل شي تراني ولد منيب بنت …

      تضاعفين العدد بإنك تضاعفين الكميات عادي ، هذا الحلو في الوزن ..

    • Reme89 on 5 March, 2011 at 11:42 am
    • Reply

    شكرااا وااايد على الوصفه الحلوه .. اليوم جربتها و ظبطت من اول مره الحمدلله :))
    شكرااااا مره ثانيه 

    1. ماشاء الله عليك … ألف ألف مبروك .. وبالعافية علي قلبك ..

    • Nuna on 24 February, 2011 at 8:18 pm
    • Reply

    امممم تدري شيف انو يباع بالسعوديه ببعض المحلات الحبه ٢٠ ريال !!! الحببه مو البوكس الصغير
    المهم ان شاء الله اجربه ماينقصني غير الميزان الديجتال احس لازم يكون ولا بخبص الدنيا
    بس شيف في شغله ماني فاهمتها بالمكسرات النقطه الثانيه ،، احطه بفرن بارد ؟ يعني طافي واحطها بعدين اشغله ؟؟

    ترا انا جديده بالمطبخ عمري ١٨ سنه يعني لاتضحكون على سسؤالي :$

    1. بالتوفيق إن شاء الله …

      الميزان لازم لازم بعد …

      فرن بارد يعني فرن حرارته ٢٠٠ فهرنهايت .. هذي الحراره بارده نسبيا يعني منتب شايفه كيك مثلا ينخبز على هذي الحراره وعشان كذا ينقال له فرن بارد … كلنا يوم من الأيام كنا مبتدئين مافيه شي يضحك خذي راحتك بالأسئلة …

    • Anonymous on 11 January, 2011 at 3:25 pm
    • Reply

    شيف ممكن تعطيني الحشوة الي جوزهند ولوز
    الله يعطيك العافية

    1. آآآآسف عالتأخير …

      تفضلي :

      كوب سكر
      ١/٣ كوب نشا ذرة
      كوبين حليب
      علبة حليب جوز هند تقريبا ٤٠٠ مل . أقصد هنا العلب المعدن تلاقينها في السوبرماركت موب البودرة .
      ٦ صفارات بيض

      أغلي الحليب وحليب جوز الهند إلين يوصل شبه غليه بس .

      وهو يغلي أخفقي السكر مع النشا وصفار البيض وحركيهم إلين يصير لون الصفار أصفر باهت .

      الحين صبي الحليب الحار على خليط الصفار شوي شوي في البدايه بعدين كبيه كله مع التحريك طبعا .

      رجعي الخليط للقدر و رجعيه على نار هاديه مع التحريك المستمر إلين يغلي .

      بعد ما يغلي خليه دقيقه تقريبا يطبخ عشان يروح طعم النشا بعدين شيلي الخليط وصفيه بصفايه على صحن معدني .

      حطي الصحن المعدني بحمام ثلجي إلين يبرد الخليط تماما بعدين حطي طبقه نايلون على الوجه وحطيه في الثلاجه ٤ ساعات على الأقل .

    • ام اقوبي on 8 January, 2011 at 10:30 am
    • Reply

    لما اشوف الشرح اقول لاااايمكن اقدر اسويه شكله وااايد صعب

    بس لما اقرا اقول سهل وملاحظاتك مهمه شكرا لك على الشرح

    1. وش دعوة صعب .. هو مرانج مع لوز وسكر .. دايما بسطي الأمور لا تعقدينها …. مشكورة على مرورك …

    • لمياء on 7 January, 2011 at 1:12 pm
    • Reply

    يااي شي حلو والله
    احبه هالماكرون وينباع عندنا مرااا غالي ..مع ان مقاديره وشغلته مو متعبه جدااا

    في شغلات ناقصتني راح اشتريها وبإذن الله اجربه ..

    مشكور الف شكر

    1. بالضبط …

      ننتظر تطبيقك ..

    • الخُزامى on 7 January, 2011 at 1:03 pm
    • Reply

    يعطيك العافية شيف …

    أما الماكرون فلي معاه قصة مع وقف التنفيذ !

    بعد مانزلت الموضوع ..

    بديت بتجهيز الادوات والمقادير ..

    اللوز من الرفاعي ,,الالوان من امازون(علبة صغيرة مع شحنها 60 ريال) ,,السليبات تافولا …كيس الكريمة

    …واخر شيء الرأس السادة 1.5

    وكان عندي الميزان وملعقة المطاط والاستيل ….

    :

    :

    وإلى اليوم ماسويته !!!!

    مع أني قريت الموضوع اكثر من 10 مرات !!!!

    1. ههههههههه …

      بس ليش الألوان شاريتها من آخر الدنيا كل سوبرماركت موجوده .

        • الخُزامى on 9 January, 2011 at 12:37 pm
        • Reply

        من الدقة ابغاها بودرة !!!

        وصدقني بالنسبة لي امريكا اقرب من الرياض !!!!

          • Top Chef on 9 January, 2011 at 8:24 pm
            Author

          فاهم عليك .. بس مين قالك إن الألوان البودرة ماتنباع عندنا ؟ هذي كانت الفكرة بس .

    • Anonymous on 6 January, 2011 at 8:37 pm
    • Reply

    ممتااااااااااااااااااااااااااااااااااااااااااااااز اجل كتبت ان الصواني نحطها فوق الطاولة نص ساعة

    طيب عاد بعلق على الفيديو / اولا مقدار السكر مع الميرانج الي حطه 50 جم انت حطيت 30 بالنسبة للبيض يعني هو بعد حط 7 بياض وانت كميته تقريبا ماتجاوزت 4 بياضات

    شغلة ثانية /الميرانج الي صلحة مرة تثقيل بزيادة.

    والخلطه هي كانت اروع مافيه لانه وصل لشي مستحيل توصفة من الشرح او الصور

    في الاخير اشكرك من كل قلبي على الفيديو والمواضيع وحتى على التعديل

    1. هههههههه إيه كتبت عشان مره …

      كمية السكر مع المرانج و حتى المقادير عموما تختلف من وصفه للثانيه .. هي كلها مربوطه بنسب ثابتة لبياض البيض يعني وزن البيض مضروب بنسبة معينة بيعطيك كمية الشي المطلوب .. خلاصة الكلام هو إنها بتختلف من وصفة لوصفة بس هذي أكثر شي أعجبني . كمية البيض اللي أستخدم أقل من 4 بشوي هذا بإفتراض البيض كبير .

      كيف مرانج ثقيل بزيادة ؟ المرانج مرانج ؟ يعتمد على كم خلطتيه بس …. دايما خلي المرانج يوصل منقار الطير .

    • suha on 6 January, 2011 at 4:01 pm
    • Reply

    ههههههههه

    انا اقول ايش هوا الماكرون داااااااا

    طلع بيض الكوكو

    نسميه بيض الكوكو >>> ايش على اسممممم بسسسس

    1. بيض الكوكو مين يابنت الحلال هذاك شي وهذا شي ؟ الشبه الوحيد هو الألوان بس ..

    • Anonymous on 6 January, 2011 at 5:24 am
    • Reply

    اووووووووووووووووووووووو اخيرا مابغيت الحمدلله على السلامة

    اما صورة الماكرون الفاشل تذكرت اول تجرة لي معه تشبة هذه الصورة لكن الحمدلله صار شي ماحصل ولا احس شيف هههههههههههه

    1. كف أحسن ؟

      ههههه

        • Anonymous on 7 January, 2011 at 9:56 pm
        • Reply

        وش احسن الا احسن ونص بعد ارسلت لك الصور قبل وعلقت عليها

        على فكرة هذه الصور مجازية ولا من الطبيق الي لك اسبوع تسوي ويخرب ههههههههههههههه

          • Top Chef on 7 January, 2011 at 10:19 pm
            Author

          لا الصور من النت …

  7. ياسلام تسلم يدينك
    من طول الغيبات جاب الغنايم

    الف شكر على الشرح الوافي والنصائح .. لا هنت 🙂

    1. الله يسلمك …

      العفوا وما سوينا شي وحياك الله دايما .

    • nora on 5 January, 2011 at 8:35 pm
    • Reply

    أنا اموت في اللوز فاتوقع طعمه بيكون رهيب ,,انا ماعرفته الا منك وان شاء الله بسويه قريب
    يعطيك العافيه مواضيعك هنا صارت أرتب منها في المنتديات ,,شكرا

    1. الله يعافيك ….

      مشكوره والله هذا الهدف وإن شاء الله باقي المواضيع في الطريق .

  8. على فكره

    أحس الفرنسي ألذ من الأمريكي

  9. بسم الله الرحمن الرحيم !!!

    قبل شوي أقول بشيك ع المدونه من زمان مانزل وهذي حزته

    الا تجيني رساله ع الإىميل

    ||

    ماشاء الله لا إله إلا الله شغلك نظيف ومرتب

    والشرح جداً واضح

    حالياً وبكل صراحه ماأفكر أجربه
    ماأحب أجرب الشي الا اذا ذقته
    عاد لاذقته ان شاء الله قررت

    تسلم ، لاهنت

    1. الله يسلمك و الله لا يهينك …

      والله مشغول شوي هالفترة و الموضوع هذا كاتبة من زمان بس يبيله تنسيق وكذا وهذا اللي أخرني .

      الفرنسي شي و الأمريكي شي ثاني

  1. […] إسمه لوبستر ثيرمدور . لو ثقلناه بليازون و خلطنا عليه مرانج و طبخناه في الفرن صار عندنا سوفليه جبن … لاحظوا كم […]

Leave a Reply to حنان Cancel reply

Your email address will not be published.

%d bloggers like this: