«

»

نوفمبر 17 2011

ألواح التقطيع .. Cutting Boards

هلا والله …

 

تكلمت في الموضوع الأخير عن سكاكين المطبخ و أهميتها وكيف تختلف عن بعض و اليوم بتكلم عن الشي المكمل للسكاكين وهو ألواح التقطيع. كثير ناس يعتقدون إن ألواح التقطيع وظيفتها إنها تحمي سطح المطبخ بس هذا كلام خطأ، ألواح التقطيع وظيفتها الأساسيه إنها تعطي سطح مناسب للتقطيع يكون آمن وثابت ومريح في الإستخدام و طبعا ما يخرب السكاكين. لوح تقطيع جيد مع سكين جيدة بيسهلون عليكم حياتكم في المطبخ ويخلون تجربه الطبخ أمتع غير إنهم بيخلون المطبخ أأمن و أنظف. ناس كثير يغفلون عن نقطة جدا مهمة وهي إن ألواح التقطيع من أخطر الأدوات في المطبخ ( إذا ماكان أخطرها ) اللي تسبب التسمم الغذائي وعشان كذا مهم إننا نعرف وين الخطر وكيف نتفاداه.

 

مواصفات ألواح التقطيع

 

أي واحد بيفكر يشتري لوح جديد بيلاقي آلاف الخيارات بمختلف الأسعار وهنا بحاول أشرح المواصفات اللي الواحد لازم ينتبه لها عشان يقدر يختار لوح مناسب له.

 

الوزن :

 

الألواح الخفيفه عمليه كونه سهل نقلها من دولاب حفظ مثلا لمكان التقطيع للمغسلة وكذا بس إذا كانت خفيفه مره بتتحرك على الطاوله وهذا مزعج ويصعب التقطيع.

 

الشكل و الأبعاد :

 

حجم أو مساحة اللوح من أهم الصفات اللي الواحد ينتبه لها. كل ماكان اللوح أكبر كل ماكان مريح وممتع أكثر في التقطيع. ما فيه حجم نقدر نقول عنه كبير أكثر من اللازم كل ماكان أكبر كل ماكان أفضل. الشي الوحيد اللي لازم تنتبهون له في الحجم هو إن اللوح يكفي داخل حوض المغسله أو داخل غسالة الصحون ( في حال كان ينفع يستخدم في غسالة الصحون ). موب شرط ينام في قاع الحوض بس أهم شي إنه يكفي داخلها عشان نقدر نغسله بسهولة. الألواح الصغيره مفيدة أحيانا كونها جدا عملية، تخيلوا مثلا كنا نبغى نقطع حبه ليمون أو حبه طماط أريح و أسرع إننا نستخدم لوح صغير من إننا نستخدم لوح جدا كبيره عشان عمليه سريعه وعشان كذا هي شي حلو يكون في المطبخ بس طبعا مافيه غنى عن اللوح (أو الألواح) الأساسية الكبيره.

 

PESTO SAUCE

لاحظوا حجم اللوح

 

سماكة اللوح شي راجع لكم و لإرتفاع طاولة المطبخ عندكم. الألواح السميكة أثقل و أثبت في الغالب أهم شي إنها ما تكون مرتفعه للدرجة اللي يصير التقطيع غير مريح بإن اللوح يكون قريب جدا للجسم، الألواح النحيفه مره تكون خفيفه و أحيانا غير ثابته.

 

ألواح التقطيع تجي بعدة أشكال إما مدورة أو مربعه أو حتى أشكال ثانيه زي النوع اللي ينحط فوق المغسلة Over the sink board وهي خيار شخصي أولا و أخيرا. بعض الناس يحب يستخدم الألواح لتقديم الأكل مثل الجبن أو الخبز مثلا.


المادة المصنوع منها :

 

يمكن هذا أول سؤال الواحد يسأل نفسه قبل يشتري لوح تقطيع، فيه مواد كثير ممكن تنصنع الألواح منها وكل واحد له حسناته وسيئاته.

 

الخشب wood :

 

الخشب هو أقدم مادة أستخدموها لألواح التقطيع ومازالت تستخدم بكثره لليوم. الخشب حلو وممكن يعتبر قطعه ديكور ثانيه في المطبخ موب بس لوح تقطيع هذا غير إنه ممكن يستخدم كصحن للتقديم في أشياء زي الجبن أو الخبز. الخشب غالي نسبيا بس رائع في الإستخدام و ممكن يعيش طول العمر بدون مشاكل إذا حافظ الشخص عليه بشكل صحيح ويقال إنه يصير أحلى و أحلى مع الوقت.

 

أهم ميزه في الخشب هي إنه صلب ويعالج نفسه بنفسه (بشكل بسيط) وفي نفس الوقت جدا هادي على السكاكين وما يخربها بسرعه. الصلابه تخليه يقاوم الخدوش اللي على الوجه و اللي تتخبى داخلها البكتيريا وفكرة إنه يعالج نفسه بنفسه تعني إن الخدوش الصغيرة اللي تتكون عليه ترجع تقفل بعد فترة. تركيب الخشب المميز هو اللي يعطي الخشب هذي الميزات. الخشب لو دققنا فيه نلاقيه عباره عن ألياف (تقريبا زي الخيوط) تكون نسيح الخشب و اللي يصير هو إننا إذا ضربنا بالسكين السكين بدال ما تقطع هذي الألياف تدخل بينها وإذا شلنا السكين ترجع لمكانها الطبيعي وهذا اللي يخليها لينه على السكين وفي نفس الوقت تعالج نفسها بنفسها. بعد فترة بتضعف هذي الألياف وتتقطع وتتكون خدوش على السطح وبيحتاج الخشب صيانه عشان يرجع زي ماكان بس تبقى أفضل من غيرها. الميزة الثانيه في الخشب هو إنه يعقم نفسه بنفسه، الخشب له مسامات و أي بكتيريا على الوجه بتدخل داخل الخشب بدال ما تكون على السطح. من زمان كان فيه إعتقاد إن هذي صفة سيئة في الخشب بس بعد بحث لقوا إن البكتيريا اللي تدخل داخل تموت بعد فترة هذا غير إنها بعيدة عن السطح اللي نقطع عليه وبكذا ما تلوث الأكل. بالإضافه لهذا بعض أنواع الخشب (مثل الخيزران و خشب الميبل أو القيقب) ينتج مركبات كيميائية معقمة تقتل الجراثيم.


مشاكل الخشب كلها ممكن نعالجها بالإهتمام و الصيانه. أكبر مشكله في الخشب هو إنه يتشرب المويه ولو شرب كمية كبيره يلين الخشب داخله وممكن يميل أو ينعوج اللوح أو حتى ينكسر في حالات. ميلان اللوح يخليه ما يثبت إذا جينا نقطع وأحيانا كثيره إذا مال اللوح ماله حل إلا الرمي. حل المشكلة هو إننا نمنع المويه الكثيرة عن اللوح، عشان كذا ما نغسله بمويه أبدا ولا نتركه فوق بقعه مويه على سطح المطبخ مثلا ، حتى لو كان طرف اللوح بس لامس للمويه الخشب ممكن يتشربه فمهم جدا إن اللوح يكون ناشف دايما. غير كذا الخشب يحتاج شوي عنايه خاصه غير كثير من الألواح الثانيه.


لوح معووج

ألواح الخشب تجي بستايلين أساسيه تعتمد على كيف الخشب مرصوص.

* ألواح تقطيع عامودية الأنسجة End Grain Butcher’s block : في هذي الألواح ألياف الخشب تكون عاموديه يعني من فوق لتحت تقدرون تتخيلونها كأنها فرشه أسنان ونقطع عليها. هذي أغلى و أفضل أنواع ألواح التقطيع، هي جدا جدا قويه وصعب تتجرح وفي نفس الوقت لينه مره على السكين هذا غير إن هذي الألواح هي أكثر ألواح يبان فيها أثر معالجة الخشب لنفسه.


* ألواح التقطيع أفقية الأنسجة Edge Grain Butcher’s block : نوع أقل من الأول بس يبقى خيار جدا ممتاز و أرخص بكثير من الأول. هنا الألياف تجي بشكل عرضي يعني من اليمين لليسار بدال ما هي من فوق لتحت.

نوعيات الأخشاب المستخدمه كثيره، اللي نبيه هو خشب قاسي hard wood وفي نفس الوقت بمسامات صغيره. أشهر أنواع الخشب المستخدمه هي : خشب الميبل أو القيقب maple wood ، خشب الكرز Cherry wood ، خشب التيك Teak wood , خشب الجوز Walnut wood والخيزران Bamboo. الميبل أو القيقب رخيص نسبيا وجدا قاسي ويعقم نفسه بشكل حلو وهو أكثر شي مستخدم. الكرز حلو شكله وتقريبا بنفس صلابه الميبل. التيك حلو كونه فيه ميزه إن مساماته صغيره وداخل الخشب فيه زيت يقلل دخول المويه. الخيزران موب خشب هو نوع عشب بس كبير ، جدا رخيص وجدا جدا صلب ويعقم نفسه بشكل حلو بس مشكلته هي صلابته الزايده اللي تخليه شوي قاسي على السكاكين أكثر من الأنواع الثانيه.

البلاستك Plastic :

 

البلاستك أكثر مادة مستخدمه لألواح التقطيع وهي بشكل عام جيده. البلاستك رخيص ونظيف ويتوفر بأحجام و ألوان و أشكال كثيره غير كذا هو لين على السكاكين بس بشكل أقل من الخشب. الحلو في البلاستك إنه ما يتأثر بالمويه ولا يشربها زي الخشب وهذا يعني إنه ما ينكسر أو ينعوج زي الخشب. البلاستك نظيف وهذا يخليه خيار محبب للمطاعم، سبب نظافة البلاستك هو إن البكتيريا تقعد على السطح ويسهل تنظيف اللوح وتعقيمه بسهوله هذا غير إنه يتحمل دخول غسالات الصحون بدون مشاكل. البلاستك غير كذا ما يحتاج أي صيانه معقده ، أستخدم اللوح إلين يطلع عليه جروح وخدوش بعدين أرمه ما يحتاج صنفره ولا يحتاج تزييت ولا غيره زي الخشب.


مشاكل البلاستك للأسف مالها حل زي مشاكل الخشب. أول مشكله هي إن البلاستك “يزحلق”، يعني اللوح ما يكون ثابت على سطح المطبخ ولا الأكل يكون ثابت عليه بشكل جيد زي الخشب. هذا غير إنه يخلي التقطيع شوي أصعب ممكن يسبب جروح. المشكلة الثانيه هي إنه رخيص بس موب إقتصادي ولا نظيف على المدى الطويل، البلاستك ضعيف مقارنة بالخشب بعد فترة قصيرة البلاستك راح يتجرح وتتكون عليه خدوش عميقه أحيانا وهذي زي ماقلنا تكثر فيها البكتيريا وصعب تتنظف حتى داخل غسالات الصحون وكونه ما يتصنفر زي الخشب ماله حل إلا التغيير وهذي مكلفه عالمدى الطويل. مشكلة البلاستك الثالثه هي إنه يتلون ويمسك الريحة و أحيانا يكون صعب إزالتها. المشكلة الرابعة هي إنه ما يتحمل الحراره أبدا ، طبعا ألواح التقطيع موب مكان ينحط عليه قدر حار بس الأخطاء تصير و ألواح البلاستك بتذوب ويمكن تلصق على القدر حتى.

 

ألواح بلاستك


ألياف الخشب Wood Fiber :

 

ألياف الخشب مادة جديدة نسبيا في ألواح التقطيع بس أنتشرت بشكل كبير، هي عباره عن قطع خشب صغيره مربوطه بمادة رابطة. الهدف من إستخدام ألياف الخشب هو إنتاج ألواح بمواصفات الخشب و البلاستك مع بعض. أكثر شي يميز ألواح الخشب و أكثر شي هم يسوقون له هي إنها صديقة للبيئة وهذا حبب ناس كثير فيها. أسعار الألواح هذي غالية نسبيا بس أرخص من الخشب بكثير. الألواح هذي تجي بأشكال و ألوان جدا حلوه هذا غير إنها تتوفر بموديلات و أشكال غريبه ومميزه. ألياف الخشب جدا صلبة وصعب تتجرح بسهولة وتتحمل حرارت عاليه نسبيا هذا غير إنها ما تتشرب المويه بسهولة زي الخشب الطبيعي وهذا يعني إنها ما تنكسر ولا تحتاج تزييت أو غيره. هذي الصفات تخلي ألياف الخشب خيار جدا نظيف كونه يدخل غسالة الصحون بدون مشاكل وكونه صعب يتجرح زي البلاستك و الخشب العادي.

 

ألياف الخشب صلبة وهذي ميزه هنا بس في نفس الوقت مشكلة كونها شوي قاسيه على السكاكين أكثر من الخشب أو البلاستك. غير كذا مهما كان السطح قاسي بعد فترة لازم يتجرح وألياف الخشب للأسف مالها صيانه بمعنى إنها ما تتصنفر زي الخشب الطبيعي وهذا يعني إنها تنرمي زي البلاستك إذا تجرحت. مع العلم إن الألواح هذي معالجه بماده عازله إلا إنها تتشرب المويه بشكل بسيط وبعد فترة راح تميل ( زي ما صار معي كثير ) إذا الواحد ما بعدها عن المويه لفترات طويله. مشكلة ثانيه في هذي الألواح وهو الريحة الصناعيه اللي تطلع منها بعد الغسيل، ولو إن الريحة موب مزعجة ولا تلصق في الأكل إلا إنها مشكله موب موجوده في باقي المواد. مشكلة ثانيه لاحظوها ناس كثير ( شخصيا ما واجهتها ) وخصوصا في الألواح المصبوغه من ماركة epicure هي إن الصبغه تبدأ تروح بعد فترة طويله نسبيا (تقريبا ٩ شهور) وكثير لاحظوها تلون الأكل.

 

ألواح ألياف الخشب تجي بأشكال كثيره

 

المطاط Rubber :

 

المطاط بعد مادة جديده على ألواح التقطيع. ألواح المطاط نظيفة و آمنه نسبيا على السكاكين و ما تتأثر بالمويه. ألواح المطاط تعتبر ثقيله بالنسبه لحجمها وشي يميزها هو إنها تجي بسماكات جدا جدا نحيفه. أسعار هذي الألواح هو الشي الغريب كونها غالية نسبيا بس ممكن تعيش وقت طويل. هذي الألواح مطاطة وتعالج نفسها بنفسها زي ما يصير في الخشب وهذي يمكن أكبر ميزه فيها كونها تقاوم الخدوش وقت جدا طويل.

 

الألواح المطاطية صلبة وتخرب السكاكين أسرع بثلاث مرات من ألواح الخشب الطبيعي. غير كذا أكبر مشكلة تواجه اللي يستخدمونها هي إن التقطيع عليها غريب شوي، السكين تدخل وتعلق داخل المطاط وهذا اللي يعطينا الشعور الغريب إذا جينا نقطع عليها. ألواح المطاط ينفع تنغسل في غسالات الصحون بس ما ينصحون بهذا الشي كون الغساله ممكن تخربها. مهما كان السطح صلب إلا ويجي يوم وتطلع عليه خدوش وشقوق تصعب علينا تنظيفها وتزيد من مخاطر التسمم الغذائي و المطاط موب خارج عن هذي القاعده بس الشي الحلو في المطاط إنه عكس البلاستك و ألياف الخشب ممكن يتصنفر زي الخشب الطبيعي بالضبط ويرجع لحالته الأصليه وهذا يخلي عمره الإفتراضي طويل.

 

لوح تقطيع مصنوع من المطاط

 

مواد ثانية :

 

الأمثلة اللي ذكرت فوق هي يمكن أشهر و أفضل مواد تستخدم للألواح التقطيع بس موب الوحيدة. بتلاقون في السوق ألواح مصنوعه من ستانلس ستيل stainless steel ومن سيراميك ومن جزاز بس هذي كلها ما تنفع. كل هذي المواد تخرب السكين بشكل جدا سريع غير إنها موب مريحة في التقطيع.

 

الخصائص الإضافيه :

 

بعض ألواح التقطيع صارت تجي بخصائص إضافيه بعضها مفيد وبعضها ماله أي داعي. أشياء زي الأرجل و القنوات اللي على الجنب عشان تجمع المويه النازله أو الأدراج أو حلقات التعليق أو المساكات أو أسطح التشريح الخشنة هذي كلها إضافات. المهم إنكم تفكرون كيف هذي الإضافات ممكن تأثر في أشياء ثانيه. مثلا الأرجل اللي على الألواح من تحت مهمتها ترفع اللوح وبكذا حتى لو كان اللوح معووج أو مايل يكون ثابت. هذي ميزه حلوه بس في نفس الوقت هي تشيل ميزه ثانيه في الألواح وهي إمكانية إستخدام الوجه الثاني كلوح ثاني لغرض ثاني وهنا لازم نقيم ونشوف.

 

لاحظوا القناة اللي تمسك السوائل

 

ألواح التقطيع و السلامة الغذائية

 

ألواح التقطيع مصدر كبير للتسمم في المطابخ. اللي يصير هو عملية يسمونها التلوث الخلطي Cross Contamination . اللي يصير في التلوث الخلطي هو إن مادة ملوثه تلامس مادة غير ملوثه وبعدين هذي المادة تلوث مواد ثانيه اللي بدورها تلوث مواد ثانيه وكذا. أحيانا نسبه الإصابه من المادة الملوثه الأصلية جدا ضئيلة بس مع الإنتشار الكبير تزيد فرص الإصابه أكثر و أكثر. مثلا خل نفترض عندنا دجاجة ملوثه ببكتيريا السالمونيلا ، وحده من أشهر أنواع البكتيريا المسببه للتسمم. البكتيريا هذي تموت بالحراره يعني لو طبخنا الدجاجه لدرجة الحراره المطلوبه مافيه أي مشاكل و الدجاجه صالحة للأكل. بس وش يصير لو قطعنا الدجاجه على لوح تقطيع وقعدت البكتيريا هذي على الوجه إما لأننا ما نظفناه أو ما نظفناه صح وقتها أي شي نقطعه على نفس اللوح بيتلوث و أي شي يلمس الشي هذا بيتلوث وهنا يصير التلوث الخلطي. عشان كذا فيه قواعد أساسيه للسلامه في إستخدام ألواح التقطيع.

 

* أستخدموا ألواح نظيفه وبدون أي خدوش على الوجه. في حال كثرت الخدوش على الوجه عالجوا المشكله بإنكم تغيرون اللوح أو تشيلون الخدوش إن أمكن. الخدوش زي ما ذكرت قبل ملاجيء للجراثيم ومستحيل تنظيفها بشكل جيد حتى في غسالات الصحون.

 

* أستخدموا لوح خاص للأكل الني و الخضروات ولوح خاص للحوم و الطيور و الأسماك، عشان نتفادى اللخبطة بعدين نقدر نعلم على اللوح بعلامه بقلم مثلا أو حتى نستخدم ألواح ملونه للتفريق. الحل المفضل بعد هو إنكم تستخدمون لوح خاص للخضروات و الأكل الني ولوح خاص للطيور ولوح خاص للأسماك و لوح خاص للحوم الحمراء بس بعض الناس يمكن يستصعب هذا الشي. بعض الألواح ممكن إستخدام الوجهين فيها وهنا نقدر نخصص وجه للأكل الني ووجه للحوم ولو إن لوح منفصل أفضل. في حال كان صعب تستخدمون لوح مختلف للأكل الني و اللحوم لازم تنتبهون لترتيب التقطيع، يعني نقطع الأكل الني (على لوح معقم ونظيف طبعا) وبعدين بعد ما نخلص نقطع اللحوم أو غيرها أهم شي إننا نتجنب إن الأكل الني يلمس شي ممكن يلوثه.

 

* تنظيف وتجفيف الألواح ضروري بعد كل إستخدام ولازم يتعقم اللوح من وقت لوقت. بقايا الأكل اللي تقعد على اللوح بيتكاثر عليها الجراثيم وبسرعه وهذا يزيد خطر التسمم من اللوح و البكتيريا تحتاج رطوبه عشان تعيش فمهم يكون اللوح ناشف دايما.

 

 

chicken liver

ما نقطع الدجاج على لوح خضار

 

التنظيف و الصيانة

 

التنظيف :

 

الألواح لازم تتنظف بعد الإستخدام علطول. إذا كان اللوح من الأنواع اللي تدخل غسالة الصحون مثل البلاستك أو ألياف الخشب فأفضل طريقة للتنظيف هي داخل غسالة الصحون. غسالة الصحون تستخدم حراره عاليه ومنظفات قويه تنظف الألواح بشكل ممتاز. الخشب الطبيعي ما يدخل غسالة الصحون بأي حال من الأحوال تجنبا إن اللوح ينكسر أو يتشرب مويه كثيره مليانه منظفات.

 

إذا كنا بنظف اللوح باليد نستخدم مويه حاره ( أعلى حراره نقدر نتحمل ) وصابون ونغسل اللوح فيها ونفركه بإسفنجه بشكل جيد. بعد ما نغسله نجففه بمندايل رول أو خرقة مطبخ ونخليه إلين ينشف تماما. ألواح الخشب ما تتغرق ولا تنشطف بالمويه أبدا ! عشان كذا إذا جينا نغسل ألواح الخشب نستخدم إسفنجه ونمسح اللوح ونفركه بشكل جيد بمويه حاره مع صابون. بعد ما نخلص من الغسيل نمسحه بإسفنجه أو ليفه صحون مليانه مويه بس وبعدين نجففه زي الألواح الثانيه.

 

بعد فترة إحتمال يلصق على اللوح ريحة أو لون من الأشياء اللي نقطع. عشان نشيل اللون اللي يطبع على اللوح نرش على اللوح كمية ملح طعام عادي وبعدين نفرك اللوح بنص ليمونه مقطوعه، بعد كذا ننظف اللوح بمويه وصابون عادي. هذا غالبا بيشيل اللون و الريحة بس في حال ماراحت الريحة نقدر نرش على اللوح شوي بيكنج صودا (بيكربونات صوديوم) ونفركه فيه وبعدين ننظف اللوح ونجففه عادي.

 

أزالة الروائح من ألواح التقطيع

 

 

تعقيم الألواح :

 

تعقيم ألواح التقطيع شي ضروري ومطلوب من وقت لوقت سواء كان اللوح خشب أو بلاستك أو غيره، تقريبا مره في الشهر جيد ولكن يفضل مره كل أسبوع. فيه ثلاث مواد أساسية نقدر نعقم فيها الألواح و أفضل إستخدام أكثر من وحده كل مره.

 

* الخل الأبيض العادي خيار ممتاز في التعقيم ومتوفر ويقتل أغلب الجراثيم المسببه للتسمم. حطوا الخل في علبه رذاذ ورشوه على سطح اللوح بسهولة.

 

* المبيضات Bleach زي الكلوركس وغيرها ممتازه بعد في التعقيم. أستخدموا ملعقة كبيره لكل لتر مويه للتعقيم.

 

* بيروكسيد الهايدروجين Hydrogen Peroxide معقم جدا ممتاز وخصوصا للألواح الخشبيه. تلاقونه غالبا في الصيدليات ويجي بتركيزات مختلفه، اللي نبيه هنا هو اللي يكون ٣٪.

 

نعقم الألواح بإننا نرش السطح بالمادة المعقمة أو نمسحة بشكل جيد عليها بإستخدام ليفه وبعدها نتركه يتعقم نص ساعة تقريبا وبعدها نشطفه بمويه أو نمسحة بشوي مويه إذا كان خشب. شخصيا أحب أستخدم رشاشات الرذاذ لأنها تسهل المهمة بشكل كبير.

 

إزالة الخدوش :

 

الخدوش اللي تطلع على الألواح هي عدوها الأول وبعد ما تطلع يصير اللوح غير صالح للإستعمال ويجب تغيره أو تصليحه.

 

ألواح الخشب و المطاط حلوه كونه جدا سهل تصليح الخدوش اللي تطلع عليها. كل اللي علينا نسويه هو إننا نستخدم ورق صنفره عادي ونفرك اللوح فيه إلين تختفي الخدوش ونكون خلصنا. في حالة الخشب أحيانا تكون الخدوش عميقة وصعب تتصنفر بالورق العادي وهنا نقدر نوديها عند أي نجار يصنفر اللوح من جديد. البلاستك و ألياف الخشب للأسف ما تتصنفر زي الخشب.

 

أزالة الخدوش من لوح التقطيع

 

التزييت :

 

التزييت عملية ضروريه من وقت لوقت في الألواح الخشبيه بس. الخشب يشرب المويه ومهم نمنع المويه قدر الإمكان عنه عشان نحافظ عليه أطول فترة. يفضل تزيتون الألواح الخشبيه مره كل ٣ شهور بالكثير. الزيوت النباتيه العاديه وزيت الزيتون وغيرها ما تنفع هنا كونها تتأكسد بسهولة. أفضل شي لتزييت الألواح هو إستخدام زيت معدني mineral oil لأنه ما يتأكسد زي الزيوت الثانيه. الزيت المعدني متوفر في أغلب محلات الأدوات المنزليه أو حتى إيكيا. خيارات ثانيه للزيت ممكن نستخدم زيت اللوز أو البندق أو حتى زيت جوز الهند. هذي الزيوت تعيش وقت طويل بدون ما تتأكسد وممكن تستخدم هنا.

 

عشان نزيت اللوح ندهنة بكمية زيت كبيره ونخليه إلين يتشرب الزيت تقريبا طول الليل وبعدها نمسح الزيت الزايد.

 

 

Follow TopChefCooks on Twitter

عن الكاتب

Top Chef

21 comments

2 pings

Skip to comment form

  1. غير معروف

    شكراً ع المعلومات

  2. ام عبدالله

    السلام عليكم
    يعطيك العافية على الجهد المبذول ، انا حابة اشتري لوح التقطيع boos من تافولاوحسب وصف المنتج انه من الخشب الميبل الصلب ، لكن الصراحة متوقفة عند نقطة محيرتني !!! كيف ماينغسل لوح التقطيع بالماء ؟ ما راح يأثر على امتزاج النكهات حتى لو استخدمنا اللوح فقط للخضار والفواكه يعني مثلا اذا قطعت البصل وعقبه اضطريت اقطع فاكهة ، وإذا كان اللوح مخصص للحوم يعني أيضاً اكتفي بمسح اللوح دون غسله . أرجو الإفادة مع فائق الاحترام والتقدير

    1. Top Chef

      ينغسل اللوح بس ما ينغمر أو يننقع بالمويه هذا قصدي. يعني تتعاملين معاه كأنك تغسلين كاونتر مطبخ … طبعا لا تنسين إن اللوح يتزيت ويتشمع (موجود الزيت و الشمع عند تافولا) وهذا يسوي طبقه زي التغليف اللي عالكتب ما يخلي شي يدخله … غير كذا اللوح لازم يتعقم من فترة لفترة وبعد حاط حلول ازالة اللوان في حال علقت عليه.

  3. سامي

    السلام عليكم شيف

    اذا سمحت من فين اقدر اشتري End Grain Butcher’s block في السعودية

    و شكراً

    سامي

    1. Top Chef

      وعليكم السلام و الرحمة ….

      أتذكر من فترة طويلة شفت ألواح boos في تافولا بس ماكانت رخيصة الصراحة. أعتقد لو تعرف نجار ممكن يسويلك إياها بس تأكد إنه يستخدم خشب غير معالج وما يدهنه أو يستخدم أي شي عليه خطر ينوكل.

  4. yasser

    السلام عليكم ورحمه الله وبركاته الساده الكرام احب ان انوه اننى والحمدلله انشائت مصنع الواح تقطيع بلاستيك صناعه مصريه ولاول مره فى الشرق الاوسط ان يتم انشاء مثل هذه التخصصات بعد ان كنا معتمدين على المستورد من الخارج وبجميع القياسات التى يرغب بها العميل

    1. Top Chef

      الف مبرووك وبالتوفيق في المصنع.

      طيب عينات مجانيه من هنا من هنا عشان نتأكد ياعم …. ههههه

  5. عهد

    شيف نزللنا تفننات بسرعت التقطيع وبلتزيين وبلحفر بظن موضوع ملفت وحلو

    1. Top Chef

      منيب أفضل شخص في هذا الموضوع أبدا .. خصوصا الحفر و النحت وغيره.

  6. عهد

    شكراً

  7. غير معروف

    ما شاء الله شيف

  8. nehad

    انا استعمل لوحين الخشب للخضار و البلاستيك للحم و اعقمه بالديتول

    امس اشتريت لوح للتقطيع للاسف قبل ان اري موقعك الاكثر من رائع بجد

    اشتريت من هوم سنتر لوح تقطيه بامبو او خيرزان
    ايه رايك بيه
    وهل احتاج الي لوح اخر للاستخدام الشاق مثلا
    كان في في ايكيا لوح تقطيع من الزان الصلب ايه رايك فيه اشتريه
    و اخلي اي واحد للحوم و ايهم للخضروات

    وشكرا ليك كتير

    1. Top Chef

      هلا والله …

      أختي أنا أكتب مواضيعي و أحط فيها كل معلومه تحتاجينها عشان أتجنب الإجابة على الأسئلة الفردية. أرجعي للموضوع فيه كل كل كل الأجوبة لأسئلتك.

  9. غير معروف

    لي فترة طويلة استخدم الواح ايكيا البلاستيك الخفيف

    لسببين : الاول/ انها ملونة تساعدني في التفريق بين لوح اللحوم ولوح الخضار .

    ثاينا / خفيفة وعملية وسهل نقله من ركن لركن على طاولة المطبخ ,اضف انها رخيصة بسهولة استغني عنها وابدلها بجديده.

    حالياُ استخدم بعد الواح جديدة في السوق وهي زجاجية ملونة اشكالها حلوة ورخيصة بعد .

    من عيوبها الصوت الصادر عن التقطيع . ايضا حركة اللحوم على اللوح مزعجة ,لذلك استخدمه فقط للخضار

    1. Top Chef

      البلاستك ممتاز بس الجزاز أسوأ شي ممكن تسوينه بغض النظر عن الصوت يعدم السكين بسرررررعه.

      1. غير معروف

        بجد !!!

        اول مرة اعرف هذا الشي . كل شي الا سكيني عاد .

        اما الصورة الشخصية !!!!! شي الصراحة

        1. Top Chef

          مكتوب الكلام في الموضوع …

          هههه الصوره هذي تحفه ، أعشق هذي الشخصيه.

  10. غير معروف

    موضوع رائع وممتع … يعطيك العافيه …
    انا علشان اكون صريحه معاك استخدم لوح واحد لكل شي … ادري بتقول لازم ولازم بس احسه موضروري من ربي خلقني انا وهلي ماعندنا الا واحد … اغسله بكوركس مضبوط بعد كل استخدام بلاخص اللحوم بذات لازم لازم بعدها تعقيم بالكلوركس …
    فليه الكلفه احسها نوع من الرفاهيه فقط …

    1. Top Chef

      هلا والله …

      كونك ما مرضتي للحين ما يعني إن مافيه خطر مثل كونه ماقد جاني حادث ما يعني إن الحزام في السياره ماله داعي. هذا النوع من التبرير عقيييييم. مع إحترامي الشديد لك بس الموضوع موب موضوع أراء مالم يكن عندك شي قوي يثبت كلامك. فيه مختبرات سوت هذي الدراسات وشافت كيف الجراثيم تعيش وتتكاثر على ألواح التقطيع وفيه إحصائيات موجوده من المستشفيات ومنظمات ووزارات صحة حولين العالم تأكد هذا الكلام وفيها أرقام المصابين بالملايين سنويا.

  11. noor88

    you are a wonderful man
    thanks for everything

  12. نور

    ما شاء الله شيف معلومات لاول مره اعرفها
    شوقتني اشتري لوح خشب
    انا استعمل بلاستيك واحد للخظار و واحد للحوم و الاسماك و الدياي
    بس الحين بفصل كل نوع بلوح بروح
    يعطيك الف عافيه

  1. مهارات التقطيع الأساسية .. Basic Knife Skills » Top Chef Blog .. مدونة توب شيف

    […] التقطيع و أهميتها وطرق إختيارها و الفروقات بينها (الموضوع هنا). في هذا الموضوع راح أحاول أشرح كيف نستخدم هذي الإثنين […]

  2. مهارات التقطيع الأساسية .. Basic Knife Skills « مدونة توب شيف … Top Chef

    […] التقطيع و أهميتها وطرق إختيارها و الفروقات بينها (الموضوع هنا). في هذا الموضوع راح أحاول أشرح كيف نستخدم هذي الإثنين […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: