«

»

مارس 15 2011

صوصات الكريمة .. Cream Sauces

هلا والله …

 

صوصات الكريمة من إسمها هي الصوصات اللي يكون أساسها كريمة بس . الأمثله كثيره سواء كصوصات للباستا أو غيره بس حاليا بتكلم بس عن صوصات الباستا.

 


فيتوشيني مع صوص كريمة اللوبستر .. Fettucini with Lobster Cream Sauce :

 

اللوبستر Lobster له أسماء كثير، فيه ناس يسمونه أستكوزا وفيه ناس يسمونه جراد البحر (مع العلم إن جراد البحر كائن ثاني) . أشكال و ألوان اللوبستر تختلف شوي عن بعض بس كلها ممكن تستخدم هنا. اللوبستر واحد من ألذ الأكلات البحريه وواحد من أغلاها بعد بس سعره فيه . طعم اللوبستر قريب من الربيان بس أحلى و ألين . ممكن تستخدمون الربيان هنا وبنفس الكمية في حال ما توفر اللوبستر أهم شي أستخدموا ربيان مع القشر حقه كوننا بنسوي الصوص منه. الصوص اللي مقدم مع الباستا صوص كريمة مع أعشاب كثير و بطعم بحري رهيب من القشر و اللحم حق اللوبستر اللي خلطناه معه.


اللوبستر لازم ينطبخ  وهو حي ! في حال ما توفر حي أستخدموا مجمد وغالبا بيكون مجمد بس الذيل. لا تستخدمون لوبستر ميت ! فيه خطر تسمم. أول ما يموت اللوبستر يبدأ جسمه يتحلل بسرعه وعشان كذا خطر ينوكل بعد ما يموت بفترة.


المقادير :


حبة لوبستر حوالي كيلو إلا ربع أو ربيان بنفس الوزن مع القشر و الراس

زيت زيتون

١/٤ كوب معجون طماط

حبتين طماط مقطعه صغار

ملعقتين كبار خل عنب أبيض

فصين ثوم مقطعه شرايح

عودين طرخون طازج

عودين زعتر بري thyme طازج

عودين بقدونس طازج

٣ أكوب قشطة خفق قصيرة الأجل

تقريبا ٤٠٠ جرام باستا سواء طازه أو جافه


* في حال كنا بنستخدم ربيان ، نقشره وننظفه بس نخلي القشر على جنب.

* الطرخون و الزعتر ممكن تبدلونهم بالمجفف بس حاولوا تلاقون الطازج كونه بيفرق أو أستخدموا أي أعشاب طازجة متوفره عندكم.

 


الطريقة :


أول شي نطبخ اللوبستر. فيه أكثر من طريقة لطبخ اللوبستر بس أشوف إن أحسن طريقة هي البخار. نجيب قدر كبير ونحط فيه تقريبا ٢ سانتي مويه مع ملح كافي إنه يخلي المويه مالحه شوي ، نخلي المويه تغلي بعدين نحط اللوبستر في القدر وهو حي ونغطي القدر زين إلين يستوي. اللوبستر بياخذ تقريبا ١٢ دقيقه إذا كان وزنه ٣/٤ كيلو ..


lobster

قبل الطبخ

lobster

بعد الطبخ

 

 

الحين نقطع اللوبستر بالنص بالطول ونشيل اللحم اللي في الذيل و اللي في اليدين و الرجول ، نحط اللحم في صحن في الثلاجه إلين نخلص الصوص. ننظف البطن من الأشياء اللي داخل ( لا تخافون منها قابلة للأكل وفيه ناس يموتون فيها بس ما نحتاجها هنا ) . الحين ناخذ القشور حقت اللوبستر ( أو الربيان )  ونقطعها شوي بالسكين.


الحين في قدر نسخن الزيت على حراره وسط ونطبخ الراس و القشور كلها إلين تتلون شوي وتطلع ريحتها حوالي ٣ دقايق . ننزل الحراره ونحط المعجون حق الطماط + الخل + الطماط + الثوم + الطرخون و الزعتر و البقدونس … نضيف القشطة ونخليه على غليه خفيفه حوالي ٢٠ دقيقه إلين تتطعم القشطة بالقشر .


نطبخ الباستا زي ما شرحت في المواضيع هنا وهنا.


الحين نصفي الصوص عشان نشيل كل القشور والأعشاب بعدين نرجع الصوص للقدر ونرجعه لغليه خفيفه ونحط اللحم حق اللوبستر إلين يحتر من جديد . لو كنا نستخدم ربيان نحط اللحم حق الربيان الحين ونطبخه في الصوص إلين يقلب برتقالي. الحين نضيف الباستا عالصوص ونطبخه شوي معها بعدين نقدمها مع زيادة بقدونس فوقها.


lobster pasta

باستا لوبستر

أوريكيتتي مع صوص كريمة البيستو .. Orecchiette with Pesto Cream Sauce :

 


الأوريكيتتي شكل من أشكال الباستا يعني الآذان الصغيرة كونه يشبه الأذن. الصوص المستخدم هنا هو صوص كريمة يشبه الألفريدو بس مطعم بالبيستو.

 

المقادير :


٢٠٠ جرام مكرونة أورشيتي أو بيني لو ما عندكم

كوبين قشطة خفق قصيرة الأجل

نص كوب بيستو ريحان أو حسب الرغبة

ملح وفلفل

بارمزان ويفضل بارميجانو ريجانو

ريحان و زيت زيتون للتزين .

 


الطريقة :

في قدر نحط القشطة ونخليها تغلي على غليه هاديه إلين تقل بمقدار الثلث. أنتبهوا تخلون الكريمة تغلي بقوة عشان ما تفصل.


Pesto cream sauce


الحين طفوا النار عالصوص و أسلقو الباستا زي ما شرحت في المواضيع هنا وهنا . إذا قربت الباستا توصل مرحلة الألدنتي نشغل النار عالصوص من جديد ونحط البيستو ونحركه مع الصوص ونذوق ونعدل الطعم حسب الرغبة .


pesto cream

كريمة البيستو

 

الحين نشيل نص كوب من موية السلق حقت الباستا بعدين نصفي الباستا ونضيفها عالصوص. نطبخ الباستا مع الصوص ونزيد شوي من مويه السلق لو لقينا إنها تحتاج. آخر شي نرش زيادة بارمزان وزيت زيتون ونزينها بالريحان أو البقدونس.

 

pesto cream

 

كريمة البيستو

 

pesto cream

 

كريمة البيستو

 

 

 

 

 

فيتوشيني ألفريدو .. Fettuccine Alfredo :

 

 

بالنسبة لناس كثير هذي تعتبر ملكة الباستات ، الألفريدو صوص أخترعه طباخ إسمه ألفريدو يقال عشان زوجته الحامل كانت تحتاج تاكل أكل دسم .. النسخة الأصلية من الألفريدو مافيها أي قشطة خفق هي عبارة عن زبدة و بارمزان بس ! . أكثر شي يزعل في الموضوع إن الباستا هذي صار فيها تأليف ماصار في أي باستا ثانيه .. هذي وحده من أسهل الصوصات في العالم بس بقدرة قادر صارت صوص معقد وفيه فلسفة زايدة ؟ الكركم و الكمون و الكزبرة وحتى الموزاريلا أضمنلكم موب من مكونات الألفريدو !! كثير ناس يحطون مكونات كثير ومكونات غريبه ومكونات ما تمشي بعد .. صوص الألفريدو موب بس للباستا هو ممكن يتقدم مع أكثر من شي زي الخضار أو السمك أو الدجاج أو المأكولات البحرية ..

 

الصوص هذا مافيه دجاج !! ونصيحة نصيحة جربوه ولو مره وحده زي ما أقول قبل ما تسوون أي تعديل عليه .. ما يحتاج يكون فيه دجاج في المكرونه عشان تكون لذيذه !! اللي مصمم يبي دجاج يسوي دجاج عالجنب بس خلوا الباستا بدون دجاج. الشي الثاني ، هذي المكرونه دسمه وثقيله لأنها ألفريدو !! مافيه ألفريدو خفيفه ! لحد يجيني يقول لذيذه بس ثقيلة ؟؟؟؟؟ هي مفروض تكون كذا بس هي موب مفروض تنوكل كل يوم !


المقادير :

 

أصبع زبده

كوبين قشطة خفق قصير الأجل.

تقريبا علبة فطر أو حسب الرغبة . مقطعة شرايح

فصين ثوم مقطعه صغار

٣/٤ كوب جبن بارمزان ويفضل بارميجانو ريجانو .. (ضروري للصوص لحد يشطبه)

ملح وفلفل

حوالي ٣٠٠ جرام مكرونه فيتوشيني طازه أو ناشفة حسب الرغبة .

بقدونس للزينة

 

 

الطريقة :

 

نسلق الباستا زي ما شرحت في المواضيع هنا وهنا .

 

و الباستا قاعدة تنسلق نسوي الصوص. نذوب نص الزبده على حراره وسط بعدين نحط الفطر مع رشة ملح وفلفل ونطبخه إلين يلين ويبدأ يتلون شوي.

 

Alfreod sauce


الحين نحط باقي الزبده و الثوم ونطبخهم إلين تطلع ريحة الثوم . الحين نحط القشطة ونخليها تغلي على غلية جدا خفيفه ( أنتبهوا لا تغلي أكثر من اللازم عشان ما تفصل المكونات عن بعض ) الحين نحط البارمزان ونحرك ..نذوق الصوص ونعدل الملح و الفلفل .

 

fettucini alfredo

 

نصفي الباستا بعدين نحطها عالصوص ونطبخه معها شوب بعدين نقدمه مع بازمزان زياده وبقدونس بس .. .

 

 

fettucini alfredo

 

فيتوشيني ألفريدو

 

fettucini alfredo

 

فيتوشيني ألفريدو

 

 

اللي يبي يسويي ألفريدو بس سادة يعني بدون فطر ينفع طبعا .. و اللي يبيها سادة مره يعني بدون ثوم بعد ممكن .. اللي يبي يسويها بالربيان بعد ممكن وسهل مره .. أطبخوا الربيان بدال الفطر إلين يقلب برتقالي بعدين شيلوه في صحن. كملوا الصوص عادي ورجعوا الربيان آخر شي للصوص عشان تسخنونه بس.

عن الكاتب

Top Chef

34 comments

2 pings

Skip to comment form

  1. ahed

    ﻣﺴﺎ ﺍﻟﺨﻴﺮ ﺷﻴﻒ.
    ﺍﻧﺎ ﻫﻸ ﺧﻠﺼﺖ ﻗﺮﺍﺋﺔ ﻛﻠﺸﻲ ﺑﻤﺪﻭﻧﺘﻚ ﺍﻟﺮﺍﺋﻌﺔ..ﻭﺗﻌﻠﻤﺖ ﻛﺘﻴﻴﻴﻴﺮ ﺷﻐﻼﺕ ﺣﻠﻮﺓ ..ﻭﺑﺎﻧﺘﻈﺎﺭ ﺟﺪﻳﺪﻙ..ﺍﻟﻠﻪ ﻳﻌﻄﻴﻚ ﺍﻟﻒ ﻋﺎﻓﻴﺔ..ﺍﻫﺘﻤﺎﻡ ﺭﺍﺋﻊ ﺑﻠﺘﻔﺎﺻﻴﻞ ﻭﺍﻻﺳﺎﺳﻴﺎﺕ ﺍﻟﻌﺎﻣﺔ..ﻭﺭﺩﻭﺩﻙ،،ﺣﺘﻰ ﺍﻟﺘﻌﻠﻴﻘﺎﺕ ﻣﺎ ﻧﻔﺪﺕ ﻣﻨﻲ ﻫﻬﻬﻪ..ﺍﻧﺎ ﺑﺸﺘﻐﻞ ﺑﻤﺠﺎﻝ ﺍﻟﻤﻄﺎﻋﻢ،،ﻟﺴﺎ ﻣﺎ ﺻﺮﺕ ﺷﻴﻒ..ﺑﻌﺮﻑ ﻫﻠﻜﻠﻤﺔ ﻣﻮ ﺳﻬﻠﺔ..ﺗﻌﻠﻤﺖ ﻣﻨﻚ ﻛﺘﻴﺮ..ﻭﺍﻧﺖ ﻣﺰﻭﻕ ﻭﻣﺤﺘﺮﻡ ﻭﻓﻬﻤﺎﺍﻥ..ﺍﻣﺎﻧﺔ ﺗﺤﺴﺐ ﺣﺴﺎﺑﻲ ﺍﺫﺍ ﻓﺘﺤﺖ ﻣﻄﻌﻢ ﺑﺴﻌﻮﺩﻳﺔ ﺑﺸﺮﺭﺭﺭﻓﻨﻲ ﺍﺷﺘﻐﻞ ﻣﻌﻚ..ﻭﺷﻜﺮﺍ

    1. Top Chef

      مساء الأنوار.

      حياك الله في أي وقت أخوي ومشكور على كلمك اللطيف.

      بإذن الله يكون لنا تواصل …

  2. المشتاقه للجنان.

    السلام عليكم يعطيك العافيه شيف
    ماشاء الله مبدع ومعلوماتك تعطيها من قلب ربي يزيدك من نعيمه
    سؤالي كريمة الخفق هي نفسه قشطة الخفق ؟!
    ياليت توصح الفرق..

    1. Top Chef

      وعليكم السلام و الرحمة ….

      هم نفس الشي بالضبط ، كريمة كلمة أجنبيه وقشطه عربيه بس هذا هو الفرق. زي الفرق بين راديو و مذياع.

  3. ابواسامة

    مرحبا شيف يعطيك العافية
    سويت صوص الفريدو ماطلعت النكهة قوية
    كيف يكون الصوص قوي جدا ونكهته قوية لاهنت

    1. Top Chef

      ذق الملح !!! بدون ملح كافي ولا شي بتطلع نكته باينه.

  4. غير معروف

    سويت صلصة الفتوشيني بس طلعت ثقيله شوي مدري ليه ؟؟
    و رغم اني مستخدمه مشروم طازج بس ما كان له اي طعم !! الثوم كان طعمه اوفر رغم اني بس اضفت فص ،،
    يعطيك العافيه و لا يحرمنا من وصفاتك

    1. Top Chef

      أي صوص أو شوربه تسوينه أعرفي دايما إنه كثافته راح تختلف حسب كذا شي مثل كم له يطبخ ، عرض القدر ، الحراره اللي يطبخ عليها ووش تحطين معه وهل تركتيه يبرد لفترات ولو بسيطة أو لأ .. بالعربي أشياء كثير بتأثر في قوام الصوص أو الشوربه بس هي موب نهاية العالم …

      دايما في آخر مراحل عمل أي صوص أو شوربة نذوق ونعدل .. ذوقي ، تحتاج ملح ؟ تحتاج أي نكهة زيادة زي بارمزان أو فلفل هنا مثلا أو ممكن شوربة تسوينها أو صوص ثاني تحتاج لمسة حموضة من ليمون أو خل أو ممكن رشة سكر زي في بعض صوصات الطماط ، لازم تتعلمين تذوقين وتعدلين … بعد ما تعدلين الطعم أبدي شوفي القوام … هل هي سايلة أكثر من اللازم ولا ناشفة أكثر من اللازم ؟ إذا سايلة خليها تطبخ شوي زيادة وإذا كانت ناشفة زيدي عليها شوي سائل زي مويه أو مرق أو حليب أو أي سائل ثاني إلين توصل للقوام اللي تبين….

      في الطبخ تعلمي دايما دايما دايما تذوقين وتعدلين هذا اللي يسوونه كل الطباخين في العالم ….

      الفطر ممكن كذا سبب ، طبعا هذا لو كنتي ملتزمه بالكميات اللي حاط بالضبط … السبب الأول هو إن النكهة يمكن موجوده بس أنتي توقعتي نكهة أقوي أو ما أنتبهتي للنكهة بشكل جيد . لو جربتي الوصفة بدون فطر بتبان لك هذي المشكلة …

      الإحتمال الثاني هو إنك ما حمرتي الفطر بشكل جيد وأكتفيتي إنك تطبخينه إلين يذبل بس .. الفطر يحب الحراره زي اللحوم وراح يتحمر بالضبط زي ما تتحمر اللحوم ويعطي طعم مختلف إذا تحمر عنه وهو مسلوق بس.

      الإحتمال الأخير هو إن الصوص كان يحتاج ملح … الملح موب نكهة … الملح مادة تساعد لساننا يذوق كل النكهات الثانية وعشان كذا الأكل اللي مافيه ملح باهت أو خانس أو ميت لأنك ما تقدرين تذوقين أي نكهة من النكهات الموجوده.

  5. الاوتار

    مشكور اخوي على الموضوع اموت على فوتتشيني مع ليمون وريحان وشوي زيت زيتون

  6. Zahraa Al-Bin Saad

    يعطييك ألف ألف عااافيه

    جربت فيتوشيني ألفريدو من جد بططططططل
    طعمها خطير وماتخيلت أنها سهله لهدرجه !!

    نص ساعه بالكثير وانا كنت خالصه ض1

  7. n0uf

    كمية سعابيل قطرت مب طبيعية وانا اقرأ!

    بسم الله عليك والله لا يضرك أشكال الكويزين رااائعة!
    بجرب اشياء واجد بهالمدونة.

    الف شكر.

  8. sema

    جربت الفيتوشيني صرااااحه رووعه اول مره تضبط معي واكون راضيه عنها

    يعطيك العافيه شيف ،

  9. dew

    طبقت وحده من وصفاتك بما اني احب الباستا وسئلتي الوالدة طريقة مين؟ قلت واحد سعودي طباخ ؟ قالت الله يهنيه ماشاءالله
    بالنسبة للمكرونات تقدر تقول هوايه ؟ لووووول
    جدا لما اسافر اي دولة احب اتفرج على منتجات السوبرماركت والباستا كمان واختار انواع واجرب
    فيه نوع جديد صرت استخدمه واجد لونه ازرق وايطالي ينباع بالدانوب كويس مرا وياخذ صوص
    في المانيا كان فيه مكرونة طولها ممكن متر وكانت خشنه لدرجة مجنونه يعني يلصق الصوص فيها بقوة ، مشكلة هي مش موجودة بكل مكان هناك
    على حد علمي : ايطالي يسويها ويبيعها للبقالة الصغيرة ، جد كانت جميلة وبعد ماقريت موضوعك تذكرتها كويس
    ماشاءالله موفق دايماً ، وعندي سؤال لو مازعجك؟ فيه مطعم ايطالي جربته بشرق اسيا وهو اسمه مايكل انجلو ” اكلهم خرافه
    عندهم نوع من الباستا بصوص غريب ؟ يعني ماهو ابيض ولا احمر
    تقول بزيت زيتون وعليه حبات فلفل احمر مجروش ومعها قطع شرمب ؛ احس اني حيرتك بس تعبت وانا ادورها واحاول اقلد عليها
    مشكور

    1. Top Chef

      هلا والله …

      بالنسبة للأنواع زي ماقلت في موضوع إختيار الباستا هي ترى ما تفرق سواء كان إيطالي أو سعودي أهم شي تكون خشنه وتكون مصنوعه بسميد، الفرق في التصنيع بس. اللي لاحظته هو إن بعض الماركات الإيطاليه غاليه أكثر من اللازم على باستا مع العلم إن جنبها علطول ماركه ثانيه إيطاليه أو بعد سعوديه أو غيرها وبنفس الجوده.

      المكرونه الطويلة شكل اللي يسويها شايب مدري ليش ههههه بالعاده ما يفضل تصير طويله مره لأن صعب سلقها كذا وبعد صعب أكلها . من زمان في إيطاليا كان طول الباستا دلاله على مهارة الشخص اللي يسويها بس بعد تطور المكاين صار سهل أي واحد يسوي باستا بأي طول.

      الباستا اللي تقصدين والله ما أعرفها لأن فيه كذا شي ممكن يركب عالوصف وبدون ما أذوق جدا جدا صعب. ممكن تكون شي عادي زي زيت زيتون مع ثوم و فلفل مجروش وربيان وشوي مويه باستا وممكن تكون أعقد من كذا .

  10. ماريوشكا

    ما معنى ” بيستو الريحان” ؟
    :s

    1. Top Chef

      http://topchefcooks.com/2011/03/12/pesto-sauce/

  11. it's me

    أخيرااااا ، واااو واااو ح اقعد أغني ، ماشاالله تبارك الله ، اللهم بارك عليه ولاتضره . آمييين .

    توب شيف متى ح تفتح مطعمك في جدة ؟
    قبل يومين رحت مطعم مرجريتا قلت لايكون الشيف هو أنتا ؟ بعدين طلع الشيف ايطالي يجننن
    كانت الكالزوني يمي مررة ، تذكرتك وحكينا أنا وصحباتي عنك ودعيت لك من قلبي .

    اتس مي

    1. Top Chef

      هلا والله ..

      آي أخيرا هههه الوصفه ترى قديمه مره ..

      مطعم مرجريتا ؟ وطباخ إيطالي ؟ وين ذا ؟؟؟

      1. it's me

        اهليين توب شيف ،
        ايوا عارفة ان الوصفة قديمة بس ماكنت اعرف انو عندك مكان صغنتوت يجمع وصفاتك ،

        مطعم مرجريتا في شارع الامير سلطان ، تعرف صيدلية أوكسجين ؟
        مقابلها ع سلطان اتبنت عمارة جديدة
        فتح هناك مرجريتا ،
        فيه مطعم ايطالي تاني اسمه برمودورو في طريق الملك جنب ستيك هاوس
        الاتنين أكلهم لذيذ بس ماتقدر تقارنهم طبعا بمطاعم ايطاليا اللي متخبية خلف ساحاتها
        لكن جدة كانت محتاجة فعلا هالمطعمين < تحس قد ايه جوعانين هههههه

        ع فكرة تتذكر محل شيرة !
        باعته صاحبتي لان ماعرفت تشغله ، أتمنى اللي يشغله تكون ذائقته عالية ، وينجح .

        اتس مي

        1. Top Chef

          هلا والله …

          أها .. تمام والله إذا رجعت أمرهم إن شاء الله على أمل على أمل نلاقي شي جديد .. خلاص من جد روحة المطاعم صارت مقرفة نفس الأكل نفس الأكل نفس الأكل كلللللهم .. بيني أربياتا ، فيتوشيني ، سيزر (مع العلم مالها علاقة بإيطاليا) ، و كلماري ههه من جد هذي كل منيوات المطاعم كذا .

          الله يعوض عليها إن شاء الله ، عاد الموقع كان جدا حلو حرام الصراحة .

  12. غير معروف

    اقصد الكريمة الخاصة بالطبخ من المراعي

    1. Top Chef

      قشطة وكريمة خفق كلهم نفس الإسم بس بعض الشركات تكتب كذا وبعضهم كذا ..

  13. غير معروف

    الفطر طازج او معلب
    ينفع بدل القشطة اضع كريمة

    1. Top Chef

      دايما دايما دايما معي طازج … فطر معلب ماله طعم فطر …

      وش قصدك ببدل القشطة كريمة ؟؟؟ القشطة اللي أقصد هي قشطة الخفق موب القشطة زي التاج وكذا لأني هذي بعد مستحيل أستخدمها …

  14. ظل الشفق

    أهلا…عندي سؤال !!
    قشطة الخفق قصيرة الاجل ..ما عرفتها؟ هل هي كريمة الخفق…أو القشطة البلدي الطازجة؟
    دورت عليها مالقيتها بها الاسم إلا فرنسية بس مو قصيرة الاجل!!
    وشيء ثاني ..الريحان الطازج موجود بكل مكان(بالراض) ..دايما اشوفه..الدانوب ..التميمي ..الجزيرة..بلشرف<<ما توقعتها عنده!!!!!!!!!! حتى فيه محلات خضرة إلي تجيب من مزارع القصيم وما جاورها ألقاه عندهم !! وفيه سوق الخضرة إلي في الربوة فيه نوادر الفواكة والخضار الطازجة حتى السعودي إلي يبيعها ما يعرف اسمها!!!
    وسوري على الإزعاج!!

    1. Top Chef

      قشطة الخفق تجي نوعين نوع مكتوب عليه طويل الأجل ونوع لأ .. هم نفس الشي وكلهم بالثلاجه بس اللي قصيرة الأجل أطعم بكثير .. غالبا بتكون ماركة المراعي …

      الريحان الطازج شفته في الرياض صح بس في جده أنتي وحظك ..

  15. لمياء

    مره لذيذه مع بساطه مكوناتها ..
    نمبر ون بالنسبه لي وطريقتي فيها نفس طريقتك ..
    كثير يسوونها بس تقلب بدل الفريدو الى فزيتو
    تكون كلها زيت ومافي اثر للصوص ابدااا
    يعطيك العافيه ..

    1. Top Chef

      الطريقة الصحيحة وحده .. بس التأليف هو اللي خلاها تتغير من مكان لمكان …

      الله يعافيك ومشكوره على مرورك ..

  16. ام صبا

    الله يعطيك العافية

    من جد وصفات رهييييييييييييبة

    انا احب اللوبستر مرررررررره ونفسي اجربة

    لكن لما قلت نطبخة وهو حي ….(جاتني دوووووخة )

    يمه اخاااااااااف مره احسه تعذيب .. :(

    اذكر زمااان بابا جاب قباقب وطبخها وهي حيه انا هربت من المطبخ ولا اكلت منها

    مع اني احبها بس اتخيل شكلها وهي تصارخ لين تموت …… ( فيلم رعب)هههه

    1. Top Chef

      الله يعافيك …

      ههههههههه لا تشيلين هم .. لا يصارخ ولا شي .. أصلا يموت بعد ١٠ ثواني من الطبخ .. ولو ما تبين تسلقينه وهو حي تقدرين بس لازم تقسمينه نصين وهو حي ههههه فأختاري عاد ..

  17. ألمآس آلدم

    مسآء آلرضــآ ..

    مآ شآءالله .. تبآرك الله

    ذوق و فن .. ربي يحرسك ..

    أنا شفت موضوع الماكرون في منتدى ومن بعده وأنا أدور وصفاتك ..

    و دايركت للمفضله لأجل نطبقها ^_^

    ربي يسعدك ويوفقك ..

    ننتظر جديدك ..

    تحياتي ..

    1. Top Chef

      مساء النور و السرور …

      مشكورة على مرورك وحياك الله دايما ..

  18. غير معروف

    يسلمو حبيب قلبي ماقصرت الله يعطيك العافية راح اجربهم بما اني جربت الفتوشيني وكانت اول مرة اسويها وكانت رهيييييييييييييييييب بجد ودسمة بقوة لكن تستاهل اطباقك التجربة دائما

    1. Top Chef

      الله يسلمك … مشكوره وبالعافيه مقدما

  1. مهارات التقطيع الأساسية .. Basic Knife Skills » Top Chef Blog .. مدونة توب شيف

    […] عليه في أحجام و أشكال القطع. أحد الأشخاص اللي طبق وصفتي للفيتوشيني ألفريدو واجه هذي المشكلة بإنه لاحظ إن طعم الثوم أقوى من […]

  2. مهارات التقطيع الأساسية .. Basic Knife Skills « مدونة توب شيف … Top Chef

    […] عليه في أحجام و أشكال القطع. أحد الأشخاص اللي طبق وصفتي للفيتوشيني ألفريدو واجه هذي المشكلة بإنه لاحظ إن طعم الثوم أقوى من […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: